ကျမ်းစာစောင် နံပါတ် ၁၃​—၁ ရာဇဝင်ချုပ်

ကျမ်းရေးသူ– ဧဇရ

ရေးရာဒေသ– ယေရုရှလင် (မသေချာ)

ရေးသားချိန်– ဘီ.စီ.အီး. ၄၆၀ ခန့်

ငုံမိသည့်ကာလပိုင်း– ၁ ရာဇဝင်ချုပ် ၉:၄၄ နောက်ပိုင်း – ဘီ.စီ.အီး. ၁၀၇၇-၁၀၃၇

၁။ ရာဇဝင်ချုပ်ပထမစောင်သည် အဘယ်နည်းများဖြင့် အရေးပါပြီးအကျိုးရှိသော မြင့်မြတ်သောမှတ်တမ်းဖြစ်သနည်း။

ရာဇဝင်ချုပ်ပထမစောင်သည် ခြောက်ကပ်ကပ် မျိုးရိုးစဉ်ဆက်စာရင်းတစ်ခုမျှသာလော။ ဓမ္မရာဇဝင်ကျမ်းတို့ကို ထပ်ကျော့ရေးသားထားခြင်းမျှသာလော။ လုံးဝမဟုတ်ပါ! ဤကျမ်းသည် မြင့်မြတ်သောမှတ်တမ်းတော်ကို မီးမောင်းထိုးပြသည့် အရေးကြီးသောအပိုင်းဖြစ်သည်—ရေးသားစဉ်အချိန်က တိုင်းပြည်နှင့်ဝတ်ပြုရေးပြန်လည်ဖွဲ့စည်းမှုတွင် အရေးပါခဲ့သကဲ့သို့ ဤမျက်မှောက်ခေတ်အပါအဝင် ၎င်း၏နောက်ပိုင်းခေတ်များတွင်လည်း မြင့်မြတ်သောဝတ်ပြုရေးပုံစံကိုဖော်ပြရာတွင် အရေးပါ၊ အကျိုးပြုသည့်ကျမ်းဖြစ်သည်။ ကျမ်းစာတစ်အုပ်လုံးတွင် ယေဟောဝါအား အလှပဆုံးချီးမွမ်းထားသောအသုံးအနှုန်းအချို့သည် ရာဇဝင်ချုပ်ပထမစောင်၌ပါရှိသည်။ ဖြောင့်မတ်ခြင်းတည်ရာ ယေဟောဝါနိုင်ငံတော်၏ အံ့ဖွယ်ရှေ့ပြေးအရိပ်အယောင်များကိုဖော်ပြပြီး ထိုနိုင်ငံတော်ကိုမျှော်လင့်သူအားလုံး အခွင့်အရေးယူလေ့လာကြရန်ဖြစ်သည်။ ရာဇဝင်ချုပ်ကျမ်းနှစ်ကျမ်းလုံးကို ဂျူးရောခရစ်ယာန်များကပါ ခေတ်ကာလနှစ်များတစ်လျှောက် တန်ဖိုးထားခဲ့ကြသည်။ ကျမ်းစာဘာသာပြန်ဆိုသူ ဂျရုမ်းက ရာဇဝင်ချုပ်ပထမစောင်နှင့် ဒုတိယစောင်ကို “ဓမ္မဟောင်းကျမ်း၏ အကျဉ်းချုပ်” ဟုခေါ်ဆိုသည်အထိ ထိုသို့သောတန်ဖိုးထားမှုရှိခဲ့ပြီး “၎င်းတို့သည် အလွန်အရေးပါသောအရာများဖြစ်၍ မိမိကိုယ်ကို ဤမြင့်မြတ်သောစာနှင့်အကျွမ်းတဝင်ရှိသည်ဟုဆိုကာ ယင်းကျမ်းတို့ကိုမသိသူများသည် မိမိကိုယ်ကိုလှည့်စားသူသာဖြစ်သည်” ဟုအခိုင်အမာပြောဆိုခဲ့သည်။a

၂။ ရာဇဝင်ချုပ်ကျမ်းကို အဘယ်ကြောင့်ရေးသားခဲ့ရသနည်း။

^၂ ရာဇဝင်ချုပ်ကျမ်းနှစ်ကျမ်းသည် မူလက တစ်ကျမ်းတည်း သို့မဟုတ် စာလိပ်တစ်လိပ်တည်းဖြစ်ကြောင်းထင်ရှားသည်၊ အဆင်ပြေစေရန်အတွက် နောက်ပိုင်းတွင် ခွဲထုတ်လိုက်ခြင်းဖြစ်သည်။ ရာဇဝင်ချုပ်ကျမ်းကို အဘယ်ကြောင့်ရေးခဲ့သနည်း။ နောက်ခံအခြေအနေကို သုံးသပ်ကြည့်ပါ။ ဗာဗုလုန်တွင် ပြည်နှင်ခံရခြင်းမှ ပြန်လာခဲ့ကြသည်မှာ ၇၇ နှစ်ခန့်ရှိပြီ။ ဂျူးတို့သည် မိမိတို့ပြည်တွင် နေသားတကျပြန်ဖြစ်နေကြပြီ။ သို့သော် ယေရုရှလင်မြို့ရှိ ပြန်လည်တည်ဆောက်ထားသောဗိမာန်တော်တွင် ယေဟောဝါကိုဝတ်ပြုခြင်းမှသွေဖည်သည့် အန္တရာယ်ရှိခဲ့သည်။ ဧဇရသည် (ဘုရင်အပါအဝင်) တရားသူကြီးများ၊ ဘုရားသခင့်ပညတ်တော်များ သွန်သင်ပေးသူများကိုခန့်အပ်ရန်နှင့် ယေဟောဝါ၏အိမ်တော်ကို လှပတင့်တယ်အောင်ပြုပြင်ရန် ပါးရှားဘုရင်ထံမှ အခွင့်အာဏာရရှိခဲ့သည်။ ယဇ်ပုရောဟိတ်အဖွဲ့တွင် အခွင့်ရှိသူများသာ အမှုဆောင်နေကြောင်း သေချာစေရန်နှင့် ယဇ်ပုရောဟိတ်အဖွဲ့အား အထောက်အပံ့ရရှိစေသော အမျိုးအနွယ်အလိုက်ရသည့် အမွေများကို အတည်ပြုရန် တိကျသောမျိုးရိုးစဉ်ဆက်စာရင်း မရှိမဖြစ်လိုအပ်ခဲ့သည်။ နိုင်ငံတော်နှင့်ပတ်သက်သော ယေဟောဝါ၏ပရောဖက်ပြုချက်များကို ထောက်ရှုကြည့်ပါက ယုဒနှင့်ဒါဝိဒ်တို့၏ ရှင်းလင်း၍စိတ်ချရသော ဆွေစဉ်မျိုးဆက်စာရင်းရှိခြင်းသည် အလွန်အရေးပါသည်။

၃။ (က) ဧဇရသည် ဂျူးလူမျိုးများအား အဘယ်အရာကိုနှလုံးသွင်းစေလိုသနည်း။ (ခ) သူသည် ယုဒနိုင်ငံ၏သမိုင်းကို အဘယ်ကြောင့် အလေးပေးဖော်ပြခဲ့သနည်း၊ စစ်မှန်သောဝတ်ပြုရေး၏အရေးကြီးမှုကို သူမည်သို့တင်ပြခဲ့သနည်း။

^၃ ဧဇရသည် ပြည်တော်ပြန်ဂျူးများအား သူတို့၏လျစ်လျူရှုသဘောထားမှ နိုးကြားလာစေရန်နှင့် သူတို့သည် ယေဟောဝါ၏ ပဋိညာဉ်ပြုထားသော မေတ္တာပါကြင်နာမှု၏အမွေခံများအမှန်ဖြစ်ကြောင်းအဖြစ်မှန်ကို နှလုံးသွင်းရန် စိတ်ရင်းမှန်နှင့်လိုလားခဲ့သည်။ ထို့ကြောင့် သူသည် ရာဇဝင်ချုပ်ကျမ်းတွင် တိုင်းပြည်၏သမိုင်းစဉ်နှင့် လူသားတို့၏အစမူလဖြစ်သည့် ပထမလူသားအာဒံအထိ နောက်ပြန်ဆုတ်ကာ အပြည့်အစုံမှတ်တမ်းကို သူတို့အားဖော်ပြပေးသည်။ ဒါဝိဒ်၏နိုင်ငံသည် အဓိကအချက်ဖြစ်သောကြောင့် သူသည် လုံးဝအဖတ်ဆယ်မရသည့် ဆယ်နွယ်နိုင်ငံ၏အဖြစ်သနစ်ကို လုံးဝဆိုရမလောက်ချန်လှပ်ကာ ယုဒသမိုင်းကို အလေးပေးဖော်ပြခဲ့သည်။ သူက ဗိမာန်တော်ကိုတည်ဆောက် သို့မဟုတ် ပြန်လည်မွမ်းမံသူနှင့် ဘုရားသခင့်ဝတ်ပြုရေးကို ဇွဲရှိရှိဦးဆောင်သွားသည့် ရှင်ဘုရင်များကို ယုဒအမျိုး၏အကြီးမြတ်ဆုံးရှင်ဘုရင်များအဖြစ် ဖော်ပြထားသည်။ ဘုရားသခင်၏ ပြန်လည်တည်ထောင်ရေးကတိတော်များကို အလေးပေးဖော်ပြသွားရင်းနှင့် တိုင်းပြည်ဖြိုဖျက်ခံရသည့်အဖြစ်ရောက်စေသည့် ဘာသာရေးအပြစ်များကိုလည်း ထောက်ပြခဲ့သည်။ ဗိမာန်တော်၊ ယဇ်ပုရောဟိတ်များ၊ လေဝိများ၊ သီချင်းသည်များစသည်တို့အကြောင်းကို အသေးစိတ်ဖော်ပြခြင်းဖြင့် စစ်မှန်သောဝတ်ပြုရေး၏ အရေးကြီးမှုကိုတင်ပြခဲ့သည်။ ပြည်နှင်ခံရာမှ ပြည်တော်ပြန်ရသည့်အကြောင်းရင်းဖြစ်သော ယေရုရှလင်မြို့တွင် ယေဟောဝါ၏ဝတ်ပြုရေးကို ပြည်လည်တည်ထောင်ရေးအပေါ် အဓိကထားဖော်ပြသည့် သမိုင်းဝင်မှတ်တမ်းတစ်ခုရှိခြင်းက ဣသရေလလူများအတွက် အားပေးမှုဖြစ်ခဲ့မည်။

၄။ ဧဇရသည် ရာဇဝင်ချုပ်ကျမ်းရေးသူဖြစ်ကြောင်း အဘယ်အထောက်အထားများက ထောက်ခံသနည်း။

^၄ ရာဇဝင်ချုပ်ကျမ်းကို ဧဇရရေးကြောင်း အဘယ်အထောက်အထားရှိသနည်း။ ရာဇဝင်ချုပ်ဒုတိယစောင်၏ နိဂုံးအခန်းငယ်နှစ်ခု[ကဘ]သည် ဧဇရကျမ်း၏ အဖွင့်အခန်းငယ်နှစ်ခုနှင့်ထပ်တူဖြစ်နေကာ ရာဇဝင်ချုပ်ဒုတိယစောင်သည် ဧဇရ ၁:၃ တွင် ဆုံးသွားသည့် ဝါကျတစ်ဝက်တစ်ပျက်ဖြင့် နိဂုံးချုပ်ထားပါသည်။ ထို့ကြောင့် ရာဇဝင်ချုပ်ကျမ်းရေးသူသည် ဧဇရကျမ်းကိုရေးသူပင်ဖြစ်ရမည်။ ရာဇဝင်ချုပ်ကျမ်းနှင့် ဧဇရကျမ်းတို့၏ ရေးဟန်၊ အဖွဲ့အနွဲ့၊ စကားလုံးအထားအသိုနှင့် စာလုံးပေါင်းပုံတို့တူနေခြင်းကလည်း ထပ်ဆင့်သက်သေများဖြစ်သည်။ ဤကျမ်းနှစ်ကျမ်းတွင်ပါသော အသုံးအနှုန်းတချို့ကို အခြားမည်သည့်ကျမ်းတွင်မျှမတွေ့ရပေ။ ဧဇရကျမ်းကိုရေးသူ ဧဇရသည်သာ ရာဇဝင်ချုပ်ကျမ်းကိုရေးခြင်းဖြစ်ရမည်။ ဂျူးထုံးတမ်းစဉ်လာကလည်း ဤကောက်ချက်ကို ထောက်ခံသည်။

၅။ ဧဇရ၏ ဝိညာဏရေးနှင့် လောကီဆိုင်ရာအရည်အသွေးတို့ကား အဘယ်နည်း။

^၅ ဤစစ်မှန်ပြီး တိကျမှန်ကန်သောသမိုင်းကို ပြုစုရေးသားရန် ဧဇရထက် အရည်အချင်းပြည့်မီသူ မည်သူမျှမရှိပေ။ “ဧဇရသည် ထာဝရဘုရား၏တရားတော်ကို စစ်ဆေးစောင့်ရှောက်ခြင်းငှာလည်းကောင်း၊ စီရင်ထုံးဖွဲ့တော်မူချက်တို့ကို ဣသရေလအမျိုး၌ သွန်သင်ခြင်းငှာလည်းကောင်း သဘောကျသောသူဖြစ်၏။” (ဧဇ. ၇:၁၀) ယေဟောဝါသည် မိမိ၏သန့်ရှင်းသောဝိညာဉ်တော်အားဖြင့် သူ့ကိုကူညီခဲ့သည်။ ပါရှန်းလူမျိုး ကမ္ဘာ့အုပ်စိုးရှင်က ဧဇရတွင် ဘုရားရေးရာပညာရှိကြောင်း အသိအမှတ်ပြုခဲ့ပြီး သူ့ကို ယုဒနိုင်ငံစီရင်စုခရိုင်တွင် ကျယ်ပြန့်လှသော အုပ်ချုပ်ခွင့်အာဏာများနှင့်အတူ တာဝန်အပ်နှင်းပေးလိုက်သည်။ (ဧဇ. ၇:၁၂-၂၆) သို့နှင့် ဧဇရသည် ဘုရားပေးအခွင့်အာဏာနှင့် မင်းဧကရာဇ်၏အခွင့်အာဏာတို့ဖြင့် ရနိုင်သည့်အကောင်းဆုံး စာပေအထောက်အထားများမှ သူ၏ဤမှတ်တမ်းကျမ်းကို ရေးသားပြုစုနိုင်ခဲ့ခြင်းဖြစ်သည်။

၆။ ရာဇဝင်ချုပ်ကျမ်း၏မှန်ကန်မှုကို ကျွန်ုပ်တို့အဘယ်ကြောင့် ယုံကြည်စိတ်ချနိုင်သနည်း။

^၆ ဧဇရသည် ထူးချွန်သောသုတေသီတစ်ဦးဖြစ်သည်။ သူသည် ထိုအချိန်နှင့် တစ်ခေတ်တည်းသား ယုံကြည်စိတ်ချနိုင်သောပရောဖက်များ စုဆောင်းပြုစုခဲ့သည့် ရှေးဟောင်းဂျူးသမိုင်းမှတ်တမ်းများအပြင် အစိုးရမှတ်တမ်းတင်အရာရှိများနှင့် အစိုးရမော်ကွန်းထိန်းများ၏ စုဆောင်းပြုစုထားသည့်မှတ်တမ်းများမှတစ်ဆင့် လေ့လာရှာဖွေခဲ့သည်။ သူရှာဖွေကြည့်ရှုခဲ့သည့် အရေးအသားအချို့တွင် ဣသရေလနှင့် ယုဒနှစ်နိုင်ငံစလုံးမှ အစိုးရမှတ်တမ်းမှတ်ရာများ၊ ဆွေစဉ်မျိုးဆက်မှတ်တမ်းများ၊ ပရောဖက်များရေးသားခဲ့သည့် သမိုင်းဝင်စာပေများနှင့် လူမျိုးစုခေါင်းဆောင်များပိုင်ဆိုင်သည့် မှတ်တမ်းမှတ်ရာများ ပါရှိခဲ့ရပေမည်။ ဧဇရသည် ထိုကဲ့သို့သော အချက်အလက်ရင်းမြစ် အနည်းဆုံး ၂၀ ကိုးကားဖော်ပြထားသည်။b ဤပေါ်လွင်ထင်ရှားသောအကိုးအကားများအားဖြင့် ဧဇရသည် မိမိ၏တစ်ခေတ်တည်းသားများအား သူတို့တွင်ဆန္ဒရှိပါက မိမိ၏ရင်းမြစ်ကိုးကားချက်များကို အရိုးခံဖြင့် စစ်ဆေးခွင့်ပေးခဲ့ရာ ယင်းက သူ၏စကားများသည် ယုံကြည်ထိုက်ကြောင်းနှင့် စစ်မှန်ကြောင်း အချေအတင်ပြောဆိုရန် အတော်ပင်အလေးစီးခဲ့သည်။ ယနေ့ကျွန်ုပ်တို့လည်း ဧဇရခေတ်ကဂျူးများအား ယုံကြည်စိတ်ချမှုဖြစ်စေခဲ့သည့် ထပ်တူအကြောင်းရင်းကြောင့် ရာဇဝင်ချုပ်ကျမ်း၏မှန်ကန်မှုကို ယုံကြည်စိတ်ချနိုင်ပါသည်။

၇။ ရာဇဝင်ချုပ်ကျမ်းကို မည်သည့်အချိန်တွင်ရေးသားခဲ့သနည်း၊ မည်သူတို့သည် ကျမ်းစစ်ကျမ်းမှန်ဖြစ်ကြောင်း သတ်မှတ်ခဲ့သနည်း၊ မည်သည့်အချိန်ကာလကို ငုံမိသနည်း။

^၇ အာတဇေရဇ် လောန်ဂင်မနပ်စ်နန်းစံသတ္တမနှစ် ဘီ.စီ.အီး. ၄၆၈ တွင် ဧဇရသည် “ဗာဗုလုန်မြို့မှထွက်သွား” ပြီး ဘီ.စီ.အီး ၄၅၅ တွင် နေဟမိ၏ အရေးပါသောရောက်ရှိမှုအကြောင်းကို မှတ်တမ်းတင်မထားခြင်းကြောင့် ရာဇဝင်ချုပ်ကျမ်းကို ထိုသက္ကရာဇ်နှစ်နှစ်ခုအကြား ဘီ.စီ.အီး. ၄၆၀ ခန့်တွင် ယေရုရှလင်မြို့၌ အပြီးအစီးရေးသားခြင်းဖြစ်ရမည်။ (ဧဇ. ၇:၁-၇; နေ. ၂:၁-၁၈) ဧဇရခေတ်ကဂျူးများသည် ရာဇဝင်ချုပ်ကျမ်းကို ‘ဘုရားသခင်မှုတ်သွင်းတော်မူသည့်ကျမ်းဖြစ်ပြီး အကျိုးပြုကြောင်း’ လက်ခံခဲ့ကြသည်။ သူတို့က ၎င်းကို Div·rehʹ Hai·ya·mimʹ ဟုခေါ်ကြသည်၊ အဓိပ္ပာယ်မှာ “ခေတ်၏အဖြစ်အပျက်များ၊” ခေတ်ကာလ၏သမိုင်း ဟူ၍ဖြစ်သည်။ နှစ်ပေါင်း ၂၀၀ ခန့်ကြာပြီးနောက် ဂရိစက်ပ်တွားဂျင့်ကျမ်းကို ဘာသာပြန်သူများကလည်း သမ္မာကျမ်းစာအဝင်ကျမ်းအဖြစ် ရာဇဝင်ချုပ်ကျမ်းကို ထည့်သွင်းခဲ့သည်။ ၎င်းကို နှစ်ကျမ်းခွဲလိုက်ကြကာ ဓမ္မရာဇဝင်ကျမ်းများ သို့မဟုတ် ထိုအချိန်ကရှိခဲ့သော ကျမ်းစာတစ်အုပ်လုံးကို ထပ်ဖြည့်သည့်အဓိပ္ပာယ်မျိုးနှင့် Pa·ra·lei·po·meʹnon “ကျော်သွားသော (ကျန်ခဲ့ မဖော်ပြခဲ့သော; ချန်လှပ်ခဲ့သော) အကြောင်းအချက်များ” ဟုသတ်မှတ်ခဲ့ကြသည်။ ဤအမည်သည် အမှန်တွင် သိပ်မအပ်စပ်သော်လည်း သူတို့၏လုပ်ဆောင်မှုက ရာဇဝင်ချုပ်ကျမ်းကို စစ်မှန်သောမှုတ်သွင်းခံကျမ်းအဖြစ် လက်ခံကြောင်းတင်ပြသည်။ လက်တင်ဗားလ်ဂိတ်ကျမ်းကို ဘာသာပြန်ရေးသားရာတွင် ဂျရုမ်းက ဤသို့တင်ပြခဲ့သည်– “၎င်းကို ပို၍အဓိပ္ပာယ်လေးနက်သည့် မြင့်မြတ်သောသမိုင်းကြောင်းတစ်ခုလုံး၏ ခရိုနီကွန် [Khro·ni·konʹ] ဟုခေါ်ဆိုနိုင်သည်။” ယင်းမှမြစ်ဖျားခံ၍ “ရာဇဝင်ချုပ်ကျမ်း” [ခရိုနစ်ကယ်၊ Chronicles] ဟုအမည်တွင်လာခဲ့သည်။ ရာဇဝင်မှတ်တမ်းတစ်ခုဆိုသည်မှာ ဖြစ်ပျက်ခဲ့သည့်အဖြစ်အပျက်များ၏ အစီအစဉ်လိုက်မှတ်တမ်းတစ်ခုဖြစ်သည်။ ဆွေစဉ်မျိုးဆက်စာရင်းကို ဖော်ပြပြီးနောက် ရာဇဝင်ချုပ်ပထမစောင်သည် ဒါဝိဒ်မင်းကြီးရာဇဝင်၊ ဘီ.စီ.အီး. ၁၀၇၇ မှသူသေဆုံးသည်အထိ အဓိကဖော်ပြထားသည်။

အဘယ်ကြောင့်အကျိုးရှိကြောင်း

၂၂။ ဧဇရ၏ဣသရေလအမျိုးသားချင်းတို့သည် ရာဇဝင်ချုပ်ပထမစောင်အားဖြင့် မည်သို့အားပေးခံခဲ့ရသနည်း။

^၂၂ ဧဇရ၏ဣသရေလအမျိုးသားချင်းတို့သည် သူရေးသည့်ကျမ်းမှ အကျိုးများစွာရရှိခဲ့ကြသည်။ လန်းဆန်းမှုဖြစ်စေပြီး အကောင်းမြင်သဘောထားပါရှိသည့် ဤစေ့စပ်ကျစ်လျစ်သောရာဇဝင်ကျမ်းရှိခြင်းက ဘုရင်ဒါဝိဒ်နှင့်ဖွဲ့ခဲ့သော နိုင်ငံတော်ပဋိညာဉ်အပေါ် ကိုယ်တော်၏သစ္စာစောင့်သိမှုကြောင့်နှင့် မိမိကိုယ်တော်တိုင်၏နာမတော်အတွက်ကြောင့် သူတို့ကိုယေဟောဝါကရုဏာထားတော်မူခဲ့ခြင်းဖြစ်ကြောင်း သဘောပေါက်ခဲ့ကြသည်။ အသစ်သောဇွဲဖြင့် ယေဟောဝါ၏စင်ကြယ်သောဝတ်ပြုရေးကို ပြန်လည်ဆောင်ရွက်နိုင်ရန် ခွန်အားရှိခဲ့ကြ၏။ ဆွေစဉ်မျိုးဆက်စာရင်းက ပြန်လည်တည်ဆောက်သောဗိမာန်တော်၌ အမှုထမ်းသည့် ယဇ်ပုရောဟိတ်များအပေါ် သူတို့၏ယုံကြည်စိတ်ချမှုကို ခိုင်ခံ့စေခဲ့သည်။

၂၃။ မဿဲ၊ လုကာနှင့် သတေဖန်တို့သည် ရာဇဝင်ချုပ်ပထမစောင်ကို မည်သို့ကောင်းစွာအသုံးပြုခဲ့ကြသနည်း။

^၂၃ ရာဇဝင်ချုပ်ပထမစောင်သည် အစောပိုင်းခရစ်ယာန်အသင်းတော်အတွက်လည်း အကျိုးများစွာဖြစ်ထွန်းခဲ့သည်။ မဿဲနှင့်လုကာတို့က ယေရှုသည် တရားဝင်ရပိုင်ခွင့်ဖြင့် ‘ဒါဝိဒ်၏သား’ နှင့်မေရှိယဖြစ်ကြောင်း ပီပြင်စွာထောက်ပြနိုင်ရန် ၎င်းတွင်ပါသောဆွေစဉ်မျိုးဆက်စာရင်းကို ကိုးကားနိုင်ခဲ့သည်။ (မ. ၁:၁-၁၆; လု. ၃:၂၃-၃၇) မိမိ၏နောက်ဆုံးသက်သေခံချက်ကို နိဂုံးချုပ်ရာတွင် သတေဖန်က ယေဟောဝါ၏အိမ်တော်ကိုတည်ဆောက်ဖို့ ဒါဝိဒ်၏တောင်းဆိုချက်နှင့် ရှောလမုန်တည်ဆောက်ခဲ့ရခြင်းအကြောင်း ဟောခဲ့သည်။ ထို့နောက် သူက ရှောလမုန်ခေတ်ဗိမာန်တော်သည် သာ၍ကြီးမြတ်သော ဘုန်းရှိသည့်ကောင်းကင်အရာများကို ပုံတင်ပြကြောင်း ညွှန်ပြရန် “အမြင့်ဆုံးသောဘုရားသည် လူတို့လက်ဖြင့်လုပ်သောဗိမာန်၌ ကျိန်းဝပ်တော်မူသည်မဟုတ်” ဟုဖော်ပြခဲ့သည်။—တ. ၇:၄၅-၅၀။

၂၄။ ဒါဝိဒ်၏ အဘယ်အားတက်ဖွယ်ပုံသက်သေကို ယနေ့ကျွန်ုပ်တို့တုပနိုင်သနည်း။

^၂၄ ယနေ့ စစ်မှန်သောခရစ်ယာန်များအတွက်ကော အသို့နည်း။ ရာဇဝင်ချုပ်ပထမစောင်သည် ကျွန်ုပ်တို့၏ယုံကြည်ခြင်းကို တည်ဆောက်ပေးပြီး တိုးပွားစေသင့်သည်။ ကျွန်ုပ်တို့သည် ဒါဝိဒ်၏အားတက်ဖွယ်ပုံသက်သေကိုတုပနိုင်စရာ များစွာရှိ၏။ သစ္စာမဲ့သောရှောလုနှင့်မတူဘဲ သူသည် ယေဟောဝါအား အမြဲမေးမြန်းခဲ့သည်။ (၅ ရာ. ၁၀:၁၃၊ ၁၄; ၁၄:၁၃၊ ၁၄; ၁၇:၁၆; ၂၂:၁၇-၁၉) ယေဟောဝါ၏ပဋိညာဉ်သေတ္တာတော်ကို ယေရုရှလင်မြို့သို့ဆောင်ယူလာခြင်းတွင်၊ ဆာလံချီးမွမ်းသီချင်းများတွင်၊ အမှုထမ်းရန်အတွက် လေဝိသားတို့အား ပြန်လည်ဖွဲ့စည်းရာတွင်နှင့် ယေဟောဝါအတွက် ဗိမာန်တော်ဆောက်ခွင့်ပေးရန် တောင်းလျှောက်ခြင်းတို့တွင် ဒါဝိဒ်သည် သူ၏စိတ်ထဲတွင် ယေဟောဝါနှင့် ကိုယ်တော်၏ဝတ်ပြုရေးကို ဦးစားထားကြောင်း ဖော်ပြသည်။ (၁၆:၂၃-၂၉) သူသည် အပြစ်ရှာညည်းညူသူတစ်ဦးမဟုတ်ခဲ့ပါ။ သူသည် မိမိအတွက်အခွင့်ထူးများကိုမရှာကြံဘဲ ယေဟောဝါ၏အလိုတော်ဆောင်ရန်သာ ရှာကြံခဲ့၏။ ထို့ကြောင့် ယေဟောဝါက အိမ်တော်တည်ဆောက်ရေးတာဝန်ကို သူ၏သားတော်အားအပ်နှင်းတော်မူသည့်အခါ သူသည် သားတော်ကို နှလုံးအကြွင်းမဲ့ညွှန်ကြားချက်ပေးခဲ့ပြီး သူကွယ်လွန်ပြီးနောက်ပိုင်းတွင်အစပြုမည့် အလုပ်အတွက်ပြင်ဆင်ရာတွင် မိမိအချိန်၊ ခွန်အားနှင့် ဥစ္စာပစ္စည်းတို့ကိုပေးခဲ့သည်။ (၂၉:၃၊ ၉) ဆည်းကပ်ဝတ်ပြုမှုဆိုင်ရာ အလွန်ကောင်းသောပုံသက်သေပင်တည်း!—ဟေဗြဲ ၁၁:၃၂။

၂၅။ ရာဇဝင်ချုပ်ပထမစောင်သည် ယေဟောဝါ၏နာမတော်နှင့် နိုင်ငံတော်နှင့်ပတ်သက်သော အဘယ်တန်ဖိုးထားလေးမြတ်မှုကို ကျွန်ုပ်တို့အား လှုံ့ဆော်မှုဖြစ်စေသင့်သနည်း။

^၂၅ ထို့ပြင် အထွတ်အထိပ်ဖြစ်သော နိဂုံးချုပ်အခန်းကြီးများပါရှိသည်။ ဒါဝိဒ်သည် ယေဟောဝါနှင့် ကိုယ်တော်၏ “ဘုန်းကြီးသောနာမတော်” ကို ချီးမွမ်းမှုနှင့်အတူ ထည်ဝါခန့်ညားသည့်အဖွဲ့အနွဲ့က ယေဟောဝါ၏ဘုန်းတော်နှင့် ကိုယ်တော့်ခရစ်တော်နိုင်ငံတော်၏ဘုန်းတော်ကို ကြေညာရသည့် ကျွန်ုပ်တို့၏ မျက်မှောက်ခေတ်အခွင့်ထူးကို နှစ်ထောင်းအားရတန်ဖိုးထားရန် လှုံ့ဆော်မှုဖြစ်သင့်သည်။ (၅ ရာ. ၂၉:၁၀-၁၃) ကိုယ်တော်၏လုပ်ငန်းတော်တွင် မိမိတို့ကိုယ်ကိုအသုံးခံခြင်းဖြင့် ယေဟောဝါ၏ထာဝရနိုင်ငံတော်အတွက် ကျွန်ုပ်တို့၏ကျေးဇူးတင်လေးမြတ်မှုကိုတင်ပြနေစဉ် ကျွန်ုပ်တို့၏ယုံကြည်ခြင်းနှင့် ရွှင်လန်းမှုသည် ဒါဝိဒ်ကဲ့သို့အမြဲဖြစ်နိုင်ပါစေ။ (၁၇:၁၆-၂၇) ရာဇဝင်ချုပ်ပထမစောင်သည် မျိုးနွယ်တော်အားဖြင့် ယေဟောဝါ၏နိုင်ငံတော်တည်းဟူသော သမ္မာကျမ်းစာခေါင်းစဉ်အရောင်အဝါကို ယခင်ထက်ပို၍တင့်တယ်စေပြီး ယေဟောဝါ၏ရည်ရွက်ချက်များနှင့်ပတ်သက်သော အနာဂတ်တွင်ဖြစ်မည့် ပီတိဖြစ်ဖွယ်ဖွင့်ပြချက်များကို ကျွန်ုပ်တို့အား စောင့်မျှော်နေစေ၏။

[အောက်ခြေမှတ်ချက်များ]