ကျွန်ုပ်တို့အသက်တာတွင် ယေဟောဝါဝတ်ပြုရေးကို တော်မှန်သောနေရာ၌ ထားရှိခြင်း
“ကိုယ်တော်ကို နေ့တိုင်းအစဉ် ကောင်းချီးပေးပါမည်။ နာမတော်ကို ကမ္ဘာအဆက်ဆက် ချီးမွမ်းပါမည်။”—ဆာလံ ၁၄၅:၂။
၁။ ဝတ်ပြုရေးနှင့်ပတ်သက်၍ မည်သည့်အရာကို ယေဟောဝါတောင်းဆိုသနည်း။
“သင်၏ဘုရားသခင် ငါယေဟောဝါသည် အကြွင်းမဲ့စိတ်နှလုံးဖြင့် ဆည်းကပ်ဝတ်ပြုခြင်းကို ကြပ်တည်းစွာ ပြုစေလိုသောဘုရား ဖြစ်သည်။” (ထွက်မြောက်ရာ ၂၀:၅၊ ကဘ) ယေဟောဝါထံတော်မှ ထိုကြေညာချက်ကို မောရှေကြားခဲ့ရပြီး နောက်ပိုင်းတွင် ဣသရေလလူမျိုးအား ဟောပြောမှာကြားရာ၌ ယင်းကိုပြန်လည်ဖော်ပြခဲ့သည်။ (တရားဟောရာ ၅:၉) ယေဟောဝါဘုရားသခင်သည် မိမိ၏ကျေးကျွန်များထံမှ အကြွင်းမဲ့စိတ်နှလုံးဖြင့် ဆည်းကပ်ဝတ်ပြုခြင်းကို လိုလားသည်ဟူသော အချက်ကို မောရှေသံသယမဖြစ်ခဲ့ချေ။
၂၊ ၃။ (က) သိနာတောင်နားတွင် ဖြစ်ပျက်ခဲ့သည့်အရာသည် သာမန်ထက်ထူးကဲကြောင်း ဣသရေလလူမျိုးအား မည်သည့်အရာက စွဲမှတ်စေသနည်း။ (ခ) ဣသရေလလူမျိုးတို့၏ဝတ်ပြုရေးနှင့် ယနေ့ဘုရားသခင့်ကျေးကျွန်များ၏ ဝတ်ပြုရေးတို့နှင့်ပတ်သက်၍ မည်သည့်မေးခွန်းများကို ကျွန်ုပ်တို့သုံးသပ်မည်နည်း။
၂ အီဂျစ်ပြည်မှထွက်လာကြသော ဣသရေလလူမျိုးနှင့် “အမျိုးမျိုးသောလူအများတို့” သည် သိနာတောင်နားတွင် စခန်းချစဉ် မကြုံဖူးသည့်အရာကို တွေ့မြင်ခဲ့ကြရသည်။ (ထွက်မြောက်ရာ ၁၂:၃၈) ယင်းသည် ဘေးဒုက္ခ သို့မဟုတ် ကပ်ကြီးဆယ်ပါးအားဖြင့် အရှက်ကွဲခဲ့သော အီဂျစ်ဘုရားများ၏ဝတ်ပြုရေးနှင့် မတူပါလေ။ ယေဟောဝါသည် မိမိအဖြစ်တော်ကို မောရှေအား ထင်ရှားပြသသောအခါ အလွန်ထိတ်လန့်ကြောက်ရွံ့ဖွယ်ဖြစ်ရပ်ဆန်းများ ပေါ်ပေါက်ခဲ့သည်– မိုးခြိမ်းခြင်း၊ လျှပ်စီးလက်ခြင်းနှင့် စခန်းတစ်ခုလုံး တုန်လှုပ်သွားစေသော နားမခံနိုင်အောင် ကျယ်လောင်သည့် တံပိုးမှုတ်သံများကို မြင်ရကြားရကြသည်။ ထို့နောက် တောင်တစ်ခုလုံးတုန်လှုပ်ပြီး မီးနှင့်မီးခိုးများထွက်လာသည်။ (ထွက်မြောက်ရာ ၁၉:၁၆-၂၀; ဟေဗြဲ ၁၂:၁၈-၂၁) အကယ်၍ ဣသရေလလူမျိုးတစ်ဦးတစ်ယောက်က ဖြစ်ခဲ့သောအရာများသည် သာမန်ထက်ထူးကဲကြောင်း ထပ်ဆင့်သက်သေလိုအပ်ပါက ယင်းကို မကြာမီတွေ့ရမည်ဖြစ်သည်။ မကြာပါ၊ ဒုတိယအကြိမ်ရေးသားသော ဘုရားသခင့်ပညတ်တော်များကို လက်ခံယူပြီးနောက် တောင်ပေါ်မှမောရှေဆင်းလာသည်။ မှုတ်သွင်းခံမှတ်တမ်းအရ “[မောရှေ] ၏မျက်နှာအရေထွန်း ပသောကြောင့် [လူများ] သည် မချဉ်းမကပ်ဝံ့ကြ။” အမှန်ပင်၊ မမေ့ပျောက်နိုင်သော လူမကြံနိုင်သည့် ဖြစ်ရပ်ပါတကား!—ထွက်မြောက်ရာ ၃၄:၃၀။
၃ ဘုရားသခင့်ဇာတိလူမျိုးအတွက် ယေဟောဝါဝတ်ပြုရေး၏ အခန်းကဏ္ဍသည် ရှင်းပါသည်။ ကိုယ်တော်သည် သူတို့၏ကယ်တင်ရှင် ဖြစ်တော်မူသည်။ ကိုယ်တော်ကြောင့် သူတို့အသက်ရှင်ကြရသည်။ ကိုယ်တော်သည် သူတို့၏ပညတ်ပေးပိုင်ရှင်လည်း ဖြစ်တော်မူသည်။ သို့သော် ယေဟောဝါဝတ်ပြုရေးကို သူတို့ဦးထိပ်ထားကြပါသလော။ ဘုရားသခင်၏ ခေတ်သစ်ကျေးကျွန်များကော မည်သို့နည်း။ သူတို့၏အသက်တာတွင် ယေဟောဝါဝတ်ပြုရေးသည် မည်သည့်နေရာတွင်ရှိသနည်း။—ရောမ ၁၅:၄။
ဣသရေလလူမျိုးတို့၏ ယေဟောဝါဝတ်ပြုရေး
၄။ တောလမ်းခရီးစဉ်တွင် ဣသရေလလူမျိုးတို့ တပ်စခန်းချပုံကား မည်သို့ဖြစ်ပြီး စခန်း၏အလယ်ဗဟိုတွင် မည်သည့်အရာရှိသနည်း။
၄ တောထဲတွင် စခန်းချနေကြသော ဣသရေလလူမျိုးတို့ကို အပေါ်စီးမြင်ကွင်းမှကြည့်ခွင့်ရလျှင် သင်ဘာကိုမြင်မည်နည်း။ တပ်၏ အရှေ့၊ အနောက်၊ တောင်၊ မြောက် အရပ်မျက်နှာအသီးသီးတွင် အနွယ်သုံးနွယ်လျှင်တစ်စုစီ တပ်စခန်းချနေကြကာ လူသုံးသန်းကျော်ခန့်တို့ နေထိုင်ရန်အတွက် များပြားလှသော်လည်း စနစ်တကျဆောက်လုပ်ထားသည့် တဲများကို သင်တွေ့ရမည်။ အနီးကပ်ကြည့်ပြန်လျှင် စခန်း၏ အလယ်ဗဟိုဝန်းကျင်တွင် အခြားအုပ်စုတစ်စုကိုလည်း သင်တွေ့လိမ့်မည်။ သာ၍သေးငယ်သော ဤတဲအုပ်စုလေးစုသည် လေဝိအနွယ်မှ မိသားစုဝင်များ နေထိုင်ရန်အတွက်ဖြစ်သည်။ စခန်း၏အလယ်ဗဟိုကျကျတွင် ပိတ်နံရံဖြင့် ဝန်းရံကာဆီးထားသောနေရာအတွင်း တစ်မူထူးခြားသည့် အဆောက်အအုံတစ်ခုရှိသည်။ ယင်းကား ယေဟောဝါ၏အစီအစဉ်အရ ‘တတ်ကျွမ်း’ သောဣသရေလလူများ ဆောက်လုပ်ထားသည့် “ပရိသတ်စည်းဝေးရာတဲ” သို့မဟုတ် တဲတော်ဖြစ်သည်။—တောလည်ရာ ၁:၅၂၊ ၅၃; ၂:၃၊ ၁၀၊ ၁၇၊ ၁၈၊ ၂၅; ထွက်မြောက်ရာ ၃၅:၁၀။
၅။ ဣသရေလလူမျိုးတွင် တဲတော်သည် မည်သည့်အရာအတွက်ဖြစ်သနည်း။
၅ ဣသရေလလူမျိုးတို့သည် တောလမ်းခရီးသွားစဉ်အတွင်း သူတို့စခန်းချသည့်နေရာ ၄၀ ခန့်တွင် နေရာတိုင်း၌ တဲတော်ကိုဆောက်လုပ်ကြပြီး ယင်းသည် သူတို့စခန်း၏ အချက်အချာဖြစ်လာခဲ့သည်။ (တောလည်ရာ အခန်းကြီး ၃၃) သမ္မာကျမ်းစာက ယေဟောဝါသည် မိမိ၏လူမျိုးအလယ်၊ တပ်စခန်း၏အလယ်ဗဟိုတွင် ကျိန်းဝပ်တော်မူကြောင်း ဆီလျော်စွာဖော်ပြထားသည်။ တဲတော်သည် ကိုယ်တော့်ဘုန်းတော်နှင့် ပြည့်လျက်ရှိသည်။ (ထွက်မြောက်ရာ ၂၉:၄၃-၄၆; ၄၀:၃၄; တောလည်ရာ ၅:၃; ၁၁:၂၀; ၁၆:၃) ကျွန်ုပ်တို့၏ရှင်သန်သောကျမ်းစာ စာအုပ်က ဤသို့မှတ်ချက်ချသည်– “သယ်သွားသယ်လာနိုင်သော ဤအထွတ်အမြတ်ဌာနသည် လူမျိုးစုများအတွက် ဘာသာရေးနှင့်ပတ်သက်၍ စုစည်းရာဗဟိုချက်မကို ဖြစ်စေသောကြောင့် အရေးအကြီးဆုံးဖြစ်သည်။ ယင်းက ကန္တာရထဲတွင် နှစ်ရှည်လများ လှည့်လည်သွားလာနေရသောသူတို့အား စည်းလုံးစေပြီး တညီတညွတ်တည်း လုပ်ကိုင်ဆောင်ရွက်စေခဲ့သည်။” ထို့အပြင် မိမိတို့၏ဖန်ဆင်းရှင်ကိုကိုးကွယ်ခြင်းသည် ဣသရေလလူမျိုးတို့၏အသက်တာတွင် အချက်အချာဖြစ်ကြောင်း တဲတော်က အစဉ်သဖြင့်သတိရစေသည်။
၆၊ ၇။ တဲတော်နေရာတွင် မည်သည့်ဝတ်ပြုရေးအဆောက်အအုံသည် အစားဝင်ခဲ့ပြီး ယင်းက ဣသရေလလူမျိုးအား မည်သို့အထောက်အကူဖြစ်စေခဲ့သနည်း။
၆ ဣသရေလလူမျိုးတို့သည် ကတိထားရာပြည်သို့ ရောက်ပြီးနောက်ပိုင်း၌ တဲတော်သည် ဣသရေလလူမျိုးဝတ်ပြုရေး၏ အချက်အချာဖြစ်မြဲဖြစ်လျက်ရှိသည်။ (ယောရှု ၁၈:၁; ၁ ဓမ္မရာဇဝင် ၁:၃) အတန်ကြာသော် ဘုရင်ဒါဝိဒ်သည် အတည်တကျဖြစ်မည့် အဆောက်အအုံတစ်ခုကို ဆောက်လုပ်ရန် အစီအစဉ်ပြုခဲ့သည်။ ယင်းသည် နောက်ပိုင်း သူ၏သားတော်ရှောလမုန် ဆောက်လုပ်ခဲ့သည့် ဗိမာန်တော်ဖြစ်လာသည်။ (၂ ဓမ္မရာဇဝင် ၇:၁-၁၀) ဗိမာန်တော်အပ်နှံပွဲတွင် ထိုအဆောက်အအုံကို ယေဟောဝါနှစ်သက်လက်ခံကြောင်း ထင်ရှားသည့်အနေနှင့် ကောင်းကင်မှ မိုးတိမ်ကျရောက်လာသည်။ “ကိုယ်တော်ကျိန်းဝပ်တော်မူရာအိမ်၊ အစဉ်အမြဲနေတော်မူရာ ဌာနတော်ကို အကျွန်ုပ် တည်ဆောက်ပါပြီ” ဟု ရှောလမုန်ဆုတောင်းခဲ့သည်။ (၃ ဓမ္မရာဇဝင် ၈:၁၂၊ ၁၃; ၂ ရာဇဝင်ချုပ် ၆:၂) ယခုအခါ အသစ်ဆောက်လုပ်ပြီးစီးသော ဗိမာန်တော်သည် ထိုလူမျိုးတို့ ဝတ်ပြုရာ ဗဟိုဌာနဖြစ်လာသည်။
၇ ဣသရေလယောက်ျားအားလုံးတို့သည် ဘုရားသခင်၏ကောင်းချီးကို အသိအမှတ်ပြုသောအားဖြင့် ယေရုရှလင်မြို့ရှိဗိမာန်တော်တွင် တစ်နှစ်လျှင်သုံးကြိမ်ကျင်းပသော ရွှင်လန်းဖွယ်ရာ အခမ်းအနားများကို သွား၍တက်ရောက်ကြသည်။ ဤသို့ပြန်လည်ဆုံစည်းမှုများသည် ဘုရားသခင့်ဝတ်ပြုရေးကို အာရုံစူးစိုက်စေသည့် ‘ယေဟောဝါ၏ အချိန်ရာသီပွဲတော်များ’ အဖြစ် မှတ်သားဖော်ပြခြင်းသည် သင့်လျော်လှပေသည်။ (ဝတ်ပြုရာ ၂၃:၂၊ ၄၊ ကဘ) ဘုရားရေးရာဘက်ထက်သန်သော မိန်းမများလည်း အခြားမိသားစုဝင်များနှင့်အတူ ထိုပွဲတော်များကို တက်ရောက်ကြသည်။—၁ ဓမ္မရာဇဝင် ၁:၃-၇; လုကာ ၂:၄၁-၄၄။
၈။ ယေဟောဝါဝတ်ပြုရေးသည် အရေးကြီးကြောင်း ဆာလံ ၈၄:၁-၁၂ က မည်သို့သက်သေထူသနည်း။
၈ မှုတ်သွင်းခံရသည့် ဆာလံဆရာများက မိမိတို့၏အသက်တာတွင် ဝတ်ပြုရေးသည် မည်မျှအရေးပါသည့် အခန်းကဏ္ဍတွင်ပါဝင်ကြောင်း လှပစွာစကားသီကုံးလျက် ဝန်ခံပြောဆိုကြသည်။ “ကောင်းကင်ဗိုလ်ခြေအရှင် ထာဝရဘုရား၊ ကိုယ်တော်ကျိန်းဝပ်တော်မူရာ အရပ်ဌာနတို့သည် အလွန်နှစ်သက်ဖွယ် ဖြစ်ပါသည်တကား” ဟု ကောရ၏သားများ သီချင်းဆိုခဲ့သည်။ အဆောက်အအုံသက်သက်ကိုသာ သူတို့ချီးမွမ်းနေကြခြင်းမဟုတ်ပါ။ သူတို့သည် အသံကိုမြှင့်၍ ယေဟောဝါအား ဤသို့ချီးမွမ်းကြသည်– “အကျွန်ုပ်နှလုံးနှင့် ကိုယ်ခန္ဓာသည် အသက်ရှင်တော်မူသော ဘုရားသခင်ကို အလိုရှိ၍ ကြွေးကြော်ပါ၏။” လေဝိသားတို့၏လုပ်ငန်းသည် သူတို့အတွက် ကြီးမားသောပျော်ရွှင်မှုကိုဖြစ်စေသည်။ “အိမ်တော်၌နေသောသူတို့သည် မင်္ဂလာရှိပါ၏။ ကိုယ်တော်ကိုအစဉ် ချီးမွမ်းကြပါလိမ့်မည်” ဟု သူတို့ကြွေးကြော်ကြ၏။ အမှန်အားဖြင့် ဣသရေလအားလုံး ဤသို့သီဆိုနိုင်ကြသည်– “ကိုယ်တော်ကိုအားပြုသောသူသည် မင်္ဂလာရှိပါ၏။ ထိုသို့သောသူတို့သည် လမ်းခရီးတော်တို့ကို နှလုံးသွင်းတတ်ကြပါ၏။ . . . သူတို့သည် အားတိုးတက်၍ ခရီးသွားလျက် ဇိအုန်မြို့မှာ ဘုရားသခင့်ထံတော်၌ မျက်နှာပြကြပါ၏။” ဣသရေလအမျိုးသားတစ်ဦးအတွက် ယေရုရှလင်မြို့သို့သွားသောခရီးသည် ရှည်ဝေးပြီး မောပန်းဖွယ်ဖြစ်သော်လည်း မြို့တော်သို့ရောက်သောအခါ သူ၏ခွန်အား ပြန်ပြည့်လာသည်။ ယေဟောဝါအားဝတ်ပြုရသည့် အခွင့်ထူးကို သူချီးမွမ်းထောမနာပြုရသောအခါ သူ့နှလုံးသည် ရွှင်လန်းမှုနှင့်ပြည့်ဝလာသည်– “တံတိုင်းတော်တို့အတွင်း၌ နေသောတစ်ရက်သည် အခြားအရပ်၌နေသော အရက်တစ်ထောင်ထက် သာ၍ကောင်းပါ၏။ မတရားသောနေရာ၌နေရသော အခွင့်ထက် အကျွန်ုပ်၏ဘုရားသခင့်အိမ်တော်၌ တံခါးစောင့်အရာကို အကျွန်ုပ်သာ၍နှစ်သက်ပါ၏။ . . . ကောင်းကင်ဗိုလ်ခြေ အရှင်ထာဝရဘုရား၊ ကိုယ်တော်၌ ခိုလှုံသောသူသည် မင်္ဂလာရှိပါ၏။” ဣသရေလလူမျိုးတို့သည် ယေဟောဝါဝတ်ပြုရေးကို ဦးစားပေးကြောင်း ထိုသို့သောအသုံးအနှုန်းများက ထင်ရှားပြသည်။—ဆာလံ ၈၄:၁-၁၂။
၉။ ယေဟောဝါဝတ်ပြုရေးကို ရှေ့တန်းတင်ရန် ပျက်ကွက်သောအခါ ဣသရေလလူမျိုး မည်သို့ဖြစ်ပျက်ခဲ့သနည်း။
၉ ဝမ်းနည်းစရာကား ဣသရေလလူမျိုးတို့သည် စစ်မှန်သောဝတ်ပြုရေးကို အမြဲရှေ့တန်းတင်ရန် ပျက်ကွက်ခဲ့ကြသည်။ ယေဟောဝါဘက်၌ စိတ်အားထက်သန်မှုကို အောက်ခြေမှလှိုက်စားစေရန် မှောက်မှားသောဘုရားဝတ်ပြုရေးတို့ကို သူတို့ခွင့်ပြုခဲ့ကြသည်။ ရလဒ်အနေနှင့် သူတို့အား ရန်သူလက်ထဲသို့ ယေဟောဝါစွန့်ပစ်လိုက်ပြီး ဗာဗုလုန်သို့ ပြည်နှင်ခံအဖြစ် ခေါ်ဆောင်ခံရရန် ယေဟောဝါခွင့်ပြုခဲ့သည်။ နှစ်ပေါင်း ၇၀ ကြာပြီး မိမိတို့၏နေရင်းပြည်သို့ ပြန်လာကြသောအခါ သစ္စာရှိပရောဖက်များဖြစ်ကြသော ဟဂ္ဂဲ၊ ဇာခရိနှင့် မာလခိတို့၏ အားရှိဖွယ် လှုံ့ဆော်မှုများအားဖြင့် ဣသရေလလူမျိုးကို ယေဟောဝါ ထောက်မခဲ့သည်။ ယဇ်ပုရောဟိတ်ဧဇရနှင့် မြို့ဝန်နေဟမိတို့က ဗိမာန်တော်ကို ပြန်လည်တည်ဆောက်ပြီး စစ်မှန်သောဝတ်ပြုရေးကို ထိုတွင်ပြန်လည်အခြေချရန် ဘုရားလူမျိုးကိုလှုံ့ဆော်အားပေးခဲ့သည်။ သို့သော် ရာစုနှစ်များကြာလာသည်နှင့်အမျှ စစ်မှန်သောဝတ်ပြုရေးသည် ထိုလူမျိုးအလယ်တွင် ဦးစားပေးခံရခြင်း ကျဆင်းလာပြန်သည်။
ပထမရာစုအချိန် စစ်မှန်သောဝတ်ပြုရေးဘက် ဇွဲနပဲ
၁၀၊ ၁၁။ ယေရှုမြေကြီးပေါ်တွင်ရှိခဲ့စဉ်က ယေဟောဝါဝတ်ပြုရေးသည် သစ္စာရှိကျေးကျွန်များ၏အသက်တာ၌ မည်သည့်နေရာတွင်ရှိခဲ့သနည်း။
၁၀ ယေဟောဝါသတ်မှတ်ထားသည့်အချိန် ရောက်သောအခါ မေရှိယ ပေါ်ထွန်းလာသည်။ သစ္စာရှိသူများသည် ကယ်တင်ခြင်းရရန် ယေဟောဝါကိုမျှော်လင့်နေကြသည်။ (လုကာ ၂:၂၅; ၃:၁၅) အသက် ၈၄ နှစ်ရှိ မုဆိုးမအန္နသည် “ဆုတောင်းခြင်းနှင့် အစာရှောင်ခြင်းအားဖြင့် နေ့ညမပြတ် ဘုရားဝတ်ကိုပြု၍ ဗိမာန်တော်နှင့် မခွာဘဲနေ” ကြောင်းကို လုကာခရစ်ဝင်ကျမ်းမှတ်တမ်းက အတိအလင်းဖော်ပြထားသည်။—လုကာ ၂:၃၇။
၁၁ ယေရှုက “ငါ့ကိုစေလွှတ်တော်မူသောသူ၏ အလိုတော်ကိုဆောင်ခြင်း၊ သူ၏အမှုတော်ကို ပြီးစီးခြင်းအမှုသည် ငါ့စားစရာဖြစ်၏” ဟုပြောခဲ့သည်။ (ယောဟန် ၄:၃၄) ဗိမာန်တော်အတွင်း ငွေလဲလှယ်သူများနှင့် ထိပ်တိုက်ရင်ဆိုင်ရသောအခါ သူတို့အား ယေရှုမည်သို့ဆန့်ကျင်ခဲ့ကြောင်း ပြန်သတိရပါ။ သူတို့၏စားပွဲများအပြင် ချိုးငှက်များရောင်းနေသည့် ကုန်သည်များ၏ ခုံတန်းရှည်များကိုပါ ကိုယ်တော်မှောက်လှန်ပစ်ခဲ့သည်။ မာကုကဤသို့ပြန်ပြောပြသည်– “[ယေရှုသည်] ဗိမာန်တော်အထဲ၌ အဆောက်အဦကို အဘယ်သူမျှ မဆောင်မရွက်ရမည်အကြောင်း မြစ်တားတော်မူလျက် ‘ငါ့အိမ်ကို လူအမျိုးမျိုး ဆုတောင်းရာအိမ်ဟူ၍ ခေါ်ဝေါ်ကြလတ္တံ့’ ဟု ကျမ်းစာ၌လာသည်မဟုတ်လော။ သို့သော်လည်း သင်တို့သည် ထိုအိမ်ကို ဓားပြတွင်း ဖြစ်စေကြပြီတကားဟူ၍ ဆုံးမသြဝါဒပေးတော်မူ၏။” (မာကု ၁၁:၁၅-၁၇) မှန်ပါသည်၊ ပစ္စည်းပစ္စယများ သယ်ဆောင်လျက် မြို့တွင်းတစ်နေရာမှ အခြားတစ်နေရာသို့ သွားရာတွင် ဗိမာန်တော်ရင်ပြင်ကို ဖြတ်လမ်းအဖြစ် အသုံးပြုခြင်းကိုပင် ယေရှုခွင့်မပြုခဲ့ချေ။ ယေရှု၏လုပ်ရပ်သည် “ဘုရားသခင်၏နိုင်ငံတော်နှင့် ဖြောင့်မတ်ခြင်းတရားတော်ကို ရှေးဦးစွာရှာကြလော့” ဟူသော ယခင်ကကိုယ်တော့်အကြံပေးချက်ကို အလေးစီးစေသည်။ (မဿဲ ၆:၃၃) ယေဟောဝါအား အကြွင်းမဲ့စိတ်နှလုံးဖြင့် ဆည်းကပ်ဝတ်ပြုခြင်း ပုံသက်သေကောင်းကို ကျွန်ုပ်တို့အတွက် ယေရှု ထားတော်မူခဲ့သည်။ ကိုယ်တော်သည် ဟောပြောသည့်အတိုင်း လက်တွေ့ကျင့်သုံးခဲ့သည်။—၁ ပေတရု ၂:၂၁။
၁၂။ ယေရှု၏တပည့်တော်များသည် ယေဟောဝါဝတ်ပြုရေးကို မိမိတို့ဦးစားပေးကြောင်း မည်သို့တင်ပြခဲ့ကြသနည်း။
၁၂ အနှိမ်ခံရသော်လည်း သစ္စာရှိသည့်ဂျူးအမျိုးသားများအား မှောက်မှားသောဘာသာရေးဆိုင်ရာ အကျင့်ဓလေ့တို့၏ ဝန်ထုပ်ဝန်ပိုးများမှ လွတ်မြောက်စေရန် မိမိ၏တာဝန်ကို ပြီးမြောက်စေသည့်နည်းအားဖြင့် မိမိတပည့်တော်များလိုက်လျှောက်ရမည့် လမ်းစဉ်ကိုလည်း ချမှတ်ပေးခဲ့သည်။ (လုကာ ၄:၁၉) တပည့်များဖြစ်စေပြီး သူတို့ကိုနှစ်ခြင်းပေးရန်ဟူသော ယေရှု၏အမိန့်တော်ကို နာခံသောအားဖြင့် ကနဦးခရစ်ယာန်များသည် ထမြောက်ပြီးသော မိမိတို့၏သခင်နှင့်ဆက်စပ်သည့် ဘုရားသခင့်အလိုတော်အကြောင်းကို ရဲရင့်စွာကြေညာခဲ့ကြသည်။ မိမိဝတ်ပြုရေးအား သူတို့ဦးစားပေးခြင်းကို ကိုယ်တော်သဘောကျတော်မူခဲ့သည်။ သို့နှင့် ဘုရားသခင်၏ကောင်းကင်တမန်သည် တမန်တော်ပေတရုနှင့်ယောဟန်တို့အား အချုပ်အနှောင်မှ အံ့ဖွယ်နည်းဖြင့်လွတ်မြောက်စေပြီး “သင်တို့သွားကြလော့။ ဗိမာန်တော်၌ရပ်၍ အသက်ရှင်ခြင်းတရားစကားအလုံးစုံကို လူများတို့အား ဟောပြောကြလော့” ဟု သူတို့အား ညွှန်ကြားခဲ့သည်။ သူတို့ပြန်လည်အားရှိလာပြီး ယင်းအတိုင်းလုပ်ဆောင်ခဲ့သည်။ နေ့စဉ် ယေရုရှလင်မြို့ရှိ ဗိမာန်တော်တွင်လည်းကောင်း၊ တစ်အိမ်မှတစ်အိမ်သို့လည်းကောင်း “ယေရှုသည် ခရစ်တော်ဖြစ်၏ဟူ၍ ဧဝံဂေလိတရားကို မပြတ်ဟောပြောလျက်နေကြ၏။”—တမန်တော် ၁:၈; ၄:၂၉၊ ၃၀; ၅:၁၉၊ ၂၀၊ ၄၂; မဿဲ ၂၈:၁၉၊ ၂၀။
၁၃၊ ၁၄။ (က) ကနဦးခရစ်ယာန်အချိန်ကတည်းက ဘုရားသခင့်ကျေးကျွန်များအား မည်သို့ပြုရန် စာတန်အားထုတ်ခဲ့သနည်း။ (ခ) ဘုရားသခင်၏ သစ္စာရှိကျေးကျွန်များသည် မည်သည့်အရာကိုဆက်လုပ်ခဲ့ကြသနည်း။
၁၃ ဟောပြောခြင်းတွင် ဆန့်ကျင်မှုများတိုးပွားလာသည်နှင့်အမျှ ဘုရားသခင်သည် မိမိ၏သစ္စာရှိကျေးကျွန်များအား အချိန်တန်အကြံပေးချက်များကို ရေးသားစေသည်။ “သင်တို့ကို သတိနှင့်ကြည့်ရှုတော်မူသောကြောင့် သင်တို့၌ စိုးရိမ်ခြင်းအမှု ရှိသမျှတို့ကို ကိုယ်တော်၌ အပ်နှံကြလော့။ သမ္မာသတိရှိလျက် မအိပ်ဘဲ စောင့်နေကြလော့။ သင်တို့၏ရန်သူ တည်းဟူသော မာရ်နတ်သည် ဟောက်သောခြင်္သေ့ကဲ့သို့ အဘယ်သူကို မျိုရမည်နည်းဟူ၍ လှည့်လည်ရှာဖွေလျက်ရှိ၏။ သို့ဖြစ်၍ လူပြည်အရပ်ရပ်တို့၌ရှိသော သင်တို့ညီအစ်ကိုများတို့သည် ထိုသို့သောဆင်းရဲကို ခံရကြသည်ဟု သိမှတ်လျက် ယုံကြည်ခြင်း၌တည်၍ မာရ်နတ်ကို ဆီးတားကြလော့” ဟု တမန်တော်ပေတရုက စီ.အီး. ၆၀ ပြီးနောက် မကြာမီကလေးတွင် ရေးသားခဲ့သည်။ ကနဦးခရစ်ယာန်တို့သည် ထိုစကားများအားဖြင့် ယုံကြည်စိတ်ချမှုရရှိခဲ့ကြသည်မှာ သေချာသည်။ ခဏတစ်ဖြုတ် ဒုက္ခဆင်းရဲခံရပြီးနောက် သူတို့၏လေ့ကျင့်မှုကို ဘုရားသခင်အဆုံးသတ်ပေးမည်ဖြစ်ကြောင်း သူတို့သိကြသည်။ (၁ ပေတရု ၅:၇-၁၀) ဂျူးအစီအစဉ်စနစ်၏ ထိုနောက်ဆုံးအချိန်အတောအတွင်း ခရစ်ယာန်စစ်များသည် နှစ်သက်မြတ်နိုးဖွယ်ကောင်းသည့် ယေဟောဝါဝတ်ပြုရေးကို အထွတ်အထိပ်သို့တိုးမြှင့်ချီးမြှောက်ခဲ့ကြသည်။—ကောလောသဲ ၁:၂၃။
၁၄ တမန်တော်ပေါလု ကြိုတင်ပြောထားသည့်အတိုင်း စစ်မှန်သောဝတ်ပြုရေးမှ ခွဲထွက်သွားသော အယူဖောက်ပြန်မှု ဖြစ်ခဲ့သည်။ (တမန်တော် ၂၀:၂၉၊ ၃၀; ၂ သက်သာလောနိတ် ၂:၃) ပထမရာစုအကုန်ပိုင်း ဆယ်စုနှစ်များမှ သာဓကက ယင်းသို့ဖြစ်ခဲ့ကြောင်း အထောက်အထားတောင်ပုံရာပုံကို ဖော်ပြသည်။ (၁ ယောဟန် ၂:၁၈၊ ၁၉) စာတန်သည် ခရစ်ယာန်စစ်များအကြားတွင် ခရစ်ယာန်အတုများကို အောင်မြင်စွာကြဲချခဲ့ပြီး ဤ “တောပင်” များကို ဂျုံမျိုးနှင့်တူသည့် ခရစ်ယာန်များနှင့် ခွဲခြားရန် အလွန်ခက်ခဲစေသည်။ သို့ရာတွင် ကုန်လွန်ခဲ့သည့် ရာစုနှစ်များတစ်လျှောက် အချို့သူတို့သည် အသက်ဘေးအန္တရာယ်ခြိမ်းခြောက်မှုများကြားမှ ဘုရားသခင့်ဝတ်ပြုရေးကို ရှေးဦးထားခဲ့ကြသည်။ သို့သော် ‘လူမျိုးများခန့်အပ်ရာအချိန်’ ကုန်ဆုံးခါနီး ဆယ်စုနှစ်များ မရောက်မချင်း ဘုရားသခင်သည် စစ်မှန်သောဝတ်ပြုရေးကိုမြှင့်တင်ရန် မိမိ၏ကျေးကျွန်များအား ပြန်လည်စုသိမ်းခြင်းမပြုခဲ့ပါ။—မဿဲ ၁၃:၂၄-၃၀; ၃၆-၄၃; လုကာ ၂၁:၂၄။
ယနေ့ ယေဟောဝါဝတ်ပြုရေး မြှင့်တင်ခံရ
၁၅။ ၁၉၁၉ ခုနှစ်ကတည်းက ဟေရှာယ ၂:၂-၄ နှင့် မိက္ခာ ၄:၁-၄ ပါ ပရောဖက်ပြုချက်များသည် မည်သို့ပြည့်စုံလာခဲ့သနည်း။
၁၅ ၁၉၁၉ ခုနှစ်တွင် မှန်သောဘုရားသခင်ဝတ်ပြုရေးကို မြှင့်တင်သည့် ရဲရင့်စွာ ကမ္ဘာချီဟောပြောခြင်းလှုပ်ရှားမှုကို ဘိသိက်ခံအကြွင်းအကျန်များ တာဝန်ယူလုပ်ဆောင်ရန် ယေဟောဝါအပ်နှင်းခဲ့သည်။ ၁၉၃၅ ခုနှစ်မှစ၍ ပုံဆောင် “အခြားသိုး” များ ပူးပေါင်းပါဝင်လာခြင်းအားဖြင့် ‘ယေဟောဝါ၏အိမ်တော်တည်ရာတောင်’ ပေါ်သို့ ဝိညာဉ်ရေးအရ မြှင့်တင်ခံရသော လူအုပ်စုကြီးသည် ကြီးမားသထက်ကြီးမားလာသည်။ ၁၉၉၃ လုပ်ငန်းတော်နှစ်အတွင်းက ၄,၇၀၉,၈၈၉ ယောက်သော ယေဟောဝါသက်သေများသည် ကိုယ်တော်၏ မြှင့်တင်ထားခြင်းခံရသော ဝတ်ပြုရေးသို့ အခြားသူများပါဝင်လာရန် ခေါ်ဖိတ်ခြင်းအားဖြင့် ကိုယ်တော်ကိုချီးမွမ်းခဲ့ကြသည်။ အထူးသဖြင့် ခရစ်ယာန်ဘောင်တွင်ရှိသော ဗာဗုလုန်ဘာသာရေးကမ္ဘာ့အင်ပါယာ ဂိုဏ်းခွဲ ‘တောင်များ’ ၏ဝိညာဉ်ရေးအရ ယုတ်ညံ့သည့်အခြေအနေနှင့် မည်မျှကွာခြားလှပါသည်တကား!—ယောဟန် ၁၀:၁၆; ဟေရှာယ ၂:၂-၄; မိက္ခာ ၄:၁-၄။
၁၆။ ဟေရှာယ ၂:၁၀-၂၂ တွင် ကြိုတင်ပြောထားသည့်အတိုင်း ဘုရားသခင်၏ကျေးကျွန်အားလုံးတို့သည် မည်သည့်အရာကိုပြုလုပ်ရန် လိုအပ်သနည်း။
၁၆ ဗာဗုလုန်ဘာသာကို လိုက်လျှောက်သူတို့သည် သူတို့၏ဘုရားကျောင်းများနှင့် သူတို့၏ဓမ္မဆရာများကိုပင် ‘အလွန်မြင့်မြတ်သည်’ ဟုယူမှတ်ကြပြီး ယင်းတို့အား ကြီးကျယ်သောဘွဲ့နာမများဖြင့် ခေါ်ဝေါ်သမုတ်ကြသည်။ သို့သော် ဟေရှာယကြိုပြောခဲ့သည့်အချက်ကို သတိပြုပါ– “ထိုကာလ၌ လူတို့၏မော်သောမျက်နှာကို နှိမ့်ရမည်။ လူတို့၏မာနကိုလည်း ရှုတ်ချရမည်။ ထာဝရဘုရားတစ်ပါးတည်းသာ ချီးမြှောက်ခြင်းသို့ ရောက်တော်မူလိမ့်မည်။” ယင်းသည် မည်သည့်အခါတွင်ဖြစ်မည်နည်း။ ‘တန်ဖိုးမရှိသောဘုရားများ လုံးလုံးပပျောက်ရမည့်’ အလျင်အမြန် ချဉ်းကပ်လာနေသည့် ကြီးစွာသောဒုက္ခအတွင်း ဖြစ်မည်။ ထိုစိုးရွံ့ထိတ်လန့်ဖွယ်ကောင်းသော ထိုအချိန်သည် အလွန်နီးကပ်နေပြီဖြစ်သောကြောင့် ယေဟောဝါဝတ်ပြုရေးသည် မိမိတို့အသက်တာ၏ မည်သည့်နေရာတွင်ရှိကြောင်းကို ဘုရားသခင့်ကျေးကျွန်အားလုံး အရေးတယူစစ်ဆေးသင့်သည်။—ဟေရှာယ ၂:၁၀-၂၂။
၁၇။ ယနေ့ ယေဟောဝါ၏ကျေးကျွန်များသည် ယေဟောဝါဝတ်ပြုရေးကိုဦးစားပေးကြောင်း မည်သို့တင်ပြကြသနည်း။
၁၇ ကမ္ဘာချီ ညီအစ်ကိုအသင်းအဖွဲ့အနေနှင့် ယေဟောဝါသက်သေများသည် ဘုရားနိုင်ငံတော်အကြောင်း ဟောပြောခြင်းဆိုင်ရာ သူတို့၏ဇွဲနပဲကို လူသိများကြသည်။ သူတို့၏ဝတ်ပြုရေးသည် တစ်ပတ်လျှင် တစ်နာရီခန့် ဝတ်ကျေဝတ်ကုန်ပြုသည့် ဘာသာရေးသက်သက်မျှ မဟုတ်ပါ။ ယင်းသည် သူတို့၏ဘဝလမ်းစဉ်တစ်ခုလုံးဖြစ်သည်။ (ဆာလံ ၁၄၅:၂) အမှန်ပင်၊ လွန်ခဲ့သည့်နှစ်က သက်သေခံ ၆၂၀,၀၀၀ ကျော်တို့သည် ခရစ်ယာန်ဓမ္မအမှုတွင် အချိန်ပြည့်ပါဝင်နိုင်ရန် မိမိတို့၏အရေးကိစ္စများကို စီစဉ်ခဲ့ကြသည်။ အခြားကျန်ရှိသောသူများကလည်း ယေဟောဝါဝတ်ပြုရေးကို မပစ်ပယ်ထားကြပါ။ သူတို့၏ မိသားစုတာဝန်က လောကလုပ်ငန်းများတွင် ကြိုးစားလုပ်ကိုင်ရန် တောင်းဆိုသည့်တိုင် နေ့စဉ် သူတို့၏အပြောအဆိုနှင့် လူသိရှင်ကြားဟောပြောခြင်းတို့က ယင်းအချက်ကို အတိအလင်းထင်ရှားစေသည်။
၁၈၊ ၁၉။ သက်သေခံတို့၏ ဘဝဇာတ်ကြောင်းများကို ဖတ်ရှုခြင်းမှ သင်ရရှိလာသည့် အားပေးချက် ပုံသက်သေများကို ကိုးကားဖော်ပြပါ။
၁၈ ကင်းမျှော်စင် တွင်ပါသော သက်သေခံတို့၏ဘဝဇာတ်ကြောင်းများက ညီအစ်ကိုညီအစ်မအသီးသီးတို့သည် မိမိတို့၏အသက်တာတွင် ယေဟောဝါဝတ်ပြုရေးကို ရှေးဦးထားသည့်နည်းများအား ထိုးထွင်းသိမြင်စေသည်။ အသက်ခြောက်နှစ်အရွယ်တွင် မိမိအသက်တာကို ယေဟောဝါထံဆက်ကပ်အပ်နှံခဲ့သော ညီအစ်မငယ်တစ်ဦးသည် သာသနာပြုလုပ်ငန်းကို မိမိ၏ပန်းတိုင်အဖြစ် ထားရှိခဲ့သည်။ အသင်ညီအစ်ကိုညီအစ်မငယ်တို့၊ သင်တို့၏အသက်တာတွင် ယေဟောဝါဝတ်ပြုရေးကို ရှေးဦးထားနိုင်ရန် အကူအညီဖြစ်စေမည့် မည်သည့်ပန်းတိုင်ကို သင်တို့ရွေးချယ်နိုင်သနည်း။—၁၉၉၂ ခု၊ မတ် ၁ ရက်ထုတ် ကင်းမျှော်စင် စာမျက်နှာ ၂၆-၃၀ ပါ “ခြောက်နှစ်အရွယ်က ဆုံးဖြတ်ထားသည့်ပန်းတိုင်ကို မီအောင်လိုက်ခြင်း” ဆောင်းပါးကိုရှု။
၁၉ ယေဟောဝါဝတ်ပြုရေးအား တော်မှန်သည့်နေရာ၌ထားခြင်းတွင် အသက်ကြီးသူမုဆိုးမညီအစ်မတစ်ဦးက နောက်ထပ်ပုံသက်သေကောင်းတစ်ခုကိုတင်ပြသည်။ သမ္မာတရားရရန် သူမအကူအညီပေးခဲ့သူများထံမှ သူမများစွာအားယူပြီး ခံနိုင်ရည်ရှိခဲ့သည်။ သူတို့သည် သူမ၏ “ဆွေမျိုး” ဖြစ်ခဲ့သည်။ (မာကု ၃:၃၁-၃၅) အလားတူအခြေအနေမျိုးကို သင်ကြုံတွေ့ရပါက အသင်းတော်ရှိ ငယ်ရွယ်သူများ၏ ကူညီထောက်ပံ့မှုကို သင်လက်ခံမည်လော။ (၁၉၉၂ ခု၊ ဇူလိုင် ၁ ရက်ထုတ် ကင်းမျှော်စင် စာမျက်နှာ ၂၁-၃ ပါ “ရိတ်သိမ်းချိန်တွင် ကျွန်မတုံ့ပြန်ခဲ့” ဟူသောဆောင်းပါးတွင် ညီအစ်မဝင်နီဖရက် ရယ်မီက မိမိအကြောင်းမည်သို့ဖော်ပြထားသည်ကို ကျေးဇူးပြု၍မှတ်သားပါ။) အသင်အချိန်ပြည့်အမှုဆောင်တို့ သင်တို့တာဝန်ခန့်အပ်ခံရသည့်နေရာတွင် နှိမ့်ချစွာအမှုဆောင်ခြင်း၊ သီအိုကရက်တစ် လမ်းညွှန်မှုများကို စိတ်လိုကိုယ်လျောက် လက်အောက်ခံခြင်းတို့အားဖြင့် သင်တို့အသက်တာတွင် ယေဟောဝါဝတ်ပြုရေးသည် ဦးဆုံးနေရာ၌ရှိကြောင်း တင်ပြကြပါလေ။ (၁၉၉၁ ခု၊ ဒီဇင်ဘာ ၁ ရက်ထုတ် ကင်းမျှော်စင် စာမျက်နှာ ၂၁-၅ ပါ “ဘုရားသခင့်အဖွဲ့အစည်းကို စွဲမြဲတွယ်ကပ်နေခြင်း” ဆောင်းပါးတွင်ဖော်ပြထားသော ညီအစ်ကိုရွိုင်ရိုင်ယန်၏ပုံသက်သေကို ကျေးဇူးပြု၍မှတ်သားပါ။) ကျွန်ုပ်တို့သည် ယေဟောဝါဝတ်ပြုရေးကို ဦးစားပေးသောအခါ ကျွန်ုပ်တို့အား ကိုယ်တော်ဂရုစိုက်မည်ကို စိတ်ချနိုင်ကြောင်း သတိရပါ။ ဘဝလိုအပ်ရာများသည် မည်သို့ဖြစ်လာမည်ကို ကျွန်ုပ်တို့စိုးရိမ်ပူပန်နေစရာမလိုပါ။ ညီအစ်မသြလဗ်နှင့် စောနယားစပရင်းဂစ်တို့၏ တွေ့ကြုံမှုများက ယင်းအချက်ကို သရုပ်ဖော်ပြသည်။—၁၉၉၄ ခု၊ ဖေဖော်ဝါရီ ၁ ရက်ထုတ် ကင်းမျှော်စင် စာမျက်နှာ ၂၀-၅ ပါ “ဘုရားနိုင်ငံတော်ကို ကျွန်မတို့ရှေးဦးရှာခဲ့ကြ” ဆောင်းပါးကိုရှု။
၂၀။ ယခု မိမိကိုယ်ကို မည်သည့်သက်ဆိုင်သောမေးခွန်းများ မေးသင့်သနည်း။
၂၀ ကျွန်ုပ်တို့တစ်ဦးစီ မိမိကိုယ်ကို ထိုးဖောက်စစ်ဆေးသည့်မေးခွန်းများ မမေးသင့်ပေလော။ ယေဟောဝါဝတ်ပြုရေးသည် ကျွန်ုပ်အသက်တာ၏ မည်သည့်နေရာတွင်ရှိသနည်း။ အစွမ်းသတ္တိရှိသရွေ့ ဘုရားသခင့်အလိုတော်ဆောင်ပါမည်ဟူသော ဆက်ကပ်အပ်နှံထားချက်နှင့်အညီ ကျွန်ုပ်အသက်ရှင်နေပါသလော။ ကျွန်ုပ်အသက်တာ၏ မည်သည့်အပိုင်းကဏ္ဍများတွင် တိုးတက်မှုပြုနိုင်သေးသနည်း။ လေးလေးနက်နက်ပိုင်းခြားဝေဖန်မှုပြုထားသည့် နောက်ဆောင်းပါးက ကျွန်ုပ်တို့အသက်တာတွင် ရွေးချယ်ထားသည့် ဦးစားပေးချက်—ကျွန်ုပ်တို့၏မေတ္တာအရှင်နှင့် စကြဝဠာပိုင်သအုပ်စိုးရှင်ဖြစ်တော်မူသော ခမည်းတော်ယေဟောဝါဘုရားသခင်အား ဝတ်ပြုရေးနှင့်အညီ ကျွန်ုပ်တို့၏စည်းစိမ်ဥစ္စာများကို မည်သို့အသုံးပြုကြောင်း ဆင်ခြင်သုံးသပ်ရန် အခွင့်အရေးရစေမည်။—ဒေသနာ ၁၂:၁၃; ၂ ကောရိန္သု ၁၃:၅။
ပြန်လည်သုံးသပ်ရာတွင်
◻ ဝတ်ပြုရေးနှင့်ပတ်သက်၍ မည်သည့်အရာကို ယေဟောဝါတောင်းဆိုသနည်း။
◻ တဲတော်သည် မည်သည့်အရာနှင့်ပတ်သက်၍ သတိပေးချက်အဖြစ် လုပ်ဆောင်သနည်း။
◻ စီ.အီး. ပထမရာစုက မည်သူများသည် စစ်မှန်သောဝတ်ပြုရေးအတွက် ဇွဲနပဲကြီးသည့်ပုံသက်သေ ဖြစ်ကြသနည်း။ မည်သို့အားဖြင့်နည်း။
◻ ၁၉၁၉ ခုနှစ်ကတည်းက ယေဟောဝါဝတ်ပြုရေး မည်သို့မြှင့်တင်ခံလာခဲ့ရသနည်း။