Yej tachemlo religión toj kamatache

Ahottaj wet ahot lhayis yahemenitʼe che am lawuye mʼak toj tolhe Dios. Ichemyenlhi religión toj kamatache, yomtilak nilhokej wichi itiyej kany Dios (2 Corintios 11:13-15). Hope religión toj kamatache ichefwenitʼe ame mʼak toj matche toj ihi Dios Lhomtes. Hop religión toj kamatache hoteʼiwuye hop tuna iwus toj ihi lechʼoye. Chik lawʼen isajya mat isitʼe wet chik latefw ihon ame wujpe awithoy.

Heowa hope Dios toj matche wet yahemenitʼe religiones toj kamatachehen. Lawhoy toj Jesús iʼpe honhat aʼelh religiosos iwatlok pʼante ilon lham. Nʼochufwenyajwuhuy pʼante yeneche is alhuhu mʼak toj iwuye nʼokwiyej Dios wet yomey: “¡Olhamel Ojcha tefwajʼatni, häpe Dios!”. ¿Ha Jesús letichunayaj hoteʼiwuye lhamil? ¡Kha! Lham nichulho wet yuk: “Ahättaj tä aleles” (Juan 8:41, 44). Hoteʼiwuye ifwalasna wujpe wichi yeneche is alhuhu mʼak toj iwuye nʼokwiyej Dios, mat iwuye mʼak toj tolhe Ahottaj wet ahot lhayis (1 Corintios 10:20).

Hop religión toj kamatache iwatlok wichi iwuye mʼak toj niʼisa, hoteʼiwuye halʼo toj najeti toj iwu lhaya lhay najetiche. Wichi iwuye mʼak toj niʼisa, toj molhyejtsu iche wujpe lawithoy toj iʼpe honhat. Iche wichi iwuye lesukyaj, ilokwlhi iñhoj, toley (techum), ilon wet tʼetan iñhoj. Hote iche wichi toj oscheʼpe iñhoj. Wujpe lhamil hiwʼen religión mat laka religión iwajnhiyejʼa iwuye mʼak toj is. Che lhamil iwatlok hope Dios lhoyfwa, is che ileche toj iwuye mʼak toj niʼisa (Mateo 7:17, 18).

Hop religión toj kamatache ichefwenej wichi iwutʼalhyajaye tocheyo. Dios ifwel nhamu che toj isitʼe iwutʼalhyajaye tocheyo. ¿Ha lefweta is alhuhu? ¿Ha am lehemenche che iche aʼelh chik nhanayej nitahuyʼamej, mat tahuyej apeyak? ¿Ha hopkhila oyfwa? Kha. Heowa yahemenitʼe wichi tahuyej tocheyo wuk mʼak toj wenhitʼe nʼowʼatshancheyaj. Dios yahemen che letahuyej wehialha Lham (Éxodo 20:4, 5).

Hop religión toj kamatache ichefwenej wichi toj is che iwuye ilon elh chik ihi nʼokʼatshayaj. Jesús yome pʼante Dios lhoyfwas toj lhayhemnhila. Toj molhyejtsu, isuhiyejʼa wichi lewʼatshancheyaj hop iyhoj toj yahemnhen (Juan 13:35). Mat, ¿ha is che ilon wichi toj fwitses? Hop lawhoy toj Jesús iche, latayfwas ekwe ichojeʼat nhopʼonti, mat lham iwajnhiyejʼa che lachefwenkay lhaylhonpe (Mateo 26:51, 52).

Hop religión toj kamatache ichefwenej wichi toj fwitses ihuyej itoj (infierno). Mat Dios Lhomtes ichefwenej toj lhasukyaj ichoj nhame lhatʼilek (Romanos 6:23). Chik Heowa Dios toj hope hemnayaj, ¿ha hipʼaltsenlhi nilhok lawhoy wichi? ¡Kha! Honhat toj isilataj ihichela wehialha religión, toj Heowa yahemen (Revelación 15:4). Nilhokej religiones toj kamatachehen ichefwenej mʼak toj tolhe Ahottaj mat hopkhihena yikonchila.