စာရှုသူများထံမှ မေးခွန်းလွှာ
အာရုန်ရဲ့သား နာဒပ်နဲ့ အဘိဟုသေဆုံးသွားပြီးတဲ့နောက် ဧလာဇာနဲ့ ဣသမာတို့ကို မောရှေ ဘာကြောင့်အမျက်ထွက်ခဲ့သလဲ။ မောရှေ ဘယ်လို စိတ်ဆိုးပြေသွားသလဲ။—ဝတ်. ၁၀:၁၆-၂၀။
ယဇ်ပုရောဟိတ်အစီအစဉ်ကို တရားဝင်အစပြုပြီးမကြာမီမှာ အာရုန်ရဲ့သား နာဒပ်နဲ့ အဘိဟုက ထူးခြားတဲ့မီးနဲ့ ယေဟောဝါကို ပူဇော်တဲ့အတွက် သူတို့ကို ကိုယ်တော်အဆုံးစီရင်ခဲ့တယ်။ (ဝတ်. ၁၀:၁၊ ၂) မောရှေက အာရုန်ရဲ့ အသက်ရှင်ကျန်ရစ်တဲ့သားတွေကို သေဆုံးသွားတဲ့ သူတို့ရဲ့အစ်ကိုတွေအတွက် ငိုကြွေးမြည်တမ်းခြင်းမလုပ်ဖို့ အမိန့်ပေးခဲ့တယ်။ သိပ်မကြာမီမှာပဲ ဧလာဇာနဲ့ ဣသမာက အပြစ်ဖြေဖို့ပူဇော်တဲ့ ဆိတ်ရဲ့အသားကိုမစားတဲ့အတွက် မောရှေ သူတို့ကို အမျက်ထွက်ခဲ့တယ်။ (ဝတ်. ၉:၃) မောရှေ ဘာကြောင့် အမျက်ထွက်တာလဲ။
မောရှေကတစ်ဆင့်ပေးတဲ့ ယေဟောဝါရဲ့ပညတ်တရားမှာ အပြစ်ဖြေရာယဇ်ကိုပူဇော်တဲ့ ယဇ်ပုရောဟိတ်က အဲဒီအသားအနည်းငယ်ကို ပရိသတ်စည်းဝေးရာတဲတော်ဝင်းအတွင်းမှာ စားဖို့ သတ်သတ်မှတ်မှတ်ဖော်ပြထားတယ်။ အဲဒီလိုပြုလုပ်ခြင်းက အပြစ်ဖြေရာယဇ်ပူဇော်သူတွေရဲ့ အပြစ်ကို ယေဟောဝါဖြေလွှတ်လိုက်တယ်ဆိုတဲ့ အဓိပ္ပာယ်ဖြစ်တယ်။ ဒါပေမဲ့ ယဇ်ကောင်ရဲ့အသွေးတချို့ကို တဲတော်ရဲ့ဦးဆုံးအခန်းဖြစ်တဲ့ သန့်ရှင်းရာအခန်းထဲကို ယူသွားတယ်ဆိုရင် ယဇ်သားကိုမစားဘဲ မီးရှို့ရမှာဖြစ်တယ်။—ဝတ်. ၆:၂၄-၂၆၊ ၃၀။
အဲဒီနေ့မှာဖြစ်ပျက်ခဲ့တဲ့ ဝမ်းနည်းဖွယ်အဖြစ်အပျက်တွေဖြစ်ပြီးတဲ့နောက် ယေဟောဝါရဲ့တောင်းဆိုချက်အားလုံးကို အတိအကျလိုက်နာကြောင်း သေချာစေဖို့ မောရှေပြုလုပ်ခဲ့ပုံရတယ်။ ဆိတ်တစ်ကောင်လုံးကို မီးရှို့ပြီးပြီဆိုတာကိုတွေ့ရပြီး အသွေးကိုလည်း သန့်ရှင်းရာအခန်းထဲကို မယူလာတဲ့အတွက် မှာထားတဲ့အတိုင်း ဆိတ်အသားကို ဘာကြောင့်မစားတာလဲလို့ ဧလာဇာနဲ့ ဣသမာကို စိတ်ဆိုးဆိုးနဲ့မေးခဲ့တယ်။—ဝတ်. ၁၀:၁၇၊ ၁၈။
မောရှေရဲ့မေးခွန်းတွေကို အာရုန် ဖြေဆိုခဲ့တယ်။ အကြောင်းကတော့ အသက်ရှင်ကျန်ရစ်တဲ့ ယဇ်ပုရောဟိတ်တွေက အာရုန်ရဲ့ခွင့်ပြုချက်နဲ့ လုပ်ဆောင်ခဲ့တာကြောင့် ဖြစ်နိုင်တယ်။ အာရုန်ရဲ့သားနှစ်ယောက် အဆုံးစီရင်ခံလိုက်ရတာကြောင့် ဒီနေ့မှာ အပြစ်ဖြေရာယဇ်သားကို ကိုယ်ကိုယ်ကိုယ်သိစိတ် ကြည်ကြည်လင်လင်နဲ့စားနိုင်တဲ့ ယဇ်ပုရောဟိတ်ရှိမှာမဟုတ်ဘူးလို့ အာရုန် စဉ်းစားခဲ့တာဖြစ်နိုင်တယ်။ နာဒပ်နဲ့ အဘိဟု ကျူးလွန်ခဲ့တဲ့အပြစ်အတွက် သူတို့မှာ တာဝန်မရှိပေမဲ့ ယဇ်သားစားခြင်းကို ယေဟောဝါနှစ်သက်မှာမဟုတ်ဘူးလို့ ခံစားခဲ့ရတာကြောင့်လည်း ဖြစ်နိုင်တယ်။—ဝတ်. ၁၀:၁၉။
အထူးသဖြင့် အာရုန်ရဲ့မိသားစုဝင်တွေ ယဇ်ပုရောဟိတ်တာဝန်ကို ဦးဆုံးထမ်းဆောင်တဲ့နေ့မှာ ဘုရားသခင့်မျက်နှာသာရဖို့ အသေးစိတ်ကအစ အသေအချာဂရုစိုက်သင့်တယ်လို့ အာရုန် ဆင်ခြင်ခဲ့မိပါလိမ့်မယ်။ ဒါပေမဲ့ နာဒပ်နဲ့ အဘိဟုကြောင့် ယေဟောဝါရဲ့နာမ ထိခိုက်ခဲ့ပြီး ဘုရားသခင့်အမျက်ဒေါသ သူတို့အပေါ် သက်ရောက်ခဲ့တယ်။ ဒါကြောင့် အပြစ်ပြုတဲ့ယဇ်ပုရောဟိတ်တွေရဲ့ မိသားစုဝင်တွေက ဒီသန့်ရှင်းရာယဇ်အသားကို မစားသင့်ဘူးလို့ အာရုန် ယူမှတ်ခဲ့တာဖြစ်နိုင်တယ်။
“မောရှေသည် ထိုစကားကိုကြားလျှင် နှစ်သက်လေ၏” ဆိုတဲ့အချက်အရ မောရှေက သူ့အစ်ကိုရဲ့ဖြေရှင်းချက်ကို လက်ခံခဲ့ပုံရတယ်။ (ဝတ်. ၁၀:၂၀၊ သမ္မာ) ယေဟောဝါလည်း အာရုန်ရဲ့အဖြေကို ကျေနပ်ခဲ့ပုံရတယ်။