5. Tumla mʼak at che inuhla hanʼayij toj alewo bautisaya

Nilhokej namel iche tʼat mʼak toj is che natatayhla lewhay toj natʼuhlak nalhayachaje Heowa wet toj nalhaiwo bautisaya. Hopkhilak nahanej tajtso, yahin VIDEO. Che paj ame mʼayhayna:

VIDEO: Nʼohumnhayaj toj natiyej Heowa tumla mʼak at che inuhla lhanʼayij (5:22)

• ¿Atsi mʼayhay toj Narangerel is che itayhla hopkhilak tachumhoplhi Heowa?

• ¿Chi malhyej (Ep hote) toj lehumnhayaj toj itiyej Heowa tachʼote toj tumla mʼayhaytso?

Yahyen Proverbios 29:25 wet 2 Timoteo 1:7 wet ame mʼayhayna:

• ¿Atsi lhip toj natalhthi lhakhajyhayaj hopkhilak natumla mʼayhay toj inuhla lhanʼayij?

Is che talhe athana toj nakhajyen lhatʼekhahyaj toj natiyej Heowa. ¿Wet chi malhyej (ep hote) toj nʼowoye tajtso? Natʼukwe lewhay hopkhilak nawo tʼalhyaja wet nayahyen Lhomet. Wet hate nen keya toj nahoye reuniones toj congregación yenlhi. Nilhokej mʼayhayna hiwʼenla amho akhajyhayaj toj lewatla hopkhilak atʼotle tʼun toj letatayhla che nʼoaihanlhi, tej toj iyhaj toj tatay ahila hope hawʼet lheley. Apóstol Pablo, ifwalaspej toj nʼohanlhi pʼante, lham ilesayen toja: «Lhawuk tä tachʼot nʼoye, tek onoway» (Hebreos 13:6).

Mʼak elh toj iwoyek tachʼot namehen toj lhatʼotle tʼunhen hope toj nawo lhometa. Tajtso ichufwen namejen toj natʼekhaye Heowa wet natiyej kanhi lhanowayhyaj toj natiyej hinʼu (Proverbios 29:25). Che atʼotle tʼun, awakʼalhila hopkhilak letujlhache toj lewo ameta tej che niyatey ihuminchek ikastayen lhachumet (1 Tesalonicenses 2:2).