ကျောက်ကပ်အထူးကုဆရာဝန်တစ်ဦးက ဘုရားသခင်ကို ဘာကြောင့်ယုံကြည်လာကြောင်း ရှင်းပြ

ဘဝနောက်ခံကို ပြောပြနိုင်မလား

ကျွန်မရဲ့မိသားစုက ကျွန်မကိုးနှစ်အရွယ်မှာ စပိန်ကနေ ပြင်သစ်ကို ပြောင်းလာခဲ့ပါတယ်။ မိဘတွေကတော့ ကက်သလစ်ဘာသာဝင်တွေပါ၊ ဒါပေမဲ့ ကျွန်မအသက် ၁၆ နှစ်ရောက်တော့ ဘုရားသခင်ရှိတယ်ဆိုတာ မယုံတော့ဘူး။ ကျွန်မအတွက်တော့ ဘာသာတရားဆိုတာ လူ့ဘဝနဲ့ ဘာမှမဆိုင်ဘူး။ ဘုရားသခင်မရှိဘူးဆိုရင် သက်ရှိတွေ ဘယ်လိုဖြစ်လာတာလဲလို့ တစ်ယောက်ယောက်က ကျွန်မကိုမေးတဲ့အခါ “အခုတော့ သိပ္ပံပညာရှင်တွေ မရှင်းပြနိုင်သေးဘူး၊ ဒါပေမဲ့ တစ်နေ့နေ့တော့ သူတို့ရှင်းပြနိုင်လိမ့်မယ်” လို့ ပြန်ဖြေလေ့ရှိတယ်။

ဘာကြောင့် ကျောက်ကပ်ပညာရပ်ကို လေ့လာခဲ့တာလဲ

ပြင်သစ်နိုင်ငံ၊ မွန်ပဲယားမြို့ကဆေးကျောင်းမှာ ဆေးပညာ ဆည်းပူးခဲ့ပါတယ်။ အဲဒီက ပါမောက္ခတစ်ယောက်က ကျွန်မကို ကျောက်ကပ်ဌာနမှာအလုပ်လုပ်ဖို့ ပြောခဲ့တယ်။ အဲဒီအလုပ်မှာ သုတေသနလုပ်ရတဲ့အပြင် လူနာတွေကိုလည်း ကြည့်ရှုပေးရတယ်။ ကျွန်မလုပ်ချင်တာ အဲဒီအလုပ်မျိုးပဲ။ ၁၉၉၀ ပြည့်နှစ်ရောက်တော့ အီးပီအို (erythropoietin) လို့ခေါ်တဲ့ အရိုးထဲက သွေးနီဥတွေထုတ်လုပ်မှုကို ထိန်းချုပ်တဲ့ အကြောင်းအရာကို စလေ့လာခဲ့တယ်။ အဲဒီအချိန်တုန်းကဆိုရင် အဲဒါကို ရှာဖွေလေ့လာမှုအသစ်အဖြစ် ယူမှတ်ထားကြတယ်။

ဘာကြောင့် ဘုရားသခင်အကြောင်း စပြီးစဉ်းစားလာခဲ့တာလဲ

၁၉၇၉ ခုနှစ်တုန်းက၊ ကျွန်မရဲ့ခင်ပွန်း ဖလိုရီရယ်ဟာ ယေဟောဝါသက်သေတွေနဲ့ ကျမ်းစာစပြီး လေ့လာခဲ့တယ်။ ကျွန်မကတော့ စိတ်မဝင်စားပါဘူး။ ငယ်ငယ်ကတည်းက ဘာသာရေးအကြောင်း စိတ်မဝင်စားတော့ဘူး။ ဒါပေမဲ့ ခင်ပွန်းနဲ့ ကလေးတွေကတော့ သက်သေခံတွေဖြစ်လာကြပြီး မကြာခင်မှာပဲ ကျွန်မတို့ရဲ့မိတ်ဆွေအားလုံးနီးပါးလည်း သက်သေခံတွေဖြစ်လာကြတယ်။ အဲဒီအထဲက တစ်ယောက်ဖြစ်တဲ့ ပက်ထရီရှာက ဘုရားသခင်ဆီဆုတောင်းဖို့ ကျွန်မကို အကြံပြုခဲ့တယ်။ “ကောင်းကင်မှာ ဘယ်သူမှမရှိဘူးဆိုရင်လည်း ကိုယ့်အတွက် အရှုံးမရှိပါဘူး။ ရှိတယ်ဆိုရင်တော့ အမြတ်ပဲပေါ့” ဆိုပြီး သူကပြောတယ်။ နှစ်တွေအတော်ကြာပြီးတဲ့နောက်မှာတော့ ဘဝရဲ့အဓိပ္ပာယ်နဲ့ပတ်သက်ပြီး ကျွန်မစဉ်းစားမိလာတယ်၊ အဲဒီအခါ ပက်ထရီရှာရဲ့စကားတွေကို သတိရလာတယ်။ ဒါနဲ့ ကျွန်မ စဆုတောင်းတော့တယ်။

ဘာကြောင့် ဘဝရဲ့အဓိပ္ပာယ်နဲ့ ပတ်သက်ပြီး စဉ်းစားလာတာလဲ

အကြမ်းဖက်သမားတွေက နယူးယောက်မြို့က ကမ္ဘာ့ကုန်သွယ်ရေးအဆောက်အအုံကို တိုက်ခိုက်လိုက်တဲ့အခါ ဘာကြောင့် ဆိုးသွမ်းမှုတွေ ဒီလောက်များရတာလဲဆိုပြီး ကျွန်မသိချင်လာတယ်။ ‘ဘာသာရေးအစွန်းရောက်တွေက ကျွန်မတို့ရဲ့အနာဂတ်ကို ခြိမ်းခြောက်နေတယ်။ ဒါပေမဲ့ ကျွန်မဘေးမှာရှိနေကြတဲ့ ယေဟောဝါသက်သေတွေကတော့ ငြိမ်းချမ်းနေကြတာပဲ။ သူတို့တွေက အစွန်းရောက်သမားတွေမဟုတ်ဘူး။ သမ္မာကျမ်းစာကို သူတို့လိုက်လျှောက်ကြတယ်။ ဘာပဲဖြစ်ဖြစ် ကျမ်းစာမှာဘာပါသလဲဆိုတာကိုတော့ ငါကြည့်သင့်တယ်’ လို့ ကျွန်မစဉ်းစားမိတယ်။ ဒါနဲ့ ကျွန်မကိုယ့်ဘာသာကိုယ် ကျမ်းစာစဖတ်တော့တယ်။

ဆရာဝန်တစ်ယောက်အနေနဲ့ ဖန်ဆင်းရှင်ကိုယုံကြည်လာဖို့ အခက်အခဲဖြစ်ခဲ့သလား

မခက်ခဲပါဘူး။ ဆန်းပြားလှတဲ့ ကျွန်မတို့ရဲ့ ခန္ဓာကိုယ်တည်ဆောက်ပုံကို ကျွန်မအရမ်းအံ့သြမိတယ်။ ဥပမာ၊ ကျောက်ကပ်က သွေးထဲက သွေးနီဥပမာဏကို ထိန်းချုပ်ပုံက သိပ်အံ့ဩစရာကောင်းပါတယ်။

ဘာကြောင့် အဲဒီလိုပြောတာလဲ

သွေးနီဥတွေဟာ အောက်ဆီဂျင်ကို သယ်ဆောင်ပေးတယ်။ အကယ်၍ ခန္ဓာကိုယ်မှာ သွေးထွက်များတဲ့အခါ ဒါမှမဟုတ် အရမ်းမြင့်တဲ့နေရာကို တက်သွားတဲ့အခါ ခန္ဓာကိုယ်မှာ အောက်ဆီဂျင်ရရှိမှု နည်းပါးသွားပါတယ်။ ကျောက်ကပ်မှာ အောက်ဆီဂျင်အာရုံခံ ကိရိယာတွေ ရှိပါတယ်။ သွေးထဲမှာ အောက်ဆီဂျင်နည်းသွားပြီဆိုတာ အဲဒီကိရိယာတွေ အာရုံခံမိတဲ့အခါ သွေးနီဥတွေထုတ်လုပ်မှုကို ထိန်းချုပ်တဲ့ အီးပီအို စအလုပ်လုပ်တယ်၊ အဲဒီအခါ သွေးထဲမှာရှိတဲ့ သွေးနီဥထုတ်လုပ်မှုဟာ အဆတစ်ထောင်လောက်အထိ မြင့်မားလာတယ်။ အောက်ဆီဂျင်တွေ ပိုပြီးသယ်ဆောင်နိုင်ဖို့အတွက် သွေးနီဥတွေထုတ်လုပ်ပေးဖို့ ရိုးတွင်းခြင်ဆီကို အီးပီအိုက လှုံ့ဆော်ပေးပါတယ်။ ဒါက တကယ့်အံ့သြစရာပါပဲ။ ဒီအကြောင်းကို ဆယ်နှစ်လောက်လေ့လာပြီးမှပဲ ဘုရားသခင်ကပဲ ဒီလိုမျိုး အံ့ဩစရာကောင်းတဲ့အရာကို ဖန်တီးနိုင်တယ်ဆိုတာ ကျွန်မလက်ခံလာတယ်။

သမ္မာကျမ်းစာကို ဘာကြောင့် ယုံကြည်လာတာလဲ

သမိုင်းစာအုပ်တွေနဲ့ နာမည်ကြီးဝတ္ထုစာအုပ်တွေ အများကြီး ကျွန်မဖတ်ဖူးတယ်။ ဒါပေမဲ့ သမ္မာကျမ်းစာကတော့ အဲဒါတွေနဲ့မတူဘူးဆိုတာ ချက်ချင်း ကျွန်မသတိပြုမိတယ်။ သမ္မာကျမ်းစာရဲ့အကြံပြုချက်တွေက အရမ်းကို လက်တွေ့ကျတဲ့အတွက် လူသားတွေထက်မြင့်တဲ့ အရာတစ်ခုခုကနေလာတာ ဖြစ်ရမယ်။ ယေရှုရဲ့ကိုယ်ရည်ကိုယ်သွေးတွေကို ကျွန်မ အရမ်းသဘောကျတယ်။ သူက တကယ်ပုဂ္ဂိုလ်တစ်ယောက်ဆိုတာ ကျွန်မသိလာတယ်။ သူ့မှာ ခံစားချက်ရှိတယ်၊ မိတ်ဆွေတွေရှိတယ်။ ကျွန်မ တစ်ခုခုသိချင်တယ်ဆိုရင် ယေဟောဝါသက်သေတွေ ထုတ်ဝေတဲ့စာပေတွေကို မဖတ်ချင်လို့ တခြားစွယ်စုံကျမ်းတွေနဲ့ တခြားစာပေတွေမှာပဲ ရှာဖွေလေ့လာခဲ့တယ်။

ဘာတွေ ရှာဖွေလေ့လာခဲ့သလဲ

တစ်ခုကို ပြောရမယ်ဆိုရင် ယေရှုနှစ်ခြင်းခံ တဲ့နှစ်နဲ့ပတ်သက်ပြီး သမ္မာကျမ်းစာကြိုဟောချက်ကို ကျွန်မအရမ်းစိတ်ဝင်စားတယ်။ အဲဒီအထဲမှာ ပါးရှားဘုရင် အာတဇေရဇ်နန်းစံနှစ်ဆယ်ကနေ ယေရှု မေရှိယဖြစ်လာမယ့်အချိန်အထိ ကြားမှာဘယ်လောက်ကြာမလဲဆိုတာ အတိအကျဖော်ပြထားတယ်။a ရှာဖွေလေ့လာမှုက ကျွန်မလုပ်နေကျအလုပ်တစ်ခုပဲလေ။ ဒါကြောင့် အာတဇေရဇ်နန်းစံတဲ့ရက်စွဲနဲ့ ယေရှုစပြီး အမှုဆောင်တဲ့အချိန်ကို သမိုင်းစာအုပ်တွေမှာ လိုက်ရှာကြည့်လိုက်တယ်။ သမ္မာကျမ်းစာကြိုဟောချက်တွေဟာ အချိန်ကိုက်ပြည့်စုံလာတယ်ဆိုတာကို ကောက်ချက်ချနိုင်ခဲ့တယ်။ ဒါကြောင့် သမ္မာကျမ်းစာဟာ ဘုရားသခင်ရဲ့ လမ်းညွှန်မှုနဲ့ရေးတဲ့ စာအုပ်ပဲဖြစ်ရမယ်။