အစည်းအဝေး သွားတဲ့အခါ ကျွန်တော်တို့ ဘာကြောင့် သပ်သပ်ရပ်ရပ် ဝတ်စားဖြီးလိမ်းရတာလဲ

ယေဟောဝါသက်သေတွေ အသင်းတော်အစည်းအဝေး တက်တဲ့အခါ သပ်သပ်ရပ်ရပ် ဝတ်စားဖြီးလိမ်းတယ်ဆိုတာ ဒီဘရိုရှာမှာပါတဲ့ပုံတွေမှာ သတိပြုမိပါလိမ့်မယ်။ ဘာကြောင့် ဒီလို သပ်သပ်ရပ်ရပ် ဝတ်စားကြသလဲ။

ဘုရားသခင်ကို လေးစားကြောင်း ပြချင်တဲ့အတွက် ဖြစ်တယ်။ ဘုရားသခင်က ကျွန်တော်တို့ရဲ့ အပြင်ပန်းအသွင်အပြင်ထက် အတွင်းစိတ်သဘောကို အာရုံစိုက်တယ်ဆိုတာ မှန်ပါတယ်။ (၁ ရှမွေလ ၁၆:၇) ဒါပေမဲ့ ဝတ်ပြုဖို့စုဝေးတဲ့အခါ ဘုရားသခင်နဲ့ ဝတ်ပြုသူချင်းတွေကို လေးစားကြောင်း ဖော်ပြလိုကြတယ်။ တရားရုံးကို သွားရမယ်ဆိုရင် တရားသူကြီးရဲ့ရာထူးကို အသိအမှတ်ပြုတဲ့အနေနဲ့ ဖြစ်ကတတ်ဆန်း ဝတ်စားဖြီးလိမ်းမှာ မဟုတ်ပါဘူး။ ဒီလိုပါပဲ အစည်းအဝေးမှာ ဝတ်စားဖြီးလိမ်းပုံအားဖြင့် “မြေတစ်ပြင်လုံးရဲ့ တရားသူကြီး” ယေဟောဝါနဲ့ ဝတ်ပြုတဲ့နေရာကို လေးစားကြောင်း ဖော်ပြကြတယ်။—ကမ္ဘာဦး ၁၈:၂၅။

ကျွန်တော်တို့ လိုက်လျှောက်တဲ့စံနှုန်းကို ဖော်ပြချင်တဲ့အတွက် ဖြစ်တယ်။ သမ္မာကျမ်းစာက ခရစ်ယာန်တွေကို “ဣန္ဒြေရှိရှိ၊ ချင့်ချိန်မှုရှိရှိ” ဝတ်စားဆင်ယင်ပါဆိုပြီး တိုက်တွန်းထားတယ်။ (၁ တိမောသေ ၂:၉၊ ၁၀) ဝတ်စားဆင်ယင်မှုမှာ “ဣန္ဒြေရှိ” တဲ့သူဟာ မြူဆွယ်ရာရောက်တဲ့၊ ဖော်လွန်းတဲ့ ဒါမှမဟုတ် ဝါကြွားရာရောက်တဲ့ အဝတ်အစားတွေကို ဝတ်မှာမဟုတ်ဘူး။ “ချင့်ချိန်မှုရှိ” သူတစ်ယောက်ဆိုရင်လည်း ဖြစ်ကတတ်ဆန်းပုံစံ၊ တစ်ဖက်စွန်းကျတဲ့ပုံစံမျိုး ဝတ်စားမှာမဟုတ်ဘူး။ ဒီလိုမူတွေ ရှိတယ်ဆိုပေမဲ့လည်း ဝတ်စားဆင်ယင်မှုမှာ ရွေးချယ်စရာ အများကြီး ရှိနေပါသေးတယ်။ တင့်တယ်လျောက်ပတ်တဲ့ အသွင်အပြင်က ကျွန်တော်တို့ရဲ့ “ကယ်တင်ရှင် ဘုရားသခင်ရဲ့ သွန်သင်ချက်ကို . . . တင့်တယ်စေနိုင်” ပြီး လူတွေ ‘ဘုရားသခင်ကို ချီးမွမ်း’ အောင် လှုံ့ဆော်ပေးနိုင်တယ်။ (တိတု ၂:၁၀။ ၁ ပေတရု ၂:၁၂) အစည်းအဝေးတွေမှာ သပ်သပ်ရပ်ရပ် ဝတ်စားဖြီးလိမ်းခြင်းက ကျွန်တော်တို့ရဲ့ ဝတ်ပြုရေးအပေါ် တခြားသူတွေရဲ့ ရှုမြင်ပုံကို အကျိုးသက်ရောက်နိုင်တယ်။

အဝတ်အစားကြောင့် ဝတ်ပြုရာခန်းမကိုလာဖို့ တွန့်ဆုတ်တာမျိုး မဖြစ်ပါနဲ့။ သင့်တော်၊ သန့်ရှင်း၊ လျောက်ပတ်တဲ့ အဝတ်အစားလို့ ပြောတဲ့အခါ စျေးကြီးတာ၊ ဆန်းပြားတာဖြစ်ဖို့ မလိုပါဘူး။

• ဘုရားသခင်ကို ဝတ်ပြုကိုးကွယ်တဲ့အခါ ဝတ်စားပုံက ဘာကြောင့် အရေးကြီးသလဲ။

• ကျွန်တော်တို့ရဲ့ ဝတ်စားဖြီးလိမ်းပုံကို ဘယ်မူတွေက လမ်းညွှန်ပေးသလဲ။