မျက်နှာဖုံးအကြောင်းအရာ | ကမ္ဘာကြီး ထိန်းမနိုင်သိမ်းမရ ဖြစ်နေပြီလား
ကမ္ဘာကြီး ထိန်းမနိုင်သိမ်းမရ ဖြစ်နေတာ အမှန်ပဲလား
စိတ်မချမ်းမြေ့စရာ ကြေညာချက်တစ်ခု ၂၀၁၇ နှစ်ဦးပိုင်းမှာ ထွက်လာတယ်။ သိပ္ပံပညာရှင်တစ်ဖွဲ့က ကမ္ဘာပျက်ကိန်းဆိုက်တော့မယ်လို့ ကြေညာတယ်။ သိပ္ပံပညာရှင်တွေဟာ ကမ္ဘာပျက်ချိန် ဘယ်လောက်နီးနေပြီဆိုတာ ပုံဖော်ဖို့ ကမ္ဘာပျက်ချိန် ညွှန်ပြတဲ့နာရီမှာ စက္ကန့် ၃၀ ရှေ့တိုးလိုက်တယ်။ ကမ္ဘာပျက်မယ့် သန်းခေါင်ယံအချိန် ရောက်ဖို့ နှစ်မိနစ်ခွဲပဲ လိုတော့တယ်။ အနှစ် ၆၀ ကျော်ကာလအတွင်းမှာ ကမ္ဘာပျက်ကိန်းဆိုက်မယ့်အချိန်ဟာ နီးသည်ထက် နီးလာပြီ။
၂၀၁၈ ခုနှစ် ရောက်တဲ့အခါ ကမ္ဘာကြီးရဲ့အဆုံး ဘယ်လောက်နီးနေပြီဆိုတာ သိပ္ပံပညာရှင်တွေ ထပ်မံတွက်ချက်ပါလိမ့်မယ်။ ကမ္ဘာပျက်ချိန် ညွှန်ပြတဲ့ နာရီဟာ မကြုံဖူးတဲ့ဘေးဆိုးကြီး ရောက်တော့မယ်ဆိုတာ ညွှန်ပြဦးမလား။ သင် ဘယ်လိုထင်ပါသလဲ။ ကမ္ဘာကြီး ထိန်းမနိုင်သိမ်းမရ ဖြစ်နေပြီလား။ ဒါဟာ ဖြေရခက်တဲ့မေးခွန်း ဖြစ်နိုင်တယ်။ ပညာရှင်တွေတောင် ဒါနဲ့ပတ်သက်ပြီး သဘောထား ကွဲလွဲနေကြတယ်။ ကမ္ဘာပျက်တော့မယ်ဆိုတာ လူတိုင်း ယုံတာတော့ မဟုတ်ဘူး။
လူသန်းပေါင်းများစွာကတော့ တောက်ပတဲ့ အနာဂတ်ရှိမယ်လို့ ယုံကြည်ကြတယ်။ ကမ္ဘာမြေနဲ့ လူသားတွေ ဆက်တည်ရှိနေမယ်၊ လူတွေရဲ့ဘဝ ပိုကောင်းမွန်လာမယ်ဆိုတဲ့ အထောက်အထားတွေ ရှိတယ်လို့လည်း ဆိုကြတယ်။ အဲဒီအထောက်အထားဟာ စိတ်ချရရဲ့လား။ ကမ္ဘာကြီး ထိန်းမနိုင်သိမ်းမရ ဖြစ်နေတာ အမှန်ပဲလား။