မေတ္တာနှင့် ကောင်းသောအလုပ်များအတွက် နှိုးဆော်—မည်သို့အားဖြင့်နည်း

“မေတ္တာနှင့် ကောင်းသောအလုပ်များအတွက် တိုက်တွန်းနှိုးဆော်ရန် အချင်းချင်းတို့ကို ထောက်စာကြည့်ရှုကြစို့။ . . . အချင်းချင်းအားပေးကြလော့၊ နေ့ရက်ကာလနီးလာသည်ကို သင်တို့သိမြင်သည်နှင့်အမျှ ယင်းသို့သာ၍ပြုကြလော့။” —ဟေဗြဲ ၁၀:၂၄၊ ၂၅၊ ကဘ။

၁၊ ၂။ (က) ကနဦးခရစ်ယာန်များသည် အတူတကွစည်းဝေးခြင်းတွင် သက်သာမှုနှင့် အားပေးမှုရယူရန် အဘယ်ကြောင့်အရေးကြီးသနည်း။ (ခ) အတူတကွစည်းဝေးရန်လိုအပ်ကြောင်းကို ပေါလု၏ မည်သည့်သြဝါဒက ဖော်ပြသနည်း။

ပိတ်ထားသောတံခါးနောက်ကွယ်တွင် စုပြုံလျက် သူတို့တိတ်တဆိတ်တွေ့ဆုံကြသည်။ အပြင်ဘက်နေရာအနှံ့တွင် အန္တရာယ်က ချောင်းမြောင်းစောင့်ဆိုင်းနေသည်။ သူတို့၏ခေါင်းဆောင်ယေရှုသည် လူအများရှေ့သေဒဏ်စီရင်ခံရပြီးခါစဖြစ်ကာ မိမိ၏နောက်တော်လိုက်များသည် မိမိထက်သာသောအခြေအနေဖြင့် ဆက်ဆံခြင်းခံရမည်မဟုတ်ကြောင်း ကိုယ်တော်သတိပေးခဲ့သည်။ (ယောဟန် ၁၅:၂၀; ၂၀:၁၉) သို့သော် သူတို့ချစ်သောယေရှုအကြောင်း တိုးတိုးတိတ်တိတ်ပြောဆိုနေစဉ် အတူတကွရှိနေကြခြင်းက ယုတ်စွအဆုံး သူတို့အား ပိုမိုလုံခြုံသည်ဟုခံစားစေခဲ့ပေမည်။

^၂ နှစ်များကုန်လွန်လာသည်နှင့်အမျှ ခရစ်ယာန်များသည် စုံစမ်းခြင်းနှင့် နှိပ်စက်ညှဉ်းပန်းခြင်းအမျိုးမျိုးကို ရင်ဆိုင်ကြရသည်။ ကနဦးတပည့်တော်များနည်းတူ သူတို့လည်း အတူတကွစည်းဝေးကြခြင်းအားဖြင့် သက်သာမှုနှင့်အားပေးမှုကိုရယူကြသည်။ ထို့ကြောင့် ဟေဗြဲ ၁၀:၂၄၊ ၂၅ (ကဘ) တွင် တမန်တော်ပေါလုဤသို့ရေးခဲ့သည်– “မေတ္တာနှင့် ကောင်းသောအလုပ်များအတွက် တိုက်တွန်းနှိုးဆော်ရန် အချင်းချင်းတို့ကို ထောက်စာကြည့်ရှုကြစို့။ လူအချို့ထုံးစံရှိသည်အတိုင်း အတူတကွစုဝေးခြင်းကို မရှောင်လွဲဘဲ အချင်းချင်းအားပေးကြလော့၊ နေ့ရက်ကာလနီးလာသည်ကို သင်တို့သိမြင်သည်နှင့်အမျှ ယင်းသို့သာ၍ပြုကြလော့။”

၃။ ဟေဗြဲ ၁၀:၂၄၊ ၂၅ သည် ခရစ်ယာန်များ အတူတကွစည်းဝေးကြရန် အမိန့်တစ်ခုမျှသာမဟုတ်ကြောင်း အဘယ်ကြောင့်ပြောနိုင်သနည်း။

^၃ ထိုစကားများသည် အတူတကွစည်းဝေးခြင်းကို ဆက်၍ပြုနေကြရန် အမိန့်တစ်ခုမျှသာမဟုတ်ပါ။ ယင်းတို့သည် ခရစ်ယာန်အစည်းအဝေးအားလုံးအတွက်—အမှန်အားဖြင့် ခရစ်ယာန်များ အတူတကွပေါင်းသင်းသော အခါတိုင်းအတွက် မြင့်မြတ်သော မှုတ်သွင်းခံစံနှုန်းတစ်ခုကိုပေးသည်။ ယေဟောဝါ၏နေ့တော်ကြီးနီးကြောင်း တစ်ခါနှင့်မျှမတူအောင် ကျွန်ုပ်တို့ရှင်းလင်းစွာသိမြင်သော ယခုအချိန်တွင် ဤဆိုးညစ်သောအစီအစဉ်စနစ်၏ ဖိစီးမှုများနှင့် အန္တရာယ်များက ကျွန်ုပ်တို့၏အစည်းအဝေးများကို လုံခြုံမှုရှိသောအရပ်၊ အားလုံးအတွက် ခံနိုင်ရည်နှင့် အားပေးရာအရင်းအမြစ် မလွဲမရှောင်သာဖြစ်စေခဲ့ပြီ။ ယင်းသို့မလွဲဧကန်ဖြစ်အောင် ကျွန်ုပ်တို့ဘာလုပ်နိုင်သနည်း။ ပေါလု၏စကားများကို ဂရုတစိုက်စစ်ဆေးကြည့်ပြီး အဓိကမေးခွန်းသုံးခုကို မေးကြည့်ကြစို့– “အချင်းချင်းတို့ကို ထောက်စာကြည့်ရှု” ခြင်းမည်သည် အဘယ်နည်း။ ‘မေတ္တာနှင့်ကောင်းသောအကျင့်အတွက် အချင်းချင်းတို့ကို တိုက်တွန်းနှိုးဆော်’ ခြင်းမည်သည် အဘယ်နည်း။ နောက်ဆုံးအနေနှင့် ဤခက်ခဲကျပ်တည်းသောအချိန်တွင် မည်သို့ ‘အချင်းချင်းအားပေး’ နိုင်မည်နည်း။

“အချင်းချင်းတို့ကို ထောက်စာကြည့်ရှု”

၄။ “အချင်းချင်းထောက်စာကြည့်ရှု” ရန်ဟူသည် အဘယ်နည်း။

^၄ “အချင်းချင်းတို့ကို ထောက်စာကြည့်ရှု” ရန် ပေါလုတိုက်တွန်းသောအခါ “သိမြင်သည်” ဟူသော သာမန်အသုံးအနှုန်း၏ ပိုမိုလေးနက်သောပုံစံဖြင့်ဖြစ်သည့် ဂရိဝေါဟာရ ကာတာနိုအဲအို ကိုအသုံးပြုထားသည်။ “စိတ်တစ်ခုလုံးကို ဦးတည်ချက်တစ်ခုဆီသို့ လမ်းကြောင်းပေးသည်” ဟုအဓိပ္ပာယ်ရကြောင်း Theological Dictiontary of the New Testament ကဆိုသည်။ ဒဗလျူ. အီး. ဗိုင်း၏အဆိုအရ “အပြည့်အဝနားလည်သည်၊ နှိုက်နှိုက်ချွတ်ချွတ်ဆင်ခြင်သုံးသပ်သည်” ဟုလည်း အဓိပ္ပာယ်ရနိုင်သည်။ ထို့ကြောင့် ခရစ်ယာန်များသည် “အချင်းချင်းတို့ကိုထောက်စာကြည့်ရှု” သောအခါ အပေါ်ယံလောက်ကိုသာရှုမြင်ခြင်းမဟုတ်ဘဲ စိတ်ပိုင်းဆိုင်ရာအရည်အသွေးအားလုံးကို အသုံးပြုပြီး ပိုမိုနက်ရှိုင်းစွာရှုမြင်ရန် ကြိုးစားကြသည်။—ဟေဗြဲ ၃:၁ နှိုင်းယှဉ်။

၅။ ဖုံးကွယ်နေနိုင်သော လူတစ်ဦး၏ အသွင်အပြင်အချို့ကား အဘယ်နည်း။ ယင်းတို့ကို အဘယ်ကြောင့် ထည့်စဉ်းစားသင့်သနည်း။

^၅ ကျွန်ုပ်တို့သတိရရန်မှာ လူတစ်ဦး၏ အပြင်ပန်းသဏ္ဌာန်၊ အကျင့်၊ ဥပဓိရုပ်တို့ထက် ထိုလူပုဂ္ဂိုလ်က ပို၍အရေးကြီးသည်။ (၁ ဓမ္မရာဇဝင် ၁၆:၇) အေးဆေးသော အပြင်ပန်းရုပ်အသွင်က အတွင်းခံစားမှုများ သို့မဟုတ် နှစ်လို့ဖွယ်စိတ်နေသဘောထားကို ဖုံးအုပ်နေတတ်သည်။ ဘဝနောက်ခံကလည်း များစွာခြားနားမှုရှိစေသည်။ အချို့တို့သည် ဘဝတွင် တုန်လှုပ်ချောက်ချားဖွယ်တွေ့ကြုံမှုများကို ကျော်ဖြတ်လာရသည်; အချို့တို့က ကျွန်ုပ်တို့စဉ်းစား၍မရနိုင်သော အခြေအနေများကို ယခုခံရပ်နေကြရသည်။ လူတစ်ဦး၏နောက်ခံ သို့မဟုတ် အခြေအနေများကို ကျွန်ုပ်တို့ပိုမိုသိရှိလာသောအခါ ညီအစ်ကို သို့မဟုတ် ညီအစ်မတစ်ဦး၏ ဉာဉ်ဆိုးအချို့ကြောင့် ကျွန်ုပ်တို့ဖြစ်ရသောဒေါသများ အရည်ပျော်ခဲ့ရသည့်အခါပေါင်း မနည်းတော့ပေ။—သု. ၁၉:၁၁။

၆။ တစ်ဦးကိုတစ်ဦး ပိုမိုသိကျွမ်းလာအောင် ပြုနိုင်သည့်နည်းအချို့ကား အဘယ်နည်း။ မည်သည့်အကျိုးဖြစ်ထွန်းမည်နည်း။

^၆ ယင်းက ဖိတ်ခေါ်မခံရဘဲ အချင်းချင်းတို့၏ ကိုယ်ရေးကိုယ်တာကိစ္စများကို ဝင်ရောက်စွက်ဖက်ရမည်ဟု မဆိုလိုပေ။ (၁ သက်သာလောနိတ် ၄:၁၁) သို့တစေ အချင်းချင်းတို့အား ပုဂ္ဂိုလ်ရေးစိတ်ဝင်စားမှုကို ကျွန်ုပ်တို့တင်ပြနိုင်သည်မှာ သေချာသည်။ ယင်းတွင် ဘုရားသခင့်နိုင်ငံတော်ခန်းမ၌ နှုတ်ဆက်ခြင်းမျှသာမဟုတ်ပါ။ အစည်းအဝေးမစတင်မီ သို့မဟုတ် ပြီးသောအခါ သင်သာ၍ကောင်းစွာသိကျွမ်းလိုသူတစ်ဦးအား ရွေးချယ်ပြီး မိနစ်အနည်းငယ်စကားပြောပါလေ။ အထွေအထူးမဟုတ်သော အဆာပြေအစားအသောက်အတွက် မိတ်ဆွေတစ်ဦးနှစ်ဦးကို သင့်အိမ်သို့ဖိတ်ခေါ်ခြင်းအားဖြင့် “ဧည့်ဝတ်ကျေပွန်ခြင်းလမ်းစဉ်ကိုလိုက်လျှောက်ခြင်း” သည် သာ၍အကျိုးရှိပေသည်။ (ရောမ ၁၂:၁၃၊ ကဘ) စိတ်ဝင်စားမှုတင်ပြပါ။ နားထောင်ပါ။ ကိုယ်စီ ယေဟောဝါအား မည်သို့သိရှိလာပြီး ချစ်ခင်လာပုံကို မေးရုံမျှဖြင့် သူ့အကြောင်းကို အတော်များများသိလာနိုင်သည်။ တစ်အိမ်မှတစ်အိမ်ဓမ္မအမှုဆောင်ခြင်းတွင် အတူတကွပါဝင်ခြင်းအားဖြင့်လည်း ပိုမိုသိရှိလာနိုင်သည်။ ဤနည်းများဖြင့် တစ်ဦးကိုတစ်ဦး ထောက်စာကြည့်ရှုခြင်းက စစ်မှန်သော သနားစာနာတတ်ခြင်း သို့မဟုတ် ဝေမျှခံစားတတ်ခြင်းတိုးပွားစေရန် ကျွန်ုပ်တို့အား အကူအညီပေးသည်။—ဖိလိပ္ပိ ၂:၄; ၁ ပေတရု ၃:၈။

‘အချင်းချင်းတိုက်တွန်းနှိုးဆော်ကြလော့’

၇။ (က) ယေရှု၏သွန်သင်ခြင်းသည် လူများအပေါ် မည်သို့အကျိုးသက်ရောက်သနည်း။ (ခ) ကိုယ်တော့်သွန်သင်ခြင်းကို အလွန်အားပါစေသောအရာကား အဘယ်နည်း။

^၇ ကျွန်ုပ်တို့ တစ်ယောက်ကိုတစ်ယောက် ထောက်စာကြည့်ရှုလျှင် လက်တွေ့လုပ်ဆောင်ခြင်းအလို့ငှာ အချင်းချင်း တိုက်တွန်းနှိုးဆော်ရန်၊ အားပေးရန် ကျွန်ုပ်တို့အား ကောင်းစွာအသင့်ပြင်ပေးရာရောက်သည်။ အထူးသဖြင့် ခရစ်ယာန်အကြီးအကဲများသည် ဤကိစ္စတွင် အဓိကကဏ္ဍမှပါဝင်သည်။ လူအများရှေ့ယေရှုစကားပြောဆိုသော အချိန်တစ်ချိန်နှင့်ပတ်သက်၍ ကျွန်ုပ်တို့ဤသို့ဖတ်ရသည်– “ထိုဒေသနာတော်ကို ယေရှုဟောတော်မူသည်အဆုံး၌ ပရိသတ်အပေါင်းတို့သည် ဆုံးမသြဝါဒပေးတော်မူခြင်းကို အလွန်အံ့သြကြ၏။” (မဿဲ ၇:၂၈) အခြားအခြေအနေတစ်ခုတွင် ကိုယ်တော်အားဖမ်းဆီးရန် စေလွှတ်ခံရသော စစ်သားများပင် ကိုယ်တော့်ထံမှထွက်သွားကြပြီး ဤသို့ပြောကြသည်– “ထိုသူဟောပြောသကဲ့သို့ အဘယ်သူမျှမဟောစဖူးပါ။” (ယောဟန် ၇:၄၆) ယေရှု၏သွန်သင်ခြင်းကို ထိုမျှအားပါစေသောအရာကား အဘယ်နည်း။ စိတ်လှုပ်ရှားစရာများကို ကိုယ်တော်တင်ပြခဲ့၍လော။ မဟုတ်ပါ; ဣန္ဒြေသိက္ခာရှိရှိ ယေရှုဟောပြောခဲ့သည်။ သို့သော် မိမိကိုနားထောင်သူများ၏ နှလုံးကို ထိမိရန် ကိုယ်တော်အမြဲရည်ရွယ်တော်မူသည်။ လူများကို ထောက်စာကြည့်ရှု သောကြောင့် သူတို့အားမည်သို့လှုံ့ဆော်ရမည်ကို ကိုယ်တော်သိတော်မူသည်။ နေ့စဉ်အသက်တာဖြစ်ပျက်ရာများကို ထင်ဟပ်သည့် ကွက်ကွက်ကွင်းကွင်းမြင်သာသော၊ ရှင်းလင်းသော ပုံဥပမာများကို ကိုယ်တော်သုံးသည်။ (မဿဲ ၁၃:၃၄) အလားတူ ကျွန်ုပ်တို့၏အစည်းအဝေးများတွင် တာဝန်ထမ်းဆောင်နေသူများလည်း လှုံ့ဆော်မှုပေးသော လှိုက်လှိုက်လှဲလှဲနှင့်အားတက်သရော တင်ပြချက်များအားဖြင့် ယေရှုကိုတုပသင့်သည်။ ယေရှုနည်းတူ ကျွန်ုပ်တို့လည်း မိမိပရိသတ်နှင့်ဆီလျော်ပြီး သူတို့၏နှလုံးကိုထိမိသော ပုံဥပမာများကိုရှာဖွေရန် အာရုံစိုက်နိုင်သည်။

၈။ ယေရှုသည် ပုံဥပမာအားဖြင့် မည်သို့တိုက်တွန်းနှိုးဆော်သနည်း။ ဤကိစ္စနှင့်ပတ်သက်၍ ကိုယ်တော်အား ကျွန်ုပ်တို့မည်သို့တုပနိုင်သနည်း။

^၈ ဘုရားသခင်ကိုဝတ်ပြုရာတွင် ကျွန်ုပ်တို့အားလုံးသည် ပုံနမူနာအားဖြင့် အချင်းချင်းတိုက်တွန်းနှိုးဆော်နိုင်သည်။ ယေရှုသည် မိမိကိုနားထောင်သူများအား တိုက်တွန်းနှိုးဆော်ခဲ့သည်မှာ သေချာသည်။ ခရစ်ယာန်ဓမ္မအမှုကို ကိုယ်တော်ချစ်မြတ်နိုးပြီး ဓမ္မအမှုကို ချီးမြှင့်ခဲ့သည်။ ယင်းသည် မိမိအတွက် အစာကဲ့သို့ဖြစ်သည်ဟု မိန့်တော်မူခဲ့သည်။ (ယောဟန် ၄:၃၄; ရောမ ၁၁:၁၃) ယင်းသို့သော် စိတ်အားထက်သန်မှုသည် ကူးစက်တတ်သည်။ ဓမ္မအမှုတွင် သင့်ရွှင်လန်းမှုကို အလားတူထင်ရှားစေမည်လော။ ဝါကြွားသည့်လေသံပြုခြင်းကို ရှောင်ပြီး တစ်ချိန်တည်းတွင် အသင်းတော်ရှိ အခြားသူများအား မိမိ၏တွေ့ကြုံမှုကောင်းများကို ဝေမျှပါ။ သင်နှင့်အတူတွဲလုပ်ရန် အခြားသူများကို ဖိတ်ခေါ်သည့်အခါ ကျွန်ုပ်တို့၏ဖန်ဆင်းရှင်ယေဟောဝါအကြောင်း သူတစ်ပါးကိုပြောပြရာတွင် စစ်မှန်သောရွှင်လန်းမှုကိုရရှိရန် သူတို့အားအကူအညီပေးနိုင်မည်လောဟူသည်ကို သုံးသပ်ပါ။—သု. ၂၅:၂၅။

၉။ (က) အခြားသူများကို တိုက်တွန်းနှိုးဆော်ရာတွင် ကျွန်ုပ်တို့ရှောင်ရှားလိုမည်ဖြစ်သည့် နည်းလမ်းအချို့ကား အဘယ်နည်း။ အဘယ်ကြောင့်နည်း။ (ခ) ယေဟောဝါ၏လုပ်ငန်းတော်တွင် ကျွန်ုပ်တို့ကိုယ်ကိုပေးဆက်ရန် မည်သည့်အရာက လှုံ့ဆော်ပေးသင့်သနည်း။

^၉ အခြားသူများကို မှားယွင်းသည့်နည်းဖြင့် တိုက်တွန်းနှိုးဆော်ခြင်းမပြုမိရန် သတိပြုပါ။ ဥပမာ၊ သူတို့များစွာမလုပ်ဆောင်သဖြင့် မိမိကိုယ်ကိုအပြစ်တင်စရာဖြစ်အောင် ကျွန်ုပ်တို့အမှတ်တမဲ့ပြုမိနိုင်သည်။ သိသာထင်ရှားစွာ တက်ကြွလှုပ်ရှားနေသော အခြားသူများနှင့် မလိုလားအပ်စွာ သူတို့ကိုနှိုင်းယှဉ်ခြင်းအားဖြင့် မရည်ရွယ်ဘဲ သူတို့ကိုအရှက်ရစေနိုင်သည် သို့မဟုတ် ကျွန်ုပ်တို့သည် တင်းကျပ်သောစံနှုန်းများကို ချမှတ်ခြင်းအားဖြင့် ယင်းစံမမီသောသူတို့အား သိက္ခာချမိနိုင်သည်။ ထိုနည်းများသည် အချို့သူတို့အား ခေတ္တအားဖြင့် လုပ်ဆောင်ရန် လှုံ့ဆော်နိုင်သော်လည်း ပေါလုက ‘အပြစ်တင်ရန် နှင့် ကောင်းသောအကျင့်အတွက် တိုက်တွန်းနှိုးဆော်’ ဟု မရေးခဲ့ပါ။ မေတ္တာ ရှိရန် တိုက်တွန်းနှိုးဆော်မှသာ ကောင်းသောရည်ရွယ်ချက်ဖြင့် လုပ်ဆောင်လာမည်။ မျှော်လင့်ထားသည်များကို မပြည့်မီလှပါက အသင်းတော်ရှိအခြားသူများ မိမိကိုမည်သို့ထင်မည်ဟူသောအတွေးဖြင့် မည်သူတစ်ဦးတစ်ယောက်မျှလှုံ့ဆော်မခံသင့်ချေ။—၂ ကောရိန္သု ၉:၆၊ ၇ နှိုင်းယှဉ်။

၁၀။ အခြားသူတို့၏ယုံကြည်ခြင်းကို ကျွန်ုပ်တို့အစိုးမရကြောင်း အဘယ်ကြောင့်သတိရသင့်သနည်း။

^၁၀ အချင်းချင်းတိုက်တွန်းနှိုးဆော်ရမည်ဟူသည် အချင်းချင်းကို ထိန်းချုပ်ရမည်ဟု မဆိုလိုပါ။ တမန်တော်ပေါလုသည် ကြီးမားသောဘုရားပေးအခွင့်အာဏာရှိသော်လည်း ကောရိန္သုအသင်းတော်အား ဤသို့နှိမ့်ချစွာ သတိပေးခဲ့သည်– ‘ငါတို့သည် သင်တို့၏ယုံကြည်ခြင်းကို အစိုးရသူများမဟုတ်။’ (၂ ကောရိန္သု ၁:၂၄) ယေဟောဝါ၏လုပ်ငန်းတော်တွင် အခြားသူများ မည်၍မည်မျှလုပ်ရမည်ကို ဆုံးဖြတ်ခြင်း၊ ကိုယ်တိုင်ဆုံးဖြတ်ရမည့် အခြားကိစ္စရပ်များတွင် သူတို့၏သြတ္တပ္ပစိတ်ကို ထိန်းချုပ်ခြင်းသည် ကျွန်ုပ်တို့အလုပ်မဟုတ်ကြောင်း ပေါလုနည်းတူ နှိမ့်ချစွာဖြင့် ကျွန်ုပ်တို့သိနားလည်လျှင် ကျွန်ုပ်တို့သည် “လွန်ကျူးစွာဖြောင့်မတ်ခြင်း”၊ ရွှင်လန်းမှုကင်းမဲ့ခြင်း၊ တင်းကျပ်ခြင်း၊ အပြုသဘောမရှိခြင်း သို့မဟုတ် စာအုပ်ကြီးအတိုင်းပြုမူခြင်းတို့ကို ရှောင်မည်။ (ဒေသနာ ၇:၁၆) ထိုကြန်အင်လက္ခဏာများသည် တိုက်တွန်းနှိုးဆော်ခြင်းကို မဖြစ်စေပါ; ယင်းတို့သည် ဖိနှိပ်မှုကိုဖြစ်စေသည်။

၁၁။ ဣသရေလလူမျိုးအချိန်က တဲတော်ဆောက်လုပ်ရေးအတွက် အလှူပေးခြင်းကို မည်သည့်အရာက လှုံ့ဆော်သနည်း။ ယင်းသည် ကျွန်ုပ်တို့ခေတ်တွင် မည်သို့မှန်ကန်သနည်း။

^၁၁ တဲတော်ဆောက်လုပ်ခြင်းအတွက် အလှူဝတ္ထုများလိုအပ်ချိန်က ရှေးဣသရေလတို့၏စိတ်နေသဘောထားမျိုးဖြင့် ယေဟောဝါ၏လုပ်ငန်းတော်တွင် ကျွန်ုပ်တို့အစွမ်းကုန်ကြိုးစားလိုကြသည်။ ထွက်မြောက်ရာ ၃၅:၂၁ တွင် ဤသို့ဖတ်ရသည်– “မိမိစိတ်နှလုံးနှိုးဆော်သောသူ၊ ကြည်ညိုသော စေတနာစိတ်သဘောရှိသော သူအပေါင်းတို့သည် ပရိသတ်စည်းဝေးရာတဲတော်လုပ်ဖို့လည်းကောင်း၊ အမှုတော်ထမ်းစရာဖို့လည်းကောင်း၊ သန့်ရှင်းသောအဝတ်ကိုလည်းကောင်း ထာဝရဘုရားအားလှူသော အလှူကိုဆောင်လျက် လာကြ၏။” သူတို့သည် ပြင်ပမှ လှုံ့ဆော်ခံရခြင်းမဟုတ်ဘဲ အတွင်းမှ၊ စိတ်နှလုံးမှ လှုံ့ဆော်ခံရခြင်းဖြစ်သည်။ အမှန်အားဖြင့် ဟေဗြဲစာသားအတိုင်း ဖတ်ရသည်မှာ “စိတ်နှလုံး၏ မြှင့်တင်ခြင်းခံရ သူတိုင်း” ယင်းသို့ပေးလှူကြသည်ဟူ၍ဖြစ်သည်။ (ကျွန်ုပ်တို့စာလုံးစောင်းထား။) ထိုထက်ပို၍ ကျွန်ုပ်တို့သည် အတူတကွရှိနေကြသော မည်သည့်အခါတွင်မဆို အချင်းချင်းတို့၏စိတ်နှလုံးကို မြှင့်တင်ပေးရန် ကြိုးစားကြစို့။ ကျန်သည့်အရာကို ယေဟောဝါ၏ဝိညာဉ်တော်က လုပ်ဆောင်ပေးနိုင်သည်။

‘အချင်းချင်းကိုအားပေး’

၁၂။ (က) “အားပေး” ဟုပြန်ဆိုသော ဂရိဝေါဟာရ၏ အဓိပ္ပာယ်အချို့ကား အဘယ်နည်း။ (ခ) ယောဘ၏အဖော်များသည် သူ့ကိုအားပေးရန် မည်သို့ပျက်ကွက်ကြသနည်း။ (ဂ) တစ်ဦးကိုတစ်ဦးစီရင်ခြင်းကို ကျွန်ုပ်တို့အဘယ်ကြောင့်ရှောင်သင့်သနည်း။

^၁၂ ကျွန်ုပ်တို့သည် ‘အချင်းချင်းကိုအားပေး’ သင့်သည်ဟု ပေါလုရေးသားစဉ်က ‘အားရှိစေသည်၊ နှစ်သိမ့်မှုဖြစ်စေသည်’ ဟူ၍လည်းအဓိပ္ပာယ်ရသော ပါရာကာလဲအို ဟူသည့် ဂရိဝေါဟာရ၏ ပုံစံတစ်မျိုးကို သူအသုံးပြုခဲ့သည်။ စပ်ထွားဂျင့်ဘာသာပြန်ကျမ်းတွင် ပူဆွေးသူများကိုနှစ်သိမ့်ပေးသူအဖြစ် ယောဘကိုဖော်ပြသော ယောဘ ၂၉:၂၅ ၌ ထိုဝေါဟာရကို အသုံးပြုထားသည်။ ယောဘကိုယ်တိုင် ပြင်းထန်သည့်စမ်းသပ်မှုကို ကြုံရသောအခါတွင်မူ မည်သည့်အားပေးမှုကိုမျှ သူမခံရပေ။ သူ၏ “နှစ်သိမ့်သူ” သုံးဦးတို့သည် သူ့ကိုနားလည်ရန် သို့မဟုတ် ဝေမျှခံစားရန် ပျက်ကွက်သည့်အထိ သူ့ကိုစီရင်ချက်ချလျက် ဩဝါဒပေးလျက်နေကြသည်။ အမှန်အားဖြင့် သူတို့စကားပြောလာခဲ့သမျှတစ်လျှောက်လုံးတွင် တစ်ကြိမ်မျှ ယောဘအား အမည်တပ်၍ ရည်ညွှန်းပြောဆိုခြင်းမရှိခဲ့ချေ။ (ယောဘ ၃၃:၁၊ ၃၁ နှိုင်းယှဉ်။) သူ့ကို လူပုဂ္ဂိုလ်တစ်ဦးထက် ပြဿနာတစ်ရပ်အဖြစ် ရှုမြင်ကြကြောင်းထင်ရှားသည်။ ယောဘက စိတ်ပျက်လက်ပျက်ဖြင့် ဤသို့ကြွေးကြော်သည်မှာ မဆန်းပါလေ– “သင်တို့၏စိုးလ်သည် ငါ့စိုးလ်နေရာတွင်သာရှိမည်ဆိုလျှင်”! (ယောဘ ၁၆:၄၊ ကဘ) အလားတူ ယနေ့လည်း တစ်ဦးတစ်ယောက်ကို အားပေးလိုလျှင် ဝေမျှခံစားပါလေ! မစီရင်ပါနှင့်။ ရောမ ၁၄:၄ တွင်ပြောထားသည့်အတိုင်း “သူတစ်ပါးပိုင်သောလူကို စစ်ကြောစီရင်သောသင်သည် အဘယ်သူနည်း။ သူသည် မိမိသခင်စီရင်သောအားဖြင့်သာ အပြစ်လွတ်ခြင်း၊ အပြစ်ခံခြင်းသို့ရောက်ရ၏။ သူသည် အပြစ်လွတ်ခြင်းသို့ရောက်လိမ့်မည်။ အကြောင်းမူကား ဘုရားသခင်သည် သူ၏အပြစ်ကိုလွှတ်ခြင်းငှာ တတ်နိုင်တော်မူ၏။”

၁၃၊ ၁၄။ (က) ကျွန်ုပ်တို့၏ညီအစ်ကိုညီအစ်မများကို နှစ်သိမ့်ပေးရန် မည်သည့်အခြေခံအမှန်တရားကို သူတို့အားအခိုင်အမာစိတ်ချစေရမည်နည်း။ (ခ) ဒံယေလသည် ကောင်းကင်တမန်တစ်ပါးအားဖြင့် မည်သို့အားပေးခြင်းခံရသနည်း။

^၁၃ ပါရာကာလဲအို နှင့် ယင်း၏နာမ်ပုံစံတစ်မျိုးကို ၂ သက်သာလောနိတ် ၂:၁၆၊ ၁၇ တွင် “သက်သာ” ဟူ၍လည်း ပြန်ဆိုထားသည်– “ငါတို့ကိုချစ်တော်မူ၍ ထာဝရသက်သာခြင်းအကြောင်းကိုလည်းကောင်း၊ ကျေးဇူးတော်အားဖြင့် ကောင်းသောမျှော်လင့်ခြင်းအကြောင်းကိုလည်းကောင်း ပေးတော်မူသော ငါတို့အဘတည်းဟူသော ဘုရားသခင်နှင့် ငါတို့သခင်ယေရှုခရစ်တော်သည် ကိုယ်တော်တိုင် သင်တို့စိတ်နှလုံးကို သက်သာစေ၍ ကောင်းသောစကား၊ ကောင်းသောအမှုအမျိုးမျိုး၌ သင်တို့ကို မြဲမြံစေတော်မူပါစေသော။” ကျွန်ုပ်တို့ကို ယေဟောဝါချစ်တော်မူသည်ဟူသော အခြေခံအမှန်တရားအားဖြင့် ကျွန်ုပ်တို့၏နှလုံး သက်သာရာရခြင်းနှင့် ပေါလုဆက်စပ်တင်ပြထားသည်ကို သတိပြုပါ။ ထိုအရေးကြီးသောအမှန်တရားကို အခိုင်အမာစိတ်ချစေခြင်းအားဖြင့် အချင်းချင်းတို့ကို အားပေးပြီး သက်သာရာရစေနိုင်သည်။

^၁၄ တစ်ခါတွင် ပရောဖက်ဒံယေလသည် အလွန်ကြောက်မက်ဖွယ်ကောင်းသော ရူပါရုံတစ်ခုကိုမြင်ပြီးနောက် ဤသို့ပြောရသည်အထိ ဂနာမငြိမ်ဖြစ်ခဲ့ရသည်– “ငါမူကား . . . ခွန်အားလျော့၍ မျက်နှာပျက်လျက် ကိုယ်၌အစွမ်းသတ္တိအလျင်းမရှိဖြစ်လေ၏။” သူသည် ဘုရားသခင်၏အမြင်တွင် “အလွန်ချစ်အပ်သောသူ” ဖြစ်ကြောင်း ဒံယေလအား ကြိမ်ဖန်များစွာသတိပေးသော ကောင်းကင်တမန်ကို ယေဟောဝါစေလွှတ်ခဲ့သည်။ ရလဒ်ကားအဘယ်နည်း။ ကောင်းကင်တမန်အား ဒံယေလဤသို့ပြောသည်– “အကျွန်ုပ်ကိုခွန်အားပေးတော်မူပြီ။”—ဒံယေလ ၁၀:၈၊ ၁၁၊ ၁၉။

၁၅။ အကြီးအကဲများနှင့် နယ်လှည့်ကြီးကြပ်မှူးများသည် ချီးမွမ်းခြင်းနှင့် ပဲ့ပြင်တည့်မတ်ပေးခြင်းတို့ကို မည်သို့မျှတမှုရှိစေသင့်သနည်း။

^၁၅ ဤသည်လည်း အခြားသူများကိုအားပေးရန် နည်းတစ်နည်းဖြစ်သည်။ သူတို့ကိုချီးမွမ်းပါလေ! အပြစ်တင်ရန်၊ ခက်ထန်သောသဘောထားရှိရန် အလွန်လွယ်ကူသည်။ သွန်သင်ပဲ့ပြင်မှု လိုအပ်သည့်အခါရှိသည်တော့မှန်ပါသည်။ အထူးသဖြင့် အကြီးအကဲများ၊ နယ်လှည့်ကြီးကြပ်မှူးများထံမှဖြစ်သည်။ သို့သော် အပြစ်တင်စီရင်လိုသောသဘောထက် လှိုက်လှိုက်လှဲလှဲအားပေးခြင်းကို သူတို့အားစွဲမှတ်စေလျှင် အကျိုးဖြစ်ထွန်းပေမည်။

၁၆။ (က) စိတ်ဓာတ်ကျဆင်းသူများကို အားပေးရာတွင် ယေဟောဝါ၏လုပ်ငန်းတော်တွင် ပိုမိုပါဝင်ရန် တိုက်တွန်းခြင်းမျှနှင့် အဘယ်ကြောင့်မလုံလောက်သနည်း။ (ခ) ဧလိယစိတ်ဓာတ်ကျဆင်းသောအခါ သူ့ကို ယေဟောဝါမည်သို့ကူညီသနည်း။

^၁၆ စိတ်ဓာတ်ကျဆင်းသူများသည် အားပေးမှုထူးကဲစွာလိုအပ်ပြီး ကျွန်ုပ်တို့သည် ခရစ်ယာန်ရောင်းရင်းများအနေနှင့် အကူအညီ၏ပင်မဖြစ်သင့်သည်။—အထူးသဖြင့် ကျွန်ုပ်တို့သည် အကြီးအကဲများဖြစ်သောအခါ၌ဖြစ်ပြီး ယင်းသို့ပြုရန်ယေဟောဝါ မျှော်လင့်သည်။ (သု. ၂၁:၁၃) ကျွန်ုပ်တို့ဘာလုပ်နိုင်သနည်း။ ယေဟောဝါ၏လုပ်ငန်းတော်တွင် ပို၍လုပ်ဆောင်ရန်ပြောခြင်းလောက်ဖြင့် လုံလောက်မည်တော့မဟုတ်ပါ။ အဘယ်ကြောင့်နည်း။ သို့ပြုခြင်းက သူတို့၏စိတ်ဓာတ်ကျဆင်းမှုသည် သူတို့လုံလောက်စွာမလုပ်ဆောင်၍ဖြစ်သည်ဟု အဓိပ္ပာယ်ပေါက်စေနိုင်သောကြောင့်ဖြစ်သည်။ များသောအားဖြင့် ထိုသို့မဟုတ်ချေ။ ပရောဖက်ဧလိယသည် တစ်ကြိမ်တွင် သေလိုသည့်တိုင်အောင် အလွန်အမင်းစိတ်ဓာတ်ကျဆင်းခဲ့သည်; သို့သော် ယင်းသည် ယေဟောဝါ၏လုပ်ငန်းတော်၌ သူအလွန်အလုပ်များနေသောအခါတွင်ဖြစ်ပေါ်ခဲ့ခြင်းဖြစ်သည်။ ယေဟောဝါသူ့ကို မည်သို့ဆက်ဆံသနည်း။ သူ့အား လက်တွေ့ကျအကူအညီပေးရန် ကောင်းကင်တမန်တစ်ပါးကို ကိုယ်တော်စေလွှတ်ခဲ့သည်။ ဧလိယက ယေဟောဝါထံတွင်ရင်ဖွင့်ပြီး မိမိသည် ဘိုးဘေးများနည်းတူ ဘာမျှအသုံးမကျ၊ မိမိ၏အလုပ်အားလုံးသည်လည်း အချည်းနှီးသာဖြစ်သည်၊ မိမိသည် လုံးလုံးလျားလျားထီးတည်းဖြစ်နေသည်ဟု ခံစားရကြောင်း ထုတ်ဖော်ပြောပြသည်။ ယင်းကို ယေဟောဝါနားထောင်တော်မူပြီး မိမိ၏တန်ခိုးတော်ကို မိန်းမောအံ့သြဖွယ်နည်းဖြင့် ပြသခြင်းနှင့် သူတစ်ယောက်တည်း လုံးဝမဟုတ်ကြောင်း၊ သူစတင်သည့်လုပ်ငန်းသည် ပြီးမြောက်ရမည်ဖြစ်ကြောင်း စိတ်ချသေချာစေခြင်းအားဖြင့် သူ့ကိုနှစ်သိမ့်မှုပေးခဲ့သည်။ ထို့အပြင် သူလေ့ကျင့်ပေးရပြီး နောက်ဆုံးတွင် သူ့ကိုဆက်ခံသူဖြစ်လာမည့် အဖော်တစ်ဦးကိုပေးမည်ဟုလည်း ဧလိယအား ယေဟောဝါကတိပြုတော်မူသည်။—၃ ဓမ္မရာဇဝင် ၁၉:၁-၂၁။

၁၇။ မိမိကိုယ်ကို အလွန်အမင်းအပြစ်တင်သူတစ်ဦးအား အကြီးအကဲတစ်ဦး မည်သို့အားပေးနိုင်ဖွယ်ရှိသနည်း။

^၁၇ မည်မျှအားရှိဖွယ်ပါတကား! ကျွန်ုပ်တို့အထဲမှ စိတ်ဒုက္ခရောက်နေသူများအား ထိုနည်းတူအားပေးကြစို့။ နားထောင်ခြင်း အားဖြင့် သူတို့ကိုနားလည်နိုင်ရန်ကြိုးစားပါ။ (ယာကုပ် ၁:၁၉) သူတို့၏လိုအပ်ချက်များနှင့် ကိုက်ညီသော ကျမ်းဆိုင်ရာနှစ်သိမ့်မှုများပေးပါ။ (သု. ၂၅:၁၁; ၁ သက်သာလောနိတ် ၅:၁၄) အကြီးအကဲများသည် မိမိကိုယ်ကို အလွန်အမင်းအပြစ်တင်နေသူများကို အားပေးပါ။ သူတို့ကိုယေဟောဝါချစ်ပြီး တန်ဖိုးထားတော်မူကြောင်း ကျမ်းဆိုင်ရာအထောက်အထားများကို ကြင်နာစွာပေးဝေနိုင်သည်။a ရွေးနုတ်ဖိုးအကြောင်းဆွေးနွေးပြောဆိုခြင်းသည် မိမိတန်ဖိုးမရှိဟုယူမှတ်သူများကို အားပေးရန် အလွန်ထိရောက်သည့်နည်းတစ်ခုဖြစ်နိုင်သည်။ အတိတ်ကအပြစ်တစ်ခုခုကြောင့် ဝမ်းနည်းပူဆွေးနေသူတစ်ဦးသည် နောင်တစစ်ရကာ ထိုအကျင့်အကြံမျိုးကို လုံးလုံးစွန့်လွှတ်ခဲ့ပြီးဖြစ်လျှင် ရွေးနုတ်ဖိုးက သူ့ကိုသန့်ရှင်းစေပြီဖြစ်ကြောင်း သူ့အားတင်ပြဖို့လိုပေမည်။—ဟေရှာယ ၁:၁၈။

၁၈။ အဓမ္မပြုကျင့်ခြင်းကဲ့သို့သော အခြားသူ၏လက်ရောက်မှုကို ခံရသူတစ်ဦးကိုအားပေးရန် ရွေးဖိုးပူဇော်သကာနှင့်ဆိုင်သော သွန်သင်ချက်ကို မည်သို့အသုံးပြုသင့်သနည်း။

^၁၈ မှန်ပါသည်၊ အကြီးအကဲတစ်ဦးသည် ယင်းသို့သော သွန်သင်မှုမျိုးကို ကောင်းစွာအသုံးပြုရန် ကိစ္စရပ်တစ်ခုချင်းကို စဉ်းစားပေမည်။ ဥပမာတစ်ခုကို စဉ်းစားကြည့်ပါ– အပြစ်အားလုံးပြေငြိမ်းစေရန်အတွက် လိုအပ်သော ခရစ်တော်၏ရွေးဖိုးပူဇော်သကာသည် မောရှေပညတ်အောက်ရှိ တိရစ္ဆာန်ပူဇော်သကာအားဖြင့် ရှေ့ပြေးပုံဆောင်ခံခဲ့ရသည်။ (ဝတ်ပြုရာ ၄:၂၇၊ ၂၈) အဓမ္မပြုကျင့်ခံရသူသည် ထိုသို့သောအပြစ်ဖြေရာယဇ်ကို ပူဇော်ရမည်ဟူသော ပြဋ္ဌာန်းသတ်မှတ်ချက်မရှိပေ။ အပြစ်ပေးရန်အလို့ငှာ “ထိုမိန်းမကို သင်သည် အဘယ်သို့မျှမပြုရ” ဟု ပညတ်ကဖော်ပြထားသည်။ (တရားဟောရာ ၂၂:၂၅-၂၇) အလားတူ ယနေ့လည်း ညီအစ်မတစ်ဦးသည် မိမိအားညစ်ညမ်းပြီး မိမိတန်ဖိုးမရှိဟုထင်မှတ်စေသော လက်ရောက်မှုနှင့် အဓမ္မပြုကျင့်မှုခံရပါက ထိုအပြစ်အတွက် သူမသန့်စင်ခံရရန် ရွေးနုတ်ဖိုးလိုအပ်သည်ဟု အသားပေးပြောဆိုလျှင် လျော်ကန်ပါမည်လော။ လုံးဝမလျော်ကန်ပါ။ ပြုကျင့်ခံရခြင်းတွင် သူမအပြစ်မကျူးလွန်ပါ။ အဓမ္မပြုကျင့်သူသာလျှင် အပြစ်ကျူးလွန်သူဖြစ်ပြီး ထိုသူသန့်စင်ခံရရန်လိုသည်။ သို့ရာတွင် ရွေးနုတ်ဖိုးကို စီစဉ်ပေးခြင်းအားဖြင့် တင်ပြသော ယေဟောဝါနှင့် ခရစ်တော်တို့၏ မေတ္တာတော်ကို အသုံးပြုပြီး ဘုရားသခင်၏အမြင်တွင် သူမသည် အခြားသူတစ်ဦး၏အပြစ်ကြောင့် ညစ်ညူးခြင်းမရှိဘဲ ယေဟောဝါအတွက် အဖိုးထိုက်ပြီး ကိုယ်တော့်မေတ္တာတော်အောက်တွင် ဆက်လက်ရှိနေကြောင်းကို သက်သေထူနိုင်သည်။—မာကု ၇:၁၈-၂၃ နှိုင်းယှဉ်; ၁ ယောဟန် ၄:၁၆။

၁၉။ ကျွန်ုပ်တို့ညီအစ်ကိုညီအစ်မများနှင့် ပေါင်းသင်းမှုအားလုံး အားရှိစရာဖြစ်မည်ဟု အဘယ်ကြောင့်မမျှော်လင့်သင့်သနည်း။ သို့သော် ကျွန်ုပ်တို့၏သန္နိဋ္ဌာန်ကား မည်သို့ဖြစ်သင့်သနည်း။

^၁၉ မှန်ပါသည်၊ လူတစ်ဦးစီ၏ဘဝအခြေအနေ မည်သို့ပင်ရှိပါစေ၊ သူ့အတိတ်ကို နာကြည်းစရာအရိပ်မဲကြီးပင်ဖုံးအုပ်ပါစေ ယေဟောဝါ့လူများ၏အသင်းတော်တွင် အားပေးမှုကိုရယူနိုင်သင့်သည်။ ကျွန်ုပ်တို့တစ်ဦးစီအနေနှင့် အတူတကွပေါင်းသင်းဆက်ဆံသောအခါတိုင်း အချင်းချင်းကို ထောက်စာကြည့်ရှုရန်၊ တိုက်တွန်းနှိုးဆော်ရန်နှင့် အားပေးရန် ကြိုးစားအားထုတ်မည်ဆိုလျှင် ထိုအတိုင်းသူဖြစ်ပေမည်။ မစုံလင်ကြသောကြောင့် ကျွန်ုပ်တို့အားလုံးသည် ယင်းသို့ပြုရန် တစ်ခါတစ်ရံပျက်ကွက်ကြသည်။ တစ်ဦးကိုတစ်ဦး စိတ်ပျက်စေကြပြီး အခါအားလျော်စွာ နာကြည်းအောင်ပင် ပြုမိကြမည်မလွဲပေ။ ဤကိစ္စနှင့်ပတ်သက်သော သူတစ်ပါး၏ပျက်ကွက်မှုများကို အာရုံစိုက်ရန်မကြိုးစားပါနှင့်။ အားနည်းချက်များကို သင်အာရုံစိုက်ပါက အသင်းတော်ကို အလွန်အမင်းအပြစ်တင်မိနိုင်သည့်အန္တရာယ်သို့ ရောက်သွားနိုင်ပြီး ပေါလုက ကျွန်ုပ်တို့ရှောင်ရှားရန် စိတ်အားထက်သန်စွာ အကူအညီပေးလိုသည့် ကျော့ကွင်း၊ တစ်နည်းအားဖြင့် အချင်းချင်းစည်းဝေးခြင်းအမှုကို ရှောင်လွဲခြင်းထဲသို့ပင် သက်ဆင်းသွားနိုင်သည်။ ဘယ်တော့မျှ ထိုသို့မဖြစ်ပါစေနှင့်! ဤစနစ်ဟောင်းကြီးသည် သာ၍အန္တရာယ်ရှိပြီး ဖိစီးနှိပ်စက်မှုများလာသည်နှင့်အမျှ အစည်းအဝေးများတွင် ကျွန်ုပ်တို့၏ပေါင်းသင်းဆက်ဆံမှုကို တည်ဆောက်မှုဖြစ်စေဖို့ ကျွန်ုပ်တို့လုပ်နိုင်သည့်အရာမှန်သမျှကိုလုပ်ရန် ခိုင်ခိုင်မြဲမြဲသန္နိဋ္ဌာန်ချထားကြစို့—ယေဟောဝါ၏နေ့ရက်တော်ကြီးနီးကြောင်း ကျွန်ုပ်တို့သိမြင်သည်နှင့်အမျှ ယင်းသို့သာ၍ပြုကြစို့လေ!

[အောက်ခြေမှတ်ချက်များ]

သင်မည်သို့ဖြေဆိုမည်နည်း

◻ ဤနောက်ဆုံးကာလတွင် ကျွန်ုပ်တို့၏အစည်းအဝေးများနှင့် ပေါင်းသင်းဆက်ဆံမှုများသည် အားရှိစရာဖြစ်စေရန် အဘယ်ကြောင့်အရေးကြီးသနည်း။

◻ အချင်းချင်းကို ထောက်စာကြည့်ရှုရန်ဟူသည် အဘယ်နည်း။

◻ အချင်းချင်းကို တိုက်တွန်းနှိုးဆော်ရန်ဟူသည် အဘယ်နည်း။

◻ အချင်းချင်းကိုအားပေးရန်ဟူသည် အဘယ်နည်း။

◻ စိတ်ဓာတ်ကျဆင်းသူများနှင့် စိတ်ညှိုးငယ်နေသူများသည် မည်သည့်နည်းဖြင့် အားပေးခံရနိုင်ဖွယ်ရှိသနည်း။

[စာမျက်နှာ ၁၆ ပါ ရုပ်ပုံ]

ဧည့်ဝတ်ပျူငှာခြင်းက တစ်ဦးကိုတစ်ဦးပိုမိုသိကျွမ်းရန် အကူအညီဖြစ်စေ

[စာမျက်နှာ ၁၈ ပါ ရုပ်ပုံ]

ဧလိယစိတ်ဓာတ်ကျဆင်းသောအခါ ယေဟောဝါသူ့ကို ကြင်နာစွာနှစ်သိမ့်ပေး