Josías ihumin Dios laka Ley

Josías hiwʼen pʼante ocho años toj iwo tesa toj lhayen niyata toj ihi Judá. Lewhaytso wichi ichumyenlhi magia wet nʼokwiyej dioses toj kamatachehen. Toj Josías hiwʼen pʼante 16 años, tʼupʼantehlak ihanej toj nʼokwiyej Heowa malhyej toj lham ihumin. Toj paj, toj hiwʼen pʼante 20 años, iwo tesa toj iwasthiche ídolos wet altares toj ihi nilhokej lhipeytso. Wet, toj hiwʼen pʼante 26 años, iwaklhat nilhokej mʼayhay hopkhilak yam is Heowa lewʼet.

Toj ihi templo sacerdote toj lhamya, Hilcías, nilhoke rollo toj Dios laka Ley ihi. Nʼalej toj rollotso Moisés pʼante toj ilesayen. Safán, niyat lelesaynekwo, ichaje rollo hop Josías wet yam aytaji lepak toj iyahyen. Josías tachʼahuye wet ihanej toj wichi wujpe lewhayis toj tachʼahuhiyetʼa Heowa. Toj malhyejtso, niyat Josías tahuyej Hilcías wet yok: «Heowa iti namejen lewak tahuyej lham hopkhilak ifwel namhohen mʼak toj is che nawoye». Heowa hiwʼenho nʼosilotna hop profetisa Hulda: «Judá ka wichi iwomnʼo. Otihiyeja okalelhthayaj, mat hopkhitʼala lewhay toj Josías iwo leniyatyaja, hop toj lham lhaichajlhihitʼa».

Toj niyat Josías ilate Heowa lhomet, ihoye templo wet ihutwek Judá laka wichi. Toj paj, yam aytaji lepak toj iyahyen Heowa laka Ley. Josías wet wichi ikalelhat toj imalhewek lehusek toj tachʼahuhiyela Dios.

Wujpe años toj Judá laka wichi yenhilhitʼa nʼokajyaj toj Pascua. Mat Josías iyahyen Ley toj nilhokej años is che nʼoyenlhi Pascua, hop toj tamenej ifwenho wichi toja: «Nenlhila nʼokajyaj toj Pascua toj nʼotayhate Heowa». Toj paj, Josías neʼtek wichi toj iwaklhat wujpe Heowa lewʼayhtes wet hate tʼalhe che iche wichi toj ichoywetha toj ihi templo. Ocho ifwalas toj wichi iwo kajyaja, toj ichun yenlhi Pascua wet toj paj Nʼokajyaj toj Panes toj Levadura Newahi. Talhe lewhay toj Samuel yʼil toj ihichetʼa Pascua toj malhyejtso. Josías matche toj ihumin Dios laka Ley. ¿Wet am? ¿Ha hate lehumin toj alechufwenej mʼak toj talhe Heowa?