ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
ဇွန် ၁-၇
ကျမ်းစာထဲက အဖိုးတန်ဘဏ္ဍာများ | ကမ္ဘာဦး ၄၄-၄၅
“အစ်ကိုတွေကို ယောသပ် ခွင့်လွှတ်”
(ကမ္ဘာဦး ၄၄:၁၊ ၂) အဲဒီနောက် ယောသပ်က အိမ်တော်ထိန်းကို “ယောက်တိုင်းရဲ့အိတ်ထဲမှာ အစားအစာတွေ သယ်နိုင်သလောက် ထည့်ပေးလိုက်။ သူတို့ရဲ့ ငွေတွေကိုလည်း ပြန်ထည့်ပေးလိုက်။ ၂ အငယ်ဆုံးရဲ့ အိတ်ထဲမှာတော့ ကောက်နှံဖိုးငွေနဲ့အတူ ငါ့ငွေခွက်ကိုပါ ထည့်ထားလိုက်” လို့ အမိန့်ပေးတယ်။ အိမ်တော်ထိန်းလည်း ယောသပ် အမိန့်ပေးတဲ့အတိုင်း လုပ်တယ်။
“ဘုရားသခင်ကပဲ အပြစ်ပေးနိုင်”
သူတို့နောက်ကို မီအောင်လိုက်၊ ငွေခွက် ခိုးယူသွားတယ်လို့ စွပ်စွဲ၊ ဖမ်းခေါ်လာခဲ့ဆိုပြီး ယောသပ် ထောင်ချောက်ဆင်လိုက်တယ်။ ဗင်ယာမိန်ရဲ့ အိတ်ထဲ ငွေခွက်ကို တွေ့သွားတဲ့အခါ သူတို့အားလုံးကို ယောသပ်ဆီ ပြန်ခေါ်လာကြတယ်။ အဲဒီအခါ ယုဒက ကရုဏာပြပါ၊ ညီအစ်ကို ၁၁ ယောက်စလုံး အီဂျစ်ပြည်မှာ ကျွန်ခံပါ့မယ်လို့ ညီအစ်ကိုတွေရဲ့ကိုယ်စား ပြောပြီး ယောသပ်ကို အသနားခံခဲ့တယ်။ အစ်ကိုတွေက အရင်နဲ့မတူတော့ဘူးဆိုတာ ယောသပ် သိခွင့်ရလိုက်ပါပြီ။ ယောသပ်က ဗင်ယာမိန်တစ်ယောက်တည်းပဲ ကျွန်ခံရမယ်၊ ကျန်တဲ့သူတွေအားလုံး အိမ်ပြန်ရမယ်လို့ ပြောလိုက်တယ်။—ကမ္ဘာဦး ၄၄:၂-၁၇။
အဲဒီအချိန်မှာ ယုဒက “သူ့အမိဖွားသော သားတို့တွင် သူတစ်ယောက်တည်း ကျန်ရစ်ပါ၏။ ထိုကြောင့် သူ၏အဘသည် သူ့ကိုချစ်ပါ၏” လို့ ရင်နင့်ဖွယ်စကားကို ပြောလိုက်တဲ့အခါ ယောသပ် ဘယ်လောက်တောင် ရင်ဆို့သွားမလဲ။ ဗင်ယာမိန်ကို မွေးပြီးပြီးချင်း ဆုံးသွားရှာတဲ့ ယာကုပ်ရဲ့ ချစ်ဇနီး ရာခေလရဲ့ သားကြီးက ယောသပ် ဖြစ်နေလို့ပေါ့။ ယောသပ်လည်း အဖေလိုပါပဲ အမေရာခေလကို လွမ်းဆွတ်သတိရနေရှာတယ်။ ဒါကြောင့် ယောသပ်ဟာ ညီလေးဗင်ယာမိန်ကို အချစ်ပိုနေရတာ ဖြစ်နိုင်တယ်။—ကမ္ဘာဦး ၃၅:၁၈-၂၀; ၄၄:၂၀။
ယုဒက ဗင်ယာမိန်ကိုယ်စား ကျွန်ခံပါ့မယ်လို့ ယောသပ်ကို အနူးအညွတ် တောင်းပန်ခဲ့တယ်။ နောက်ဆုံးအသနားခံတဲ့အနေနဲ့ “ကျွန်တော်သည် သူငယ် မပါဘဲ မည်သို့ ပြန်နိုင်ပါမည်နည်း။ ဖခင် ခံရမည့် စိတ်ဆင်းရဲခြင်းကို ကျွန်တော် မမြင်ရက်နိုင်ပါ” ဆိုပြီး ကြေကွဲစရာကောင်းတဲ့စကားကို ပြောလိုက်တယ်။ (ကမ္ဘာဦး ၄၄:၁၈-၃၄၊ ခမ) ဒါက သူ ပြောင်းလဲသွားပြီဆိုတဲ့ အထောက်အထားပဲ မဟုတ်လား။ ယုဒဟာ နောင်တရတဲ့အပြင် စာနာမှု၊ ကိုယ်ကျိုးစွန့်မှု၊ သနားကြင်နာမှု ရှိမှန်း ဖော်ပြလိုက်တာပဲ။
အဲဒီအခါ ယောသပ်လည်း ခံစားချက်ကို မျိုသိပ်မထားနိုင်တော့ဘဲ ပွင့်အန်လာပါလေရော။ အီဂျစ်ကျွန်အားလုံးကို အပြင်ထွက်ခိုင်းလိုက်ပြီး အားရပါးရ ငိုချလိုက်တဲ့ အသံက ဖာရောနန်းတော်ထိတောင် ကြားရတယ်။ နောက်ဆုံးမှာတော့ ယောသပ်က “ကျွန်ုပ်သည် ယောသပ် ဖြစ်ပါ၏” လို့ ဖွင့်ပြောလိုက်တယ်။ အဲဒီနောက် ကြက်သေသေနေတဲ့ အစ်ကိုတွေကို ပွေ့ဖက်ပြီး သူတို့ လုပ်ခဲ့သမျှ အပြစ်တွေကို ခွင့်လွှတ်လိုက်တယ်။ (ကမ္ဘာဦး ၄၅:၁-၁၅) ဒီလိုနည်းနဲ့ ခွင့်လွှတ်တတ်တဲ့ ယေဟောဝါဘုရားကို ယောသပ် တုပခဲ့တယ်။ (ဆာလံ ၈၆:၅) ကျွန်ုပ်တို့ကော အဲဒီလိုလုပ်နိုင်မလား။
(ကမ္ဘာဦး ၄၄:၃၃၊ ၃၄) ဒါကြောင့် ညီလေးအစား ကျွန်တော်ပဲ သခင့်ကျွန်အဖြစ် နေခဲ့ပါရစေ။ ညီလေးကိုတော့ သူ့အစ်ကိုတွေနဲ့ ပြန်ခွင့်ပေးပါ။ ၃၄ ညီလေး မပါဘဲ အဖေ့ဆီ ပြန်လို့ မဖြစ်ပါဘူး။ အဖေ ဒီလိုအဖြစ်ဆိုးမျိုး ကြုံရမှာကို ကျွန်တော် မကြည့်ရက်လို့ပါ။
(ကမ္ဘာဦး ၄၅:၄၊ ၅) “အနားလာကြပါဦး” လို့ ပြောတော့ သူတို့ အနားတိုးလာကြတယ်။ အဲဒီအခါ ယောသပ်က “ကျွန်တော်ဟာ အီဂျစ်ပြည်ဆီ အစ်ကိုတို့ ရောင်းလိုက်တဲ့ ညီယောသပ်ပါ။ ၅ ကျွန်တော့်ကို ရောင်းလိုက်လို့ စိတ်မကောင်း မဖြစ်ပါနဲ့။ အချင်းချင်း အပြစ်မတင်ကြပါနဲ့။ အစ်ကိုတို့ရဲ့ အသက်ကို ကယ်ဖို့ ဘုရားသခင်က ကျွန်တော့်ကို အရင်လွှတ်လိုက်တာပါ။
ရှာဖွေလေ့လာ ဘုရားရေးရာရတနာ
(ကမ္ဘာဦး ၄၄:၁၃) အဲဒီအခါ သူတို့လည်း ကိုယ့်အဝတ်ကို ဆွဲဆုတ်၊ မြည်းပေါ် အထုပ်တွေ ပြန်တင်ပြီး မြို့ကို ပြန်လိုက်သွားကြတယ်။
it-2 ၈၁၃
အဝတ်ကို ဆွဲဆုတ်ခြင်း
အထူးသဖြင့် ဆွေမျိုးတစ်ယောက်ယောက် သေဆုံးသွားတဲ့သတင်း ကြားတဲ့အခါ ဂျူးတွေ၊ အရှေ့တိုင်းသားတွေ လုပ်တတ်တဲ့ ဝမ်းနည်းခြင်း အမှတ်သင်္ကေတ ဖြစ်တယ်။ အခြေအနေ အတော်များများမှာ ရင်ဘတ်ပေါ်ရုံလောက် အဝတ်ရဲ့ အရှေ့ခြမ်းကို ဆွဲဆုတ်တာ ဖြစ်တယ်။ အဝတ် ဝတ်လို့ မရတော့တဲ့အထိ ထက်ခြမ်း ဖြစ်အောင် ဆွဲဆုတ်တာ မဟုတ်ဘူး။
အဝတ်ကို ဆွဲဆုတ်သူအဖြစ် ကျမ်းစာမှာ ပထမဦးဆုံး မှတ်တမ်းတင်ခံရသူက ယာကုပ်ရဲ့ အကြီးဆုံးသား ရုဗင်ဖြစ်တယ်။ ယောသပ်ကို ရေတွင်းထဲမှာ မတွေ့တော့တဲ့အခါ အဝတ်ကို ဆွဲဆုတ်ပြီး “ညီလေး မရှိတော့ဘူး။ ဒုက္ခပဲ။ ငါဘာလုပ်ရမလဲ” လို့ ပြောခဲ့တယ်။ သားဦး ဖြစ်တဲ့ ရုဗင်ဟာ ညီဖြစ်သူနဲ့ပတ်သက်ပြီး အထူးတာဝန်ရှိသူ ဖြစ်တယ်။ ဖခင်ဖြစ်သူ ယာကုပ်လည်း သားဖြစ်သူ သေသွားပြီဆိုတဲ့ သတင်းကြားတဲ့အခါ အဝတ်ကို ဆွဲဆုတ်၊ အထည်ကြမ်း ဝတ်ပြီး ဝမ်းနည်းပူဆွေးခဲ့တယ်။ (က ၃၇:၂၉၊ ၃၀၊ ၃၄) အီဂျစ်ပြည်မှာ သူခိုးလို့ ဗင်ယာမိန် စွပ်စွဲခံရချိန်မှာလည်း ဖတူမိကွဲ အစ်ကိုတွေဟာ အဝတ်ကို ဆွဲဆုတ်ပြီး ဝမ်းနည်းကြောင်း ဖော်ပြခဲ့ကြတယ်။—က ၄၄:၁၃။
(ကမ္ဘာဦး ၄၅:၅-၈) ကျွန်တော့်ကို ရောင်းလိုက်လို့ စိတ်မကောင်း မဖြစ်ပါနဲ့။ အချင်းချင်း အပြစ်မတင်ကြပါနဲ့။ အစ်ကိုတို့ရဲ့ အသက်ကို ကယ်ဖို့ ဘုရားသခင်က ကျွန်တော့်ကို အရင်လွှတ်လိုက်တာပါ။ ၆ အခုဆို တိုင်းပြည်မှာ အငတ်ဘေး ဆိုက်တာ နှစ်နှစ်ရှိပြီ။ နောက်ငါးနှစ်လုံးလုံး ထွန်ယက်ရိတ်သိမ်းလို့ ရဦးမှာ မဟုတ်ဘူး။ ၇ ဒါကြောင့် မြေကြီးပေါ်မှာ ကျွန်တော်တို့မျိုးဆက် မပြတ်စေဖို့၊ အစ်ကိုတို့ကို အံ့ဖွယ်နည်းနဲ့ ကယ်ပြီး အသက်ဆက်ရှင်စေဖို့ ကျွန်တော့်ကို ဘုရားသခင် အရင်လွှတ်လိုက်တာပါ။ ၈ ဒီတော့ ကျွန်တော့်ကို ဒီပြည်လွှတ်လိုက်တာ အစ်ကိုတို့ မဟုတ်ပါဘူး။ စစ်မှန်တဲ့ ဘုရားသခင်ပါ။ ကျွန်တော့်ကို ဖာရောမင်းရဲ့ အကြံပေးအရာရှိ၊ နန်းတွင်းသားတွေရဲ့ သခင်၊ အီဂျစ်တစ်ပြည်လုံးကို အုပ်ချုပ်သူအဖြစ် ခန့်အပ်ချင်လို့ပါ။
အကြောင်းမဲ့ မုန်းတီးခံရ
၁၅ ကျွန်ုပ်တို့ကို အကြောင်းမဲ့မုန်းတီးသူတို့အပေါ် နာကြည်းစိတ်မရှိစေရန် အဘယ်အရာက ကူညီပေးနိုင်သနည်း။ ကျွန်ုပ်တို့၏အဓိကရန်သူများမှာ စာတန်နှင့် နတ်ဆိုးများဖြစ်ကြောင်း သတိရပါ။ (ဧဖက် ၆:၁၂) လူတချို့သည် ကျွန်ုပ်တို့ကို တမင်တကာ၊ သိလျက်နှင့် နှိပ်စက်ညှဉ်းပန်းကြသော်လည်း ဘုရားသခင့်လူမျိုးကို ဆန့်ကျင်သူအများစုသည် မသိကြ၍၊ သို့မဟုတ် အခြားသူများ၏ ကြိုးဆွဲမှုကို ခံရကြ၍ ထိုသို့ပြုလုပ်ကြ၏။ (ဒံယေလ ၆:၄-၁၆; ၁ တိမောသေ ၁:၁၂၊ ၁၃) ယေဟောဝါ၏အလိုတော်မှာ “လူအပေါင်းတို့သည် ကယ်တင်ခြင်းသို့ရောက်၍ [အမှန်]တရားကိုသိ” စေရန်ဖြစ်သည်။ (၁ တိမောသေ ၂:၄) ယခင်က အတိုက်အခံပြုသူတချို့သည် ကျွန်ုပ်တို့၏ အပြစ်တင်စရာမရှိသော အမူအကျင့်များကို တွေ့ရှိလာခဲ့ကြပြီးနောက် ယခု ကျွန်ုပ်တို့၏ ညီအစ်ကိုများ ဖြစ်နေကြပြီ။ (၁ ပေတရု ၂:၁၂) ထို့ပြင် ယာကုပ်၏သား ယောသပ်၏ပုံနမူနာမှ သင်ခန်းစာယူနိုင်ပါသည်။ ယောသပ်သည် ဖတူမိကွဲအစ်ကိုများကြောင့် အကြီးအကျယ် အခက်အခဲကြုံခဲ့ရသော်လည်း သူတို့အပေါ် ရန်လိုအငြိုးထားစိတ် မရှိခဲ့ပါ။ အဘယ်ကြောင့်နည်း။ ယေဟောဝါသည် ရည်ရွယ်တော်မူချက် ပြီးမြောက်စေရန် စနစ်တကျ စီစဉ်ဆောင်ရွက်ခဲ့ခြင်းဖြစ်ကြောင်း သူသဘောပေါက်လာသည်။ (ကမ္ဘာဦး ၄၅:၄-၈) ထိုနည်းအတိုင်းပင် ကျွန်ုပ်တို့ မတရားသဖြင့်ခံခဲ့ရသော အဘယ်အခက်အခဲမဆိုသည် ယေဟောဝါ၏နာမတော် ဘုန်းထင်ရှားရန် ဖြစ်သွားစေနိုင်၏။—၁ ပေတရု ၄:၁၆။
ကျမ်းစာဖတ်ရှုခြင်း
ဇွန် ၈-၁၄
ကျမ်းစာထဲက အဖိုးတန်ဘဏ္ဍာများ | ကမ္ဘာဦး ၄၆-၄၇
“အငတ်ဘေးမှ လွတ်မြောက်”
(ကမ္ဘာဦး ၄၇:၁၃) အငတ်ဘေး ပြင်းထန်လွန်းတဲ့အတွက် တစ်ပြည်လုံးမှာ အစားအစာ မရှိတော့ဘူး။ အငတ်ဘေးကြောင့် အီဂျစ်ပြည်ရော၊ ခါနန်ပြည်ရော ပြုတ်ပြုတ်ပြုန်းလာတယ်။
က၈၈ ၅/၁ ၁၈ ပိုဒ်. ၂
ဒုဗ္ဘိက္ခန္တရကပ်အတွင်း အသက်ချမ်းသာရာရစေခြင်း
၂ ဝပြောသောနှစ် ခုနစ်နှစ် ကုန်လေသည်။ ယေဟောဝါ ကြိုတင် မိန့်ကြားထားတော်မူသည်အတိုင်း ဒုဗ္ဘိက္ခန္တရကပ် ဆိုက်လေသည်။ အီဂျစ်ပြည်၌သာမဟုတ် “မြေပြင်တစ်လျှောက်လုံး၌” အစာခေါင်းပါးလေသည်။ အီဂျစ်ပြည်သူပြည်သား အပေါင်းတို့သည် မွတ်သိပ်သောအခါ စားစရာကို ရပါမည်အကြောင်း ဖာရောမင်းထံ၌ ကြွေးကြော်ကြသောအခါ “ယောသပ်ထံသို့ သွားကြ။ သူစီရင်သည်အတိုင်း ပြုကြ” ဟူ၍ သူတို့အား ဖာရောဆိုသည်။ အီဂျစ်ပြည်သူပြည်သားတို့ ငွေကုန်သည်အထိ သူတို့ကို ယောသပ် စပါးရောင်းပေးခဲ့သည်။ ထိုနောက် ငွေအစား သူတို့ တိရစ္ဆာန်များကို လက်ခံခဲ့သည်။ ထိုနောက် ပြည်သူပြည်သားတို့သည် ယောသပ်ထံ လာ၍ “အစာကိုပေး၍ ကျွန်တော်တို့နှင့် ကျွန်တော်တို့ မြေကို ဝယ်ပါ။ ကျွန်တော်တို့သည် မြေနှင့်တကွ ဖာရောဘုရင်၏ကျွန် ခံပါမည်” ဟုပြောကြပြန်သည်။ ထို့ကြောင့် အီဂျစ်မြေရှိသမျှကို ဖာရောမင်းအတွက် ယောသပ် ဝယ်ပေးလေသည်။—ကမ္ဘာဦး ၄၁:၅၃-၅၇။ ၄၇:၁၃-၂၀။
(ကမ္ဘာဦး ၄၇:၁၆) ဒါနဲ့ ယောသပ်က “ငွေကုန်သွားရင် တိရစ္ဆာန်တွေ ပေးကြ။ အစားအစာနဲ့ လဲပေးမယ်” လို့ပြောတယ်။
(ကမ္ဘာဦး ၄၇:၁၉၊ ၂၀) သခင့်ရှေ့မှာ ကျွန်တော်တို့ရော လယ်မြေတွေရော ဘာကြောင့် သေကျေပျက်စီးရမှာလဲ။ ကျွန်တော်တို့နဲ့ လယ်မြေတွေကို သိမ်းပြီး အစားအစာတွေ ပေးပါ။ ကျွန်တော်တို့ဟာ ဖာရောမင်းရဲ့ ကျွန်တွေ၊ လယ်မြေတွေလည်း ဖာရောမင်းရဲ့ လယ်မြေတွေ ဖြစ်ပါစေ။ မသေဘဲ အသက်ဆက်ရှင်ဖို့၊ လယ်မြေတွေ မပျက်စီးဖို့ မျိုးစေ့ ပေးပါ” လို့ပြောကြတယ်။ ၂၀ အငတ်ဘေး ပိုပြင်းထန်လာတော့ အီဂျစ်ပြည်သားအားလုံးက လယ်မြေတွေရောင်းတဲ့အတွက် ယောသပ်လည်း လယ်မြေတွေကို ဖာရောမင်းအတွက် ဝယ်တယ်။ ဒီလိုနဲ့ လယ်မြေအားလုံး ဖာရောမင်းအပိုင် ဖြစ်လာတယ်။
(ကမ္ဘာဦး ၄၇:၂၃-၂၅) ယောသပ်က “မင်းတို့ကိုရော လယ်မြေတွေကိုပါ ဖာရောမင်းအတွက် ဒီနေ့ ငါဝယ်လိုက်ပြီ။ လယ်မှာ စိုက်ပျိုးဖို့ မျိုးစေ့တွေယူကြ။ ၂၄ သီးနှံထွက်တဲ့အခါ ဖာရောမင်းကို ငါးပုံတစ်ပုံ ပေးရမယ်။ ကျန်တဲ့လေးပုံကို လယ်မှာ မျိုးကြဲနိုင်တယ်။ မင်းတို့နဲ့ အိမ်သားတွေ၊ ကလေးတွေ စားနိုင်တယ်” လို့ပြောတော့၊ ၂၅ လူတွေက “ကျွန်တော်တို့အသက်ကို သခင် ကယ်လိုက်ပါပြီ။ ကျွန်တော်တို့ဟာ သခင့်စိတ်နဲ့တွေ့တဲ့သူတွေ ဖြစ်ချင်ပါတယ်။ ဖာရောမင်းဆီမှာ ကျွန်ခံပါ့မယ်” လို့ပြောကြတယ်။
နိုင်ငံတော်က ဘုရားသခင့်အလိုတော်ကို မြေကြီးပေါ်မှာ ပြည့်စုံစေ
၁၁ ပေါများကြွယ်ဝမှု။ ဒီကမ္ဘာလောကကြီးက ပုံဆောင်သဘောအရ ငတ်ပြတ်နေတယ်၊ တစ်နည်းအားဖြင့် ဘုရားသခင်နဲ့ပတ်သက်တဲ့ အသိပညာ ငတ်ပြတ်နေတယ်။ “အရှင်ထာဝရဘုရား မိန့်တော်မူသည်ကား ‘မွတ်သိပ်ခြင်းဘေးကို တစ်ပြည်လုံး၌ ငါဖြစ်စေသောကာလ ရောက်လိမ့်မည်။ အစာခေါင်းပါး၍ မွတ်သိပ်ခြင်းဘေးမဟုတ်၊ ရေငတ်ခြင်းဘေးလည်းမဟုတ်၊ ထာဝရဘုရား၏ အမိန့်တော်ကို မကြားရသော မွတ်သိပ်ခြင်းဘေး ဖြစ်လိမ့်မည်’” လို့ ကျမ်းစာက သတိပေးတယ်။ (အာ. ၈:၁၁) ဘုရားသခင့်နိုင်ငံတော်ရဲ့ နိုင်ငံသားတွေကော ပုံဆောင်အငတ်ဘေး ကြုံနေရသလား။ ယေဟောဝါက သူ့လူမျိုးနဲ့ ရန်သူတွေရဲ့ ကွာခြားချက်ကို အခုလိုကြိုပြောတယ်– “ငါ၏ကျွန်တို့သည် စားကြလိမ့်မည်။ သင်တို့မူကား မွတ်သိပ်ကြလိမ့်မည်။ ငါ၏ကျွန်တို့သည် သောက်ကြလိမ့်မည်။ သင်တို့မူကား ရေငတ်ကြလိမ့်မည်။ ငါ၏ကျွန်တို့သည် ဝမ်းမြောက်ကြလိမ့်မည်။ သင်တို့မူကား ရှက်ကြောက်ကြလိမ့်မည်။” (ဟေရှာ. ၆၅:၁၃) အဲဒီစကားတွေ ပြည့်စုံတာကို သင်မြင်နေရသလား။
၁၂ ဘုရားသခင်နဲ့ ဆက်ဆံရေးကောင်းစေတဲ့ ပြင်ဆင်ပေးချက်တွေဟာ ကျယ်ပြန့်နက်ရှိုင်းတဲ့ မြစ်တစ်စင်းလို စီးဆင်းနေတယ်။ ပုံဆောင်အစာ ငတ်မွတ်နေတဲ့ ဒီလောကကြီးမှာ ကျွန်တော်တို့ကတော့ ကျမ်းစာအခြေပြု စာပေတွေ၊ အသံသွင်းထားတာတွေ၊ ဗီဒီယိုတွေ၊ အစည်းအဝေးနဲ့ စည်းဝေးကြီးတွေ၊ ဝက်ဘ်ဆိုက်မှာ တင်ထားတာတွေကနေတစ်ဆင့် ပုံဆောင်အစာ အလျှံပယ် ရရှိနေကြတယ်။ (ယေဇ. ၄၇:၁-၁၂; ယောလ ၃:၁၈) ပေါများကြွယ်ဝစေမယ်ဆိုတဲ့ ယေဟောဝါရဲ့ကတိစကား ပြည့်စုံတာကို သင့်ရဲ့နေ့စဉ်အသက်တာမှာ မြင်နေရတာ စိတ်လှုပ်ရှားစရာ မကောင်းဘူးလား။ ယေဟောဝါရဲ့စားပွဲမှာ သင် ပုံမှန်စားသုံးနေသလား။
ရှာဖွေလေ့လာ ဘုရားရေးရာရတနာ
(ကမ္ဘာဦး ၄၆:၄) ငါကိုယ်တိုင် မင်းနဲ့အတူ အီဂျစ်ပြည်ကို ဆင်းသွားပြီး အဲဒီကနေ မင်းကို ပြန်ခေါ်လာမယ်။ မင်းသေတဲ့အခါ ယောသပ်က မင်းမျက်လုံးကို မှိတ်ပေးလိမ့်မယ်” လို့ပြောတယ်။
it-1 ၂၂၀ ပိုဒ်. ၁
စိတ်နေသဘောထားနဲ့ ကိုယ်ဟန်အမူအရာ
သေတဲ့အခါ မျက်လုံးမှိတ်ပေး။ ယေဟောဝါက ယာကုပ်ကို “မင်းသေတဲ့အခါ ယောသပ်က မင်းမျက်လုံးကို မှိတ်ပေးလိမ့်မယ်” လို့ ပြောခဲ့တယ်။ (က ၄၆:၄) တကယ်တော့ အဲဒါက သားဦးလုပ်ရမယ့် တာဝန်ဖြစ်တယ်။ ဒါကြောင့် သားဦးအခွင့်အရေးကို ယောသပ်ရသင့်တယ်လို့ ယာကုပ်ကို ယေဟောဝါ ဖော်ပြတာ ဖြစ်ပုံရတယ်။—၁ရ ၅:၂။
(ကမ္ဘာဦး ၄၆:၂၆၊ ၂၇) အီဂျစ်ပြည်ကို ရောက်လာတဲ့ ယာကုပ်ရဲ့သားမြေးတွေက ချွေးမတွေမပါဘဲ စုစုပေါင်း ၆၆ ယောက် ရှိတယ်။ ၂၇ အီဂျစ်ပြည်မှာ ယောသပ်ရတဲ့သား နှစ်ယောက် ရှိတယ်။ အီဂျစ်ပြည်ကိုရောက်လာတဲ့ ယာကုပ်ရဲ့အိမ်သားအားလုံး အယောက် ၇၀ ရှိတယ်။
တ ၇:၁၄ nwtsty လေ့လာမှု မှတ်စု
စုစုပေါင်း ၇၅ ယောက်။ အီဂျစ်ပြည်ကို ပြောင်းလာတဲ့ ယာကုပ်ရဲ့မိသားစုဝင် စုစုပေါင်း ၇၅ ယောက်လို့ သတေဖန် ပြောတဲ့အခါ ဟီဘရူးကျမ်းစောင်တွေထဲက ကျမ်းချက်တစ်ချက်ကို ကိုးကားခဲ့တာ မဖြစ်နိုင်ဘူး။ ဒီကိန်းဂဏန်းကို ဟီဘရူးကျမ်းစောင်များရဲ့ မက်စိုရက်တစ်ကျမ်းမှာ မတွေ့ရဘူး။ က ၄၆:၂၆ မှာ “အီဂျစ်ပြည်ကို ရောက်လာတဲ့ ယာကုပ်ရဲ့သားမြေးတွေက ချွေးမတွေမပါဘဲ စုစုပေါင်း ၆၆ ယောက်ရှိတယ်” လို့ပြောတယ်။ အငယ် ၂၇ မှာ “အီဂျစ်ပြည်ကိုရောက်လာတဲ့ ယာကုပ်ရဲ့အိမ်သားအားလုံး အယောက် ၇၀ ရှိတယ်” လို့ ဆက်ပြောတယ်။ လူဦးရေကို နည်းနှစ်နည်းနဲ့ ဖော်ပြကြတယ်။ ပထမ ကိန်းဂဏန်းက သွေးသားအရင်းတွေရဲ့ အရေအတွက်ဖြစ်ပြီး ဒုတိယ ကိန်းဂဏန်းက အီဂျစ်ပြည်မှာ အခြေချနေထိုင်တဲ့ ယာကုပ်မိသားစုဝင် အားလုံးရဲ့ အရေအတွက် ဖြစ်တယ်။ ထွ ၁:၅ နဲ့ တရ ၁၀:၂၂ မှာလည်း ယာကုပ်သားမြေးတွေရဲ့ အရေအတွက်ကို “၇၀” လို့ ဖော်ပြထားတယ်။ သတေဖန်က တတိယ ကိန်းဂဏန်းကို ဖော်ပြတဲ့အတွက် ယာကုပ်ရဲ့ တခြားဆွေမျိုးတွေကိုပါ ထည့်ရေတွက်ထားတာ ဖြစ်ရမယ်။ စက်ပ်တွားဂျင့် ဘာသာပြန်ကျမ်းထဲက က ၄၆:၂၀ မှာ ယောသပ်ရဲ့သား မနာရှေနဲ့ ဧဖရိမ်ကို ဖော်ပြထားတယ်။ ဒါကြောင့် ၇၅ ယောက်ထဲမှာ ယောသပ်ရဲ့သား မနာရှေနဲ့ ဧဖရိမ်တို့ရဲ့ သားတွေ၊ မြေးတွေ ပါတယ်လို့ တချို့က ပြောကြတယ်။ က ၄၆:၂၆ မှာ ချွေးမတွေကို ထည့်မရေတွက်ထားဘူးလို့ ပြောထားတဲ့အတွက် အဲဒီကိန်းဂဏန်းထဲမှာ ယာကုပ်ရဲ့ ချွေးမတွေ ပါတယ်လို့ တချို့ ဆိုကြတယ်။ ဒါကြောင့် “၇၅ ယောက်” ဆိုတာ စုစုပေါင်း အရေအတွက် ဖြစ်ပုံရတယ်။ ဒီကိန်းဂဏန်းကို အေဒီ ပထမရာစုမှာ အသုံးပြုကြတဲ့ ဟီဘရူးကျမ်းစောင်တွေကနေ ယူထားတာ ဖြစ်နိုင်တယ်။ ဂရိစပ်တွားဂျင့်ကျမ်းထဲက က ၄၆:၂၇ နဲ့ ထွ ၁:၅ မှာ “၇၅ ယောက်” လို့ဖော်ပြထားမှန်း ကျမ်းပညာရှင်တွေ သိထားတာ ကြာပြီ။ အဲဒီအပြင် ၂၀ ရာစုမှာတွေ့ရှိခဲ့တဲ့ ပင်လယ်သေကျမ်းလိပ် အပိုင်းအစနှစ်ခုထဲက ဟီဘရူးဘာသာစကားနဲ့ ထွ ၁:၅ မှာလည်း “၇၅ ယောက်” လို့ ပါတယ်။ ဒါကြောင့် ၇၅ ယောက်လို့ သတေဖန် ပြောတဲ့အခါ အဲဒီ ရှေးဟောင်းစာမူ တစ်ခုခုကို အခြေခံခဲ့တာ ဖြစ်နိုင်တယ်။ ဘယ်အယူအဆပဲ မှန်ပါစေ သတေဖန်ပြောတဲ့ ကိန်းဂဏန်းက ယာကုပ်ရဲ့ သားစဉ်မြေးဆက် စုစုပေါင်းအရေအတွက်ကို တခြားနည်းတစ်နည်းနဲ့ ရေတွက်ထားခြင်းသာ ဖြစ်ပါတယ်။
ကျမ်းစာဖတ်ရှုခြင်း
ဇွန် ၁၅-၂၁
ကျမ်းစာထဲက အဖိုးတန်ဘဏ္ဍာများ| ကမ္ဘာဦး ၄၈-၅၀
“အသက်ကြီးသူတွေမှာ ဝေမျှစရာ များစွာရှိ”
(ကမ္ဘာဦး ၄၈:၂၁၊ ၂၂) အဲဒီနောက် အစ္စရေးက ယောသပ်ကို “အဖေ သေရတော့မယ်။ ဒါပေမဲ့ ဘုရားသခင်က မင်းတို့နဲ့အတူ အမြဲရှိနေမယ်။ မင်းတို့ကို ဘိုးဘေးတွေရဲ့ပြည်ဆီ ဆက်ဆက်ပြန်ပို့ပေးမယ်။ ၂၂ အဖေက မင်းကို အစ်ကိုတွေထက် နယ်မြေတစ်ခု ပိုပေးမယ်။ အဲဒီနယ်မြေဟာ အာမောရိလူမျိုးလက်ထဲကနေ အဖေ့ရဲ့ဓား၊ အဖေ့ရဲ့လေးနဲ့ သိမ်းယူခဲ့တဲ့ နယ်မြေပဲ” လို့ပြောတယ်။
it-1 ၁၂၄၆ ပိုဒ်. ၈
ယာကုပ်
ယာကုပ် မသေဆုံးခင်မှာ ယောသပ်ရဲ့သားတွေဖြစ်တဲ့ မြေးနှစ်ယောက်ကို ကောင်းချီးပေးခဲ့တယ်။ ဘုရားရဲ့ လမ်းညွှန်ချက်အရ သားကြီးမနာရှေထက် သားငယ် ဧဖရိမ်ကို ရှေ့တန်းတင်ခဲ့တယ်။ ပြီးတဲ့နောက် သားဦးအခွင့်အရေးအဖြစ် အမွေနှစ်ဆရမယ့် ယောသပ်ကို “အဖေက မင်းကို အစ်ကိုတွေထက် နယ်မြေတစ်ခု ပိုပေးမယ်။ အဲဒီနယ်မြေဟာ အာမောရိလူမျိုးလက်ထဲကနေ အဖေ့ရဲ့ဓား၊ အဖေ့ရဲ့လေးနဲ့ သိမ်းယူခဲ့တဲ့ နယ်မြေပဲ” လို့ ပြောတယ်။ (က ၄၈:၁-၂၂။ ၁ရ ၅:၁) ယာကုပ်ဟာ ရှေခင်မြို့နားက မြေကွက်ကို ဟာမော်ရဲ့သားတွေဆီကနေ အေးအေးချမ်းချမ်း ဝယ်ယူ (က ၃၃:၁၉၊ ၂၀) ခဲ့တာဖြစ်ပေမဲ့ ယာကုပ်ကိုယ်တိုင် သူ့ရဲ့ဓား၊ သူ့ရဲ့လေးနဲ့ သိမ်းယူခဲ့သလိုမျိုး ပြောတာကိုကြည့်ရင် ယောသပ်ကို ပေးခဲ့တဲ့ အဲဒီကတိက ယာကုပ်ရဲ့ ယုံကြည်ခြင်းကို ဖော်ပြပုံရတယ်။ အနာဂတ်မှာ မိမိရဲ့သားမြေးတွေက ခါနန်တွေကို တိုက်ခိုက်အနိုင်ရမယ်ဆိုတာကို ပရောဖက်ပြု ဖော်ပြခြင်း ဖြစ်တယ်။ ယောသပ်ရတဲ့ အမွေနှစ်ဆထဲမှာ ဧဖရိမ်အနွယ်နဲ့ မနာရှေအနွယ်ရတဲ့ နယ်မြေတွေ ပါဝင်တယ်။
(ကမ္ဘာဦး ၄၉:၁) ယာကုပ်က သားတွေကို ခေါ်ပြီးပြောတယ်- “မင်းတို့အားလုံး လူစုကြ။ အဆုံးပိုင်းကာလမှာ မင်းတို့ဘာဖြစ်မယ်ဆိုတာ အဖေပြောပြမယ်။
it-2 ၂၀၆ ပိုဒ်. ၁
နောက်ဆုံးနေ့များ
ယာကုပ် မသေဆုံးခင်လေးမှာ ကြိုဟောခဲ့။ ယာကုပ်က သားတွေကို ခေါ်ပြီး “မင်းတို့အားလုံး လူစုကြ။ အဆုံးပိုင်းကာလမှာ” ဒါမှမဟုတ် “နောင်ကာလအခါ” (ယုဒသန်) “မင်းတို့ ဘာဖြစ်မယ်ဆိုတာ အဖေ ပြောပြမယ်” လို့ပြောတဲ့အခါ မိမိပြောတဲ့စကားတွေဟာ နောင်အနာဂတ်မှာ ပြည့်စုံလာမယ်လို့ ဆိုလိုတာဖြစ်တယ်။ (က ၄၉:၁) အစောပိုင်း နှစ် ၂၀၀ ကျော်တုန်းက ယာကုပ်ရဲ့အဘိုး အာဗြံ (အာဗြဟံ) ကို ယေဟောဝါက အာဗြဟံရဲ့သားမြေးတွေ နှစ်ပေါင်း ၄၀၀ ညှဉ်းဆဲခံရလိမ့်မယ်လို့ ပြောခဲ့တယ်။ (က ၁၅:၁၃) ဒါကြောင့် ယာကုပ်ပြောတဲ့ “အဆုံးပိုင်းကာလ” ဆိုတာ ညှဉ်းဆဲခံရတဲ့ အနှစ် ၄၀၀ ပြည့်ပြီးနောက်ပိုင်းမှ စတင်မယ်ဆိုတာ ဖော်ပြတယ်။ (ကမ္ဘာဦးကျမ်း ၄၉ နဲ့ပတ်သက်တဲ့ အသေးစိတ်အချက်အလက်ကို ယာကုပ်ရဲ့သားတွေနာမည် အသီးသီးအောက်မှာ ကြည့်ပါ။) ပရောဖက်ပြုချက်ရဲ့ နောက်ပိုင်းပြည့်စုံမှုက “ဘုရားသခင်ရဲ့ အစ္စရေးလူမျိုး” နဲ့လည်း သက်ဆိုင်တယ်လို့ ပြောနိုင်ပါတယ်။—ဂလ. ၆:၁၆။ ရ ၉:၆။
(ကမ္ဘာဦး ၅၀:၂၄၊ ၂၅) နောက်တော့ ယောသပ်က “ငါသေရတော့မယ်။ ဒါပေမဲ့ ဘုရားသခင်က မင်းတို့ကို တကယ်သတိရလိမ့်မယ်။ မင်းတို့ကို ဒီပြည်ကနေ ဆက်ဆက်ခေါ်ထုတ်ပြီး အာဗြဟံ၊ အိဇက်၊ ယာကုပ်တို့ကို ကတိပေးထားတဲ့ပြည်ဆီ ခေါ်ဆောင်သွားမယ်” လို့ပြောတယ်။ ၂၅ ပြီးတော့ “မင်းတို့ကို ဘုရားသခင် တကယ်သတိရလိမ့်မယ်။ အဲဒီအခါကျရင် ငါ့အရိုးတွေကို ဒီနေရာကနေ သယ်သွားပါ” ဆိုပြီး အစ္စရေးရဲ့သားမြေးတွေကို သစ္စာဆိုခိုင်းတယ်။
သက်ကြီးရွယ်အိုများ—လူငယ်များအတွက် ကောင်းချီးတစ်ခုဖြစ်
၁၀ သက်ကြီးရွယ်အိုများသည် ယုံကြည်သူချင်းများအပေါ် ကောင်းသောသြဇာ လွှမ်းမိုးနိုင်ကြသည်။ ယာကုပ်၏သား ယောသပ်သည် အသက်အရွယ်အိုမင်းချိန်တွင် ယုံကြည်ခြင်းပါသည့် လုပ်ရပ်တစ်ခုကို ပြုလုပ်ခဲ့သည်၊ ယင်းက သူ့နောက်ပိုင်း အသက်ရှင်ခဲ့သော သန်းနှင့်ချီသည့် မှန်သောဝတ်ပြုကိုးကွယ်သူတို့အပေါ် အလွန်နက်ရှိုင်းစွာ အကျိုးဖြစ်ခဲ့သည်။ အသက် ၁၁၀ ရှိချိန်တွင် “မိမိအရိုးတို့၏ အကြောင်းကို မှာထား” ခဲ့ပြီး ဣသရေလလူမျိုး အီဂျစ်ပြည်မှ နောက်ဆုံးထွက်ခွာသည့်အခါ သူ၏အရိုးများကို ယူဆောင်သွားရန်ဖြစ်သည်။ (ဟေဗြဲ ၁၁:၂၂; ကမ္ဘာဦး ၅၀:၂၅) ယောသပ် သေဆုံးပြီးနောက် ဣသရေလလူမျိုး ဆင်းရဲခက်ခဲစွာ ကျွန်ခံခဲ့ရသည့် နှစ်များအတွင်း သူ၏အထက်ပါ မိန့်မှာချက်သည် မျှော်လင့်ချက်ရောင်ခြည်တစ်ခု ဖြစ်ခဲ့သည်၊ ကယ်နုတ်ခံရမည့်အချိန် ရောက်လာမည်ဟူသည့် အာမခံချက် ဖြစ်ခဲ့သည်။
ရှာဖွေလေ့လာ ဘုရားရေးရာရတနာ
(ကမ္ဘာဦး ၄၉:၁၉) ဂဒ်ကိုတော့ ဓားပြတွေ တိုက်ခိုက်လိမ့်မယ်။ ဒါပေမဲ့ သူက ထက်ကြပ်မကွာ လိုက်ပြီး ပြန်တိုက်ခိုက်လိမ့်မယ်။
ဘုရားသခင်၏ဘုန်းတော်ကို ထင်ရှားစေသူတို့သည် ကောင်းချီးခံစားရကြ
၄ ကတိထားရာပြည်ထဲ မဝင်မီ ဣသရေလလူမျိုးမှ ဂဒ်အမျိုးသားများသည် တိရစ္ဆာန်အတွက် စားကျက်ကောင်းသော ယော်ဒန်မြစ် အရှေ့ပိုင်း၌ အခြေချနေထိုင်ခွင့်ပေးရန် တောင်းဆိုခဲ့ကြသည်။ (တောလည်ရာ ၃၂:၁-၅) ထိုဒေသတွင် အခြေချနေထိုင်ရန် ဆိုးရွားသော စိန်ခေါ်ချက်များကို ရင်ဆိုင်ကြရလိမ့်မည်။ ယော်ဒန်မြစ် အနောက်ဘက်ခြမ်းရှိ မျိုးနွယ်များသည် ရန်သူများမှ သဘာဝအရံအတားဖြစ်သော ယော်ဒန်ချိုင့်ဝှမ်း ရှိ၏။ (ယောရှု ၃:၁၃-၁၇) သို့ရာတွင် ယော်ဒန်မြစ် အရှေ့ပိုင်းမှ ဒေသများနှင့်ပတ်သက်၍ ဂျော့ဂ်ျ အယ်ဒမ် စမစ်သ်၏ သန့်ရှင်းသောမြေ၏ သမိုင်းဝင်ပထဝီဝင်စာအုပ်က ဤသို့ဆိုသည်– “ထိုနယ်မြေသည် အာရေဗျကုန်းပြင်မြင့်ကြီးပေါ်တွင် အရံအတားမရှိ ပြန့်ပြူးသည့်ဒေသ ဖြစ်၏။ ထို့ကြောင့် ၎င်းဒေသ၌ နေထိုင်သူများသည် ရေကြည်ရာမြက်နုရာ လှည့်လည်သွားလာနေထိုင်သူတို့၏ ကျူးကျော်မှုကို ခေတ်အဆက်ဆက်ခံရပြီး နှစ်တိုင်းလိုလို စားကျက်လုခံရကြသည်။”
၅ ဂဒ်မျိုးနွယ်သည် ထိုသို့ အမြဲဖိအားပေးခံရသည့်အတွက် သူတို့အခြေအနေ မည်သို့ရှိသနည်း။ ရာစုနှစ်များစွာက ၎င်းတို့၏ဘိုးဘေးဖြစ်သူ ယာကုပ် မသေဆုံးမီလေးတွင် ဤသို့ကြိုတင်ပရောဖက်ပြုခဲ့သည်– “ဂဒ်မှာမူ တပ်သားတို့သည် သူ့ကို တိုက်ခိုက်လုယက်လိမ့်မည်။ သူမူကား နောက်ကလိုက်၍ ပြန်တိုက်လိမ့်မည်။” (ကမ္ဘာဦး ၄၉:၁၉၊ သမ္မာ) အပေါ်ယံကြည့်လျှင် ယင်းစကားများသည် စိတ်ပျက်ဖွယ်ဖြစ်ပုံရ၏။ အမှန်မှာ ဂဒ်အမျိုးသားများအား ပြန်တိုက်ခိုက်ဖို့ မိန့်မှာနေခြင်းဖြစ်၏။ ထိုသို့ပြန်တိုက်ခိုက်သည့်အခါ ကျူးကျော်သူများသည် အရှက်တကွဲ ထွက်ပြေးနေကြစဉ် ဂဒ်အမျိုးသားများ သူတို့နောက် လိုက်တိုက်လိမ့်မည်ဟု ယာကုပ် အခိုင်အမာ ပြောခဲ့သည်။
(ကမ္ဘာဦး ၄၉:၂၇) ဗင်ယာမိန်က ဝံပုလွေလို ကိုက်ဖဲ့နေလိမ့်မယ်။ မနက်ပိုင်းမှာ သားကောင်ကို ကိုက်စားပြီး ညနေပိုင်းမှာ တိုက်ရာပါဥစ္စာတွေကို ခွဲဝေမယ်။
it-1 ၂၈၉ ပိုဒ်. ၂
ဗင်ယာမိန်
ယာကုပ် မသေဆုံးခင်မှာ ဗင်ယာမိန် သားမြေးတွေရဲ့ တိုက်ခိုက်စွမ်းရည်နဲ့ ပတ်သက်ပြီး ဒီလို ပြောခဲ့တယ်– “ဗင်ယာမိန်က ဝံပုလွေလို ကိုက်ဖဲ့နေလိမ့်မယ်။ မနက်ပိုင်းမှာ သားကောင်ကို ကိုက်စားပြီး ညနေပိုင်းမှာ တိုက်ရာပါဥစ္စာတွေကို ခွဲဝေမယ်။” (က ၄၉:၂၇) ဗင်ယာမိန်တပ်သားတွေရဲ့ လောက်လွှဲပစ် စွမ်းရည်ဟာ ထင်ရှားကျော်ကြားတယ်။ ဘယ်လက်နဲ့ပဲဖြစ်ဖြစ်၊ ညာလက်နဲ့ပဲဖြစ်ဖြစ် “ဆံခြည်တစ်မျှင် မလွဲအောင်” ပစ်နိုင်တယ်။ (သူ ၂၀:၁၆။ ၁ရ ၁၂:၂) ဘုရင်ဧဂလုန်ကို သတ်ခဲ့တဲ့ ဘယ်သန် တရားသူကြီး ဧဟုဒဟာ ဗင်ယာမိန်အမျိုး ဖြစ်တယ်။ (သူ ၃:၁၅-၂၁) အစ္စရေးနိုင်ငံရဲ့ သမိုင်းအစဖြစ်တဲ့ “မနက်ပိုင်း” မှာ “အငယ်ဆုံးဖြစ်တဲ့ ဗင်ယာမိန်အနွယ်” ထဲက ကိရှရဲ့သား ရှောလုဟာ ပထမဆုံးဘုရင် ဖြစ်လာတယ်။ သူဟာ ဖိလိတိလူမျိုးကို ပြင်းပြင်းထန်ထန် တိုက်ခိုက်ခဲ့သူ ဖြစ်တယ်။ (၁ရှ ၉:၁၅-၁၇၊ ၂၁) အလားတူ အစ္စရေးလူမျိုး အရေးကြုံချိန်ဖြစ်တဲ့ “ညနေပိုင်း” မှာလည်း ဗင်ယာမိန်အနွယ်ဖြစ်တဲ့ မိဖုရား ဧသတာနဲ့ ဝန်ကြီးချုပ် မော်ဒကဲဟာ ပါးရှားအင်ပါယာရဲ့ မျိုးဖြုတ်သတ်ဖြတ်မှုကနေ အစ္စရေးလူမျိုးကို ကယ်တင်ခဲ့တယ်။—ဧ ၂:၅-၇။
ကျမ်းစာဖတ်ရှုခြင်း
ဇွန် ၂၂-၂၈
ကျမ်းစာထဲက အဖိုးတန်ဘဏ္ဍာများ | ထွက်မြောက်ရာ ၁-၃
“ငါဖြစ်ချင်တာ မှန်သမျှ ငါဖြစ်လာမယ်”
(ထွက်မြောက်ရာ ၃:၁၃) ဒါပေမဲ့ မောရှေက “အစ္စရေးတွေဆီ သွားပြီး ‘ဘိုးဘေးတို့ရဲ့ဘုရားက ကျွန်တော့်ကို စေလွှတ်လိုက်တာ’ လို့ပြောတဲ့အခါ ‘အဲဒီဘုရားနာမည်က ဘာလဲ’ လို့ သူတို့မေးခဲ့ရင် ဘာပြန်ပြောရမလဲ” ဆိုပြီး ဘုရားသခင်ကို မေးတယ်။
ယေဟောဝါရဲ့ ကြီးမြတ်တဲ့နာမည်ကို ဂုဏ်တင်ပါ
၄ ထွက်မြောက်ရာ ၃:၁၀-၁၅ ကိုဖတ်ပါ။ မောရှေအသက် ၈၀ ရှိတဲ့အခါမှာ ဘုရားသခင်က သူ့ကို “ငါ၏လူ ဣသရေလအမျိုးသားတို့ကို အဲဂုတ္တုပြည်မှ နုတ်ဆောင်” ပါ ဆိုတဲ့ အရေးကြီးတဲ့ အမိန့်တစ်ခု ပေးခဲ့တယ်။ အဲဒီအခါမှာ မောရှေက ‘ကိုယ်တော့်နာမည်က ဘာလဲ’ ဆိုတဲ့ အလွန်အဓိပ္ပာယ်ရှိတဲ့ မေးခွန်းတစ်ခုကို လေးလေးစားစား ပြန်မေးခဲ့တယ်။ ဘုရားသခင့်နာမည်ကို သိထားတာ ကြာနေပြီဖြစ်ပါလျက်နဲ့ မောရှေ ဘာကြောင့် ဒီမေးခွန်းကို မေးခဲ့တာလဲ။ အဲဒီနာမည်ကို ခံယူထားတဲ့ပုဂ္ဂိုလ်အကြောင်း မောရှေ ပိုသိချင်လို့ပဲ။ အစ္စရေးလူတွေကို ဘုရားသခင် တကယ်ကယ်တင်မယ်ဆိုတာ သူတို့ကို မောရှေ ယုံကြည်စေချင်တယ်။ မောရှေ အဲဒီလိုယုံကြည်စေချင်တာ သဘာဝကျပါတယ်၊ ဘာကြောင့်လဲဆိုတော့ အစ္စရေးလူတွေ ကျွန်ဘဝရောက်နေတာ အတော်ကြာနေပြီ။ ဘိုးဘေးတွေရဲ့ ဘုရားက တကယ် ကယ်တင်နိုင်မလားဆိုတာ သူတို့ သံသယရှိနေနိုင်တယ်။ တချို့အစ္စရေးလူတွေဆိုရင် အီဂျစ်ဘုရားတွေကိုတောင် ဝတ်ပြုကိုးကွယ်နေကြပြီ။—ယေဇ. ၂၀:၇၊ ၈။
(ထွက်မြောက်ရာ ၃:၁၄) ဒါနဲ့ ဘုရားသခင်က “‘ငါဖြစ်ချင်တာမှန်သမျှ ငါဖြစ်လာမယ်’ ဆိုတာ ငါ့နာမည်ပဲ။ ‘ငါဖြစ်လာမယ်လို့ နာမည်ရှိတဲ့အရှင်က စေလွှတ်လိုက်တာ’ ဆိုပြီး အစ္စရေးတွေကို ပြောရမယ်” လို့မောရှေကို ပြောတယ်။
kr ၄၃၊ လေးထောင့်ကွက်
ဘုရားသခင့်နာမည်ရဲ့ အဓိပ္ပာယ်
ယေဟောဝါဆိုတဲ့နာမည်က “ဖြစ်လာစေသည်” လို့အဓိပ္ပာယ်ရတဲ့ ဟေဗြဲကြိယာကနေ ဆင်းသက်လာတယ်။ ဒါကြောင့် ဘုရားသခင့်နာမည်က “ကိုယ်တော် ဖြစ်လာစေသည်” လို့အဓိပ္ပာယ်ရတယ်။ ယေဟောဝါက ဖန်ဆင်းရှင်ဖြစ်တဲ့အတွက် ဒီအဓိပ္ပာယ်ဖွင့်ဆိုချက်နဲ့ တကယ်ကိုက်ညီတယ်။ ကိုယ်တော်ဟာ စကြဝဠာကြီးနဲ့ အသိဉာဏ်ရှိသတ္တဝါတွေကို ဖြစ်ပေါ်လာစေခဲ့တယ်။ ကိုယ်တော့်အလိုတော်နဲ့ ရည်ရွယ်ချက်ကိုလည်း ဆက်ပြီး အမှန်တကယ် ဖြစ်လာစေတယ်။
ဒါဆိုရင် ထွက်မြောက်ရာ ၃:၁၃၊ ၁၄ (ကဘ) မှာ မောရှေရဲ့ မေးခွန်းကို ယေဟောဝါ အဖြေပေးတာနဲ့ ပတ်သက်ပြီး ဘယ်လို နားလည်သင့်သလဲ။ မောရှေက ‘အစ္စရေးတွေဆီသွားပြီး “ဘိုးဘေးတို့ရဲ့ ဘုရားသခင်က ကျွန်တော့်ကို စေလွှတ်လိုက်တာ” လို့ပြောတဲ့အခါ “အဲဒီဘုရားနာမည်က ဘာလဲ” လို့ သူတို့မေးခဲ့ရင် ဘာပြန်ပြောရမလဲ’ ဆိုပြီးမေးတယ်။ ဒါနဲ့ ယေဟောဝါက ‘ငါဖြစ်ချင်တာမှန်သမျှ ငါဖြစ်လာမယ် ဆိုတာ ငါ့နာမည်ပဲ’ လို့ပြန်ဖြေတယ်။
မောရှေက ယေဟောဝါရဲ့နာမည်ကို မေးနေတာ မဟုတ်ဘူးဆိုတာ သတိပြုပါ။ မောရှေနဲ့ အစ္စရေးလူမျိုးတွေက ဘုရားသခင်ကို ကောင်းကောင်းသိပြီးသားပဲ။ ကိုယ်တော်ဟာ ဘယ်လို ဘုရားမျိုးဖြစ်တယ် ဆိုတာနဲ့ပတ်သက်ပြီး ယုံကြည်ခြင်းခိုင်ခံ့စေမယ့်အရာ တစ်ခုခု၊ ကိုယ်တော့်နာမည်ရဲ့ အဓိပ္ပာယ်ကို ဖော်ပြပေးမယ့်အရာ တစ်ခုခုကို ပြောပြဖို့ မောရှေ တောင်းဆိုနေတာ ဖြစ်တယ်။ ယေဟောဝါက ‘ငါဖြစ်ချင်တာမှန်သမျှ ငါဖြစ်လာမယ် ဆိုတာ ငါ့နာမည်ပဲ’ လို့ဖြေလိုက်ခြင်းအားဖြင့် မိမိကိုယ်တိုင်နဲ့ပတ်သက်တဲ့ စိတ်လှုပ်ရှားစရာ အချက်တစ်ချက်ကို ဖော်ပြခဲ့တယ်။ အဲဒါကတော့ ကိုယ်တော်ဟာ မိမိရည်ရွယ်ချက်ပြည့်စုံစေဖို့ အခြေအနေတစ်ခုစီမှာ လိုအပ်သလို ဘာမဆိုဖြစ်လာတယ် ဆိုတဲ့အချက်ပဲ။ ဥပမာအနေနဲ့၊ ယေဟောဝါက မောရှေနဲ့ အစ္စရေးလူမျိုးအတွက် ကယ်တင်ရှင်၊ ပညတ်ပေးရှင်၊ ထောက်ပံ့ပေးရှင် ဖြစ်လာတဲ့အပြင် တခြားအရာများစွာလည်း ဖြစ်လာခဲ့တယ်။ ဒါကြောင့် ယေဟောဝါက သူ့လူမျိုးကိုပေးတဲ့ကတိတွေ ပြည့်စုံစေဖို့ သူဖြစ်ချင်တာမှန်သမျှ သူဖြစ်လာတယ်။ ဒါပေမဲ့ ယေဟောဝါ ဆိုတဲ့နာမည်မှာ အဲဒါထက်မက ပါဝင်တယ်။ ကိုယ်တော်က သူ့ရည်ရွယ်ချက် ပြည့်စုံစေဖို့ သူဖန်ဆင်းထားရာတွေကိုလည်း ဘာမဆိုဖြစ်လာစေတယ်။
ရှာဖွေလေ့လာ ဘုရားရေးရာရတနာ
(ထွက်မြောက်ရာ ၂:၁၀) ကလေးကြီးပြင်းလာတဲ့အခါ ဖာရောရဲ့သမီးတော်ဆီ ခေါ်သွားတော့ သမီးတော်က သားအဖြစ် မွေးစားလိုက်တယ်။ “သူ့ကို ရေထဲကနေ ငါဆယ်ယူခဲ့တယ်” ဆိုပြီး မောရှေလို့ နာမည်ပေးတယ်။
မောရှေ—တကယ်ရှိခဲ့သူလား၊ ဒဏ္ဍာရီပုဂ္ဂိုလ်လား
အီဂျစ်မင်းသမီးတစ်ပါးက ကလေးတစ်ယောက်ကို ကောက်ယူမွေးစားတယ်လို့ လက်ခံယုံကြည်တာက မဖြစ်နိုင်တဲ့ ကိစ္စလား။ မဟုတ်ပါဘူး။ ကောင်းကင်သွားဖို့ ကြင်နာတဲ့ လုပ်ရပ်တွေ လုပ်ဖို့လိုတယ်လို့ အီဂျစ်ဘာသာရေးက သင်ပေးတယ်။ ကလေးမွေးစားတာနဲ့ပတ်သက်ပြီး ရှေးဟောင်းသုတေသနပညာရှင် ဂျွိုက်စ် တေစလီ ဒီလို ပြောတယ်– “အီဂျစ်အမျိုးသမီးတွေဟာ အီဂျစ်အမျိုးသားတွေနဲ့ တန်းတူ အခွင့်အရေးရှိတယ်။ တရားဥပဒေအရ၊ စီးပွားရေးအရ၊ အတွေးအခေါ်ပိုင်းမှာတောင် တန်းတူအခွင့်အရေးရှိတယ်။ . . . အမျိုးသမီးတွေ ကလေးမွေးစားခွင့် ရှိတယ်။” ရှေးဟောင်း ကျူစာတစ်ခုမှာ အီဂျစ်အမျိုးသမီးတစ်ယောက်က သူ့ကျွန်တွေကို မွေးစားခဲ့တဲ့အကြောင်း မှတ်တမ်းတင်ထားတယ်။ မောရှေရဲ့မိခင်ကို အထိန်းအဖြစ် ငှားတာနဲ့ ပတ်သက်ပြီး ကျမ်းစာအဘိဓာန်တစ်အုပ်မှာ ဒီလို ပြောတယ်– “မောရှေရဲ့ မိခင်ရင်းကို ကလေးထိန်းခပေးတာက . . . မက်ဆိုပိုတေးမီးယားဒေသက မွေးစားခြင်းဆိုင်ရာ စာချုပ်တွေမှာပါတဲ့ အချက်တွေနဲ့ အတူတူပဲ ဖြစ်တယ်။”
(ထွက်မြောက်ရာ ၃:၁) မောရှေက ယောက္ခမဖြစ်သူ မိဒျန်လူမျိုး ပုရောဟိတ်ယေသရောရဲ့ သိုးအုပ်ကို ထိန်းကျောင်းရတယ်။ သူက သိုးအုပ်ကို တောအနောက်ဘက်မှာ ကျောင်းရင်း ဟောရပ်လို့ခေါ်တဲ့ ဘုရားသခင့်တောင်ကို ရောက်လာတယ်။
ထွက်မြောက်ရာကျမ်းမှ ပေါ်လွင်ချက်များ
၃:၁—ယေသရောသည် မည်သို့သော ယဇ်ပုရောဟိတ်မျိုး ဖြစ်သနည်း။ ဖခင်ကြီးစိုးသည့်ခေတ်တွင် အိမ်ထောင်ဦးစီးသည် သူ့မိသားစုအတွက် ယဇ်ပုရောဟိတ်အဖြစ် အမှုထမ်းသည်။ ယေသရောသည် မိဒျန်လူမျိုးစု၏ ခေါင်းဆောင်ဖြစ်ကြောင်း ထင်ရှားသည်။ မိဒျန်လူမျိုးတို့သည် ကေတုရနှင့်ရသော အာဗြဟံ၏ သားစဉ်မြေးဆက်များဖြစ်သောကြောင့် ယေဟောဝါအား ဝတ်ပြုခြင်းအကြောင်းကို သူတို့သိရှိထားဖို့ အကြောင်းရှိပေမည်။—ကမ္ဘာဦး ၂၅:၁၊ ၂။
ကျမ်းစာဖတ်ရှုခြင်း
ဇွန် ၂၉–ဇူလိုင် ၅
ကျမ်းစာထဲက အဖိုးတန်ဘဏ္ဍာများ | ထွက်မြောက်ရာ ၄-၅
“မင်းစကားပြောတဲ့အခါ မင်းနဲ့အတူ ငါရှိနေမယ်”
(ထွက်မြောက်ရာ ၄:၁၀) မောရှေက “ယေဟောဝါဘုရား၊ တစ်ခွန်းလောက် ပြောပါရစေဦး။ ကျွန်တော်ဟာ ဟိုးအရင်ကတည်းက စကားပြောသွက်လက်သူ မဟုတ်ပါဘူး။ ကိုယ်တော်နဲ့ စကားစပြောချိန်မှာလည်း နှုတ်သွက်လျှာသွက်သူ မဟုတ်ပါဘူး” လို့ယေဟောဝါကို ပြောတယ်။
(ထွက်မြောက်ရာ ၄:၁၃) ဒါပေမဲ့ မောရှေက “ယေဟောဝါဘုရား၊ ကျွန်တော်ပြောပါရစေဦး။ တခြားတစ်ယောက်ကို စေလွှတ်လို့ မရဘူးလား” လို့ပြောပြန်တယ်။
ဆင်ခြေပေးခြင်းကို ယေဟောဝါ ဘယ်လိုရှုမြင်သလဲ
“အရည်အချင်းမရှိဘူး။” သတင်းကောင်းဟောဖို့ အရည်အချင်းမရှိဘူးလို့ သင်ခံစားရနိုင်တယ်။ သမ္မာကျမ်းစာခေတ်က ဘုရားသခင့် သစ္စာရှိကျေးကျွန် တချို့လည်း ယေဟောဝါ သူတို့ကိုပေးအပ်တဲ့ တာဝန်တွေကို ထမ်းဆောင်ဖို့ အရည်အချင်း မပြည့်မီဘူးလို့ ခံစားခဲ့ကြရတယ်။ ဥပမာအနေနဲ့ မောရှေကို ကြည့်ပါ။ ယေဟောဝါထံက တာဝန်တစ်ခု ရတဲ့အခါ မောရှေ ဒီလိုပြောခဲ့တယ်– ‘အို ယေဟောဝါ၊ အကျွန်ုပ်သည် နှုတ်သတ္တိမရှိပါ။ အထက်ကလည်း မရှိပါ။ ကိုယ်တော်ကျွန်အား မိန့်တော်မူသောအခါ၌ပင် မရှိပါ။ နှုတ်လေးသောသူ၊ စကားနှေးနှေး ပြောတတ်သောသူ ဖြစ်ပါ၏။’ ယေဟောဝါက သူ့ကို စိတ်ချအောင်ပြောပေမဲ့ မောရှေ ဒီလိုပြန်ပြောခဲ့တယ်– ‘အို ယေဟောဝါ၊ အလိုတော်ရှိသောသူ၏လက်တွင် ပေးလိုက်တော်မူပါ။” (ထွ. ၄:၁၀-၁၃) ဒါကို ယေဟောဝါ ဘယ်လိုတုံ့ပြန်ခဲ့သလဲ။
(ထွက်မြောက်ရာ ၄:၁၁၊ ၁၂) ယေဟောဝါက “လူ့နှုတ်ကို ဘယ်သူဖန်ဆင်းသလဲ။ ဆွံ့အသူ၊ နားမကြားသူ၊ မျက်စိမြင်သူ၊ မျက်စိမမြင်သူကို ဘယ်သူဖန်ဆင်းသလဲ။ ငါယေဟောဝါပဲ မဟုတ်လား။ ၁၂ ဒါကြောင့် အခု သွားပါ။ မင်းစကားပြောတဲ့အခါ မင်းနဲ့အတူ ငါရှိနေမယ်။ ဘာပြောရမယ်ဆိုတာ သင်ပေးမယ်” လို့ပြောတယ်။
မမြင်ရတဲ့အရှင်ကို သင် မြင်ရသလား
၅ မောရှေ အီဂျစ်ပြည်ကို ပြန်မသွားခင်မှာ ဘုရားသခင်က သူ့ကို အရေးကြီးတဲ့ သင်ခန်းစာတစ်ခု သင်ပေးခဲ့တယ်။ အဲဒီသင်ခန်းစာကို နောက်ပိုင်းမှာ မောရှေက ယောဘကျမ်းမှာ ထည့်ရေးခဲ့တယ်။ အဲဒါကတော့ ‘ယေဟောဝါကို ကြောက်ရွံ့ခြင်းက ဉာဏ်ပညာပဲ’ ဆိုတဲ့အချက်ဖြစ်တယ်။ (ယောဘ ၂၈:၂၈) ယေဟောဝါကို ကြောက်ရွံ့ပြီး ပညာရှိရှိ လုပ်ဆောင်နိုင်အောင် မောရှေကို ကူညီပေးရာမှာ ယေဟောဝါက မိမိနဲ့ လူသားတွေရဲ့ ကွာခြားမှုကို ဒီလိုဖော်ပြခဲ့တယ်– “လူ့နှုတ်ကို ဘယ်သူ ဖန်ဆင်းသလဲ။ ဆွံ့အသူ၊ နားမကြားသူ၊ မျက်စိမြင်သူ၊ မျက်စိမမြင်သူကို ဘယ်သူ ဖန်ဆင်းသလဲ။ ငါယေဟောဝါပဲ မဟုတ်လား။”—ထွ. ၄:၁၁၊ ကဘ။
6 သင်ခန်းစာက ဘာလဲ။ မောရှေကို စေလွှတ်သူက ယေဟောဝါ ဖြစ်တယ်၊ ဒါကြောင့် သူကြောက်ဖို့မလိုဘူး။ ဖာရောကို ဘုရားသခင့်သတင်းစကား ပြောပြဖို့ မောရှေကို ဘုရားသခင် တန်ခိုးပေးမှာဖြစ်တယ်။ ဒါ့အပြင် ဘုရားသခင့်ကျေးကျွန်တွေ အီဂျစ်ပြည်မှာ အန္တရာယ်ကြုံရတာ ဒါ ဦးဆုံးအကြိမ် မဟုတ်ဘူး။ အရင် ဖာရောဘုရင်တွေ လက်ထက်တုန်းက အာဗြဟံ၊ ယောသပ်နဲ့ သူကိုယ်တိုင်ကို ယေဟောဝါ ဘယ်လို ကာကွယ်ခဲ့တယ်ဆိုတာ မောရှေ ပြန်စဉ်းစားမိမှာပဲ။ ယေဟောဝါနဲ့ ယှဉ်လိုက်ရင် ဖာရောမှာ ဘာတန်ခိုးမှ မရှိပါဘူး။ (က. ၁၂:၁၇-၁၉; ၄၁:၁၄၊ ၃၉-၄၁; ထွ. ၁:၂၂–၂:၁၀) မောရှေဟာ မမြင်ရတဲ့အရှင်ကို မြင်တဲ့အတွက်ကြောင့် ဖာရောဆီကို သတ္တိရှိရှိသွားပြီး ယေဟောဝါ ပြောခိုင်းတာကို တစ်ခွန်းမကျန် ပြောပြခဲ့တယ်။
(ထွက်မြောက်ရာ ၄:၁၄၊ ၁၅) ယေဟောဝါလည်း မောရှေကို အမျက်ထွက်ပြီး “မင်းအစ်ကို လေဝိအမျိုးသား အာရုန် ရှိတာပဲ။ သူစကားပြောကောင်းမှန်း ငါသိတယ်။ အခု မင်းကိုတွေ့ဖို့ သူလာနေပြီ။ မင်းကိုတွေ့ရင် သူဝမ်းသာမှာပဲ။ ၁၅ ငါမှာထားသမျှ သူ့ကို ပြောပြလိုက်။ မင်းတို့စကားပြောတဲ့အခါ မင်းတို့နှစ်ယောက်စလုံးနဲ့အတူ ငါရှိနေမယ်။ ဘာလုပ်ရမယ်ဆိုတာ ငါသင်ပေးမယ်။
ဆင်ခြေပေးခြင်းကို ယေဟောဝါ ဘယ်လိုရှုမြင်သလဲ
ယေဟောဝါက မောရှေကို တာဝန်ကနေ လွတ်ကင်းခွင့် မပေးခဲ့ဘူး။ ဒါပေမဲ့ မောရှေကို အကူအညီပေးဖို့ အာရုန်ကို ခန့်အပ်ခဲ့တယ်။ (ထွ. ၄:၁၄-၁၇) ဒါ့အပြင် နှစ်ပေါင်းများစွာကြာတဲ့အထိ ယေဟောဝါ ခန့်အပ်ထားတဲ့ တာဝန်တွေကို မောရှေ အောင်မြင်စွာ ထမ်းဆောင်နိုင်ဖို့ လိုအပ်ရာတွေကိုလည်း ထောက်မပေးခဲ့တယ်။ ယနေ့လည်း ယေဟောဝါက သင် ဓမ္မအမှုမှာ ပါဝင်တဲ့အခါ အကူအညီပေးဖို့ အတွေ့အကြုံရှိတဲ့ ယုံကြည်သူချင်းတွေကို လှုံ့ဆော်ပေးပါလိမ့်မယ်။ အရေးအကြီးဆုံးအချက်က ယေဟောဝါ ပေးအပ်ထားတဲ့တာဝန်ကို လုပ်ဆောင်ဖို့ ကျွန်ုပ်တို့ကို ကိုယ်တော် အရည်အချင်း ပြည့်မီစေနိုင်တယ်ဆိုပြီး သမ္မာကျမ်းစာက အာမခံထားတယ်။—၂ ကော. ၃:၅။ “ကျွန်တော့်ဘဝရဲ့ အပျော်ရွှင်ဆုံးနှစ်တွေ” လေးထောင့်ကွက်ကို ကြည့်ပါ။
ရှာဖွေလေ့လာ ဘုရားရေးရာရတနာ
(ထွက်မြောက်ရာ ၄:၂၄-၂၆) ဒီလိုနဲ့ လမ်းမှာ တည်းခိုတဲ့နေရာရောက်တော့ ယေဟောဝါက သူနဲ့တွေ့ပြီး သူ့ကို သတ်ဖို့လုပ်တယ်။ ၂၅ အဲဒီအခါ ဇိပေါရက မီးခတ်ကျောက်ကိုယူပြီး သားရဲ့အရေဖျားကို ဖြတ်လိုက်တယ်။ အဲဒီအရေဖျားကို ခြေတော်ရင်းမှာ ထားပြီး “ရှင်ဟာ ကျွန်မအတွက် သွေးနဲ့ကတိသစ္စာပြုထားတဲ့ လင်ယောက်ျားပဲ” လို့ပြောတယ်။ ၂၆ ဒါနဲ့ ဘုရားသခင်က သူ့ကို လွှတ်ပေးလိုက်တယ်။ ဇိပေါရလည်း အဲဒီလို အရေဖျားဖြတ်လိုက်တဲ့အတွက် “ရှင်ဟာ သွေးနဲ့ကတိသစ္စာပြုထားတဲ့ လင်ယောက်ျားပဲ” ဆိုပြီးပြောတယ်။
စာရှုသူများထံမှ မေးခွန်းလွှာ
“သင်သည် ကျွန်မ၌ အသွေးနှင့်ယှဉ်သော လင်ဖြစ်သည်” ဟူသော ဇိပေါရ၏ အသုံးအနှုန်းက တစ်မူထူး၏။ ယင်းက သူနှင့်ပတ်သက်၍ အဘယ်အရာ ဖော်ပြသနည်း။ အရေဖျားလှီးခြင်း ပဋိညာဉ်၏ တောင်းဆိုချက်များကို လိုက်နာခြင်းဖြင့် ဇိပေါရသည် ယေဟောဝါနှင့် ပဋိညာဉ်ဆိုင်ရာ ဆက်ဆံရေးရှိကြောင်း အသိအမှတ်ပြုခဲ့သည်။ ပဋိညာဉ်ဆိုင်ရာ ဆက်ဆံရေးတွင် ယေဟောဝါကို လင်ယောက်ျားအဖြစ် အခြားတစ်ဖက်ကို ဇနီးအဖြစ် သဘောထားနိုင်ကြောင်း နောက်ပိုင်းတွင် ဣသရေလလူမျိုးနှင့်ဖွဲ့ခဲ့သော ပညတ်ပဋိညာဉ်က ဖော်ပြသည်။ (ယေရမိ ၃၁:၃၂) ထို့ကြောင့် (ကိုယ်စားလှယ် ကောင်းကင်တမန်မှတစ်ဆင့်) ယေဟောဝါကို “အသွေးနှင့်ယှဉ်သောလင်” ဟုခေါ်ဆိုရာ၌ ဇိပေါရသည် ထိုပဋိညာဉ်၏ စည်းကမ်းကို မိမိကိုယ်တိုင် လက်အောက်ခံလိုက်နာကြောင်း ဝန်ခံခြင်းဖြစ်ဟန်ရှိသည်။ အရေဖျားလှီးပဋိညာဉ်တွင် မိမိသည် ဇနီးသည်အလားဖြစ်ပြီး ယေဟောဝါဘုရားသခင်ကို ခင်ပွန်းအလား လက်ခံလိုက်သည့်သဘောဖြစ်သည်။ မည်သို့ပင်ဖြစ်စေ ဘုရားသခင့်တောင်းဆိုချက်ကို နာခံကြောင်း ပြတ်ပြတ်သားသား လုပ်ဆောင်မှုကြောင့် သူ၏သား အသက်အန္တရာယ် မရှိတော့ချေ။
(ထွက်မြောက်ရာ ၅:၂) ဒါပေမဲ့ ဖာရောမင်းက “ယေဟောဝါက ဘယ်သူမို့လို့ သူ့စကားနားထောင်ပြီး အစ္စရေးတွေကို လွှတ်ပေးရမှာလဲ။ ယေဟောဝါကို ငါလုံးဝ မသိဘူး။ အစ္စရေးတွေကိုလည်း မလွှတ်ပေးနိုင်ဘူး” လို့ပြောတယ်။
it-2 ၁၂ ပိုဒ်. ၅
ယေဟောဝါ
တစ်ခုခု ဒါမှမဟုတ် တစ်ယောက်ယောက်ကို “သိ” တယ်ဆိုတာက အဲဒါနဲ့ အကျွမ်းတဝင်ရှိတယ်၊ ရင်းနှီးတယ်လို့ အမြဲမဆိုလိုဘူး။ လူမိုက် နာဗလဟာ ဒါဝိဒ်ရဲ့ နာမည်ကို သိပေမဲ့ “ဒါဝိဒ်က ဘယ်သူမို့လို့လဲ” ဆိုပြီး မေးခဲ့တယ်။ (၁ရှ ၂၅:၉-၁၁။ ၂ရှ ၈:၁၃ နဲ့နှိုင်းယှဉ်ပါ။) ဖာရောလည်း မောရှေကို “ယေဟောဝါက ဘယ်သူမို့လို့ သူ့စကား နားထောင်ပြီး အစ္စရေးတွေကို လွှတ်ပေးရမှာလဲ။ ယေဟောဝါကို ငါလုံးဝ မသိဘူး။ အစ္စရေးတွေကိုလည်း မလွှတ်ပေးနိုင်ဘူး” လို့ ပြောခဲ့တယ်။ (ထွက်မြောက်ရာ ၅:၁၊ ၂) အဲဒါက ယေဟောဝါဟာ စစ်မှန်တဲ့ဘုရား ဖြစ်တယ်၊ အီဂျစ်ဘုရင်နဲ့ ဘုရင်ရဲ့ ကိစ္စရပ်တွေအပေါ်မှာ အခွင့်အာဏာ ရှိသူဖြစ်တယ်၊ မောရှေနဲ့ အာရုန်ကတစ်ဆင့် မိမိရဲ့အလိုတော်ကို တောင်းဆိုပိုင်ခွင့် ရှိသူ ဖြစ်တယ်ဆိုတာ ဖာရော မသိဘူးလို့ ဖော်ပြရာရောက်တယ်။ ဒါပေမဲ့ အခု အစ္စရေးလူမျိုး အပါအဝင်၊ ဖာရောနဲ့ အီဂျစ်လူအားလုံးဟာ ယေဟောဝါနာမည်ရဲ့ အဓိပ္ပာယ်၊ အဲဒီနာမည် ကိုယ်စားပြုတဲ့ ပုဂ္ဂိုလ်ကို သိရပါတော့မယ်။ မောရှေကို ယေဟောဝါ ဖော်ပြခဲ့သလိုပဲ အစ္စရေးလူမျိုးနဲ့ပတ်သက်တဲ့ မိမိရည်ရွယ်ချက်ကို အကောင်အထည်ဖော်ပါလိမ့်မယ်။ အစ္စရေးတွေကို ကယ်နုတ်မယ်၊ ကတိထားရာပြည်ထဲ ပို့ဆောင်မယ်။ ဒီလိုလုပ်ခြင်းအားဖြင့် ယေဟောဝါဟာ အစ္စရေးတွေရဲ့ ဘိုးဘေးတွေနဲ့ ပြုထားတဲ့ ပဋိညာဉ်ကို အကောင်အထည်ဖော်မယ်။ အဲဒီနည်းနဲ့ ‘ငါဟာ မင်းတို့ရဲ့ဘုရား ယေဟောဝါပဲဆိုတာ မင်းတို့ သိကို သိရလိမ့်မယ်’ လို့ ဘုရားသခင် ပြောခဲ့တယ်။—ထွ ၆:၄-၈။
ကျမ်းစာဖတ်ရှုခြင်း