Hop guerrero wet lhutshafwaj

Toj ihi Aram iche lhutshafwaj toj israelita toj tofwehla lewʼet wet lewʼet lheley. Hop toj ejército toj talhe Aram ichaj, athana hope nʼokwenek toj tachʼotejlhi Naamán lechʼefwa, hinʼu toj lhaitumtej ejército. Lhutshafwajna nʼokwiyej Heowa tej toj wichi toj iyej iwohiyetʼa.

Naamán matche toj isitʼa pʼante letʼinhayaj toj iʼpe tʼaj wet matche toj aytaj. Lhutshafwajna tʼuhlak tachʼote, hop toj tamenej toj ifwenho Naamán lechʼefwa toja: «Olham otafwelej elh toj iwoyek tachʼote hachʼefwa hopkhilak iches. Toj ihi Israel iche Heowa laka profeta toj lhey Eliseo, lham iwoyek ichesat hachʼefwa».

Atsinha ifwenho lechʼefwa Naamán mʼak toj lhutshafwaj ifwenho, lham iwatlak yelhte mʼak at che hope hopkhilak iches hop toj tamenej toj ihoye Eliseo lewʼet toj ihi Israel. Naamán yen tichunhayaja toj Eliseo yamla is toj tachumla lham hop toj lenʼohyaj ihi, mat iwohiyetʼa tajtso. Eliseo ichene lakawo hopkhilak iyahinhla wet ifwenho toja: «Mah, hoye tewok toj ihi Jordán wet lej amche siete veces wet lechesla».

Naamán ihuminhitʼa tajtso, wet yok: «Oyenek profetana ichesatlanʼo toj tʼane laka Dios wet yenlhila mʼayhay toj iselkatnʼo. Mat lham tajlhamet ifwel nʼoho toj is che ohoye tewok toj ihi Israel. Mat tewok lhayis toj ihi Aram inuʼpe tewok lhayis toj ihi Israel. ¿Atsi toj tamenej toj iwohiyetʼak ohoye tewok lhayis toj ihi Aram?». Naamán wuj toj lewak ihi wet yikchʼoye Eliseo lewʼet.

Naamán lakawos tachʼote lham toj yam is letichunhayaj. Lhamel ifwenho toj yok: «Che profeta neʼtek lewoyene mʼak toj atha lewoye tʼat. Mat toj profeta tʼalh ame toj lewoye mʼak toj athahitʼa, ¿atsi mʼak toj tamenej toj lewohiyetʼa lhomet?». Naamán tachʼahuye lhamel, ihoye tewok Jordán wet yʼuyhcha siete veces. Toj lepes toj Naamán yʼuyhcha toj inupha iches tʼat. Matche toj lekajyaj ihi wet yaple Eliseo lewʼet, hiwʼenho gracias lham wet yok: «Nechʼe ohanej toj Heowa hope Dios toj matche». Toj Naamán yaple lewʼet, ¿atsi mʼak toj lefwetaj toj lhutshafwaj ilate toj hiwʼen toj iches?