အာဒံနဲ့ဧဝဟာ ဧဒင်ဥယျာဉ်ကနေ ထွက်လာပြီးနောက်ပိုင်း ကလေးတွေ ရှိလာတယ်။ သားကြီး ကာအိနက စိုက်ပျိုးသူ၊ သားငယ် အာဗေလက သိုးထိန်း ဖြစ်လာတယ်။

တစ်နေ့မှာ၊ ကာအိနနဲ့ အာဗေလဟာ ယေဟောဝါကို ပူဇော်ကြတယ်။ ပူဇော်တယ်ဆိုတာ ဘာလဲ သိလား။ ဘုရားကို အကောင်းဆုံး လက်ဆောင်ပေးတာပဲ။ ယေဟောဝါက အာဗေလ ပူဇော်တာကို လက်ခံတယ်၊ ကာအိန ပူဇော်တာကိုတော့ လက်မခံဘူး။ ဒါကြောင့် ကာအိန အရမ်းဒေါသထွက်သွားတယ်။ ဒေါသကြောင့် အမှားလုပ်မိနိုင်တယ်လို့ ယေဟောဝါ သတိပေးပေမဲ့ သူ နားမထောင်ဘူး။

ကာအိနက အာဗေလကို ‘လယ်ထဲသွားရအောင်’ လို့ ပြောတယ်။ လယ်ထဲမှာ သူတို့နှစ်ယောက်တည်း ရှိတဲ့အခါ အာဗေလကို ရိုက်သတ်လိုက်တယ်။ ဒီတော့ ယေဟောဝါ ဘာလုပ်သလဲ။ ယေဟောဝါက ကာအိနကို ဟိုးအဝေးကြီး နှင်ထုတ်လိုက်တယ်။ ကာအိန ဘယ်တော့မှ ပြန်လာရတော့မှာ မဟုတ်ဘူး။

ဒီအဖြစ်အပျက်ကနေ ဘာသင်ခန်းစာရသလဲ။ ကိုယ်ဖြစ်ချင်သလို မဖြစ်တဲ့အခါ ဒေါသထွက်လာနိုင်တယ်။ အဲဒီဒေါသကို မထိန်းနိုင်မှန်း သိရင် ဒါမှမဟုတ် သတိပေးသူရှိရင် ချက်ချင်းပြုပြင်ပြီး ထိန်းချုပ်ပါ။ မဟုတ်ရင် အမှားလုပ်မိလိမ့်မယ်။

အာဗေလက ယေဟောဝါကို ချစ်တယ်၊ မှန်ရာကို လုပ်တယ်။ ဒါကြောင့် ယေဟောဝါက သူ့ကို အမြဲ သတိရနေမှာ။ တစ်ကမ္ဘာလုံး ပရဒိသု ဖြစ်လာတဲ့အခါ အာဗေလကို ဘုရားသခင် အသက် ပြန်ရှင်လာစေမှာ။

နောက်ပိုင်း၊ ကမ္ဘာမြေကြီးပေါ်မှာ လူတွေ အများကြီး ရှိလာတယ်။ လူအများစုက ဆိုးတယ်။ ကောင်းကင်တမန် တချို့တောင် ဆိုးလာတယ်။ သူတို့နေတဲ့ ကောင်းကင်ကနေ မြေကြီးပေါ် ဆင်းလာကြတယ်။ ဘာကြောင့်လဲ သိလား။ လူယောင်ဆောင်ပြီး မိန်းမတွေ ယူဖို့ဖြစ်တယ်။

ကောင်းကင်တမန်တွေက မိန်းမတွေယူပြီး သားတွေ မွေးလာတယ်။ အဲဒီသားတွေဟာ အရမ်းထွားကြိုင်း သန်မာပြီး လူတွေကို ဗိုလ်ကျတယ်၊ ဒုက္ခပေးတယ်။ ယေဟောဝါက ဒါကို ဆက်ခွင့်မပြုနိုင်လို့ လူဆိုးတွေကို ရေလွှမ်းမိုးပြီး ဖျက်ဆီးပစ်ဖို့ ဆုံးဖြတ်တယ်။

လူတစ်ယောက်ကတော့ အဲဒီလူဆိုးတွေနဲ့ မတူဘူး။ ယေဟောဝါကို ချစ်တယ်။ သူ့နာမည်က နောဧတဲ့။ သူ့မှာ မိန်းမနဲ့ သားသုံးယောက်ရှိတယ်။ သားတွေဖြစ်တဲ့ ရှေမ၊ ဟာမ၊ ယာဖက်တို့မှာလည်း မိန်းမ ရှိတယ်။ ယေဟောဝါက နောဧကို သင်္ဘောအကြီးကြီးတစ်စင်း ဆောက်ခိုင်းတယ်။ အဲဒီသင်္ဘောက သေတ္တာကြီးနဲ့တူပြီး ရေပေါ်,ပေါ်နိုင်တယ်။ ဒါမှလည်း သူတို့မိသားစုဟာ ရေလွှမ်းမိုးဘေးမှာ မသေဘဲ အသက်ဆက်ရှင်နိုင်မှာ။ သင်္ဘောကြီးထဲ တိရစ္ဆာန်တွေကိုလည်း သွင်းခိုင်းတယ်။

နောဧက သင်္ဘောကို ချက်ချင်း စဆောက်တယ်။ နောဧမိသားစု သင်္ဘောဆောက်တာ အနှစ် ၅၀ လောက်ကြာတယ်။ ယေဟောဝါပြောတဲ့ပုံစံအတိုင်း အတိအကျ ဆောက်ကြတာ။ ဆောက်နေရင်းလည်း ရေလွှမ်းမိုးမယ့်အကြောင်း လူတွေကို နောဧ သတိပေးတယ်။ တစ်ယောက်မှ နားမထောင်ကြဘူး။

နောက်ဆုံး၊ သင်္ဘောထဲ ဝင်ရမယ့်အချိန် ရောက်လာပြီ။ ဘာဆက်ဖြစ်သလဲဆိုတာ ကြည့်ရအောင်။