ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
ဇွန် ၄-၁၀
ကျမ်းစာထဲက အဖိုးတန်ဘဏ္ဍာများ | မာကု ၁၅-၁၆
“ပရောဖက်ပြုချက်တွေကို ယေရှု ပြည့်စုံစေခဲ့”
(မာကု ၁၅:၃-၅) ပုရောဟိတ်ကြီးတွေကတော့ ယေရှုကို အမျိုးမျိုး စွပ်စွဲနေကြတယ်။ ၄ ပိလတ်မင်းက “မင်းကို ဒီလောက်စွပ်စွဲနေတာ ဘာမှ ပြန်မပြောဘူးလား” ဆိုပြီးမေးတော့လည်း၊ ၅ ယေရှု တစ်ခွန်းမှ ပြန်မပြောတဲ့အတွက် သူအံ့ဩသွားတယ်။
(မာကု ၁၅:၂၄) အဲဒီနောက် သူတို့က ယေရှုကို သစ်တိုင်ပေါ်တင်ပြီး သံနဲ့ရိုက်ကြတယ်။ ဝတ်လုံတွေကိုတော့ ဘယ်သူ ဘာယူမယ်ဆိုတာ သိနိုင်ဖို့ မဲချပြီး ခွဲယူကြတယ်။
(မာကု ၁၅:၂၉၊ ၃၀) ဖြတ်သန်းသွားလာသူတွေက ယေရှုကို ကဲ့ရဲ့ကြတယ်။ ခေါင်းတခါခါ လုပ်ပြီး “ဗိမာန်တော်ကို ဖြိုဖျက်ပြီး သုံးရက်အတွင်း ပြန်ဆောက်မယ့်လူ၊ ၃၀ သစ်တိုင်ပေါ်ကနေ ဆင်းခဲ့လေ။ ကိုယ့်ကိုယ်ကိုယ် ကယ်တင်လိုက်လေ” လို့ ပြောကြတယ်။
nwtsty မာ ၁၅:၂၄၊ ၂၉ လေ့လာမှု မှတ်စု
ဝတ်လုံတွေကို ခွဲယူကြတယ်– မဿဲ၊ မာကုနဲ့ လုကာတို့ မဖော်ပြတဲ့ အသေးစိတ်အချက်အလက်တွေကို ယဟ ၁၉:၂၃၊ ၂၄ မှာ ဖြည့်စွက်ထားတယ်– အတွင်းနဲ့ အပြင်ဝတ်လုံ နှစ်ခုစလုံးကို ရောမစစ်သားတွေက မဲချယူကြတာ ထင်ရှားတယ်။ စစ်သားတွေက “ဝတ်လုံတွေကို လေးပိုင်းပိုင်းပြီး တစ်ယောက်တစ်ပိုင်းစီ ယူတယ်။” အတွင်းဝတ်လုံကိုတော့ မပိုင်းဘဲ မဲချယူတယ်။ မေရှိယရဲ့ အဝတ်ကို မဲချယူကြတာက ဆ ၂၂:၁၈ ကို ပြည့်စုံစေတယ်။ ကွပ်မျက်သူတွေက အသတ်ခံရမယ့်သူတွေရဲ့ အဝတ်တွေကို ယူကြတဲ့ ထုံးစံရှိပုံရတဲ့အတွက် အသတ်မခံရခင် အဝတ်တွေကို ချွတ်ခိုင်းပြီး ပစ္စည်းဥစ္စာတွေကို သိမ်းယူကြတယ်။ အဲဒီလိုလုပ်တာက ပိုအရှက်ကွဲစေတယ်။
ခေါင်းတခါခါ လုပ်ပြီး– ဒီအမူအရာနဲ့ရော စကားနဲ့ပါ အထင်သေးကြောင်း လှောင်ပြောင်သရော်ကြတယ်။ ဒီလိုနည်းနဲ့ ဖြတ်သန်း သွားလာသူတွေဟာ ဆ ၂၂:၇ မှာပါတဲ့ ပရောဖက်ပြုချက်ကို ပြည့်စုံစေကြတယ်။
(မာကု ၁၅:၄၃) အရိမသဲမြို့သား ယောသပ်က ပိလတ်မင်းကို အရဲစွန့် ဝင်တွေ့ပြီး ယေရှုအလောင်းကို တောင်းတယ်။ ယောသပ်ဟာ ဂုဏ်အသရေရှိသူ ကောင်စီအဖွဲ့ဝင်ဖြစ်ပြီး ဘုရားသခင့် နိုင်ငံတော်ကို စောင့်မျှော်နေသူပဲ။
(မာကု ၁၅:၄၆) ယောသပ်က ယေရှုရဲ့အလောင်းကို သစ်တိုင်ပေါ်ကချ၊ ဝယ်လာတဲ့ပိတ်ချောနဲ့ ပတ်ရစ်ပြီး ကျောက်ဆောင်ထဲထွင်းထားတဲ့ သင်္ချိုင်းဂူထဲ ထည့်တယ်။ အဲဒီနောက် ကျောက်တုံးကို လှိမ့်ပြီး ဂူဝကို ပိတ်လိုက်တယ်။
nwtsty မာ ၁၅:၄၃ လေ့လာမှု မှတ်စု
ယောသပ်– ခရစ်ဝင်ကျမ်းရေးသူတွေမှာ ထူးခြားတဲ့အရည်အသွေး ကိုယ်စီရှိမှန်း ယောသပ်နဲ့ပတ်သက်ပြီး တစ်မျိုးစီ ဖော်ပြပုံကနေ သိရတယ်။ ဥပမာ၊ အခွန်ခံမဿဲက ယောသပ်ကို “သူဌေး” လို့ဖော်ပြတယ်။ ရောမလူတွေအတွက် ရည်ရွယ်ပြီးရေးသားသူ မာကုက ယောသပ်ဟာ ဘုရားနိုင်ငံတော်ကို စောင့်မျှော်နေတဲ့ “ဂုဏ်အသရေရှိသူ ကောင်စီအဖွဲ့ဝင်” ဖြစ်တယ်လို့ ဖော်ပြတယ်။ သနားစာနာတတ်တဲ့ သမားတော်လုကာက ယောသပ်ဟာ ယေရှုကိုအတိုက်အခံလုပ်တဲ့ ကောင်စီအဖွဲ့နဲ့ သဘောမတူသူ၊ “လူကောင်း၊ ဖြောင့်မတ်တဲ့သူ” ဖြစ်တယ်လို့ ဖော်ပြတယ်။ ယောသပ်ဟာ “ဂျူးတွေကိုကြောက်လို့ ယေရှုရဲ့တပည့်ဖြစ်မှန်း လူသိမခံရဲတဲ့သူ” လို့ ယောဟန်တစ်ယောက်တည်းကပဲ ဆိုတယ်။”—မ၊ ၂၇:၅၇-၆၀။ မာ ၁၅:၄၃-၄၆။ လု ၂၃:၅၀-၅၃။ ယဟ ၁၉:၃၈-၄၂။
ရှာဖွေလေ့လာ ဘုရားရေးရာရတနာ
(မာ ၁၅:၂၅) မနက် ၉ နာရီလောက်မှာ ယေရှုကို သစ်တိုင်ပေါ်တင်ပြီး သံနဲ့ရိုက်ကြတယ်။
nwtsty မာ ၁၅:၂၅ လေ့လာမှု မှတ်စု
မနက် ၉ နာရီ– ပိလတ်မင်းက ယေရှုကို ကွပ်မျက်ဖို့ အပ်လိုက်တဲ့အချိန်ဟာ “နေ့လယ် ၁၂ နာရီလောက်ရှိပြီ” လို့ ယောဟန် ၁၉:၁၄-၁၆ မှာဆိုတာကို တချို့ ထောက်ပြကြတယ်။ ဒီခြားနားချက်ကို ကျမ်းစာက အပြည့်အဝ မရှင်းပြပေမဲ့ ထည့်တွက်စရာ တချို့က– ယေရှုရဲ့ မြေကြီးအသက်တာ နောက်ဆုံးနေ့မှာဖြစ်ခဲ့တဲ့ အဖြစ်အပျက်တွေရဲ့ အချိန်နဲ့ပတ်သက်ပြီး ခရစ်ဝင်ကျမ်း မှတ်တမ်းတွေဟာ ညီညွတ်မှုရှိပါတယ်။ လေးကျမ်းစလုံးက ပုရောဟိတ်တွေနဲ့ အကြီးအကဲတွေဟာ နံနက်မှာ တွေ့ဆုံ စည်းဝေးကြပြီး ယေရှုကို ရောမဘုရင်ခံ ပိလတ်လက်ထဲ အပ်လိုက်တယ်လို့ ဖော်ပြတယ်။ (မ ၂၇:၁၊ ၂။ မာ ၁၅:၁။ လု ၂၂:၆၆–၂၃:၁။ ယဟ ၁၈:၂၈) မဿဲ၊ မာကုနဲ့ လုကာက ယေရှု သစ်တိုင်ပေါ် တင်ခံရတဲ့အချိန် “မွန်းတည့် ၁၂ နာရီ . . . ကနေ မွန်းလွဲ ၃ နာရီအထိ” တစ်ပြည်လုံး အမှောင်ကျသွားတယ်လို့ ဖော်ပြတယ်။ (မ. ၂၇:၄၅၊ ၄၆။ မာ. ၁၅:၃၃၊ ၃၄။ လု. ၂၃:၄၄) ယေရှု ကွပ်မျက်ခံရချိန်ကို ဖော်ပြရာမှာ ထည့်စဉ်းစားနိုင်တဲ့ အချက်တစ်ချက်က– ကျာပွတ်နဲ့ရိုက်တာကို ကွပ်မျက်တဲ့ လုပ်ရပ်အဖြစ် ယူမှတ်တာ ဖြစ်နိုင်တယ်။ တစ်ခါတလေ ကျာပွတ်နဲ့ရိုက်တာ ပြင်းထန်လွန်းလို့ ရာဇဝတ်သားက အဲဒီမှာပဲ သေဆုံးသွားတယ်။ ယေရှု အဖြစ်မှာတော့ သစ်တိုင်ကို မထမ်းနိုင်တော့လို့ တခြားသူကို ထမ်းခိုင်းရတဲ့အထိပဲ။ (လု ၂၃:၂၆။ ယဟ ၁၉:၁၇) ယေရှုကို ကျာပွတ်နဲ့ရိုက်ပြီး အတော်လေးကြာမှ အမှန်တကယ် သစ်တိုင်ပေါ်တင်ပြီး သံနဲ့ရိုက်တာ ဖြစ်မယ်။ မ ၂၇:၂၆ နဲ့ မာ ၁၅:၁၅ က အဲဒီအချက်ကို ထောက်ခံတယ်၊ ယေရှုကို ကျာပွတ်နဲ့ရိုက်စေပြီး သစ်တိုင်ပေါ်မှာ ကွပ်မျက်ဖို့ အပ်လိုက်တယ်လို့ ဖော်ပြထားတယ်။ သူတို့တစ်ဦးစီရဲ့ ရှုမြင်ပုံပေါ်မူတည်ပြီး တစ်မျိုးစီဖော်ပြတာ ဖြစ်နိုင်တယ်။ ဒါကြောင့် သစ်တိုင်တင်ခံရပြီး မကြာခင်မှာပဲ ယေရှု အသက်ထွက်သွားတာကို ပိလတ် အံ့သြသွားတာ ဖြစ်နိုင်တယ်။ (မာ ၁၅:၄၄) အဲဒီအပြင် ညအချိန်ကို သုံးနာရီစီ လေးပိုင်းပိုင်းသလို နေ့အချိန်ကိုလည်း ပိုင်းတဲ့ထုံးစံအကြောင်း ကျမ်းရေးသူတွေ မကြာခဏ ဖော်ပြတတ်တယ်။ ဒါကြောင့် နေထွက်တဲ့ နံနက် ၆ နာရီကစပြီး မနက် ၉ နာရီ၊ နေ့လယ် ၁၂ နာရီ၊ ညနေ ၃ နာရီဆိုပြီး ကိုးကားဖော်ပြတာ ဖြစ်မယ်။ (မ ၂၀:၁-၅။ ယဟ ၄:၆။ တ ၂:၁၅။ ၃:၁။ ၁၀:၃၊ ၉၊ ၃၀) အဲဒီအပြင် လူအများမှာ အချိန်ကို အတိအကျ ဖော်ပြတဲ့ နာရီမရှိလို့ ယဟ ၁၉:၁၄ မှာလို “လောက်” ဆိုပြီး ပြောတတ်ကြတယ်။ (မ ၂၇:၄၆။ လု ၂၃:၄၄။ ယဟ ၄:၆။ တ ၁၀:၃၊ ၉) အချုပ်ဆိုရရင် မာကုက ကျာပွတ်နဲ့ရိုက်ပြီး သစ်တိုင်ပေါ်တင် သံနဲ့ရိုက်တာ နှစ်ခုစလုံးကို ဖော်ပြပေမဲ့ ယောဟန်ကတော့ သစ်တိုင်ပေါ်တင် သံနဲ့ရိုက်တာကိုပဲ ဖော်ပြတာ ဖြစ်နိုင်တယ်။ ကျမ်းရေးသူနှစ်ဦးက တစ်နေ့တာရဲ့ သုံးနာရီပိုင်းထားတဲ့ အနီးဆုံးအချိန်ကို ဖော်ပြပြီး ယောဟန်ကျတော့ သူဖော်ပြတဲ့အချိန်ကို “လောက်” ဆိုပြီး ကိုးကားဖော်ပြတာ ဖြစ်မယ်။ အဆိုပါအချက်တွေကြောင့် သူတို့ရဲ့ ကျမ်းမှတ်တမ်းတွေမှာ ဖော်ပြတဲ့အချိန် မတူတာဖြစ်နိုင်တယ်။ မာကုကျမ်းရေးပြီးနောက် ဆယ်စုနှစ်ချီကြာပြီးမှ ယောဟန်ကျမ်းကို ရေးခဲ့တာဖြစ်တယ်။ ယောဟန်နဲ့ မာကုတို့ဟာ အချိန်ဖော်ပြပုံချင်း မတူကြဘူး။ ဒီအချက်က မာကုရဲ့ မှတ်တမ်းကို ယောဟန် ကူးမရေးဘူးဆိုတာ ဖော်ပြတယ်။
(မာကု ၁၆:၈) သူတို့လည်း စိတ်လှုပ်ရှားလွန်းတော့ ကတုန်ကယင်ဖြစ်ပြီး သင်္ချိုင်းဂူထဲကနေ ထွက်ပြေးသွားကြတယ်။ ကြောက်လွန်းလို့ ဘယ်သူ့ကိုမှ မပြောပြရဲဘူး။
nwtsty မာ ၁၆:၈ လေ့လာမှု မှတ်စု
ကြောက်လွန်းလို့– ရှေးအကျဆုံး လက်ရေးစာမူတွေမှာ မာကုကျမ်းကို အခန်းငယ် ၈ ပါ စကားတွေနဲ့ နိဂုံးချုပ်ထားတယ်။ မာကုကျမ်းကို ဒီလို တိုတိုတုတ်တုတ် နိဂုံးချုပ်တာက မူရင်းနိဂုံး မဖြစ်နိုင်ဘူးလို့ တချို့က ဆိုတယ်။ ဒါပေမဲ့ မာကု ရေးသားပုံက အများအားဖြင့် ကျစ်လျစ်တဲ့အတွက် အဲဒီလို ပြောတာဟာ မခိုင်လုံပါဘူး။ အဲဒီအပြင် လေးရာစုက ပညာရှင် ဂျရုမ်းနဲ့ ယူစီးဘီးယပ်စ်တို့က သူတို့ “ကြောက်လွန်းလို့” ဆိုတဲ့စကားနဲ့ မူရင်းကျမ်းကို နိဂုံးချုပ်ထားတယ်လို့ ဖော်ပြတယ်။
ဂရိလက်ရေးစာမူနဲ့ ဘာသာပြန်ကျမ်းတချို့က အခန်းငယ် ၈ ပြီးနောက် နိဂုံးအတိုနဲ့ အရှည်ကိုပါ ထပ်ထည့်ပေးတယ်။ (အခန်းငယ်အပို ၁၂ ခုပါတဲ့) နိဂုံးရှည်ကို အေဒီ ငါးရာစုက ကိုဒက် အလက်ဇန္ဒြီးနပ်စ်၊ ကိုဒက် အဲဖရီမီဆီရီ လက်ရေးစာမူနဲ့ ကိုဒက် ဘီဇေး ကန်တာဘရီဂျီအန်စစ် လက်ရေးစာမူတွေမှာ တွေ့ရတယ်။ လက်တင်ဗားလ်ဂိတ်၊ ကွပ်ခ်တိုနီယန်ဆီးရီးယား စာမူနဲ့ ဆီးရီးယားပက်ရှီတာကျမ်း မှာလည်း တွေ့ရတယ်။ ဒါပေမဲ့ လေးရာစုက ဂရိလက်ရေးစာမူ နှစ်ခုဖြစ်တဲ့ ကိုဒက် ဆိုင်းနိုင်းတိကပ်စ်နဲ့ ကိုဒက် ဗက်တီကင် စာမူ၊ လေးရာစု ဒါမှမဟုတ် ငါးရာစုက ကိုဒက် ဆိုင်းနိုင်းတိကပ်စ် ဆီးရီးယားကပ်စ် စာမူတွေမှာတော့ မတွေ့ရဘူး။ ငါးရာစုက ဆဟီဒစ်ကော့ပ်တစ် မာကုကျမ်း စာမူမှာလည်း မပါဘူး။ အဲဒီလိုပဲ ရှေးအကျဆုံး အာမေးနီးယားနဲ့ ဂျော်ဂျီယာလို မာကုကျမ်း လက်ရေးစာမူတွေမှာလည်း အခန်းငယ် ၈ နဲ့ပဲ နိဂုံးချုပ်ထားတယ်။
နောက်ပိုင်းမှ ထွက်လာတဲ့ ဂရိလက်ရေးစာမူနဲ့ ဘာသာပြန်ကျမ်းတချို့မှာ (ဝါကျအနည်းငယ်ပဲပါတဲ့) နိဂုံးတို ပါတယ်။ အေဒီရှစ်ရာစုက ကိုဒက် ရီးဂျီးယပ်စ် စာမူမှာတော့ နိဂုံးအတိုရော အရှည်ပါ ပါတယ်။ နိဂုံးအတိုကို အရင်ဖော်ပြပေးတယ်။ နိဂုံးနှစ်ခုစလုံးရဲ့ အမှာစကားမှာ အဲဒီစာပိုဒ်တွေကို တချို့လက်ခံထားပေမဲ့ ကျမ်းစစ်ကျမ်းမှန်လို့ အသေအချာ မသိနိုင်ကြောင်း အသိအမှတ်ပြုထားတယ်။
နိဂုံးတို
မာကု ၁၆:၈ နောက်က နိဂုံးတိုဟာ စွမ်းအားတော်လမ်းညွှန်မှုနဲ့ ရေးသားတဲ့ ကျမ်းစာရဲ့ အစိတ်အပိုင်းမဟုတ်ပါ။ အဲဒါက အောက်ပါအတိုင်းဖြစ်တယ်-
သူတို့သည် မိန့်မှာခဲ့သမျှကို ပေတရုနှင့် အပေါင်းပါရှိသမျှတို့အား အတိုချုပ်ပြောကြားကြ၏။ ထို့ပြင် ယေရှုကိုယ်တော်တိုင်သည် တပည့်တော်တို့ကို စေလွှတ်၍ သန့်ရှင်းသော၊ မဖောက်ပြန်မပျက်စီးတတ်သော ထာဝရကယ်တင်ခြင်းသတင်းကို အရှေ့အရပ်မှ အနောက်အရပ်တိုင်အောင် ပျံ့နှံ့စေတော်မူ၏။
နိဂုံးရှည်
မာကု ၁၆:၈ နောက်က နိဂုံးရှည်ဟာ စွမ်းအားတော်လမ်းညွှန်မှုနဲ့ ရေးသားတဲ့ ကျမ်းစာရဲ့ အစိတ်အပိုင်းမဟုတ်ပါ။ အဲဒါက အောက်ပါအတိုင်းဖြစ်တယ်–
၉ ယေရှုသည် သီတင်းပတ်တွင် ပထမနေ့ နံနက်စောစော အချိန်၌ ထမြောက်ပြီးနောက် မာဂဒလမာရိအား ဦးစွာ ကိုယ်ကိုထင်ရှားပြတော်မူ၏။ ထိုမာရိထံမှ နတ်ဆိုးခုနစ်ကောင်ကို ကိုယ်တော် နှင်ထုတ်ပေးခဲ့ဖူး၏။ ၁၀ မာရိသည် သွား၍ တပည့်တော်များ ညည်းတွားငိုကြွေးလျက်နေကြစဉ် သူတို့အား သတင်းပြောကြားလေ၏။ ၁၁ ကိုယ်တော်သည် အသက်ရှင်ပြန်တော်မူကြောင်း၊ မာရိသည် ကိုယ်တော်အား မြင်ခဲ့ကြောင်းတို့ကို ထိုသူတို့သည်ကြားလျှင် မယုံကြ။ ၁၂ ထို့နောက် တပည့်တော်နှစ်ပါးတို့သည် တောရွာသို့သွားနေကြစဉ် ကိုယ်တော်သည် အသွင်တစ်မျိုးဖြင့် ကိုယ်ကိုပြတော်မူ၏။ ၁၃ ထိုသူတို့သည် ပြန်လာ၍ ကျန်သူတို့အား သတင်းပြောကြားကြ၏။ သို့သော် သူတို့ကိုလည်း မယုံကြ။ ၁၄ ထို့နောက် ကိုယ်တော်သည် တစ်ဆယ့်တစ်ပါးသောသူတို့ စားပွဲ၌လျောင်းကြစဉ် ထင်ရှားတော်မူ၏။ သေခြင်းမှ ထမြောက်တော်မူပြီးနောက် ကိုယ်တော်ကို မြင်သောသူတို့၏စကားကို မယုံသောကြောင့် သူတို့၏ယုံကြည်ခြင်းကင်းမဲ့မှု၊ စိတ်နှလုံးခိုင်မာမှုတို့ကို ပြစ်တင်ဆုံးမတော်မူပြီး၊ ၁၅ သူတို့အား “သင်တို့သည် တစ်လောကလုံးသို့သွား၍ လူအပေါင်းတို့အား သတင်းကောင်း ဟောပြောကြလော့။ ၁၆ ယုံကြည်၍ နှစ်ခြင်းခံသောသူသည် ကယ်တင်ခံရလိမ့်မည်။ မယုံကြည်သောသူမူကား အပြစ်စီရင်ခံရလိမ့်မည်။ ၁၇ ထို့ပြင် ယုံကြည်သောသူတို့ပြမည့် နိမိတ်လက္ခဏာများကား၊ ငါ၏နာမကိုအမှီပြု၍ နတ်ဆိုးတို့ကို နှင်ထုတ်ကြလိမ့်မည်။ ဘာသာစကားအမျိုးမျိုးတို့ကို ပြောကြလိမ့်မည်။ ၁၈ မြွေတို့ကို ဖမ်းကိုင်ကြလိမ့်မည်။ သေစေတတ်သောအဆိပ်ကို သောက်မိလျှင်လည်း ဘေးကင်းကြလိမ့်မည်။ မကျန်းမာသူတို့အပေါ်မှာ လက်ကိုတင်၍ ကျန်းမာစေကြလိမ့်မည်” ဟုမိန့်တော်မူ၏။
၁၉ သခင်ယေရှုသည် ထိုသို့မိန့်တော်မူပြီးနောက် ကောင်းကင်ဘုံသို့ ချီဆောင်ခံရ၍ ဘုရားသခင်၏လက်ယာတော်ဘက်၌ ထိုင်နေတော်မူ၏။ ၂၀ တပည့်တော်တို့သည်လည်း ထွက်သွား၍ ခပ်သိမ်းသောအရပ်၌ ဟောပြောကြ၏။ သခင်သည်လည်း သူတို့နှင့်အတူ လုပ်ဆောင်လျက် သူတို့ပြသော နိမိတ်လက္ခဏာများအားဖြင့် သတင်းတရားကို တည်စေတော်မူ၏။
ကျမ်းစာဖတ်ရှုခြင်း
(မာကု ၁၅:၁-၁၅) မနက်မိုးလင်းတာနဲ့ ပုရောဟိတ်ကြီးတွေ၊ အကြီးအကဲတွေ၊ ကျမ်းတတ်တွေပါတဲ့ ဂျူးတရားရုံးချုပ် အဖွဲ့ဝင်အားလုံး တိုင်ပင်ကြတယ်။ အဲဒီနောက် ယေရှုကို ချည်နှောင်ပြီး ပိလတ်မင်းဆီ အပ်လိုက်တယ်။ ၂ ပိလတ်မင်းက “မင်းဟာ ဂျူးတွေရဲ့ဘုရင် ဟုတ်သလား” လို့မေးတော့ ယေရှုက “မင်းကြီးပြောတာ အမှန်ပဲ” လို့ဖြေတယ်။ ၃ ပုရောဟိတ်ကြီးတွေကတော့ ယေရှုကို အမျိုးမျိုး စွပ်စွဲနေကြတယ်။ ၄ ပိလတ်မင်းက “မင်းကို ဒီလောက်စွပ်စွဲနေတာ ဘာမှ ပြန်မပြောဘူးလား” ဆိုပြီးမေးတော့လည်း၊ ၅ ယေရှု တစ်ခွန်းမှ ပြန်မပြောတဲ့အတွက် သူအံ့ဩသွားတယ်။ ၆ ပွဲတော်နေ့ရောက်တိုင်း ပိလတ်မင်းက လူတွေတောင်းဆိုတဲ့ အကျဉ်းသားတစ်ယောက်ကို လွှတ်ပေးတဲ့ထုံးစံ ရှိတယ်။ ၇ အဲဒီအချိန်မှာ ဗာရဗ္ဗလို့ခေါ်တဲ့ လူတစ်ယောက်ဟာ သူပုန်တွေနဲ့အတူ ထောင်ကျနေတယ်။ သူတို့ဟာ ပုန်ကန်ထကြွပြီး လူသတ်မှု ကျူးလွန်ခဲ့သူတွေပဲ။ ၈ လူတွေက စုဝေးလာပြီး ထုံးစံရှိတဲ့အတိုင်း အကျဉ်းသားတစ်ယောက် လွှတ်ပေးဖို့ တောင်းဆိုကြတယ်။ ၉ ပိလတ်မင်းက “ဂျူးတွေရဲ့ဘုရင်ကို လွှတ်စေချင်သလား” ဆိုပြီး လူတွေကို ပြန်မေးတယ်။ ၁၀ ပုရောဟိတ်ကြီးတွေက ယေရှုကို မနာလိုစိတ်နဲ့ အခုလို အပ်လိုက်မှန်း ပိလတ်မင်း ရိပ်မိတယ်။ ၁၁ ပုရောဟိတ်ကြီးတွေက ယေရှုအစား ဗာရဗ္ဗကို လွှတ်ပေးပါလို့ တောင်းဆိုဖို့ လူအုပ်ကို လှုံ့ဆော်ထားတယ်။ ၁၂ ပိလတ်မင်းက “ဒါဆိုရင် ဂျူးတွေရဲ့ဘုရင်ဆိုပြီး မင်းတို့ပြောနေတဲ့ ဒီလူကို ငါဘယ်လိုလုပ်ရမလဲ” လို့ထပ်မေးတော့၊ ၁၃ “သစ်တိုင်ပေါ် တင်လိုက်ပါ” လို့ အော်ကြပြန်တယ်။ ၁၄ ပိလတ်မင်းက “ဘာဖြစ်လို့လဲ။ သူ ဘာမကောင်းတာ လုပ်ခဲ့လို့လဲ” ဆိုပြီး ထပ်မေးတဲ့အခါ သူတို့က “သူ့ကို သစ်တိုင်ပေါ် တင်လိုက်ပါ” လို့ပဲ အသံကုန်အော်ကြတယ်။ ၁၅ အဲဒီအခါ လူတွေကို လိုက်လျောပေးချင်တဲ့ ပိလတ်မင်းက ဗာရဗ္ဗကို လွှတ်ပေးလိုက်တယ်။ ယေရှုကိုတော့ ကျာပွတ်နဲ့ ရိုက်စေပြီး သစ်တိုင်ပေါ်မှာ ကွပ်မျက်ဖို့ အပ်လိုက်တယ်။
ဇွန် ၁၁-၁၇
ကျမ်းစာထဲက အဖိုးတန်ဘဏ္ဍာများ | လုကာ ၁
“မာရိရဲ့ နှိမ့်ချမှုကို အတုယူပါ”
(လုကာ ၁:၃၈) အဲဒီအခါ မာရိက “ကျွန်မဟာ ယေဟောဝါဘုရားရဲ့ အစေခံပါ။ သခင်ပြောတဲ့အတိုင်း ဖြစ်လာပါစေ” လို့ပြောတော့ ကောင်းကင်တမန်လည်း ထွက်သွားတယ်။
“ကျွန်မသည် ယေဟောဝါဘုရား၏ကျွန်မ ဖြစ်ပါ၏”
၁၂ နှိမ့်ချမှုနဲ့နာခံမှု အပြည့်ရှိတဲ့ မာရိရဲ့စကားတွေကို ဒီနေ့ခေတ်လူအများ သိကြတယ်။ “ကျွန်မသည် ယေဟောဝါဘုရား၏ကျွန်မ ဖြစ်ပါ၏။ အရှင့်စကားအတိုင်း ကျွန်မ၌ ဖြစ်ပါစေ” လို့ဂါဗြေလကို သူပြောခဲ့တယ်။ (လု. ၁:၃၈) ကျွန်မဆိုတာ နိမ့်ကျတဲ့အစေခံ၊ သခင်စေခိုင်းသလို လုပ်ရတဲ့သူဖြစ်တယ်။ မာရိလည်း သူ့ရဲ့သခင် ယေဟောဝါဘုရားအလိုအတိုင်း လုပ်လိုစိတ်ရှိတယ်။ ဘုရားသခင်ဟာ ကိုယ်တော့်အပေါ်သစ္စာစောင့်သူတွေကို ကာကွယ်ပေးတယ်။ ကိုယ်တော့်လက်အောက်မှာ လုံခြုံတယ်ဆိုတာ သူသိထားတယ်။ ဒီခက်ခဲတဲ့တာဝန်ကို အတတ်နိုင်ဆုံးထမ်းဆောင်ရင် ကိုယ်တော် ကောင်းချီးပေးမယ်ဆိုတာလည်း မာရိကောင်းကောင်းသိထားတယ်။—ဆာ. ၃၁:၂၃။
(လုကာ ၁:၄၆-၅၅) အဲဒီအခါ မာရိက “ယေဟောဝါ ဘုရားကို ကျွန်မ ဂုဏ်တင်ချီးမွမ်းပါတယ်။ ၄၇ ကျွန်မရဲ့ကယ်တင်ရှင် ဘုရားသခင်ကြောင့် ရင်ထဲမှာ ပျော်လို့ မဆုံးဘူး။ ၄၈ ဘုရားက ကျွန်မရဲ့ နိမ့်ကျတဲ့အဖြစ်ကို မြင်ပြီ။ အခုကစပြီး လူမျိုးအဆက်ဆက်က ကျွန်မကို ပျော်ရွှင်ချမ်းမြေ့သူလို့ ခေါ်ကြတော့မယ်။ ၄၉ တန်ခိုးနဲ့ပြည့်စုံတဲ့အရှင်က ကျွန်မအတွက် အံ့ဖွယ်အမှုတွေ လုပ်ဆောင်ပေးတာကိုး။ နာမတော်ဟာ သန့်ရှင်းမြင့်မြတ်တယ်။ ၅၀ ဘုရားက သူ့ကို ကြောက်ရွံ့ရိုသေသူတွေကို လူမျိုးအဆက်ဆက် ကရုဏာပြတယ်။ ၅၁ လက်ရုံးတော်နဲ့ တန်ခိုးပြတယ်။ မောက်မာတဲ့စိတ်နဲ့ ကြံစည်သူတွေကိုတော့ တကွဲတပြား ဖြစ်စေတယ်။ ၅၂ မင်းအရာရှိတွေကို နန်းချပြီး နိမ့်ကျသူတွေကို ချီးမြှောက်တယ်။ ၅၃ ဆာလောင်နေသူတွေကို ကောင်းမွန်ရာတွေ ဖြည့်ဆည်းပေးပြီး ချမ်းသာကြွယ်ဝသူတွေကို လက်ချည်းလွှတ်လိုက်တယ်။ ၅၄ ဘုရားသခင်က ဘိုးဘေးတွေကို ပြောခဲ့တဲ့အတိုင်း မိမိကျွန် အစ္စရေးလူမျိုးကို မစတယ်။ ၅၅ အာဗြဟံနဲ့ သူ့မျိုးနွယ်ကို အမြဲကရုဏာပြမယ်လို့ ကတိပေးခဲ့တဲ့အတိုင်း အဲဒီကတိကို မမေ့ဘူးဆိုတာ ပြလိုက်တာပဲ” လို့ပြောတယ်။
“ကျွန်မသည် ယေဟောဝါဘုရား၏ကျွန်မ ဖြစ်ပါ၏”
၁၅ မာရိ ပြန်ပြောတဲ့စကားတွေကို ကျမ်းစာမှာ သေသေချာချာ မှတ်တမ်းတင်ထားတယ်။ (လုကာ ၁:၄၆-၅၅ ကိုဖတ်ပါ။) ဒါဟာ ကျမ်းစာမှာတွေ့ရတဲ့ မာရိရဲ့ အရှည်ဆုံးစကားဖြစ်ပြီး အဲဒီကနေ သူ့အကြောင်း အများကြီးသိရတယ်။ မာရိဟာ မေရှိယရဲ့မိခင်ဖြစ်ရတဲ့အခွင့်ထူးအတွက် ယေဟောဝါဘုရားကို ချီးမွမ်းခဲ့တယ်။ အဲဒီမှာ သူ့ရဲ့ကျေးဇူးတင်လေးမြတ်တတ်တဲ့စိတ် ပေါ်လွင်နေပါတယ်။ ဘုရားသခင်ဟာ မောက်မာသူ၊ အာဏာရှိသူတွေကို ရှုတ်ချပြီး ကိုယ်တော့်ကိုဝတ်ပြုတဲ့ နိမ့်ကျသူ၊ ဆင်းရဲသူတွေကို ကူညီတဲ့အကြောင်း ပြောထားတဲ့အတွက် သူ့ရဲ့နက်ရှိုင်းတဲ့ယုံကြည်ခြင်း ပေါ်လွင်နေတယ်။ အဲဒီအပြင် သူ့မှာ အသိပညာ ဘယ်လောက်များတယ်ဆိုတာကိုလည်း သိရတယ်။ ခန့်မှန်းချက်တစ်ခုအရ သူဟာ ဟေဗြဲကျမ်းထဲကစကားတွေကို အကြိမ် ၂၀ ကျော် အသုံးပြုခဲ့တယ်။
၁၆ မာရိဟာ ကျမ်းစာကို လေးလေးနက်နက် တွေးတောဆင်ခြင်ခဲ့တဲ့အတွက် ပြောစရာကိုယ်ပိုင်အတွေးအခေါ်တွေ အများကြီးရှိမှာပဲ။ ဒါပေမဲ့ သူဟာ နှိမ့်ချမှုရှိရှိနဲ့ ကျမ်းစကားတွေကိုပဲ ပြောခဲ့တယ်။ သူ့ရဲ့သားအိမ်ထဲမှာကြီးထွားနေတဲ့ သားဟာလည်း နောက်ပိုင်းမှာ သူ့လိုပဲ နှိမ့်ချမှုရှိရှိနဲ့ “ငါသွန်သင်သော တရားသည် ငါ၏တရားမဟုတ်၊ ငါ့ကို စေလွှတ်တော်မူသောအရှင်၏ တရားတော်ဖြစ်၏” လို့ပြောခဲ့တယ်။ (ယော. ၇:၁၆) ကျွန်ုပ်တို့လည်း ကိုယ့်ကိုယ်ကိုယ် ဒီလိုမေးသင့်ပါတယ်– ‘ငါဟာ သမ္မာကျမ်းစာကို မာရိလို ရိုသေလေးမြတ်သလား။ ဒါမှမဟုတ် ကိုယ့်အယူအဆ၊ ကိုယ့်သွန်သင်ချက်တွေကို ပိုနှစ်သက်နေသလား။’ မာရိမှာ မှန်ကန်တဲ့စိတ်သဘောထားရှိတယ်ဆိုတာ ထင်ရှားပါတယ်။
ရှာဖွေလေ့လာ ဘုရားရေးရာရတနာ
(လုကာ ၁:၆၉) ငါတို့အတွက် တန်ခိုးကြီးတဲ့ ကယ်တင်ရှင်ကို မိမိကျွန်ဒါဝိဒ်ရဲ့ မျိုးနွယ်ထဲက ပေါ်ထွန်းစေပြီ။
nwtsty လုကာ ၁:၆၉၊ အောက်ခြေမှတ်ချက် လေ့လာမှု မှတ်စု
ကယ်တင်ခြင်း ဦးချို– ဒါမှမဟုတ် “တန်ခိုးကြီးတဲ့ ကယ်တင်ရှင်။” ကျမ်းစာထဲမှာ တိရစ္ဆာန်ချိုတွေက အစွမ်းခွန်အား၊ အောင်ပွဲခံခြင်း စတာကို ကိုယ်စားပြုတယ်။ (၁ ရှ ၂:၁။ ဆ ၇၅:၄၊ ၅၊ ၁၀။ ၁၄၈:၁၄၊ အောက်ခြေမှတ်ချက်။) အဲဒီအပြင် အုပ်စိုးရှင်တွေ၊ မင်းဆက်တွေ၊ ဖြောင့်မတ်သူ၊ မဖြောင့်မတ်သူတွေကို ချိုတွေနဲ့ တင်စားဖော်ပြတယ်။ သူတို့အောင်ပွဲခံတာကို ချိုတွေနဲ့ တွန်းတယ်၊ ဝှေ့တယ်ဆိုပြီး ဖော်ပြတယ်။ (တရ ၃၃:၁၇။ ဒံ ၇:၂၄။ ၈:၂-၁၀၊ ၂၀-၂၄) ဒီကျမ်းချက်တွေရဲ့ ရှေ့နောက်စကားအရ “တန်ခိုးကြီးတဲ့ ကယ်တင်ရှင်” ဆိုတာ ကယ်တင်နိုင်တဲ့ တန်ခိုးကြီးသူ မေရှိယကို ဆိုလိုတယ်။
(လုကာ ၁:၇၆) ငါ့သား၊ မင်းကတော့ အမြင့်ဆုံးအရှင်ရဲ့ ပရောဖက်လို့ အခေါ်ခံရလိမ့်မယ်။ ယေဟောဝါဘုရားရဲ့ လမ်းခရီးကို အသင့်ပြင်ဆင်ဖို့ ရှေ့တော်ကနေ အရင်သွားရလိမ့်မယ်။
nwtsty လု ၁:၇၆ လေ့လာမှု မှတ်စု
ယေဟောဝါဘုရားရဲ့ ရှေ့တော်ကနေ အရင်သွားရလိမ့်မယ်– နှစ်ခြင်းပေးသူယောဟန်ဟာ ယေရှုရဲ့ရှေ့ပြေး ဖြစ်တယ်။ ယေရှုက သူ့ဖခင်ကို ကိုယ်စားပြုပြီး ဖခင်နာမည်နဲ့လာတဲ့သူ ဖြစ်တယ်။ ဒါကြောင့် နှစ်ခြင်းပေးသူယောဟန်ဟာ ‘ယေဟောဝါဘုရားရဲ့ ရှေ့တော်ကနေ အရင်သွားရလိမ့်မယ်’ လို့ပြောနိုင်တယ်။—ယောဟန် ၅:၄၃။ ၈:၂၉။ ဒီအခန်းငယ်ပါ ယေဟောဝါနဲ့ပတ်သက်တဲ့ လေ့လာမှု မှတ်စုကို ကြည့်ပါ။
ကျမ်းစာဖတ်ရှုခြင်း
(လုကာ ၁:၄၆-၆၆) အဲဒီအခါ မာရိက “ယေဟောဝါဘုရားကို ကျွန်မ ဂုဏ်တင်ချီးမွမ်းပါတယ်။ ၄၇ ကျွန်မရဲ့ကယ်တင်ရှင် ဘုရားသခင်ကြောင့် ရင်ထဲမှာ ပျော်လို့ မဆုံးဘူး။ ၄၈ ဘုရားက ကျွန်မရဲ့ နိမ့်ကျတဲ့အဖြစ်ကို မြင်ပြီ။ အခုကစပြီး လူမျိုးအဆက်ဆက်က ကျွန်မကို ပျော်ရွှင်ချမ်းမြေ့သူလို့ ခေါ်ကြတော့မယ်။ ၄၉ တန်ခိုးနဲ့ပြည့်စုံတဲ့အရှင်က ကျွန်မအတွက် အံ့ဖွယ်အမှုတွေ လုပ်ဆောင်ပေးတာကိုး။ နာမတော်ဟာ သန့်ရှင်းမြင့်မြတ်တယ်။ ၅၀ ဘုရားက သူ့ကို ကြောက်ရွံ့ရိုသေသူတွေကို လူမျိုးအဆက်ဆက် ကရုဏာပြတယ်။ ၅၁ လက်ရုံးတော်နဲ့ တန်ခိုးပြတယ်။ မောက်မာတဲ့စိတ်နဲ့ ကြံစည်သူတွေကိုတော့ တကွဲတပြား ဖြစ်စေတယ်။ ၅၂ မင်းအရာရှိတွေကို နန်းချပြီး နိမ့်ကျသူတွေကို ချီးမြှောက်တယ်။ ၅၃ ဆာလောင်နေသူတွေကို ကောင်းမွန်ရာတွေ ဖြည့်ဆည်းပေးပြီး ချမ်းသာကြွယ်ဝသူတွေကို လက်ချည်းလွှတ်လိုက်တယ်။ ၅၄ ဘုရားသခင်က ဘိုးဘေးတွေကို ပြောခဲ့တဲ့အတိုင်း မိမိကျွန် အစ္စရေးလူမျိုးကို မစတယ်။ ၅၅ အာဗြဟံနဲ့ သူ့မျိုးနွယ်ကို အမြဲကရုဏာပြမယ်လို့ ကတိပေးခဲ့တဲ့အတိုင်း အဲဒီကတိကို မမေ့ဘူးဆိုတာ ပြလိုက်တာပဲ” လို့ပြောတယ်။ ၅၆ မာရိက ဧလိရှဗက်ဆီမှာ သုံးလလောက်နေပြီး အိမ်ပြန်သွားတယ်။ ၅၇ ဧလိရှဗက်က မီးဖွားချိန်စေ့ပြီး သားလေး မွေးလာတယ်။ ၅၈ ယေဟောဝါက ဧလိရှဗက်ကို အထူးကရုဏာပြမှန်း အိမ်နီးချင်းတွေ၊ ဆွေမျိုးတွေ ကြားတဲ့အခါ ဝမ်းသာကြတယ်။ ၅၉ ရှစ်ရက်မြောက်နေ့မှာ ကလေးကို အရေဖျားဖြတ်ပေးဖို့ ရောက်လာကြတယ်။ ကလေးကို ဖခင်ရဲ့နာမည်အတိုင်း ဇာခရိဆိုပြီး မှည့်မလို့ပဲ။ ၆၀ ဒါပေမဲ့ ဧလိရှဗက်က “အဲဒီနာမည် မဟုတ်ဘူး။ ယောဟန်လို့ မှည့်ရမယ်” လို့ပြောတော့၊ ၆၁ သူတို့က “မင်းရဲ့ဆွေမျိုးထဲမှာ ဒီနာမည်မှ မရှိတာ” လို့ပြောကြတယ်။ ၆၂ ဒါနဲ့ ဘာနာမည်ပေးချင်သလဲ ဆိုပြီး ဖခင်ဖြစ်သူကို အမူအရာနဲ့ မေးကြည့်တော့၊ ၆၃ သူက သင်ပုန်းကို တောင်းပြီး “ကလေးနာမည်ဟာ ယောဟန်” လို့ရေးပြတဲ့အခါ အားလုံး အံ့ဩကြတယ်။ ၆၄ အဲဒီအချိန်မှာပဲ သူ စကားပြန်ပြောနိုင်တဲ့အတွက် ဘုရားသခင်ကို ချီးမွမ်းတော့တယ်။ ၆၅ အိမ်နီးချင်းအားလုံး ကြောက်သွားကြတယ်။ ယုဒပြည် တောင်တန်းဒေသ တစ်လျှောက်လုံးမှာ အဲဒီသတင်း ပျံ့နှံ့သွားတယ်။ ၆၆ ဒီသတင်းကို ကြားတဲ့သူအားလုံးက စိတ်ဝင်တစားဖြစ်ပြီး “ဒီကလေးဟာ ဘယ်လိုလူစားမျိုး ဖြစ်လာမှာပါလိမ့်” လို့တွေးကြတယ်။ ယေဟောဝါရဲ့ တန်ခိုးက ကလေးအပေါ်မှာ သက်ရောက်နေတယ်။
ဇွန် ၁၈-၂၄
ကျမ်းစာထဲက အဖိုးတန်ဘဏ္ဍာများ | လုကာ ၂-၃
“လူငယ်တို့—ယေဟောဝါနဲ့ သင့်ဆက်ဆံရေးကို ခိုင်မြဲအောင်လုပ်နေသလား”
(လုကာ ၂:၄၁၊ ၄၂) ယေရှုရဲ့မိဘတွေက ပသခါပွဲခံချိန်မှာ ဂျေရုဆလင်မြို့ကို နှစ်တိုင်း သွားလေ့ရှိတယ်။ ၄၂ ယေရှု အသက် ၁၂ နှစ်မှာ ခါတိုင်းလိုပဲ ပွဲတော်ကို သွားကြတယ်။
nwtsty လု ၂:၄၁ လေ့လာမှု မှတ်စု
ယေရှုရဲ့မိဘတွေက . . . သွားလေ့ရှိတယ်- ပညတ်တရားအရ ပသခါပွဲကို အမျိုးသမီးတွေ တက်စရာမလိုပါဘူး။ ဒါပေမဲ့ အဲဒီပွဲကို ဂျေရုဆလင်မြို့မှာ ယောသပ် နှစ်စဉ်သွားတက်တဲ့အခါ မာရိပါ လိုက်သွားလေ့ရှိတယ်။ (ထွ ၂၃:၁၇။ ၃၄:၂၃) အသွားအပြန်ခရီး မိုင် ၁၉၀ နီးပါးကို မိသားစုလိုက် နှစ်စဉ် သွားလေ့ရှိတယ်။
(လု ၂:၄၆၊ ၄၇) သုံးရက်ကြာမှပဲ ယေရှုကို ရှာတွေ့တော့တယ်။ ဗိမာန်တော်မှာ ဆရာတွေအလယ်မှာ ထိုင်ပြီး သူတို့ပြောတာကို နားထောင်လိုက်၊ မေးခွန်းမေးလိုက် လုပ်နေတယ်။ ၄၇ သူ့စကားကို ကြားတဲ့သူအားလုံးက သူအဖြေပေးပုံ၊ ဉာဏ်ထက်မြက်ပုံကို တအံ့တဩ ဖြစ်နေကြတယ်။
nwtsty လု ၂:၄၆၊ ၄၇ လေ့လာမှု မှတ်စု
မေးခွန်းမေးလိုက် လုပ်နေတယ်– ယေရှုစကားကို နားထောင်သူတွေ တုံ့ပြန်ပုံအရ သူ့မေးခွန်းတွေက စပ်စုတဲ့ ကလေးရဲ့ မေးခွန်းမျိုး မဟုတ်ဘူး။ (လု ၂:၄၇) “မေးခွန်းမေး” ဆိုပြီး ပြန်ဆိုထားတဲ့ ဂရိစကားလုံးက တရားရုံးမှာ အမှုစစ်တဲ့အခါ မေးတဲ့ မေးခွန်းမျိုး၊ တန်ပြန်မေးခွန်းထုတ်တာမျိုးကို ဆိုလိုနိုင်တယ်။ (မ ၂၇:၁၁။ မာ ၁၄:၆၀၊ ၆၁။ ၁၅:၂၊ ၄။ တ ၅:၂၇) ပွဲနေ့တွေပြီးတဲ့နောက် အထင်ကရ ဘာသာရေးခေါင်းဆောင် တချို့ဟာ ဗိမာန်တော်မှာ ကျန်ရစ်ပြီး ကျယ်ဝန်းတဲ့ဆင်ဝင်တစ်ခုမှာ သွန်သင်ပေးလေ့ရှိတယ်လို့ သမိုင်းဆရာတွေ ပြောကြတယ်။ သူတို့ရဲ့ ခြေရင်းမှာ ထိုင်ပြီး မေးခွန်းတွေ မေးလို့ရတယ်။
တအံ့တဩ ဖြစ်နေကြတယ်– “တအံ့တဩ ဖြစ်နေ” ဆိုပြီး ဒီမှာအသုံးပြုတဲ့ ဂရိကြိယာက အံ့သြပြီးရင်း အံ့သြနေကြတာကို ဆိုလိုနိုင်တယ်။
(လု ၂:၅၁၊ ၅၂) ယေရှုက မိဘတွေနဲ့အတူ နာဇရက်မြို့ကို ပြန်လိုက်သွားတယ်။ မိဘစကားကို အမြဲနာခံတယ်။ သူ့မိခင်က ဒါတွေအားလုံးကို စိတ်ထဲမှာ အသေအချာ မှတ်ထားတယ်။ ၅၂ ယေရှုဟာ ကာယဉာဏ နှစ်တန်စလုံး ကြီးထွားဖွံ့ဖြိုးလာတယ်။ ဘုရားသခင်ရှေ့၊ လူရှေ့ မျက်နှာသာရတဲ့သူ ဖြစ်လာတယ်။
nwtsty လု ၂:၅၁၊ ၅၂ လေ့လာမှု မှတ်စု
မိဘစကားကို အမြဲနာခံတယ်– ဒါမှမဟုတ် “အမြဲလက်အောက်ခံတယ်။” ဂရိကြိယာအရ ယေရှုဟာ ဗိမာန်တော်မှာ ဆရာတွေကို စွဲမှတ်စေပြီးနောက် အိမ်ပြန်သွားပြီး မိဘတွေရဲ့စကား ဆက်နားထောင်နေမှန်း သိရတယ်။ ဒီနာခံမှုမျိုးဟာ တခြားကလေးတွေရဲ့ နာခံမှုထက် ပိုထူးခြားတယ်။ ဒါက မောရှေရဲ့ပညတ်ကို အသေးစိတ်လိုက်နာတာ ဖြစ်တယ်။—ထွ ၂၀:၁၂။ ဂ ၄:၄။
ရှာဖွေလေ့လာ ဘုရားရေးရာရတနာ
(လု ၂:၁၄) “ကောင်းကင်မှာ စံမြန်းတဲ့ ဘုရားသခင်ကို ဂုဏ်တင်ချီးမွမ်းကြ။ ကမ္ဘာမြေပေါ်နေထိုင်တဲ့ ဘုရားမျက်နှာသာရသူတွေ ငြိမ်သက်ခြင်းရှိပါစေ။”
nwtsty လု ၂:၁၄ လေ့လာမှု မှတ်စု
ကမ္ဘာမြေပေါ်နေထိုင်တဲ့ ဘုရားမျက်နှာသာရသူတွေ ငြိမ်သက်ခြင်းရှိပါစေ– လက်ရေးစာမူတချို့မှာ “မြေကြီးပေါ်၌လည်း ငြိမ်သက်ခြင်းရှိပါစေသတည်း။ လူတို့အား မေတ္တာကရုဏာ ရှိစေသတည်း” လို့ဆိုထားတယ်။ ဘာသာပြန်ကျမ်းတချို့မှာ အဲဒီအတိုင်း ဖော်ပြတယ်။ ဒါပေမဲ့ ကမ္ဘာသစ်ဘာသာပြန်ကျမ်း မှာဖတ်ရတဲ့စာသားကို လက်ရေးစာမူအများက ထောက်ခံတယ်။ ကောင်းကင်တမန်တွေရဲ့ ဒီကြေညာချက်က လူတွေ ဘယ်လိုစိတ်ထားရှိရှိ၊ ဘာပဲလုပ်လုပ် ဘုရားရဲ့မေတ္တာကရုဏာ ရရှိမယ်လို့ မဆိုလိုဘူး။ အဲဒီအစား ဘုရားကို တကယ်ယုံကြည်ပြီး သားတော်နောက်လိုက်သူတွေ ဘုရားမျက်နှာသာရမှာကို ဆိုလိုတယ်။—ဒီအခန်းငယ်ပါ ဘုရားမျက်နှာသာရသူတွေ လေ့လာမှု မှတ်စုကို ကြည့်ပါ။
ဘုရားမျက်နှာသာရသူတွေ– ကောင်းကင်တမန်တွေရဲ့ ဒီကြေညာချက်မှာ ပါတဲ့ “မျက်နှာသာ” က လူတွေအပေါ် ဘုရားပြတာကို ဆိုလိုတယ်။ ဂရိစကားလုံး ယူဒိုကီယာ ကို “လက်ခံမှု၊ နှစ်သက်မှု၊ ထောက်ခံမှု” လို့လည်း ပြန်ဆိုနိုင်တယ်။ မ ၃:၁၇၊ မာ ၁:၁၁ နဲ့ လု ၃:၂၂ မှာ ယူဒိုကီအို ဆိုတဲ့ ကြိယာကို အသုံးပြုထားတယ်။ (မ ၃:၁၇ နဲ့ မာ ၁:၁၁ ရဲ့ လေ့လာမှု မှတ်စုကို ကြည့်ပါ။) ဒီကျမ်းချက်တွေမှာပါတဲ့ စကားဟာ သားတော်နှစ်ခြင်းခံပြီးတာနဲ့ ဘုရားပြောတဲ့စကား ဖြစ်တယ်။ ဒါဟာ “ထောက်ခံတယ်၊ နှစ်သက်တယ်၊ ကြည်ကြည်ဖြူဖြူ လက်ခံတယ်၊ ပျော်မွေ့တယ်” ဆိုတဲ့ အခြေခံအဓိပ္ပာယ် ရှိတယ်။ အဲဒီအသုံးအနှုန်းတွေအရ “ဘုရားမျက်နှာသာရသူတွေ” (အန်သရိုပွိုင်ယူဒိုကီယာ့စ်) ဆိုတာကို ဘုရာသခင့်အလိုတော်နဲ့တွေ့ပြီး မျက်နှာသာရသူ၊ “ကိုယ်တော်လက်ခံသူ၊ ကိုယ်တော်သဘောကျသူ” လို့လည်း ပြန်ဆိုနိုင်တယ်။ ဒါကြောင့် ကောင်းကင်တမန်တွေရဲ့ ကြေညာချက်က လူအားလုံးကိုမဟုတ်ဘဲ ဘုရားကို တကယ်ယုံကြည်ပြီး သားတော်နောက်လိုက်ကြလို့ ဘုရားနှစ်သက်သဘောကျသူတွေကို ဆိုလိုတယ်။ ဂရိစကားလုံး ယူဒိုကီယာဟာ လူတွေရဲ့ စေတနာစိတ် (ရ ၁၀:၁။ ဖလ ၁:၁၅) ကို ဆိုလိုနိုင်ပုံရှိပေမဲ့ အများအားဖြင့် ဘုရား မျက်နှာသာပြတာ၊ နှစ်သက်တာ၊ ထောက်ခံတာနဲ့ဆက်စပ်ပြီး အသုံးပြုတယ်။ (မ ၁၁:၂၆။ လု ၁၀:၂၁။ ဧ ၁:၅၊ ၉။ ဖလ ၂:၁၃။ ၂သ ၁:၁၁)။ စက်ပ်တွားဂျင့်ကျမ်း ဆ ၅၁:၁၈ မှာ ဘုရားသခင်ရဲ့ “စေတနာစိတ်တော်” ဆိုပြီး အသုံးပြုထားတယ်။
(လုကာ ၃:၂၃) ယေရှုက အသက် ၃၀ အရွယ်မှာ လူတွေကို စပြီးသွန်သင်တယ်။ လူတွေရဲ့အမြင်မှာ ယေရှုက ယောသပ်ရဲ့သား၊ ယောသပ်က ဟေလိရဲ့သား၊
သင် သိပါသလား
ယောသပ်ရဲ့ဖခင်က ဘယ်သူလဲ
နာဇရက်မြို့က လက်သမားဆရာယောသပ်ဟာ ယေရှုရဲ့မွေးစားဖခင်ဖြစ်တယ်။ ဒါဆို ယောသပ်ရဲ့ဖခင်ကကော ဘယ်သူလဲ။ မဿဲကျမ်းမှာဖော်ပြထားတဲ့ ယေရှုရဲ့ ဆွေစဉ်မျိုးဆက်စာရင်းမှာတော့ ယောသပ်အဖေနာမည်ကို ယာကုပ်လို့ဖော်ပြပေမဲ့ လုကာကျမ်းမှာတော့ “ဧလိ၏သား” လို့ ဖော်ပြထားတယ်။ ဘာကြောင့် ဒီလိုကွာခြားနေရတာလဲ။—လုကာ ၃:၂၃။ မဿဲ ၁:၁၆။
မဿဲရဲ့မှတ်တမ်းမှာ ‘ယာကုပ်၏သားကား ယောသပ်’ လို့ဖော်ပြထားတယ်။ ဒီမှာသုံးထားတဲ့ ဂရိစကားလုံးအသုံးအနှုန်းအရ ယာကုပ်က ယောသပ်ရဲ့ဖခင်အရင်းဖြစ်မှန်း သိရတယ်။ ဒါဝိဒ်ရဲ့ မင်းဆက်ကနေဆင်းသက်လာသူ ယောသပ်ရဲ့မွေးစားသားယေရှုက ပေါ်ထွက်လာမည့် ရာဇပလ္လင်ကိုပိုင်ထိုက်သူဖြစ်ကြောင်း မဿဲပြောတဲ့အခါ ယောသပ်ရဲ့ ဆွေစဉ်မျိုးဆက်စာရင်းကို ခြေရာခံပြီးဖော်ပြခဲ့တာဖြစ်တယ်။
လုကာရဲ့မှတ်တမ်းမှာတော့ “ဧလိသား ယောသပ်” လို့ ရေးသားထားတယ်။ “သား” ဆိုတဲ့ စကားလုံးကို “သားမက်” အတွက်လည်း သုံးလေ့ရှိကြောင်း သိရတယ်။ လုကာ ၃:၂၇ မှာတွေ့ရတဲ့ ရှာလသေလဆိုသူရဲ့ အဖြစ်အပျက်ကိုလည်း အဲဒီအတိုင်း ဖော်ပြထားတယ်။ သူ့ဖခင်အရင်းကတော့ ယေခေါနိဖြစ်တယ်။ ဒါပေမဲ့ ရှာလသေလကို “နေရိရဲ့သား” စာရင်းထဲမှာဖော်ပြထားတယ်။ (၁ ရာဇဝင်ချုပ် ၃:၁၇။ မဿဲ ၁:၁၂) ဖြစ်နိုင်တာက ရှာလသေလဟာ နေရိရဲ့ အမည်မဖော်ပြထားတဲ့ သမီးတစ်ဦးနဲ့ ထိမ်းမြားခဲ့ပုံရတယ်။ ဒါကြောင့် သူဟာ နေရိရဲ့ သားမက်/သားဖြစ်လာတယ်။ ဒီလိုပဲ၊ ယောသပ်လည်း ဧလိရဲ့သမီးမာရိနဲ့ ထိမ်းမြားခဲ့လို့ ဧလိရဲ့သားမက်/သားလို့ခေါ်ရခြင်းဖြစ်တယ်။ ဒါကြောင့် လုကာက ယေရှုရဲ့ ဆွေစဉ်မျိုးဆက်စာရင်းကို “လူ့ဇာတိ” အရ တစ်နည်းအားဖြင့် သူ့မိခင်မာရိဘက်ကနေ ဖော်ပြခဲ့တာဖြစ်တယ်။ (ရောမ ၁:၃) ဒီလိုနည်းအားဖြင့် သမ္မာကျမ်းစာမှာ ယေရှုရဲ့ ဆွေစဉ်မျိုးဆက်စာရင်းကို မတူညီတဲ့ပုံစံ ၂ မျိုးနဲ့ဖော်ပြထားတယ်။
ကျမ်းစာဖတ်ရှုခြင်း
(လုကာ ၂:၁-၂၀) အဲဒီအချိန်မှာ ဆီဇာ ဩဂတ်စတပ်က အင်ပါယာတစ်ခွင်လုံးမှာ နေထိုင်သူအားလုံး နာမည်စာရင်းပေးဖို့ အမိန့်ထုတ်လိုက်တယ်။ ၂ (ဆီးရီးယားနိုင်ငံရဲ့ ဘုရင်ခံ ကုရေနိလက်ထက်မှာ အခုလို ဦးဆုံးအကြိမ် နာမည်စာရင်းကောက်တာ ဖြစ်တယ်။) ၃ ဒါကြောင့် လူအားလုံး နာမည်စာရင်းပေးဖို့ ကိုယ့်မြို့ကိုယ့်ရွာ ပြန်ကြရတယ်။ ၄ ယောသပ်က ဒါဝိဒ်မျိုးနွယ်ဖြစ်တဲ့အတွက် ဂါလိလဲပြည်၊ နာဇရက်မြို့ကနေ ယုဒပြည်မှာရှိတဲ့ ဘက်သလီဟင်လို့ခေါ်တဲ့ ဒါဝိဒ်ရဲ့နေရင်းမြို့ဆီ သွားတယ်။ ၅ နာမည်စာရင်းပေးဖို့ သွားတဲ့အခါ စေ့စပ်ထိမ်းမြားထားတဲ့ ဇနီးမာရိကိုပါ ခေါ်သွားတယ်။ အဲဒီအချိန်မှာ မာရိဟာ ကိုယ်ဝန်နေ့စေ့လစေ့ ဖြစ်နေပြီ။ ၆ ဘက်သလီဟင်မြို့မှာ သူတို့ရှိနေတုန်း မာရိ မီးဖွားချိန်ရောက်လာပြီး၊ ၇ သားဦးလေးကို မွေးတယ်။ ဒါပေမဲ့ တည်းခိုမယ့်နေရာ မရှိတော့လို့ ကလေးကို အနှီးနဲ့ပတ်ပြီး နွားစားခွက်ထဲမှာ သိပ်ထားရတယ်။ ၈ အဲဒီဒေသမှာ သိုးထိန်းတွေကလည်း ကွင်းပြင်မှာ ရောက်နေပြီး သိုးအုပ်တွေကို ညလုံးပေါက် စောင့်ရှောက်နေတယ်။ ၉ ရုတ်တရက်၊ ယေဟောဝါရဲ့ ကောင်းကင်တမန်က သူတို့ရှေ့မှာ ပေါ်လာတယ်။ ပတ်လည်မှာလည်း ယေဟောဝါရဲ့ ဘုန်းအသရေကြောင့် ထွန်းလင်းနေတဲ့အတွက် သူတို့ ကြောက်လန့်နေကြတယ်။ ၁၀ ကောင်းကင်တမန်က “မကြောက်ပါနဲ့။ လူတိုင်းကို အကြီးအကျယ် ဝမ်းမြောက်စေမယ့် သတင်းကောင်းပြောဖို့ ကျွန်တော် ရောက်လာတာ။ ၁၁ ဒီနေ့ ဒါဝိဒ်ရဲ့ဇာတိမြို့မှာ ခင်ဗျားတို့ကို ကယ်တင်မယ့်သူ၊ သခင်ခရစ်တော် မွေးဖွားပြီ။ ၁၂ နို့စို့ကလေးကို အနှီးနဲ့ပတ်ပြီး နွားစားခွက်ထဲ သိပ်ထားတာကို ခင်ဗျားတို့တွေ့ရင် အဲဒါ သူပဲဆိုတာ သိကြပါ” လို့ပြောတယ်။ ၁၃ အဲဒီကောင်းကင်တမန်နဲ့အတူ ကောင်းကင်တမန်ဗိုလ်ခြေ အမြောက်အမြား ရုတ်တရက်ပေါ်လာပြီး ဘုရားသခင်ကို ချီးမွမ်းကြတယ်။ ၁၄ “ကောင်းကင်မှာ စံမြန်းတဲ့ ဘုရားသခင်ကို ဂုဏ်တင်ချီးမွမ်းကြ။ ကမ္ဘာမြေပေါ်နေထိုင်တဲ့ ဘုရားမျက်နှာသာရသူတွေ ငြိမ်သက်ခြင်းရှိပါစေ” လို့ချီးမွမ်းကြတယ်။ ၁၅ အဲဒီနောက် ကောင်းကင်တမန်တွေ ကောင်းကင်ကို ပြန်တက်သွားတယ်။ သိုးထိန်းတွေက “ယေဟောဝါ ဘုရား အသိပေးတဲ့ကိစ္စကို သွားကြည့်ကြရအောင်။ အခုပဲ ဘက်သလီဟင်မြို့ကို သွားကြစို့” လို့အချင်းချင်းပြောပြီး၊ ၁၆ ခပ်သုတ်သုတ်သွားပြီး ကြည့်တဲ့အခါ မာရိနဲ့ ယောသပ်ကိုရော နွားစားခွက်ထဲမှာ သိပ်ထားတဲ့ မွေးကင်းစကလေးကိုပါ တွေ့လိုက်ရတယ်။ ၁၇ အဲဒီအခါ သိုးထိန်းတွေက ဒီကလေးနဲ့ပတ်သက်ပြီး ကောင်းကင်တမန် ပြောသွားတာတွေကို ပြန်ပြောပြတော့၊ ၁၈ ကြားတဲ့သူအားလုံး တအံ့တဩ ဖြစ်ကြတယ်။ ၁၉ မာရိက အဲဒီအကြောင်းကို စိတ်ထဲ မှတ်ထားပြီး ဘာကိုဆိုလိုတယ်ဆိုတာ ဆင်ခြင်တွေးတောတယ်။ ၂၀ သိုးထိန်းတွေလည်း ဘုရားသခင် အသိပေးတဲ့အတိုင်း မြင်ရ၊ ကြားရတဲ့အတွက် ဘုရားကို ဂုဏ်တင်ချီးမွမ်းပြီး ပြန်သွားကြတယ်။
ဇွန် ၂၅–ဇူလိုင် ၁
ကျမ်းစာထဲက အဖိုးတန်ဘဏ္ဍာများ | လုကာ ၄-၅
“သွေးဆောင်မှုတွေကို ယေရှုလို တွန်းလှန်ပါ”
(လုကာ ၄:၁-၄) သန့်ရှင်းသော စွမ်းအားတော်နဲ့ပြည့်နေတဲ့ ယေရှုက ဂျော်ဒန်မြစ်ကနေ ထွက်သွားတယ်။ တောထဲမှာ စွမ်းအားတော်က သူ့ကို လမ်းညွှန်တယ်။ ၂ တောထဲမှာ ရက်ပေါင်း ၄၀ နေတယ်။ အဲဒီအတောအတွင်း ဘာမှမစားဘူး။ ရက် ၄၀ စေ့တော့ သူဆာလောင်နေတယ်။ အဲဒီအခါ မာရ်နတ်က သူ့ကို သွေးဆောင်တယ်။ ၃ မာရ်နတ်က “မင်း ဘုရားသခင်ရဲ့ သားမှန်ရင် ဒီကျောက်ခဲတွေကို မုန့်ဖြစ်စေလို့ အမိန့်ပေးလိုက်လေ” လို့ပြောတော့၊ ၄ ယေရှုက “‘လူဟာ အစားအစာနဲ့ပဲ အသက်ရှင်ရမှာ မဟုတ်ဘူး’ လို့ ကျမ်းစာမှာ ရေးထားတယ်” ဆိုပြီး ပြန်ပြောတယ်။
သင် ဘယ်လိုလူစား ဖြစ်သင့်တယ်ဆိုတာ ဆင်ခြင်ပါ
၈ စာတန်ဟာ အဲဒီနည်းကိုပဲသုံးပြီး ယေရှုကို လှည့်ဖြားဖို့ ကြိုးစားခဲ့တယ်။ ယေရှု ရက် ၄၀၊ ည ၄၀ အစာမစားဘဲ တောထဲမှာရှိနေတုန်း စာတန်က အစာစားချင်တဲ့ဆန္ဒကိုသုံးပြီး ယေရှုကိုလှည့်ဖြားဖို့ ကြိုးစားခဲ့တယ်။ စာတန်က “သင်သည် ဘုရားသခင်၏သားတော်မှန်လျှင် ဤကျောက်ခဲကို မုန့်ဖြစ်စေရန် အမိန့်ပေးလော့” လို့ ပြောခဲ့တယ်။ (လု. ၄:၁-၃) ယေရှုမှာ ရွေးချယ်စရာ နှစ်ခုရှိတယ်– အစာစားလိုတဲ့ဆန္ဒကို ဖြည့်ဆည်းဖို့ သူ့ရဲ့တန်ခိုးကို မသုံးဖို့ ရွေးချယ်နိုင်တယ် ဒါမှမဟုတ် သူ့ရဲ့တန်ခိုးကိုသုံးဖို့ ရွေးချယ်နိုင်တယ်။ ယေရှုဟာ မိမိရဲ့တန်ခိုးကို တစ်ကိုယ်ကောင်းဆန်တဲ့ရည်ရွယ်ချက်အတွက် မသုံးသင့်ဘူးဆိုတာ သိတယ်။ ယေရှု ဆာလောင်နေတာမှန်ပေမဲ့ ယေဟောဝါနဲ့ သူ့ရဲ့ဆက်ဆံရေးက အစားအစာထက် ပိုအရေးကြီးတယ်။ ယေရှုက “‘လူသည် မုန့်အားဖြင့်သာ အသက်ရှင်ရမည်မဟုတ်။ ယေဟောဝါဘုရား မိန့်တော်မူသမျှအားဖြင့် အသက်ရှင်ရမည်’ ဟူ၍ ကျမ်းစာ၌ရေးထားသည်” လို့ ပြန်ဖြေခဲ့တယ်။—မ. ၄:၄။
(လုကာ ၄:၅-၈) ဒါနဲ့ မာရ်နတ်က ယေရှုကို တောင်ပေါ် ခေါ်သွားတယ်။ ကမ္ဘာ့တိုင်းနိုင်ငံတွေကို တစ်ခဏလောက် ပြပြီးနောက်၊ ၆ “ဒီတိုင်းနိုင်ငံတွေကို အုပ်စိုးပိုင်ခွင့်ရော ဘုန်းစည်းစိမ်အားလုံးကိုပါ မင်းကို ငါပေးမယ်။ ဒါတွေကို ငါပိုင်တဲ့အတွက် ပေးချင်တဲ့သူကို ပေးလို့ရတယ်။ ၇ ငါ့ကို တစ်ကြိမ်ပဲ ရှိခိုးဦးချရင် ဒါတွေအားလုံး မင်းကို ပေးမယ်” လို့ပြောတယ်။ ၈ ယေရှုက “‘ယေဟောဝါ ဘုရားကို ကိုးကွယ်ရမယ်။ ကိုယ်တော်တစ်ပါးတည်းကိုပဲ ဝတ်ပြုရမယ်’ လို့ ကျမ်းစာမှာ ရေးထားတယ်” ဆိုပြီးပြန်ပြောတယ်။
သင် ဘယ်လိုလူစား ဖြစ်သင့်တယ်ဆိုတာ ဆင်ခြင်ပါ
၁၀ စာတန်ဟာ “မျက်စိတပ်မက်ခြင်း” ကိုသုံးပြီး ယေရှုကို ဘယ်လို လှည့်ဖြားခဲ့သလဲ။ စာတန်ဟာ “လူနေရာမြေကြီးပေါ်ရှိ တိုင်းနိုင်ငံရှိသမျှကို တစ်ခဏချင်းတွင် ပြပြီးလျှင် ‘ဤအခွင့်အာဏာရှိသမျှနှင့် ထိုနိုင်ငံများ၏ ဘုန်းစည်းစိမ်ကို သင့်အား ငါပေးမည်’” လို့ ပြောခဲ့တယ်။ (လု. ၄:၅၊ ၆) ယေရှုမြင်တွေ့ခဲ့တာက တကယ့် တိုင်းနိုင်ငံတွေမဟုတ်ဘူး၊ အဲဒီတိုင်းနိုင်ငံတွေရဲ့ ဘုန်းစည်းစိမ်ကို ရူပါရုံနဲ့ပြတာကို မြင်ခဲ့ရတာဖြစ်တယ်။ စာတန်က ယေရှုဟာ မြင်တွေ့ရတဲ့အရာကြောင့် လှည့်စားခံရမယ်လို့ ယူဆခဲ့မှာဖြစ်တယ်။ စာတန်က ယေရှုကို “သင်သည် ငါ့ကို တစ်ကြိမ်သာ ကိုးကွယ်လျှင် ဤအရာရှိသမျှသည် သင်၏ဥစ္စာဖြစ်လိမ့်မည်” လို့ ပြောခဲ့တယ်။ (လု. ၄:၇) ယေရှုဟာ စာတန်ဖြစ်စေချင်တဲ့လူစားမျိုး လုံးဝ အဖြစ်မခံခဲ့ဘူး။ ချက်ချင်းပဲ “‘သင်၏ဘုရားသခင် ယေဟောဝါကို ကိုးကွယ်ရမည်။ ကိုယ်တော်တစ်ပါးတည်းကိုသာ ဝတ်ပြုရမည်’ ဟူ၍ ကျမ်းစာ၌ရေးထားသည်” လို့ ပြန်ပြောခဲ့တယ်။—လု. ၄:၈။
(လုကာ ၄:၉-၁၂) အဲဒီနောက် မာရ်နတ်က ယေရှုကို ဂျေရုဆလင်မြို့ဆီ ခေါ်သွားတယ်။ ဗိမာန်တော်အမိုးပေါ်မှာ ရပ်ခိုင်းပြီး “မင်း ဘုရားသခင်ရဲ့သားမှန်ရင် ဒီကနေ ခုန်ချလိုက်ပါလား။ ၁၀ ‘ဘုရားက မင်းကို ကာကွယ်ဖို့ ကောင်းကင်တမန်တွေကို မိန့်မှာထားလိမ့်မယ်။’ ၁၁ ‘သူတို့ လက်နဲ့ပင့်ထားမှာဖြစ်လို့ မင်းက ကျောက်တုံးနဲ့ ထိမိခိုက်မိမှာ မဟုတ်ဘူး’ လို့ ကျမ်းစာမှာ ရေးထားတာပဲ” ဆိုပြီး ပြောတယ်။ ၁၂ ယေရှုက “‘ယေဟောဝါ ဘုရားကို အကဲမစမ်းရ’ လို့ ကျမ်းစာမှာ ရေးထားတယ်” ဆိုပြီး ပြန်ပြောတယ်။
nwtsty မီဒီယာ
ဗိမာန်တော်အမိုး
စာတန်က ယေရှုကို “ဗိမာန်တော်အမိုး [ဒါမှမဟုတ် “အမြင့်ဆုံးနေရာ”] ပေါ်မှာ” တကယ်ရပ်ခိုင်းပြီး ခုန်ချခိုင်းတာ ဖြစ်နိုင်တယ်။ ဒါပေမဲ့ ယေရှု ဘယ်နေရာမှာ ရပ်ခဲ့တယ်ဆိုတာ အတိအကျ မပြောနိုင်ဘူး။ ဒီနေရာမှာ “ဗိမာန်တော်” ဆိုပြီး သုံးထားတဲ့ စကားလုံးက ဗိမာန်တော် အဆောက်အအုံ တစ်ခုလုံးကို ဆိုလိုနိုင်တယ်။ ဒါကြောင့် ဗိမာန်တော်ဧရိယာရဲ့ (၁) အရှေ့တောင်ဘက်ထောင့်မှာ ယေရှု ရပ်နေတာ ဖြစ်နိုင်တယ်။ ဒါမှမဟုတ် ဗိမာန်တော် အဆောက်အအုံရဲ့ တခြားထောင့်တစ်ခုမှာ ရပ်နေတာ ဖြစ်နိုင်တယ်။ ဒီလိုနေရာမျိုးကနေ ပြုတ်ကျတဲ့အခါ ယေဟောဝါ မကယ်ရင်တော့ သေမှာပဲ။
သင် ဘယ်လိုလူစား ဖြစ်သင့်တယ်ဆိုတာ ဆင်ခြင်ပါ
၁၂ ယေရှုကတော့ ဧဝနဲ့မတူဘဲ နှိမ့်ချမှုပုံသက်သေပြခဲ့တယ်။ စာတန်က ယေရှုကို တခြားသူတွေ အထင်ကြီးစေမယ့်အရာတစ်ခုခုကို ပြုလုပ်ပြီး ဘုရားသခင်ကို စမ်းသပ်ဖို့ လှည့်ဖြားခဲ့တယ်။ ဒါပေမဲ့ အဲဒါက မာနကြီးတဲ့လုပ်ရပ်ဖြစ်လို့ ယေရှု ပြတ်ပြတ်သားသား ငြင်းဆိုခဲ့တယ်။ ယေရှုဟာ ရှင်းရှင်းလင်းလင်း ပြတ်ပြတ်သားသားပဲ “‘သင်၏ဘုရားသခင် ယေဟောဝါကို စမ်းသပ်ခြင်းမပြုရ’ ဟူ၍ ကျမ်းစကားရှိသည်” လို့ ပြန်ပြောခဲ့တယ်။—လုကာ ၄:၉-၁၂ ကိုဖတ်ပါ။
ရှာဖွေလေ့လာ ဘုရားရေးရာရတနာ
(လုကာ ၄:၁၇) ပရောဖက် ဟေရှာယရေးတဲ့ ကျမ်းလိပ်ကို လှမ်းပေးကြတယ်။ ဒါနဲ့ ယေရှုက ကျမ်းလိပ်ကိုဖွင့်ပြီး ရှာလိုက်တဲ့အခါ ဒီကျမ်းချက်ကို တွေ့တယ်-
nwtsty လု ၄:၁၇ လေ့လာမှု မှတ်စု
ပရောဖက် ဟေရှာယရေးတဲ့ ကျမ်းလိပ်– ဟေရှာယ ပင်လယ်သေကျမ်းလိပ်ဟာ သားရေစက္ကူရှည် ၁၇ ချပ်ဆက်ထားတဲ့ စာလိပ်တစ်ခုဖြစ်တယ်။ ကော်လံ ၅၄ ခုရှိပြီး ၂၄ ပေရှည်တယ်။ နာဇရက်မြို့က တရားဇရပ်မှာ အသုံးပြုခဲ့တဲ့ စာလိပ်ဟာ အဲဒီလောက် ရှည်နိုင်တယ်။ ပထမရာစုမှာ အခန်းကြီးအခန်းငယ်ခွဲတာ မရှိသေးတဲ့အတွက် ယေရှုက သူဖတ်ချင်တဲ့ အပိုင်းကို ရှာယူရလိမ့်မယ်။ ပရောဖက်ပြုချက်ပါ စကားလုံးတွေ ရှိတဲ့နေရာကို ရှာတွေ့တယ် ဆိုတဲ့အချက်က ယေရှုဟာ ကျမ်းစာနဲ့ အကျွမ်းတဝင်ရှိထားမှန်း ထင်ရှားတယ်။
(လုကာ ၄:၂၅) ကျွန်တော် မှန်တာကို ပြောမယ်။ တကယ်တော့ ဧလိယလက်ထက်မှာ သုံးနှစ်နဲ့ ခြောက်လပတ်လုံး မိုးခေါင်ပြီး တစ်ပြည်လုံး အငတ်ဘေးဆိုက်တုန်းက အစ္စရေးပြည်မှာ မုဆိုးမတွေ အများကြီးရှိတာပဲ။
nwtsty လုကာ ၄:၂၅ လေ့လာမှု မှတ်စု
သုံးနှစ်နဲ့ ခြောက်လပတ်လုံး– ၁ ဘု ၁၈:၁ အရ ဧလိယက “သုံးနှစ်စေ့တဲ့အခါ” မိုးရွာမယ်လို့ ကြေညာခဲ့တယ်။ ဒါကြောင့် ယေရှုရဲ့ စကားဟာ ၁ ဘုရင်ကျမ်းပါ မှတ်တမ်းနဲ့ ဆန့်ကျင်တယ်လို့ တချို့ပြောတယ်။ ဒါပေမဲ့ ဟီဘရူးကျမ်းစောင်ပါ မှတ်တမ်းက မိုးခေါင်တဲ့အချိန်ဟာ သုံးနှစ်ထက်မပိုဘူးလို့ မဆိုလိုပါဘူး။ “သုံးနှစ်စေ့တဲ့အခါ” လို့ဆိုတာက မိုးခေါင်မယ်လို့ အာဟပ်ကို ဧလိယ စပြောတဲ့အချိန်နဲ့ သက်ဆိုင်တယ်။ (၁ဘု ၁၇:၁) ခြောက်လလောက်ကြာတတ်တဲ့ နွေရာသီဟာ ခါတိုင်းထက်ပိုကြာနေတဲ့ အချိန်မှာ ဧလိယ ကြေညာခဲ့တာ ဖြစ်မယ်။ အဲဒီအပြင် အာဟပ်ကို ဧလိယ နောက်တစ်ခေါက်တွေ့ချိန် “သုံးနှစ်စေ့တဲ့အခါ” ချက်ချင်း စမိုးရွာခဲ့တာ မဟုတ်ဘူး။ ကရမေလတောင်ပေါ်မှာ မီးနဲ့စမ်းသပ်ပြီးမှ မိုးရွာတာ ဖြစ်တယ်။ (၁ဘု ၁၈:၁၈-၄၅) ဒါကြောင့် ဒီမှာ မှတ်တမ်းတင်ထားတဲ့ ယေရှုရဲ့စကားနဲ့ ခရစ်တော်ရဲ့ မိတူဖကွဲညီက ယာ ၅:၁၇ မှာ မှတ်တမ်းတင်ခဲ့တဲ့ စကားတွေဟာ ၁ဘု ၁၈:၁ နဲ့ ကိုက်ညီမှုရှိပါတယ်။
ကျမ်းစာဖတ်ရှုခြင်း
(လုကာ ၄:၃၁-၄၄) အဲဒီနောက် ယေရှုက ဂါလိလဲပြည်၊ ကပေရနောင်မြို့ကို ဆင်းသွားပြီး ဥပုသ်နေ့မှာ သွန်သင်တယ်။ ၃၂ အခွင့်အာဏာရှိရှိ ဟောပြောတဲ့အတွက် လူတွေက သူ့ရဲ့သွန်သင်ပုံကို အံ့ဩကြတယ်။ ၃၃ အဲဒီတရားဇရပ်မှာ နတ်ဆိုးပူးနေသူတစ်ယောက် ရှိတယ်။ သူက အသံကျယ်ကျယ်နဲ့၊ ၃၄ “နာဇရက်မြို့သား ယေရှု၊ ခင်ဗျားက ကျုပ်တို့နဲ့ ဘာဆိုင်လို့တုံး။ ကျုပ်တို့ကို ဖျက်ဆီးဖို့ လာတာလား။ ခင်ဗျားဟာ ဘုရားသခင်ဆီကလာတဲ့ သန့်ရှင်းသူပဲဆိုတာ ကျုပ်သိတာပေါ့” လို့အော်ပြောတယ်။ ၃၅ ယေရှုက “တိတ်စမ်း၊ သူ့အထဲကနေ ထွက်သွား” ဆိုပြီး ဆုံးမလိုက်တဲ့အခါ နတ်ဆိုးက အဲဒီလူကို လူအများရှေ့မှာ လှဲချပစ်ပြီး ဘေးအန္တရာယ်မပြုဘဲ ထွက်သွားတယ်။ ၃၆ အဲဒီအခါ လူတွေ အံ့ဩပြီး “သူ့စကားတွေဟာ အစွမ်းထက်လှချေလား။ တန်ခိုးအာဏာနဲ့ အမိန့်ပေးလိုက်တာ နတ်ဆိုးတွေ ထွက်ရတော့တာပဲ” လို့ အချင်းချင်း ပြောကြတယ်။ ၃၇ ဒါကြောင့် ယေရှုရဲ့သတင်းဟာ ပတ်ဝန်းကျင်အရပ်ရပ် ပျံ့နှံ့သွားတော့တယ်။ ၃၈ ယေရှုက တရားဇရပ်ကနေ ထွက်ပြီး ရှိမုန်အိမ်ကို သွားတယ်။ ရှိမုန်ရဲ့ယောက္ခမ အဖျားကြီးနေတဲ့အတွက် ကုသပေးဖို့ အသနားခံကြတယ်။ ၃၉ ဒါနဲ့ လူနာအနားကို သွားပြီး ကုသပေးလိုက်တဲ့အခါ အဖျားပျောက်သွားတယ်။ ရှိမုန်ရဲ့ ယောက္ခမက ချက်ချင်းပဲ ထပြီး သူတို့ကို ဧည့်ဝတ်ပြုတော့တယ်။ ၄၀ နေဝင်ချိန်ရောက်တဲ့အခါ ရောဂါသည်အမျိုးမျိုးကို ခေါ်လာကြတဲ့အတွက် ယေရှုက တစ်ယောက်စီအပေါ် လက်ကိုတင်ပြီး ကုသပေးတယ်။ ၄၁ နတ်ဆိုးတွေကလည်း “ခင်ဗျားဟာ ဘုရားသခင်ရဲ့သားပဲ” လို့အော်ဟစ်ပြီး သူတို့ဝင်ပူးနေတဲ့ လူတွေထဲကနေ ထွက်လာတယ်။ ဒါပေမဲ့ ယေရှုဟာ ခရစ်တော်ဖြစ်မှန်း နတ်ဆိုးတွေ သိတဲ့အတွက် သူတို့ကို စကားတစ်ခွန်းမှ မပြောဖို့ ဆုံးမတယ်။ ၄၂ မနက်မိုးလင်းတော့ ယေရှုက လူသူကင်းဝေးတဲ့နေရာဆီ ထွက်သွားတယ်။ လူတွေကလည်း မတွေ့တွေ့အောင်ရှာပြီး သူရှိတဲ့နေရာကို ရောက်လာကြတယ်။ သူတို့ဆီကနေ ထွက်မသွားဖို့ တောင်းပန်ကြတယ်။ ၄၃ ဒါပေမဲ့ ယေရှုက “ဘုရားသခင့်နိုင်ငံတော် သတင်းကောင်းကို တခြားမြို့ရွာတွေမှာလည်း ဟောရဦးမယ်။ အဲဒီအတွက် ကျွန်တော့်ကို စေလွှတ်လိုက်တာ” လို့ပြောပြီး၊ ၄၄ ယုဒပြည် တရားဇရပ်တွေမှာ သွားဟောပြောတယ်။