ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
ဇန်နဝါရီ ၄-၁၀
ကျမ်းစာထဲက အဖိုးတန်ဘဏ္ဍာများ | ဝတ်ပြုရာ ၁၈–၁၉
“ကိုယ်ကျင့်တရား စင်ကြယ်ပါ”
စာတန့် ထောင်ချောက်ထဲ မကျအောင် ကာကွယ်နိုင်ပုံ
‘မင်းတို့ကို ငါပို့ဆောင်မယ့် ခါနန်ပြည်က လူတွေလို လိုက်မလုပ်နဲ့။ . . . သူတို့ရဲ့ တိုင်းပြည်ဟာ ညစ်ညူးနေပြီ။ သူတို့အပြစ်အတွက် ငါဒဏ်ခတ်မယ်’ လို့ အစ္စရေးတွေကို ယေဟောဝါ ပြောတယ်။ ခါနန်လူမျိုးရဲ့ အကျင့်တွေ ညစ်ညမ်းလွန်းလို့ သူတို့ရဲ့ တိုင်းပြည်ကိုလည်း ညစ်ညူးတယ်လို့ အစ္စရေးတွေရဲ့ သန့်ရှင်းတဲ့ ဘုရား ရှုမြင်တယ်။—ဝတ်. ၁၈:၃၊ ၂၅။
မိမိလူမျိုးကို ယေဟောဝါ ဦးဆောင်
၁၃ ဒီသစ္စာရှိ ဘုရင်တွေဟာ အမြော်အမြင် နည်းတဲ့ လူ့ဉာဏ်ပညာရဲ့ လမ်းညွှန်မှုကို ခံယူတဲ့ တခြားလူမျိုး ခေါင်းဆောင်တွေနဲ့ ကွာခြားလိုက်လေခြင်း။ ခါနာန်လူမျိုး ခေါင်းဆောင်တွေအောက်မှာ လူတွေဟာ ရွံရှာဖွယ်ရာ သွေးနီးချင်း အိမ်ထောင်ပြုခြင်း၊ လိင်တူဆက်ဆံခြင်း၊ တိရစ္ဆာန်နဲ့ ကာမစပ်ယှက်ခြင်း၊ ကလေးတွေကို ပူဇော်ခြင်း၊ ရုပ်တုကိုးကွယ်ခြင်းတို့ကို ပြုလုပ်ကြတယ်။ (ဝတ်. ၁၈:၆၊ ၂၁-၂၅) ဒီ့အပြင် ဗာဗုလုန်နဲ့ အီဂျစ်ခေါင်းဆောင်တွေဟာ အစ္စရေးလူမျိုးကို ဘုရား ပေးခဲ့တဲ့ တစ်ကိုယ်ရေ သန့်ရှင်းမှု ပညတ်တွေကို မလိုက်နာကြဘူး။ (တော. ၁၉:၁၃) ဘုရားရဲ့ ရှေးခေတ်လူမျိုးတွေကတော့ ဝတ်ပြုရေး၊ စာရိတ္တရေး၊ ကာယရေးမှာ သန့်ရှင်းဖို့ သစ္စာရှိ ခေါင်းဆောင်တွေ လုပ်ဆောင်ကြပုံကို မြင်တွေ့ကြရတယ်။ ယေဟောဝါ သူတို့ကို ဦးဆောင်နေမှန်း ထင်ရှားပါတယ်။
အဖြစ်ဆိုးတွေကို ဘုရားသခင် ဘာလုပ်ပေးမှာလဲ
မကောင်းမှုတွေကို အဆက်မပြတ် လုပ်နေသူတွေ၊ ခေါင်းမာမာနဲ့ အကျင့်မပြောင်းလဲတဲ့သူတွေ ဘာဖြစ်မှာလဲ။ ရိုးရှင်းပြီး တိကျတဲ့ ဒီကတိကို စဉ်းစားကြည့်ပါ– “ဖြောင့်မတ်သောသူတို့သည် ပြည်တော် [မြေကြီး] ၌ နေ၍ စုံလင်သောသူတို့သည် နေရာကျကြလိမ့်မည်။ အဓမ္မလူတို့မူကား ပြည်တော် [မြေကြီး] မှ ပယ်ရှင်းခြင်း၊ လွန်ကျူးသောသူတို့သည် နုတ်ပစ်ခြင်းကို ခံရကြလိမ့်မည်။” (သုတ္တံ ၂:၂၁၊ ၂၂) ဆိုးညစ်သူတွေရဲ့ ဩဇာလွှမ်းမိုးမှုလည်း ပျောက်ကွယ်သွားပါလိမ့်မယ်။ ငြိမ်းချမ်းသာယာတဲ့ ဒီကမ္ဘာပေါ်မှာ နာခံမှု ရှိတဲ့ လူသားတွေဟာ အာဒံနဲ့ ဧဝတို့ဆီက အမွေရခဲ့တဲ့ အပြစ်ပြုလိုစိတ်တွေကနေ တဖြည်းဖြည်း လွတ်ကင်းသွားပါလိမ့်မယ်။—ရောမ ၆:၁၇၊ ၁၈; ၈:၂၁။
ဘုရားရေးရာ ရတနာ
‘ကိုယ်တော်၏ တရားတော်ကို အကျွန်ုပ် အလွန် နှစ်သက်ပေစွ!’
၁၁ လူမျိုးတော်၏ ကောင်းကျိုးကို ဘုရားသခင် ဂရုစိုက်ကြောင်း ဖော်ပြသော မောရှေပညတ်၏ ဒုတိယ ကဏ္ဍမှာ ကောက်သင်း ကောက်ပိုင်ခွင့် ဖြစ်သည်။ ဣသရေလ လယ်သမားတစ်ဦးသည် လယ်၌ အသီးအနှံများကို ဆွတ်ခူးသောအခါ ကျန်ခဲ့သည့် အသီးအနှံများကို ဆင်းရဲနွမ်းပါးသောသူတို့အား လိုက်ကောက်ခွင့် ပေးရမည်ဟု ယေဟောဝါ မိန့်မှာတော်မူခဲ့၏။ လယ်သမားများသည် မိမိတို့၏ လယ်ကွက် အစွန်းအနားများမှ အသီးအနှံများကို အကုန်အစင် မရိတ်သိမ်းရ၊ စပျစ် သို့မဟုတ် သံလွင်သီး အကျန်များကိုလည်း ပြန်မစုသိမ်းရချေ။ လယ်ကွင်းများတွင် အမှုမဲ့အမှတ်မဲ့ ကျန်ရစ်ခဲ့သည့် ကောက်လှိုင်းများကိုလည်း ပြန်မသိမ်းယူရချေ။ ယင်းသည် ဆင်းရဲသားများ၊ တိုင်းတစ်ပါးသားများ၊ မိဘမဲ့များနှင့် မုဆိုးမများအတွက် မေတ္တာပါသည့် အစီအစဉ် ဖြစ်ပေသည်။ ကောက်သင်းကောက်ခြင်းသည် ပင်ပန်းသည့်အလုပ် ဖြစ်သည် မှန်သော်လည်း ထိုသို့ပြုခြင်းဖြင့် သူတို့သည် တောင်းစားရသည့် အဖြစ်ကို ရှောင်နိုင်ကြသည်။—ဝတ်ပြုရာ ၁၉:၉၊ ၁၀; တရားဟောရာ ၂၄:၁၉-၂၂; ဆာလံ ၃၇:၂၅။
ဇန်နဝါရီ ၁၁-၁၇
ကျမ်းစာထဲက အဖိုးတန်ဘဏ္ဍာများ | ဝတ်ပြုရာ ၂၀–၂၁
“ယေဟောဝါက မိမိလူမျိုးကို သီးခြားခွဲထား”
ပရဒိသု—သင့်အတွက်လော
၁၂ သို့တိုင် ကျွန်ုပ်တို့ လျစ်လျူမရှုအပ်သည့် အရာတစ်ခု ရှိသေးသည်။ ဘုရားသခင်က ဣသရေလလူမျိုးအား ဤသို့မိန့်တော်မူခဲ့သည်– “သင်တို့သည် သွား၍ ဝင်စားလတ္တံ့သော ပြည်ကို ကြီးစွာသော ခွန်အားနှင့် ဝင်စားမည်အကြောင်း . . . ယနေ့ ငါမှာထားသမျှသော ပညတ်တို့ကို စောင့်ရှောက်ရကြမည်။” (တရားဟောရာ ၁၁:၈၊ ၉) ဝတ်ပြုရာ ၂၀:၂၂၊ ၂၄ တွင်လည်း ထိုပြည်တော်အကြောင်း ဤသို့ဖော်ပြထားသည်– “သင်တို့ကို ငါပို့ဆောင်၍ နေရာချသော ပြည်သည် မအော့အန်စေခြင်းငှာ သင်တို့သည် ငါစီရင်ထုံးဖွဲ့သမျှတို့ကို ကျင့်ဆောင်ရမည်။ သူတို့ပြည်တည်းဟူသော နို့နှင့် ပျားရည် စီးသောပြည်ကို သင်တို့သည် အမွေခံစေခြင်းငှာ ငါအပိုင်ပေးမည်ဟု ငါ့အမိန့်တော်ရှိ၏။” မှန်ပါသည်၊ ကတိထားရာ ပြည်တော်ကို ပိုင်ဆိုင်ရေးသည် ယေဟောဝါ ဘုရားသခင်နှင့် ကောင်းသော ဆက်ဆံရေးအပေါ် မူတည်သည်။ ဘုရားသခင်အား ဣသရေလလူမျိုး မနာခံခဲ့ကြသောကြောင့် ကိုယ်တော်သည် မိမိလူမျိုးအပေါ် ဗာဗုလုန်လူမျိုးကို အနိုင်ယူစေပြီး သူတို့ နေထိုင်ရာအရပ်မှ မောင်းထုတ်ခွင့် ပေးခဲ့ခြင်း ဖြစ်သည်။
it-1 ၁၁၉၉
အမွေ
ပိုင်ရှင် သေဆုံးသွားတဲ့အခါ သူ့ရဲ့ ပိုင်ဆိုင်ရာတွေကို အမွေဆက်ခံပိုင်ခွင့်ရှိသူ ရရှိသွားတယ်။ ဘိုးဘွားပိုင်ပစ္စည်းတွေကို သားမြေးတွေက အမွေရတယ်။ အဓိက အသုံးပြုတဲ့ ဟီဘရူးကြိယာက နာချယ် (na·chalʹ) (နာမ်၊ နာချယ်လာ na·chalahʹ) ဖြစ်တယ်။ အဲဒါက ဆွေစဉ်မျိုးဆက် ပိုင်တဲ့ အမွေ ဒါမှမဟုတ် မိရိုးဖလာ ပိုင်ဆိုင်မှုကို လက်ခံခြင်း၊ ပေးခြင်းနဲ့ သက်ဆိုင်တယ်။ (တလ ၂၆:၅၅။ ယဇ ၄၆:၁၈) ဆွေစဉ်မျိုးဆက်ထဲ မပါတဲ့သူကို “အမွေ” ပေးတယ်ဆိုရင်တော့ များသောအားဖြင့် ကြိယာ ယာရက်ရှ် (ya·rashʹ) ကို အသုံးပြုတယ်။ (က ၁၅:၃။ ဝ ၂၀:၂၄) အဲဒါက စစ်ရေးနဲ့ပတ်သက်ပြီး “တိုက်ခိုက်မောင်းထုတ်” ဆိုတဲ့ အဓိပ္ပာယ်လည်း ရှိတယ်။ (တရ ၂:၁၂။ ၃၁:၃) အမွေနဲ့ ပတ်သက်တဲ့ ဂရိစကားလုံး ကယ်ရို့စ် (kleʹros) ရဲ့ မူရင်းအဓိပ္ပာယ်က “မဲချတယ်” ဖြစ်ပြီး နောက်ပိုင်း “ဝေမျှသည်” ဆိုတဲ့ အဓိပ္ပာယ် ဖြစ်လာပြီး နောက်ဆုံး “အမွေရ” တာ ဖြစ်လာတယ်။—မ ၂၇:၃၅။ တ ၁:၁၇။ ၂၆:၁၈။
it-1 ၃၁၇ ပိုဒ်. ၂
ငှက်များ
ကမ္ဘာချီ ရေလွှမ်းမိုးဘေးပြီးနောက် နောဧက “သန့်ရှင်းတဲ့ တိရစ္ဆာန်တွေ၊ ပျံတတ်တဲ့ သတ္တဝါတွေထဲက” တချို့ယူပြီး မီးရှို့ပူဇော်တယ်။ (က ၈:၁၈-၂၀) အဲဒီနောက်ပိုင်း လူတွေကို စားခွင့် ပေးတဲ့ အစားအစာထဲမှာ ငှက်တွေလည်း ပါတယ်။ ဒါပေမဲ့ အသွေးကိုတော့ တားမြစ်ခဲ့တယ်။ (က ၉:၁-၄။ ဝ ၇:၂၆။ ၁၇:၁၃ တို့နဲ့ နှိုင်းယှဉ်ပါ။) ဒါကြောင့် “သန့်ရှင်းတဲ့” ငှက်တွေဆိုတာ ပူဇော်သက္ကာအဖြစ် ဘုရား လက်ခံတဲ့ ငှက်တွေဆိုတာ ရှင်းပါတယ်။ အစားအစာအဖြစ် အသုံးပြုတာနဲ့ပတ်သက်လို့ ဘယ်ငှက်ကိုမှ “မသန့်ရှင်းတဲ့ ငှက်” လို့ ကျမ်းစာမှာ မဖော်ပြခဲ့ဘူး။ မောရှေပညတ် ပေးတဲ့အခါကျတော့မှပဲ ဖော်ပြခဲ့တယ်။ (ဝ ၁၁:၁၃-၁၉၊ ၄၆၊ ၄၇။ ၂၀:၂၅။ တရ ၁၄:၁၁-၂၀) “မသန့်ရှင်း” တဲ့ ငှက်တွေလို့ သတ်မှတ်ရတဲ့ အကြောင်းရင်းတွေကို ကျမ်းစာမှာ မဖော်ပြထားဘူး။ များသောအားဖြင့် ငှက်ရဲတွေ၊ အပုပ်အသိုး ရှင်းလင်းတဲ့ ငှက်တွေ ဖြစ်ပေမဲ့လည်း အားလုံးတော့ မဟုတ်ပြန်ဘူး။ ပဋိညာဉ်သစ် ဖွဲ့ပြီးနောက်ပိုင်း အဲဒီတားမြစ်ချက်လည်း ပျက်ပြယ်သွားတယ်။ အဲဒါကို ပေတရု မြင်ခဲ့ရတဲ့ စိတ်အာရုံမှာ အထင်အရှား တွေ့ရတယ်။—တ ၁၀:၉-၁၅။
ဘုရားရေးရာ ရတနာ
it-1 ၅၆၃
ဓားနဲ့မွှန်း
သေလွန်သူအတွက် ကိုယ့်အသားကို ဓားနဲ့ မမွှန်းနဲ့လို့ ဘုရားပညတ်မှာ တားမြစ်ထားတယ်။ (ဝ ၁၉:၂၈။ ၂၁:၅။ တရ ၁၄:၁) တားမြစ်ရတဲ့ အကြောင်းရင်းက အစ္စရေးလူမျိုးဟာ ယေဟောဝါအတွက် သန့်ရှင်းတဲ့ လူမျိုး၊ တန်ဖိုးအထားရဆုံး လူမျိုး ဖြစ်လို့ပဲ။ (တရ ၁၄:၂) ဒါကြောင့် အစ္စရေးတွေဟာ ရုပ်တုကိုးကွယ်သူတွေရဲ့ ဓလေ့ထုံးစံတွေကို မလုပ်ကြဘူး။ လူသေတွေရဲ့ အခြေအနေကို ကောင်းကောင်း သိပြီး ရှင်ပြန်ထမြောက်ခြင်း မျှော်လင့်ချက် ရှိတဲ့ လူမျိုးအနေနဲ့ ကိုယ့်ကိုယ်ကိုယ် အနာတရ ဖြစ်အောင် လုပ်ပြီး ဝမ်းနည်းပူဆွေးမှုကို ဖော်ပြတာက မသင့်လျော်ပါဘူး။ (ဒံ ၁၂:၁၃။ ဟီ ၁၁:၁၉) ကိုယ့်ကိုယ်ကိုယ် အနာတရ လုပ်ခြင်းကို တားမြစ်တာက အစ္စရေးတွေ ဘုရား ဖန်ဆင်းပေးထားတဲ့ လူ့ကိုယ်ခန္ဓာကို တန်ဖိုးထားဖို့ လိုကြောင်း သိစေတယ်။
ဇန်နဝါရီ ၁၈-၂၄
ကျမ်းစာထဲက အဖိုးတန်ဘဏ္ဍာများ | ဝတ်ပြုရာ ၂၂–၂၃
“ရာသီပွဲတွေက ကျွန်တော်တို့အတွက် အဓိပ္ပာယ်ရှိ”
it-1 ၈၂၆-၈၂၇
တဆေးမဲ့မုန့်ပွဲ
တဆေးမဲ့မုန့်ပွဲတော် ပထမနေ့ဟာ မြင့်မြတ်တဲ့ စည်းဝေးပွဲနေ့ ဖြစ်ပြီး ဥပုသ်နေ့လည်း ဖြစ်တယ်။ ဒုတိယနေ့၊ နိသန် ၁၆ ရက်နေ့မှာ ပါလက်စတိုင်းပြည်မှာ ဦးဆုံး ရိတ်တဲ့ (မုယောစပါး) ကောက်လှိုင်းစည်းကို ပုရောဟိတ်ဆီ ယူလာရတယ်။ ဒီပွဲတော်မတိုင်ခင် ကောက်သစ်နဲ့ လုပ်ထားတဲ့ မုန့်၊ ကောက်နှံလှော်တွေကို မစားရဘူး။ သီးဦးသီးဖျားကို ယေဟောဝါကို ပေးတဲ့အနေနဲ့ ပုရောဟိတ်က ကောက်လှိုင်းစည်းကို ချီလွှဲရတယ်။ အနာအဆာ မရှိတဲ့ တစ်နှစ်သားအရွယ် သိုးထီးလေးကို မီးရှို့ရာအလှူအဖြစ် ဆက်သပြီး ဆီလောင်းထားတဲ့ ကောက်နှံအလှူနဲ့ သွန်းလောင်းရာအလှူကိုလည်း ဆက်ရတယ်။ (ဝ ၂၃:၆-၁၄) ကောက်နှံ ဒါမှမဟုတ် ဂျုံနုကို ပူဇော်ရာပလ္လင်မှာ မီးရှို့ဖို့ ပညတ်ထားခြင်း မရှိပေမဲ့ နောက်ပိုင်း ပုရောဟိတ်တွေ လုပ်ဆောင်ခဲ့ကြတယ်။ လူအုပ်လိုက် ဒါမှမဟုတ် လူမျိုးလိုက် သီးဦးသီးဖျား ဆက်သခြင်း အစီအစဉ် ရှိသလို ဒီပွဲတော်အတွင်းမှာ ကျေးဇူးတင်ချီးမွမ်းတဲ့အနေနဲ့ မိသားစုလိုက်၊ တစ်ဦးချင်းစီအလိုက် ကိုယ့်လယ်ယာက ထွက်တဲ့ သီးဦးသီးဖျား ဆက်သတဲ့ အစီအစဉ်လည်း ရှိတယ်။—ထွ ၂၃:၁၉။ တရ ၂၆:၁၊ ၂။
ရည်ရွယ်ချက်။ ဒီအချိန်ကာလမှာ တဆေးမဲ့မုန့် စားခြင်းက ထွက်မြောက်ရာ ၁၂:၁၄-၂၀ မှာ မောရှေကို ပေးခဲ့တဲ့ ယေဟောဝါ ညွှန်ကြားချက်နဲ့အညီ ပြုလုပ်ခြင်း ဖြစ်တယ်။ အခန်းငယ် ၁၉ မှာ “ခုနစ်ရက်ပတ်လုံး အိမ်မှာ တဆေး မထားရဘူး” ဆိုပြီး သတ်သတ်မှတ်မှတ် ညွှန်ကြားထားတယ်။ တရားဟောရာ ၁၆:၃ မှာ တဆေးမဲ့မုန့်ကို “ဒုက္ခမုန့်” လို့ ခေါ်ထားတယ်။ (မုန့်ညက်ထဲ တဆေးထည့်ပြီး ပွအောင် လုပ်ဖို့ အချိန် မရှိဘဲ [ထွ ၁၂:၃၄]) အီဂျစ်ပြည်ကနေ အလောတကြီး ထွက်လာခဲ့ရတာကို အဲဒီမုန့်တွေက နှစ်တိုင်း သတိရစေတယ်။ ဒါကြောင့် အစ္စရေးတွေ ညှဉ်းဆဲခံရ၊ ကျွန်ပြုခံရတဲ့ အခြေအနေကနေ လွတ်မြောက်လာခဲ့တာကို ပြန်အမှတ်ရစေတယ်။ ယေဟောဝါကိုယ်တိုင် ဒီလို ပြောခဲ့တယ်– “အီဂျစ်ပြည်ကနေ ထွက်လာတဲ့နေ့ကို တစ်သက်လုံး သတိရနေဖို့ အဲဒီလိုလုပ်ရမယ်။” လူမျိုးတစ်မျိုးအနေနဲ့ ရရှိထားတဲ့ လွတ်လပ်မှုကို အသိအမှတ်ပြုရာ ရောက်တဲ့၊ ယေဟောဝါကို ကယ်တင်ရှင်အဖြစ် အသိအမှတ်ပြုရာ ရောက်တဲ့ ဒီပွဲတော်ကို အစ္စရေးတွေ နှစ်စဉ် ကျင်းပတဲ့ ပွဲတော် သုံးခုထဲမှာ ဦးဆုံး ကျင်းပတာက သင့်လျော်ပါတယ်။—တရ ၁၆:၁၆။
it-2 ၅၉၈ ပိုဒ်. ၂
ပင်တေကုတ္တေပွဲ
မုယောစပါး သီးဦးသီးဖျား ဆက်သပုံနဲ့ ဂျုံစပါး သီးဦးသီးဖျား ဆက်သပုံချင်း မတူဘူး။ ဂျုံနုတစ်ဧဖာရဲ့ ဆယ်ပုံနှစ်ပုံ (၄.၄ လီတာ) ကို တဆေးထည့်ပြီး မုန့်နှစ်လုံး ဖုတ်ရတယ်။ မုန့်နှစ်လုံးကို ‘အိမ်ကနေ ယူလာရမယ်’ လို့ ပြောထားတဲ့အတွက် နေ့တိုင်း အိမ်မှာ လုပ်တဲ့ မုန့်ပုံစံမျိုး ဖြစ်တယ်။ မြင့်မြတ်တဲ့ ရည်ရွယ်ချက်အတွက်လို့ မဖော်ပြထားဘူး။ (ဝ ၂၃:၁၇) အဲဒီမုန့်နဲ့အတူ မီးရှို့ရာအလှူ၊ အပြစ်ဖြေရာအလှူ ဆက်သပြီး သိုးထီးလေး နှစ်ကောင်ကို မိတ်သဟာယ ပူဇော်သက္ကာအဖြစ် ဆက်သရတယ်။ အဲဒီမုန့်တွေနဲ့ သိုးတွေကို ပုရောဟိတ်က ယေဟောဝါရှေ့ ချီလွှဲရာအလှူအဖြစ် ချီလွှဲတယ်။ ပုရောဟိတ်ရဲ့ လက်ပေါ်မှာ မုန့်တွေနဲ့ သိုးသားကို တင်ပြီး ချီလွှဲတာက ယေဟောဝါကို ပေးဆက်တယ်ဆိုတဲ့ အဓိပ္ပာယ် ဖြစ်တယ်။ မုန့်တွေနဲ့ သိုးတွေကို ဆက်သပြီးနောက် အဲဒါတွေကို ပုရောဟိတ် ယူရတယ်။ မိတ်သဟာယ ပူဇော်သကာအဖြစ် စားရတယ်။—ဝ ၂၃:၁၈-၂၀။
ယေဟောဝါရဲ့ အဖွဲ့အစည်းနဲ့အတူ သင် ရှေ့ကို တိုးတက်နေသလား
၁၁ ယေဟောဝါရဲ့ အဖွဲ့အစည်းက ပေါလုရဲ့ ဒီအကြံပြုချက်ကို လိုက်နာဖို့ တိုက်တွန်းတယ်– “မေတ္တာစိတ် ရှိ၍ အကျင့်ကောင်းများ ကျင့်စေရန် တိုက်တွန်းနှိုးဆော်နိုင်မည်အကြောင်း အချင်းချင်း ထောက်ထားစာနာကြစို့။ လူအချို့၏ ထုံးစံရှိသည့်အတိုင်း အတူတကွ စည်းဝေးခြင်းအမှုကို လျစ်လျူမရှုကြနှင့်။ အချင်းချင်း အားပေးကြလော့။ ထိုနေ့ရက် နီးလာသည်ကို မြင်ရသောကြောင့် သာ၍ ကြိုးစားအားထုတ်ကြလော့။” (ဟေဗြဲ ၁၀:၂၄၊ ၂၅) ရှေးခေတ် အစ္စရေးလူတွေဟာ ယေဟောဝါကို ဝတ်ပြုဖို့နဲ့ ကိုယ်တော့် ညွှန်ကြားချက်တွေ ခံယူဖို့အတွက် မှန်မှန် စုဝေးခဲ့ကြတယ်။ နေဟမိခေတ်က ကျင်းပခဲ့တဲ့ သကေနေ (တဲနေ) ပွဲဟာ အဲဒီလို ပျော်စရာ စုဝေးမှုတွေထဲက တစ်ခု ဖြစ်တယ်။ (ထွ. ၂၃:၁၅၊ ၁၆; နေ. ၈:၉-၁၈) အခုခေတ် ကျွန်ုပ်တို့မှာလည်း ပတ်စဉ်စည်းဝေးတွေ၊ အထူးနဲ့ တိုက်နယ်စည်းဝေးပွဲတွေ၊ ခရိုင်အစည်းအဝေးတွေ ရှိတယ်။ အဲဒီအစည်းအဝေးတွေ အားလုံးကို တက်ဖို့ ကြိုးစားသင့်တယ်၊ ဘာကြောင့်လဲဆိုတော့ အဲဒီအစည်းအဝေးတွေက ကျွန်ုပ်တို့ကို ယေဟောဝါနဲ့ ရင်းနှီးစေပြီး အမှုဆောင်လုပ်ငန်းမှာ ပျော်ရွှင်စေတယ်။—တိ. ၂:၂။
ဘုရားရေးရာ ရတနာ
သမာဓိ စောင့်ထိန်းပါ
၃ ဘုရားသခင့် ကျေးကျွန်တွေအတွက် သမာဓိရှိတယ်ဆိုတာ ယေဟောဝါကို ပုဂ္ဂိုလ်တစ်ဦးအဖြစ် စိတ်နှလုံးအကြွင်းမဲ့ ချစ်ခြင်း၊ ဆည်းကပ်ခြင်း၊ ဆုံးဖြတ်ချက် မှန်သမျှမှာ ဘုရားအလိုတော်ကို အဓိကထားခြင်း ဖြစ်တယ်။ “သမာဓိ” ဆိုတဲ့ ကျမ်းစာစကားလုံးရဲ့ အခြေခံ အဓိပ္ပာယ်က စုံလင်ခြင်း၊ အနာအဆာ ကင်းခြင်း၊ အပြည့်အဝ ဖြစ်ခြင်းကို ဆိုလိုတယ်။ ဥပမာ၊ အစ္စရေးတွေ တိရစ္ဆာန် ပူဇော်တဲ့အခါ အနာအဆာ ကင်းဖို့ ယေဟောဝါ တောင်းဆိုတယ်။ (ဝတ်. ၂၂:၂၁၊ ၂၂) ခြေကျိုး၊ နားရွက်ပဲ့၊ မျက်စိကန်း၊ ရောဂါရှိတဲ့ တိရစ္ဆာန်တွေကို မပူဇော်ရဘူး။ ယေဟောဝါအတွက် ပူဇော်တဲ့ တိရစ္ဆာန်တွေဟာ ကိုယ်အင်္ဂါ စုံပြီး အနာအဆာ ကင်းရမယ်။ (မာလ. ၁:၆-၉) အနာအဆာ ကင်းဖို့ ယေဟောဝါ ဘာကြောင့် အလေးထားမှန်း နားလည်နိုင်ပါတယ်။ ကျွန်တော်တို့ဟာ အသီးဖြစ်ဖြစ်၊ စာအုပ်ဖြစ်ဖြစ် တစ်ခုခု ဝယ်တဲ့အခါ အနာအဆာ ပါတာ၊ မပြည့်စုံတာကို လိုချင်မှာ မဟုတ်ဘူး။ အနာအဆာ ကင်းပြီး အပြည့်အစုံ ပါတာကိုပဲ လိုချင်ကြတယ်။ အဲဒီလိုပဲ ယေဟောဝါလည်း ကျွန်တော်တို့ရဲ့ မေတ္တာနဲ့ သစ္စာစောင့်သိမှုကို အပြည့်အဝ လိုချင်တယ်။
ဇန်နဝါရီ ၂၅-၃၁
ကျမ်းစာထဲက အဖိုးတန်ဘဏ္ဍာများ | ဝတ်ပြုရာ ၂၄–၂၅
“ယုဘိလနှစ်နဲ့ အနာဂတ် လွတ်မြောက်မှု”
it-1 ၈၇၁
လွတ်မြောက်မှု
လွတ်မြောက်မှု ပေးတဲ့ ဘုရားသခင်။ ယေဟောဝါဟာ လွတ်မြောက်မှု ပေးတဲ့ ဘုရားသခင် ဖြစ်တယ်။ အစ္စရေးလူမျိုးကို အီဂျစ်ကျွန်ဘဝကနေ လွှတ်ပေးခဲ့တယ်။ အစ္စရေးတွေ ယေဟောဝါရဲ့ ပညတ်တွေကို လိုက်နာနေသ၍ ဘေးကင်းလုံခြုံမယ်၊ လွတ်လပ်မယ်လို့ မိန့်မှာခဲ့တယ်။ (တရ ၁၅:၄၊ ၅) ဒါဝိဒ်က ဂျေရုဆလင်မြို့က ခံတပ်မျှော်စင်တွေထဲမှာ “ဘေးကင်းလုံခြုံ” တယ်လို့ ပြောခဲ့တယ်။ (ဆ ၁၂၂:၆၊ ၇) ဒါပေမဲ့ လူတစ်ယောက်ဟာ ဆင်းရဲသွားတဲ့အတွက် ကိုယ်တိုင်နဲ့ မိသားစု လိုအပ်ရာတွေကို ထောက်ပံ့ပေးဖို့ မိမိကိုယ်ကိုယ် ကျွန်အဖြစ် ရောင်းလိုက်ရတဲ့ အဖြစ်ကို ပညတ်တရားမှာ ဖော်ပြထားတယ်။ ပညတ်တရားအရ ဒီ ဟီဘရူးကျွန်ကို ခုနစ်နှစ်မြောက်ကျရင် လွှတ်ပေးရတယ်။ (ထွ ၂၁:၂) ယုဘိလနှစ် (အနှစ် ၅၀ ပြည့်တိုင်း) မှာ ပြည်သူပြည်သားအားလုံး လွတ်လပ်ခွင့် ရကြောင်း ကြေညာရမယ်။ ဟီဘရူးကျွန်အားလုံး လွတ်လပ်သွားပြီး ကိုယ့်အမွေမြေဆီ ပြန်ရတယ်။—ဝ ၂၅:၁၀-၁၉။
it-1 ၁၂၀၀ ပိုဒ်. ၂
အမွေ
မြေယာတွေဟာ သားစဉ်မြေးဆက် ပိုင်ဆိုင်ရာ ဖြစ်တဲ့အတွက် မြေကို အပြီးအပိုင် မရောင်းရဘူး။ ရောင်းမယ်ဆိုရင် လွတ်လပ်ခွင့် ရတဲ့ ယုဘိလနှစ် ရောက်ဖို့ ဘယ်နှစ်နှစ် လိုသေးတယ်၊ အဲဒီနှစ်တွေအတွင်း အသီးအနှံ ဘယ်လောက် ထွက်ရှိမယ် ဆိုတာကို တွက်ချက်ပြီး ဈေးဖြတ်တယ်။ ယုဘိလနှစ် မတိုင်မီ မိမိမြေကို ပြန်မဝယ်ယူနိုင်တဲ့ မြေပိုင်ရှင်တိုင်းဟာ ယုဘိလနှစ်မှာ ကိုယ်မြေကို ပြန်ပိုင်ဆိုင်ခွင့် ရတယ်။ (ဝ ၂၅:၁၃၊ ၁၅၊ ၂၃၊ ၂၄) ဒီစည်းမျဉ်းက မြို့ရိုး မရှိတဲ့ နေရာတွေက အိမ်တွေနဲ့လည်း သက်ဆိုင်တယ်။ မြို့ရိုး မရှိတဲ့ နေရာက အိမ်တွေကို လယ်ယာလို့ သတ်မှတ်ကြလို့ပဲ။ မြို့ရိုးထဲက အိမ်ကို ရောင်းမယ်ဆိုရင် ရောင်းပြီးတဲ့အချိန်ကစပြီး နှစ်ကုန်တဲ့အထိ ပြန်ဝယ်ယူခွင့် ရှိတယ်။ ပြန်မဝယ်နိုင်ရင်တော့ အဲဒီအိမ်ကို ဝယ်သူ ပိုင်ဆိုင်သွားတယ်။ လေဝိအနွယ် ပိုင်တဲ့ မြို့တွေထဲက အိမ်တွေကိုတော့ လေဝိအနွယ်ဝင်တွေ အချိန်မရွေး ပြန်ဝယ်ယူခွင့် ရှိတယ်။ အကြောင်းကတော့ သူတို့က အမွေမြေ မရရှိကြလို့ပဲ။—ဝ ၂၅:၂၉-၃၄။
it-2 ၁၂၂-၁၂၃
ယုဘိလနှစ်၊ လွတ်လပ်ခွင့် ရတဲ့နှစ်
ယုဘိလပညတ်ကို လိုက်နာကြတဲ့အခါ ယနေ့ နိုင်ငံအတော်များများမှာ ဝမ်းနည်းဖွယ်ကောင်းလောက်အောင် တွေ့မြင်နေရတဲ့ ဆင်းရဲချမ်းသာ ကွာဟမှု အခြေအနေမျိုး မရောက်အောင် အစ္စရေးတွေကို ကာကွယ်ပေးခဲ့တယ်။ လူတစ်ယောက်စီ ရရှိတဲ့ အကျိုးကျေးဇူးကြောင့် တိုင်းပြည် တိုးတက်ခဲ့တယ်။ ဆင်းရဲချွတ်ခြုံကျနေတဲ့သူ၊ စီးပွားပျက်လို့ ဘဝပျက်သူ တစ်ယောက်မှ ရှိမှာ မဟုတ်ဘူး။ အားလုံးဟာ မိမိတို့ရဲ့ စွမ်းရည်၊ အစွမ်းအစတွေနဲ့ တိုင်းပြည်ကို အကျိုးပြုနိုင်ကြတယ်။ မြေကြီးကို သီးပွင့်ဖြစ်ထွန်းစေတဲ့ ယေဟောဝါရဲ့ ကောင်းချီးနဲ့ ဘုရား ပြင်ဆင်ပေးထားတဲ့ ပညာရေးကို အစ္စရေးတွေ လိုက်လျှောက်နေသ၍ ကောင်းမွန်တဲ့ အစိုးရ ရှိပြီး တိုင်းပြည် သာယာဝပြောမှာ ဖြစ်တယ်။ ဘုရားရဲ့ အုပ်ချုပ်ပုံ နည်းစနစ်ကြောင့်သာ အဲဒီလို ဖြစ်နိုင်တယ်။—ရှာ ၃၃:၂၂။
ဘုရားရေးရာ ရတနာ
သင် စိတ်နာကြည်းသည့်အခါ
အစ္စရေးလူတစ်ဦးသည် လူမျိုးချင်းတစ်ဦးကို ကိုယ်ထိလက်ရောက် ကျူးလွန်ကာ မျက်စိကို ဖျက်မိပါက ပညတ်တရားအရ ထိုက်သင့်သော ပြစ်ဒဏ် ခံရမည်။ သို့သော် ပြစ်မှားခံရသူသည် ပြစ်မှုကျူးလွန်သူ သို့မဟုတ် သူ့မိသားစုဝင် တစ်ဦးဦးကို မိမိ၏ ဆန္ဒအလျောက် ကိုယ်တိုင် ပြစ်ဒဏ်ပေး၍ မရပါ။ သူသည် ထိုက်သင့်သော ပြစ်ဒဏ် ချမှတ်ပေးပါရန် ခန့်အပ်ခံ တရားသူကြီးများ ကဲ့သို့သော အခွင့်အာဏာ ရှိသူများထံ ထိုကိစ္စကို တင်ပြရမည်ဟု ပညတ်တရားတွင် တောင်းဆိုထားသည်။ လူတစ်ဦးသည် ရာဇဝတ်မှု သို့မဟုတ် အကြမ်းဖက်မှု တမင်တကာ ကျူးလွန်ကြောင်း သက်သေထင်ရှားလျှင် ကလဲ့စားချေသည့် အဖြစ်ကို တားဆီးရန် ကျူးလွန်ခဲ့သည့် လုပ်ရပ်အတိုင်းပင် သူ့ကို ပြစ်ဒဏ်ပေးနိုင်သည်။ သို့သော် ထိုကိစ္စတွင် ယင်းထက်မက ပါဝင်သည်။
ဖေဖော်ဝါရီ ၁-၇
ကျမ်းစာထဲက အဖိုးတန်ဘဏ္ဍာများ | ဝတ်ပြုရာ ၂၆–၂၇
“ယေဟောဝါရဲ့ ကောင်းချီး ရရှိနိုင်ပုံ”
“တန်ဖိုးမဲ့သောအရာများ” ကို ငြင်းပယ်လော့
၈ “စည်းစိမ်” သည် အဘယ်နည်းဖြင့် ဘုရားသခင်သဖွယ် ဖြစ်လာနိုင်သနည်း။ ဥပမာ၊ ရှေးခေတ် ဣသရေလနိုင်ငံ၏ လယ်ကွင်းတစ်ခုရှိ ကျောက်တုံးတစ်တုံးကို သုံးသပ်ကြည့်ပါ။ ထိုကျောက်သည် အိမ် သို့မဟုတ် မြို့ရိုးတည်ဆောက်ရာတွင် အသုံးဝင်နိုင်သည်။ သို့သော် “ကိုးကွယ်စရာမှတ်တိုင်” သို့မဟုတ် “ထုသောကျောက်” အဖြစ် တည်ထားကိုးကွယ်မည်ဆိုလျှင် ယင်းသည် ယေဟောဝါ၏ လူမျိုးအတွက် ထိမိလဲစရာ ဖြစ်လာနိုင်သည်။ (ဝတ်. ၂၆:၁) အလားတူပင်၊ ငွေသည် သူ့နေရာနှင့်သူ အသုံးဝင်၏။ ကျွန်ုပ်တို့ အသက်ဆက်နိုင်ရန် ငွေလိုအပ်ပြီး ယင်းကို ယေဟောဝါ၏ အမှုတော်တွင် အကျိုးရှိရှိ အသုံးပြုနိုင်သည်။ (ဒေ. ၇:၁၂။ လု. ၁၆:၉) သို့သော် ခရစ်ယာန်လုပ်ငန်းများထက် ငွေရှာဖွေခြင်းကို ဦးစားထားပါက ငွေသည် ကျွန်ုပ်တို့၏ ဘုရားသခင် ဖြစ်လာနိုင်သည်။ (၁ တိမောသေ ၆:၉၊ ၁၀ ကိုဖတ်ပါ။) ဤလောကတွင် ငွေနောက် တကောက်ကောက် လိုက်ခြင်းသည် လူများစွာအတွက် အရေးကြီးဆုံးအရာ ဖြစ်နေပြီး ထိုကိစ္စတွင် မျှတသော အမြင် ရှိဖို့ ကျွန်ုပ်တို့ ကြိုးစားရမည်။—၁ တိ. ၆:၁၇-၁၉။
it-1 ၂၂၃ ပိုဒ်. ၃
ကြည်ညိုလေးစား
မောရှေကို ယေဟောဝါ အသုံးပြုခဲ့ပြီး ဘုရားနဲ့ ပြောဆိုဆက်ဆံမှု ရှိတဲ့အတွက်ကြောင့် မောရှေဟာ ဘုရားလူမျိုးရှေ့မှာ ကြီးမားတဲ့ အစွမ်းတန်ခိုးကို သုံးပြီး လုပ်ပြခဲ့တယ်။ (တရ ၃၄:၁၀၊ ၁၂။ ထွ ၁၉:၉) ယုံကြည်ခြင်း ရှိသူတွေဟာ မောရှေရဲ့ အခွင့်အာဏာကို ကြောက်ရွံ့ရိုသေခဲ့ကြတယ်။ မောရှေကနေတစ်ဆင့် ဘုရား စကားပြောတယ်ဆိုတာ သူတို့ သိကြတယ်။ ယေဟောဝါရဲ့ သန့်ရှင်းရာ ဌာနတော်ကိုလည်း အစ္စရေးတွေ ကြည်ညိုလေးစားခဲ့ကြတယ်။ (ဝ ၁၉:၃၀။ ၂၆:၂) ဆိုလိုတာက ယေဟောဝါ ညွှန်ကြားထားတဲ့ နည်းလမ်းအတိုင်း ဝတ်ပြုကိုးကွယ်ခြင်း၊ ဘုရားပညတ်အတိုင်း ကျင့်ကြံနေထိုင်ခြင်းအားဖြင့် သန့်ရှင်းရာ ဌာနတော်ကို ကြည်ညိုလေးစားကြောင်း တင်ပြခဲ့ကြတယ်။
“ဘုရားသခင်၏ ငြိမ်သက်ခြင်း” သည် သင်၏ စိတ်နှလုံးကို စောင့်မစေ
၁၀ ထိုလူမျိုးအား ယေဟောဝါ ဤသို့မိန့်တော်မူသည်။ “သင်တို့သည် ငါ့ထုံးဖွဲ့ရာ လမ်းသို့ လိုက်၍ ငါ့ပညတ်တို့ကို ကျင့်စောင့်လျှင် အချိန်တန်မှ ငါသည် သင်တို့အဖို့ မိုးရွာစေသဖြင့် မြေသည် မိမိဘဏ္ဍာကို ပေး၍ ဥယျာဉ်အပင်တို့သည် အသီးသီးကြလိမ့်မည်။ သင်တို့ပြည်၌ စစ်မှုကို ငါငြိမ်းစေ၍ ခြိမ်းခြောက်သောသူ မရှိဘဲ သင်တို့သည် အိပ်ရကြလိမ့်မည်။ တစ်ပြည်လုံးသည် ထားဘေးနှင့် ကင်းလွတ်လိမ့်မည်။ သင်တို့တွင်လည်း လှည့်လည်၍ သင်တို့၏ ဘုရားသခင် ဖြစ်မည်။ သင်တို့သည်လည်း ငါ၏လူ ဖြစ်ကြလိမ့်မည်။” (ဝတ်ပြုရာ ၂၆:၃၊ ၄၊ ၆၊ ၁၂) ဣသရေလလူမျိုးသည် ရန်သူတို့မှ လုံခြုံမှု ရရှိ၍ စည်းစိမ်ဥစ္စာ ကြွယ်ဝကြသည့်ပြင် ယေဟောဝါနှင့် ရင်းနှီးသော ဆက်ဆံမှု ရှိကြသဖြင့် ငြိမ်သက်မှု ရှိကြပေသည်။ သို့သော် ဤသို့ဖြစ်စေခြင်းငှာ ယေဟောဝါ၏ ပညတ်ကို သူတို့ လိုက်လျှောက်ရကြမည် ဖြစ်သည်။—ဆာလံ ၁၁၉:၁၆၅။
ဘုရားရေးရာ ရတနာ
it-2 ၆၁၇
ကပ်ရောဂါ
ဘုရားပညတ်ကို ချိုးဖောက်လို့ ခံစားရတဲ့ ကပ်ရောဂါ။ အစ္စရေးလူမျိုးဟာ ဘုရားရဲ့ ပဋိညာဉ်ကို ချိုးဖောက်မယ်ဆိုရင် “ကပ်ရောဂါတွေကို ငါစေလွှတ်လိုက်မယ်” လို့ ဘုရား သတိပေးခဲ့တယ်။ (ဝ ၂၆:၁၄-၁၆၊ ၂၃-၂၅။ တရ ၂၈:၁၅၊ ၂၁၊ ၂၂) ကျမ်းစာထဲမှာ ကာယပိုင်း၊ ဝတ်ပြုရေးပိုင်းမှာ ကျန်းမာခြင်းကို ဘုရားကောင်းချီးနဲ့ ဆက်စပ်ဖော်ပြပြီး (တရ ၇:၁၂၊ ၁၅။ ဆ ၁၀၃:၁-၃။ ပ ၃:၁၊ ၂၊ ၇၊ ၈။ ၄:၂၁၊ ၂၂။ ဗ ၂၁:၁-၄) ရောဂါဝေဒနာတွေကို အပြစ်၊ မစုံလင်မှုနဲ့ ဆက်စပ်ဖော်ပြထားတယ်။ (ထွ ၁၅:၂၆။ တရ ၂၈:၅၈-၆၁။ ရှာ ၅၃:၄၊ ၅။ မ ၉:၂-၆၊ ၁၂။ ယဟ ၅:၁၄) ဒါကြောင့် မိရိအံ၊ ဩဇိ၊ ဂေဟာဇိတို့ကို အနာကြီးရောဂါ စွဲစေတာလိုမျိုး တချို့အခြေအနေတွေမှာ ယေဟောဝါ ဘုရားသခင်က အနာရောဂါနဲ့ ဒဏ်ခတ်ခဲ့တာ မှန်ပါတယ်။ (တလ ၁၂:၁၀။ ၂ရ ၂၆:၁၆-၂၁။ ၂ဘု ၅:၂၅-၂၇) ဒါပေမဲ့ ရောဂါဝေဒနာတွေ၊ ကပ်ရောဂါတွေ ဖြစ်ရတဲ့ အခြေအနေ အများစုကတော့ သဘာဝတရားကြောင့် ဖြစ်သလို တစ်ယောက်စီ ဒါမှမဟုတ် လူမျိုးလိုက်ရဲ့ အပြစ်လမ်းစဉ်ကြောင့် ခံစားရတဲ့ မရှောင်လွှဲနိုင်တဲ့ ရလဒ်ကြောင့်လည်း ဖြစ်တယ်။ မျိုးစေ့ကြဲတဲ့အတိုင်း ရိတ်သိမ်းရခြင်း ဖြစ်တယ်။ လူတွေရဲ့ မှားယွင်းတဲ့ လမ်းစဉ်ကြောင့် ကိုယ်ခန္ဓာ ဒုက္ခခံစားရတာ ဖြစ်တယ်။ (ဂ ၆:၇၊ ၈) ယုတ်ညံ့တဲ့ လိင်အကျင့် ယိုယွင်းသူတွေနဲ့ပတ်သက်ပြီး တမန်တော် ပေါလု ဒီလို ပြောခဲ့တယ်– “ဘုရားသခင်က သူတို့ကို စွန့်ပစ်ပြီး အထိန်းအကွပ်မဲ့တဲ့ ရမ္မက်အလိုအတိုင်း အကျင့်ပျက်ပြားဖို့ ခွင့်ပြုလိုက်တယ်။ . . . ဒါကြောင့် အပြစ်အတွက် ထိုက်သင့်တဲ့ အပြစ်ဒဏ်ကို သူတို့ အပြည့်အဝ ခံရတယ်။”—ရ ၁:၂၄-၂၇။
ဖေဖော်ဝါရီ ၈-၁၄
ကျမ်းစာထဲက အဖိုးတန်ဘဏ္ဍာများ | တောလည်ရာ ၁–၂
“မိမိလူမျိုးကို ယေဟောဝါ ဖွဲ့စည်း”
ကျွန်ုပ်တို့အသက်တာတွင် ယေဟောဝါ ဝတ်ပြုရေးကို တော်မှန်သော နေရာ၌ ထားရှိခြင်း
၄ တောထဲတွင် စခန်းချနေကြသော ဣသရေလလူမျိုးတို့ကို အပေါ်စီးမြင်ကွင်းမှ ကြည့်ခွင့်ရလျှင် သင် ဘာကို မြင်မည်နည်း။ တပ်၏ အရှေ့၊ အနောက်၊ တောင်၊ မြောက် အရပ်မျက်နှာ အသီးသီးတွင် အနွယ် သုံးနွယ်လျှင် တစ်စုစီ တပ်စခန်းချနေကြကာ လူသုံးသန်းကျော်ခန့်တို့ နေထိုင်ရန်အတွက် များပြားလှသော်လည်း စနစ်တကျ ဆောက်လုပ်ထားသည့် တဲများကို သင် တွေ့ရမည်။ အနီးကပ် ကြည့်ပြန်လျှင် စခန်း၏ အလယ်ဗဟို ဝန်းကျင်တွင် အခြားအုပ်စု တစ်စုကိုလည်း သင် တွေ့လိမ့်မည်။ သာ၍ သေးငယ်သော ဤတဲအုပ်စု လေးစုသည် လေဝိအနွယ်မှ မိသားစုဝင်များ နေထိုင်ရန်အတွက် ဖြစ်သည်။ စခန်း၏ အလယ်ဗဟိုကျကျတွင် ပိတ်နံရံဖြင့် ဝန်းရံကာဆီးထားသော နေရာအတွင်း တစ်မူထူးခြားသည့် အဆောက်အအုံတစ်ခု ရှိသည်။ ယင်းကား ယေဟောဝါ၏ အစီအစဉ်အရ ‘တတ်ကျွမ်း’ သော ဣသရေလလူများ ဆောက်လုပ်ထားသည့် “ပရိသတ် စည်းဝေးရာတဲ” သို့မဟုတ် တဲတော် ဖြစ်သည်။—တောလည်ရာ ၁:၅၂၊ ၅၃; ၂:၃၊ ၁၀၊ ၁၇၊ ၁၈၊ ၂၅; ထွက်မြောက်ရာ ၃၅:၁၀။
it-1 ၃၉၇ ပိုဒ်. ၄
စခန်း
အစ္စရေးတွေရဲ့ တပ်စခန်းက အတော် ကျယ်တယ်။ လူဦးရေ စာရင်းအရ အမျိုးသမီး၊ ကလေး၊ အသက်ကြီးသူ၊ မသန်စွမ်းသူတွေ မပါဘဲ စစ်မှုထမ်းနိုင်သူ အမျိုးသားချည်းပဲ ၆၀၃,၅၅၀၊ လေဝိသား ၂၂,၀၀၀ နဲ့ အစ္စရေး မဟုတ်တဲ့ “ဧရာမ လူအုပ်ကြီး” ပါတဲ့အတွက် အားလုံး ပေါင်းလိုက်ရင် လူဦးရေ သုံးသန်း၊ သုံးသန်းကျော် ရှိနိုင်တယ်။ (ထွ ၁၂:၃၈၊ ၄၄။ တလ ၃:၂၁-၃၄၊ ၃၉) အဲဒီလောက် များတဲ့ လူတွေ စခန်းချတဲ့နေရာက အတော် ကျယ်မှာပဲ။ ယေရိခေါမြို့ တစ်ဖက်ကမ်း မောဘလွင်ပြင်မှာ စခန်းချချိန်တုန်းက “ဗက်ယေရှိမုတ်အရပ်ကနေ အာဗေလရှိတိမ်အရပ်အထိ” စခန်းချနေထိုင်ကြတယ်လို့ ဖော်ပြထားတယ်။—တလ ၃၃:၄၉။
ဘုရားရေးရာ ရတနာ
it-2 ၇၆၄
စာရင်းကောက်ခြင်း
လူဦးရေစာရင်း ကောက်တဲ့အခါ များသောအားဖြင့် မျိုးနွယ်စုအလိုက်၊ အိမ်ထောင်စုအလိုက် နာမည်နဲ့ ဆွေစဉ်မျိုးဆက်အတိုင်း ဖော်ပြတယ်။ သန်းခေါင်စာရင်း၊ အိမ်ထောင်ဦးစီး စာရင်း ရေတွက်ရုံလောက်ပဲ မဟုတ်ဘူး။ ကျမ်းစာမှာ ဖော်ပြထားတဲ့ လူမျိုးလိုက် လူဦးရေစာရင်း ကောက်တာက ရည်ရွယ်ချက် အမျိုးမျိုး ရှိတယ်။ အခွန်ကောက်ဖို့၊ စစ်မှုထမ်းဖို့၊ (လေဝိသားတွေဆိုရင်) သန့်ရှင်းရာဌာနမှာ တာဝန်ပေးဖို့ ဖြစ်တယ်။
ဖေဖော်ဝါရီ ၁၅-၂၁
ကျမ်းစာထဲက အဖိုးတန်ဘဏ္ဍာများ | တောလည်ရာ ၃–၄
“လေဝိအမျိုးသားတွေရဲ့ လုပ်ငန်း”
it-2 ၆၈၃ ပိုဒ်. ၃
ပုရောဟိတ်
ပညတ်ပဋိညာဉ်အောက်တွင်။ အစ္စရေးတွေ အီဂျစ်ပြည် ကျွန်ဘဝတုန်းက ဆယ်ခုမြောက် ကပ်ဘေးမှာ အီဂျစ်တွေရဲ့ သားဦးတွေကို ကွပ်မျက်ခဲ့ပေမဲ့ အစ္စရေးတွေရဲ့ သားဦးတွေကို ယေဟောဝါက မိမိအတွက် သီးသန့် ဖယ်ထားခဲ့တယ်။ (ထွ ၁၂:၂၉။ တလ ၃:၁၃) အဲဒီသားဦးတွေဟာ ယေဟောဝါရဲ့ ပိုင်ဆိုင်ရာ ဖြစ်သွားပြီး ဘုရားအတွက် အထူးတာဝန် ထမ်းဆောင်ဖို့ အသုံးပြုမှာ ဖြစ်တယ်။ ဘုရားသခင်က အဲဒီသားဦးအားလုံးကို ပုရောဟိတ်တွေအဖြစ် ခန့်အပ်ပြီး တဲတော်ကို ကြည့်ရှုစောင့်ရှောက်ဖို့ တာဝန်ပေးပိုင်ခွင့် ရှိတယ်။ ဒါပေမဲ့ အဲဒီတာဝန်အတွက် လေဝိအနွယ်ထဲက အမျိုးသားတွေကို ထမ်းဆောင်ခိုင်းတာ သင့်လျော်တယ်။ ဒါကြောင့် အစ္စရေး ၁၂ နွယ် (ယောသပ်ရဲ့သား ဧဖရိမ်နဲ့ မနာရှေရဲ့ သားမြေးတွေကို နှစ်နွယ်အဖြစ် ရေတွက်) ထဲက သားဦးတွေကို လေဝိအမျိုးအနွယ်က အမျိုးသားတွေနဲ့ လဲယူလိုက်တယ်။ စာရင်းကောက်တဲ့အခါ အသက် တစ်လပြည့် အစ္စရေး သားဦးတွေက လေဝိသားတွေရဲ့ အရေအတွက်ထက် ၂၇၃ ယောက် ပိုနေတယ်။ ပိုနေတဲ့ သားဦး ၂၇၃ ယောက်ကို ရွေးဖို့ တစ်ယောက်ကို ငွေ ငါးရှယ်ကယ် (၁၁ ဒေါ်လာ) စီ ကောက်ယူတယ်။ ရတဲ့ ငွေကို အာရုန်နဲ့ သူ့သားတွေဆီ ပေးလိုက်တယ်။ (တလ ၃:၁၁-၁၆၊ ၄၀-၅၁) အဲဒီလို မစီမံခင်ကတည်းက ယေဟောဝါဟာ လေဝိအနွယ် အာရုန်မိသားစုထဲက အမျိုးသားတွေကို အစ္စရေးတွေအတွက် ပုရောဟိတ်တာဝန် ထမ်းဆောင်ဖို့ သတ်မှတ်ထားပြီး ဖြစ်တယ်။—တလ ၁:၁။ ၃:၆-၁၀။
it-2 ၂၄၁
လေဝိသားများ
တာဝန်များ။ လေဝိသားတွေဆိုတာ လေဝိရဲ့ သားသုံးယောက် ဖြစ်တဲ့ ဂေရရှုန် (ဂေရရှုံ)၊ ကောဟတ်၊ မေရာရိကနေ ဆင်းသက်လာကြသူတွေ ဖြစ်တယ်။ (က ၄၆:၁၁။ ၁ရ ၆:၁၊ ၁၆) တောကန္တာရမှာတုန်းက မိသားစု တစ်စုစီဟာ တဲတော်နားမှာ နေရာရတယ်။ ကောဟတ်ကနေ ဆင်းသက်တဲ့ အာရုန် မိသားစုက တဲတော်ရဲ့ အရှေ့ဘက်မှာ စခန်းချရတယ်။ တခြား ကောဟတ် အိမ်ထောင်စုတွေက တောင်ဘက်ခြမ်းမှာ၊ ဂေရရှုန် အိမ်ထောင်စုတွေက အနောက်ဘက်မှာ၊ မေရာရိ မိသားစုက မြောက်ဘက်မှာ စခန်းချရတယ်။ (တလ ၃:၂၃၊ ၂၉၊ ၃၅၊ ၃၈) လေဝိသားတွေဟာ တဲတော်ကို တပ်ဆင်၊ ဖြုတ်သိမ်းတဲ့ အလုပ်၊ တဲတော် အသုံးအဆောင်တွေကို သယ်ဆောင်ရတဲ့ အလုပ် လုပ်ရတယ်။ စခန်းသိမ်းချိန် ရောက်ရင် အာရုန်နဲ့ သားတွေက သန့်ရှင်းရာအခန်းနဲ့ အသန့်ရှင်းဆုံးအခန်းကို ကာထားတဲ့ ကန့်လန့်ကာကို ဖြုတ်ပြီး သက်သေခံချက်သေတ္တာ၊ ပလ္လင်တွေနဲ့ သန့်ရှင်းမြင့်မြတ်တဲ့ တခြားပရိဘောဂတွေ၊ အသုံးအဆောင်တွေကို ဖုံးရတယ်။ အဲဒီပစ္စည်းတွေကို ကောဟတ် အမျိုးသားတွေက သယ်ရတယ်။ ဂေရရှုန် အမျိုးသားတွေက တဲတော် ရွက်ထည်၊ အမိုး၊ ကန့်လန့်ကာတွေ၊ တဲတော်ဝင်းအကာ၊ ကြိုးတွေကို သယ်ရတယ်။ မေရာရိ အမျိုးသားတွေက တဲတော်ကျဉ်းဘောင်၊ သစ်သားတန်း၊ တိုင်၊ စရွေးပေါက် ပါတဲ့ အောက်ခံခုံ၊ တဲတော်ဝင်းပတ်လည်က တိုင်၊ စရွေးပေါက် ပါတဲ့ အောက်ခံခုံ၊ တဲတော်ငုတ်တိုင်၊ ကြိုးတွေကို သယ်ရတယ်။—တလ ၁:၅၀၊ ၅၁။ ၃:၂၅၊ ၂၆၊ ၃၀၊ ၃၁၊ ၃၆၊ ၃၇။ ၄:၄-၃၃။ ၇:၅-၉။
it-2 ၂၄၁
လေဝိသားများ
မောရှေခေတ်တုန်းက လေဝိသားတွေဟာ စခန်းပြောင်းချိန်မှာ တဲတော်နဲ့ တဲတော်ပစ္စည်းတွေကို သယ်ကြရတဲ့အတွက် အသက် ၃၀ ပြည့်မှ တာဝန်ထမ်းဆောင်ဖို့ သတ်မှတ်တယ်။ (တလ ၄:၄၆-၄၉) တချို့တာဝန်တွေကိုတော့ အသက် ၂၅ နှစ်မှာ စထမ်းဆောင်ကြတယ်။ တဲတော် ရွှေ့ပြောင်းခြင်းလိုမျိုး ခွန်အား သုံးရတဲ့ အလုပ်တော့ ဖြစ်ပုံမရဘူး။ (တလ ၈:၂၄) ဘုရင် ဒါဝိဒ်ခေတ် ရောက်လာတဲ့အခါ အသက် ၂၀ မှာ စအမှုဆောင်ကြရတယ်။ အကြောင်းကတော့ တဲတော်ကို (ဗိမာန်တော်နဲ့ အစားထိုးလိုက်ပြီ ဖြစ်လို့) သယ်ယူရွှေ့ပြောင်းစရာ မလိုတော့တဲ့အတွက်လို့ ဒါဝိဒ် ပြောခဲ့တယ်။ အသက် ၅၀ ကျော်ရင်တော့ အမှုမဆောင်တော့ဘဲ အနားယူရတယ်။ (တလ ၈:၂၅၊ ၂၆။ ၁ရ ၂၃:၂၄-၂၆) လေဝိသားတွေဟာ ပညတ်ကျမ်းကို အကျွမ်းတဝင် ရှိဖို့ လိုတယ်။ သူတို့ဟာ လူတွေရှေ့မှာ ပညတ်ကျမ်းကို ဖတ်ပြရတယ်၊ သွန်သင်ပေးကြရတယ်။—၁ရ ၁၅:၂၇။ ၂ရ ၅:၁၂။ ၁၇:၇-၉။ နေ ၈:၇-၉။
ဘုရားရေးရာ ရတနာ
ပညာရှိလော့—ဘုရားသခင်ကို ကြောက်ရွံ့လော့
၁၃ ဒါဝိဒ်သည် ဆင်းရဲခက်ခဲမှု ကြုံရချိန်တွင် ယေဟောဝါ၏ အကူအညီ ရရှိခဲ့ခြင်းကြောင့် ဘုရားသခင်ကို ပိုမို ကြောက်ရွံ့လာပြီး ကိုယ်တော်အပေါ် ယုံကြည်စိတ်ချမှု တိုးလာ၏။ (ဆာလံ ၃၁:၂၂-၂၄) သို့ရာတွင် ဒါဝိဒ်သည် ထူးခြားသော ဖြစ်ရပ် သုံးခုတွင် ဆိုးကျိုးများ ခံစားရသည့်အထိ ဘုရားသခင်ကို ကြောက်စိတ် လျော့နည်းသွားခဲ့သည်။ ပထမဖြစ်ရပ်တွင် ယေဟောဝါ၏ ပဋိညာဉ်သေတ္တာကို ယေရုရှလင်မြို့သို့ ဘုရားသခင့် ပညတ်အတိုင်း လေဝိသားတို့ကို ထမ်းယူသွားစေမည့်အစား လှည်းဖြင့် သယ်ဆောင်ခဲ့သည်။ လှည်းကို နှင်ရသော ဩဇသည် ယိုင်သွားသော သေတ္တာတော်ကို လှမ်းထိန်းလိုက်ရာ သူ၏ မခန့်လေးစား လုပ်ရပ်ကြောင့် ပွဲချင်းပြီး သေဆုံးရလေသည်။ ဩဇသည် ကြီးလေးသော အပြစ် ပြုခဲ့သော်လည်း အမှန်ဆိုရလျှင် ဘုရားသခင့် ပညတ်ကို ဒါဝိဒ် မလိုက်နာခဲ့ခြင်းကြောင့် ထိုသို့ ဆိုးရွားသော အကျိုးဆက် ဖြစ်ပေါ်လာရခြင်း ဖြစ်၏။ ဘုရားသခင်ကို ကြောက်ရွံ့ခြင်းဟူသည် ကိုယ်တော်၏ ပညတ်အတိုင်း လုပ်ဆောင်ခြင်း ဖြစ်သည်။—၂ ဓမ္မရာဇဝင် ၆:၂-၉; တောလည်ရာ ၄:၁၅; ၇:၉။
ဖေဖော်ဝါရီ ၂၂-၂၈
ကျမ်းစာထဲက အဖိုးတန်ဘဏ္ဍာများ | တောလည်ရာ ၅–၆
“နာဇရိလူတွေကို ဘယ်လို တုပနိုင်သလဲ”
it-2 ၄၇၇
နာဇရိလူ
နာဇရိ သစ္စာကတိပြုသူ ရှောင်ရမယ့် အဓိကအချက် သုံးချက် ရှိတယ်။ (၁) မူးယစ်စေတဲ့ ဝိုင်နဲ့ အရက်ယမကာကို ရှောင်ရမယ်။ စပျစ်ဝိုင် အမျိုးအစား မှန်သမျှအပြင် စပျစ်သီး အစိမ်းရော အခြောက်ပါ မစားရဘူး။ စပျစ်ဖျော်ရည်၊ စပျစ်အချဉ်ရည်ကိုလည်း မသောက်ရဘူး။ (၂) နာဇရိလူဟာ ဆံပင် မဖြတ်ရဘူး။ (၃) အသေကောင်အနား မသွားရဘူး။ မိဘ၊ ညီအစ်ကိုမောင်နှမ ဖြစ်ရင်တောင် မထိမကိုင်ရဘူး။—တလ ၆:၁-၇။
အထူး သစ္စာကတိ။ “ယေဟောဝါအတွက် နာဇရိလူ [ဆက်ကပ်ထားသူ၊ သီးသန့်ဖယ်ထားခံရသူ] အဖြစ် နေထိုင်ဖို့” အထူး သစ္စာကတိပြုတာက ခြိုးခြံကျင့်ကြံခြင်းကို လူမြင်အောင် ပြပြီး ချီးမွမ်းခံရဖို့ မဟုတ်ဘူး။ အဲဒီအစား “နာဇရိ သစ္စာခံချိန် တစ်လျှောက်လုံးမှာ သူဟာ ယေဟောဝါအတွက် သန့်ရှင်းတယ်။”—တလ ၆:၂၊ ၈။ က ၄၉:၂၆။
ဒါကြောင့် နာဇရိလူတွေအတွက် ချမှတ်ထားတဲ့ တောင်းဆိုချက်တွေဟာ ယေဟောဝါရဲ့ ဝတ်ပြုရေးအရ အထူး အရေးကြီးတယ်၊ အထူး အဓိပ္ပာယ်ရှိတယ်။ ပုရောဟိတ်မင်းဟာ သန့်ရှင်းမြင့်မြတ်တဲ့ တာဝန် ရထားတဲ့အတွက် လူသေအလောင်းနား မသွားရသလိုပဲ နာဇရိလူတွေလဲ မသွားရဘူး။ အရင်းနှီးဆုံး ဆွေမျိုးသားချင်း ဖြစ်ရင်တောင် မသွားရဘူး။ ပုရောဟိတ်မင်းနဲ့ လက်ထောက် ပုရောဟိတ်တွေဟာ အရေးကြီးတဲ့ တာဝန်တွေ ရထားတဲ့အတွက် ယေဟောဝါရှေ့ မြင့်မြတ်တဲ့ တာဝန်တွေ ထမ်းဆောင်တဲ့အခါ စပျစ်ဝိုင်ဖြစ်စေ၊ တခြားအရက်ယမကာဖြစ်စေ မသောက်ရဘူး။—ဝ ၁၀:၈-၁၁။ ၂၁:၁၀၊ ၁၁။
ဒါ့အပြင် နာဇရိ (ဟီဘရူး၊ na·zirʹ) သစ္စာခံချိန် တစ်လျှောက်လုံးမှာ “ဆံပင် မဖြတ်ရဘူး။” သိသိသာသာ မြင်ရတဲ့ အဲဒီလက္ခဏာက သူဟာ သန့်ရှင်းမြင့်မြတ်တဲ့ နာဇရိ သစ္စာကတိ ပြုထားကြောင်း ချက်ချင်း သိရှိစေတယ်။ (တလ ၆:၅) သန့်ရှင်းမြင့်မြတ်တဲ့ ဥပုသ်နှစ်၊ ယုဘိလနှစ်အတွင်း မချိုင်ထားတဲ့ စပျစ်ပင်နဲ့ပတ်သက်ပြီးတော့လည်း အဲဒီဟီဘရူးစကားလုံး (na·zirʹ) ကို အသုံးပြုတယ်။ (ဝ ၂၅:၅၊ ၁၁) စိတ်ဝင်စားစရာက “ယေဟောဝါဟာ သန့်ရှင်းမြင့်မြတ်တယ်” ဆိုပြီး ရေးထွင်းထားတဲ့ ပုရောဟိတ်မင်း နဖူးပေါ်မှာ တပ်ဆင်ရတဲ့ ရွှေစင်ပြားကိုလည်း “သန့်ရှင်းမြင့်မြတ်တဲ့ ဆက်ကပ်အပ်နှံခြင်း [ဟီဘရူး၊ na·zirʹ ကနေ ဆင်းသက်လာတဲ့ neʹzer] အမှတ်အသား” လို့ ခေါ်ထားတယ်။ (ထွ ၃၉:၃၀၊ ၃၁) အဲဒီအပြင် ဘိသိက်ပေးခံထားရတဲ့ အစ္စရေးဘုရင်တွေ ဆောင်းတဲ့ သရဖူကိုလည်း neʹzer လို့ ခေါ်တယ်။ (၂ရှ ၁:၁၀။ ၂ဘု ၁၁:၁၂) ခရစ်ယာန် အသင်းတော်မှာ အမျိုးသမီးတွေရဲ့ ဆံပင်ရှည်ကို ခေါင်းဖုံးစရာအဖြစ် ပေးထားတယ်လို့ တမန်တော်တွေ ပြောထားတယ်။ အဲဒါက အမျိုးသမီးဟာ အမျိုးသားနဲ့ အနေအထား မတူဘူးဆိုတာ သိစေတဲ့ သဘာဝ သတိပေးချက် ဖြစ်တယ်။ ဘုရားအစီအစဉ်မှာ လက်အောက်ခံရမယ့် အနေအထားမှာ ရှိသူဆိုတာ သတိရသင့်တယ်။ ဒါကြောင့် (အမျိုးသားတွေအတွက် သဘာဝ မဟုတ်တဲ့) ဆံပင် မဖြတ်ဖို့၊ ဝိုင် လုံးဝ ရှောင်ဖို့၊ သန့်ရှင်းစင်ကြယ်နေဖို့၊ မညစ်ညူးဖို့ စတဲ့ တောင်းဆိုချက်တွေက သစ္စာကတိပြုထားတဲ့ နာဇရိလူဟာ မိမိအလိုဆန္ဒကို ငြင်းပယ်ပြီး ယေဟောဝါရဲ့ အလိုတော်ကို အပြည့်အဝ လက်အောက်ခံဖို့ အရေးကြီးကြောင်း ဖော်ပြခြင်း ဖြစ်တယ်။—၁က ၁၁:၂-၁၆။
ဘုရားရေးရာ ရတနာ
စာရှုသူများထံမှ မေးခွန်းလွှာ
သို့သော် ရှံဆုန်၏ နာဇရိလူ ဖြစ်ခြင်းမူ တစ်မျိုးတစ်ဘာသာ ဖြစ်သည်။ ရှံဆုန် မမွေးဖွားမီ ယေဟောဝါ၏ ကောင်းကင်တမန်က မိခင်ဖြစ်သူအား ဤသို့ပြော၏– “အကြောင်းမူကား ပဋိသန္ဓေယူ၍ ဖွားမြင်ရလတ္တံ့ သားယောက်ျားသည် ဆံပင်ရိတ်ခြင်းကို မခံဘဲ အမိဝမ်းထဲမှ စ၍ ဘုရားသခင်၏ နာဇရိလူ ဖြစ်ရလိမ့်မည်။ သူသည်လည်း ဣသရေလအမျိုးကို ဖိလိတ္တိလူတို့လက်မှ ကယ်နုတ်စပြုလိမ့်မည်။” (တရားသူကြီး ၁၃:၅) ရှံဆုန်သည် နာဇရိလူအဖြစ် ကတိမပြုခဲ့ပေ။ သူသည် ဘုရားသခင့် ခန့်အပ်ချက်ကြောင့် နာဇရိလူ ဖြစ်ရခြင်း ဖြစ်ပြီး ရာသက်ပန် နာဇရိလူ ဖြစ်၏။ လူသေကောင်နှင့် မထိရန် တားမြစ်ချက်သည် သူ့ကိစ္စရပ်တွင် မသက်ဆိုင်နိုင်ပေ။ အကယ်၍ သူနှင့် သက်ဆိုင်၍ အသေကောင်ကို အမှတ်တမဲ့ ထိမိလျှင် သူမွေးဖွားချိန်ဖြင့် စခဲ့သော ရာသက်ပန် နာဇရိလူ မည်သို့တစ်ဖန် ပြန်လည်စနိုင်အံ့နည်း။ သို့ဖြစ်၍ တစ်သက်လုံး နာဇရိလူ ဖြစ်သူတို့အတွက် တောင်းဆိုချက်များသည် ဆန္ဒအလျောက် နာဇရိလူ ဖြစ်သူတို့နှင့် ခြားနားသည်မှာ ထင်ရှားနေပါသည်။