“ဆီဇာဆီ အယူခံဝင်မယ်”

၁၊ ၂။ (က) ပေါလု ဘယ်အခြေအနေမှာ ရောက်နေသလဲ။ (ခ) ဆီဇာဆီ ပေါလု အယူခံဝင်ခြင်းနဲ့ပတ်သက်ပြီး ဘာမေးခွန်း ပေါ်လာသလဲ။

ကဲသရိမြို့မှာ အစောင့်အကြပ်အပြည့်နဲ့ ပေါလု နေရတယ်။ အစောပိုင်း နှစ်နှစ်က ယုဒပြည်ကို ပြန်သွားတဲ့ ရက်အနည်းငယ်အတွင်း ပေါလုကို ဂျူးတွေ သတ်ဖို့ အနည်းဆုံး သုံးကြိမ် ကြိုးစားခဲ့ကြတယ်။ (တ. ၂၁:၂၇-၃၆။ ၂၃:၁၀၊ ၁၂-၁၅၊ ၂၇) ရန်သူတွေ မအောင်မြင်ပေမဲ့ လက်မလျှော့ဘူး။ ရန်သူတွေလက်ထဲ ပြန်ရောက်နိုင်တယ်ဆိုတာ ပေါလု သိလို့ “ဆီဇာဆီမှာ ကျွန်တော် အယူခံဝင်မယ်” လို့ ရောမဘုရင်ခံ ဖေတ္တုမင်းကို ပြောတယ်။—တ. ၂၅:၁၁။

^၂ ရောမ ဧကရာဇ်ဆီ အယူခံဝင်မယ်ဆိုတဲ့ ပေါလုရဲ့ ဆုံးဖြတ်ချက်ကို ယေဟောဝါ နှစ်သက်သလား။ အဖြေဟာ ဒီနောက်ဆုံးကာလမှာ ဘုရားနိုင်ငံတော်အကြောင်း စေ့စေ့စပ်စပ် သက်သေခံနေတဲ့ ကျွန်တော်တို့အတွက် အရေးကြီးတယ်။ “သတင်းကောင်းကို ခုခံကာကွယ်ပြီး တရားဥပဒေအရ အတည်ဖြစ်စေ” ရာမှာ ပေါလုကို အတုယူသင့်မသင့် ကျွန်တော်တို့ သိဖို့ လိုတယ်။—ဖိ. ၁:၇။

‘တရားပလ္လင်ရှေ့မှာ ရပ်နေ’ (တ. ၂၅:၁-၁၂)

၃၊ ၄။ (က) ပေါလုကို ဂျေရုဆလင်မြို့ဆီ ဂျူးတွေ ဘာကြောင့် ခေါ်လာခိုင်းသလဲ။ ပေါလု သေဘေးကနေ ဘယ်လို လွတ်မြောက်ခဲ့သလဲ။ (ခ) ပေါလုကို ထောက်မပေးသလို ဒီနေ့ခေတ် ကျေးကျွန်တွေကို ယေဟောဝါ ဘယ်လို ထောက်မပေးသလဲ။

^၃ ယုဒပြည်ရဲ့ ရောမ ဘုရင်ခံသစ် ဖြစ်ပြီး သုံးရက်အကြာမှာ ဂျေရုဆလင်မြို့ကို ဖေတ္တုမင်း သွားတယ်။a အဲဒီမှာ ပုရောဟိတ်ကြီးတွေ၊ ထင်ရှားတဲ့ ဂျူးလူကြီးတွေ ပေါလုရဲ့ ကြီးလေးတဲ့ အပြစ်အကြောင်း တိုင်ချက်ဖွင့်တာကို နားထောင်တယ်။ ဘုရင်ခံသစ်ဟာ သူတို့နဲ့သာမက ဂျူးအားလုံးနဲ့လည်း သင့်သင့်မြတ်မြတ် ရှိဖို့ လိုတယ်ဆိုတာ သူတို့ သိတယ်။ ဒါကြောင့် ပေါလုကို ဂျေရုဆလင်မြို့ဆီ ခေါ်လာပြီး ရုံးတင်စစ်ဆေးဖို့ ဖေတ္တုမင်းဆီ အသနားခံကြတယ်။ ဒီတောင်းဆိုမှု နောက်ကွယ်မှာ မကောင်းတဲ့ အကြံအစည် ရှိတယ်။ ကဲသရိမြို့ကနေ ဂျေရုဆလင်မြို့ကို သွားတဲ့လမ်းမှာ ပေါလုကို သတ်ဖို့ ကြံစည်ထားကြလို့ပဲ။ ဖေတ္တုမင်းက သူတို့ရဲ့ တောင်းဆိုချက်ကို မလိုက်လျောဘဲ “မင်းတို့ထဲက ခေါင်းဆောင်တချို့ ငါနဲ့အတူ လိုက်ခဲ့။ အဲဒီလူမှာ ပြစ်မှုတစ်စုံတစ်ရာ ရှိတယ်ဆိုရင် စွဲချက်တင်ကြပေါ့” လို့ ပြောတယ်။ (တ. ၂၅:၅) ဒီလိုနဲ့ သေဘေးကနေ ပေါလု နောက်တစ်ကြိမ် လွတ်သွားပြန်တယ်။

^၄ ပေါလု အခက်အခဲတွေ ကြုံရချိန်တစ်လျှောက် သခင်ယေရှုခရစ်ကတစ်ဆင့် ယေဟောဝါ ထောက်မတယ်။ ဥပမာ၊ “သတ္တိရှိပါ” လို့ စိတ်အာရုံမှာ ယေရှု ပြောခဲ့တယ်။ (တ. ၂၃:၁၁) ဒီနေ့ ဘုရားကျေးကျွန်တွေလည်း အခက်အခဲတွေ၊ ခြိမ်းခြောက်မှုတွေ ကြုံကြရတယ်။ အခက်အခဲတွေ ကျွန်တော်တို့ မကြုံရအောင် ယေဟောဝါ ကာကွယ်မပေးပေမဲ့ ခံနိုင်ရည် ရှိဖို့ ဉာဏ်ပညာနဲ့ ခွန်အား ပေးတယ်။ “သာမန်ထက် ထူးကဲတဲ့ တန်ခိုး” ကို ဘုရား အမြဲ ပေးမယ်ဆိုတာ ယုံကြည်စိတ်ချနိုင်ပါတယ်။—၂ ကော. ၄:၇။

၅။ ပေါလုရဲ့ ကိစ္စကို ဖေတ္တုမင်း ဘယ်လို ဖြေရှင်းသလဲ။

^၅ ရက်အနည်းငယ်ကြာတော့ ကဲသရိမြို့က “တရားပလ္လင်ပေါ်မှာ” ဖေတ္တုမင်း “ထိုင်” တယ်။b ရှေ့မှာ ပေါလုနဲ့ ပေါလုကို စွပ်စွဲသူတွေ ရပ်နေကြတယ်။ မကျူးလွန်ခဲ့တဲ့ ပြစ်မှုတွေအတွက် ပေါလု စွပ်စွဲခံနေရတယ်။ ဒါကြောင့် “ကျွန်တော်ဟာ ဂျူးတွေရဲ့ ပညတ်တရားကိုဖြစ်စေ၊ ဗိမာန်တော်ကိုဖြစ်စေ၊ ဆီဇာကိုဖြစ်စေ တစ်ခါမှ မပြစ်မှားခဲ့ဖူးပါဘူး” လို့ ပြောတယ်။ တမန်တော်မှာ အပြစ် မရှိလို့ လွှတ်ပေးသင့်တယ်။ ဖေတ္တုမင်း ဘယ်လို ဆုံးဖြတ်မလဲ။ ဂျူးတွေရဲ့ မျက်နှာသာ ရချင်လို့ “ဒီအမှုအတွက် ဂျေရုဆလင်မြို့ကို သွားပြီး အစစ်ဆေးခံချင်သလား” လို့ ပေါလုကို မေးတယ်။ (တ. ၂၅:၆-၉) လုံးဝ အဓိပ္ပာယ် မရှိတဲ့ ကမ်းလှမ်းချက်ပါပဲ။ ဂျေရုဆလင်မြို့မှာ အစစ်ဆေးခံဖို့ ပေါလုကို လွှတ်လိုက်ရင် စွပ်စွဲသူတွေ လက်ထဲ ရောက်ပြီး အသတ်ခံရမှာ။ ဒီကိစ္စမှာ ဖေတ္တုမင်းဟာ မှန်မှန်ကန်ကန် တရားစီရင်ဖို့ထက် နိုင်ငံရေးအရ အမြတ်ထုတ်ဖို့ ရွေးချယ်ခဲ့တယ်။ ဘုရင်ခံဟောင်း ပုန္တိပိလတ်လည်း ယေရှုကို ဒီအတိုင်း လုပ်ခဲ့တယ်။ (ယော. ၁၉:၁၂-၁၆) ဒီနေ့ခေတ် တရားသူကြီးတွေလည်း လူတွေရဲ့ မျက်နှာသာ ရဖို့ မတရား ဆုံးဖြတ်ကြတယ်။ ဒါကြောင့် ဘုရားလူမျိုးနဲ့ပတ်သက်တဲ့ အမှုကိစ္စတွေကို တရားရုံးတွေ မတရား ဆုံးဖြတ်တဲ့အခါ ကျွန်တော်တို့ မအံ့သြသင့်ဘူး။

၆၊ ၇။ ဘာကြောင့် ဆီဇာဆီ ပေါလု အယူခံဝင်သလဲ။ ခရစ်ယာန်စစ်တွေအတွက် ဘယ်ပုံသက်သေ ချမှတ်ခဲ့သလဲ။

^၆ ဂျူးတွေရဲ့ မျက်နှာသာ ရချင်တဲ့ ဖေတ္တုရဲ့ ဆန္ဒကြောင့် ပေါလု သေနိုင်တယ်။ ဒါကြောင့် ပေါလုဟာ ရောမနိုင်ငံသား အခွင့်အရေးကို အသုံးပြုခဲ့တယ်။ ဖေတ္တုမင်းကို “အခု ကျွန်တော်ဟာ ဆီဇာရဲ့ တရားပလ္လင်ရှေ့မှာ ရပ်နေပါတယ်။ ဒီမှာပဲ ကျွန်တော့်ကို စစ်ကြောစီရင်သင့်တယ်။ ဂျူးတွေကို ကျွန်တော် မပြစ်မှားခဲ့မှန်း မင်းကြီး ကောင်းကောင်း သိပါတယ်။ . . . ဆီဇာဆီမှာ ကျွန်တော် အယူခံဝင်မယ်” လို့ လျှောက်တယ်။ အယူခံဝင်မယ်လို့ ပြောပြီးရင် ပြန်ရုပ်သိမ်းလို့ မရတော့ဘူး။ “မင်း ဆီဇာဆီမှာ အယူခံဝင်လိုက်ပြီဆိုတော့ ဆီဇာဆီကိုပဲ သွားရမယ်” လို့ ဖေတ္တု ပြောပြီး အတည်ပြုလိုက်တယ်။ (တ. ၂၅:၁၀-၁၂) ပိုမြင့်မားတဲ့ တရားဝင် အခွင့်အာဏာရှိသူဆီ ပေါလု အယူခံဝင်ခြင်းအားဖြင့် ဒီနေ့ ခရစ်ယာန်စစ်တွေအတွက် ပုံသက်သေ ချမှတ်ခဲ့တယ်။ ဆန့်ကျင်သူတွေ “ဥပဒေကို အသုံးချပြီး” ဒုက္ခရောက်အောင် ကြံစည်တဲ့အခါ ယေဟောဝါသက်သေတွေဟာ သတင်းကောင်းကို ခုခံကာကွယ်ဖို့ တရားဝင် နည်းလမ်းတွေကို အသုံးပြုကြတယ်။c—ဆာ. ၉၄:၂၀။

^၇ ပေါလုဟာ ကိုယ်မကျူးလွန်တဲ့ ပြစ်မှုအတွက် နှစ်နှစ်ကျော် အကျဉ်းသားဘဝနဲ့ နေရပြီးနောက် ရောမမှာ အမှုလျှောက်လဲခွင့် ရတယ်။ ဒါပေမဲ့ မထွက်ခွာခင် နောက်အုပ်စိုးရှင်တစ်ဦးက သူ့ကို တွေ့ချင်နေတယ်။

“ကျွန်တော်ဟာ မနာခံဘဲ မနေပါ” (တ. ၂၅:၁၃–၂၆:၂၃)

၈၊ ၉။ ကဲသရိမြို့ကို အဂရိပ္ပမင်း ဘာကြောင့် လည်ပတ်သလဲ။

^၈ ဆီဇာဆီ အယူခံဝင်မယ်လို့ ပေါလု ပြောတာကို ဖေတ္တုမင်း ကြားပြီးနောက် ရက်အနည်းငယ်အကြာမှာ အဂရိပ္ပမင်းနဲ့ ညီမ ဗေရနိတ်တို့ ဘုရင်ခံသစ်ဆီ “အလည်အပတ် ရောက်လာတယ်။”d ရောမခေတ်မှာ အထက်အရာရှိတွေဟာ အသစ်ခန့်အပ်ခံရတဲ့ ဘုရင်ခံတွေဆီ လည်ပတ်လေ့ရှိတယ်။ ဖေတ္တု ခန့်အပ်ခံရတဲ့အတွက် ဝမ်းသာဂုဏ်ယူကြောင်း အဂရိပ္ပမင်း ပြောရင်း နိုင်ငံရေး၊ ပုဂ္ဂိုလ်ရေးအရ ရင်းနှီးခင်မင်ဖို့ ကြိုးစားတယ်။—တ. ၂၅:၁၃။

^၉ ပေါလုအကြောင်း ဖေတ္တု ပြောပြတဲ့အခါ အဂရိပ္ပမင်း စိတ်ဝင်စားသွားတယ်။ နောက်တစ်နေ့မှာ မင်းနှစ်ပါးဟာ တရားပလ္လင်ပေါ် ထိုင်ကြတယ်။ ဒါပေမဲ့ သူတို့ရဲ့ အာဏာနဲ့ ခမ်းနားကြီးကျယ်တဲ့ အဆောင်အယောင်တွေဟာ သူတို့ရှေ့မှာရှိတဲ့ အကျဉ်းသား ပြောမယ့်စကားလောက် စိတ်စွဲမှတ်စရာ မကောင်းဘူး။—တ. ၂၅:၂၂-၂၇။

၁၀၊ ၁၁။ အဂရိပ္ပမင်းကို လေးစားကြောင်း ပေါလု ဘယ်လို ပြသလဲ။ အရင် အသက်တာနဲ့ပတ်သက်ပြီး ဘာတွေ ပြောပြသလဲ။

^၁၀ အဂရိပ္ပမင်းရှေ့ ထုချေခွင့် ရလို့ ကျေးဇူးတင်ကြောင်း ပေါလု လေးလေးစားစား ပြောတယ်။ မင်းကြီးဟာ ဂျူးတွေရဲ့ ထုံးတမ်းနဲ့ အမေးပုစ္ဆာအားလုံးကို တတ်ကျွမ်းသူ ဖြစ်ကြောင်း အသိအမှတ်ပြုတယ်။ အဲဒီနောက် “ကျွန်တော်ဟာ အတင်းကျပ်ဆုံး ဂိုဏ်းထုံးနည်းအတိုင်း ဖာရိရှဲတစ်ဦးအဖြစ် နေထိုင်ခဲ့” တယ်ဆိုပြီး အရင် အသက်တာအကြောင်း ပေါလု ပြောပြတယ်။ (တ. ၂၆:၅) ဖာရိရှဲတစ်ဦးအနေနဲ့ မေရှိယ ကြွလာမှာကို မျှော်လင့်ခဲ့တယ်။ အခု ခရစ်ယာန်တစ်ယောက်အနေနဲ့ ကြာမြင့်စွာ စောင့်မျှော်ခဲ့တဲ့ မေရှိယဟာ ယေရှုခရစ် ဖြစ်ကြောင်း ရဲရဲရင့်ရင့် ပြောတယ်။ ဘိုးဘေးတွေကို ဘုရား ပေးတဲ့ ကတိတော် ပြည့်စုံဖို့ မျှော်လင့်ချက်ဟာ သူနဲ့ စွပ်စွဲသူတွေရဲ့ တူညီတဲ့ ယုံကြည်ချက် ဖြစ်တယ်။ ဒီကတိအကြောင်း ဟောလို့ စစ်ကြောစီရင်ခံနေရတာ ဖြစ်ကြောင်း ရှင်းပြတယ်။ ပေါလု ပြောတာ နားထောင်ပြီးတဲ့နောက် ဘာဆက်ပြောမလဲဆိုတာ အဂရိပ္ပမင်း ပိုစိတ်ဝင်စားလာတယ်။e

^၁၁ ခရစ်ယာန်တွေကို ရက်ရက်စက်စက် ညှဉ်းဆဲခဲ့ကြောင်း ပေါလု ပြောပြပြီး “နာဇရက်မြို့သား ယေရှုရဲ့ နာမည်ကို ဆန့်ကျင်ဖို့ဆိုရင် ဘာမဆို လုပ်ရမယ်လို့ ကျွန်တော်လည်း အခိုင်အမာ ယူဆခဲ့ဖူးတယ်။ . . .  [ခရစ်တော်ရဲ့ နောက်လိုက်တွေကို] ဒေါသစိတ်မွှန်ပြီး တခြားမြို့တွေအထိ လိုက်လံညှဉ်းဆဲခဲ့ပါတယ်” လို့ ပြောတယ်။ (တ. ၂၆:၉-၁၁) ပေါလု ပုံကြီးချဲ့ပြောနေတာ မဟုတ်ပါဘူး။ ခရစ်ယာန်တွေကို ရက်ရက်စက်စက် ညှဉ်းပန်းနှိပ်စက်ခဲ့သူ ဖြစ်ကြောင်း တော်တော်များများ သိတယ်။ (ဂလ. ၁:၁၃၊ ၂၃) ‘ဒီလို လူက ဘာကြောင့် ပြောင်းလဲသွားတာလဲ’ လို့ အဂရိပ္ပမင်း စဉ်းစားနေမှာပဲ။

၁၂၊ ၁၃။ (က) ခရစ်ယာန် ဖြစ်လာတဲ့အကြောင်း ပေါလု ဘယ်လို ပြောပြသလဲ။ (ခ) ပေါလု ဘယ်နည်းနဲ့ “တုတ်ချွန်ကို ကန်” ခဲ့သလဲ။

^၁၂ ပေါလု ဆက်ပြောတဲ့ ဒီစကားတွေက အဖြေပေးပါတယ်– “ပုရောဟိတ်မင်းတွေ ပေးတဲ့ အခွင့်အာဏာနဲ့ တာဝန်အရ အဲဒီလို ညှဉ်းဆဲဖို့ ဒမတ်စကတ်မြို့ကို သွားပါတယ်။ အရှင်မင်းကြီး၊ မွန်းတည့်ချိန် ရောက်တော့ လမ်းမှာ နေရောင်ထက် တောက်ပတဲ့ အလင်းတန်းတစ်ခုက ကျွန်တော်နဲ့ ခရီးသွားဖော်တွေအပေါ် ကောင်းကင်ကနေ ထွန်းတောက်လာတယ်။ ကျွန်တော်တို့အားလုံး မြေပေါ် လဲသွားတဲ့အခါ ဟီဘရူးလို စကားသံတစ်ခု ထွက်ပေါ်လာပြီး ‘ရှောလု၊ ရှောလု၊ ငါ့ကို ဘာလို့ နှိပ်စက်ညှဉ်းဆဲနေတာလဲ။ တုတ်ချွန်ကို ကန်ရင် မင်းပဲ နာကျင်မှာပေါ့’ လို့ ပြောတာကို ကျွန်တော် ကြားပါတယ်။ ဒါနဲ့ ကျွန်တော်က ‘သခင်ဟာ ဘယ်သူလဲ’ လို့ မေးတော့ သခင်က ‘ငါဟာ မင်း နှိပ်စက်ညှဉ်းဆဲနေတဲ့ ယေရှုပဲ’ . . . လို့ ပြောပါတယ်။”f—တ. ၂၆:၁၂-၁၅၊ ၁၈။

^၁၃ ဒီအံ့သြဖွယ်ဖြစ်ရပ် မဖြစ်ခင် ပေါလုဟာ ပုံဆောင်သဘောအရ “တုတ်ချွန်ကို ကန်” ခဲ့တယ်။ တုတ်တံရှည်ရဲ့ ချွန်ထက်တဲ့ ထိပ်ကို ခြေနဲ့ ကန်ပြီး ကိုယ့်ကိုယ်ကိုယ် အနာတရ ဖြစ်စေတဲ့ ဝန်တင်တိရစ္ဆာန်လိုပဲ ပေါလုဟာ ဘုရားအလိုတော်ကို ဆန့်ကျင်ခြင်းအားဖြင့် ဘုရားနဲ့ ဆက်ဆံရေး ထိခိုက်အောင် လုပ်နေတယ်။ ရှင်ပြန်ထမြောက်ပြီးတဲ့ ယေရှုဟာ ဒမတ်စကတ်မြို့ကို သွားတဲ့ လမ်းပေါ်မှာ ကိုယ်ထင်ပြခြင်းအားဖြင့် စိတ်ရင်းမှန် ရှိပေမဲ့ လမ်းလွဲနေတဲ့ ပေါလုကို ပြောင်းလဲစေတယ်။—ယော. ၁၆:၁၊ ၂။

၁၄၊ ၁၅။ ဘဝမှာ လုပ်ခဲ့တဲ့ အပြောင်းအလဲတွေနဲ့ပတ်သက်ပြီး ပေါလု ဘာပြောပြသလဲ။

^၁၄ ပေါလုဟာ ဘဝမှာ ကြီးမားတဲ့ အပြောင်းအလဲတွေ လုပ်ခဲ့တယ်။ “ကောင်းကင်ကနေ ရတဲ့ အဲဒီစိတ်အာရုံကို ကျွန်တော် မနာခံဘဲ မနေပါဘူး၊ အဂရိပ္ပမင်း။ သူတို့ နောင်တရပြီး ဘုရားသခင်ဆီ ပြန်လှည့်လာရမယ်၊ နောင်တရကြောင်း လုပ်ရပ်နဲ့ သက်သေပြရမယ်ဆိုတဲ့ သတင်းတရားကို ဒမတ်စကတ်မြို့မှာ ဦးဆုံး ဟောခဲ့တယ်။ အဲဒီနောက် ဂျေရုဆလင်မြို့မှာ၊ ယုဒပြည်တစ်ဝန်းလုံးမှာ ဟောခဲ့တယ်။ လူမျိုးခြားတွေကိုလည်း ဟောခဲ့တယ်” လို့ အဂရိပ္ပမင်းကို ပြောတယ်။ (တ. ၂၆:၁၉၊ ၂၀) မွန်းတည့်ချိန် စိတ်အာရုံမှာ ယေရှုခရစ် ပေးခဲ့တဲ့ တာဝန်ကို ပေါလု နှစ်ပေါင်းများစွာ ထမ်းဆောင်ခဲ့တယ်။ ဘာရလဒ် ရသလဲ။ ပေါလု ဟောပြောတဲ့ သတင်းကောင်းကို လက်ခံတုံ့ပြန်သူတွေဟာ အကျင့်ပျက်ပြားတဲ့၊ မရိုးသားတဲ့ အကျင့်တွေအတွက် နောင်တယူပြီး ဘုရားဆီ ပြန်လှည့်လာကြတယ်။ တရားဥပဒေနဲ့ စည်းကမ်း လေးစားလိုက်နာသူတွေ၊ နိုင်ငံသားကောင်းတွေ ဖြစ်လာကြတယ်။

^၁၅ ပေါလု ဟောတဲ့ သတင်းတရားကနေ လူတွေ ဘယ်လောက် အကျိုးရနေသလဲဆိုတာ ဂျူးတွေ စိတ်မဝင်စားဘူး။ “ဒါကြောင့် ဂျူးတွေက ဗိမာန်တော်မှာ ကျွန်တော့်ကို ဖမ်းပြီး သတ်ဖို့ ကြိုးစားခဲ့တယ်။ ဒါပေမဲ့ ကျွန်တော်က ဘုရားသခင်ရဲ့ မစခြင်းကျေးဇူးကို ခံစားရတဲ့အတွက် ပရောဖက်ကျမ်းတွေနဲ့ မောရှေ ရေးသားဖော်ပြခဲ့သမျှ တကယ် ဖြစ်ပျက်လာမယ့်အကြောင်း အယုတ်အမြတ်မရွေး လူတိုင်းကို သက်သေခံနေတာ အခုချိန်ထိပါပဲ” လို့ ပေါလု ပြောတယ်။—တ. ၂၆:၂၁၊ ၂၂။

၁၆။ ကိုယ့်ယုံကြည်ချက်အကြောင်း တရားသူကြီးတွေ၊ အုပ်စိုးရှင်တွေရှေ့ ပြောတဲ့အခါ ပေါလုကို ဘယ်လို အတုယူနိုင်သလဲ။

^၁၆ ကျွန်တော်တို့ဟာ ခရစ်ယာန်စစ်တွေအနေနဲ့ ကိုယ့်ယုံကြည်ခြင်းကို “ဖြေရှင်းပြောပြဖို့ အမြဲ အသင့်ရှိ” ရမယ်။ (၁ ပေ. ၃:၁၅) ကိုယ့်ယုံကြည်ချက်နဲ့ပတ်သက်ပြီး တရားသူကြီးတွေ၊ အုပ်စိုးရှင်တွေရှေ့ ပြောတဲ့အခါ အဂရိပ္ပမင်းနဲ့ ဖေတ္တုမင်းရှေ့ ပေါလု ပြောခဲ့တဲ့ နည်းကို အတုယူနိုင်တယ်။ ကျမ်းစာအမှန်တရားဟာ ကိုယ်တိုင်ကော သတင်းကောင်း လက်ခံတဲ့ တခြားသူတွေရဲ့ အသက်တာမှာပါ အကျိုးရစေပုံအကြောင်း လေးလေးစားစား ပြောပြပါ။ ဒါဆိုရင် တရားသူကြီးတွေ၊ အုပ်စိုးရှင်တွေ မျှမျှတတ စီရင်ပေးနိုင်တယ်။

‘မင်း သွေးဆောင်တာနဲ့ပဲ ငါ ခရစ်ယာန် ဖြစ်တော့မယ်’ (တ. ၂၆:၂၄-၃၂)

၁၇။ ပေါလုရဲ့ ခုခံပြောဆိုမှုကို ဖေတ္တုမင်း ဘယ်လို တုံ့ပြန်သလဲ။ ဖေတ္တုလိုပဲ ဒီနေ့လည်း လူတချို့ ဘယ်လို တုံ့ပြန်ကြသလဲ။

^၁၇ ပေါလု ပြောတဲ့ အထောက်အထားတွေကို နားထောင်ပြီးနောက် ဘုရင်ခံ နှစ်ယောက် နှုတ်ဆိတ်မနေနိုင်တော့ဘူး။ “အဲဒီလို ထုချေပြောဆိုလိုက်တဲ့အခါ ဖေတ္တုက ‘ပေါလု၊ မင်း ရူးနေပြီ။ အတတ်ကြူးလို့ ရူးသွားပြီ’ လို့ အော်ပြောတယ်။” (တ. ၂၆:၂၄) ဖေတ္တုမင်း တုံ့ပြန်သလို ဒီနေ့အချိန်မှာလည်း လူတချို့ တုံ့ပြန်ကြတယ်။ ကျမ်းစာ အမှန်တရားအတိုင်း သွန်သင်သူတွေကို တစ်ယူသန်တွေလို့ ဆိုကြတယ်။ သေလွန်သူတွေ ရှင်ပြန်ထမြောက်လာမယ်ဆိုတဲ့ ကျမ်းစာသွန်သင်ချက်ကို လောက ပညာတတ်တွေ လက်ခံဖို့ အခက်တွေ့ကြတယ်။

၁၈။ ဖေတ္တုမင်းကို ပေါလု ဘယ်လို ပြန်ဖြေသလဲ။ အဂရိပ္ပမင်း ဘယ်လို တုံ့ပြန်သလဲ။

^၁၈ ဒါပေမဲ့ “ကြီးမြတ်တဲ့ ဖေတ္တုမင်း၊ ကျွန်တော် မရူးပါဘူး။ မှန်တဲ့စကား၊ ယုတ္တိရှိတဲ့စကားကိုပဲ ပြောနေတာပါ။ ဒီအကြောင်းတွေကို မင်းကြီး ကောင်းကောင်း သိပါတယ်။ ဒါကြောင့် ကျွန်တော် အခုလို ပွင့်ပွင့်လင်းလင်း ပြောရဲတာပါ။ . . .  အဂရိပ္ပမင်း၊ ပရောဖက်တွေကို မင်းကြီး ယုံပါသလား။ ယုံတယ်ဆိုတာ ကျွန်တော် သိပါတယ်” လို့ ပေါလု ပြောတယ်။ “မင်း သွေးဆောင်တာနဲ့ပဲ အချိန်တိုအတွင်းမှာ ငါ ခရစ်ယာန် ဖြစ်တော့မယ်” လို့ အဂရိပ္ပမင်း ပြောတယ်။ (တ. ၂၆:၂၅-၂၈) ဒီစကားတွေကို စိတ်ရင်းမှန်နဲ့ ပြောတာ မဟုတ်ရင်တောင် ပေါလု စကားတွေကို လေးလေးနက်နက် စဉ်းစားခဲ့ကြောင်း သိနိုင်တယ်။

၁၉။ ပေါလုနဲ့ပတ်သက်ပြီး ဖေတ္တုနဲ့ အဂရိပ္ပ ဘယ်လို ကောက်ချက်ချသလဲ။

^၁၉ ကြားနာမှု ပြီးဆုံးသွားပြီ ဖြစ်ကြောင်း ပရိသတ်ကို အချက်ပြတဲ့အနေနဲ့ အဂရိပ္ပနဲ့ ဖေတ္တု ထရပ်လိုက်တယ်။ “သူတို့ ထွက်သွားရင်းနဲ့ ‘ဒီလူဟာ သေဒဏ်၊ ထောင်ဒဏ် ခံထိုက်တဲ့အပြစ် မကျူးလွန်ထားဘူး’ ဆိုပြီး အချင်းချင်း ပြောကြတယ်။ အဂရိပ္ပမင်းကလည်း ‘ဒီလူသာ ဆီဇာဆီမှာ အယူခံ မဝင်ထားရင် လွှတ်ပေးလို့ ရပြီ’ ဆိုပြီး ဖေတ္တုကို ပြောတယ်။” (တ. ၂၆:၃၁၊ ၃၂) ပေါလု အပြစ်ကင်းမှန်း သိကြတယ်။ အခု သူတို့ ခရစ်ယာန်တွေနဲ့ပတ်သက်ပြီး အကောင်းမြင်လာနိုင်တယ်။

၂၀။ အထက်အရာရှိတွေကို ပေါလု သက်သေခံတဲ့အတွက် ဘာရလဒ် ရသလဲ။

^၂၀ ဒီမှတ်တမ်းမှာပါတဲ့ အာဏာရှင်တစ်ယောက်မှ ခရစ်ယာန် ဖြစ်လာပုံ မရဘူး။ ဒါကြောင့် တမန်တော် ပေါလု ခုခံပြောဆိုတာ အကျိုးရှိရဲ့လား။ အကျိုးရှိပါတယ်။ ယုဒပြည်မှာရှိတဲ့ “ဘုရင်တွေ၊ ဘုရင်ခံတွေရှေ့” ပေါလု ရောက်သွားတဲ့အတွက် သတင်းကောင်း မကြားဖူးတဲ့ ရောမ အစိုးရ အရာရှိတွေကို သက်သေခံခွင့် ရသွားတယ်။ (လု. ၂၁:၁၂၊ ၁၃) ပေါလုရဲ့ အတွေ့အကြုံနဲ့ သစ္စာရှိမှုက ယုံကြည်သူ ညီအစ်ကို/မတွေကို အားပေးမှု ဖြစ်စေတယ်။

၂၁။ အခက်အခဲတွေကြား နိုင်ငံတော်သတင်းကို ဇွဲရှိရှိ ဟောတဲ့အခါ ဘာရလဒ်ကောင်းတွေ ရနိုင်သလဲ။

^၂၁ ဒီနေ့လည်း အလားတူပဲ။ အခက်အခဲတွေ၊ ဆန့်ကျင်မှုတွေကြားမှာ နိုင်ငံတော်သတင်းကို ဇွဲရှိရှိ ဟောတဲ့အခါ ရလဒ်ကောင်းတွေ ရကြတယ်။ တခြားနည်းနဲ့ မရောက်နိုင်တဲ့ အရာရှိတွေဆီ ရောက်ပြီး သက်သေခံခွင့် ရနိုင်တယ်။ ကျွန်တော်တို့ရဲ့ သစ္စာစောင့်သိမှု၊ ခံနိုင်ရည်တွေက ခရစ်ယာန် ညီအစ်ကို/မတွေအတွက် အားပေးမှု ဖြစ်စေနိုင်တယ်။ ဘုရားနိုင်ငံတော်အကြောင်း စေ့စေ့စပ်စပ် သက်သေခံဖို့ ပိုရဲရင့်လာစေနိုင်တယ်။