«Nemhit olate che owatlak owo elha m’ayhay toj ihi honhat»

M’AK TOJ OIHIHTE:

Talhe toj on’afwaj toj wuj toj ohumin m’ayhay toj ihi honhat. Olhay’epej ow’et lheley toj olunwetha toj ohoye lhip toj isilataj toj iche hal’oy toj w’atshan wet lewomekitaj toj ilunejlhi Jyväskylä, toj ihi Finlandia. Hate, matche toj ohumin itshatay. Talhe toj on’afwaj toj ot’uhlak otsufwelej nilhokej sinhas wet mitshilis toj ow’en. Toj olhaichiyhelit iwo tesa toj ofwitajayaj ihi toj ow’en wichi toj itiyej m’ak toj ni’isa itshatay. Toj malhyetso, olhaithatche organizaciones toj t’uye itshatay. Lhiptso otafwelej wichi toj letichunhayajay hate iwoye otichunhayaj.

Olhamel oyenlhi campañas hopkhilak n’owoyeje m’ak toj t’uhawetej itshatay. Ow’enhomchehte wichi papeles wet olhamel oyenlhi marchas toj tatayhla hup toj iwom itshatay t’ahes wet laboratorios. Toj lepes, olhamel oyenlhi organización toj t’uye itshatay. M’ayhay toj olhamel owoyehte ichepej lewhay toj ichaj n’oyehen n’owit’ayhyajay. Ichepej toj n’op’o n’ohi wet n’ochaj n’oye n’okalelhthayaj.

Hate iwo olhakliya wujpe m’ayhay, toj malhyetso olhaithatche organizaciones toj lhey Amnistía Internacional wet Greenpeace, wet inu’pe lew’et toj olhaithatche organizacionestso. Hate, iwo olhaklia wichi toj m’ak niw’ena wok toj ichuyuhen.

Mat toj paj, otafwelej toj iwohiyet’ak owo iyhaja m’ayhay toj ihi honhat. Tej toj olhamel okalhi iyhaj m’ayhay toj lelemsas, mat n’owit’ayhyajay yik t’at toj t’aytshi. Malhyej iwoye che m’ak toj ni’isa tim nilhok honhat wet ihichet’a elh che yen lelhakliya m’ak at che hope. Wet olate toj m’ak okalhihit’ala.

BIBLIA IWO ELHA M’AK TOJ OIHI:

Ofwitajayaj ihi toj iwohiyet’ak okalhi m’ak toj ohuminchek iwo elha. Toj malhyetso, nech’e otichunla Dios wet Biblia. Tej toj ichun otetshante Biblia olhay’e wichi toj yen lhometa Heowa, wet matche toj is toj lhamel in’alit n’oyej lep’altsenyaj wet lehumnhayaj, mat owak’alhit’a che owo elha m’ak toj oihi. Mat athana iwo elha tajtso.

Ot’ukwe oka Biblia wet owo tesa toj oyahyen. Wet tajtso matche toj tach’ot n’oye. Oyahyente wujpe textos toj yome toj is che n’ot’uye itshatay. Malhyej toj ihi Proverbios 12:10 toj yok: «Hin’o tä is yen tichunhayaja leläy wet t’uye t’at». Hate, otafwelche toj Dios hopkhit’a elh toj tamenej toj n’owit’ayhyajay ihi honhatna. Mat, m’ak toj tamenej toj yik t’at toj iche n’owit’ayhyajay, hope wichi toj iwohiyet’a Heowa fwonyajay. Matche toj oseltej Heowa humnhayaj wet letelaythayaj toj iti namejen (Salmo 103:8-14).

Wet lewhaytso ow’en papel lhip hopkhilak ot’alhch’oye libro toj lhey M’ak toj Biblia ichufwen amej. Wet pitajit’a lewhay wet ichehte iyhaj wichi toj yen lhometa Heowa toj iwatlak olhaichufwenej Biblia. Okelit toj otchumla. Hate, owo tesa toj ohoye laka reuniones toj iyej wichi toj yen lhometa Heowa lew’et. M’ayhay toj matchehen toj ihi Biblia lhimpajpej toj tiyajo ohusek.

Isej Biblia, okalhi toj owo iyhaja wujpe m’ayhay. Noj toj ochumyenlhi yokwas wet toj oyayej hat’es, oyam is okey wet olhomtes, wet hate owo elha otichunhayaj toj otiyej wichi toj len’ohyajay ihiche (Romanos 13:1). Hate, oleyej m’ak toj kok’aye, tej toj hope m’ak toj wuj toj owoyehte tajtso.

M’ak toj matche toj atha n’oho hope toj otiyej otichunhayaj toj t’uhawetej hop organizaciones sociales. Ifwalapej toj olhaikhajyen toj owo elha otichunhayajtso. Toj ichun olate toj malhyej iwoye che oyachaj lhamel. Mat toj paj, otafwelche toj tajlhamet Dios Niyatyaj toj iwoyek itayhat nilhokej honhat lewit’ayhyajay, toj malhyetso, ochunkat toj olhaithatche wet otafwnhatej wichi tajtso (Mateo 6:33).

N’OKOPFWAYAJAY TOJ OKALHI:

Lewhay toj olhaithatchehte organizaciones, oyenek iche iyhaj toj isen wet iyhaj toj isihent’a, wet oyenek is che otayhla iyhaj toj isihent’a. Athana isej Biblia toj nemhit olate toj on’ayiho lhamel wet olhaikhajyenej toj ohumin nilhokej wichi (Mateo 5:44). N’ohumhayajtso on’alit lewhay toj oyen lhometa n’osilotyaj toj isis toj yome Dios Niyatyaj. Okajyaj ihi toj ow’en toj n’ochumetso hiw’enho letamsek wet lekajyaj wichi, wet hate lhamel iwoyek leniwhayaj ihi.

Toj otihi Heowa kweyey nilhokej m’ayhaytso, tajtso yachajo toj hiw’en n’oho otamsek. Kalelhaj n’oho toj lham, elh toj lhenek m’ayhay, inuhlahla m’ayhay toj ni’isahen toj n’otiyej wichi, itshatay wet lhaka honhat. Mat, isej Leniyatyaj atofwiyet’a che itayhthila m’ayhay toj ni’isahen toj wichi toj tamenej toj iche (Isaías 11:1-9). Okajyaj ihi toj otafwelej m’ayhay toj matchehen wet hate otch’ote toj wichi itiyej t’ekhahyaj tajtso. Nemhit olate che owatlak owo elha m’ayhay toj ihi honhat.