• Am iwoyek ahope Heowa lakalayʼi
    ¡Iwoyek lepes ihihitʼa akajyaj! Libro toj ichufwen amej mʼak toj ihi Biblia

    • 5. Mʼak toj Heowa tʼalheje lakalayʼis

      Iche tʼat mʼak toj natataye toj lhakalayʼis iwoye.

      • ¿Atsi mʼak toj am letataye toj akalayʼis iwoyej ame?

      Yahyen 1 Juan 5:3 wet ame mʼayhayna:

      • ¿Atsi mʼak toj Heowa tataye che lakalayʼis iwoye?

      Hopkhilak natchʼahuye Heowa, nʼalej toj is che nawo elha lhakey wok mʼak toj nahope. Yahyen Isaías 48:17, 18 wet ame mʼayhayna:

      • ¿Atsi mʼak toj tamenej toj Heowa tʼalhe che lakalayʼis iwo iyhaja lakeyis?

      Iche hinʼu toj yenlhi nʼowukwey toj hiwʼenho letʼunfwa casco.

      Nʼokalayʼi toj matche ifwel namhohen mʼak toj is che nawoye hopkhilak naische alhoho wet mʼak ihiyejtʼa namel. Malhyejattso toj Heowa iwoyeje lakalayʼis.

  • ¿Chi malhyej (Ep hote) toj iwoyek nanʼaltej Heowa lhahumnhayaj?
    ¡Iwoyek lepes ihihitʼa akajyaj! Libro toj ichufwen amej mʼak toj ihi Biblia
    • Nʼochufwenyaj 34. Hinʼu iyahin kapha wet itichunlhi.

      NʼOCHUFWENYAJ 34

      ¿Chi malhyej (Ep hote) toj iwoyek nanʼaltej Heowa lhahumnhayaj?

      ¿Ha lhayʼe lhip toj lehumin Dios talhe toj lewo pʼante tesa toj alechufwenej Biblia? ¿Ha lehuminchek lhayʼe lhip toj aise lham? Che malhyejtso, husekchʼoye che, Heowa hiwʼen toj am matche toj lehumin, lham hate lhayʼehila lhip toj aihumin wet tʼuhla ame. ¿Chi malhyej (Ep hote) toj iwoyek lenʼaltej Heowa toj lhayʼe lhip toj lehumin?

      1. ¿Chi malhyej (Ep hote) toj nanʼaltej Heowa toj nahumin?

      Toj natchʼahuye, nanʼaltej lhahumnhayaj lham (yahyen 1 Juan 5:3). Lham inityenhiyejtʼa nʼoelh hopkhilak tachʼahuye. Mat, inuhitʼahla che nawoye tajtso wok kha. ¿Atsi mʼak toj tamenej? Hop toj Heowa tataye che imalhewek lhahusey lhayʼe imalhewek lhatichunhayaj toj natchʼahuye lham (Deuteronomio 10:12). Toja hope toj, lham tataye che letachʼahuye, mat inityenhitʼa amej, is che talh ame toj lehumin. Mʼak toj tʼuhlak ikalhi lhip 3 wet 4 toj ihi librona hope dos mʼayhay toj tachʼotla ame toj lenʼaltej ahumnhayaj Heowa: lewoye mʼak toj lham ihumin wet letekawayhla mʼak toj ihuminhitʼa.

      2. ¿Atsi mʼak toj tamenej toj iwoyek atha toj nanʼaltej lhahumnhayaj Heowa?

      «Häp hinʼo tä is alhoho wujpe mʼayhay tä niʼisachehen tä nichätepej» (Salmo 34:19). Nilhokej namel natatayhla lhakeyis toj niʼisahen. Wet, hate natatayhla mʼayhay toj niʼisahen, toj nawʼenhitʼa chinaj tʼoj wet nʼowitʼayhyajay iyhaj. Lewhay toj nehi mʼak toj atha, nʼalej toj atha namhohen toj nawoye mʼak toj Heowa tataye che nawoye. Wet iwoyek ilafwel toj natchʼahuhiyetʼa lham. Mat, che am alekhajyen toj lewoye mʼak toj Heowa tʼalh ame, lenʼaltej toj lehumin lham lenuhatpe mʼak at che hope. Wet hate lenʼaltej toj letʼifwtiyej lham. Lham inʼalthila amej nʼohumnhayaj toj nittaya wet ihichetʼala lewhay che iwom am (yahyen Salmo 4:3).

      NATʼAYHETTSHI TOJ NALECHUFWENEJ

      Natetshan mʼak toj tamenej toj laha ihi toj natchʼahuye Heowa wet mʼak toj iwoyek tachʼot namehen toj natʼifwtiyej lham.

      3. Iche mʼak toj hate yʼaj ame

      Malhyej toj ihi libro Job, mʼak toj Satanás yome pʼante, tsʼilakhitʼa toj yʼaje Job hate nilhokej wichi toj tʼuhlak tachumhoplhi Heowa. Yahyen Job 1:1 wet 1:6-2:10 wet ame mʼayhayna:

      • Malhyej toj Satanás yome pʼante, ¿atsi mʼak toj tamenej toj Job tachʼahuye pʼante Heowa? (Tetshan Job 1:9-11).

      • ¿Atsi mʼak toj Satanás yomeje nilhokej wichi wet am? (Tetshan Job 2:4).

      Yahyen Job 27:5b wet ame mʼayhayna:

      • ¿Chi malhyej (Ep hote) toj Job inʼalit pʼante toj matche toj ihumin Heowa?

      Satanás ifwenho Heowa toj Job ilehiyeja toj tachumhoplhi Lham hop toj amostas ilan, wet tajtso yʼaje ipunfwa atsinha toj tachumhoplhi Heowa ifwalasna.

      Toj tʼifwtiyej pʼante Heowa, Job inʼalit toj ihumin.

      Toj natʼifwtiyej Heowa, nanʼalit toj nahumin.

      4. Kajyenlhi Heowa

      Yahyen Proverbios 27:11 wet ame mʼayhayna:

      • ¿Chi malhyej (Ep hote) toj Heowa ilat lhame lewhay toj ahope elh toj tachʼahulhi wet toj letshupiye mʼayhay toj is alhoho? ¿Atsi mʼak toj tamenej?

      5. Am iwoyek letʼifwtiyej hop Heowa

      Nʼohumnhayaj toj natiyej Heowa inityenla namejen toj nafwenho wichi iyhaj mʼak toj nahanej toj talhe lham. Wet lhatʼifwtinyaj toj natiyej Lham inityenla namejen toj nawoye tajtso tej che ichepej toj atha. Yahin VIDEO wet ame mʼayhayna:

      VIDEO: Alewompe mʼak toj letʼekhaye tej che nʼotay ahila (5:09)

      • ¿Ha atha amho toj lefwenho aiyhaj mʼak toj talhe Heowa?

      • Malhyej toj ihi video, ¿chi malhyej (ep hote) toj Grayson ikalhi pʼante toj itiyej kanhi lenowayhyaj?

      Athahitʼa toj natʼifwtiyej Heowa lewhay toj nahumin mʼak toj Lham ihumin wet nanʼayiho mʼak toj Lham nʼayiho. Yahyen Salmo 97:10 wet ame mʼayhayna:

      • Tichunejlhi mʼak toj am lehanej pajtha athana, ¿atsi mʼayhay iyhaj toj Heowa ihumin? ¿Wet atsi iyhaj toj lham nʼayiho?

      • ¿Chi malhyej (Ep hote) toj iwoyek alechufwenej toj lehumin mʼak toj is wet lenʼayiho mʼak toj isitʼa?

      6. Toj natchʼahuye Heowa naisej

      Che natchʼahuye Heowa naisiyeja. Yahyen Isaías 48:17, 18 wet ame mʼayhayna:

      • ¿Ha lematitche toj Heowa ihanej mʼak toj namel iwoyek naisej? ¿Atsi mʼak toj tamenej toj malhyejtso atichunhayaj?

      • ¿Chi malhyej (Ep hote) toj tachʼot ame toj alechufwenej Biblia wet toj lhayʼe lhip toj letafwelej Heowa, Dios toj matche?

      IYHAJ WICHI YOME TOJA: «Oyenek yʼajiyetʼa Dios che is wok kha mʼak toj owoye».

      • ¿Atsi texto toj ihi Biblia toj iwoyek lechumyenlhi hopkhilak lenʼalit toj mʼak toj nawoye yʼaje Heowa?

      MʼAYHAY TOJ LETETSHANNE

      Am lenʼalit toj lehumin Heowa lewhay toj letachʼahuye wet toj letʼifwtiyej lham tej che iche mʼak toj aytajche.

      Mʼayhay toj nalechufwenejne

      • ¿Atsi mʼak toj ichufwen amej mʼak toj iyej pʼante Job?

      • ¿Chi malhyej (Ep hote) toj am lenʼalthiyeja ahumnhayaj Heowa?

      • ¿Atsi mʼak toj tachʼotla ame toj letʼifwtiyej Heowa?

      Mʼak toj is che lewoye

      IWOYEK LEWʼEN IYHAJ MʼAYHAY:

      Tafwelej chi malhyej (ep hote) toj iwoyek letʼifwtiyej Heowa wet congregación.

      «Lelehiyejtʼa hop elh toj nileya amej» (16:49)

      Tafwelej mʼayhay iyhaj toj niʼisa toj Satanás yome pʼante.

      «Job tʼifwtiyej tʼat Heowa» (La Biblia y su mensaje, lhip 6)

      Yahin toj naʼtshas hate iwoyek inʼalit toj ihumin Heowa.

      ¡Kajyenlhi Heowa! (8:16)

      ¿Chi malhyej (Ep hote) toj mamses wet lhutshay tatayhla toj nʼonityenej toj iwoye mʼak toj niʼisa wet tujlhache toj tʼifwtiyej Dios?

      Wasti cadenas toj nʼonityen amej toj lewoye mʼak toj niʼisa (4:00)