Halʼo toj lekʼe

Hop 40 años toj Moisés ihi pʼante Madián. Lewhaytso, tawhayey wet leles ihi. Iche lewhay toj lham tʼuye lelay tsonʼatas toj iwhaye chenhaj Sinaí wet iche mʼak toj iseltej toj hiwʼen. Iche halʼo toj lekʼe, ¡mat yohohitʼa! Toj Moisés iyahne, ilate nʼopak toj tumho halʼotso. Nʼopaktso yok: «¡Moisés! Yej lham alhoho. Lanche anisahis, hop toj honhat toj letʼasinna nʼotʼamajchet tʼat». Hope tʼat Heowa, toj tahuyej Moisés toj ichumyenlhi ángel.

Moisés wuj toj noway, hop toj tamenej toj hipʼoʼpe letepe. Nʼopaktso ikalelhtho: «Owʼen toj Israel lhayis ihi lewitʼay. Ofwayhthiyeja Egipto lhayis wet ochajiyela honhat toj is. Wet owatlak am toj letompha oka wichi toj ihi Egipto». ¿Ha Moisés iseltej tajtso?

Moisés yok: «¿Atsi mʼak toj ofwenho che iche nʼoelh toj iwatlak ihanej atsi elh toj ichennʼo?». Dios ichulho: «Ohlak Heowa, Abraham laka Dios, Isaac laka Dios wet Jacob laka Dios hope elh toj ichennʼo». Moisés yok: «Wet, ¿che aka wichi tachʼahuhitʼa noye?». Heowa iwoye mʼak hopkhilak inʼalit toj tachʼothiyela. Tʼalhe Moisés che itat honhate letsut, wet toj iwoye, ¡letsut lhayen hopeya amlhaj! Toj paj, Moisés tachuma amlhaj wet yachajo toj hope letsut. Heowa ikalelhtho: «Che lewoye tajtso, lenʼalthila toj olham ochen ame».

Mat Moisés yok: «Tʼunhomche olhamtes toj otahuyej wichi». Heowa yok: «Ofwenla amho mʼak toj is che lhome, wet hate, ochenla achʼinij Aarón hopkhilak tachʼot ame». Athana toj Moisés ihanej toj Heowa tachʼothiyela, lham yaple Egipto wet ichaj lhamche lechʼefwa wet leles.