LHIP 4
Nʼoelh toj ilan lhamej letichunhayaj: «So nʼoyej osukyaj»
«Nʼowʼen nʼoho nʼochumet toj owʼet lheley matche toj isej, mat nʼochumettso inityen nʼoyej toj owoye mʼayhay toj Heowa nʼayiho. Owo tesa toj oyenlhi nʼokajyajay toj wichi iwoye, olhayʼuyto mʼak toj políticos iwoye wet ohoye tʼat hop cultos iyhaj. Cuarenta nekchomis toj otofwehla hop Heowa. Toj tafwaytshipej wujpe lewhayis iyhaj, tʼaytshipej toj okachu toj lham itayhat otes. Hop toj olham otayhthitʼa lhamej otes, otshupiye nʼayij toj niʼisa alhoho tej toj ohanej Heowa lenechʼethayaj» (Martha).
NʼOELH toj ilan lhamej letichunhayajay iwoyek hope nʼolhuk toj choyhat. Niyat David ihanhiyejtʼa mʼak toj iwoyeje lechʼisukyajay, hop toj tamenej toj ilesayen toja: «Choyhat olhuk tä häpe ochʼisukyaj, ofwtsinhitʼa» (Salmo 38:4). Iche ipunfwas iyhaj toj yen tichunhayaja toj Heowa itayhthitʼa letes, hop toj tamenej toj wuj lefwitajayaj (2 Corintios 2:7). ¿Ha lelate toj tume ahusek toj matche toj atofwehla Heowa hop toj lewoye pʼante hachʼisukyaj? ¿Ha lhen atichunhayaja toj nʼochʼisukyaj toj lewoye pʼante Heowa itayhthitʼa ates? Is che atamsek ihi, Heowa tʼuhlak tachʼot ame.
«Lhuyay wet nʼämawethä nʼamhohen»
Heowa ilehiyejtʼa iyhaj toj iwo elha lehusek. Mat lham tʼuhlak tachʼote lhamel. Nʼotechʼaynek toj Jesús yome pʼante toj manse yickchʼoye lajcha lewʼet wet toj iwoye wujpe mʼayhay toj niʼisa wet toj paj lham tʼuhlak yaple lajcha lewʼet. Lewhay toj yapil ¿atsi mʼak toj iche? «Tä kamaj atojlä, lajcha hiwʼenlä wet wuj tä hipʼaltsen. Wet inu alhoho tä lhaichutyenej häp lhäs, wet tatsufwelej wet hitsʼuhi lechʼalo» (Lucas 15:11-20). Heowa hatet iwoye nʼojchatso toj humnhatsaj wet pʼaltsentsaj. ¿Ha am letʼuhlak lhamwhoye lham mat lelate toj tume ahusek toj kamaj atofwehla? Is che lhen atichunhayaja toj Heowa tatay ame.
¿Ha lhen atichunhayaja toj Heowa itayhthitʼa ates hop toj nʼochʼisukyaj toj lewoye pʼante matche toj niʼisa? Che malhyejtso en atichunhayaja mʼak toj Isaías 1:18 yome: «Lhawuk yokwe: “Lhuyay wet nʼämawethä nʼamhohen. Tej tä hachʼisukyajay wuj tä nʼäl, mat olejla, hätehlat iwoye fwiyʼet tä wuj tä ipelaj». Toj malhyejtso Heowa iwoyek itayhat namejen lhachʼisukyajay tej toj malhyej iwoye mʼak toj chat toj iyej wesaj toj pelaj.
Heowa tʼuhitʼahlak lelan amej atichunhayaj. Lham itayhat namejen lhates wet toj lhatichunhayajay letamsek ihi tajtso ikhajyen namel. ¿Atsi mʼak toj is che lewoye hopkhilak lekalhi tajtso? Malhyej iwoye mʼak toj niyat David iwoye pʼante. Toj ichun lham yo pʼantek: «Ofwenhihola Lhawuk osukyaj» (Salmo 32:5). Heowa pajche ifwel amho toja: «Nʼämawethä nʼamhohen». Chumla wet chumyenlhi nʼotʼalhyaj hopkhilak lhamwhoye lham. Fwenho hachʼisukyajay wet hate fwenho mʼak toj lelate toj tume ahusek. David ihanej pʼante toj Heowa tachʼahuhiyela letʼalhyaj wet yok: «So nʼoyej osukyaj». Hate yo pʼantek: «Häp elh tä yen lhakliya lesukyaj tä iwoye wet lhayʼayhatchä, häp tä letachumlä, Iwuk Dios» (Salmo 51:2, 17).
Mat hate David ichumla profeta Natan lechʼotyaj hop elh toj Dios ichumyenlhi (2 Samuel 12:13). Ifwalasna Heowa ichumyenlhi hinʼul toj tʼuyehen lepunfwas toj ihi congregación. Ipunfwasna nʼochufwenej hopkhilak tachʼote iyhaj toj iwo iyhaja lehusey wet yachajo toj ise Heowa. Lewhay che letahuyej hinʼul toj tʼuyehen lepunfwas, lhamel ichumyenhilhila Biblia hopkhilak tachʼot ame toj yachajo toj aise Dios. Hate lhayʼehla am toj iwo tʼalhyaja hopkhilak atamsek ihi wet letiyej kanhi atichunhayajay toj niʼisa alhoho (Santiago 5:14-16).
Heowa tʼuhlak atichunhayaj letamsek ihi
«Lhawuk lakäpfwayaj tä is iyej hinʼo tä lham itäyhtej lesukyajay wet noj letes»
Iwoyek atha toj nafwenho Heowa wet hinʼul toj tʼuyehen lepunfwas lhachʼisukyajay. David athaho pʼante toj iwoye tajtso. Dios lhomtes yome toj wuj lewhay toj ihichetʼa elh che ifwenho lechʼisukyajay toj iwoye pʼante (Salmo 32:3). Mat toj paj, hiwʼen tʼat toj matche toj isej toj ifwel nʼochʼisukyaj toj iwoye pʼante wet ileyej.
Mʼak toj David ikalhi hope toj yachajo toj lekajyaj ihi. Lham ilesayen pʼante: «Lhawuk lakäpfwayaj tä is iyej hinʼo tä lham itäyhtej lesukyajay wet noj letes» (Salmo 32:1). Hate tʼalhe pʼante Dios: «Iwuk, wʼen nʼoho ochos [opak] häpkhilek otchoylhi tä owunit ame» (Salmo 51:15). David ilate pʼante toj matche toj lekajyaj ihi wet hiwʼenho gracias hop Heowa, tajtso inityenej toj iwujyen Dios toj ihi toj wichi tatache.
Heowa tʼuhlak am lhen akajyaja toj atichunhayaj letamsek ihi. Lham ihuminchek, toj che lhome lham wet mʼak toj iwohiyejela wichi hopkhilak lekajyaj ihi, atichunhayajay letamsek ihi wet lhome mʼak toj matche (Salmo 65:1-4). Heowa ifwel namhohen toja: «Tä mälhyejtso, woyay ahusey iyhäja wet atilhkataye Dios, häpkhilek itäyhthen hachʼisukyajay, wet ichätyen amehen nʼotamsek tä tälhe» (Apóstoles Lhenhay 3:19).
Ipunfwana toj namene toj ichun toj lhey Martha yok: «Olhos ithat nʼoyepej hop revistas toj lhey La Atalaya wet ¡Despertad!. Wet lhimpajpej toj yachajo toj oise hop Dios. Mʼak toj lhayʼe lhip toj atha nʼoho hope toj owo tʼalhyajaye wet otʼalhe che itayhat nʼoyej nilhokej nʼochʼisukyajay toj owoye pʼante. Mat owoye tʼat. Oyaple Heowa toj tafwaytshi cuarenta nekchomis, ¡matche toj oseltej! Mʼak toj oyome ikalelhat toj, tej toj pajche toj natofwehla hop Heowa lham kamaj tʼuhlak lhaple, nalatla lehumnhayaj wet nehi laka wichi».