အိပ်ချိန် ဘယ်လို ပိုရနိုင်မလဲ

သင်္ချာဘာသာမှာ ကျသွားရင် ပိုကြိုးစားရမယ်လို့ ယူဆနိုင်တယ်။ အားကစားမှာ အကောင်းဆုံး မစွမ်းဆောင်နိုင်ရင် ပိုလေ့ကျင့်ရမယ်လို့ ယူဆနိုင်တယ်။ ဒါပေမဲ့ နှစ်မျိုးလုံးမှာ တကယ်လိုအပ်နေတာက အိပ်ရေးဝဖို့ပါ။ အကြောင်းရင်းကို သုံးသပ်ကြည့်ပါ။

• အိပ်ဖို့ ဘာကြောင့် လိုသလဲ

• အိပ်မပျော်ရတဲ့ အကြောင်းရင်းက ဘာလဲ

• အိပ်ချိန် ဘယ်လို ပိုရနိုင်မလဲ

• ရွယ်တူတွေအဆို

အိပ်ဖို့ ဘာကြောင့် လိုသလဲ

ဆယ်ကျော်သက်အများစုဟာ အိပ်ချိန် ရှစ်နာရီနဲ့ ဆယ်နာရီကြား လိုအပ်တယ်လို့ ကျွမ်းကျင်သူတွေ ဆိုကြတယ်။ အိပ်ရေးဝဖို့ ဘာကြောင့် အရေးကြီးသလဲ။

• အိပ်ခြင်းက သင့်ဉာဏ်ရည်ကို ထက်မြက်စေတယ်။ အိပ်ခြင်းကို “ဦးနှောက် အစာ” လို့ ခေါ်ကြတယ်။ အိပ်ခြင်းက ကျောင်းစာ၊ အားကစား၊ ပြဿနာဖြေရှင်းနိုင်စွမ်းတို့မှာ တိုးတက်ကောင်းမွန်စေနိုင်တယ်။

• အိပ်ခြင်းက စိတ်နေစိတ်ထားကို တိုးတက်ကောင်းမွန်စေတယ်။ အိပ်ရေးပျက်သူတွေဟာ စိတ်အပြောင်းအလဲ ပိုများတတ်ကြတယ်။ ဝမ်းနည်းလွယ်တယ်။ စိတ်ဓာတ်ကျလွယ်တယ်။ တခြားသူတွေနဲ့ အဆင်မပြေ ဖြစ်တတ်တယ်။

• အိပ်ခြင်းက ယာဉ်မောင်းတဲ့အခါ ပိုဘေးကင်းစေတယ်။ အသက် ၁၆-၂၄ အရွယ် ယာဉ်မောင်းတွေဟာ အသက် ၄၀-၅၉ အရွယ် ယာဉ်မောင်းတွေနဲ့ ယှဉ်ကြည့်ရင် “ယာဉ်တိုက်ချိန်မှာ အိပ်ငိုက်တာ နှစ်ဆနီးပါး ပိုများတယ်” လို့ အမေရိကန်နိုင်ငံမှာ လေ့လာမှုတစ်ရပ်က ဖော်ပြတယ်။

• အိပ်ခြင်းက ကျန်းမာရေး ပိုကောင်းစေတယ်။ အိပ်ခြင်းက ခန္ဓာကိုယ်ကို ထိန်းသိမ်းပေးတယ်။ ဆဲလ်တွေ၊ တစ်သျှူးတွေ၊ သွေးကြောတွေကို ပြုပြင်ပေးတယ်။ အိပ်ရေးဝခြင်းက အဝလွန်ခြင်း၊ ဆီးချို၊ လေဖြတ်ခြင်း အန္တရာယ်ကိုလည်း လျော့နည်းစေနိုင်တယ်။

အိပ်မပျော်ရတဲ့ အကြောင်းရင်းက ဘာလဲ

အထက်ဖော်ပြပါ အကျိုးကျေးဇူးတွေ ရှိပေမဲ့ ဆယ်ကျော်သက်များစွာဟာ လိုအပ်သလောက် မအိပ်ကြဘူး။ ဥပမာ၊ အသက် ၁၆ နှစ်အရွယ် အီလိန်းက ပြောတယ်–

“အတန်းထဲမှာ ဆရာမက အိပ်ရာဝင်တဲ့ အချိန်ကို မေးတယ်။ အများစုက မနက် ၂:၀၀ နာရီတဲ့။ တချို့က မနက် ၅:၀၀ နာရီတဲ့။ ကျောင်းသားတစ်ယောက်ပဲ ည ၉:၃၀ နာရီလို့ ပြောတယ်။”

အိပ်မပျော်အောင် ဘာတွေက တားဆီးနိုင်သလဲ။

လူမှုဘဝ။ “ညနက်တဲ့အထိ အချိန်ဖြုန်းနေရတာ သိပ်လွယ်တယ်။ အထူးသဖြင့် သူငယ်ချင်းတွေနဲ့ ညဘက် ထွက်လည်တဲ့အခါတွေပေါ့။”—ပံမလာ။

တာဝန်များ။ “ကျွန်မက အအိပ်မက်တယ်။ ဒါပေမဲ့ အလုပ်များတော့ အိပ်ချိန် အလုံအလောက်ရဖို့ ခက်တယ်။”—အယ်နာ။

နည်းပညာ။ “ဖုန်းက ကျွန်မ အိပ်မရတဲ့ အဓိကအကြောင်းရင်းပေါ့။ အိပ်ရာထဲမှာ ဖုန်းမကြည့်ရရင် မနေနိုင်ဘူး။”—အနီဆာ။

အိပ်ချိန် ဘယ်လို ပိုရနိုင်မလဲ

• အိပ်ခြင်းနဲ့ပတ်သက်တဲ့ သင့်သဘောထားကို ဆန်းစစ်ပါ။ “လက်တစ်ဆုပ်စာ အနားယူရတာဟာ လက်နှစ်ဆုပ်စာ တပင်တပန်း လုပ်ဆောင်ပြီး လေကို ဖမ်းဆုပ်ဖို့ အားထုတ်နေတာထက် ပိုကောင်းတယ်” လို့ ကျမ်းစာ ဆိုတယ်။ (ဒေသနာ ၄:၆) အိပ်ခြင်းဟာ ဇိမ်ခံခြင်း မဟုတ်ဘဲ လိုအပ်ချက် ဖြစ်တယ်။ မအိပ်ရင် အလုပ်စွမ်းရည်အပြင် အပျော်စွမ်းရည်တောင် ကျဆင်းသွားမယ်။

• အိပ်မရတဲ့ အဓိကအကြောင်းရင်းကို ခွဲခြားသိမြင်ပါ။ ဥပမာ၊ သူငယ်ချင်းတွေနဲ့ ညနက်တတ်သလား။ အိမ်စာတွေ၊ အိမ်အလုပ်တွေ များလွန်းတယ်လို့ ခံစားရသလား။ ဆဲလ်ဖုန်းကြောင့် အိပ်ချိန်တွေ ကုန်လွန်သွားတာမျိုး၊ နိုးတာမျိုး ဖြစ်တတ်သလား။

စဉ်းစားကြည့်ပါ။ သင့်အဓိကအကြောင်းရင်းကို ကျော်လွှားနိုင်ဖို့ အချိန်ယူရပါမယ်။ ဒါပေမဲ့ အကျိုးရှိတယ်။ ပညာအလိမ္မာ ၂၁:၅ မှာ “ဝီရိယရှိသူရဲ့ အစီအစဉ်တွေ ကျိန်းသေ အောင်မြင်လိမ့်မယ်” လို့ ဆိုထားတယ်။

အိပ်ပျော်စေတဲ့အရာ တစ်ယောက်နဲ့ တစ်ယောက် မတူကြတာ မှန်ပါတယ်။ ဥပမာ၊ နေ့လည်နေ့ခင်း တစ်ရေးတစ်မော အိပ်လိုက်ရင် ညဘက် ပိုအိပ်ပျော်စေတယ်လို့ တချို့ ဆိုကြတယ်။ တချို့ကျတော့ နေ့ဘက် အိပ်လိုက်ရင် ညဘက် အိပ်မပျော်တော့ဘူး။ သင့်အတွက် အကောင်းဆုံးအရာကို ရှာဖွေပါ။ အောက်ပါအကြံပြုချက်တွေက အထောက်အကူပြုနိုင်တယ်–

• အနားယူချိန် ရယူပါ။ အိပ်ရာမဝင်ခင် သက်သောင့်သက်သာ အနားယူလိုက်ရင် မြန်မြန် အိပ်ပျော်စေနိုင်တယ်။

  “အိမ်အလုပ်တွေ၊ တခြားအလုပ်တွေ စောစော အပြီးသတ်လိုက်တာ ကောင်းတယ်။ အိပ်ရာဝင်တဲ့အခါ အလုပ်တွေအတွက် တွေးပူမနေတော့ဘူးပေါ့။”—မာရီယာ။

• အခြေအနေကို ဖန်တီးယူပါ။ အခြေအနေတွေရဲ့ ထိန်းချုပ်မှု မခံဘဲ လိုအပ်တဲ့ အိပ်ချိန် ရဖို့ သင့်အချိန်ဇယားကို စီစဉ်ပါ။

  “ညတိုင်း အနည်းဆုံး အိပ်ချိန် ရှစ်နာရီ လိုတယ်။ ဒါကြောင့် ခါတိုင်းထက် စောစော ထရမယ်ဆိုရင် အိပ်ချိန်ကို ပြန်ဆုတ်ရတယ်။”—ဗင်းဆင့်။

• တစ်သမတ်တည်း ဖြစ်ဖို့ ကြိုးစားပါ။ သင့်ကိုယ်တွင်းနာရီဟာ လေ့ကျင့်ပေးထားမှသာ အကျိုးပြုမယ်။ နေ့တိုင်း အိပ်ချိန်၊ နိုးချိန် တူနေဖို့ ကျွမ်းကျင်သူတွေ အကြံပေးကြတယ်။ တစ်လလောက် စမ်းကြည့်ပါ။ ဘယ်လောက် ပိုကောင်းသွားသလဲ စောင့်ကြည့်ပါ။

  “ညတိုင်း အိပ်ချိန် မှန်ရင် နောက်တစ်နေ့မှာ စိတ်လန်းဆန်းနေလိမ့်မယ်။ အဲဒါက လုပ်ဆောင်မှုတိုင်းမှာ ပိုထိရောက်စေမယ်။”—ဂျဲရက်။

• လူမှုဘဝ မျှတပါစေ။ ကျမ်းစာမှာ “အစွန်းမရောက်” ဖို့ ဆိုထားတယ်။ အဲဒီမှာ အားလပ်ချိန် လုပ်ဆောင်တဲ့အရာတွေလည်း ပါတယ်။—၁ တိမောသေ ၃:၂၊ ၁၁။

  “ညနေဘက် လူမှုရေးတွေကို ကန့်သတ်တတ်လာတယ်။ အပန်းဖြေချိန် မကန့်သတ်ထားရင် တစ်ခုခုတော့ ထိခိုက်တာပဲ။ များသောအားဖြင့် အိပ်ချိန် ထိခိုက်တတ်တယ်။—ရေဗက္ကာ။

• သင့်ဖုန်းလည်း “အိပ်” ပါစေ။ အိပ်ရာမဝင်ခင် အနည်းဆုံး တစ်နာရီလောက်မှာ အင်တာနက် ရှာဖွေမွှေနှောက်ကြည့်ချင်စိတ်၊ သူငယ်ချင်းတွေဆီ ညနက်မှ စာပို့ချင်စိတ်တို့ကို တွန်းလှန်ပါ။ ဖုန်း၊ တီဗီ၊ တက်ဘလက်အလင်းမျိုးက အိပ်ပျော်ဖို့ ခက်စေတယ်လို့ ကျွမ်းကျင်သူတချို့ ဆိုကြတယ်။

  “လူတွေက သင့်ကို ၂၄/၇ ရှိနေဖို့ မျှော်လင့်ကြတယ်။ ဒါပေမဲ့ အိပ်ရေး ဝဝအိပ်ဖို့ ဖုန်း မသုံးဘဲ နေရပါမယ်။”—ဂျူလီဆာ။