Dios, matche toj ahantsaj wet takhajay

Pedro ifwenho pʼante Martín wet Cristina toj mʼayhay toj Dios yenwetha p’ante hote inʼalit Heowa lakeyis iyhoj toj isis. Hopkhilak iwotesa, iyahyen p’ante nʼolhomtesna toj ihi Biblia:

• “¡Iwuk, wujpey mʼayhay tä lhenlhi! Nilhokej lhamel ahanyaj tʼat tä lhenejlhi. ¡Honhat tapoyejej enhay!” (Salmo 104:24).

—Hote insectos wok itshatayhas toj lalemsas ichufwen namejen Dios lehanyaj —yomlhi pʼante Pedro—. Malhyej toja, Biblia yome toj Dios lehanyaj nʼal toj ihi mʼayhay toj iwoye suwanhas.

Pedro ifwenho pʼante Martín toj is che itichunejlhi mʼak toj suwanhas iwoye, malhyej toj lhamel ilunwetha nilhok ifwalas wet ichaje lewʼet halʼo woley lhipey toj yisthen. ¿Chi malhyej toj lhamel ihanej tajtso? Iche pʼante nʼolesaynekwo toj yome pʼante toj suwanhas “matche tä ihan mʼakejen”. Mat, ¿atsi toj yenwetha pʼante suwanhas? Lhamel malhhiyejtʼa iwoye hinʼu toj iwoyek itichunejlhi mʼak toj iwoye, toj malhyejtso ¿atsi toj hiwʼenho lehanyaj lhamel? Dios Lhomtes yome toj hope pʼante Heowa, Elh toj yenlhi pʼante pele wet Honhat (Proverbios 30:24, 25).

—Otichunhayaj malhyej iwoye tajtso, itshatay toj hiwʼen lehanyaj, nalej toj iche pʼante Elh toj itichunejlhi chi iwoyneje toj yenwetha pʼante lhamelna —yomlhi pʼante Martín.

—¿Ha amel lehanej toj lhawʼatshancheyaj toj nawʼen isej Heowa lehanyaj? —toj Pedro tafwaytshi toj yomlhi Martín wet lechʼefwa tayʼotshan lhamejen che mʼaktso hope m’ak toj matche.

Pedro ifwenho pʼante lhamel toj matche toj iseltej pʼante toj ihanej toj mʼayhay toj nawatla ihi honhatna hopkhilak nalayhiche. Malhyej toja, isej toj Honhat lham tʼat toj ilunhi wet hote ilunejlhi Ifwala, hop toj tamenej toj iche nahayhos wet fwiyʼetil wet hote hiwʼen namhomche mʼak toj chayo. Lhayʼe toj iche naya inot toj ihi Honhat hopkhilak tachʼot namehen wet yikchufwi toj nalayhiche. Hote honhat hiwʼen mʼak toj halʼoy iwatla hopkhilak talh.

—Olham ohanej toj nilhokej mʼayhay toj iche nalej toj iche pʼante nʼoelh toj yenwetha —yomlhi pʼante Pedro—. Ohanej toj hope pʼante Heowa, hop Nʼohanyajwuk, toj hiwʼen namhomche mʼayhay toj nawatla hopkhilak kamaj nalayhiche.

Martín wet Cristina, ilenwetho lhetey, inʼalit tʼat toj lhamel letichunhayaj malhyej iwoye Pedro.

Toj tafwaytshi, Pedro yome pʼante mʼak elh toj iyej Dios toj hote lhamel iselthiyejena toj hope nʼokhajyhayaj. Martín ihuminche pʼante che ihanej atsi toj yome Biblia mʼak toj hope Heowa lekhajyhayaj wet Pedro iyahyen pʼante nʼolhomtesna:

• “Iwuk Dios, am tä lhenlhi pule lhäyʼe honhat tsi wuj tä akhajyhayaj ihi. Eh newache mʼak chik atha amho” (Jeremías 32:17).

—Hopkhilak nahanej toj Heowa wuj lekhajyhayaj, natichunejlhi Ifwala hutunek —yikchufwi toj yomlhi pʼante Pedro—. Che Ifwala inupha namel nalatla toj chayo, ¿ha malhyejtso? ¿Ha amel lefwetaj Ifwala matche toj lekhajyhayaj ihi?

—Matche, lhipna wuj toj chayokwe toj nam lewhay —Martín wet Cristina nichulho p’ante.

Pedro iyahyen p’ante wet ifwenho lhamel, toj Ifwala lhip toj lechowej matche toj chayo inuʼpe m’ak at che hope, ihichetʼa hinʼu che tumla toj chayo. Che natchuma Ifwala lhip malhyej alfiler lhetek is che nalhaitonte 150 kilómetros (30 leguas) hopkhilak nayʼinhenhitʼa. Mʼak toj isi toj talho Ifwala weihalhapej segundo malhyej iwoye wujpe bombas toj ichewek toj techʼelhen.

—Che Ifwala hope kates toj matche toj takhajay —Pedro yomhoplhi pʼante Martín wet lechʼefwa—, Elh toj lhenek pʼante Ifwala, ¡matche toj wuj lakhajyhayaj! Toja matche toj atha che namatitche. Mat Ifwala hope mʼak toj inʼalit namejen lhimpaj nʼokhajyhayaj toj tolhe Elh toj lhenek Ifwala, Heowa.

Martín wet Cristina letichunhayajay malhyej iwoye Pedro toj nilhokej mʼayhayna toj matche toj isis ­nalej toj iche pʼante nʼoelh toj yenlhi, tsi matche toj atha che lhamel tʼat che lhayenwetha. Lhayʼe toj nechʼe ihanej toj tej toj hope espíritu toj ninʼala, hope Elh toj iche wet nilhokej mʼayhay toj yenwetha pʼante inʼalit toj tajlhamet lham toj nʼohumnhayaj, nʼoʼisyaj, nʼohanyaj wet nʼokhajyhayaj iyej, inuʼpe mʼak che hope.