သားသမီးများ အသိုက်အမြုံ စွန့်ခွာသွားချိန်ဝယ်

အခက်အခဲ

သားသမီးတွေ အရွယ်ရောက်လို့ အိမ်က ထွက်ခွာသွားတဲ့အခါ မိဘတွေ အကြီးအကျယ် အခက်တွေ့လေ့ရှိတယ်။ သားသမီးတွေ မရှိတော့တဲ့အခါ မိဘနှစ်ဦးဟာ သူစိမ်းတွေလို ဖြစ်ကျန်ရစ်ခဲ့တယ်။ “ကိုယ့်အိမ်ထောင်ဖက်နဲ့ တရင်းတနှီးပြန်ဖြစ်ဖို့ ဘယ်လိုလုပ်ရမှန်းမသိသူ အများကြီးကို ကျွန်တော် အကြံပေးဖူးတယ်။ အခု သားသမီးတွေ မရှိတော့ [မိဘတွေ] တစ်ယောက်နဲ့တစ်ယောက် စကားသိပ်မပြောဖြစ်ကြတော့ဘူး” လို့ မိသားစုအတိုင်ပင်ခံ အမ်. ဂယ်ရီ ပြောတယ်။a

သင့်အိမ်ထောင်မှာကော အဲဒီလိုဖြစ်နေ သလား။ ဖြစ်နေတယ်ဆိုရင် ဆက်ဆံရေး ပြန်ကောင်းအောင် လုပ်နိုင်ပါတယ်။ ဦးဆုံး၊ လင်နဲ့မယား ခပ်စိမ်းစိမ်းဖြစ်စေနိုင်တဲ့ အကြောင်းရင်းတချို့ကို သုံးသပ်ကြည့်ပါ။

အကြောင်းရင်းများ

နှစ်နဲ့ချီပြီး ကလေးတွေကို ဦးစားပေးရတယ်။ မိဘများစွာဟာ ကိုယ့်အရေးထက် သားသမီးတွေရဲ့ လိုအပ်ရာကို စေတနာထား ဖြည့်ဆည်းပေးကြတယ်။ မိဘတာဝန် ထမ်းဆောင်နေရတာနဲ့ပဲ လင်မယားနှောင်ကြိုး ပြေလျော့လာတယ်။ အဲဒီလို ဖြစ်နေမှန်း သားသမီးတွေ မရှိတော့မှ သိသာလာတယ်။ “ကလေးတွေရှိတုန်းကတော့ ကျွန်မတို့ မိသားစုလိုက် လုပ်ဆောင်ကြတယ်။” ကလေးတွေ အိမ်ကနေ ထွက်သွားပြီးနောက် “ကျွန်မတို့ဟာ ပြဒါးတစ်လမ်း သံတစ်လမ်းပဲ” လို့ အသက် ၅၉ နှစ်အရွယ် မိခင်တစ်ဦး ပြောတယ်။ “ရှင်နဲ့ကျွန်မ ဘယ်တော့မှ အစေးမကပ်ဘူး” လို့တောင် ယောက်ျားကို ပြောဖူးတယ်။

မောင်နှံစုံတချို့ဟာ အဲဒီဘဝအခြေအနေသစ်နဲ့ အလိုက်သင့် နေတတ်ဖို့ မပြင်ဆင်ထားဘူး။ “မောင်နှံစုံအများစုဟာ အိမ်ထောင်ကျခါစလို ပြန်ဖြစ်သွားတယ်” လို့ ခြောက်ကပ်သွားတဲ့ရိပ်မြုံ ဆိုတဲ့စာအုပ်မှာ ဖော်ပြတယ်။ မောင်နှံအများစုဟာ ညှိမရတာများလာတယ်လို့ ခံစားရပြီး ကိုယ်ကြိုက်တာ ကိုယ်လုပ်တဲ့အခါ အိမ်ထောင်ဖက်တွေလို မဟုတ်တော့ဘဲ အခန်းဖော်တွေလို ဖြစ်လာကြတယ်။

ဝမ်းသာစရာကတော့ အဲဒီလိုအဖြစ်မျိုးကို ရှောင်နိုင်တဲ့အပြင် ဒီအခြေအနေသစ်ကနေ အကျိုးကျေးဇူးတောင် ရနိုင်ပါတယ်။ အဲဒီလိုလုပ်နိုင်အောင် ကျမ်းစာက ကူညီပေးနိုင်တယ်။ ဘယ်လိုနည်းနဲ့လဲ။

လုပ်ဆောင်နိုင်ရာ

အပြောင်းအလဲကို လက်ခံဖို့ စိတ်ပိုင်းဖြတ်ထားပါ။ အရွယ်ရောက်တဲ့ သားသမီးတွေနဲ့ပတ်သက်ပြီး “ယောက်ျားက မိဘကိုထားခဲ့ . . . လိမ့်မယ်” လို့ ကျမ်းစာပြောတယ်။ (ကမ္ဘာဦး ၂:၂၄) မိဘတွေရဲ့ တာဝန်က သားသမီးတွေ အတောင်စုံလို့ စွန့်ခွာသွားမယ့်အချိန်အတွက် လေ့ကျင့်ပေးပြီး ကိုယ့်ခြေပေါ် ကိုယ်ရပ်တည်နိုင်တဲ့အထိ စွမ်းရည်တွေ ရှိလာအောင် ကူညီပေးဖို့ပဲ။ အဲဒီလိုသဘောထားရင် သားသမီးတွေ အိမ်ကနေ ထွက်ခွာသွားတာကို ဂုဏ်ယူစရာလို့ ရှုမြင်နိုင်ပါလိမ့်မယ်။—ကျမ်းစာအကြံပြုချက်– မာကု ၁၀:၇။

သင်ဟာ သားသမီးတွေအတွက် ထာဝရ မိဘဖြစ်နေမှာပါ။ ဒါပေမဲ့ အုပ်ထိန်းသူမဟုတ်တော့ဘဲ အကြံပေးသူဖြစ်သွားပြီ။ ဒီလိုအခြေအနေပြောင်းသွားပေမဲ့ သားသမီးတွေနဲ့ ရင်းရင်းနှီးနှီး ဆက်နေနိုင်ပါတယ်။ တစ်ချိန်တည်းမှာ ကိုယ့်အိမ်ထောင်ဖက်ကိုလည်း ဦးစားပေးနိုင်ပါတယ်။b—ကျမ်းစာအကြံပြုချက်– မဿဲ ၁၉:၆။

စိုးရိမ်ပူပန်စရာတွေကို ရင်ဖွင့်ပါ။ ဒီအခြေအနေအပြောင်းအလဲကြောင့် သင် ဘယ်လိုခံစားရတယ်ဆိုတာ အိမ်ထောင်ဖက်ကို ပြောပြပါ။ သူ့ခံစားချက်တွေ ရင်ဖွင့်တဲ့အခါမှာလည်း နားထောင်ပေးပါ။ စိတ်ရှည်ပါ၊ နားလည်ပေးပါ။ လင်နဲ့မယား သံယောဇဉ်နှောင်ကြိုး ခိုင်မြဲဖို့ အချိန်ယူရမှာ ဖြစ်ပေမဲ့ ကြိုးစားရကျိုးနပ်ပါတယ်။—ကျမ်းစာအကြံပြုချက်– ၁ ကောရိန္သု ၁၃:၄။

မလုပ်ဖူးတာတွေကို အတူလုပ်ကြည့်ပါ။ အတူလုပ်ချင်တာတွေ၊ အတူစူးစမ်းလေ့လာချင်တာတွေကို ပြောဆိုကြပါ။ ကလေးတွေကို ပြုစုစောင့်ရှောက်ခဲ့ရတော့ သင်တို့မှာ အတွေ့အကြုံ အများကြီးရှိနေပြီ။ အဲဒီအတွေ့အကြုံတွေကို သုံးပြီး တခြားသူတွေကို ကူညီပါ။—ကျမ်းစာအကြံပြုချက်– ယောဘ ၁၂:၁၂။

သင့်သစ္စာကတိကို တည်စေပါ။ တစ်ဦးကိုတစ်ဦး ဘယ်အရည်အသွေးတွေကြောင့် ချစ်သွားတာလဲဆိုတာ ပြန်စဉ်းစားပါ။ ဘဝကို အတူဖြတ်သန်းခဲ့ပုံ၊ အခက်အခဲတွေ ရင်ဆိုင်ဖြေရှင်းခဲ့ပုံကို ပြန်စဉ်းစားပါ။ ဒီလိုနဲ့ သင်တို့ရဲ့ ဘဝစာမျက်နှာသစ်ဟာ လှပတင့်တယ်နိုင်ပါတယ်။ တူနှစ်ကိုယ်ကြိုးစားသွားမယ်ဆိုရင် သင့်အိမ်ထောင် ပိုသာယာလာမယ်၊ အရင်ကရှိခဲ့တဲ့ မေတ္တာ ပြန်လည် ရှင်သန်လာပါလိမ့်မယ်။