ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
မတ် ၇–၁၃
ကျမ်းစာထဲက အဖိုးတန်ဘဏ္ဍာများ | ၁ ရှမွေလ ၁၂–၁၃
“ရောင့်တက်ခြင်းက အရှက်ကွဲစေ”
ရောင့်တက်ခြင်းက အရှက်ကွဲစေ
၁၇ ရှောလု၏ လုပ်ရပ်များသည် မြင်မြင်ချင်းတွင် မှန်ကန်ပုံ ရှိပေမည်။ ဘုရားသခင့်လူတို့မှာ သူတို့၏ ဆိုးရွားလှသော အခြေအနေကြောင့် “ကျဉ်းမြောင်းလျက်” “အလွန် ဆင်းရဲခံ” နေကြရပြီး တုန်လှုပ်နေကြ၏။ (၁ ဓမ္မရာဇဝင် ၁၃:၆၊ ၇) မှန်ပါသည်၊ အခြေအနေ ခွင့်ပြုသည့်အခါ အစပြုလုပ်ဆောင်ခြင်းသည် မမှားပါ။ သို့သော် ယေဟောဝါသည် နှလုံးများနှင့် ကျွန်ုပ်တို့၏ အတွင်းအကျဆုံး သဘောထားများကို သိမြင်နိုင်ကြောင်း သတိရပါ။ (၁ ဓမ္မရာဇဝင် ၁၆:၇) ထို့ကြောင့် ကျမ်းစာမှတ်တမ်း၌ တိုက်ရိုက် ဖော်ပြမထားသော ရှောလုနှင့်ပတ်သက်သည့် အကြောင်းအချို့ကို ကိုယ်တော် သိမြင်ပေမည်။ ဥပမာ၊ ရှောလု၏ စိတ်မရှည်မှုသည် မာနထောင်လွှားခြင်းကြောင့် ဖြစ်ကြောင်း ယေဟောဝါ သိမြင်ပေမည်။ ဣသရေလလူမျိုးအပေါင်း၏ ဘုရင် ဖြစ်သော မိမိသည် အသက်ကြီးရင့်၍ ဖင့်နွှဲနေသည့် ပရောဖက်တစ်ပါးအဖြစ် သူ ရှုမြင်သူတစ်ဦးအား စောင့်ဆိုင်းရခြင်းကို ရှောလု အလွန် စိတ်အနှောင့်အယှက် ဖြစ်ကောင်း ဖြစ်မိပေမည်! မည်သို့ပင် ဖြစ်စေ ရှမွေလ၏ နှေးကွေးခြင်းက ကိစ္စရပ်များကို ကိုယ်တိုင် ကိုင်တွယ်လုပ်ဆောင်ရန်နှင့် သူ ရရှိထားသော ညွှန်ကြားချက် အတိအကျကို ပမာဏမပြုဘဲ နေခွင့် ရှိစေသည်ဟု ရှောလု ယူဆခဲ့ပေမည်။ ရလဒ်ကား အဘယ်နည်း။ ရှမွေလသည် ရှောလု၏ အစပြုလုပ်ဆောင်မှုကို မချီးမွမ်းခဲ့ချေ။ ချီးမွမ်းမည့်အစား “သင်၏ အာဏာ မတည်ရ။ . . . အကြောင်းမူကား သင်သည် ထာဝရဘုရား မှာထားတော်မူသည်အတိုင်း မကျင့်” ဟု ပြစ်တင်ဆုံးမခဲ့သည်။ (၁ ဓမ္မရာဇဝင် ၁၃:၁၃၊ ၁၄) တစ်ဖန် ရောင့်တက်ခြင်းက အရှက်ကွဲစေပြန်သည်။
သင်၏ နာခံမှုကို ယေဟောဝါ တန်ဖိုးထားတော်မူ၏
၈ ဘုရင် ရှောလုနှင့်ပတ်သက်သော ကျမ်းစာမှတ်တမ်းက နာခံခြင်း၏ အရေးကြီးမှုကို ပေါ်လွင်စေသည်။ ရှောလုသည် မိမိကိုယ်ကို “ငယ်သောသူ” အဖြစ် ယူမှတ်ကာ ဘုရင် ဖြစ်စတွင် နှိမ့်ချကျိုးနွံခဲ့၏။ သို့သော် နောက်ပိုင်းတွင် မာနနှင့် မှားယွင်းသော ကျိုးကြောင်းဆင်ခြင်မှုတို့က သူ့ဆုံးဖြတ်ချက်များကို လွှမ်းမိုးစပြုလာ၏။ (၁ ဓမ္မရာဇဝင် ၁၀:၂၁၊ ၂၂; ၁၅:၁၇) တစ်ကြိမ်တွင် ရှောလုသည် ဖိလိတ္တိလူတို့နှင့် စစ်တိုက်ခဲ့ရ၏။ ယေဟောဝါအား ယဇ်ပူဇော်ရန်နှင့် ထပ်ဆင့် ညွှန်ကြားချက်များ ရရှိရန် မိမိကို စောင့်ပါဟု သူ့ကို ရှမွေလ ပြောခဲ့သည်။ သို့သော် သူ မျှော်လင့်ထားသောအချိန်တွင် ရှမွေလ ရောက်မလာသည့်အပြင် လူတို့လည်း ထွက်ပြေးစပြုလာကြ၏။ ထိုအခါ ရှောလုသည် “မီးရှို့ရာယဇ်ကို ပူဇော်လေ၏။” ယင်းကို ယေဟောဝါ မနှစ်သက်ပေ။ နောက်ဆုံး ရှမွေလ ရောက်လာသော် ဘုရင်က ရှမွေလ နောက်ကျနေသဖြင့် ဘုရားသခင့် မျက်နှာသာ ရရန် “ကိုယ်ကို အနိုင်ပြု၍ မီးရှို့ရာယဇ်ကို ပူဇော်မိပြီ” ဟု မိမိ၏ မနာခံမှုအတွက် အကြောင်းပြ ပြောဆိုလေသည်။ ယဇ်ပူဇော်ရန် ရှမွေလကို စောင့်ပါဟူသော ညွှန်ကြားချက်ကို နာခံခြင်းထက် ယဇ်ပူဇော်ခြင်းက ဘုရင် ရှောလုအတွက် ပိုအရေးကြီးခဲ့သည်။ ထို့ကြောင့် ရှမွေလက ‘သင်သည် မှားပြီ။ သင်၏ ဘုရားသခင် မှာထားတော်မူသော ပညတ်တရားကို မစောင့်ပါတကား’ ဟု ဆိုလေသည်။ ရှောလုသည် ယေဟောဝါကို မနာခံသောကြောင့် ဘုရင့်အရိုက်အရာ ဆုံးရှုံးခဲ့ရ၏။—၁ ဓမ္မရာဇဝင် ၁၀:၈; ၁၃:၅-၁၃။
ဘုရားရေးရာ ရတနာ
ယေဟောဝါရဲ့ မေတ္တာပါ လမ်းညွှန်ချက်ကို သင် လိုက်နာမလား
၁၅ လူသားဘုရင်က ယေဟောဝါထက် ပိုယုံကြည်စိတ်ချရတယ်လို့ အစ္စရေးလူတွေ ယူဆခဲ့ကြတာ ဖြစ်နိုင်တယ်။ အဲဒီလို ယူဆတယ်ဆိုရင် သူတို့က အချည်းနှီး ဖြစ်သောအရာနောက် လိုက်နေခြင်း ဖြစ်တယ်။ ဒါက အမြင်မှားအောင် စာတန် ပြုလုပ်ထားတဲ့အရာတွေထဲက တစ်ခုပဲ။ လူသားဘုရင်က သူတို့ကို မျက်စိနဲ့ မြင်နိုင်တဲ့ ဘုရားသခင်တွေကို ဝတ်ပြုအောင် အလွယ်တကူ သွေးဆောင်နိုင်တယ်။ မျက်စိနဲ့ မြင်ရတဲ့ အရာဝတ္ထုတွေနဲ့ လုပ်ထားတဲ့ ဘုရားသခင်တွေက အရာခပ်သိမ်းကို ဖန်ဆင်းတဲ့ မမြင်နိုင်တဲ့ ယေဟောဝါထက် ပိုအားကိုးလို့ ရတယ်လို့ လွဲမှားစွာ ယူဆစေနိုင်တယ်။ ဒါပေမဲ့ တမန်တော် ပေါလု ပြောတဲ့အတိုင်း အဲဒါတွေက အချည်းနှီးပဲ။ (၁ ကော. ၈:၄) ကျွန်ုပ်တို့ကသာ သူတို့ကို ထိတွေ့နိုင်၊ မြင်နိုင်ပြီး သူတို့ကတော့ မမြင်နိုင်၊ မကြားနိုင်၊ စကားမပြောနိုင်ဘူး။ ဒါကြောင့် ဒီအရာတွေကို ဝတ်ပြုနေတယ်ဆိုရင် အချည်းနှီး အရာတွေကို လိုက်စားနေခြင်း ဖြစ်တယ်။—ဆာ. ၁၁၅:၄-၈။
မတ် ၁၄–၂၀
ကျမ်းစာထဲက အဖိုးတန်ဘဏ္ဍာများ | ၁ ရှမွေလ ၁၄–၁၅
“နာခံတာဟာ ပူဇော်သက္ကာထက် ပိုကောင်း”
သင်၏ နာခံမှုကို ယေဟောဝါ တန်ဖိုးထားတော်မူ၏
၄ ယေဟောဝါသည် ဖန်ဆင်းရှင် ဖြစ်သောကြောင့် ကျွန်ုပ်တို့၌ ရှိသည့် ရုပ်ပစ္စည်းအားလုံးကို ကိုယ်တော် ပိုင်ဆိုင်သည်။ သို့ဖြစ်လျှင် ကိုယ်တော့်ကို ပေးဆက်နိုင်သောအရာ တစ်စုံတစ်ခု ရှိပါသလော။ ရှိပါသည်၊ အလွန် တန်ဖိုးရှိသည့် အရာတစ်ခုကို ကျွန်ုပ်တို့ ပေးဆက်နိုင်သည်။ အဘယ်အရာနည်း။ အဖြေကို အောက်ပါ တိုက်တွန်းချက်တွင် တွေ့ရှိနိုင်သည်– “ငါ့သား ပညာရှိလော့။ ကဲ့ရဲ့သောသူ၏ စကားကို ငါ ချေနိုင်အောင် ငါ့စိတ်ကို ရွှင်လန်းစေလော့။” (သု. ၂၇:၁၁) ဘုရားသခင်အား ကျွန်ုပ်တို့၏ နာခံမှုကို ပေးဆက်နိုင်သည်။ အခြေအနေ အမျိုးမျိုး၊ နောက်ခံ အသီးသီး ရှိသည့်တိုင် နာခံမှု တင်ပြခြင်းဖြင့် လူသားများသည် စမ်းသပ်မှု ကြုံရချိန်တွင် ဘုရားသခင်အား သစ္စာတည်ကြည်မည် မဟုတ်ဟူသော စာတန်၏ ယုတ်မာသည့် စွဲချက်ကို ကျွန်ုပ်တို့ တစ်ဦးစီ ချေပနိုင်ပါသည်။ အခွင့်ထူးလိုက်လေခြင်း!
it-2 ၅၂၁ ပိုဒ်. ၂
နာခံမှု
ဘုရားသခင့် မျက်နှာသာ ရဖို့ နာခံခြင်း မရှိမဖြစ် လိုအပ်တယ်။ နာခံခြင်းကို အစားထိုးနိုင်မယ့်အရာ မရှိဘူး။ ဘုရင် ရှောလုကို ရှမွေလ ပြောခဲ့သလိုပါပဲ– “ယေဟောဝါဘုရားက မိမိရဲ့ စကားကို နာခံတာထက် (ရှာမာ ရဲ့ ပုံစံတစ်မျိုး) မီးရှို့ရာအလှူတွေ၊ ပူဇော်သက္ကာတွေကို ပိုနှစ်သက်ပါ့မလား။ ယေဟောဝါဘုရားကို နာခံ (စာသားအရ နားထောင်) တာဟာ ပူဇော်သက္ကာထက် ပိုကောင်းတယ်။ အာရုံစိုက် နားထောင်တာကလည်း သိုးထီးရဲ့ အဆီထက် ပိုကောင်းတယ်။” (၁ရှ ၁၅:၂၂) မနာခံတာဟာ ဘုရားသခင့်စကားကို ငြင်းပယ်တာ၊ စကားတော်နဲ့ မိန့်မြွက်သူ ယေဟောဝါကို မယုံကြည်တာ ဖြစ်တယ်။ မနာခံသူဟာ မှော်အတတ် လိုက်စားသူ၊ ရုပ်တု ကိုးကွယ်သူနဲ့ အတူတူပဲ။ (၁ရှ ၁၅:၂၃။ ရ ၆:၁၆ နဲ့ နှိုင်းယှဉ်ပါ။) သဘောတူကြောင်း နှုတ်နဲ့ပဲ ပြောပြီး လုပ်ရပ် မပါဘူးဆိုရင် ညွှန်ကြားသူရဲ့ စကားကို မယုံကြည်တာ၊ မလေးစားတာ ဖြစ်တယ်။ (မ ၂၁:၂၈-၃၂) ကျမ်းစာ အမှန်တရားကို ကြားရုံ၊ စိတ်က လက်ခံရုံနဲ့ ကျေနပ်ပြီး လုပ်ရပ် မပါသူတွေဟာ မှားယွင်းတဲ့ အတွေးအခေါ်တွေနဲ့ ကိုယ့်ကိုယ်ကိုယ် လှည့်စားနေသူတွေပဲ။ သူတို့ ကောင်းချီး ခံစားရမှာ မဟုတ်ဘူး။ (ယာ ၁:၂၂-၂၅) မိန့်မှာချက်အတိုင်း လုပ်တော့ လုပ်နေပေမဲ့ နည်းလမ်းနဲ့ သဘောထား မှားနေရင်လည်း ကောင်းကင်နိုင်ငံတော် လုံးဝ ဝင်ခွင့် ရမှာ မဟုတ်ဘူးလို့ ဘုရားသခင့် သားတော် ရှင်းရှင်းလင်းလင်း ပြောခဲ့တယ်။—မ ၇:၁၅-၂၃။
ဘုရားရေးရာ ရတနာ
it-1 ၄၉၃
သနားစာနာမှု
ဘုရားသခင့် စိတ်တော်အတိုင်း မလုပ်တဲ့သူတွေကို သနားတဲ့အခါ ဆိုးကျိုးတွေ ခံစားရနိုင်တယ်။ အဲဒီအချက်ကို ဘုရင် ရှောလုအဖြစ်မှာ တွေ့နိုင်ပါတယ်။ အီဂျစ်ပြည်ကနေ အစ္စရေးလူတွေ ထွက်လာချိန်မှာ သူတို့ကို အကြောင်းမရှိဘဲ တိုက်ခိုက်ခဲ့တဲ့ အာမလက်လူတွေကို ပယ်ရှင်းဖို့ ဘုရားသခင် မိန့်မှာထားတယ်။ အာမလက်လူတွေကို မသနားဖို့ ရှောလုကို ဘုရားသခင် ပြောခဲ့တယ်။ ရှောလုကိုယ်တိုင် ယေဟောဝါဘုရားရဲ့ မိန့်မှာချက်ကို လုံးဝ နားမထောင်တဲ့အပြင် သူ့ရဲ့ ငယ်သားတွေကိုလည်း နားမထောင်ဖို့ ဖိအားပေးတယ်။ ဒါကြောင့် ယေဟောဝါဘုရားက ရှောလုကို ရှင်ဘုရင်အရာကနေ ဖယ်ရှားလိုက်တယ်။ (၁ရှ ၁၅:၂-၂၄) ယေဟောဝါဘုရားရဲ့ ဖြောင့်မတ်တဲ့ လမ်းစဉ်အတွက် ကျေးဇူးတင်လေးမြတ်တဲ့စိတ် ပျိုးထောင်ပြီး ကိုယ်တော့်အပေါ် သစ္စာစောင့်သိမယ်ဆိုရင် ရှောလုလို အမှားမျိုး လုပ်မိမှာလည်း မဟုတ်ဘူး၊ ဘုရားသခင့်ရဲ့ မျက်နှာသာလည်း ဆုံးရှုံးမှာ မဟုတ်ဘူး။
မတ် ၂၁–၂၇
ကျမ်းစာထဲက အဖိုးတန်ဘဏ္ဍာများ | ၁ ရှမွေလ ၁၆-၁၇
“ယေဟောဝါဘုရားကပဲ စစ်ပွဲမှာ အောင်မြင်ခွင့် ပေးနိုင်”
‘ထာဝရဘုရားသည် စစ်မှုကို ပိုင်၏’
ဒါဝိဒ်က ရှောလု စိတ်မပူအောင် ခြင်္သေ့နဲ့ ဝက်ဝံကို သတ်ပုတ်ဖူးတဲ့အကြောင်း ပြန်ပြောပြတယ်။ သူ ကြွားပြောနေတာလား။ မဟုတ်ပါဘူး။ အဲဒီလို သတ်ပုတ်တုန်းက ဘာလို့ အနိုင်ရခဲ့မှန်း သူ သိတယ်။ “ခြင်္သေ့လက်၊ ဝံလက်မှ ကျွန်တော်ကို ကယ်နုတ်တော်မူသော ထာဝရဘုရားသည် ထိုဖိလိတ္တိလူလက်မှ ကယ်နုတ်တော်မူလိမ့်မည်” လို့ သူ ပြောတယ်။ နောက်ဆုံး ရှောလုလည်း လက်လျှော့လိုက်ပြီး “သွားလော့။ ထာဝရဘုရားသည် သင်နှင့်အတူ ရှိတော်မူပါစေသော” ဆိုပြီး ခွင့်ပေးလိုက်တယ်။—၁ ဓမ္မရာဇဝင် ၁၇:၃၇။
ဒါဝိဒ်ရဲ့ ယုံကြည်ခြင်းမျိုး ပိုင်ဆိုင်ချင်သလား။ သူ့ယုံကြည်ခြင်းဟာ စိတ်ကူးသက်သက်၊ ဆန္ဒသက်သက် မဟုတ်ပါဘူး။ ဘုရားသခင်နဲ့ပတ်သက်တဲ့ အသိပညာနဲ့ အတွေ့အကြုံ ရှိထားတဲ့အတွက် ဘုရားအပေါ် အဲဒီလို ယုံကြည်ခြင်းမျိုး ရှိနေတာပါ။ ယေဟောဝါဘုရားဟာ မေတ္တာနဲ့ ကာကွယ်ပေးမယ့်အရှင်၊ ကတိတည်တဲ့အရှင် ဖြစ်မှန်း သူ သိတယ်။ ကျွန်တော်တို့လည်း သူ့ရဲ့ ယုံကြည်ခြင်းမျိုး ပိုင်ဆိုင်ချင်ရင် ဘုရားသခင်အကြောင်း ကျမ်းစာကနေ အမြဲ သင်ယူဖို့ လိုတယ်။ သင်ယူခဲ့ရာတွေအတိုင်း အသက်ရှင်နေထိုင်တဲ့အခါ အကျိုးရှိမှန်း သိလာပြီး ယုံကြည်ခြင်း ပိုခိုင်မြဲလာပါလိမ့်မယ်။—ဟေဗြဲ ၁၁:၁။
‘ထာဝရဘုရားသည် စစ်မှုကို ပိုင်၏’
ဒါဝိဒ် ပြန်ပြောလိုက်တဲ့စကားဟာ ယုံကြည်ခြင်းကို ဖော်ကျူးတဲ့ စကားအဖြစ် ဒီနေ့ခေတ်အထိ တည်တံ့နေဆဲပါပဲ။ လူငယ်လေး ဒါဝိဒ်က “သင်သည် ဓား၊ လှံ၊ လှံတို ပါလျက် ငါ့ထံသို့ လာ၏။ ငါသည် သင် ရှုတ်ချကဲ့ရဲ့သော ဣသရေလဗိုလ်ပါ၏ ဘုရားသခင်၊ ဗိုလ်ခြေတို့အရှင် ထာဝရဘုရား၏ နာမတော် ပါလျက် သင် ရှိရာသို့ လာ၏” ဆိုပြီး ဂေါလျတ်ကို အော်ပြောနေတာ မြင်ယောင်ကြည့်လိုက်ပါ။ လူ့အစွမ်းခွန်အားနဲ့ လက်နက်တွေဟာ သိပ်အရေးမကြီးမှန်း ဒါဝိဒ် သိတယ်။ ဂေါလျတ်က ယေဟောဝါဘုရားကို မလေးမစား စိန်ခေါ်တဲ့အတွက် ယေဟောဝါကလည်း တုံ့ပြန်ပါလိမ့်မယ်။ ဒါကြောင့် ဒါဝိဒ်က ‘ထာဝရဘုရားသည် စစ်မှုကို ပိုင်၏’ လို့ ပြောလိုက်တယ်။—၁ ဓမ္မရာဇဝင် ၁၇:၄၅-၄၇၊ သမ္မာ။
ဂေါလျတ်ရဲ့ ကိုယ်ခန္ဓာ အရွယ်အစား၊ ကိုင်ထားတဲ့ လက်နက်တွေကို ဒါဝိဒ် မမြင်ဘဲ မနေပါဘူး။ ဒါပေမဲ့ အဲဒါတွေကြောင့် ကြောက်စိတ်ဝင်သွားဖို့ သူ့ကိုယ်သူ ခွင့်မပြုခဲ့ဘူး။ ရှောလုနဲ့ စစ်သည်တွေရဲ့ အမှားမျိုး သူ မလုပ်ဘူး။ သူ့ကိုယ်သူ ဂေါလျတ်နဲ့ မနှိုင်းယှဉ်ဘူး။ အဲဒီအစား ဂေါလျတ်ကို ယေဟောဝါဘုရားနဲ့ နှိုင်းယှဉ်ကြည့်ခဲ့တယ်။ ကိုးပေခွဲကျော် မြင့်တဲ့ ဂေါလျတ်ဟာ တခြားလူတွေထက် မိုးထိုးနေပေမဲ့ စကြဝဠာရဲ့ အချုပ်အခြာအာဏာပိုင်ရှင်နဲ့ ယှဉ်လိုက်တဲ့အခါ ဘယ်လောက်များ ကြီးမားနေလို့လဲ။ တခြားလူအားလုံးလိုပဲ သူလည်း အင်းဆက်တစ်ကောင်ထက် မပိုပါဘူး။ အဲဒီအပြင် ဒီလူဟာ ယေဟောဝါ ကွပ်မျက်ဖို့ အသင့်ဖြစ်နေတဲ့သူပဲ။
‘ထာဝရဘုရားသည် စစ်မှုကို ပိုင်၏’
ဒါဟာ အတိတ်တုန်းက ဖြစ်ရပ်ပါ။ ဒီနေ့ခေတ်မှာတော့ ယေဟောဝါဘုရားရဲ့ ကျေးကျွန်တွေဟာ ပကတိ စစ်ပွဲတွေမှာ မပါဝင်ကြပါဘူး။ (မဿဲ ၂၆:၅၂) ဒါပေမဲ့ ဒါဝိဒ်ရဲ့ ယုံကြည်ခြင်းကို အတုယူဖို့ လိုအပ်နေတုန်းပဲ။ သူ့လိုပဲ ယေဟောဝါဘုရားကို တကယ့် ပုဂ္ဂိုလ်တစ်ပါးအဖြစ်၊ ကျွန်တော်တို့ ကိုးကွယ်ရမယ့်၊ ကြည်ညိုလေးမြတ်ရမယ့် တစ်ပါးတည်းသော ဘုရားသခင်အဖြစ် မြင်တတ်ဖို့ လိုတယ်။ တစ်ခါတလေ ပြဿနာတွေနဲ့ နှိုင်းယှဉ်မိတဲ့အခါ သိမ်ငယ်စိတ် ဝင်နိုင်တယ်။ ဒါပေမဲ့ ယေဟောဝါဘုရားရဲ့ အတိုင်းအဆမဲ့ တန်ခိုးနဲ့ နှိုင်းယှဉ်လိုက်ရင် ပြဿနာတွေဟာ အသေးအမွှား ဖြစ်သွားတယ်။ ယေဟောဝါကို ဘုရားသခင်အဖြစ် ရွေးချယ်ပြီး ဒါဝိဒ်လိုပဲ ယုံကြည်ကိုးစားမယ်ဆိုရင် ဘယ်အခက်အခဲ ပြဿနာမဆို ကြောက်စရာ မလိုတော့ဘူး။ ယေဟောဝါရဲ့ တန်ခိုးထက် ကြီးမားတာ ဘာမှ မရှိပါဘူး။ မုချ အောင်မြင်ပါလိမ့်မယ်။
ဘုရားရေးရာ ရတနာ
it-2 ၈၇၁-၈၇၂
ရှောလု
ဒီအဖြစ်အပျက်အပြင် ဒါဝိဒ်ကို အစ္စရေးရဲ့ အနာဂတ် ဘုရင်အဖြစ် ဘိသိက်ပေးပြီး နောက်မှာ ရှောလုဆီကနေ ယေဟောဝါရဲ့ စွမ်းအားတော် ရုပ်သိမ်းသွားတယ်။ အဲဒီအချိန်ကစပြီး သူ့ရဲ့ “မကောင်းတဲ့စိတ်ထား” က စနှောင့်ယှက်တော့တယ်။ ဘုရားစွမ်းအားတော် ရုပ်သိမ်းလိုက်တဲ့အတွက် ရှောလုရဲ့ မကောင်းတဲ့စိတ်ကြောင့် စိတ်ငြိမ်သက်မှု မရှိတော့ဘူး။ သူ့ရဲ့ ခံစားချက်တွေ၊ အတွေးအခေါ်တွေ၊ စိတ်ကူးတွေ အားလုံး မှားယွင်းကုန်တယ်။ ယေဟောဝါစကား နားမထောင်တာက သူ့စိတ်နေစိတ်ထား မကောင်းဘူးဆိုတာ ဖော်ပြတယ်။ အဲဒါကြောင့် ဘုရားသခင်ရဲ့ စွမ်းအားတော်က ရှောလုကို ကာကွယ်မပေးတော့ဘူး။ ဘုရားသခင်ရဲ့ စွမ်းအားတော်အစား “မကောင်းတဲ့ စိတ်ထားက” သူ့ကို ထိတ်လန့်စေလို့ ရှောလုရဲ့ ကျွန်တွေက “ထာဝရဘုရားထံတော်က ဆိုးသော ဝိညာဉ် နှောင့်ယှက်” တာလို့ ပြောတာ ဖြစ်တယ်။ မင်းမှုထမ်း တစ်ယောက်ရဲ့ အကြံပေးချက်အရ “မကောင်းတဲ့ စိတ်ထား” နှောင့်ယှက်တဲ့အခါတိုင်း စောင်းတီးပြီး စိတ်ကို ငြိမ်သက်အောင် လုပ်ပေးဖို့ ဒါဝိဒ်ကို နန်းတော်ထဲ ဆင့်ခေါ်လိုက်တယ်။—၁ရှ ၁၆:၁၄-၂၃၊ ယုဒသန်။ ၁၇:၁၅။
မတ် ၂၈–ဧပြီ ၃
ကျမ်းစာထဲက အဖိုးတန်ဘဏ္ဍာများ | ၁ ရှမွေလ ၁၈–၁၉
“အောင်မြင်မှု ရတဲ့အခါ ဆက်နှိမ့်ချနေပါ”
ဘဝအသက်တာတွင် အပြောင်းအလဲများနှင့် ကြုံတွေ့ရသောအခါ ဘုရားသခင့် ဝိညာဉ်တော်ကို ယုံကြည်ကိုးစားပါ
၄ မကြာမီ ထိုသိုးကျောင်းသားလေးသည် နိုင်ငံကျော် ဖြစ်လာမည် ဖြစ်သည်။ ဘုရင်၏ အမှုတော် ထမ်းရန် ဖိတ်ခေါ်ခံရပြီး ဘုရင်အတွက် တူရိယာဖြင့် ဖျော်ဖြေပေးခဲ့ရသည်။ အတွေ့အကြုံရှိသော ဣသရေလ စစ်သားများပင် မရင်ဆိုင်ရဲကြသည့် ရက်စက်ကြမ်းကြုတ်သော လူ့ဘီလူးကြီး စစ်သူရဲ ဂေါလျတ်ကို သူ သတ်ခဲ့သည်။ တိုက်ပွဲတွင် ဦးဆောင်သူအဖြစ် တာဝန် ရရှိခဲ့ပြီး ဒါဝိဒ်သည် ဖိလိတ္တိလူမျိုးများကို အောင်မြင်စွာ တိုက်ခိုက်ခဲ့သည်။ သူ့ကို လူများက ချစ်မြတ်နိုးလာခဲ့သည်။ လူတို့သည် ဒါဝိဒ်အတွက် သီချင်းရေးစပ်ကြပြီး ကျယ်လောင်စွာ သီဆိုချီးမွမ်းခဲ့ကြသည်။ အစောပိုင်း၌ ဘုရင် ရှောလုအား အကြံပေးသူက လူငယ် ဒါဝိဒ်သည် “စောင်းတီးသော အတတ်” တွင်သာမက “ရဲရင့်ခြင်း အစွမ်းသတ္တိနှင့် ပြည့်စုံ၍ စစ်မှု၌လည်းကောင်း၊ ပညာစကား၌လည်းကောင်း လေ့ကျက်ပါ၏။ အဆင်းလည်းလှပါ၏” ဟု ဖော်ပြခဲ့သည်။—၁ ဓမ္မရာဇဝင် ၁၆:၁၈; ၁၇:၂၃၊ ၂၄၊ ၄၅-၅၁; ၁၈:၅-၇။
လူတွေရဲ့ ခြားနားမှုကို ကြည့်ပါ
၆ လူတချို့ဟာ ကိုယ့်ရုပ်ရည်၊ ကျော်ကြားမှု၊ ဂီတစွမ်းရည်၊ ခွန်အား၊ အစွမ်းအစ၊ အဆင့်အတန်းတို့ကြောင့် မာနကြီးလာကြတယ်။ ဒါတွေအားလုံးကို ဒါဝိဒ် ပိုင်ဆိုင်ထားပေမဲ့ ဘဝတစ်လျှောက်လုံး နှိမ့်ချနေခဲ့တယ်။ ဂေါလျတ်ကို သတ်ပြီး ဘုရင် ရှောလုရဲ့ သမီးတော်နဲ့ ထိမ်းမြားဖို့ ကမ်းလှမ်းခံရတဲ့အခါ “ကျွန်တော့်ဆွေမျိုးတွေ၊ အဖေ့အိမ်သားတွေက အစ္စရေးလူမျိုးမှာ ဘယ်သူတွေမို့လို့လဲ။ ကျွန်တော့်လို လူစားမျိုးဟာ ဘုရင့်သမက် မဖြစ်ထိုက်ပါဘူး” လို့ ပြောခဲ့တယ်။ (၁ ရှ. ၁၈:၁၈) ဘာက ဒါဝိဒ်ကို နှိမ့်ချစေခဲ့တာလဲ။ ဘုရားသခင်က ကိုယ့်ကိုယ်ကိုယ် “ကိုင်းညွတ်” နှိမ့်ချပြီး ဂရုစိုက်ပေးတဲ့အတွက် ဒီအရည်အသွေးတွေ၊ စွမ်းရည်တွေ၊ အခွင့်ထူးတွေ ဒါဝိဒ် ရရှိထားတယ်။ (ဆာ. ၁၁၃:၅-၈) ယေဟောဝါဆီက မရဘဲ ကောင်းတဲ့အရာတစ်ခုမှ မပိုင်ဆိုင်နိုင်ကြောင်း ဒါဝိဒ် သိထားတယ်။—၁ ကောရိန္သု ၄:၇ နဲ့ နှိုင်းယှဉ်ပါ။
၇ ဒါဝိဒ်လိုပဲ ဒီနေ့ ယေဟောဝါရဲ့ လူတွေလည်း နှိမ့်ချဖို့ ကြိုးစားကြတယ်။ စကြဝဠာမှာ အကြီးမြတ်ဆုံး ပုဂ္ဂိုလ် ယေဟောဝါက ဒီနှစ်လို့ဖွယ် နှိမ့်ချမှု အရည်အသွေးကို တင်ပြကြောင်း သိရတဲ့အတွက် ကျွန်တော်တို့ အံ့ဩကြတယ်။ (ဆာ. ၁၈:၃၅) “ချစ်ခင်စာနာခြင်း၊ ကြင်နာခြင်း၊ စိတ်နှိမ့်ချခြင်း၊ နူးညံ့သိမ်မွေ့ခြင်း၊ စိတ်ရှည်ခြင်းတို့ကို ဝတ်ဆင်ကြပါ” ဆိုတဲ့ ကျမ်းစကားကို ကျွန်တော်တို့ ကြိုးစားကျင့်သုံးကြတယ်။ (ကော. ၃:၁၂) မေတ္တာဟာ “မဝါကြွားတတ်ဘူး၊ မာန်မာန မရှိဘူး” ဆိုတာကိုလည်း သိထားကြတယ်။ (၁ ကော. ၁၃:၄) ကျွန်တော်တို့ နှိမ့်ချမှု တင်ပြတဲ့အခါ ယေဟောဝါဆီ လူတွေ ချဉ်းကပ်ချင်လာကြတယ်။ ဇနီးရဲ့ အမူအကျင့်ကြောင့် စကားတစ်ခွန်းမှ ပြောစရာ မလိုဘဲ ခင်ပွန်း ယုံကြည်သူ ဖြစ်လာနိုင်သလိုပဲ ဘုရားလူမျိုး တင်ပြတဲ့ နှိမ့်ချမှုကြောင့် တခြားသူတွေကို ဘုရားသခင်ဆီ ဆွဲဆောင်နိုင်တယ်။—၁ ပေ. ၃:၁။
ဘုရားရေးရာ ရတနာ
it-2 ၆၉၅-၆၉၆
ပရောဖက်
ပရောဖက်တွေကို ယေဟောဝါရဲ့ စွမ်းအားတော်နဲ့ ခန့်အပ်တာ ဖြစ်ပေမဲ့ ဘုရားစွမ်းအားတော်က သူတို့ကို တစ်ချိန်လုံး လမ်းညွှန်နေတာတော့ မဟုတ်ဘူး။ ဘုရားစွမ်းအားတော် သူတို့အပေါ် “သက်ရောက်လာ” တဲ့အခါမှသာ ကြေညာရမယ့် သတင်းတွေကို သိရတယ်။ (ယဇ ၁၁:၄၊ ၅။ မိ ၃:၈) အဲဒီအခါ တက်တက်ကြွကြွ ပရောဖက်ပြုတော့တယ်။ (၁ရှ ၁၀:၁၀။ ယေ ၂၀:၉။ အ ၃:၈) သာမန် မဟုတ်တဲ့ လုပ်ရပ်တွေ လုပ်ကြတဲ့အပြင် သူတို့ရဲ့ အပြောအဆို၊ အပြုအမူတွေက ထူးဆန်းနေတတ်တယ်။ အဲဒါကြောင့် “ပရောဖက်တွေလို ပြုမူကြတော့တယ်” လို့ပြောကြတာ ဖြစ်နိုင်တယ်။ (၁ရှ ၁၀:၆-၁၁။ ၁၉:၂၀-၂၄။ ယေ ၂၉:၂၄-၃၂။ တ ၂:၄၊ ၁၂-၁၇။ ၆:၁၅။ ၇:၅၅ နဲ့နှိုင်းယှဉ်ပါ။) ပရောဖက်တွေဟာ မိမိတို့တာဝန် ကျေပွန်အောင် အာရုံစိုက်ပြီး ထက်ထက်သန်သန်၊ သတ္တိရှိရှိ လုပ်ဆောင်တာကြောင့် တခြားသူတွေအတွက် အထူးအဆန်း ဖြစ်နေတတ်တယ်။ ယေဟုကို ဘိသိက်ပေးတုန်းက ပရောဖက်တစ်ပါးကို ဗိုလ်ချုပ်တွေ ယူမှတ်သလို ဖြစ်မယ်။ အဲဒီလူက ပရောဖက်မှန်း ဗိုလ်ချုပ်တွေ သိတာနဲ့ သူ့စကားကို လေးစားကြတယ်။ (၂ဘု ၉:၁-၁၃။ တ ၂၆:၂၄၊ ၂၅ နဲ့နှိုင်းယှဉ်ပါ။) ဒါဝိဒ်ကို လိုက်ဖမ်းတဲ့အချိန်မှာ ရှောလုက ပရောဖက်လို ပြုမူခဲ့တယ်။ အတွင်းအင်္ကျီနဲ့ပဲ လှဲနေတယ်။ အဲဒီအချိန်အတွင်းမှာ ဒါဝိဒ် ထွက်ပြေးတော့တယ်။ (၁ရှ ၁၉:၁၈–၂၀:၁) ဒီလိုပြောလို့ ပရောဖက်တွေက အမြဲ အဝတ်မပါဘဲ သွားလာတာတော့ မဟုတ်ပါဘူး။ ကျမ်းစာမှတ်တမ်းက အဲဒီလို မပြောဘူး။ မှတ်တမ်းတင်ထားတဲ့ အဖြစ်အပျက်နှစ်ခုမှာ ပရောဖက်ဟာ အကြောင်းရှိလို့ အဝတ်မပါတာ ဖြစ်တယ်။ (ရှာ ၂၀:၂-၄။ မိ ၁:၈-၁၁) ရှောလု ဘုရင့်အဝတ်အစားတွေ ချွတ်တာက သူဟာ သာမန်လူပဲ၊ ယေဟောဝါရဲ့ တန်ခိုးအာဏာနဲ့ နှိုင်းယှဉ်တဲ့အခါ ဘာမှ မဟုတ်ဘူးဆိုတာ ပြဖို့ ဖြစ်နိုင်တယ်။ ဒါပေမဲ့ အဲဒီလိုတော့ မဖော်ပြထားဘူး။
ဧပြီ ၄–၁၀
ကျမ်းစာထဲက အဖိုးတန်ဘဏ္ဍာများ | ၁ ရှမွေလ ၂၀–၂၂
“မိတ်ဆွေကောင်း ဖြစ်နိုင်ပုံ”
အဆုံး မရောက်ခင် ရင်းနှီးမှု နှောင်ကြိုးကို ခိုင်မြဲစေပါ
၁၈ ဒီနေ့လည်း ညီအစ်ကို/မတွေဟာ အခက်အခဲ အမျိုးမျိုး ကြုံနေကြတယ်။ သဘာဝဘေး၊ လူတွေကြောင့် ဖြစ်တဲ့ ဘေးဆိုးတွေကို ကြုံနေရတယ်။ အဲဒီလိုအချိန်မှာ မိတ်ဆွေတွေကို ကိုယ့်အိမ်မှာ ခေါ်ထားနိုင်တယ်။ ငွေကြေး ကူညီနိုင်တယ်။ သူတို့ကို ကူညီပေးဖို့ ယေဟောဝါဆီ ဆုတောင်းနိုင်တယ်။ ညီအစ်ကို/မ တစ်ယောက်ယောက် စိတ်ဓာတ်ကျနေချိန်မှာ ဘာပြောရမှန်း၊ ဘာလုပ်ပေးရမှန်း မသိဘဲ ဖြစ်နေနိုင်တယ်။ ဒါပေမဲ့ တစ်နည်းနည်းနဲ့ ကူညီပေးနိုင်တယ်။ ဥပမာ၊ အချိန်ပေးနိုင်တယ်။ သူတို့ စကားပြောတဲ့အခါ စာနာစိတ်နဲ့ နားထောင်ပေးနိုင်တယ်။ နှစ်သိမ့်မှု ဖြစ်စေတဲ့ အကြိုက်ဆုံး ကျမ်းချက်တွေ ပြောပြနိုင်တယ်။ (ဟေရှာ. ၅၀:၄) အရေးကြီးဆုံးကတော့ မိတ်ဆွေတွေ ကိုယ့်ကို လိုအပ်ချိန်မှာ သူတို့အနား ရှိနေပေးဖို့ပါပဲ။—ပညာအလိမ္မာ ၁၇:၁၇ ကိုဖတ်ပါ။
ယေဟောဝါ၏ လမ်းခရီးတော်၌ လျှောက်သွားလော့
၇ ဘုရားသခင်သည် ကျွန်ုပ်တို့ကို ယုံကြည်ကိုးစားထိုက်သော မိတ်ဆွေများ ဖြစ်စေလိုသည်။ (သု. ၁၇:၁၇) ဘုရင် ရှောလု၏ သား ယောနသန်သည် ဒါဝိဒ်၏ မိတ်ဆွေတစ်ဦး ဖြစ်၏။ ဂေါလျတ်ကို ဒါဝိဒ် သတ်ပစ်လိုက်ကြောင်း ယောနသန် ကြားသောအခါ “ယောနသန် စိတ်နှလုံးသည် ဒါဝိဒ်စိတ်နှလုံးနှင့် စွဲကပ်လျက် ရှိ၍ ဒါဝိဒ်ကို ကိုယ်နှင့်အမျှ ချစ်လေ၏။” (၁ ရာ. ၁၈:၁၊ ၃) ရှောလုသည် ဒါဝိဒ်အား သတ်လိုကြောင်းကိုလည်း ယောနသန် သတိပေးခဲ့သည်။ ဒါဝိဒ် ထွက်ပြေးပြီးနောက် ယောနသန်သည် သူနှင့် သွားတွေ့ပြီး ပဋိညာဉ် ဖွဲ့ခဲ့သည်။ ယောနသန်သည် ဒါဝိဒ်နှင့်ပတ်သက်၍ ရှောလုအား ပြောဆိုချိန်တွင် အသတ်ခံရလုနီးပါး ဖြစ်ခဲ့သော်လည်း ဒါဝိဒ်နှင့် ထပ်မံ တွေ့ဆုံပြီး ရင်းနှီးမှု နှောင်ကြိုးကို ပို၍ ခိုင်မာစေခဲ့သည်။ (၁ ရာ. ၂၀:၂၄-၄၁) သူတို့ နောက်ဆုံး တွေ့ဆုံချိန်၌ ယောနသန်သည် ဒါဝိဒ်ကို “ဘုရားသခင်၌ ခိုလှုံအားကြီးစေခြင်းငှာ” ထောက်မပေးခဲ့သည်။—၁ ရာ. ၂၃:၁၆-၁၈။
မေတ္တာကင်းမဲ့သော လောကတွင် မိတ်ဆွေများအဖြစ် ခင်မင်ရင်းနှီးမှုကို ဆက်ထိန်းသိမ်းခြင်း
၁၁ သစ္စာရှိပါ။ “အဆွေခင်ပွန်းသည် အခါခပ်သိမ်း ချစ်တတ်၏။ ညီအစ်ကိုသည် ဒုက္ခကာလအဖို့ မွေးဖွားလျက်ရှိ၏” ဟု ရှောလမုန် ရေးခဲ့သည်။ (သု. ၁၇:၁၇) ဤစကားများကို ရှောလမုန် ရေးသားခဲ့ချိန်တွင် သူ့ဖခင် ဒါဝိဒ်နှင့် ယောနသန်တို့၏ ခင်မင်ရင်းနှီးမှုကို အမှတ်ရနေပေမည်။ (၁ ရာ. ၁၈:၁) ဘုရင် ရှောလုသည် သားဖြစ်သူ ယောနသန်ကို အစ္စရေးနိုင်ငံ၏ ထီးနန်း ဆက်ခံစေလိုသည်။ သို့သော် ယေဟောဝါသည် ဤအရိုက်အရာကို အပ်နှင်းရန် ဒါဝိဒ်အား ရွေးချယ်သည်ဟူသော အချက်ကို ယောနသန် လက်ခံခဲ့သည်။ ထို့ကြောင့် ရှောလုနှင့် မတူဘဲ ဒါဝိဒ်အား မနာလို မဖြစ်ခဲ့ပေ။ ဒါဝိဒ် ချီးမွမ်းခံရသည်ကို သူ မခံချိမခံသာ မဖြစ်ခဲ့သည့်အပြင် ဒါဝိဒ်နှင့်ပတ်သက်၍ ရှောလု မဟုတ်မမှန် စွပ်စွဲသည်ကို မယုံကြည်ခဲ့ချေ။ (၁ ရာ. ၂၀:၂၄-၃၄) ကျွန်ုပ်တို့သည် ယောနသန်နှင့် တူသလော။ ကျွန်ုပ်တို့၏ မိတ်ဆွေများ အသင်းတော်တွင် အခွင့်ထူး ရရှိသောအခါ သူတို့အတွက် ဝမ်းမြောက်သလော။ သူတို့ အခက်အခဲ ကြုံသောအခါ အားပေးနှစ်သိမ့်၍ ထောက်မပေးပါသလော။ မိတ်ဆွေတစ်ဦးနှင့်ပတ်သက်သော ထိခိုက်နစ်နာစေသည့် အတင်းအဖျင်းများ ကြားသောအခါ ချက်ချင်း ယုံကြည်လိုက်သလော။ သို့မဟုတ် ယောနသန်ကဲ့သို့ပင် ကျွန်ုပ်တို့၏ မိတ်ဆွေဘက်မှ နေ၍ သစ္စာရှိရှိ ကာကွယ်ပေးသလော။
ဘုရားရေးရာ ရတနာ
ဓမ္မရာဇဝင် ပထမစောင်မှ ပေါ်လွင်ချက်များ
၂၁:၁၂၊ ၁၃။ ကျွန်ုပ်တို့၏ ဘဝတွင် ခက်ခဲသော အခြေအနေများကို ရင်ဆိုင်ဖြေရှင်းရန် ကျွန်ုပ်တို့၏ ဉာဏ်ရည်ဉာဏ်စွမ်းနှင့် အရည်အချင်းများကို အသုံးပြုဖို့ ယေဟောဝါ မျှော်လင့်တော်မူ၏။ ကိုယ်တော်သည် ကျွန်ုပ်တို့အား သမ္မာကျမ်းစာ ပေးအပ်ထားပြီ ဖြစ်ရာ ယင်းက ဉာဏ်အမြော်အမြင်၊ အသိပညာနှင့် တွေးခေါ်နိုင်စွမ်းတို့ကို ရရှိစေသည်။ (သု. ၁:၄) ထို့အပြင် ခန့်အပ်ခံ ခရစ်ယာန် အကြီးအကဲများ၏ အကူအညီကိုလည်း ကျွန်ုပ်တို့ ရရှိထားကြ၏။
ဧပြီ ၁၈–၂၄
ကျမ်းစာထဲက အဖိုးတန်ဘဏ္ဍာများ | ၁ ရှမွေလ ၂၃–၂၄
“ယေဟောဝါကို စိတ်ရှည်ရှည် စောင့်ဆိုင်းပါ”
ဘဝအသက်တာတွင် အပြောင်းအလဲများနှင့် ကြုံတွေ့ရသောအခါ ဘုရားသခင့် ဝိညာဉ်တော်ကို ယုံကြည်ကိုးစားပါ
၈ ဒါဝိဒ်သည် ရှောလုအား ထိခိုက်အောင် ပြုလုပ်ဖို့ ငြင်းဆိုခဲ့သည်။ ယုံကြည်ခြင်းနှင့် သည်းခံခြင်းကို တင်ပြကာ ကိစ္စရပ်များကို ယေဟောဝါ၏ လက်ထဲ အပ်နှံထားခဲ့သည်။ ဘုရင်သည် ဂူထဲမှ ထွက်သွားပြီးနောက် ဒါဝိဒ်သည် ဘုရင်အား လှမ်း၍ ဤသို့ပြောခဲ့၏– “ထာဝရဘုရားသည် ကျွန်တော်နှင့် ကိုယ်တော်စပ်ကြားမှာ စီရင်တော်မူပါစေသော။ ကျွန်တော်အား ပြစ်မှားသော အပြစ်ကို ထာဝရဘုရား ဆပ်ပေးတော်မူပါစေသော။ သို့ရာတွင် ကျွန်တော်လက်သည် ကိုယ်တော်အပေါ်သို့ မရောက်ပါစေနှင့်။” (၁ ဓမ္မရာဇဝင် ၂၄:၁၂) ရှောလု မှားသည်ကို ဒါဝိဒ် သိသော်လည်း သူကိုယ်တိုင် လက်တုံ့မပြန်ခဲ့ပါ၊ သူသည် ရှောလုကိုသော်လည်းကောင်း၊ ရှောလုနှင့် ပတ်သက်၍သော်လည်းကောင်း ရင့်သီးရိုင်းစိုင်းစွာ ပြောဆိုခြင်း မရှိခဲ့ပါ။ အခြားအချိန်များစွာတွင်လည်း ဒါဝိဒ်သည် မိမိကိုယ်တိုင် လက်တုံ့မပြန်မိစေရန် ချုပ်တည်းခဲ့သည်။ ယင်းအစား ကိစ္စရပ်များကို ဖြောင့်မတ်စွာ ပြုပြင်တည့်မတ်ပေးရန် ယေဟောဝါအား ယုံကြည်ကိုးစားခဲ့သည်။—၁ ဓမ္မရာဇဝင် ၂၅:၃၂-၃၄; ၂၆:၁၀၊ ၁၁။
သင့်အခြေအနေက သင့်ဘဝကို ထိန်းချုပ်သလော
တတိယ သင်ခန်းစာမှာ ကျွန်ုပ်တို့၏ အခြေအနေကို ကျမ်းစာနှင့်မညီသော နည်းများဖြင့် ပြောင်းလဲစေမည့်အစား ယေဟောဝါအား စောင့်ဆိုင်းခြင်း ဖြစ်သည်။ တပည့်ဖြစ်သူ ယာကုပ်က ဤသို့ရေးခဲ့၏– “သင်တို့သည် အလျှင်း မချို့တဲ့ဘဲ စေ့စပ်စုံလင်မည်အကြောင်း သည်းခံခြင်းစိတ်သည် အကုန်အစင် ပြုပြင်ပါစေ။” (ယာကုပ် ၁:၄) စုံစမ်းနှောင့်ယှက်ခြင်းကို အလျင်အမြန် ရပ်တန့်သွားစေရန် ကျမ်းစာနှင့် မညီသည့် နည်းကို အသုံးမပြုဘဲ သည်းခံခြင်းစိတ် “အကုန်အစင် ပြုပြင်” ခံရစေရန် ဆက်ခွင့်ပြုသင့်သည်။ သို့ပြုလျှင် ကျွန်ုပ်တို့၏ ယုံကြည်ခြင်းသည် စမ်းသပ်ခံရပြီး သန့်စင်နေမည် ဖြစ်ရာ အားရှိစေနိုင်ကြောင်း ထင်ရှားလိမ့်မည်။ ယောသပ်နှင့် ဒါဝိဒ်တို့သည် ထိုသို့သော ခံနိုင်ရည်မျိုး ရှိခဲ့ကြသည်။ ယေဟောဝါ မနှစ်သက်သော ဖြေရှင်းနည်းကို သူတို့ အသုံးမပြုခဲ့ကြချေ။ ယင်းအစား သူတို့၏ အခြေအနေကို အကောင်းဆုံး ဖြစ်စေခဲ့ကြသည်။ ယေဟောဝါအား သူတို့ စောင့်ဆိုင်းခဲ့ကြသဖြင့် ရရှိသော ကောင်းချီးများသည် ကြီးမားလိုက်လေခြင်း! သူတို့ နှစ်ဦးစလုံးကို ယေဟောဝါ အသုံးပြုခဲ့ပြီး ကိုယ်တော့်လူမျိုးကို ကယ်လွှတ်သူများ ဖြစ်စေခဲ့သည်။—ကမ္ဘာဦး ၄၁:၃၉-၄၁; ၄၅:၅; ၂ ဓမ္မရာဇဝင် ၅:၄၊ ၅။
ကျွန်ုပ်တို့လည်း ကျမ်းစာနှင့် မညီသော ဖြေရှင်းနည်းများကို အသုံးပြုရန် သွေးဆောင်ခံရပေမည်။ ဥပမာ၊ သင်သည် သင့်တော်သော အိမ်ထောင်ဖက် မတွေ့သေးသောကြောင့် စိတ်ဓာတ်ကျနေသလော။ ထိုသို့ဖြစ်မည်ဆိုလျှင် “သခင်ဘုရား၌သာ” အိမ်ထောင်ပြုပါဟူသော ယေဟောဝါ၏ အမိန့်တော်ကို မနာခံစေသည့် မည်သည့် သွေးဆောင်မှုမျိုးကိုမဆို ရှောင်ကြဉ်ပါ။ (၁ ကောရိန္သု ၇:၃၉) အိမ်ထောင်ရေး ပြဿနာများကို သင် ကိုင်တွယ်ဖြေရှင်းနေရပါသလော။ လင်မယား ခွဲနေခြင်း၊ ကွာရှင်းခြင်းတို့ကို အားပေးသည့် လောကစိတ်ဓာတ်၏ လွှမ်းမိုးမှုကို ခံမည့်အစား အကျပ်အတည်း ကာလတစ်လျှောက် အတူတူ လက်တွဲဖြေရှင်းပါ။ (မာလခိ ၂:၁၆; ဧဖက် ၅:၂၁-၃၃) သင့်စီးပွားရေး အခြေအနေကြောင့် မိသားစုကို ပြုစုစောင့်ရှောက်ရန် ခဲယဉ်းနေပါသလော။ ယေဟောဝါအား စောင့်ဆိုင်းခြင်းတွင် ငွေရရန် သံသယ ဖြစ်စရာ လုပ်ငန်းများ၊ တရားမဝင် အလုပ်များကို ရှောင်ကြဉ်ခြင်း ပါဝင်သည်။ (ဆာလံ ၃၇:၂၅; ဟေဗြဲ ၁၃:၁၈) ကျွန်ုပ်တို့ အားလုံးသည် ကျွန်ုပ်တို့၏ အခြေအနေများကို အကောင်းဆုံး ဖြစ်လာစေရန်၊ ယေဟောဝါ ကောင်းချီး ခံစားရရန် ကြိုးစားကြရမည်။ ထိုသို့ပြုလုပ်ကြစဉ် အကောင်းဆုံး ဖြေရှင်းနည်းကို ယေဟောဝါ ပေးသည့်အထိ စောင့်မျှော်နေကြပါစို့။—မိက္ခာ ၇:၇။
ဘုရားရေးရာ ရတနာ
ဆုမရအောင် ဘာကမှ မတားဆီးပါစေနဲ့
၁၁ မေတ္တာ၊ ကြင်နာခြင်းကို မွေးမြူမယ်ဆိုရင် အလွယ်တကူ မနာလိုဖြစ်မှာ မဟုတ်ဘူး။ “မေတ္တာဟာ စိတ်ရှည်တတ်တယ်။ ကြင်နာတတ်တယ်။ မေတ္တာဟာ မနာလို မဖြစ်တတ်ဘူး” လို့ ကျမ်းစာက ပြောတယ်။ (၁ ကော. ၁၃:၄) မနာလိုခြင်းကို စိတ်နှလုံးထဲကနေ အမြစ်ပါမကျန် ဖယ်ရှားနိုင်ဖို့ ကိစ္စရပ်တွေကို ဘုရားသခင် ရှုမြင်သလို ရှုမြင်ရမယ်။ ညီအစ်ကို/မတွေကို ခရစ်ယာန် ကိုယ်ခန္ဓာတစ်ခုတည်းက အင်္ဂါချင်းတွေအဖြစ် ရှုမြင်ရမယ်။ ဒါမှ “အစိတ်အပိုင်းတစ်ခု ချီးမွမ်းခံရရင် ကျန်တဲ့ အစိတ်အပိုင်းအားလုံး ထပ်တူ ဝမ်းမြောက်ကြတယ်” ဆိုတဲ့ ကျမ်းစကားနဲ့အညီ ကိုယ်ချင်းစာတတ်အောင် ကူညီပေးပါလိမ့်မယ်။ (၁ ကော. ၁၂:၁၆-၁၈၊ ၂၆) တခြားသူတွေ ကောင်းချီးရတဲ့အခါ မနာလို မဖြစ်ဘဲ ဝမ်းမြောက်လိမ့်မယ်။ ဘုရင်ရှောလုရဲ့ သား ယောနသန်အကြောင်း စဉ်းစားကြည့်ပါ။ ထီးနန်းကို ဒါဝိဒ် ဆက်ခံရတဲ့အခါ မနာလို မဖြစ်ဘဲ ဒါဝိဒ်ကို အားပေးခဲ့တယ်။ (၁ ရှ. ၂၃:၁၆-၁၈) ယောနသန်လို မေတ္တာ၊ ကြင်နာမှု ပြနိုင်မလား။
ဧပြီ ၂၅–မေ ၁
ကျမ်းစာထဲက အဖိုးတန်ဘဏ္ဍာများ | ၁ ရှမွေလ ၂၅–၂၆
“စိတ်လိုက်မာန်ပါ လုပ်သလား”
ဉာဏ်အမြော်အမြင် ရှိရှိ သူ ပြုမူခဲ့
၁၀ အလုပ်ကြိုးစားတဲ့ ဒီစစ်သူရဲတွေဟာ သိုးထိန်းတွေနဲ့ ဘယ်လို ဆက်ဆံခဲ့သလဲ။ သိုးတွေကို အလွယ်တကူ ဖမ်းယူ စားနိုင်ပေမဲ့ သူတို့ မလုပ်ကြဘူး။ အဲဒီအစား နာဗလရဲ့ သိုးအုပ်နဲ့ သိုးထိန်းတွေကို ကာကွယ် စောင့်ရှောက်ပေးခဲ့ကြတယ်။ (၁ ရှမွေလ ၂၅:၁၅၊ ၁၆ ကိုဖတ်ပါ။) သိုးအုပ်နဲ့ သိုးထိန်းတွေဟာ အန္တရာယ်မျိုးစုံ ကြုံတွေ့နိုင်တယ်။ အဲဒီအချိန်က သားရဲတိရစ္ဆာန်တွေ အရမ်း ပေါများတယ်။ အဲဒီအပြင် အစ္စရေးနိုင်ငံ တောင်ပိုင်းနယ်စပ်နဲ့ နီးတဲ့အတွက် တိုင်းတစ်ပါးက သူခိုးဓားပြတွေရဲ့ လုယက်တိုက်ခိုက်မှုကို မကြာခဏ ကြုံတွေ့ရတတ်ကြတယ်။
၁၁ တောကန္တာရမှာ သူ့လူတွေ စားဖို့ အစားအစာ ရှာပေးရတာက ဒါဝိဒ်အတွက် တာဝန်ကြီးတစ်ခုပဲ။ တစ်နေ့ကျတော့ ဒါဝိဒ်ဟာ သူ့လူဆယ်ယောက်ကို နာဗလဆီ လွှတ်ပြီး အကူအညီ တောင်းခိုင်းတယ်။ အဲဒီအချိန်က သိုးမွေးညှပ်ပွဲခံချိန်၊ အစားအသောက်တွေ အလျှံပယ် ကျွေးတဲ့ အချိန် ဖြစ်လို့ အချိန်အခါကောင်းပဲ။ ဒါဝိဒ်ဟာ ယဉ်ကျေးတဲ့ စကားလုံးတွေ ရွေးပြီး ပြောခိုင်းတဲ့အပြင် နာဗလရဲ့ အသက်အရွယ်ကို ထောက်ပြီး “လူကြီးမင်းရဲ့ သား ဒါဝိဒ်” လို့ ရိုရိုသေသေ ပြောခိုင်းတယ်။ နာဗလ ဘယ်လို တုံ့ပြန်ခဲ့သလဲ။—၁ ရှ. ၂၅:၅-၈။
၁၂ နာဗလဟာ ဒေါသပေါက်ကွဲသွားတယ်။ ဆောင်းပါးအစမှာ ဖော်ပြထားတဲ့ လူငယ် ပြောသလို “သခင်က ရိုင်းရိုင်းစိုင်းစိုင်း အော်ထုတ်တယ်” လို့ အဘိဂဲလကို ပြောပြတယ်။ ကပ်စေးနှဲတဲ့ နာဗလက သူရဲ့ စားစရာ၊ သောက်စရာတွေကို ဘယ်က လာမှန်း မသိတဲ့၊ သခင်ဆီကနေ ထွက်ပြေးလာတဲ့ ကျွန်ကို မပေးနိုင်ဘူးလို့ စော်ကား ပြောဆိုလိုက်တယ်။ နာဗလရဲ့ အမြင်ဟာ ဒါဝိဒ်ကို မုန်းတဲ့ ရှောလုရဲ့ အမြင်နဲ့ တူနေတယ်။ သူတို့ နှစ်ယောက်စလုံးမှာ ယေဟောဝါဘုရားရဲ့ အမြင် မရှိဘူး။ ဘုရားသခင်က ဒါဝိဒ်ကို ချစ်တယ်။ ပုန်ကန်တဲ့ ကျွန်အဖြစ် မမြင်ဘဲ အစ္စရေးတွေရဲ့ မင်းလောင်းအဖြစ် ရှုမြင်တယ်။—၁ ရှ. ၂၅:၁၀၊ ၁၁၊ ၁၄။
ဉာဏ်အမြော်အမြင် ရှိရှိ သူ ပြုမူခဲ့
၁၈ ပြဿနာကို သူ ခေါင်းခံလိုက်ပြီး သူ့ကို ခွင့်လွှတ်ပါလို့ ဒါဝိဒ်ကို အသနားခံတယ်။ သူ့ခင်ပွန်းဟာ နာမည်နဲ့ လိုက်အောင် မိုက်မဲတယ်လို့ အမှန်အတိုင်း ဝန်ခံတယ်။ ဒီလိုလူစားမျိုးကို အရေးလုပ်ပြီး တုံ့ပြန်တာက သိက္ခာကျရုံပဲ ရှိတယ်လို့ ဆိုလိုနေပုံရတယ်။ ဒါဝိဒ်ကို “ယေဟောဝါဘုရားအတွက် တိုက်ပွဲဝင်နေသူ” လို့ ပြောခြင်းအားဖြင့် ဒါဝိဒ်ဟာ ယေဟောဝါရဲ့ ကိုယ်စားလှယ် ဖြစ်တယ်ဆိုတာကို ယုံကြည်စိတ်ချကြောင်း အဘိဂဲလ ဖော်ပြတယ်။ “ယေဟောဝါဘုရားက သခင့်ကို . . . အစ္စရေး ခေါင်းဆောင်အဖြစ် ခန့်အပ်” မယ်လို့ ပြောတဲ့အတွက် ဒါဝိဒ်ကို ဘုရင့်အရိုက်အရာ ပေးမယ်ဆိုတဲ့ ယေဟောဝါဘုရားရဲ့ ကတိတော်ကို သိကြောင်းလည်း ဖော်ပြတယ်။ ဒီ့အပြင် သွေးပြစ်သင့်စေနိုင်တဲ့၊ နောက်ပိုင်း “ဝမ်းနည်းပြီး နောင်တရတဲ့ အဖြစ်မျိုး” မကျူးလွန်ဖို့ ဒါဝိဒ်ကို ဖျောင်းဖျတယ်။ အမှားအမှန် သိစိတ်ကို ဒုက္ခပေးမယ့် လုပ်ရပ်ကို ရည်ညွှန်းနေတာ ဖြစ်တယ်။ (၁ ရှမွေလ ၂၅:၂၄-၃၁ ကိုဖတ်ပါ။) အကြင်နာတရား ပြည့်ဝပြီး စိတ်နှလုံးကို ထိမိစေတဲ့ စကားတွေပါပဲ။
ဘုရားရေးရာ ရတနာ
ဉာဏ်အမြော်အမြင် ရှိရှိ သူ ပြုမူခဲ့
၁၆ အဘိဂဲလဟာ ခင်ပွန်းကို ကျော်ပြီး လုပ်နေတာလား။ လုံးဝမဟုတ်ပါဘူး။ နာဗလဟာ ယေဟောဝါဘုရားရဲ့ ဘိသိက်ခံ ကျေးကျွန်ကို ရိုင်းရိုင်းစိုင်းစိုင်း ဆက်ဆံခဲ့တဲ့အတွက် အပြစ်မရှိတဲ့ အိမ်သူအိမ်သားတွေ အသတ်ခံရတော့မယ်။ အဘိဂဲလသာ ဘာမှ မလုပ်ဘူးဆိုရင် ခင်ပွန်းရဲ့ အပြစ်မှာ ကြံရာပါ ဖြစ်သွားနိုင်တယ်။ ဒီအခြေအနေမှာ သူဟာ ခင်ပွန်းထက် ဘုရားသခင်ကို လက်အောက်ခံဖို့ လိုအပ်နေတယ်။