Niyat toj ichun toj ihi Israel

Heowa hiwʼenho pʼante jueces hop israelitas hopkhilak inuhyenkwe lenʼayij, mat lhamel tʼupʼantehlak hiwʼen laka niyat. Hop toj tamenej toj lhamel ifwenho Samuel toja: «Nilhokej lhipey iyhaj hiwʼen laka niyatey, olhamel hate owatla elh». Samuel yen tichunhayaja toj tajtso isitʼa. Hop toj tamenej toj iwo tʼalhyajaye Heowa, wet lham nichulho: «Wichina ilehitʼa amej, ile nʼoyej. Fwenho lhamel toj iwoyek hiwʼen laka niyat, mat niyattso tʼalhiyela wujpe mʼayhay». Tej toj malhyejattso, wichi yok: «¡Olhamel owatla niyat!».

Heowa ifwenho Samuel toj hinʼu toj lhey Saúl hopehla niyat toj ichun. Toj Saúl tʼisiyake hop Samuel toj ihi Ramá, Samuel itsaype aceite lhetek hopkhilak inʼalit toj hope niyat toj Heowa itshupiye.

Toj paj, Samuel ihutwek israelitas hopkhilak ipayne laka niyat toj nechʼayek. Mat nilhokhiyetʼa hop Saúl. ¿Ha lehanej mʼak toj tamenej? Hop toj lhaiskat toj ihi nʼokay lehi. Toj nʼolhoke, nʼotompha wet nʼotihi wichi lechowej. Lham hope elh toj inuʼpe iyhaj toj tojpha wet matche toj isilataj. Samuel yok: «Yahin elh toj Heowa tatshupiye». Wet wichi tʼan toj yok: «¡Lewujyaj ihi niyat!».

Toj ichun, niyat Saúl iwoyepej mʼak toj Samuel tʼalhe wet toj tachʼahuye Heowa. Mat toj paj iwo elha. Iche lewhay toj Samuel ifwenho Saúl toj is che inihihla lham toj iwo wayhata Heowa. Hop toj niyat hopkhitʼa lechumet tajtso. Mat Samuel pajla, hop toj tamenej toj Saúl tsʼilak lham toj yachaje nʼowayhtes hop Heowa. ¿Atsi mʼak toj Samuel iwoye? Lham yok: «Is pʼante che lechʼahuye Heowa wet lewohiyetʼa». ¿Ha Saúl ihanej toj is che tajlhamet tachʼahuye hop Heowa?

Toj paj, Saúl yik toj itayhla amalequitas, wet Samuel ifwenho toj is che ilanhen nilhokej lhamel. Mat Saúl itshupiye toj ilanhitʼa niyat Agag. Hop toj tamenej toj Heowa ifwenho Samuel toja: «Saúl iwomnʼo, ileyej toj tachʼahu nʼoye». Samuel wuj toj lefwitajayaj ihi, wet ifwenho toja Saúl: «Heowa tatshupiyela elh niyat hop toj am lechʼahuhiyetʼa lham». Toj Samuel lhaitilhkat toj yik, Saúl itsok lewʼuy lhip, wet iwasthi. Samuel ifwenho toja Saúl: «Malhyejatso toj Heowa isohla amej aniyatyaj». Tajtso hope toj Heowa hiwʼenhihola nʼoniyatyaj elh toj ihumin wet tachʼahuye lham.