သမ္မာကျမ်းစာ​—တကယ်ပဲ “စွမ်းအားတော်ရဲ့ လမ်းညွှန်မှုနဲ့ ရေးထား” တာလား

ကျမ်းစာဟာ ဘုရားသခင်ဆီက လာတာလို့ သင် ယုံကြည်သလား။ ဒါမှမဟုတ် လူ့အတွေးအခေါ်တွေပါတဲ့ စာအုပ်ပဲလို့ ယူဆသလား။

ခရစ်ယာန်လို့ ပြောတဲ့သူတွေတောင် အဲဒီအချက်ကို အငြင်းပွားနေတုန်းပဲ။ အမေရိကန်ပြည်ထောင်စုမှာ ကောက်ယူတဲ့ ၂၀၁၄ ခုနှစ် လူထုသဘောထားစစ်တမ်းအရ ခရစ်ယာန်အမည်ခံသူအများစုက “ကျမ်းစာဟာ ဘုရားသခင်နဲ့ တစ်နည်းမဟုတ် တစ်နည်း ဆက်စပ်နေတယ်” လို့ ယူဆကြတယ်။ ဒါပေမဲ့ လူ ၅ ယောက်မှာ ၁ ယောက်ကတော့ ကျမ်းစာဟာ “ရှေးခေတ် ဒဏ္ဍာရီပုံပြင်၊ ယုံတမ်းစကား၊ ရာဇဝင်၊ လူ့ပညတ်ချက်တွေပါတဲ့ စာအုပ်” လို့ ရှုမြင်ကြတယ်။ အဲဒီလိုသဘောထားကွဲပြားမှုက ကျမ်းစာကို “စွမ်းအားတော်ရဲ့ လမ်းညွှန်မှုနဲ့ရေးထား” တယ်ဆိုတဲ့ အသုံးအနှုန်းရဲ့ ဆိုလိုရင်းအမှန်ကို အာရုံစိုက်စေတယ်။—၂ တိမောသေ ၃:၁၆။

“စွမ်းအားတော်ရဲ့ လမ်းညွှန်မှုနဲ့ရေးထား” တယ်ဆိုတာ ဘာကို ဆိုလိုသလဲ

ကျမ်းစာမှာ ကျမ်းစောင် ၆၆ စောင် ပါဝင်တယ်။ အဲဒီကျမ်းစောင်တွေကို နှစ်ပေါင်း ၁,၆၀၀ အတွင်း လူအယောက် ၄၀ လောက် ရေးခဲ့တယ်။ ကျမ်းစာကို လူတွေရေးခဲ့တယ်ဆိုရင် ဘယ်လိုလုပ်ပြီး “ဘုရားသခင့်စွမ်းအားတော်ရဲ့ လမ်းညွှန်မှုနဲ့ရေးထား” တာ ဖြစ်နိုင်မလဲ။ ရိုးရိုးလေးပြောရရင် “ဘုရားသခင့် စွမ်းအားတော်ရဲ့ လမ်းညွှန်မှုနဲ့ရေးထား” တယ်ဆိုတဲ့ အသုံးအနှုန်းက ကျမ်းစာမှာပါတဲ့ အကြောင်းအရာတွေ ဟာ ဘုရားသခင်ဆီက လာတယ်ဆိုတဲ့ အဓိပ္ပာယ်ပဲ။ “လူတွေက သန့်ရှင်းသော စွမ်းအားတော်ရဲ့ လှုံ့ဆော်မှုကိုခံရလို့ ဘုရားသခင်ဆီကလာတဲ့ စကားတွေကို ပြန်ဟောတာဖြစ်တယ်” လို့ ကျမ်းစာ ပြောတယ်။ (၂ ပေတရု ၁:၂၁) တစ်နည်းပြောရရင် ဘုရားသခင်က သူရေးချင်တဲ့အကြောင်းအရာတွေကို လူ့မျက်စိနဲ့မမြင်နိုင်တဲ့ သန့်ရှင်းသောစွမ်းအားတော်ကတစ်ဆင့် ကျမ်းရေးသူတွေကို အသိပေးတယ်။ စီးပွားရေးလုပ်ငန်းရှင်တစ်ဦးက အတွင်းရေးမှူးကို စာတစ်စောင် ရေးခိုင်းတာနဲ့ နှိုင်းယှဉ်နိုင်တယ်။ တကယ်တော့ အဲဒီစာဟာ အတွင်းရေးမှူးရဲ့စာ မဟုတ်ဘူး။ လုပ်ငန်းရှင်ရဲ့စာ ဖြစ်တယ်။

ကျမ်းရေးသူတချို့ဟာ ကောင်းကင်တမန်ကတစ်ဆင့် ဘုရားပြောတဲ့စကားတွေကို ကိုယ်တိုင်ကြားခဲ့ရတယ်။ တချို့ကတော့ ဘုရားပေးတဲ့ စိတ်အာရုံကို မြင်ခဲ့ရတယ်။ တချို့ကိုတော့ အိပ်မက်ကတစ်ဆင့် ဘုရား အသိပေးတယ်။ တစ်ခါတလေ ဘုရားသခင်က သူရေးစေချင်တာတွေကို ကျမ်းရေးသူတွေရဲ့ ကိုယ်ပိုင်စကားနဲ့ မှတ်တမ်းတင်စေသလို စကားလုံးအတိအကျ ရေးခိုင်းတာလည်း ရှိတယ်။ ဘယ်လိုပဲဖြစ်ပါစေ ကျမ်းရေးသူတွေဟာ ကိုယ့်အတွေးအခေါ်ကို မဟုတ်ဘဲ ဘုရားရဲ့အတွေးအခေါ်ကို ရေးသားခဲ့ကြတယ်။

ကျမ်းရေးသူတွေကို စွမ်းအားတော်နဲ့လမ်းညွှန်သူဟာ ဘုရားသခင်ပဲဆိုတာ ဘယ်လိုလုပ် အသေအချာပြောနိုင်မှာလဲ။ ကျမ်းစာဟာ ဘုရားသခင်ဆီက လာတယ်ဆိုတာ စိတ်ချစေတဲ့ အထောက်အထားသုံးခုကို လေ့လာကြည့်ပါ။