အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
© 2023 Watch Tower Bible and Tract Society of Pennsylvania
ဇူလိုင် ၃-၉
ကျမ်းစာထဲက အဖိုးတန်ဘဏ္ဍာများ | ဧဇရ ၄–၆
“အလုပ်ကို မနှောင့်ယှက်ကြနဲ့”
ဇာခရိ မြင်တာကို သင် မြင်သလား
၁၃ ဗိမာန်တော် ပြန်တည်ဆောက်ရေးလုပ်ငန်း ပိတ်ပင်ခံလိုက်ရပေမဲ့ လူမျိုးတော်ကို ဦးဆောင်ဖို့ ခန့်အပ်ခံရတဲ့ ပုရောဟိတ်မင်း ယေရွှာ (ယောရှု) နဲ့ ဘုရင်ခံ ဇေရုဗဗေလက “ဘုရားသခင့်အိမ်တော် တည်ဆောက်တဲ့ အလုပ်ကို ပြန်စကြတယ်။” (ဧဇ. ၅:၁၊ ၂) အဲဒီဆုံးဖြတ်ချက်ကို ဂျူးတချို့ မထောက်ခံကြဘူး။ ဗိမာန်တော်ကို ရန်သူတွေ မမြင်အောင် ပုန်းလျှိုးကွယ်လျှိုး ဆောက်လို့ မရတဲ့အတွက် ရန်သူတွေ မရမက ပိတ်ပင်ဖို့ ကြိုးစားမယ်ဆိုတာ သူတို့ သိတယ်။ တာဝန်ရှိသူ နှစ်ယောက် ဖြစ်တဲ့ ဇေရုဗဗေလနဲ့ ယောရှုဟာ ယေဟောဝါရဲ့ ထောက်မမှု ရရှိထားတယ်ဆိုတဲ့ အာမခံချက် လိုအပ်တယ်။ အဲဒီအာမခံချက်ကို သူတို့ ရရှိခဲ့တယ်။ ဘယ်လိုနည်းနဲ့လဲ။
က၈၆ ၂/၁ ၂၉၊ လေးထောင့်ကွက် ပိုဒ်. ၂-၃
ယေဟောဝါက “အကြီးအကဲတွေကို ကြည့်ရှုစောင့်ရှောက်ပေးတယ်”
ဗာဗုလုန်ကနေ ဂျူးတချို့ ပြန်လာပြီးနောက်ပိုင်း ယေဟောဝါရဲ့ဗိမာန်တော်ကို ပြန်လည်ဆောက်လုပ်ခဲ့ကြပေမဲ့ ၁၆ နှစ်ကြာ အလုပ် ရပ်ဆိုင်းသွားတယ်။ ပရောဖက် ဟဂ္ဂဲနဲ့ ဇာခရိတို့က ဂျူးတွေကို စိတ်ထက်သန်လာအောင် လှုံ့ဆော်ပေးခဲ့လို့ ဆောက်လုပ်ရေး ပြန်လည်စတင်နိုင်ခဲ့တယ်။ ဒါပေမဲ့ သိပ်မကြာခင်မှာ ပါရှားအရာရှိတွေက “ဒီအိမ်တော်ကို တည်ဆောက်ဖို့ . . . ခင်ဗျားတို့ကို ဘယ်သူအမိန့်ပေးတာလဲ” လို့မေးပြီး ဆန့်ကျင်နှောင့်ယှက်လာတယ်။—ဧဇရ ၅:၁-၃။
ဖြေပုံဖြေနည်းက အရေးကြီးနေပြီ။ အကြီးအကဲတွေက ကြောက်ပြီး အလျှော့ပေးလိုက်ရင် ဗိမာန်တော်ဆောက်လုပ်ရေး ချက်ချင်းရပ်သွားနိုင်သလို အရာရှိတွေကို ဒေါသထွက်အောင် လုပ်လိုက်ရင်လည်း လုပ်ငန်း ချက်ချင်း ပိတ်ပင်ခံရနိုင်တယ်။ ဒါကြောင့် (ဘုရင်ခံ ဇေရုဗဗေလနဲ့ ပုရောဟိတ်မင်း ယောရှုတို့ ဦးဆောင်တဲ့) အကြီးအကဲတွေက အရာရှိတွေကို လိမ္မာပါးနပ်စွာ၊ ထိရောက်စွာ ဖြေကြားခဲ့တယ်။ ဂျူးတွေကို ဒီလုပ်ငန်း ဆက်လုပ်ဖို့ ဘုရင်ဆိုင်းရပ်စ် ဟိုးအရင်ကတည်းက အမိန့်ပေးထားတဲ့အကြောင်း ရှင်းပြလိုက်တယ်။ ထုတ်ပြန်ထားတဲ့ဥပဒေကို ဘယ်တော့မှ ပြန်မရုပ်သိမ်းတဲ့ ပါရှားစည်းမျဉ်းကို သိတဲ့အတွက် ဘုရင့်အမိန့်ကို မဆန့်ကျင်ဖို့ အရာရှိတွေ အမြော်အမြင်ရှိရှိ ဆုံးဖြတ်ခဲ့တယ်။ ဒါကြောင့် ဘုရင်ဒါရိဆီက တရားဝင်ခွင့်ပြုချက် မရခင်အချိန်အထိ လုပ်ငန်းကို ဆက်လုပ်ဆောင်နိုင်ခဲ့တယ်။—ဧဇရ ၅:၁၁-၁၇။ ၆:၆-၁၂။
ဇာခရိ မြင်တာကို သင် မြင်သလား
၇ အပြောင်းအလဲတစ်ခုကြောင့် ဗိမာန်တော် ဆောက်လုပ်သူတွေ အတော်အတန် သက်သာရာ ရကြတယ်။ ဘာအပြောင်းအလဲလဲ။ ဘီစီ ၅၂၀ မှာ ပထမမြောက် ဒါရိဟာ ပါးရှားဘုရင်အဖြစ် နန်းတက်လာတယ်။ ဗိမာန်တော် ဆောက်လုပ်ရေးကို ပိတ်ပင်ထားတာ တရားမဝင်ကြောင်း နန်းစံ ဒုတိယနှစ်မှာ ဒါရိ သိလာတယ်။ ဒါနဲ့ လုပ်ငန်းပြီးအောင် ဆက်လုပ်ဖို့ ခွင့်ပြုလိုက်တယ်။ (ဧဇ. ၆:၁-၃) ဘုရင့်ဆုံးဖြတ်ချက်ကို ကြားတဲ့အခါ ယောက်တိုင်း အံ့ဩသွားကြတယ်။ ဒါတင်မက ပြန်တည်ဆောက်ခြင်းလုပ်ငန်းကို မနှောင့်ယှက်ဖို့၊ ကုန်ကျစရိတ်နဲ့ ရိက္ခာ ထောက်ပံ့ဖို့တောင် ပတ်ဝန်းကျင်က လူတွေကို ဘုရင် အမိန့်ပေးလိုက်တယ်။ (ဧဇ. ၆:၇-၁၂) ရလဒ်အနေနဲ့ လေးနှစ်ကျော်လောက် ကြာပြီးနောက် ဘီစီ ၅၁၅ မှာ ဗိမာန်တော်ကို ဂျူးတွေ လက်စသတ်နိုင်ခဲ့ကြတယ်။—ဧဇ. ၆:၁၅။
ဇာခရိ မြင်တာကို သင် မြင်သလား
၁၆ ယေဟောဝါ လမ်းညွှန်တဲ့ နောက်တစ်နည်းကတော့ “သစ္စာနဲ့ သတိပညာရှိတဲ့ ကျွန်” အားဖြင့်ပါပဲ။ (မ. ၂၄:၄၅) တစ်ခါတလေ သစ္စာရှိကျွန်ဆီကရတဲ့ လမ်းညွှန်ချက်ကို ကျွန်တော်တို့ အပြည့်အဝ နားလည်မှာ မဟုတ်ဘူး။ ဥပမာ၊ ကိုယ့်ဒေသမှာ ဖြစ်မှာမဟုတ်ဘူးလို့ ထင်ရတဲ့ သဘာဝဘေးအတွက် ကြိုတင်ပြင်ဆင်ဖို့ လမ်းညွှန်ချက် တိတိကျကျ ရလာနိုင်တယ်။ ဒါမှမဟုတ် ကပ်ရောဂါနဲ့ပတ်သက်ပြီး သစ္စာရှိကျွန် အစိုးရိမ်လွန်တယ်လို့ ခံစားမိနိုင်တယ်။ လမ်းညွှန်ချက်တွေ လက်တွေ့မကျဘူးလို့ ထင်တဲ့အခါ ဘာလုပ်သင့်သလဲ။ ယောရှုနဲ့ ဇေရုဗဗေလရဲ့ လမ်းညွှန်ချက်ကို လိုက်နာလို့ အစ္စရေးတွေ ဘယ်လို အကျိုးရတယ်ဆိုတာ စဉ်းစားနိုင်တယ်။ တခြား ကျမ်းစာမှတ်တမ်းတွေကိုလည်း စဉ်းစားနိုင်တယ်။ လူ့ရှုထောင့်က ကြည့်ရင် လက်တွေ့မကျပုံ ရပေမဲ့ အသက်ကယ်တဲ့ လမ်းညွှန်ချက်တွေကို တစ်ခါတလေ ဘုရားလူမျိုး ရရှိတယ်။—သူကြီး. ၇:၇။ ၈:၁၀။
ဘုရားရေးရာ ရတနာ
သမ္မာကျမ်းစာကို သင်ယုံစားနိုင်ပါသလော
ဤဒင်္ဂါးကို ယနေ့တူရကီနိုင်ငံ၏ အရှေ့တောင်ဘက်ပိုင်းရှိ တာရှုမြို့တွင် သွန်းခဲ့ပါသည်။ ဘီစီအီးစတုတ္ထရာစုတွင် ပါရှန်မြို့ဝန်မင်း မာဇအပ်စ်အုပ်စိုးချိန်အတွင်း ဤဒင်္ဂါးကို ထုတ်လုပ်ခဲ့သည်။ ဥဖရတ်မြစ်ကိုရည်ညွှန်း၍ “မြစ်အနောက်ဘက်” ရှိပြည်နယ်၏မြို့ဝန်မင်းအဖြစ် ယင်းက သူ့အား သတ်မှတ်ထားသည်။
သို့သော် ထိုစကားများသည် အဘယ်ကြောင့် စိတ်ဝင်စားစရာ ဖြစ်သနည်း။ အကြောင်းမူကား၊ ထပ်တူဘွဲ့အမည်ကို သင့်ကျမ်းစာတွင် တွေ့ရှိမည်ဖြစ်သောကြောင့်တည်း။ ဧဇရ ၅:၆–၆:၁၃ တွင် ပါရှန်ဘုရင် ဒါရိနှင့် မြို့ဝန် တာတနဲတို့သည် အပြန်အလှန် စာရေးခဲ့ကြောင်း ဖတ်ရှုရမည်။ အရေးအကြောင်းမှာ ယေရုရှလင်မြို့တွင် ဂျူးများသည် သူတို့၏ဗိမာန်တော်ကို ပြန်ဆောက်လုပ်နေခြင်းဖြစ်သည်။ ဧဇရသည် ဘုရားသခင့် ပညတ္တိကျမ်းရေးသူ တစ်ဦးဖြစ်၍ ရေးသမျှကို တိကျမှန်ကန်စွာ ရေးမှတ်မည်အကြောင်း စိတ်ချနိုင်ပါသည်။ ဧဇရ ၅:၆ နှင့် ၆:၁၃ တွင် တာတနဲအား “မြစ်အနောက်ဘက် မြို့ဝန်” ဟုခေါ်ဆိုထားသည်ကို သတိပြုမိမည်။
ယင်းကို ဘီစီအီး ၄၆၀ ခန့်က ဧဇရမှတ်တမ်းတင်ခဲ့သည်။ ထိုအချိန်သည် ဤဒင်္ဂါးကို မသွန်းမီ အနှစ် ၁၀၀ ခန့်ကဖြစ်သည်။ အချို့က ရှေးခေတ်အရာရှိ၏ ဘွဲ့ရာထူးသည် အသေးအမွှားကိစ္စမျှဖြစ်သည်ဟု ယူမှတ်ကြပေမည်။ သို့သော် ဤမျှအသေးအမွှားကိစ္စတွင်ပင် ကျမ်းရေးသူများကို စိတ်ချနိုင်မည်ဆိုလျှင် သူတို့ရေးသားသော အခြားအကြောင်းအရာများကို ပိုမိုယုံကြည်စိတ်ချစေမည် မဟုတ်လော။
ဇူလိုင် ၁၀-၁၆
ကျမ်းစာထဲက အဖိုးတန်ဘဏ္ဍာများ | ဧဇရ ၇–၈
“ဧဇရရဲ့ အပြုအမူက ယေဟောဝါကို ဂုဏ်တင်ချီးမွမ်းမှု ဖြစ်စေ”
လေ့လာခြင်း—ဆုကျေးဇူးဖြစ်ကာ နှစ်သက်ဖွယ်ဖြစ်
၈ မှန်ပါသည်၊ ယေဟောဝါ၏ နှုတ်မြွက်စကားတော်ကို ကျွန်ုပ်တို့၏ နှစ်သက်မြတ်နိုးမှုသည် စိတ်လှုပ်ရှားမှု၏ အချက်အချာဖြစ်သော ကျွန်ုပ်တို့၏ စိတ်နှလုံးအတွင်းမှ ပေါ်ထွက်လာသင့်သည်။ ကျွန်ုပ်တို့ ယခုပင် ဖတ်ရှုခဲ့ကြသည့် ကျမ်းပိုဒ်အချို့၌ အပြန်ပြန်စဉ်းစားခြင်းတွင် နှစ်သက်ပျော်မွေ့သင့်သည်။ ကျွန်ုပ်တို့သည် နက်နဲသော ဝိညာဉ်ရေးဆိုင်ရာ ယူဆချက်ကို တွေးတောပြီး ယင်းတို့ထဲတွင် အာရုံနှစ်ထားကာ တွေးတောဆင်ခြင်သင့်သည်။ ဤတွင် ပြန်ပြောင်းသုံးသပ်ခြင်းနှင့် ဆုတောင်းခြင်း လိုအပ်သည်။ ဧဇရကဲ့သို့ ဘုရားသခင့် နှုတ်မြွက်စကားတော်ကို ဖတ်ရှုခြင်းနှင့် လေ့လာခြင်းအတွက် ကျွန်ုပ်တို့၏ နှလုံးများကို ပြင်ဆင်ရန် လိုအပ်သည်။ သူနှင့်ပတ်သက်၍ ဤသို့ရေးသားထားသည်– “ဧဇရသည် ထာဝရဘုရား၏ တရားတော်ကို လေ့ကျက်စောင့်ရှောက်ခြင်းငှာလည်းကောင်း၊ ထုံးဖွဲ့ချက်၊ စီရင်ချက်များကို ဣသရေလလူမျိုးတွင် သွန်သင်ခြင်းငှာလည်းကောင်း သဘောထား [“စိတ်နှလုံးကို ပြင်ဆင်ထား၊” ကဘ] သတည်း။” (ဧဇရ ၇:၁၀၊ သမ္မာ) မိမိစိတ်နှလုံးကို ဧဇရပြင်ဆင်ခြင်း၏ ရည်ရွယ်ချက် သုံးခုကို သတိပြုပါ– လေ့လာရန်၊ လက်တွေ့ကျင့်သုံးရန်နှင့် သွန်သင်ပေးရန်တို့ ဖြစ်သည်။ သူ၏ပုံသက်သေကို ကျွန်ုပ်တို့ လိုက်လျှောက်သင့်သည်။
ကျမ်းစာစောင် နံပါတ် ၁၃—၁ ရာဇဝင်ချုပ်
၅ ဤစစ်မှန်ပြီး တိကျမှန်ကန်သော သမိုင်းကို ပြုစုရေးသားရန် ဧဇရထက် အရည်အချင်းပြည့်မီသူ မည်သူမျှမရှိပေ။ “ဧဇရသည် ထာဝရဘုရား၏ တရားတော်ကို စစ်ဆေးစောင့်ရှောက်ခြင်းငှာလည်းကောင်း၊ စီရင်ထုံးဖွဲ့တော်မူချက်တို့ကို ဣသရေလအမျိုး၌ သွန်သင်ခြင်းငှာလည်းကောင်း သဘောကျသောသူဖြစ်၏။” (ဧဇ. ၇:၁၀) ယေဟောဝါသည် မိမိ၏သန့်ရှင်းသော ဝိညာဉ်တော်အားဖြင့် သူ့ကို ကူညီခဲ့သည်။ ပါရှန်းလူမျိုး ကမ္ဘာ့အုပ်စိုးရှင်က ဧဇရတွင် ဘုရားရေးရာပညာရှိကြောင်း အသိအမှတ်ပြုခဲ့ပြီး သူ့ကို ယုဒနိုင်ငံစီရင်စုခရိုင်တွင် ကျယ်ပြန့်လှသော အုပ်ချုပ်ခွင့်အာဏာများနှင့်အတူ တာဝန်အပ်နှင်းပေးလိုက်သည်။ (ဧဇ. ၇:၁၂-၂၆) သို့နှင့် ဧဇရသည် ဘုရားပေး အခွင့်အာဏာနှင့် မင်းဧကရာဇ်၏ အခွင့်အာဏာတို့ဖြင့် ရနိုင်သည့် အကောင်းဆုံးစာပေ အထောက်အထားများမှ သူ၏ ဤမှတ်တမ်းကျမ်းကို ရေးသားပြုစုနိုင်ခဲ့ခြင်းဖြစ်သည်။
it-1 ၁၁၅၈ ပိုဒ်. ၄
နှိမ့်ချခြင်း
နှိမ့်ချမှုကြောင့် လမ်းပြမှုရရှိ။ ဘုရားရှေ့ ကိုယ့်ကိုယ်ကိုယ် နှိမ့်ချသူဟာ ဘုရားရဲ့လမ်းပြမှုကို မျှော်ကိုးနိုင်တယ်။ ဧဇရက ယောက်ျား ၁,၅၀၀ ကျော်အပြင် ပုရောဟိတ်တွေ၊ နက်သနင်တွေ၊ အမျိုးသမီးတွေနဲ့ ကလေးတွေကိုပါ ဦးဆောင်ပြီး ဗာဗုလုန်ကနေ ဂျေရုဆလင်ကို ခရီးနှင်ရမယ့် တာဝန်ကြီး ရထားတယ်။ ဂျေရုဆလင်မှာ ဗိမာန်တော်ကို အလှဆင်ဖို့ ရွှေငွေများစွာကိုလည်း တစ်ပါတည်း သယ်ဆောင်လာရတယ်။ ဒီတော့ လမ်းခရီးတစ်လျှောက် ကာကွယ်ပေးမယ့်သူတွေ လိုအပ်နေတယ်။ ဒါပေမဲ့ ဧဇရက လူ့အစွမ်းအစကို အားကိုးရာ မရောက်ချင်လို့ ပါရှားဘုရင်ဆီမှာ စစ်သားတွေ မတောင်းဆိုချင်ဘူး။ အရင်ကလည်း ဘုရင့်ကို “ဘုရားသခင်ရဲ့ လက်တော်ဟာ ကိုယ်တော့်ကို ရှာဖွေသူတွေနဲ့အတူ ရှိတယ်” လို့ သူ ပြောခဲ့ဖူးတာ။ ဒါကြောင့် ဧဇရက လူတွေကို အစာရှောင်စေပြီး ယေဟောဝါဘုရားရှေ့ ကိုယ့်ကိုယ်ကိုယ် နှိမ့်ချခိုင်းတယ်။ လမ်းခရီးတစ်လျှောက်မှာ ရန်သူတွေ၊ ချောင်းမြောင်းတိုက်ခိုက်သူတွေရဲ့ ရန်ကနေ ကယ်တင်ပေးဖို့ ဆုတောင်းကြတယ်။ ဘုရားသခင်က သူတို့ရဲ့ ဆုတောင်းစကားကို နားထောင်ပေးလို့ အန္တရာယ်များတဲ့ ခရီးစဉ် အောင်အောင်မြင်မြင် ပြီးဆုံးသွားတယ်။ (ဧဇရ ၈:၁-၁၄၊ ၂၁-၃၂) ဗာဗုလုန်မှာ ပြည်နှင်ခံရတဲ့ ပရောဖက် ဒံယေလလည်း ဘုရားသခင်ရှေ့ စိတ်နှိမ့်ချပြီး လမ်းပြမှုနဲ့ သိနားလည်နိုင်စွမ်း ရရှိဖို့ တောင်းခံခဲ့တယ်။ ဒါကြောင့် ဘုရားသခင်က ဒံယေလကို အထူးမျက်နှာသာ ရရှိသူဖြစ်ကြောင်း သိစေဖို့ စိတ်အာရုံမှာ ကောင်းကင်တမန်တစ်ပါးကို စေလွှတ်ခဲ့တယ်။—ဒံယေလ ၁၀:၁၂။
ဘုရားရေးရာ ရတနာ
ဧဇရမှတ်စာမှ ပေါ်လွင်ချက်များ
၇:၂၈–၈:၂၀—ဗာဗုလုန်ရှိ ဂျူးများစွာသည် အဘယ်ကြောင့် ဧဇရနှင့်အတူ ယေရုရှလင်သို့ မသွားလိုကြသနည်း။ ဂျူးလူမျိုး ပထမတစ်သုတ်သည် မိမိတို့၏ ဇာတိမြေသို့ ပြန်လာကြသည်မှာ အနှစ် ၆၀ ကျော် ကုန်လွန်ခဲ့ပြီဖြစ်သည့်တိုင် ယေရုရှလင်မြို့တွင် ဟိုတစ်စု သည်တစ်စုသာ နေထိုင်လျက်ရှိကြ၏။ ယေရုရှလင်မြို့သို့ ပြန်လာခြင်းက ခက်ခဲပြီး အန္တရာယ်များသည့် အခြေအနေတွင် ဘဝသစ် ထူထောင်ကြရမည် ဖြစ်သည်။ ထိုစဉ်က ယေရုရှလင်မြို့၏ အခြေအနေသည် ဗာဗုလုန်ပြည်တွင် ကောင်းစားခဲ့ဖွယ်ရှိသည့် ဂျူးများအတွက် အဘယ်ဆွဲဆောင်စရာမျှ မရှိချေ။ လမ်းခရီးက အန္တရာယ်များကြောင်းကိုလည်း မမေ့အပ်ပေ။ ပြည်တော်ပြန်များသည် ယေရုရှလင်မြို့သို့ ပြောင်းရွှေ့ရန် ယေဟောဝါအား အခိုင်အမာယုံကြည်ကာ စစ်မှန်သော ဝတ်ပြုရေးအတွက် ဇွဲရှိကြပြီး သတ္တိရှိဖို့ လိုသည်။ ဧဇရသည်ပင် ယေဟောဝါ၏ တန်ခိုးတော်ကြောင့် အားရှိခဲ့၏။ ဧဇရ၏ အားပေးမှုကြောင့် အရေအတွက် ၆,၀၀၀ ရှိပုံရသော မိသားစု ၁,၅၀၀ က တုံ့ပြန်ခဲ့ကြသည်။ ဧဇရ ထပ်ဆင့် အစပြုလုပ်ဆောင်ခဲ့ခြင်းကြောင့် လေဝိသား ၃၈ ဦးနှင့် နက်သနင် ၂၂၀ တို့က တုံ့ပြန်ခဲ့ကြသည်။
ဇူလိုင် ၁၇-၂၃
ကျမ်းစာထဲက အဖိုးတန်ဘဏ္ဍာများ | ဧဇရ ၉–၁၀
“မနာခံမှုရဲ့ ဆိုးကျိုး”
ဧဇရမှတ်စာမှ ပေါ်လွင်ချက်များ
၉:၁၊ ၂—ပြည်သားရင်းများနှင့် ထိမ်းမြားခြင်းက မည်မျှ အန္တရာယ်ကြီးသနည်း။ ပြန်လည်ထူထောင်လာသည့် လူမျိုးသည် ယေဟောဝါ၏ဝတ်ပြုရေးကို မေရှိယရောက်လာသည်အထိ ထိန်းသိမ်းကာကွယ်ရန် ဖြစ်သည်။ အခြားသောတိုင်းတစ်ပါးသားများနှင့် လက်ထပ်ထိမ်းမြားခြင်းက စစ်မှန်သော ဝတ်ပြုရေးအတွက် အမှန်တကယ် ခြိမ်းခြောက်မှုပင်။ အချို့သောသူတို့သည် ရုပ်ပုံကိုးကွယ်သူများနှင့် လက်ထပ်ထိမ်းမြားခဲ့ကြရာ ဣသရေလတစ်မျိုးလုံး အယူမှားလူမျိုးများနှင့် သွေးနှောနိုင်သည့် အခြေဆိုက်ရောက်သွားနိုင်သည်။ ထိုအခါ စင်ကြယ်သောဝတ်ပြုရေး လုံးဝကွယ်ပျောက်သွားနိုင်၏။ သို့ဆိုလျှင် မည်သူ့အတွက် မေရှိယ ရောက်လာရတော့မည်နည်း။ ထိုအဖြစ်အပျက်ကို မြင်တွေ့လိုက်ရသည့် ဧဇရ တုန်လှုပ်ချောက်ချားသွားခြင်းက အံ့အားသင့်စရာ မဟုတ်ချေ။
ကျွန်ုပ်တို့ကို ယေဟောဝါဘုရားသခင် အဘယ်အရာ တောင်းဆိုတော်မူသနည်း
စိတ်ပါလက်ပါ နာခံခြင်းသည် ကောင်းချီးများ ရရှိစေမည်။ ‘သင်၏အကျိုးကိုထောက်၍ ယနေ့ငါဆင့်ဆိုသော ပညတ်တော်ကို စောင့်ရှောက်လော့’ ဟု မောရှေ ဖော်ပြထားသည်။ (အခန်းငယ် ၁၃) မှန်ပါသည်၊ ယေဟောဝါ ဘုရားသခင်၏ ပညတ်တော်မှန်သမျှ၊ ကိုယ်တော်တောင်းဆိုသမျှ အရာရာတိုင်းသည် ကျွန်ုပ်တို့ အကျိုးအတွက် ဖြစ်သည်။ အခြား အဘယ်အကြောင်းကြောင့်မျှ မဖြစ်နိုင်ချေ။ “ဘုရားသခင်သည် ချစ်ခြင်းမေတ္တာ ဖြစ်တော်မူ၏” ဟု သမ္မာကျမ်းစာတွင် ဖော်ပြသည်။ (၁ ယောဟန် ၄:၈) ထို့ကြောင့် ထိုပညတ်များသည် ကျွန်ုပ်တို့၏ ထာ၀ရကောင်းကျိုးအတွက် ရည်ရွယ်၍သာ ပေးထားခြင်းဖြစ်သည်။ (ဟေရှာယ ၄၈:၁၇) ယေဟောဝါ ဘုရားသခင် တောင်းဆိုသမျှကို လုပ်ဆောင်ခြင်းသည် ယနေ့အချိန်တွင် စိတ်ပျက်စရာများမှ ကင်းဝေးစေသည့်အပြင် အနာဂတ်တွင် ကိုယ်တော့်နိုင်ငံတော် အုပ်ချုပ်မှုအောက်၌ ထာ၀ရကောင်းချီးများကို ရရှိစေပါမည်။
ဘုရားရေးရာရတနာ
ဧဇရမှတ်စာမှ ပေါ်လွင်ချက်များ
၁၀:၃၊ ၄၄—သားသမီးများကို ဇနီးသည်များနှင့်အတူ အဘယ်ကြောင့် စွန့်ပယ်ရသနည်း။ သားသမီးများ နေရစ်ခဲ့မည်ဆိုလျှင် စွန့်ပစ်ခံရသည့် ဇနီးသည်များသည် ကလေးများကြောင့် ပြန်လာနိုင်စရာအကြောင်း ပိုများပေမည်။ ထို့ပြင် ကလေးသူငယ်များသည် မိခင်၏ ကြည့်ရှုစောင့်ရှောက်မှု လိုအပ်သည်။
ဇူလိုင် ၂၄-၃၀
ကျမ်းစာထဲက အဖိုးတန်ဘဏ္ဍာများ | နေဟမိ ၁–၂
“ကျွန်တော် ချက်ချင်း ဆုတောင်းလိုက်တယ်”
ယေဟောဝါကို အစဉ်မျက်မှောက်ပြုလော့
၅ တစ်ခါတစ်ရံ ကျွန်ုပ်တို့သည် ဘုရားသခင်၏ အကူအညီအတွက် ချက်ချင်း ဆုတောင်းဖို့ လိုပေမည်။ တစ်ခါက ပါးရှားဘုရင် အာတဇေရဇ်သည် မိမိ၏ ဖလားတော်ဝန် နေဟမိ မျက်နှာညှိုးငယ်နေကြောင်း သတိပြုမိသည်။ ရှင်ဘုရင်က “အဘယ်သို့ တောင်းလျှောက်ချင်သနည်း” ဟု မေးသောအခါ နေဟမိသည် “ကောင်းကင်ဘုံ၏အရှင် ဘုရားသခင်အား [“ချက်ချင်း၊” ကဘ] ဆုတောင်းပြီးမှ လျှောက်လေ၏။” သူသည် စိတ်ထဲမှ တိုတိုတုတ်တုတ် ဆုတောင်းခဲ့သည်။ သို့တိုင် ဆုတောင်းချက်ကို ဘုရားသခင် ဖြေကြားသဖြင့် ယေရုရှလင်မြို့ရိုး ပြန်လည်တည်ဆောက်နိုင်ရန် ဘုရင်၏ ကူညီမှုကို သူရရှိခဲ့သည်။ (နေဟမိ ၂:၁-၈ ကိုဖတ်ပါ။) မှန်ပါသည်၊ စိတ်ထဲမှ တိုတိုတုတ်တုတ် ဆုတောင်းလျှင်ပင် ထိရောက်မှု ရှိနိုင်သည်။
လက်တန်းဟောပြောခြင်း
သင့်ယုံကြည်ချက်များနှင့်ပတ်သက်၍ လက်တန်းရှင်းပြချက်များ ပေးရန် တောင်းဆိုခံရသောအခါ အဘယ်အရာက သင့်တင်ပြချက်များကို ထိမိစေနိုင်သနည်း။ ဘုရင် အာတဇေရဇ် ထုတ်လိုက်သည့် မေးခွန်းတစ်ခုကို မဖြေဆိုမီ တိတ်ဆိတ်စွာ ဆုတောင်းခဲ့သည့် နေဟမိကို အတုယူပါ။ (နေ. ၂:၄) ထို့နောက် စိတ်ဖြင့် အောက်လိုင်းတစ်ခုကို လျင်မြန်စွာ ပုံဖော်လိုက်ပါ။ အခြေခံအဆင့်များသည် ဤစာရင်းအတိုင်း ဖြစ်ပေမည်– (၁) ရှင်းပြချက်တွင် ပါဝင်သင့်သော အချက်တစ်ချက်နှစ်ချက်ကို ရွေးချယ်ပါ (ကျမ်းစာဖြင့် ကျိုးကြောင်းဆင်ခြင်ခြင်းမှ အချက်များကို အသုံးပြုရန် သင်ရွေးချယ်နိုင်ပေသည်)။ (၂) ထိုအချက်များအား ထောက်မပေးရန် အဘယ်ကျမ်းချက်များ အသုံးပြုမည်ကို ဆုံးဖြတ်ပါ။ (၃) စုံစမ်းမေးမြန်းသူ နားထောင်ချင်စိတ်ရှိရန် လိမ္မာပါးနပ်စွာ မည်သို့ စတင်ရှင်းပြမည်ကို စီစဉ်ပါ။ ထို့နောက် စ၍ပြောပါ။
ဘုရားရေးရာ ရတနာ
က၈၆ ၂/၁၅ ၂၅
စစ်မှန်တဲ့ဝတ်ပြုရေး အောင်ပွဲဆင်
မဟုတ်ပါဘူး။ ဂျေရုဆလင်မြို့ရဲ့ အခြေအနေဆိုးနဲ့ပတ်သက်ပြီး နေဟမိ အချိန်အတော်ကြာ “နေ့ညမပြတ် ဆုတောင်း” ခဲ့တာဖြစ်တယ်။ (၁:၄၊ ၆) အရင်တုန်းက အထပ်ထပ်အခါခါ ဆုတောင်းခဲ့သလို ဂျေရုဆလင်မြို့ရိုး ပြန်လည်တည်ဆောက်ချင်တဲ့အကြောင်း အာတဇေရဇ်မင်းကို ပြောခွင့်ရတဲ့အခါလည်း ထပ်ပြီး ဆုတောင်းတယ်။ ဆုတောင်းချက်ကို ယေဟောဝါ ဖြေကြားပေးလို့ မြို့ရိုး ပြန်တည်ဆောက်ခွင့် ရခဲ့တယ်။
သင်ခန်းစာ။ နေဟမိဟာ လမ်းညွှန်မှုရဖို့ ယေဟောဝါကို မျှော်ကိုးခဲ့တယ်။ ကျွန်တော်တို့လည်း အရေးကြီးတဲ့ ဆုံးဖြတ်ချက်တွေ ချရတဲ့အခါ “ဇွဲမလျှော့တမ်း ဆုတောင်း” သင့်တယ်။ ယေဟောဝါရဲ့လမ်းပြမှုနဲ့အညီ လုပ်ဆောင်သင့်တယ်။—ရောမ ၁၂:၁၂။
ဇူလိုင် ၃၁–ဩဂုတ် ၆
ကျမ်းစာထဲက အဖိုးတန်ဘဏ္ဍာများ | နေဟမိ ၃–၄
“အလုပ်ကြမ်းလုပ်လို့ နိမ့်ကျ သွားသလား”
နေဟမိကျမ်းမှ ပေါ်လွင်ချက်များ
၃:၅၊ ၂၇။ စစ်မှန်သောဝတ်ပြုရေး အကျိုးအတွက် အလုပ်ကြမ်းလုပ်ရခြင်းကို အောက်ကျသည်ဟု “တေကောမင်းတို့” နည်းတူ မယူမှတ်သင့်ချေ။ ယင်းအစား အားသွန်ခွန်စိုက် လုပ်ဆောင်ခဲ့ကြသော တေကောမြို့သားများကို ကျွန်ုပ်တို့ အတုယူနိုင်သည်။
ယေဟောဝါ သင့်ကို ဘာဖြစ်စေမလဲ
၁၁ နှစ်ပေါင်းများစွာ ကြာပြီးနောက် ရှလုံရဲ့ သမီးတွေကို ဂျေရုဆလင်မြို့ရိုး ပြုပြင်ရေးမှာ ယေဟောဝါ အသုံးပြုခဲ့တယ်။ (နေ. ၂:၂၀။ ၃:၁၂) ရှလုံဟာ အုပ်ချုပ်ရေးမှူး ဖြစ်ပေမဲ့ သူ့ရဲ့သမီးတွေက ခက်ခဲပြီး အန္တရာယ်များတဲ့ အဲဒီအလုပ်ကို လုပ်ဖို့ လိုလိုလားလား ရှိကြတယ်။ (နေ. ၄:၁၅-၁၈) “ခေါင်းဆောင်တွေ ခိုင်းတာကို မလုပ်ချင်ကြ” တဲ့ တေကောမြို့က အထင်ကရ ပုဂ္ဂိုလ်တွေနဲ့ တခြားစီပဲ။ (နေ. ၃:၅) ၅၂ ရက်အတွင်း မြို့ရိုး ပြီးစီးသွားတဲ့အခါ ရှလုံရဲ့ သမီးတွေ ဘယ်လောက် ပျော်မလဲဆိုတာ စဉ်းစားကြည့်လိုက်ပါ။ (နေ. ၆:၁၅) အခုအချိန်မှာလည်း ယေဟောဝါဆီ အပ်နှံထားတဲ့ အဆောက်အအုံတွေကို ဆောက်လုပ်ခြင်း၊ ပြုပြင်ထိန်းသိမ်းခြင်းမှာ ညီအစ်မတွေ ပျော်ရွှင်စွာ ပါဝင်နေကြတယ်။ ဒါဟာ မြင့်မြတ်တဲ့ အမှုဆောင်လုပ်ငန်းရဲ့ အထူးကဏ္ဍတစ်ခုပဲ။ ဒီလုပ်ငန်း အောင်မြင်ရေးမှာ သူတို့ရဲ့ အစွမ်းအစ၊ ထက်သန်မှု၊ သစ္စာစောင့်သိမှုတွေ မရှိမဖြစ် လိုအပ်တယ်။
ကြီးမြတ်မှုအပေါ်ခရစ်တော်အမြင်မျိုး ပျိုးထောင်ခြင်း
၁၆ လူကြီးလူငယ်မရွေး ခရစ်ယာန်အားလုံးသည် ကြီးမြတ်မှုအပေါ် ခရစ်တော်၏အမြင်မျိုး ကြိုးစားပျိုးထောင်သင့်သည်။ အသင်းတော်တွင် တာဝန်အမျိုးမျိုး လုပ်ဆောင်ရ၏။ နိမ့်ကျပုံရသည့် အမှုများကို လုပ်ဆောင်ရန် တောင်းဆိုခံရလျှင် ဘယ်တော့မျှ မကျေမနပ် မဖြစ်ပါနှင့်။ (၁ ဓမ္မရာဇဝင် ၂၅:၄၁; ၄ ဓမ္မရာဇဝင် ၃:၁၁) အသင်မိဘတို့၊ သင်တို့၏ သားသမီးများနှင့် ဆယ်ကျော်သက်များကို ဘုရားသခင့် နိုင်ငံတော်ခန်းမတွင်ဖြစ်စေ၊ စည်းဝေးပွဲတွင်ဖြစ်စေ၊ စည်းဝေးကြီး ကျင်းပမည့်နေရာတွင်ဖြစ်စေ ပေးအပ်ထားသော မည်သည့်တာဝန်ကိုမဆို ဝမ်းမြောက်ဝမ်းသာ လုပ်ဆောင်ရန် အားပေးသလော။ နိမ့်ကျသော အလုပ်များ သင်,လုပ်ဆောင်ခြင်းကို သူတို့တွေ့သလော။ ယခု ယေဟောဝါသက်သေများ၏ ကမ္ဘာ့ဌာနချုပ်တွင် အမှုဆောင်နေသော ညီအစ်ကိုတစ်ဦးသည် သူ့မိဘများ၏ ပုံသက်သေကို အထင်းသား ပြန်မြင်ယောင်နေသေး၏။ သူက ဤသို့ပြောပြသည်– “ဘုရားသခင့် နိုင်ငံတော်ခန်းမမှာပဲဖြစ်ဖြစ်၊ စည်းဝေးကြီး ကျင်းပမယ့်နေရာမှာပဲဖြစ်ဖြစ် သန့်ရှင်းရေးအလုပ်ကို ကျွန်တော့်မိဘတွေရဲ့ လုပ်ဆောင်ပုံက သန့်ရှင်းရေးလုပ်တာကို သူတို့ ဘယ်လောက် အရေးထားတယ်ဆိုတာ ကျွန်တော် သိခဲ့ရတယ်။ အဲ့ဒီအလုပ်တွေက ဘယ်လောက်ပဲ နိမ့်ကျတဲ့ပုံပေါက်ပါစေ အသင်းတော် ဒါမှမဟုတ် ညီအစ်ကို အသင်းအပင်းအတွက် အကျိုးရှိစေမယ့် အလုပ်တွေကို စေတနာအပြည့်နဲ့ လုပ်ဆောင်ခဲ့ကြတယ်။ အဲ့ဒီစိတ်ထားကြောင့် ဗေသလမှာ ဘာအလုပ်ကိုမဆို စိတ်ပါလက်ပါ လုပ်ဆောင်ဖို့ ကျွန်တော် အသင့်ရှိနေတာ။”
ဘုရားရေးရာ ရတနာ
နေဟမိကျမ်းမှ ပေါ်လွင်ချက်များ
၄:၁၇၊ ၁၈—လက်တစ်ဖက်တည်းနှင့် မည်သို့ ဆောက်လုပ်နိုင်ပါမည်နည်း။ ဝန်ထမ်းသူများအဖို့ ယင်းသည် ပြဿနာမဟုတ်ပါ။ ဝန်များကို သူတို့၏ဦးခေါင်း သို့မဟုတ် ပခုံးပေါ် ထမ်းထားပြီး လက်တစ်ဖက်နှင့် ထိန်းပေးပြီးနောက် အခြား “လက်တစ်ဖက်နှင့် လက်နက်ကိုကိုင်” နိုင်ကြပါသည်။ လက်နှစ်ဖက်နှင့် အလုပ်လုပ်ရသော ဆောက်လုပ်ရေးသမားများမူ “ခါး၌ ဓားဆွဲလျက် တည်လုပ်ကြ၏။” သို့ဖြင့် ရန်သူတိုက်ခိုက်လာခဲ့သော် တိုက်ပွဲဝင်ဖို့ အသင့်ရှိနေကြသည်။
ဩဂုတ် ၇-၁၃
ကျမ်းစာထဲက အဖိုးတန်ဘဏ္ဍာများ | နေဟမိ ၅–၇
“နေဟမိက အမိန့်ပေး စေခိုင်းရုံပဲမဟုတ်၊ ကိုယ်တိုင် လုပ်ဆောင်ခဲ့”
စစ်မှန်သောဝတ်ပြုရေးကို ထောက်ပံ့သူများ—ထိုစဉ်ကနှင့် ယခု
နေဟမိသည် သူ၏အချိန်နှင့် သူ၏စည်းရုံးရေး အတတ်ပညာကိုသာ အသုံးပြု၍ ပါဝင်ခဲ့ခြင်းမဟုတ်ချေ။ စစ်မှန်သော ဝတ်ပြုရေးကို ထောက်ပံ့ရန် သူ၏စည်းစိမ်ဥစ္စာကိုလည်း အသုံးပြုခဲ့သည်။ ကျွန်ဘဝ ရောက်ရှိနေကြသော သူ၏ဂျူးညီအစ်ကိုများကို သူ၏ငွေနှင့် ပြန်ဝယ်ယူခဲ့သည်။ အတိုးမယူဘဲ ငွေချေးခဲ့၏။ ဘုရင်ခံတစ်ဦးအနေနှင့် သူရသင့်ရထိုက်သော ထောက်ပံ့ငွေကို အတင်းအကျပ် တောင်းခံခြင်းဖြင့် ဂျူးတို့အပေါ် “လေးသောဝန်” တစ်ခါမျှ မတင်ခဲ့ချေ။ သို့အစား၊ နေဟမိသည် “ပတ်ဝန်းကျင်၌နေ၍ ငါတို့ထံသို့လာသော တစ်ပါးအမျိုးသားကိုမဆိုဘဲ . . . တစ်ရာငါးကျိပ်တို့” ကို ကျွေးမွေးလေ၏။ သူ၏ဧည့်သည်များကို “နွားတစ်ကောင်၊ ရွေးသောသိုး ခြောက်ကောင်၊ ကြက်များ” နှင့် နေ့စဉ်ဧည့်ခံခဲ့သည်။ ထို့ပြင် သူ၏စရိတ်ဖြင့် “များစွာသော စပျစ်ရည် အမျိုးမျိုးကိုလည်း” ဆယ်ရက်တစ်ခါ ဧည့်ခံခဲ့သည်။—နေဟမိ ၅:၈၊ ၁၀၊ ၁၄-၁၈။
“လက်အားမလျော့စေနှင့်”
၁၆ နေဟမိနဲ့ ဂျူးတွေဟာ ယေဟောဝါရဲ့ အကူအညီကြောင့် အားရှိခဲ့ကြတယ်။ ဂျေရုဆလင်မြို့ရိုးကို ၅၂ ရက်တည်းနဲ့ လက်စသတ်နိုင်ခဲ့ကြတယ်။ (နေ. ၂:၁၈။ ၆:၁၅၊ ၁၆) နေဟမိဟာ အလုပ်ကို ကြီးကြပ်ပေးရုံသာမက ဆောက်လုပ်ရေးမှာ ကိုယ်တိုင်ကိုယ်ကျ ပါဝင်ခဲ့တယ်။ (နေ. ၅:၁၆) အဲဒီလိုပဲ အကြီးအကဲများစွာဟာ ဆောက်လုပ်ရေး၊ နိုင်ငံတော်ခန်းမ သန့်ရှင်းရေးနဲ့ ပြုပြင်ထိန်းသိမ်းရေးမှာ ကူညီပေးခြင်းအားဖြင့် နေဟမိကို တုပနေကြတယ်။ ဒီမေတ္တာရှိ အကြီးအကဲတွေဟာ စိုးရိမ်သောက ရောက်နေတဲ့ ညီအစ်ကို/မတွေဆီ လည်ပတ်ခြင်း၊ သူတို့နဲ့အတူ အမှုဆောင်လုပ်ငန်းမှာ ပါဝင်ခြင်းအားဖြင့် အားရှိစေကြတယ်။—ဟေရှာယ ၃၅:၃၊ ၄ ကိုဖတ်ပါ။
သင့်ကို ယေဟောဝါ မည်သို့ အောက်မေ့တော်မူမည်နည်း
ရှေ့နောက်ညီညွတ်စွာပင် သမ္မာကျမ်းစာက ဘုရားသခင်နှင့်ပတ်သက်၍ “အောက်မေ့” ဟုဆိုလျှင် အမှန်ပင် အရေးယူဆောင်ရွက်ခြင်းကို ဆိုလို၏။ ဥပမာ၊ မြေကြီးကို ရက်ပေါင်း ၁၅၀ ရေလွှမ်းမိုးပြီးနောက် “ဘုရားသခင်သည်၊ နောဧ . . . ကိုအောက်မေ့၍၊ မြေကြီးပေါ်မှာ လေလာစေတော်မူသဖြင့် ရေငြိမ်လေ၏။” (ကမ္ဘာဦး ၈:၁) ရာစုနှစ်များစွာကြာပြီးနောက် ရှံဆုန်သည် ဖိလိတ္တိလူတို့ကြောင့် မျက်စိကန်းခဲ့၍ အကျဉ်းချခံရသောအခါ သူက ဤသို့ဆုတောင်းခဲ့သည်– “အိုအရှင်ထာဝရဘုရား၊ အကျွန်ုပ်ကို အောက်မေ့တော်မူပါ။ . . . ယခုတစ်ကြိမ်မျှသာ ခွန်အားကို ပြန်ပေးတော်မူပါ။” သူကိုယ်တိုင် ဘုရားသခင့် ရန်သူများကို လက်စားချေနိုင်စေရန် သူ့ကို လူသာမန်ထက်သာလွန်သော ခွန်အားကို ပေးတော်မူခြင်းအားဖြင့် ယေဟောဝါသည် သူ့ကို အောက်မေ့တော်မူခဲ့၏။ (တရားသူကြီး ၁၆:၂၈-၃၀) နေဟမိကိုမူ ယေဟောဝါသည် သူ၏အားထုတ်မှုများကို ကောင်းချီးပေးတော်မူခဲ့သဖြင့် ယေရုရှလင်၌ စစ်မှန်သောဝတ်ပြုရေး ပြန်လည်တည်ထောင်ခဲ့သည်။
ဘုရားရေးရာ ရတနာ
“အကောင်းအားဖြင့် အဆိုးကိုနိုင်လော့”
၁၅ တတိယအနေနှင့် နေဟမိ၏ ရန်သူတို့သည် ဘုရားသခင့် ပညတ်ကို နေဟမိချိုးဖောက်စေရန် ကြိုးစားရာတွင် ဣသရေလလူမျိုး သစ္စာဖောက် ရှေမာယကို အသုံးပြုခဲ့ကြသည်။ ရှေမာယက နေဟမိအား ဤသို့ဆို၏– ‘ဘုရားသခင်၏ အိမ်တော်အတွင်းခန်းထဲမှာ ငါတို့သည် စုဝေး၍ ဝတ်ပြုရာအိမ်တော် တံခါးတို့ကို ပိတ်ထားကြကုန်အံ့။ ကိုယ်တော်ကို သတ်အံ့သောငှာ လာကြလိမ့်မည်။’ ရှေမာယက နေဟမိသည် အသတ်ခံရတော့မည်ဖြစ်သည်၊ သို့သော် ဝတ်ပြုရာအိမ်တော်ထဲတွင် ပုန်းနေခြင်းဖြင့် မိမိအသက်ကို ကယ်တင်နိုင်သည်ဟု ပြောသည်။ နေဟမိသည် ယဇ်ပုရောဟိတ်တစ်ဦး မဟုတ်ပါ။ ဘုရားသခင်၏ အိမ်တော်အတွင်း ပုန်းနေခြင်းသည် အပြစ်ကျူးလွန်ရာ ရောက်မည်ဖြစ်သည်။ မိမိအသက်ကို ကယ်တင်ဖို့ ကြိုးစားရာတွင် ဘုရားသခင့်ပညတ်ကို သူချိုးဖောက်မည်လော။ နေဟမိက ‘ငါကဲ့သို့သောသူသည် . . . အသက် ချမ်းသာခြင်းငှာ ဝတ်ပြုရာအိမ်တော်ထဲသို့ ဝင်ရမည်လော။ ငါမဝင်’ ဟု ပြန်ပြော၏။ နေဟမိသည် ချထားသော ထောင်ချောက်ထဲသို့ အဘယ်ကြောင့် မကျရောက်ခဲ့သနည်း။ ရှေမာယသည် ဣသရေလ အမျိုးသားချင်းဖြစ်သော်လည်း “ထိုသူကို ဘုရားသခင် စေလွှတ်တော်မမူ” ကြောင်း သူသိထားသောကြောင့် ဖြစ်သည်။ အမှန်ဆိုလျှင် စစ်မှန်သော ပရောဖက်တစ်ဦးသည် ဘုရားသခင့်ပညတ်ကို ချိုးဖောက်စေရန် ဘယ်တော့မျှ သူ့အား အကြံပေးမည် မဟုတ်ပါ။ ဤတွင်တစ်ဖန် နေဟမိသည် ဆန့်ကျင်သူ လူဆိုးများ မိမိအား အနိုင်ယူရန် ခွင့်မပြုခဲ့ပါ။ ယင်းနောက် မကြာမီတွင် သူဤသို့ရေးခဲ့၏– “အရက်ငါးဆယ့်နှစ်ရက်ကြာမှ ဧလုလ,လ နှစ်ဆယ့်ငါးရက်နေ့တွင် မြို့ရိုးကို လက်စသတ်ကြ၏။”—နေဟမိ ၆:၁၀-၁၅; တောလည်ရာ ၁:၅၁; ၁၈:၇။
ဩဂုတ် ၁၄-၂၀
ကျမ်းစာထဲက အဖိုးတန်ဘဏ္ဍာများ | နေဟမိ ၈–၉
“ယေဟောဝါဘုရား ပေးသနားတဲ့ ဝမ်းမြောက်ခြင်းဟာ ခင်ဗျားတို့အတွက် ရဲတိုက်ပဲ”
သေချာပြင်ဆင်ထားတဲ့ ဆုတောင်းချက်ကနေရတဲ့ သင်ခန်းစာများ
၂ အထူးစုဝေးမှု မစခင် တစ်လမှာ ဂျူးတွေဟာ ဂျေရုဆလင်မြို့ရိုးကို တည်ဆောက်ပြီးစီးခဲ့တယ်။ (နေ. ၆:၁၅) အဲဒါကို ၅၂ ရက်တည်းနဲ့အပြီးဆောက်ခဲ့ကြတယ်။ နောက်တစ်လဖြစ်တဲ့ တိရှရိလရဲ့ ပထမနေ့မှာပဲ သူတို့ဟာ ဧဇရနဲ့ တခြားလေဝိသားတွေ ဘုရားသခင့် ပညတ်ဖတ်ပြီး ရှင်းပြတာကို နားထောင်ဖို့ လူထုရင်ပြင်မှာ စုဝေးခဲ့ကြတယ်။ (ပုံ ၁) ကလေးတွေ အပါအဝင် မိသားစုတွေ အားလုံးဟာ မနက်ကနေ နေ့လယ်အထိ မတ်တတ်ရပ်ပြီး နားထောင်ခဲ့ကြတယ်။ အဲဒီအစ္စရေးလူတွေဟာ ယနေ့ ကျွန်ုပ်တို့အတွက် တကယ့် ပုံသက်သေကောင်းပါပဲ။ ကျွန်ုပ်တို့ဟာ သက်သောင့်သက်သာရှိတဲ့ နိုင်ငံတော်ခန်းမမှာ စည်းဝေးတက်ဖို့ ရောက်နေပေမဲ့ တစ်ခါတလေ စည်းဝေးချိန်အတွင်းမှာ တခြားအကြောင်းတွေ စဉ်းစားနေတတ်တယ်။ ဒါပေမဲ့ အဲဒီအစ္စရေးလူတွေဟာ သေချာအာရုံစိုက် နားထောင်ပြီး သူတို့ကြားတဲ့အရာတွေကို စဉ်းစားကြတယ်။ ဘုရားသခင့်ပညတ်ကို သူတို့မလိုက်ခဲ့ဘူးဆိုတာ သိရတဲ့အခါမှာ ငိုကြတယ်။—နေ. ၈:၁-၉။
သင်သည် ‘ဘုရားသခင့်ဝိညာဉ်တော်ဖြင့် လျှောက်လှမ်း’ နေမည်လော
၉ ဝမ်းမြောက်ခြင်းသည် အလွန်ပျော်ရွှင်နေသော အခြေအနေဖြစ်သည်။ ယေဟောဝါသည် “ပျော်ရွှင်သော ဘုရားသခင်” ဖြစ်တော်မူ၏။ (၁ တိမောသေ ၁:၁၁၊ ကဘ; ဆာလံ ၁၀၄:၃၁) သားတော်သည်လည်း ခမည်းတော်၏ အလိုတော်ကို အားရဝမ်းမြောက်စွာ ထမ်းဆောင်ခဲ့သည်။ (ဆာလံ ၄၀:၈; ဟေဗြဲ ၁၀:၇-၉) “ယေဟောဝါ၏ ဝမ်းမြောက်ခြင်းသည် [ကျွန်ုပ်]တို့ ခိုလှုံရာ ဖြစ်သည်။”—နေဟမိ ၈:၁၀၊ ကဘ။
၁၀ ဘုရားသခင် ပေးတော်မူသော ဝမ်းမြောက်ခြင်းသည် ခက်ခဲချိန်၊ ဝမ်းနည်းကြေကွဲနေချိန် သို့မဟုတ် နှိပ်စက်ညှဉ်းပန်း ခံရချိန်တွင်ပင် ဘုရားသခင့် အလိုတော် ထမ်းဆောင်ရာ၌ ကြီးစွာသော ပျော်ရွှင်ကျေနပ်မှု ခံစားရစေသည်။ “ဘုရားသခင်ကို သိသောဉာဏ်” သည် ကျွန်ုပ်တို့ကို အလွန်ပျော်ရွှင်စေသည်။ (သု. ၂:၁-၅) ဘုရားသခင်နှင့် ကျွန်ုပ်တို့၏ ပျော်ရွှင်ကျေနပ်ဖွယ် ဆက်ဆံရေးသည် တိကျမှန်ကန်သော အသိပညာရှိခြင်း၊ ဘုရားသခင်ကို ယုံကြည်ခြင်း၊ ယေရှု၏ ရွေးနုတ်ဖိုး ပူဇော်သကာကို ယုံကြည်ခြင်းတို့အပေါ် အခြေခံသည်။ (၁ ယောဟန် ၂:၁၊ ၂) အပြည်ပြည်ဆိုင်ရာ ညီအစ်ကိုအသင်းအပင်းတွင် ပါဝင်ခွင့်ရခြင်းသည်လည်း ကျွန်ုပ်တို့ကို ဝမ်းမြောက်စေသည့် နောက်အကြောင်းရင်း ဖြစ်၏။ (ဇေဖနိ ၃:၉; ဟဂ္ဂဲ ၂:၇) ဘုရားသခင့်နိုင်ငံတော် မျှော်လင့်ချက်နှင့် သတင်းကောင်းကြေညာရသည့် အခွင့်ထူးကလည်း ဝမ်းမြောက်စေသည်။ (မဿဲ ၆:၉၊ ၁၀; ၂၄:၁၄) ထာဝရအသက် မျှော်လင့်ချက်သည်လည်း ထိုနည်းတူပင်။ (ယောဟန် ၁၇:၃) ထိုကောင်းမွန်လှသော မျှော်လင့်ချက်ကြောင့် “အမှန်ရွှင်လန်း” သင့်ပေသည်။—တရားဟောရာ ၁၆:၁၅။
ဘုရားရေးရာ ရတနာ
it-1 ၁၄၅ ပိုဒ်. ၂
အာရမိတ်
ဗာဗုလုန်ကနေ ပြန်လာပြီး နှစ်အနည်းငယ်အကြာမှာ ဖြစ်တယ်။ ပုရောဟိတ် ဧဇရက ဂျေရုဆလင်မြို့မှာ စုရုံးရောက်ရှိနေတဲ့ ဂျူးတွေကို ပညတ်ကျမ်း ဖတ်ပြတယ်။ လေဝိသားတွေက ပညတ်ကျမ်းရဲ့အဓိပ္ပာယ် ရှင်းပြကြတယ်။ နေဟမိ ၈:၈ မှာ အခုလိုဆိုတယ်– “သူတို့က ဘုရားသခင်ရဲ့ ပညတ်ကျမ်းကို အသံကျယ်ကျယ်ဖတ်ပြီး အနက်အဓိပ္ပာယ်ကို ရှင်းပြတယ်။ ဖတ်ပြတဲ့အရာကို လူတွေ သဘောပေါက်အောင် ကူညီပေးတယ်။” ဂျူးတွေက ဗာဗုလုန်မှာ အာရမိတ်စကား သုံးခဲ့ပုံရတယ်။ ဒါကြောင့် ဟီဘရူးကျမ်း စာသားတွေကို အာရမိတ်စကားနဲ့ စကားပြေပြန်ပြီး ရှင်းပြတာ ဖြစ်နိုင်တယ်။ အသေးစိတ်လည်း ရှင်းပြပေးခဲ့တယ်။ ဒါမှသာ ဟီဘရူးစကားကို နားလည်ထားပြီးဖြစ်ရင်တောင် ပိုလေးလေးနက်နက် နားလည်လာမှာဖြစ်တယ်။
ဩဂုတ် ၂၁-၂၇
ကျမ်းစာထဲက အဖိုးတန်ဘဏ္ဍာများ | နေဟမိ ၁၀–၁၁
“ယေဟောဝါအတွက် သူတို့ ကိုယ်ကျိုးစွန့်ခဲ့ကြ”
အမည်နှင့်လိုက်ဖက်သော ယေရုရှလင်
၁၃ နေဟမိခေတ်တွင် တံဆိပ်ခတ်ထားသော “ပဋိညာဉ်စာချုပ်” သည် ယေရုရှလင်မြို့ရိုး အပ်နှံသည့်နေ့အတွက် ဘုရားသခင့် ရှေးလူမျိုးတော်ကို ပြင်ဆင်ပေးခဲ့သည်။ သို့သော် အရေးပေးစရာလိုသည့် အခြားအရေးပေါ်ကိစ္စတစ်ခု ရှိနေသေးသည်။ ယခု တံခါး ၁၂ ခုရှိသော မြို့ရိုးကြီးဖြင့် ကာရံထားသော ယေရုရှလင်မြို့တွင် ပို၍ကြီးမားသော လူဦးရေ လိုအပ်လျက်ရှိသည်။ ဣသရေလလူအချို့သည် ထိုတွင်နေထိုင်ခဲ့ကြသော်လည်း “မြို့ကျယ်ဝန်း၍ လူနည်းပါး၏။” (နေဟမိ ၇:၄၊ သမ) ဤပြဿနာကိုဖြေရှင်းရန် လူတို့သည် “သန့်ရှင်းသောအရပ်၊ ယေရုရှလင်မြို့၌ တစ်ကျိပ်တွင်တစ်ယောက်၊ အခြားသောမြို့တို့၌ ကိုးယောက် နေရမည်အကြောင်း [မဲချ] ကြ၏။” ဤအစီအစဉ်ကို လိုလိုလားလား တုံ့ပြန်ခဲ့ကြခြင်းကြောင့် “ယေရုရှလင်မြို့၌ နေခြင်းငှာ အလိုလိုဝန်ခံသောသူ အပေါင်းတို့ကို” ကောင်းချီးပေးရန် လူတို့လှုံ့ဆော်ခံခဲ့ရသည်။ (နေဟမိ ၁၁:၁၊ ၂) ယင်းသည် ရင့်ကျက်သောခရစ်ယာန်အကူအညီ သာ၍လိုအပ်သည့် နေရာများသို့ ပြောင်းရွှေ့နေထိုင်ရန် အခြေအနေပေးသော ယနေ့ စစ်မှန်သည့် ဝတ်ပြုသူများအတွက် ပုံသက်သေကောင်းပင်!
က၈၆ ၂/၁၅ ၂၆
စစ်မှန်တဲ့ဝတ်ပြုရေး အောင်ပွဲဆင်
အမွေပစ္စည်းတွေကို ထားခဲ့ပြီး ဂျေရုဆလင်ကို ပြောင်းရတာဖြစ်တဲ့အတွက် ထိခိုက်နစ်နာမှုတွေ ရှိမှာပဲ။ ဂျေရုဆလင်မြို့မှာ နေတဲ့အခါ အန္တရာယ်အမျိုးမျိုးလည်း ကြုံရနိုင်တယ်။ ဒါကြောင့် ဆန္ဒအလျောက် သွားနေထိုင်သူတွေကို ချီးမွမ်းထိုက်သူတွေအဖြစ် ရှုမြင်ပြီး သူတို့အပေါ် ယေဟောဝါဘုရား ကောင်းချီးပေးဖို့ ဆုတောင်းပေးခဲ့ကြတယ်။
ယုံကြည်ခြင်းရှိရှိ လုပ်ဆောင်ခြင်းက ဘုရားသခင့်နှစ်သက်မှု ရရှိစေ
၁၅ ကျွန်တော်တို့ရဲ့ဘဝကို ယေဟောဝါဆီ ဆက်ကပ်အပ်နှံတုန်းက ဘာပဲဖြစ်ဖြစ် ဘုရားသခင့်အလိုတော် ထမ်းဆောင်ပါ့မယ်လို့ ကတိပေးခဲ့ကြတယ်။ အဲဒီကတိတည်ဖို့ အမြဲတော့ မလွယ်မှန်း ကျွန်တော်တို့ သိတယ်။ ဒါပေမဲ့ ကိုယ်မကြိုက်တာ တစ်ခုခုလုပ်ဖို့ တောင်းဆိုခံရတဲ့အခါ ဘယ်လို တုံ့ပြန်သလဲ။ ကိုယ့်ရဲ့ ခံစားချက်တွေကို အနိုင်ယူပြီး ဘုရားသခင်ကို လိုလိုလားလား နာခံမယ်ဆိုရင် ကျွန်တော်တို့ ကတိတည်မှန်း၊ ယုံကြည်ခြင်းရှိမှန်း သက်သေပြရာရောက်တယ်။ စွန့်လွှတ်အနစ်နာခံရတဲ့အတွက် ထိခိုက်နာကျင်မှုတွေ ရှိနိုင်တယ်။ ဒါပေမဲ့ ပြန်ရရှိတဲ့ ကောင်းချီးတွေက အဲဒါတွေထက် အဆပေါင်းများစွာ သာလွန်ပါတယ်။ (မာလ. ၃:၁၀) ယေဖသရဲ့သမီးအကြောင်း ဆက်ဆွေးနွေးကြစို့။ အဖေဖြစ်သူရဲ့ ကတိကို သူ ဘယ်လို တုံ့ပြန်ခဲ့သလဲ။
ဘုရားရေးရာ ရတနာ
နေဟမိကျမ်းမှ ပေါ်လွင်ချက်များ
၁၀:၃၄—လူတို့ထံမှ အဘယ်ကြောင့် ထင်းအလှူ တောင်းသနည်း။ မောရှေပညတ်တွင် ထင်းပူဇော်ရာယဇ် ပေးရမည်ဟု ပညတ်မထားပါ။ လိုအပ်လာသောကြောင့် ထိုသို့တောင်းဆိုရခြင်း ဖြစ်သည်။ ယဇ်ပလ္လင်ပေါ်တွင် ယဇ်များကို ပူဇော်ဖို့ ထင်းအတော်များများ လိုအပ်ခဲ့သည်။ ဣသရေလလူမျိုးမဟုတ်သော ဝတ်ပြုရာအိမ်တော်ကျွန်များဖြစ်သည့် နက်သနင်များ အလုံအလောက် ရှိပုံမရချေ။ ထို့ကြောင့် ထင်းအလုံအလောက် ရှိနေစေဖို့ မဲချခဲ့ကြရသည်။
ဩဂုတ် ၂၈–စက်တင်ဘာ ၃
ကျမ်းစာထဲက အဖိုးတန်ဘဏ္ဍာများ | နေဟမိ ၁၂–၁၃
“မိတ်ဆွေရွေးတဲ့အခါ ယေဟောဝါကို သစ္စာစောင့်သိကြောင်း ပြပါ”
it-1 ၉၅ ပိုဒ်. ၅
အမ္မုန်လူမျိုး
တောဘိကို ဗိမာန်တော်ဝင်းကနေ မောင်းထုတ်လိုက်ပြီးနောက် အမ္မုန်လူမျိုးနဲ့ မောဘလူမျိုး တစ်ယောက်မှ ဘုရားသခင့်လူမျိုး အစုအဝေးထဲ မပါရဆိုတဲ့ တရားဟောရာ ၂၃:၃-၆ ပါ ပညတ်ကို ဖတ်ရှုလိုက်နာခဲ့တယ်။ (နေ ၁၃:၁-၃) ကတိထားရာပြည်ကို သွားချိန်မှာ အမ္မုန်နဲ့ မောဘလူမျိုးတွေက အစ္စရေးတွေကို အကူအညီ မပေးခဲ့ကြလို့ အဲဒီပညတ်ကို လွန်ခဲ့တဲ့ အနှစ် ၁,၀၀၀ လောက်က ပြဋ္ဌာန်းခဲ့တာဖြစ်တယ်။ ဆိုလိုချင်တာက အမ္မုန်နဲ့ မောဘလူမျိုးတွေဟာ အစ္စရေးလူမျိုးရဲ့ တရားဝင်အဖွဲ့ဝင်ထဲ မပါနိုင်ဘူး၊ တရားဝင်အဖွဲ့သားတွေလို အခွင့်အရေး၊ အရိုက်အရာတွေ မရနိုင်ဘူးဆိုတဲ့ အဓိပ္ပာယ်ပါ။ အစ္စရေးတွေနဲ့ မပေါင်းဖော်၊ မနေထိုင်ဖို့ အဲဒီပညတ်က တားမြစ်နေတာ မဟုတ်ပါဘူး။ အမ္မုန်နဲ့ မောဘလူမျိုးထဲက တချို့ကတော့ ဘုရားကောင်းချီးပေးတဲ့ အစ္စရေးလူမျိုးနဲ့အတူ ပေါင်းသင်းနေထိုင်ခြင်းကနေ အကျိုးရခဲ့ကြတယ်။ အထက်မှာ ဖော်ပြခဲ့တဲ့အတိုင်း ဒါဝိဒ်ရဲ့ စစ်သည်ခေါင်းဆောင်အဝင် ဇေလက်နဲ့ မောဘအမျိုးသမီး ရုသတို့ရဲ့ ဖြစ်ရပ်ကိုကြည့်ပြီး သိနိုင်ပါတယ်။—ရု ၁:၄၊ ၁၆-၁၈။
သင်တို့သည် သန့်စင်ခြင်းခံရပြီ
၅ နေဟမိ ၁၃:၄-၉ ကိုဖတ်ပါ။ ကျွန်ုပ်တို့ရဲ့ ပတ်ဝန်းကျင်မှာ မသန့်ရှင်းတဲ့ သြဇာလွှမ်းမိုးမှုတွေ ရှိနေလို့ ဆက်သန့်ရှင်းနေဖို့ဆိုတာ မလွယ်ကူဘူး။ ကျမ်းစာမှာပါတဲ့ ဧလျာရှိပ်နဲ့ တောဘိတို့အကြောင်း စဉ်းစားကြည့်ပါ။ ဧလျာရှိပ်က ယဇ်ပုရောဟိတ်မင်း ဖြစ်တယ်၊ တောဘိက အမ္မုန်လူမျိုးဖြစ်ပြီး ပါရှားဘုရင်အတွက် အလုပ်လုပ်ပေးနေတဲ့ အရာရှိတစ်ယောက် ဖြစ်တယ်။ ယေရုရှလင်မြို့ရိုးကို နေဟမိ ပြန်တည်ဆောက်တုန်းက တောဘိနဲ့ သူ့အပေါင်းအသင်းတွေက တားဆီးခဲ့ကြတယ်။ (နေ. ၂:၁၀) အမ္မုန်လူမျိုးဟာ ဗိမာန်တော်ဝင်းထဲ ဝင်ခွင့်မရှိဘူး။ (တရား. ၂၃:၃) ဒါဆို ယဇ်ပုရောဟိတ်မင်းက ဘာဖြစ်လို့ တောဘိလိုလူကို ဗိမာန်တော် စားသောက်ခန်းထဲမှာ နေစရာ ပေးထားတာလဲ။
၆ အကြောင်းရင်း သုံးခုရှိတယ်။ ပထမ၊ ဧလျာရှိပ်ဟာ တောဘိရဲ့ မိတ်ဆွေဖြစ်တယ်။ ဒုတိယ၊ တောဘိနဲ့ သူ့ရဲ့သား ယောဟနန်ဟာ ဂျူးအမျိုးသမီးတွေနဲ့ လက်ထပ်ထားကြပြီး ဂျူးအတော်များများက တောဘိကို ကြည်ညိုလေးစားကြတယ်။ (နေ. ၆:၁၇-၁၉) တတိယ၊ ယဇ်ပုရောဟိတ်မင်းကြီး ဧလျာရှိပ်ရဲ့ မြေးတစ်ယောက်က သမ္ဘာလတ်ရဲ့သမီးနဲ့ အိမ်ထောင်ပြုထားတယ်။ သမ္ဘာလတ်ဟာ ရှမာရိမြို့ဝန်ဖြစ်ပြီး တောဘိနဲ့ အရမ်းရင်းနှီးတဲ့ မိတ်ဆွေတွေ ဖြစ်ကြတယ်။ (နေ. ၁၃:၂၈) ဒီဆက်ဆံရေးတွေကို ကြည့်ခြင်းအားဖြင့် ယဇ်ပုရောဟိတ်မင်း ဧလျာရှိပ်ဟာ ဘာကြောင့် မယုံကြည်သူ၊ ဆန့်ကျင်သူတစ်ယောက်ရဲ့ ဩဇာလွှမ်းမိုးမှုကို ခံနေရသလဲဆိုတာ နားလည်နိုင်တယ်။ ဒါပေမဲ့ နေဟမိဟာ တောဘိရဲ့ပရိဘောဂအားလုံးကို ဗိမာန်တော် စားသောက်ခန်းအပြင်ဘက် ထုတ်ပစ်ခြင်းအားဖြင့် ယေဟောဝါကို သစ္စာစောင့်သိကြောင်း ဖော်ပြခဲ့တယ်။
သစ္စာစောင့်သိမှု၏ စိန်ခေါ်ချက်ကို ရင်ဆိုင်ခြင်း
၆ ကျွန်ုပ်တို့သည် ယေဟောဝါ ဘုရားသခင်ကို သစ္စာစောင့်သိမည်ဆိုလျှင် ကိုယ်တော်၏ ရန်သူများနှင့် မိတ်ဖွဲ့မည်မဟုတ်။ ယင်းကြောင့် တပည့်တော် ယာကုပ်က “မတရားသောမေထုန်၌ မှီဝဲသော ယောက်ျားမိန်းမတို့၊ လောကီမိတ်သဟာယသည် ဘုရားသခင်နှင့် ဆန့်ကျင်ဘက်ဖြစ်သည်ကို မသိကြသလော။ ဤလောကနှင့် မိတ်သဟာယဖွဲ့လိုသောသူသည် ဘုရားသခင်၏ ရန်သူဖြစ်၏” ဟူ၍ ရေးခဲ့ရခြင်း ဖြစ်သည်။ (ယာကုပ် ၄:၄) “အိုထာဝရဘုရား၊ ကိုယ်တော်ကို မုန်းသောသူတို့ကို အကျွန်ုပ် မုန်းပါသည် မဟုတ်လော။ အာဏာတော်ကို ဆန်သောသူတို့ကို အကျွန်ုပ် ရွံရှာပါသည် မဟုတ်လော။ ထိုသူတို့ကို စိတ်နှလုံးအကြွင်းမဲ့ မုန်းပါ၏။ ကိုယ်ရန်သူကဲ့သို့ မှတ်ပါ၏” ဟု ဒါဝိဒ်မင်းကြီး ပြောဆိုစဉ်က သူထင်ရှားပြခဲ့သော သစ္စာစောင့်သိခြင်းသဘောကို ကျွန်ုပ်တို့ တင်ပြလိုကြသည်။ (ဆာလံ ၁၃၉:၂၁၊ ၂၂) ကျွန်ုပ်တို့သည် တမင်ပြစ်မှားသူများနှင့် အသွင်တူညီမှု တစ်ခုမျှမရှိသောကြောင့် သူတို့နှင့် မပေါင်းသင်းလိုကြပါ။ ဘုရားသခင်ကို သစ္စာစောင့်သိခြင်းက ယေဟောဝါ၏ ရန်သူများနှင့် ကိုယ်တိုင်ကိုယ်ကျသော်လည်းကောင်း၊ ရုပ်မြင်သံကြားမှတစ်ဆင့်သော်လည်းကောင်း မပေါင်းသင်းဘဲ နေစေမည် မဟုတ်ပေလော။
ဘုရားရေးရာ ရတနာ
it-2 ၄၅၂ ပိုဒ်. ၉
တေးဂီတ
သီချင်းသည်တွေအကြောင်း ဖော်ပြထားတဲ့ ကျမ်းချက်တွေကို ကြည့်ရင်၊ သီချင်းဆိုတဲ့ တာဝန်မှာ အပြည့်အဝမြှုပ်နှံနိုင်ဖို့ သူတို့ကို တခြားလေဝိသားတွေ ထမ်းဆောင်ရတဲ့ “တာဝန်တွေကနေ ကင်းလွတ်ခွင့်” ပေးထားတာကို ကြည့်ရင် ဗိမာန်တော်မှာ သီဆိုရတဲ့တာဝန်ဟာ အရေးကြီးမှန်း ထင်ရှားပါတယ်။ (၁ရ ၉:၃၃) ဗာဗုလုန်ကနေ ပြန်လာတဲ့အခါလည်း သူတို့ကို အထူးလေဝိအုပ်စုအဖြစ် ဆက်လက်သတ်မှတ်ပြီး သီးသန့်စာရင်းပြုစုတယ်။ (ဧဇ ၂:၄၀၊ ၄၁) ပါရှားဘုရင် အာတဇေရဇ် (လောန်ဂင်မနပ်စ်) ကတောင် တခြားအထူးအုပ်စုတွေနဲ့အတူ သီချင်းသည်တွေကို “လူခွန်၊ ပစ္စည်းခွန်၊ ဖြတ်သန်းခ” ကနေ ကင်းလွတ်ခွင့်ပေးခဲ့တယ်။ (ဧဇ ၇:၂၄) နောက်ပိုင်း ဘုရင်က “သီချင်းသည်တွေ လိုအပ်တဲ့ရိက္ခာကို နေ့စဉ်ပေးရမယ်” ဆိုပြီး အမိန့်တော် ထုတ်ပြန်ခဲ့တယ်။ ဘုရင်အာတဇေရဇ် အမိန့်တော် ထုတ်ပြန်တယ်လို့ ဆိုထားပေမဲ့ ဘုရင်အပ်နှင်းတဲ့ အခွင့်အာဏာနဲ့ ဧဇရ အမိန့်ထုတ်ပြန်ခဲ့တာ ဖြစ်နိုင်တယ်။ (နေ ၁၁:၂၃။ ဧဇ ၇:၁၈-၂၆) ဒါကြောင့် လေဝိအမျိုးသားတွေ ဖြစ်ပါလျက်နဲ့ ကျမ်းစာက သီချင်းသည်တွေကို “သီချင်းသည်တွေ၊ လေဝိအမျိုးသားတွေ” လို့ ခေါ်ဆိုပြီး အထူးအုပ်စုအဖြစ် ရည်ညွှန်းခဲ့တာပါ။—နေ ၇:၁။ ၁၃:၁၀။