သေခြင်း

လူသေသွားတဲ့အခါ တခြားဘုံတစ်ခုခုကို ရောက်သွားသလား။

လူအများပြောဆိုရာ–

လူသေသွားတဲ့အခါ တခြား ဘုံတစ်ခုခုကို ရောက်သွားတယ် ဒါမှမဟုတ် ပြန်ဝင်စားတယ်၊ ကောင်းကင် ဒါမှမဟုတ် ငရဲကို ရောက်သွားတယ်ဆိုပြီး ယုံကြည်ကြတယ်။

သမ္မာကျမ်းစာပြောဆိုရာ–

လူသေသွားတဲ့အခါ တခြားဘုံတစ်ခုခုကို ရောက်သွားတယ်ဆိုပြီး ကျမ်းစာက မပြောပါဘူး။ “မြေမှုန့်သို့ ပြန်ရမည်” လို့ ပြောပါတယ်။ အာဒံကို ပြစ်ဒဏ်စီရင်တဲ့အခါ၊ သူ့ကို မြေမှုန့်နဲ့ ဖန်ဆင်းထားတာမို့လို့ သူ သေသွားတဲ့အခါ မြေမှုန့်ကိုပဲ ပြန်သွားရမယ်ဆိုပြီး ဘုရားသခင် မိန့်ဆိုခဲ့တယ်။ တစ်နည်းပြောရရင်၊ အသက်မရှိတဲ့အခြေအနေကို ပြန်သွားရမယ်လို့ ပြောတာဖြစ်တယ်။

“သင်သည် မြေမှုန့်ဖြစ်၍ မြေမှုန့်သို့ပြန်ရမည်။”—ကမ္ဘာဦး ၃:၁၉။

သေလွန်သူတွေရဲ့ အခြေအနေမှန်ဟာ ဘာလဲ။

သမ္မာကျမ်းစာပြောဆိုရာ–

“မရဏာနိုင်ငံ [သင်္ချိုင်း] ၌ လုပ်ဆောင်ခြင်းမရှိ။ ကြံစည်ခြင်းမရှိ။ သိပ္ပံအတတ်မရှိ။ ပညာမရှိ” ဆိုပြီး ကျမ်းစာမှာ အတိအကျ ဖော်ပြထားတယ်။ (ဒေသနာ ၉:၁၀) လူသေတဲ့အခါ “မြေသို့ပြန်သွားတတ်၏။ ထိုနေ့ခြင်းတွင် သူ၏အကြံအစည်တို့သည် ပျက်စီးကြ၏။” (ဆာလံ ၁၄၆:၄) လူသေဟာ မလှုပ်မယှက် ငြိမ်သက်နေတာကြောင့် သေခြင်းကို “အိပ်ပျော်နေခြင်း” ဆိုပြီး ကျမ်းစာက ဖော်ပြလေ့ရှိတယ်။—မဿဲ ၉:၂၄။

ဒီအကြောင်းသိဖို့ ဘာကြောင့်အရေးကြီးသလဲ–

ကိုယ်ချစ်ရသူ ဆုံးသွားတဲ့အခါ သူ ဘယ်ရောက်နေသလဲ၊ ဘယ်လို အခြေအနေရှိသလဲ၊ ဝေဒနာတွေများ ခံစားနေရသလား စတဲ့ မေးခွန်းတွေရဲ့အဖြေကို သိချင်ကြပါတယ်။ သေတဲ့သူက ဘာမှမသိဘူးလို့ ကျမ်းစာက ဆိုတယ်။ ကိုယ်ချစ်ရသူ ဘာဝေဒနာမှ မခံစားရဘူးဆိုတာ သိရလို့ စိတ်သက်သာရာရနိုင်ပါတယ်။

“သေသောသူမူကား အဘယ်အရာကိုမျှမသိ။”—ဒေသနာ ၉:၅။

သေလွန်သူတွေအတွက် မျှော်လင့်ချက် ရှိသလား။

သမ္မာကျမ်းစာပြောဆိုရာ–

မကြာခင် ဒီကမ္ဘာမြေကြီးဟာ ဖြောင့်မတ်သူတွေနေထိုင်တဲ့ကမ္ဘာ ဖြစ်လာတော့မယ်၊ အဲဒီအချိန်မှာ ဘုရားသခင်ရဲ့ မှတ်ဉာဏ်တော်ထဲမှာရှိတဲ့ သေလွန်သူအားလုံး အသက်ပြန်ရှင်လာမယ်လို့ ဘုရားသခင် ကတိပေးထားတယ်။ အဲဒီအချိန်မရောက်ခင်အထိ သူတို့ဟာ သေခြင်းမှာ အိပ်ပျော်နေကြမယ်။ အနန္တတန်ခိုးရှင် ဘုရားသခင်က သေလွန်သွားသူတွေကို အသက်ပြန်ရှင်အောင် လုပ်ပေးဖို့ ဆန္ဒပြင်းပြနေပါတယ်။ ကိုယ်ချစ်ရတဲ့ သေလွန်သွားသူတွေကို အသက်ပြန်ရှင်အောင်လုပ်ပေးမယ်ဆိုတဲ့ ယေဟောဝါဘုရားရဲ့ ကတိတော်တွေကို သိရတာက တကယ့်ကို နှစ်သိမ့်မှုဖြစ်စေပါတယ်။—တမန်တော် ၂၄:၁၅။

“ဖြောင့်မတ်သောသူ၊ မဖြောင့်မတ်သောသူတို့သည် ရှင်ပြန်ထမြောက်ကြလိမ့်မည်။” —တမန်တော် ၂၄:၁၅။