သင်ဟာ ယေဟောဝါသက်သေတွေနဲ့ ကျမ်းစာလေ့လာရာကနေ အမှန်တရားကို သိရှိလာတယ်။ သိရှိလာတဲ့အရာတွေက ဘုရားသခင်နဲ့ ဆက်ဆံရေးကောင်း ရှိဖို့ သင့်ကို ကူညီပေးခဲ့မှာ သေချာတယ်။ အဲဒီအပြင် ဘုရားနိုင်ငံတော်အောက် မြေကြီးပရဒိသုမှာ အနာဂတ်အသက်တာနဲ့ ကောင်းချီးတွေ ရဖို့ မျှော်လင့်ချက် ရှိလာမှာလည်း သေချာတယ်။ ကျမ်းစာကို အခိုင်အမာ ယုံကြည်လာတယ်။ ခရစ်ယာန် အသင်းတော်နဲ့ ပေါင်းသင်းခြင်းကနေလည်း ကောင်းချီးများစွာ ခံစားနေရတယ်။ ဒီနေ့ခေတ် လူမျိုးတော်နဲ့ ယေဟောဝါ ဘယ်လို ဆက်ဆံနေတယ်ဆိုတာ သင် သိရှိခဲ့ရပြီ။—ဇာ. ၈:၂၃။

အခု နှစ်ခြင်းအတွက် အသင့်ပြင်နေချိန်မှာ အခြေခံ ခရစ်ယာန် ယုံကြည်ချက်တွေကို အသင်းတော် အကြီးအကဲတွေနဲ့ ပြန်သုံးသပ်ခြင်းကနေ အကျိုးရရှိပါလိမ့်မယ်။ (ဟီ. ၆:၁-၃) ယေဟောဝါအကြောင်း သိလာဖို့ သင့်ရဲ့ ကြိုးစားအားထုတ်မှုကို ဘုရား ဆက်ကောင်းချီးပေးပြီး ကတိပေးထားတဲ့ ဆုလာဘ်နဲ့ ဆုချပါစေ။—ယော. ၁၇:၃။

၁။ ဘာကြောင့် နှစ်ခြင်းခံချင်သလဲ။

၂။ ယေဟောဝါက ဘယ်သူလဲ။

• ‘အထက်ကောင်းကင်နဲ့ အောက်အရပ်မြေကြီးပေါ်မှာ ယေဟောဝါဟာ စစ်မှန်တဲ့ ဘုရားသခင်ပဲ။ ကိုယ်တော့်လို ဘုရားမျိုး မရှိဘူး။’—တရား. ၄:၃၉။

• “ယေဟောဝါလို့ နာမည်ရှိတဲ့ ကိုယ်တော် တစ်ပါးတည်းသာ မြေတစ်ပြင်လုံးမှာ အမြင့်မြတ်ဆုံးအရှင် ဖြစ်မှန်း လူတွေ သိကြပါစေ။”—ဆာ. ၈၃:၁၈။

၃။ ဘုရားသခင့် ကိုယ်ပိုင်နာမည်ကို သုံးဖို့ ဘာကြောင့် အရေးကြီးသလဲ။

• “ဒီနည်းအတိုင်း ခင်ဗျားတို့ ဆုတောင်းရမယ်– ‘ကောင်းကင်မှာ စံမြန်းတဲ့ ကျွန်တော်တို့ရဲ့ အဖ၊ နာမတော် သန့်ရှင်းမြင့်မြတ်ပါစေ။’”—မ. ၆:၉။

• “ယေဟောဝါရဲ့ နာမည်ကိုခေါ်ပြီး ဆုတောင်းသူတိုင်း ကယ်တင်ခံရမယ်။”—ရော. ၁၀:၁၃။

၄။ ယေဟောဝါနဲ့ပတ်သက်ပြီး ကျမ်းစာမှာ ဘယ်လို အသုံးအနှုန်းတွေ သုံးနှုန်းထားသလဲ။

• “ကမ္ဘာမြေရဲ့ အစွန်အဖျားတွေကို ဖန်ဆင်းတဲ့အရှင် ငါယေဟောဝါဟာ ထာဝစဉ်တည်တဲ့ ဘုရားသခင်ပဲ။”—ဟေရှာ. ၄၀:၂၈။

• “ကောင်းကင်မှာ စံမြန်းတဲ့ ကျွန်တော်တို့ရဲ့ အဖ။”—မ. ၆:၉။

• “ဘုရားသခင်ဟာ ချစ်ခြင်းမေတ္တာ ဖြစ်လို့ပဲ။”—၁ ယော. ၄:၈။

၅။ ယေဟောဝါဘုရားကို သင် ဘာပေးဆက်နိုင်သလဲ။

• “ယေဟောဝါဘုရားကို စိတ်စွမ်းရှိသမျှ၊ ကိုယ်စွမ်းရှိသမျှ၊ ဉာဏ်စွမ်းရှိသမျှ၊ ခွန်အားရှိသမျှနဲ့ ချစ်ပါ။”—မာ. ၁၂:၃၀။

• “ယေဟောဝါဘုရားကို ကိုးကွယ်ရမယ်။ ကိုယ်တော်တစ်ပါးတည်းကိုပဲ ဝတ်ပြုရမယ်။”—လု. ၄:၈။

၆။ ယေဟောဝါအပေါ် ဘာကြောင့် သစ္စာစောင့်သိချင်သလဲ။

• “ငါ့သား၊ ဉာဏ်ပညာရှိပါ။ ငါ့စိတ်ကို ရွှင်လန်းစေပါ။ ဒါမှ ငါ့ကို ကဲ့ရဲ့နေတဲ့သူကို ငါချေပနိုင်မယ်။”—ပညာ. ၂၇:၁၁။

၇။ ဘယ်သူ့ဆီ သင် ဆုတောင်းသလဲ။ ဘယ်သူ့နာမည်ကတစ်ဆင့် ဆုတောင်းသလဲ။

• “ကျွန်တော် [ယေရှု] မှန်တာကို ပြောမယ်၊ အမှန်အတိုင်း ပြောမယ်။ အဖဘုရားက ခင်ဗျားတို့ တောင်းသမျှ ကျွန်တော့်နာမည်ကို ထောက်ပြီး ပေးသနားလိမ့်မယ်။”—ယော. ၁၆:၂၃။

၈။ သင် ဆုတောင်းနိုင်တဲ့ အရာတချို့က ဘာတွေလဲ။

• “ဒီနည်းအတိုင်း ခင်ဗျားတို့ ဆုတောင်းရမယ်– ‘ကောင်းကင်မှာ စံမြန်းတဲ့ ကျွန်တော်တို့ရဲ့ အဖ၊ နာမတော် သန့်ရှင်းမြင့်မြတ်ပါစေ။ နိုင်ငံတော် လာပါစေ။ အလိုတော်ဟာ ကောင်းကင်မှာ ပြည့်စုံသလို ကမ္ဘာမြေမှာလည်း ပြည့်စုံပါစေ။ ဒီနေ့အတွက် ကျွန်တော်တို့ လိုအပ်တဲ့ အစားအစာကို ပေးသနားပါ။ သူတစ်ပါးရဲ့ အပြစ်ကြွေးတွေကို ကျွန်တော်တို့ ခွင့်လွှတ်သလို ကျွန်တော်တို့ရဲ့ အပြစ်ကြွေးတွေကိုလည်း ခွင့်လွှတ်ပေးပါ။ သွေးဆောင်မှုနောက် ပါမသွားအောင် ကူညီပြီး ဆိုးညစ်သူရဲ့ လက်ကနေ ကယ်တင်ပေးပါ။’”—မ. ၆:၉-၁၃။

• “အလိုတော်နဲ့အညီ ဆုတောင်းမယ်ဆိုရင် ဘုရား နားထောင်မယ်ဆိုတာ စိတ်ချတယ်။”—၁ ယော. ၅:၁၄။

၉။ လူတစ်ယောက်ရဲ့ ဆုတောင်းချက်ကို ယေဟောဝါ နားမထောင်တာမျိုး ဘာကြောင့် ဖြစ်နိုင်သလဲ။

• “ယေဟောဝါကို သူတို့ အော်ဟစ်အကူအညီတောင်းပေမဲ့ [သူတို့ရဲ့ ဆိုးညစ်တဲ့ အကျင့်တွေကြောင့်] ဘုရားက ပြန်ဖြေမှာ မဟုတ်ဘူး။”—မိ. ၃:၄။

• “ယေဟောဝါက ဖြောင့်မတ်သူတွေကို ကြည့်ရှုနေတယ်။ သူတို့ တိုးလျှိုးအသနားခံတာကို နားထောင်နေတယ်။ မကောင်းမှုပြုသူတွေကိုတော့ ယေဟောဝါ မျက်နှာလွှဲတယ်။”—၁ ပေ. ၃:၁၂။

၁၀။ ယေရှုခရစ်ဆိုတာ ဘယ်သူလဲ။

• “ရှိမုန်ပေတရုက ‘သခင်ဟာ ခရစ်တော်ပဲ။ အသက်ရှင်နေတဲ့ ဘုရားသခင်ရဲ့ သားပါ’ လို့ ပြန်ဖြေတယ်။”—မ. ၁၆:၁၆။

၁၁။ ယေရှု ကမ္ဘာပေါ် ဘာကြောင့် လာခဲ့သလဲ။

• “လူသား [ဟာ] သူတစ်ပါးကို စေခိုင်းဖို့ လာတာ မဟုတ်ဘူး။ သူတစ်ပါးအစေကိုခံပြီး လူအများအတွက် ရွေးဖိုးအဖြစ် အသက်ကိုပေးဖို့ ရောက်လာတာ။”—မ. ၂၀:၂၈။

• “ဘုရားသခင့်နိုင်ငံတော် သတင်းကောင်းကို တခြားမြို့ရွာတွေမှာလည်း ဟောရဦးမယ်။ အဲဒီအတွက် ကျွန်တော့် [ယေရှု] ကို စေလွှတ်လိုက်တာ။”—လု. ၄:၄၃။

၁၂။ ယေရှုရဲ့ ရွေးဖိုးပူဇော်သက္ကာအတွက် ကျေးဇူးတင်ကြောင်း ဘယ်လို ပြနိုင်သလဲ။

• “လူအားလုံးအတွက် အသေခံတဲ့သူဟာ ခရစ်တော်ပဲ။ ဒါကြောင့် အသက်ရှင်နေသူတွေဟာ ကိုယ့်အတွက် အသက်မရှင်တော့ဘဲ ကိုယ့်အတွက် အသေခံပြီး အသက်ပြန်ရှင်လာတဲ့ ခရစ်တော်အတွက် အသက်ရှင်သင့်တယ်။”—၂ ကော. ၅:၁၅။

၁၃။ ယေရှုမှာ ဘာအခွင့်အာဏာ ရှိသလဲ။

• “ကောင်းကင်မှာရော မြေကြီးမှာပါ အခွင့်အာဏာရှိသမျှကို ကျွန်တော့်ကို ပေးထားပြီ။”—မ. ၂၈:၁၈။

• “ဘုရားသခင်က သူ့ကို သာလွန်မြင့်မြတ်တဲ့ အနေအထားရောက်အောင် ချီးမြှောက်ပြီး ဘွဲ့နာမတကာထက် ကြီးမြတ်တဲ့ ဘွဲ့နာမကို ပေးသနားလိုက်ပြီ။”—ဖိ. ၂:၉။

၁၄။ ယေဟောဝါသက်သေတွေရဲ့ အုပ်ချုပ်ရေးအဖွဲ့ဟာ ယေရှု ခန့်အပ်ထားတဲ့ “သစ္စာနဲ့ သတိပညာရှိတဲ့ ကျွန်” ဖြစ်တယ်လို့ ယုံကြည်ပါသလား။

• “သစ္စာနဲ့ သတိပညာရှိတဲ့ ကျွန်ဟာ တကယ်တော့ ဘယ်သူလဲ။ အိမ်သူအိမ်သားတွေကို အချိန်တန်ရင် အစားအစာ ဝေပေးဖို့ သူ့ကို သခင် ခန့်အပ်ထားတယ်။”—မ. ၂၄:၄၅။

၁၅။ သန့်ရှင်းသော စွမ်းအားတော်ဟာ ပုဂ္ဂိုလ်တစ်ပါးလား။

• “ကောင်းကင်တမန်က ‘ခင်ဗျားအပေါ် သန့်ရှင်းသော စွမ်းအားတော် သက်ရောက်ပြီး အမြင့်ဆုံးအရှင်ရဲ့ တန်ခိုးတော် လွှမ်းမိုးလိမ့်မယ်။ ဒါကြောင့် မွေးလာမယ့် ကလေးဟာ သန့်ရှင်းတဲ့သူ၊ ဘုရားသခင်ရဲ့ သားလို့ အခေါ်ခံရလိမ့်မယ်။’”—လု. ၁:၃၅။

• “ခင်ဗျားတို့ အပြစ်သားတွေတောင် ကိုယ့်သားသမီးကို ကောင်းတာတွေ ပေးတတ်ရင် ကောင်းကင်မှာ စံမြန်းတဲ့ အဖဘုရားက တောင်းတဲ့သူတွေကို သန့်ရှင်းသော စွမ်းအားတော် ပိုလို့တောင် ပေးမှာ မဟုတ်လား။”—လု. ၁၁:၁၃။

၁၆။ သန့်ရှင်းသော စွမ်းအားတော်ကို ယေဟောဝါ ဘယ်လို အသုံးပြုသလဲ။

• “ယေဟောဝါက ကောင်းကင်ကို နှုတ်တော်ထွက်စကားနဲ့၊ ကောင်းကင်မှာရှိတဲ့ အရာအားလုံးကို နှုတ်တော်ထွက်လေနဲ့ ဖန်ဆင်းတယ်။”—ဆာ. ၃၃:၆။

• “ခင်ဗျားတို့ သန့်ရှင်းသော စွမ်းအားတော် ရတဲ့အခါ တန်ခိုးရပြီး . . . ကမ္ဘာမြေအစွန်အဖျားအထိ ကျွန်တော့်အကြောင်း သက်သေခံကြလိမ့်မယ်။”—တ. ၁:၈။

• “ကျမ်းစာပရောဖက်ပြုချက်ဆိုတာ တစ်ဦးတစ်ယောက်ရဲ့ အယူအဆကို အခြေခံပြီး ပေါ်ပေါက်လာတာ မဟုတ်[ဘူး]။ . . . ပရောဖက်ပြုချက်ဆိုတာ လူ့အလိုအတိုင်း ဖြစ်ပေါ်လာတာ မဟုတ်ဘူး။ လူတွေက သန့်ရှင်းသော စွမ်းအားတော်ရဲ့ လှုံ့ဆော်မှုကို ခံရလို့ ဘုရားသခင်ဆီက လာတဲ့ စကားတွေကို ပြန်ဟောတာ ဖြစ်တယ်။”—၂ ပေ. ၁:၂၀၊ ၂၁။

၁၇။ ဘုရားသခင့် နိုင်ငံတော်ဆိုတာ ဘာလဲ။

• “အဲဒီဘုရင်တွေလက်ထက်မှာ ကောင်းကင်အုပ်စိုးရှင် ဘုရားသခင်က ဘယ်တော့မှ မပျက်စီးမယ့် နိုင်ငံတစ်ခုကို တည်ထောင်လိမ့်မယ်။ အဲဒီနိုင်ငံဟာ တခြားလူတွေလက်ထဲ ရောက်မှာ မဟုတ်ဘူး။ အထက်မှာ ပြောခဲ့တဲ့ နိုင်ငံအားလုံးကို ခြေမွှဖျက်ဆီးလိမ့်မယ်။ ပြီးတဲ့နောက် အဲဒီနိုင်ငံတစ်ခုပဲ ထာဝစဉ် တည်တံ့နေမယ်။”—ဒံ. ၂:၄၄။

၁၈။ ဘုရားသခင့်နိုင်ငံတော်က သင့်ကို ဘယ်လို အကျိုးပြုမလဲ။

• “ဘုရားသခင်က သူတို့ရဲ့ မျက်ရည်ရှိသမျှကို သုတ်ပေးလိမ့်မယ်။ သူတို့ သေဆုံးရတော့မှာ မဟုတ်ဘူး။ ငိုကြွေးမြည်တမ်းတာ၊ အော်ဟစ်တာ၊ နာကျင်တာတွေလည်း ရှိတော့မှာ မဟုတ်ဘူး။ အရင်က ဖြစ်ဖူးတာတွေ ကွယ်ပျောက်သွားပြီ။”—ဗျာ. ၂၁:၄။

၁၉။ နိုင်ငံတော်ကောင်းချီးတွေ မကြာခင် ရရှိတော့မယ်ဆိုတာ ဘယ်လို သိရသလဲ။

• “တပည့်တွေချည်းပဲ လာပြီး ‘သခင်၊ ကျွန်တော်တို့ကို ပြောပြပါ။ အဲဒါတွေ ဘယ်တော့ဖြစ်မှာလဲ။ သခင် ရောက်ရှိနေပြီ၊ လောကစနစ်နိဂုံးပိုင်းကို ရောက်နေပြီဆိုတဲ့ နိမိတ်ဟာ ဘာလဲ’ လို့ မေးကြတယ်။ အဲဒီအခါ ယေရှု အခုလို ပြောတယ်– ‘. . . လူတစ်မျိုးနဲ့ တစ်မျိုး၊ တစ်နိုင်ငံနဲ့ တစ်နိုင်ငံ တိုက်ခိုက်ကြလိမ့်မယ်။ အစာခေါင်းပါးတာ၊ ငလျင်လှုပ်တာတွေ တစ်နေရာပြီး တစ်နေရာ ဖြစ်လိမ့်မယ်။ လူမျိုးအားလုံးအတွက် သက်သေဖြစ်စေဖို့ နိုင်ငံတော် သတင်းကောင်းကို လူနေထိုင်ရာ မြေတစ်ခွင်လုံးမှာ ဟောပြောရလိမ့်မယ်။ ပြီးမှ အဆုံး ရောက်လာလိမ့်မယ်။’”—မ. ၂၄:၃၊ ၄၊ ၇၊ ၁၄။

• “နောက်ဆုံးကာလဟာ အလွန် ခက်ခဲကျပ်တည်းမယ်။ . . . ဘာလို့လဲဆိုတော့ လူတွေဟာ ကိုယ့်ကိုယ်ကိုယ်ပဲ ချစ်တဲ့သူ၊ ငွေကိုတပ်မက်သူ၊ ဝါကြွားသူ၊ မောက်မာသူ၊ ဘုရားကို စော်ကားပြောဆိုသူ၊ မိဘစကား နားမထောင်သူ၊ ကျေးဇူးကန်းသူ၊ သစ္စာမရှိသူ၊ ချစ်ခင်တွယ်တာစိတ် မရှိသူ၊ ညှိနှိုင်းလို့မရသူ၊ သွားပုပ်လေလွင့်ပြောသူ၊ မချုပ်တည်းနိုင်သူ၊ ကြမ်းကြုတ်သူ၊ ကောင်းမြတ်ရာကို မုန်းတီးသူ၊ သစ္စာဖောက်သူ၊ တဇောက်ကန်းနိုင်သူ၊ မာနထောင်လွှားသူ၊ ဘုရားသခင်ကို ချစ်တာထက် အပျော်အပါးကို ပိုနှစ်သက်သူ၊ ဘုရားတရား ကြည်ညိုဟန်ရှိပေမဲ့ တရားကို လက်တွေ့မကျင့်သူတွေ ဖြစ်ကြလိမ့်မယ်။”—၂ တိ. ၃:၁-၅။

၂၀။ နိုင်ငံတော်ဟာ သင့်အတွက် အရေးကြီးကြောင်း သင် ဘယ်လို ပြနေသလဲ။

• “ဘုရားသခင်ရဲ့ နိုင်ငံတော်နဲ့ ဘုရားသခင်ရဲ့ ဖြောင့်မတ်ခြင်းကို အမြဲ ဦးစားထားကြပါ။”—မ. ၆:၃၃။

• “ယေရှုက ‘ကျွန်တော့်နောက်လိုက် ဖြစ်ချင်သူတိုင်း ကိုယ့်ကိုယ်ကိုယ် ငြင်းပယ်ရမယ်။ ဒုက္ခသစ်တိုင်ကို ထမ်းပြီး ကျွန်တော့်နောက်ကို အမြဲလိုက်ရမယ်။’”—မ. ၁၆:၂၄။

၂၁။ စာတန်နဲ့ နတ်ဆိုးတွေက ဘယ်သူတွေလဲ။

• “ခင်ဗျားတို့ရဲ့ အဖဟာ မာရ်နတ်ပဲ။ . . . သူဟာ အစကတည်းက လူ့အသက်သတ်တဲ့သူပဲ။”—ယော. ၈:၄၄။

• “လူနေထိုင်ရာ မြေတစ်ပြင်လုံးကို လှည့်စားသူ၊ မာရ်နတ် စာတန်လို့ ခေါ်တဲ့ ရှေးမြွေဟောင်း၊ နဂါးကြီးဟာ မြေကြီးပေါ် ပစ်ချခံရတယ်။ သူနဲ့အတူ သူ့ရဲ့ ကောင်းကင်တမန်တွေလည်း ပစ်ချခံရတယ်။”—ဗျာ. ၁၂:၉။

၂၂။ ယေဟောဝါနဲ့ ဝတ်ပြုကိုးကွယ်သူတွေကို စာတန် ဘယ်လို စွပ်စွဲနေသလဲ။

• “မိန်းမက ‘ဥယျာဉ်ထဲမှာရှိတဲ့ အပင်တွေရဲ့ အသီးကို ကျွန်မတို့ စားလို့ရပါတယ်။ ဥယျာဉ်ထဲက အပင်တစ်ပင်ရဲ့ အသီးကိုတော့ “မစားနဲ့၊ မထိနဲ့။ စားမယ်၊ ထိမယ်ဆိုရင် သေရမယ်” ဆိုပြီး ဘုရားသခင် မှာထားတယ်’ လို့ ပြန်ဖြေတယ်။ မြွေကလည်း ‘မင်းတို့ လုံးဝ သေမှာမဟုတ်ဘူး။ တကယ်တော့ အဲဒီအသီးကို စားတဲ့နေ့မှာပဲ မျက်စိပွင့် လာမယ်၊ အကောင်းအဆိုးကို သိလာပြီး ဘုရားလို ဖြစ်လာမယ်ဆိုတာ ဘုရားသခင် သိတယ်’ လို့ ပြောတယ်။”—က. ၃:၂-၅။

• “စာတန်က ယေဟောဝါကို ‘အသက်အတွက် အသက်ဆိုသလိုပေါ့။ လူတွေဟာ အသက်ဆက်ရှင်ဖို့ ကိုယ်ပိုင်ဆိုင်သမျှကို ပေးမှာပဲ။’”—ယောဘ ၂:၄။

၂၃။ စာတန့်စွပ်စွဲချက်တွေ မှားမှန်း ဘယ်လို သက်သေထူနိုင်သလဲ။

• ‘ဘုရားကို စိတ်နှလုံးအကြွင်းမဲ့ ဝတ်ပြုပါ။’—၁ ရာ. ၂၈:၉။

• “သေတဲ့အထိ ကျုပ်ရဲ့ သမာဓိကို မစွန့်ဘူး။”—ယောဘ ၂၇:၅။

၂၄။ လူတွေ ဘာကြောင့် သေတာလဲ။

• “အပြစ်ဟာ လူတစ်ယောက်ကြောင့် လူ့လောကထဲ ရောက်လာတယ်။ အပြစ်ကြောင့် သေခြင်းလည်း ပေါ်ပေါက်လာတယ်။ ဒါကြောင့် လူအားလုံးဟာ အပြစ်ရှိသူတွေ ဖြစ်သွားတဲ့အတွက် သေဆုံးကြရတယ်။”—ရော. ၅:၁၂။

၂၅။ လူသေတွေ ဘယ်လို အခြေအနေမှာ ရှိနေသလဲ။

• “အသက်ရှင်နေသူက သေရမှာကို သိတယ်။ သေလွန်သူကတော့ ဘာမှမသိဘူး။”—ဒေ. ၉:၅။

၂၆။ သေလွန်သွားသူအတွက် ဘာမျှော်လင့်ချက် ရှိသလဲ။

• ‘ဖြောင့်မတ်သူရော မဖြောင့်မတ်သူတွေပါ ရှင်ပြန်ထမြောက်လာမယ်။’—တ. ၂၄:၁၅။

၂၇။ ယေရှုနဲ့အတူ အုပ်ချုပ်ဖို့ ကောင်းကင်ကို ဘယ်နှယောက် သွားမလဲ။

• “ကျွန်တော် ကြည့်လိုက်တဲ့အခါ ဇိအုန်တောင်ပေါ်မှာ သိုးသငယ် ရပ်နေတာကို မြင်တယ်။ သူ့နာမည်နဲ့ အဖဘုရားရဲ့ နာမည်ကို နဖူးပေါ်မှာရေးထားတဲ့သူ ၁၄၄,၀၀၀ လည်း သူနဲ့အတူ ရှိနေတယ်။”—ဗျာ. ၁၄:၁။

သင့်ဆီကနေ ယေဟောဝါ ဘာတောင်းဆိုထားသလဲ၊ ဘုရားရဲ့ ဖြောင့်မတ်တဲ့ စံနှုန်းတွေအတိုင်း ဘယ်လို နေထိုင်ရမလဲဆိုတာ ကျမ်းစာလေ့လာမှုကနေ သင်သိရှိလာခဲ့ပြီ။ သိရှိလာတာတွေကို လိုက်နာတဲ့အတွက် သင့်ရဲ့ အကျင့်အကြံနဲ့ ဘဝအပေါ် သဘောထားတွေမှာ ပြုပြင်ပြောင်းလဲမှု အတော်များများ ပြုလုပ်ခဲ့ရမှာပဲ။ အခု ယေဟောဝါရဲ့ ဖြောင့်မတ်တဲ့ စံနှုန်းတွေအတိုင်း နေထိုင်ဖို့ သင် ဆုံးဖြတ်ထားပြီဖြစ်လို့ သတင်းကောင်းရဲ့ အမှုဆောင်တစ်ဦးအဖြစ် လက်ခံဖွယ်နည်းနဲ့ ဝတ်ပြုနိုင်တဲ့ အနေအထားမှာ ရှိနေပြီ။

အောက်ပါမေးခွန်းတွေကို သုံးသပ်ခြင်းက ယေဟောဝါရဲ့ ဖြောင့်မတ်တဲ့ တောင်းဆိုချက်တွေကို စိတ်စွဲမှတ်ထားနိုင်ဖို့ ကူညီပေးပြီး ဘုရားသခင် လက်ခံတဲ့ ကျေးကျွန်တစ်ဦး ဖြစ်လာဖို့ သင် လုပ်ဆောင်နိုင်တဲ့ အရာတချို့ကို ပြန်အမှတ်ရစေပါလိမ့်မယ်။ အရာအားလုံးကို ကြည်လင်တဲ့သိစိတ်နဲ့ လုပ်ဆောင်ခြင်း၊ ယေဟောဝါကို ဂုဏ်တင်ဖို့ လုပ်ဆောင်ခြင်းရဲ့ အရေးကြီးမှုကိုလည်း စွဲမှတ်စေပါလိမ့်မယ်။—၂ ကော. ၁:၁၂။ ၁ တိ. ၁:၁၉။ ၁ ပေ. ၃:၁၆၊ ၂၁။

ဒီအဆင့်အထိ လေ့လာသင်ယူခဲ့ပြီ ဖြစ်လို့ ယေဟောဝါရဲ့ အုပ်ချုပ်မှုကို လက်အောက်ခံဖို့၊ ဘုရားအဖွဲ့အစည်းဝင် ဖြစ်ဖို့ စိတ်ပြင်းပြနေမှာ သေချာပါတယ်။ မေးခွန်းတွေနဲ့ ရည်ညွှန်းကျမ်းချက်တွေက အသင်းတော်၊ မိသားစု၊ ဒီလောကစနစ်ရဲ့ နိုင်ငံရေး အဖွဲ့အစည်းတွေနဲ့ပတ်သက်တဲ့ ယေဟောဝါရဲ့ အစီအစဉ်ကို လက်အောက်ခံခြင်းအကြောင်း သင့်နားလည်မှုကို ဆန်းစစ်ဖို့ ကူညီပေးပါလိမ့်မယ်။ မိမိလူမျိုးကို ပညာပေးဖို့၊ ယုံကြည်ခြင်း ခိုင်ခံ့လာစေဖို့ ပြင်ဆင်ပေးထားတဲ့ ယေဟောဝါရဲ့ အစီအစဉ်တွေကို သင် ပိုတန်ဖိုးထားလေးမြတ်လာမှာ သေချာပါတယ်။ အဲဒီထဲမှာ အခြေအနေ ခွင့်ပြုသရွေ့ သင် တက်ရောက်ပါဝင်နိုင်တဲ့ အသင်းတော် အစည်းအဝေးတွေ ပါဝင်တယ်။

အဲဒီအပြင် နိုင်ငံတော်သတင်း ဟောပြောခြင်းမှာ ပုံမှန် ပါဝင်ခြင်း၊ ယေဟောဝါအကြောင်း၊ လူသားတွေအတွက် ဘုရားလုပ်ဆောင်ပေးနေတဲ့ အရာတွေအကြောင်း တခြားသူတွေ သိလာအောင် ကူညီပေးခြင်းရဲ့ အရေးကြီးမှုကို ဒီအပိုင်းမှာ ဆွေးနွေးပါမယ်။ (မ. ၂၄:၁၄။ ၂၈:၁၉၊ ၂၀) နောက်ဆုံးအနေနဲ့ ယေဟောဝါဘုရားဆီ ဆက်ကပ်အပ်နှံခြင်းနဲ့ နှစ်ခြင်းရဲ့ လေးနက်မှုကို စိတ်စွဲမှတ်စေပါလိမ့်မယ်။ သင့်အကျိုးအတွက် ယေဟောဝါ ဖော်ပြတဲ့ မဟာကရုဏာအပေါ် သင် စိတ်ရင်းမှန်နဲ့ တုံ့ပြန်တာကို ဘုရား တန်ဖိုးထားကြောင်း ယုံကြည်စိတ်ချနိုင်ပါတယ်။

၁။ အိမ်ထောင်အတွက် ခရစ်ယာန်စံနှုန်းက ဘာလဲ။ ကွာရှင်းနိုင်တဲ့ တစ်ခုတည်းသော ကျမ်းစာအကြောင်းရင်းက ဘာလဲ။

• “အစအဦးမှာ ဖန်ဆင်းရှင်က ယောက်ျားနဲ့ မိန်းမကို ဖန်ဆင်းခဲ့တဲ့အကြောင်း မဖတ်ဖူးဘူးလား။ ‘ဒါကြောင့် ယောက်ျားက မိဘကို ထားခဲ့ပြီး ဇနီးနဲ့ မခွဲအတူ နေလိမ့်မယ်။ သူတို့နှစ်ယောက်ဟာ တစ်သားတစ်ကိုယ်တည်း ဖြစ်လိမ့်မယ်’ လို့ ပြောခဲ့တာကိုလည်း မဖတ်ဖူးဘူးလား။ သူတို့ဟာ နှစ်ယောက်မဟုတ်တော့ဘဲ တစ်သားတစ်ကိုယ်တည်း ဖြစ်သွားပြီ။ ဒါကြောင့် ဘုရားသခင် တွဲဖက်ထားသူတွေကို ဘယ်သူမှ မခွဲကြနဲ့။ ကိုယ့်ဇနီးကို လိင်အကျင့်ယိုယွင်းမှုကြောင့် မဟုတ်ဘဲ တခြားအကြောင်းကြောင့် ကွာရှင်းပြီး တခြားသူနဲ့ လက်ထပ်တဲ့သူဟာ အိမ်ထောင်ရေး ဖောက်ပြန်သူပဲ။”—မ. ၁၉:၄-၆၊ ၉။

၂။ အကြင်လင်မယားအဖြစ် အတူနေထိုင်သူတွေဟာ ဘာကြောင့် တရားဝင် ထိမ်းမြားထားသင့်သလဲ။ သင်ဟာ အိမ်ထောင်သည်ဖြစ်မယ်ဆိုရင် အစိုးရ အသိအမှတ်ပြုတဲ့ ပုံစံအတိုင်း တရားဝင် လက်ထပ်ထားသလား။

• “အစိုးရနဲ့ အာဏာပိုင်တွေကို လက်အောက်ခံပြီး နာခံဖို့ . . . သူတို့ကို မပြတ်သတိပေးနေပါ။”—တိ. ၃:၁၊ ၂။

• “အိမ်ထောင်မင်္ဂလာကို လူတိုင်း လေးစားရမယ်။ အိမ်ထောင်မင်္ဂလာကို မညစ်ညူးစေပါနဲ့။ လိင်အကျင့်ယိုယွင်းသူတွေ၊ အိမ်ထောင်ရေးဖောက်ပြန်သူတွေကို ဘုရားသခင် ပြစ်ဒဏ်စီရင်လိမ့်မယ်။”—ဟီ. ၁၃:၄။

၃။ မိသားစုမှာ သင့်အခန်းကဏ္ဍက ဘာလဲ။

• “ငါ့သား၊ ဖခင်ရဲ့ ဆုံးမစကားကို နားထောင်ပါ။ မိခင်ရဲ့ သွန်သင်ချက်ကို မပစ်ပယ်ပါနဲ့။”—ပညာ. ၁:၈။

• “ခရစ်တော်ဟာ အသင်းတော်ရဲ့ ဦးခေါင်းဖြစ်သလို ခင်ပွန်းကလည်း ဇနီးရဲ့ ဦးခေါင်းဖြစ်လို့ပဲ။ . . . ခင်ပွန်းတို့၊ ဇနီးကို ချစ်မြဲချစ်ကြပါ။ ခရစ်တော်က အသင်းတော်ကို ချစ် . . . သလိုပေါ့။”—ဧ. ၅:၂၃၊ ၂၅။

• “ဖခင်တို့၊ သားသမီးတွေကို စိတ်ဆိုးအောင် မလုပ်ကြနဲ့။ ယေဟောဝါ မိန့်မှာတဲ့အတိုင်း သူတို့ကို ဆုံးမသွန်သင်ပြီး ပြုစုပျိုးထောင်ကြပါ။”—ဧ. ၆:၄။

• “သားသမီးတို့၊ မိဘစကားကို အရာရာမှာ နာခံကြပါ။ အဲဒီလိုနာခံတာကို သခင် နှစ်သက်တယ်။”—ကော. ၃:၂၀။

• “ဇနီးတို့၊ ခင်ပွန်းကို လက်အောက်ခံကြပါ။”—၁ ပေ. ၃:၁။

၄။ အသက်ကို ဘာကြောင့် လေးမြတ်သင့်သလဲ။

• “ဘုရားသခင်ဟာ လူအားလုံးကို အသက်နဲ့ ထွက်သက်ဝင်သက်ကို ပေးတဲ့အရှင်၊ အရာခပ်သိမ်းကို ပေးသနားတဲ့အရှင် ဖြစ်လို့ပဲ။ . . . ဘုရားသခင်ကြောင့်သာ ကျွန်တော်တို့ ဖြစ်တည်နေတာ၊ အသက်ရှင်ပြီး သွားလာလှုပ်ရှားနေတာပါ။”—တ. ၁၇:၂၅၊ ၂၈။

၅။ မမွေးသေးတဲ့ ကလေး အပါအဝင် ဘယ်သူ့ကိုမှ မသတ်သင့်တာ ဘာကြောင့်လဲ။

• “ယောက်ျားချင်း ခိုက်ရန်ဖြစ်တဲ့အခါ ကိုယ်ဝန်ဆောင်မိခင်ကို ထိခိုက်မိပြီး . . . တစ်ယောက်ယောက်သေရင် အသက်အတွက် အသက် ပြန်လျော်ပေးရမယ်။”—ထွ. ၂၁:၂၂၊ ၂၃။

• “ကျွန်တော် သန္ဓေသားလောင်းအရွယ်မှာတောင် ကိုယ်တော် မြင်တယ်။ အင်္ဂါအစိတ်အပိုင်းလေးတွေ တစ်ခုမှ မရှိခင်ကတည်းက ဘယ်အပိုင်းလေးက ဘယ်နေ့မှာ ပုံပေါ်လာမယ်ဆိုတာကို ကိုယ်တော့်စာစောင်ထဲမှာ တစ်ခုမကျန် ရေးမှတ်ထားတယ်။”—ဆာ. ၁၃၉:၁၆။

• “ယေဟောဝါ မုန်းတီးတဲ့အရာက . . . အပြစ်မဲ့သူကို သတ်တဲ့လက်။”—ပညာ. ၆:၁၆၊ ၁၇။

၆။ သွေးနဲ့ပတ်သက်တဲ့ ဘုရားပညတ်က ဘာလဲ။

• ‘သွေး၊ လည်ညှစ်သတ်ထားတဲ့ တိရစ္ဆာန်ကို အမြဲရှောင်ကြဉ်ကြပါ။’—တ. ၁၅:၂၉။

၇။ ခရစ်ယာန် ညီအစ်ကိုညီအစ်မတွေကို ဘာကြောင့် ချစ်ရမလဲ။

• “အချင်းချင်း ချစ်ကြပါဆိုတဲ့ ပညတ်အသစ်တစ်ခု ကျွန်တော်ပေးမယ်။ ခင်ဗျားတို့ကို ကျွန်တော်ချစ်သလို အချင်းချင်း ချစ်ကြပါ။ အချင်းချင်း ချစ်မယ်ဆိုရင် ခင်ဗျားတို့ဟာ ကျွန်တော့်တပည့်တွေပဲဆိုတာ လူတွေ သိလိမ့်မယ်။”—ယော. ၁၃:၃၄၊ ၃၅။

၈။ တခြားသူတွေကို ကူးစက်ရောဂါ ဒါမှမဟုတ် သေစေနိုင်တဲ့ရောဂါ ကူးစက်စေခြင်းကို ရှောင်ဖို့ ကူးစက်ရောဂါရှိသူဟာ (က) ဖက်ခြင်း၊ နမ်းခြင်း စတဲ့ ချစ်ခင်မှုကို ဘာကြောင့် မပြသင့်သလဲ။ (ခ) တချို့က အိမ်ကို မဖိတ်ခေါ်တဲ့အခါမျိုးမှာ ဘာကြောင့် အပျက်သဘောနဲ့ မတုံ့ပြန်သင့်သလဲ။ (ဂ) ကူးစက်ရောဂါရှိခဲ့ဖူးသူဟာ မပိုးပန်းမီ ဘာကြောင့် စိတ်လိုကိုယ်လျောက် သွေးစစ်သင့်သလဲ။ (ဃ) ကူးစက်ရောဂါရှိသူဟာ နှစ်ခြင်းမခံခင် အကြီးအကဲအဖွဲ့ ညှိနှိုင်းရေးမှူးကို ဘာကြောင့် အသိပေးသင့်သလဲ။

• “အချင်းချင်းအပေါ် မေတ္တာကြွေးကလွဲလို့ ဘာအကြွေးမှ မတင်စေနဲ့။ . . . ‘လူလူချင်းကို ကိုယ်နဲ့ထပ်တူ ချစ်ပါ။’ . . . မေတ္တာဟာ သူတစ်ပါးကို နစ်နာအောင် မလုပ်တတ်ဘူး။”—ရော. ၁၃:၈-၁၀။

• “ကိုယ့်အကျိုးကိုပဲ အာရုံမစိုက်ပါနဲ့၊ သူတစ်ပါးအကျိုးကိုလည်း ထည့်စဉ်းစားပေးကြပါ။”—ဖိ. ၂:၄။

၉။ တခြားသူတွေကို ကျွန်တော်တို့ ခွင့်လွှတ်ဖို့ ယေဟောဝါ ဘာကြောင့် မျှော်လင့်သလဲ။

• “အချင်းချင်း မကျေနပ်စရာ ရှိနေရင်တောင် ဆက်ပြီးသည်းခံကြပါ၊ ကြည်ကြည်ဖြူဖြူ ခွင့်လွှတ်ကြပါ။ ယေဟောဝါက ခင်ဗျားတို့ကို ကြည်ကြည်ဖြူဖြူ ခွင့်လွှတ်သလို ခင်ဗျားတို့လည်း အဲဒီလိုပဲ ခွင့်လွှတ်ကြပါ။”—ကော. ၃:၁၃။

၁၀။ ညီအစ်ကိုတစ်ယောက် သင့်ကို အသရေဖျက်ပြောဆိုရင်၊ လိမ်လည်လှည့်စားရင် ဘာလုပ်သင့်သလဲ။

• “ညီအစ်ကိုက အပြစ်တစ်ခုခုလုပ်ရင် သူနဲ့ နှစ်ယောက်ချင်းတွေ့ပြီး သူ့အမှားကို ပြောပြပါ။ ကိုယ့်စကားကို သူနားထောင်တယ်ဆိုရင် သူ့ကို လမ်းမှန်ရောက်အောင် လုပ်နိုင်ပြီ။ နားမထောင်ရင် လူတစ်ယောက် နှစ်ယောက်ကို ခေါ်သွားပါ။ ဘယ်ကိစ္စမဆို သက်သေနှစ်ယောက် ဒါမှမဟုတ် သုံးယောက်ရဲ့ ထွက်ဆိုချက်ရှိမှ အတည်ဖြစ်တယ်။ သူတို့ရဲ့စကားကို နားမထောင်ဘူးဆိုရင် အသင်းတော်ကို အကြောင်းကြားပါ။ အသင်းတော်ရဲ့ စကားကိုတောင် နားမထောင်ဘူးဆိုရင် သူ့ကို လူမျိုးခြား၊ အခွန်ခံလို့ပဲ သတ်မှတ်လိုက်ပါ။”—မ. ၁၈:၁၅-၁၇။

၁၁။ အောက်ပါအပြစ်တွေကို ယေဟောဝါ ဘယ်လို ရှုမြင်သလဲ။

▪ လိင်အကျင့်ယိုယွင်းတာ

▪ ဝတ်ပြုရေးမှာ ရုပ်တု အသုံးပြုတာ

▪ လိင်တူဆက်ဆံတာ

▪ ခိုးတာ

▪ လောင်းကစားတာ

▪ သောက်စားမူးယစ်တာ

• “လှည့်ဖြားမခံကြပါနဲ့။ လိင်အကျင့်ယိုယွင်းသူ၊ ရုပ်တုကိုးကွယ်သူ၊ အိမ်ထောင်ရေးဖောက်ပြန်သူ၊ မိန်းမလျှာ၊ ယောက်ျားချင်း လိင်ဆက်ဆံသူ၊ သူခိုး၊ လောဘကြီးသူ၊ သောက်ကြူးသူ၊ ဆဲဆိုသူ၊ လုယက်သူတွေဟာ ဘုရားသခင်ရဲ့ နိုင်ငံတော်ကို အမွေမခံရဘူး။”—၁ ကော. ၆:၉၊ ၁၀။

၁၂။ အိမ်ထောင်ဖက် မဟုတ်သူနဲ့ လိင်အကျင့်ပျက်တဲ့ လုပ်ရပ်အမျိုးမျိုး အပါအဝင် လိင်အကျင့် ယိုယွင်းခြင်းနဲ့ပတ်သက်ပြီး သင် ဘယ်လို စိတ်ပိုင်းဖြတ်ထားသလဲ။

• “လိင်အကျင့်ယိုယွင်းမှုကို ဝေးဝေးရှောင်ကြပါ။”—၁ ကော. ၆:၁၈။

၁၃။ ဆေးကုသမှုအတွက် မဟုတ်ဘဲ စွဲစေတဲ့၊ စိတ်ကို ပြောင်းလဲစေတဲ့အရာတွေ အသုံးပြုတာကို ဘာကြောင့် ရှောင်သင့်သလဲ။

• “အသက်ရှင်နေတဲ့၊ သန့်ရှင်းတဲ့၊ ဘုရားသခင် လက်ခံနိုင်တဲ့ ပူဇော်သက္ကာအဖြစ် မိမိတို့ရဲ့ ကိုယ်ခန္ဓာကို ဆက်သကြပါ။ ဒီလိုဆိုရင် စဉ်းစားဆင်ခြင်နိုင်စွမ်းကို သုံးပြီး ဘုရားသခင်အတွက် အမှုဆောင်ရာရောက်တယ်။ ဒီလောကစနစ်ရဲ့ ပုံသွင်းမှုကို မခံပါနဲ့တော့။ ဘုရားသခင်ရဲ့ ကောင်းမြတ်တဲ့၊ လက်ခံဖွယ်ဖြစ်တဲ့၊ ပြီးပြည့်စုံလင်တဲ့ အလိုတော်ကို ကောင်းကောင်းသိနိုင်ဖို့ ခင်ဗျားတို့ရဲ့ စိတ်သဘောကို ပြုပြင်ပြောင်းလဲကြပါ။”—ရော. ၁၂:၁၊ ၂။

၁၄။ ဘုရား တားမြစ်ထားတဲ့ နတ်ဆိုးနဲ့ဆိုင်တဲ့ လုပ်ရပ်တချို့က ဘာတွေလဲ။

• “ခင်ဗျားတို့ဆီမှာ ကိုယ့်သားသမီးကို မီးရှို့ပူဇော်သူ၊ နတ်ဆရာ၊ မှော်ဆရာ၊ နိမိတ်ဖတ်သူ၊ ပယောဂဆရာ၊ စုန်းအတတ်နဲ့ပြုစားသူ၊ နတ်ကတော်ကို၊ ဗေဒင်ဆရာကို မေးမြန်းတဲ့သူ၊ လူသေကို မေးမြန်းတဲ့သူ တစ်ယောက်မှ မရှိရဘူး။”—တရား. ၁၈:၁၀၊ ၁၁။

၁၅။ လူတစ်ယောက် ကြီးလေးတဲ့အပြစ် ကျူးလွန်မိပြီး ယေဟောဝါရဲ့ မျက်နှာသာ ပြန်ခံစားချင်တယ်ဆိုရင် ချက်ချင်း ဘာလုပ်သင့်သလဲ။

• “အပြစ်ကို ဝန်ချတောင်းပန်ရပါတယ်။ အမှားတွေကို မဖုံးကွယ်ထားတော့ဘူး။ ‘အပြစ်တွေကို ယေဟောဝါဆီ ဝန်ချတောင်းပန်ပါတယ်’ လို့ ပြော . . . [ပါ]တယ်။”—ဆာ. ၃၂:၅။

• “ဖျားနာနေတဲ့သူ ရှိသလား။ ရှိရင် အသင်းတော် အကြီးအကဲတွေကို သူခေါ်ပါစေ။ အကြီးအကဲတွေက ယေဟောဝါရဲ့ နာမည်ကိုသုံးပြီး သူ့အတွက် ဆုတောင်းပေးမယ်၊ ဆီလိမ်းပေးလိမ့်မယ်။ ယုံကြည်ခြင်းနဲ့တောင်းတဲ့ ဆုတောင်းချက်တွေဟာ လူနာကို ကျန်းမာစေတယ်။ ယေဟောဝါက သူ့ကို ထူမပေးလိမ့်မယ်၊ သူအပြစ်ကျူးလွန်ထားရင်လည်း ခွင့်လွှတ်ပေးလိမ့်မယ်။”—ယာ. ၅:၁၄၊ ၁၅။

၁၆။ ယုံကြည်သူချင်းတစ်ယောက် ကြီးလေးတဲ့အပြစ် ကျူးလွန်ထားတာကို သိရင် ဘာလုပ်သင့်သလဲ။

• “လူတစ်ယောက်က သက်သေထွက်ဆိုပေးဖို့ လူသိရှင်ကြား တောင်းဆိုတဲ့ စကားကို ကြားတဲ့အပြင် တစ်ယောက်ယောက် အပြစ်လုပ်တာကို မြင်လျက်၊ သိလျက်၊ သက်သေဖြစ်လျက်နဲ့ သတင်းမပေးရင် အပြစ်ရှိတယ်။ သူ့အပြစ်အတွက် ပြစ်ဒဏ်ခံရမယ်။”—ဝတ်. ၅:၁။

၁၇။ ယေဟောဝါသက်သေ မဟုတ်တော့ကြောင်း ကြေညာခံရတဲ့သူကို ဘယ်လို ဆက်ဆံသင့်သလဲ။

• “ညီအစ်ကိုလို့ ပြောပြီး လိင်အကျင့်ယိုယွင်းသူ၊ လောဘကြီးသူ၊ ရုပ်တုကိုးကွယ်သူ၊ ဆဲရေးတိုင်းထွာသူ၊ သောက်ကြူးသူ၊ လုယက်သူ ဖြစ်နေရင်တော့ သူနဲ့ ပေါင်းဖော်ဖို့ မပြောနဲ့ အတူစားသောက်တာတောင် မလုပ်ကြ [နဲ့]။”—၁ ကော. ၅:၁၁။

• “ခရစ်တော်ရဲ့ သွန်သင်ချက်အတိုင်း မသွန်သင်တဲ့သူက ခင်ဗျားတို့ဆီ ရောက်လာရင် သူ့ကို လုံးဝ လက်မခံနဲ့။ နှုတ်ဆက်စကားတောင် မပြောနဲ့။”—၂ ယော. ၁၀။

၁၈။ ယေဟောဝါကို ချစ်တဲ့သူတွေနဲ့ပဲ ဘာကြောင့် ရင်းရင်းနှီးနှီး ပေါင်းသင်းသင့်သလဲ။

• “ဉာဏ်ပညာရှိသူနဲ့ ပေါင်းဖော်ရင် ဉာဏ်ပညာရှိလာမယ်။ လူမိုက်နဲ့ ပေါင်းဖော်ရင်တော့ ဒုက္ခလှလှ တွေ့လိမ့်မယ်။”—ပညာ. ၁၃:၂၀။

• “လှည့်စားမခံကြပါနဲ့။ မကောင်းတဲ့ အပေါင်းအသင်းဟာ ကောင်းတဲ့အကျင့်ကို ပျက်စီးစေတတ်တယ်။”—၁ ကော. ၁၅:၃၃။

၁၉။ ယေဟောဝါသက်သေတွေ နိုင်ငံရေးမှာ ဘာကြောင့် ကြားနေကြသလဲ။

• “ကျွန်တော် [ယေရှု] က ဒီလောကနဲ့ မပတ်သက်သလို သူတို့လည်း လောကနဲ့ မပတ်သက်ကြပါဘူး။”—ယော. ၁၇:၁၆။

၂၀။ အစိုးရကို ဘာကြောင့် နာခံသင့်သလဲ။

• “အထက်အာဏာပိုင်တွေကို လူတိုင်း လက်အောက်ခံရမယ်။ ဘာလို့လဲဆိုတော့ ဘုရားသခင်ရဲ့ ခွင့်ပြုချက်မရှိရင် အာဏာပိုင်ဆိုတာ မရှိဘူး။ ဘုရားသခင်က လက်ရှိအာဏာပိုင်တွေကို အတိုင်းအတာတစ်ခုအထိ အခွင့်အာဏာ ပေးအပ်ထားတယ်။”—ရော. ၁၃:၁။

၂၁။ လူ့ဥပဒေ တောင်းဆိုချက်ဟာ ဘုရားပညတ်နဲ့ ဆန့်ကျင်တဲ့အခါ ဘာလုပ်မလဲ။

• “ကျွန်တော်တို့ကတော့ လူ့စကားထက် အုပ်စိုးရှင် ဘုရားသခင်ရဲ့ စကားကို နားထောင်မှာပဲ။”—တ. ၅:၂၉။

၂၂။ အလုပ်အကိုင် ရွေးချယ်တဲ့အခါ လောကနဲ့ သီးခြားနေဖို့ ဘယ်ကျမ်းချက်တွေက ကူညီပေးနိုင်သလဲ။

• “လူမျိုးအချင်းချင်း တိုက်ခိုက်ကြတော့မှာ မဟုတ်ဘူး။ စစ်အတတ်ပညာကိုလည်း မသင်ကြတော့ဘူး။”—မိ. ၄:၃။

• “ငါ့လူတို့၊ သူ့ [မဟာဗာဗုလုန်] ရဲ့အပြစ်တွေမှာ မပါချင်ဘူး၊ သူခံရမယ့်ကပ်ဘေးတွေကို မခံချင်ဘူးဆိုရင် သူ့ဆီကနေ ထွက်သွားကြ။”—ဗျာ. ၁၈:၄။

၂၃။ ဘယ်လို ဖျော်ဖြေမှု၊ အပန်းဖြေမှုမျိုးကို ရွေးချယ်မလဲ။ ဘယ်လိုမျိုးကို ငြင်းပယ်မလဲ။

• “ယေဟောဝါက . . . အကြမ်းဖက်မှု နှစ်သက်သူကို မုန်းတယ်။”—ဆာ. ၁၁:၅။

• “ဆိုးညစ်တဲ့အရာကို ရွံမုန်းပါ။ ကောင်းတဲ့အရာကို တွယ်တာပါ။”—ရော. ၁၂:၉။

• “မှန်ကန်တဲ့အရာ၊ အလေးအနက်ထားရမယ့်အရာ၊ ဖြောင့်မတ်တဲ့အရာ၊ စင်ကြယ်တဲ့အရာ၊ မေတ္တာတိုးစေတဲ့အရာ၊ အားပေးမှုဖြစ်စေတဲ့အရာ၊ မွန်မြတ်တဲ့အရာ၊ ချီးမွမ်းထိုက်တဲ့အရာ မှန်သမျှကို အမြဲ ဆင်ခြင်သုံးသပ်နေကြပါ။”—ဖိ. ၄:၈။

၂၄။ ယေဟောဝါသက်သေတွေဟာ ဝတ်ပြုရေးမှာ တခြားဘာသာရေးအုပ်စုတွေနဲ့ ဘာကြောင့် မရောနှောသလဲ။

• “‘ယေဟောဝါရဲ့ စားပွဲ’ နဲ့ နတ်ဆိုးတွေရဲ့စားပွဲ နှစ်ခုစလုံးမှာ သုံးဆောင်လို့မရဘူး။”—၁ ကော. ၁၀:၂၁။

• “‘တသီးတခြားနေကြ။ မသန့်ရှင်းတဲ့အရာကို လက်နဲ့တောင် မထိနဲ့တော့’ ဆိုပြီး ယေဟောဝါ ပြောတယ်။ ‘မင်းတို့ကို ငါလက်ခံမယ်။’”—၂ ကော. ၆:၁၇။

၂၅။ ပွဲနေ့တစ်ခုမှာ ပါဝင်သင့်မသင့် ဆုံးဖြတ်ရာမှာ ဘယ်ကျမ်းစာမူတွေက ကူညီပေးမလဲ။

• “အဲဒီလူမျိုးတွေနဲ့ ရောနှောနေထိုင်ပြီး သူတို့ရဲ့လမ်းစဉ်တွေကို ခံယူလိုက်ကြတယ်။ ရုပ်တုတွေကို ဆက်ဝတ်ပြုကြတယ်။ ဒါကြောင့် ရုပ်တုတွေဟာ သူတို့အတွက် ထောင်ချောက်ဖြစ်လာတယ်။”—ဆာ. ၁၀၆:၃၅၊ ၃၆။

• “သေလွန်သူကတော့ ဘာမှ မသိဘူး။”—ဒေ. ၉:၅။

• “ကျွန်တော်က ဒီလောကနဲ့ မပတ်သက်သလို သူတို့လည်း လောကနဲ့ မပတ်သက်ကြပါဘူး။”—ယော. ၁၇:၁၆။

• “တစ်ချိန်တုန်းက လောကမှာရှိတဲ့လူတွေရဲ့ အလိုအတိုင်း ခင်ဗျားတို့ ကျင့်ကြံခဲ့တာတွေ တော်လောက်ပါပြီ။ အဲဒီတုန်းက ခင်ဗျားတို့ဟာ မျက်နှာပြောင်တိုက်တာ၊ ရမ္မက်အလိုကို မထိန်းနိုင်တာ၊ သောက်ကြူးတာ၊ အထိန်းအကွပ်မဲ့ ပွဲလုပ်တာ၊ အပြိုင်အဆိုင် သောက်စားတာ၊ ရွံမုန်းဖွယ်ကောင်းတဲ့ ရုပ်တုကိုးကွယ်တာတွေ လုပ်ခဲ့ကြတယ်။”—၁ ပေ. ၄:၃။

၂၆။ မွေးနေ့ပွဲ ကျင်းပသင့်မသင့် ဆုံးဖြတ်ရာမှာ ကျမ်းစာနမူနာတွေက ဘယ်လို ကူညီပေးသလဲ။

• “သုံးရက်မြောက်နေ့ ရောက်တော့ ဖာရောမင်းက သူ့မွေးနေ့ပွဲ လုပ်ပြီး မင်းမှုထမ်းအားလုံးအတွက် စားသောက်ပွဲ ကျင်းပပေးတယ်။ ပြီးတော့ ဖလားတော်ဝန်နဲ့ စားတော်ဝန်ကို မင်းမှုထမ်းတွေရှေ့ ခေါ်ထုတ်လာခိုင်းတယ်။ ဖလားတော်ဝန်က အရင်ရာထူး ပြန်ရ . . . တယ်။ စားတော်ဝန်ကိုတော့ တိုင်မှာ ဆွဲထားတယ်။”—က. ၄၀:၂၀-၂၂။

• “ဟေရုဒ်ရဲ့ မွေးနေ့ ရောက်လာပြီး ပွဲခံနေချိန်မှာ ဟေရောဒိရဲ့ သမီးက ဧည့်သည်တွေကို ကပြဖျော်ဖြေတယ်။ ဟေရုဒ်လည်း သိပ်သဘောကျသွားပြီး၊ တောင်းသမျှ ပေးမယ်လို့ အလေးအနက် ကတိပေးလိုက်တယ်။ အဲဒီအခါ မိန်းကလေးက ‘နှစ်ခြင်းပေးသူ ယောဟန်ရဲ့ ဦးခေါင်းကို ဒီလင်ပန်းထဲ ထည့်ပေးပါ’ ဆိုပြီး မိခင် တောင်းခိုင်းတဲ့အတိုင်း တောင်းဆိုတယ်။ [ဟေရုဒ်မင်းလည်း] ထောင်ထဲကို လူလွှတ်ပြီး ယောဟန်ရဲ့ ခေါင်းကို ဖြတ်ခိုင်းတယ်။”—မ. ၁၄:၆-၈၊ ၁၀။

၂၇။ အကြီးအကဲတွေရဲ့ လမ်းညွှန်မှုကို ဘာကြောင့် လိုက်နာချင်သလဲ။

• “ခင်ဗျားတို့ကို ဦးဆောင်တဲ့သူတွေကို နာခံပါ၊ လက်အောက်ခံပါ။ ခင်ဗျားတို့ကို သူတို့ ဂရုစိုက်စောင့်ရှောက်ပေးနေတယ်။ တကယ်တော့ အဲဒီအတွက် သူတို့ကိုယ်တိုင် ဖြေရှင်းချက်ပေးရမှာ။ သူတို့ရဲ့ တာဝန်ကို ပျော်ပျော်ရွှင်ရွှင် မဟုတ်ဘဲ သက်ပြင်းချပြီး လုပ်ဆောင်နေရရင်တော့ ခင်ဗျားတို့ပဲ အကျိုးယုတ်လိမ့်မယ်။”—ဟီ. ၁၃:၁၇။

၂၈။ သင်နဲ့ သင့်မိသားစု ကျမ်းစာ ဖတ်ရှု၊ လေ့လာဖို့ ဘာကြောင့် ပုံမှန် အချိန်ဖယ်ထားရမလဲ။

• “သူဟာ ယေဟောဝါရဲ့ ပညတ်မှာ ပျော်မွေ့ပြီး ပညတ်တော်ကို နေ့ညမပြတ် ဖတ်ရွတ်ဆင်ခြင်တယ်။ ရာသီအလိုက် အသီးသီးပြီး မညှိုးနွမ်းတဲ့ သစ်ပင်၊ စမ်းချောင်းနား စိုက်ထားတဲ့ သစ်ပင်နဲ့ တူလိမ့်မယ်။ လုပ်သမျှ အောင်မြင်လိမ့်မယ်။”—ဆာ. ၁:၂၊ ၃။

၂၉။ အစည်းအဝေး တက်တာ၊ အစည်းအဝေးမှာ ပါဝင်ရတာကို ဘာကြောင့် နှစ်သက်သလဲ။

• “နာမတော်ကို ညီအစ်ကိုတွေ သိအောင် ကြေညာပါ့မယ်။ လူစုလူဝေးအလယ်မှာ ကိုယ်တော့်ကို ချီးမွမ်းပါ့မယ်။”—ဆာ. ၂၂:၂၂။

• “မေတ္တာစိတ်ရှိစေဖို့၊ အကျင့်ကောင်းတွေ ကျင့်စေဖို့ တိုက်တွန်းအားပေးပြီး အချင်းချင်း ထောက်ထားစာနာကြစို့။ လူတချို့မှာ အတူတကွ စည်းဝေးတာကို လျစ်လျူရှုတဲ့ထုံးစံ ရှိနေတယ်။ ခင်ဗျားတို့ကတော့ အတူတကွ စည်းဝေးတာကို လျစ်လျူမရှုကြပါနဲ့။ အချင်းချင်း အားပေးကြပါ။ ဘုရားသခင်ရဲ့ နေ့ရက် နီးလာတာကို သိနေတဲ့အတွက် ပိုကြိုးစားအားထုတ်ကြပါ။”—ဟီ. ၁၀:၂၄၊ ၂၅။

၃၀။ ကျွန်တော်တို့ကို ယေရှု ပေးအပ်ထားတဲ့ အရေးကြီးဆုံး အလုပ်က ဘာလဲ။

• “ဒါကြောင့် လူမျိုးတကာဆီ သွားပြီး လူတွေကို ကျွန်တော့်တပည့် ဖြစ်လာအောင် သွန်သင်ပေးကြပါ။ . . . နှစ်ခြင်းပေးကြပါ။ ကျွန်တော် မိန့်မှာထားသမျှကို လိုက်နာဖို့ သွန်သင်ပေးကြပါ။”—မ. ၂၈:၁၉၊ ၂၀။

၃၁။ နိုင်ငံတော်လုပ်ငန်းအတွက် ပေးလှူတဲ့အခါ၊ ညီအစ်ကို/မတွေကို ကူညီတဲ့အခါ ဘယ်လို သဘောထားနဲ့ ပေးလှူ၊ ကူညီတာကို ယေဟောဝါ နှစ်သက်သလဲ။

• “ကိုယ့်မှာရှိတဲ့ အဖိုးတန်ဥစ္စာတွေ . . . ဆက်သပြီး ယေဟောဝါကို ဂုဏ်တင်ပါ။”—ပညာ. ၃:၉။

• “လူတိုင်း စိတ်ဆုံးဖြတ်ထားတဲ့အတိုင်း လှူဒါန်းကြပါ။ နှမြောတဲ့စိတ်၊ မလှူမနေရဆိုတဲ့ စိတ်နဲ့ မလှူပါစေနဲ့။ စေတနာစိတ်နဲ့ လှူဒါန်းတဲ့သူကိုပဲ ဘုရားသခင် ချစ်မြတ်နိုးတယ်။”—၂ ကော. ၉:၇။

၃၂။ ဘယ်အခက်အခဲတွေ ကြုံတွေ့ရမယ်လို့ ခရစ်ယာန်တွေ မျှော်လင့်ထားသလဲ။

• “ဖြောင့်မှန်ရာကို လုပ်တဲ့အတွက် နှိပ်စက်ခံရသူတွေ ပျော်ရွှင်ချမ်းမြေ့တယ်။ ကောင်းကင်နိုင်ငံဟာ သူတို့အတွက် ဖြစ်လိမ့်မယ်။ ခင်ဗျားတို့ဟာ ကျွန်တော့်ကြောင့် ကဲ့ရဲ့ညှဉ်းဆဲခံရတဲ့အခါ၊ မဟုတ်မမှန် စွပ်စွဲခံရတဲ့အခါ ပျော်ရွှင်ချမ်းမြေ့တယ်။ ကောင်းကင်မှာ ခင်ဗျားတို့ ရမယ့် ဆုဟာ ကြီးမြတ်တဲ့အတွက် ဝမ်းမြောက် ရွှင်လန်းကြပါ။ အရင်က ပရောဖက်တွေလည်း ဒီလိုပဲ ညှဉ်းဆဲခံခဲ့ရတယ်။”—မ. ၅:၁၀-၁၂။

၃၃။ ယေဟောဝါသက်သေတစ်ယောက်အဖြစ် နှစ်ခြင်းခံရတာ ဘာကြောင့် အခွင့်ထူး ဖြစ်သလဲ။

• “နာမတော်ကို ခံယူထားတဲ့အတွက် နှုတ်တော်ထွက်စကားတွေက ကျွန်တော့်ကို ရွှင်လန်းစေတယ်။ ရင်ကို ကြည်နူးစေပါတယ်။”—ယေ. ၁၅:၁၆။

ယေဟောဝါသက်သေတွေရဲ့ တိုက်နယ်အစည်းအဝေးနဲ့ ခရိုင်အစည်းအဝေးတွေမှာ နှစ်ခြင်းပေးလေ့ရှိတယ်။ နှစ်ခြင်းဟောပြောချက်ရဲ့ နိဂုံးမှာ ဟောပြောသူက နှစ်ခြင်းခံမယ့်သူတွေကို မတ်တတ်ရပ်စေပြီး အောက်ပါမေးခွန်းနှစ်ခုကို အသံကျယ်ကျယ်နဲ့ ရှင်းလင်းပြတ်သားစွာ ဖြေဆိုဖို့ တောင်းဆိုပါလိမ့်မယ်–

၁။ ယေရှုခရစ်ကတစ်ဆင့် ဘုရားသခင် ပြင်ဆင်ပေးတဲ့ ကယ်တင်ခြင်းနည်းလမ်းကို လက်ခံပြီး သင့်ရဲ့အပြစ်တွေကို နောင်တယူကာ သင့်ကိုယ်ကို ယေဟောဝါဆီ ဆက်ကပ်အပ်နှံပြီးပြီလား။

၂။ သင့်ရဲ့ နှစ်ခြင်းဟာ ယေဟောဝါရဲ့ အဖွဲ့အစည်းနဲ့ ပူးပေါင်းနေတဲ့ ယေဟောဝါသက်သေတစ်ဦးအဖြစ် သင့်ကို သတ်မှတ်ဖော်ပြကြောင်း နားလည်သဘောပေါက်ပါသလား။

အဲဒီမေးခွန်းတွေကို အခိုင်အမာ ဖြေကြားခြင်းက နှစ်ခြင်းခံမယ့်သူတွေဟာ ရွေးဖိုးကို ယုံကြည်ကြောင်း၊ ယေဟောဝါဆီ ကိုယ့်ကိုယ်ကိုယ် အကြွင်းမဲ့ ဆက်ကပ်အပ်နှံထားကြောင်း “လူသိရှင်ကြား ကြေညာ” တာဖြစ်တယ်။ (ရော. ၁၀:၉၊ ၁၀) ဒါကြောင့် နှစ်ခြင်းခံမယ့်သူတွေဟာ ကိုယ်ပိုင်ခံယူချက်အတိုင်း ဖြေဆိုနိုင်ဖို့ အဲဒီမေးခွန်းတွေကို ဆုတောင်းပြီး ကြိုတင်စဉ်းစားထားဖို့ လိုပါလိမ့်မယ်။

ယေဟောဝါတစ်ပါးတည်းကို ဝတ်ပြုကိုးကွယ်ပါ့မယ်၊ အလိုတော်ဆောင်ခြင်းကို ဘဝမှာ အရေးကြီးဆုံး ဖြစ်စေပါ့မယ်လို့ ယေဟောဝါဆီ ဆုတောင်း၊ ဆက်ကပ်အပ်နှံပြီးပြီလား။

အခွင့်အရေးရတာနဲ့ နှစ်ခြင်းခံသင့်တယ်လို့ အခု သင် အပြည့်အဝ ယုံကြည်စိတ်ချပြီလား။

နှစ်ခြင်းအတွက် ဘယ်အဝတ်အစားက သင့်လျော်သလဲ။ (၁ တိ. ၂:၉၊ ၁၀။ ယော. ၁၅:၁၉။ ဖိ. ၁:၁၀)

“ဘုရားသခင်ကို ကြည်ညို” ကြောင်း ပြဖို့ “ဣန္ဒြေရှိရှိ၊ ချင့်ချိန်မှုရှိရှိ” ဝတ်ဆင်သင့်တယ်။ ဒါကြောင့် နှစ်ခြင်းခံမယ့်သူတွေဟာ ဖော်လွန်းတဲ့ ရေကူးဝတ်စုံ၊ စာတန်း၊ ဆောင်ပုဒ်ပါတဲ့ အဝတ်အစားတွေ ဝတ်မှာ မဟုတ်ဘူး။ သန့်ရှင်းသပ်ရပ်၊ နှစ်သက်ဖွယ်ကောင်းပြီး အချိန်အခါနဲ့ လိုက်ဖက်စွာ ဝတ်ဆင်သင့်တယ်။

လူတစ်ယောက်ဟာ နှစ်ခြင်းခံချိန်မှာ ဘယ်လို ပြုမူသင့်သလဲ။ (လု. ၃:၂၁၊ ၂၂)

ယေရှုရဲ့နှစ်ခြင်းဟာ ဒီနေ့ခေတ် ခရစ်ယာန်နှစ်ခြင်းအတွက် စံနမူနာ ဖြစ်တယ်။ နှစ်ခြင်းဟာ အရေးကြီးတဲ့အဆင့် ဖြစ်တာကို နားလည်ကြောင်း ယေရှုရဲ့ သဘောထားနဲ့ လုပ်ရပ်တွေမှာ ပေါ်လွင်တယ်။ နှစ်ခြင်းခံတဲ့နေရာဟာ နောက်ပြောင်ရမယ့်၊ ဆော့ရမယ့်၊ ရေကူးရမယ့်၊ အချိန်အခါရဲ့ လေးနက်မှုကို အာရုံလွဲစေမယ့် တခြားအပြုအမူတွေ ပြုမူရမယ့်နေရာ မဟုတ်ပါဘူး။ ခရစ်ယာန်လူသစ်တစ်ယောက်ဟာ အောင်ပွဲခံတဲ့ပုံမျိုး ပြုမူမှာ မဟုတ်ပါဘူး။ နှစ်ခြင်းခံချိန်ဟာ ပျော်ရွှင်ဖွယ် အချိန်အခါ ဖြစ်ပေမဲ့ သိက္ခာရှိရှိ ဖြစ်သင့်တယ်။

ပုံမှန် အစည်းအဝေး တက်ခြင်း၊ အသင်းတော်နဲ့ ပူးပေါင်းခြင်းက ယေဟောဝါဆီ ဆက်ကပ်အပ်နှံခြင်းနဲ့အညီ အသက်ရှင်နိုင်အောင် ဘယ်လို ကူညီပေးမလဲ။

နှစ်ခြင်းခံပြီးနောက် ကိုယ်ပိုင်လေ့လာမှု ဇယားကောင်း ဆက်ထားဖို့၊ အမှုဆောင်လုပ်ငန်းမှာ ပုံမှန်ပါဝင်ဖို့ ဘာကြောင့် အရေးကြီးသလဲ။