တခြားသူတွေရဲ့ အသက်အရွယ်၊ နိုင်ငံသား၊ ကိုးကွယ်ရာဘာသာကို ထည့်မတွက်ဘဲ ကူညီပေးနိုင်မလား
လိုအပ်နေသူတွေကို ကူညီပေးသူတွေ ခံစားရမယ့် ကောင်းချီးများ
ကမ္ဘာတစ်ဝန်းက လူတွေဟာ အစားအသောက်နဲ့ နေစရာတွေ လိုအပ်နေတယ်။ တချို့ကတော့ အနာဂတ် မျှော်လင့်ချက်လောက်ပဲ လိုအပ်ကြတယ်။ အဲဒီလိုလူတွေကို ကူညီပေးတာက ဘာကြောင့် ဘုရားသခင့် ကောင်းချီး ခံစားရစေသလဲ။
သမ္မာကျမ်းစာ အဆို
“နိမ့်ကျသူကို မျက်နှာသာပေးတဲ့သူဟာ ယေဟောဝါကို ချေးငှားပေးတဲ့သူပဲ။ သူ့လုပ်ရပ်အတွက် ဘုရား ပြန်ဆပ်ပေးလိမ့်မယ်။”—ပညာအလိမ္မာ ၁၉:၁၇။
လိုအပ်နေသူတွေကို ကူညီပေးခြင်းဆိုတာ
ဓားပြတိုက်ခံရပြီး သေလုမျောပါး ဖြစ်နေတဲ့ လူတစ်ယောက်အကြောင်း ပုံဥပမာကို ယေရှု ပြောပြခဲ့တယ်။ (လုကာ ၁၀:၂၉-၃၇) ကူညီပေးတတ်တဲ့ သူစိမ်းတစ်ယောက်က အဲဒီလူကို ဂရုစိုက် ကုသပေးခဲ့တယ်။ လူမျိုး မတူပေမဲ့ အဲဒီလိုလုပ်ပေးခဲ့တယ်။
ကြင်နာတတ်သူက ဒဏ်ရာရနေသူကို အရေးပေါ် ကုသမှုနဲ့ ရုပ်ပိုင်းဆိုင်ရာ ထောက်ပံ့မှုပဲ ပေးခဲ့တာ မဟုတ်ဘူး။ စိတ်သက်သာရာ ရအောင် နှစ်သိမ့်ပေးခဲ့တယ်။
ဒီပုံဥပမာကနေ ဘာသင်ယူနိုင်သလဲ။ ကျွန်တော်တို့ဟာ အကူအညီ လိုအပ်နေသူတွေကို တတ်နိုင်သလောက် ကူညီပေးသင့်တယ်ဆိုတာ သင်ယူရပါတယ်။ (ပညာအလိမ္မာ ၁၄:၃၁) မကြာခင် ဆင်းရဲဒုက္ခတွေကို ဘုရားသခင် ဖယ်ရှားပေးတော့မယ်လို့ သမ္မာကျမ်းစာ ပြောထားတယ်။ ဒါဆိုရင် ဘယ်အချိန်မှာ ဘယ်လိုနည်းနဲ့ ဘုရား ဖယ်ရှားပေးမလဲလို့ စဉ်းစားမိနိုင်တယ်။ မေတ္တာရှိတဲ့ ဖန်ဆင်းရှင် ပြင်ဆင်ထားတဲ့ အနာဂတ်ကောင်းချီးတွေကို နောက်ဆောင်းပါးမှာ ဆွေးနွေးပါမယ်။