“ကျင့်ဝတ်ဆိုင်ရာလမ်းညွှန်မှုနှင့်ပတ်သက်သော ကလေးတစ်ဦး၏အခွင့်အရေး”

ဒီဇင်ဘာ ၉၊ ၂၀၀၈ တွင် ကလေးများ၏အခွင့်အရေးဆိုင်ရာ ဆွီဒစ်ရှ် အကယ်ဒမီအဖွဲ့က “ကျင့်ဝတ်ဆိုင်ရာလမ်းညွှန်မှုနှင့်ပတ်သက်သော ကလေးတစ်ဦး၏အခွင့်အရေး” ခေါင်းစဉ်ဖြင့် နှီးနှောဖလှယ်ပွဲတစ်ခုကို ကျင်းပခဲ့သည်။ ဆွီဒင်ချာ့ချ်၊ ခရစ်ယာန်ဘောင်၏ အခြားဂိုဏ်းဂဏများ၊ အစ္စလာမ်ဘာသာမှ ကိုယ်စားလှယ်များနှင့် လူအဓိကပြုဝါဒီများသည် သဘောထားများစွာကို တင်ပြခဲ့ကြသည်။

တင်ဆက်သူများထဲတွင် ဓမ္မဆရာတစ်ဦးက ဤသို့ဆို၏– “ကလေးတွေ ကျင့်ဝတ်နဲ့ဆိုင်တဲ့ လမ်းညွှန်မှုရဖို့အတွက် သမ္မာကျမ်းစာမှတ်တမ်းတွေက အရေးအပါဆုံးပဲ။” ကျမ်းစာသည် ကလေးများအား ကျင့်ဝတ်နှင့်ဆိုင်သော လမ်းညွှန်မှုရရန် မည်သို့ထောက်ကူသနည်း။

“ကျမ်းချက်တွေနဲ့ ကျမ်းစာမှတ်တမ်းတွေက ကလေးတွေ မိမိတို့ဘာသာ သုံးသပ်၊ တွေးတောဆင်ခြင်စေနိုင်တဲ့ အကြောင်းအရာတွေဖြစ်တယ်” ဟု ဓမ္မဆရာကပြောခဲ့သည်။ “အာဒံနဲ့ဧဝ၊ ကာဣနနဲ့အာဗေလ၊ ဒါဝိဒ်နဲ့ဂေါလျတ်၊ ယေရှုမွေးဖွားခြင်း၊ အခွန်ခံဇက္ခဲ၊ ဖြုန်းတီးသောသား၊ စာနာစိတ်ရှိသူ ရှမာရိအမျိုးသား မှတ်တမ်းများ” ကို သူဖော်ပြခဲ့၏။ ယင်းတို့ကို “[ကလေးတစ်ဦးရဲ့] စိတ်မှာ သစ္စာဖောက်မှု၊ ခွင့်လွှတ်မှု၊ အပြစ်ဖြေမှု၊ မုန်းတီးမှု၊ အကျင့်ယိုယွင်းမှု၊ အမှားပြင်မှု၊ ညီရင်းအစ်ကိုမေတ္တာ၊ ကိုယ်ကျိုးစွန့်မေတ္တာစတဲ့ ဘဝအသက်တာမှာ အရေးကြီးတဲ့ကိစ္စရပ်တွေကို စဉ်းစားသုံးသပ်ရာမှာ လမ်းညွှန်ပေးနိုင်တဲ့ နမူနာများ” အဖြစ်ကိုးကားခဲ့သည်။ သူဤသို့ထပ်ဆို၏– “အဲဒီအချက်တွေက လူတစ်ဦးကို လက်တွေ့လုပ်ဆောင်လာအောင်၊ အကျိုးရှိတဲ့အတွေ့အကြုံတွေရလာအောင် ပြောင်းလဲပေးနိုင်တဲ့ နမူနာတွေဖြစ်တယ်။”

သမ္မာကျမ်းစာဖတ်ရန်အားပေးခြင်းသည် အမှန်ပင် ကောင်းမြတ်လှသည်။ သို့သော် ကလေးများသည် သမ္မာကျမ်းစာမှ ဖတ်ရှုရာများကို “မိမိတို့ဘာသာ သုံးသပ်၊ တွေးတောဆင်ခြင်” ကာ မှန်ကန်သောကောက်ချက်ချရန် အမှန်ပင် တတ်စွမ်းနိုင်ကြပါသလော။

လူကြီးများပင် ကျမ်းချက်များ၏အဓိပ္ပာယ် ရှင်းပြချက် လိုအပ်ကြသည်။ ဥပမာ၊ အမျိုးသားတစ်ဦးသည် ‘မိမိဘာသာ သုံးသပ်၊ တွေးတောဆင်ခြင်’ ခြင်းဖြင့် မှန်ကန်စွာ နားမလည်ခဲ့ကြောင်း သမ္မာကျမ်းစာက ဖော်ပြသည်။ ထိုသူမှာ အီသီယိုးပီးယားအရာရှိတစ်ဦးဖြစ်သည်။ ဟေရှာယပရောဖက်ပြုချက်ကို ဖတ်နေသော်လည်း ယင်း၏အဓိပ္ပာယ်ကို သူနားမလည်ခဲ့ပါ။ သူသည် ပရောဖက်ပြုချက်ပါ သတင်းစကားကို နားလည်သဘောပေါက်လိုသောကြောင့် ဖိလိပ္ပု၏ ရှင်းပြချက်ကို တလိုတလားလက်ခံခဲ့သည်။ (တ. ၈:၂၆-၄၀) ထိုသို့အကူအညီလိုအပ်ခဲ့သူမှာ ထိုအီသီယိုးပီးယားလူမျိုးတစ်ဦးတည်းသာ မဟုတ်ပါ။ ကျွန်ုပ်တို့အားလုံး၊ အထူးသဖြင့် ကလေးများသည် သမ္မာကျမ်းစာပါ ကျမ်းချက်များ၏အဓိပ္ပာယ် ရှင်းလင်းဖော်ပြပေးချက် လိုအပ်ကြသည်။

“မိုက်သောသဘောသည် သူငယ်၏စိတ်နှလုံးထဲမှာ ထုပ်ထားလျက်ရှိ၏” ဟု သမ္မာကျမ်းစာက ကျွန်ုပ်တို့အား သတိပေးထား၏။ (သု. ၂၂:၅) ကလေးများသည် လမ်းညွှန်ချက်၊ ညွှန်ကြားချက်တို့လိုအပ်ရာ သူတို့၏မိဘတို့သည် သမ္မာကျမ်းစာနှင့် ခရစ်ယာန်အစည်းအဝေးများ၌ သွန်သင်ပေးသည့်အရာတို့ကိုအခြေခံကာ ကိုယ်ကျင့်တရား၊ ဝတ်ပြုရေးနှင့်ဆက်နွှယ်ရာတို့ကို ကလေးများအား သင်ကြားပေးရန် တာဝန်ရှိသည်။ ထိုသို့သောလေ့ကျင့်ပေးမှု ရရှိရန်မှာ ကလေးများ၏ အခွင့်အရေးဖြစ်သည်။ ကျင့်ဝတ်ဆိုင်ရာလမ်းညွှန်မှုရရှိနိုင်ရန် သမ္မာကျမ်းစာဖြင့် ငယ်သောအရွယ်မှစ၍ အခိုင်အမာ အုတ်မြစ်ချတည်ဆောက်သွားပေးဖို့လိုသည်၊ သို့မှသာ သူတို့သည် “မိမိတို့နားလည်နိုင်စွမ်းကို အသုံးပြုခြင်းဖြင့် အမှားအမှန်ကို ပိုင်းခြားသိမြင်နိုင်ရန် လေ့ကျင့်ထားသော ရင့်ကျက်သူများ” ဖြစ်လာကြပေမည်။—ဟေဗြဲ ၅:၁၄။