Husekchʼoye Lot lechʼefwa

Lot iyej pʼante laka tío Abraham toj ihi Canaán. Lot wet Abraham tʼaytshipej toj hiwʼen lelay wet lewʼet ihihitʼa toj ihi lhiptso. Hop toj tamenej, toj Abraham ifwenho pʼante Lot toja: «Iwohiyetʼak natujlhache toj nehi tʼat lhipna. Tshupiye lhip toj lehuminchek lehoye, wet olham ohohiyela lhip elh». Nʼal tʼat toj Abraham matche toj lehusek ihi, ¿mat?

Lot hiwʼen pʼante lhip honhat toj matche toj isilataj, wʼatshan wet wuj toj inat ihi. Hop toj tamenej toj lham itshupiye lhiptso wet yik toj lhayʼe lewʼet lheley toj ihoye lhiptso. Ihoye tʼat ciudad toj iwhaye Sodoma.

Wichi toj ihi pʼante Sodoma wet elh toj iwhaye toj lhey Gomorra matche pʼante toj fwitses. Inuʼpe toj fwitses wichitso toj Heowa itshupiye toj itayhat ciudadestso. Mat Dios iwatlak ifwayhat Lot wet lewʼet lheley, ichene dos laka ángeles toj ifwenho toja: «¡Mah! ¡Ekchʼoya hop ciudadna! ¡Heowa itayhthila!».

Mat Lot yikhitʼa. Toj malhyejtso ángeles itsok Lot, lechʼefwa wet leles tsinhay kwey wet inukwe alhoho toj itompha lhamel toj talho ciudadtso. Lhamel yok: «¡Nukwe alhoho! ¡Ekhen hopkhilak leyʼinhitʼa wet yej yahinche amel hanʼayij! Che leyahinche, leyʼinhenla».

Toj lhamel ichate ciudad toj lhey Zoar, Heowa itshaype itaj wet azufre Sodoma wet Gomorra. Dos ciudadestso tatayhen tʼat. Lot lechʼefwa tachʼahuhiyetʼa pʼante Heowa iyahinche lenʼayij wet lhayen estatua toj nisoy. Mat Lot wet leles tsinhay tafwayhen hop toj chʼahunhas. Nʼalej toj wuj pʼante toj lefwitajayaj ihi hop toj Lot lechʼefwa tachʼahuhiyetʼa Heowa, mat lhamel letamsekis ihi hop toj tachʼahuye tʼat Heowa.