MʼAK TOJ DIOS LAKAWOS IHI
Tetshanchʼoye atsi Heowa letichunhayaj
Nilhokej namel nahumin Heowa wet natʼuhlak lham akajejlhi mʼak toj nawoye (Pr 27:11). Hop toj tamenej iwatlak nakalelhat lhamho toj nilhokej mʼayhay toj natshupiye yiwtejla Heowa letichunhayaj, tej toj ihichetʼa texto toj ipayen namehen mʼak toj iwatlak nawoye. ¿Atsi mʼak toj iwoyek nawoye?
Nalechufwenej Dios Lhomtes nilhokej ifwalas. Toj nayahyenpej Dios Lhomtes, malhyej iwoye che newhaye Heowa. Toj natetshan mʼak toj Heowa iwoyeje lakawos toj pajchehen wet nen tichunhayaja ejemplos toj isen wet iyhaj toj niʼisahen iwoyek tachʼot namehen toj natafwelej Heowa letichunhayaj. Toj malhyejtso, che iche mʼak toj iwatlak natshupiye hopkhilak nawoye, Heowa laka espíritu toj nʼotʼamajchet tachʼotla namehen toj nahusekchʼoye lefwonyajay wet iyhaj mʼayhay toj lahal ihi toj nalechufwenej naji toj ihi Dios Lhomtes (Jn 14:26).
Nateshanchʼoye. Toj kamaj letatshupihiyetʼa mʼak toj lewohiyela, atshan ame: «¿Atsi mʼayhay toj Biblia yome iwoyek tachʼot nʼoye toj ohanej Heowa letichunhayaj toj itiyej mʼak toj owohiyela?». Alheje Heowa lechʼotyaj wet chumyenlhi mʼayhay toj iche toj ihi amtes hopkhilak lewʼen wet lewoye nʼochufwenyajay toj talho Biblia toj yiwtejla mʼak toj lhehi (Sl 25:4).
YAHIN VIDEO IWATLAK NALHAIKHAJYENHEN TOJ NANUKWE ALHOHO: NATUJ NʼOLHAK TOJ MATCHE TOJ IS, WET TOJ PAJ CHULHO NʼOYʼATSHANHAYNA:
¿Atsi mʼayhay toj athahen toj itelaytej atsinha lhutsha toj ihi video?
¿Chi malhyej (Ep hote) toj nʼochumetchal hopkhilak nʼolhaichufwenej Biblia iwoyek tachʼot ame toj letelaytej mʼayhay toj malhyejentso?
Toj kamaj natshupihiyetʼa mʼak toj nawohiyela, ¿chi malhyej (ep hote) toj naisiyeja che nawo lewhaya toj nalechufwenej wet natetshanchʼoye mʼayhay toj talhe Biblia? (Heb 5:13, 14).