¿Atsi mʼak toj tamenej toj lhayʼe lhip toj iche mʼak toj niʼisa wet nʼotelaythayaj?

Lewhay che iche nʼowitʼay, wujpe wichi tayʼatshan lhamehen «¿Atsi mʼak toj tamenej?». Wuj toj ikhajyen namel toj nahanej toj Biblia hiwʼen lechulhyaj hop nʼoyʼatshanekna.

1. ¿Atsi mʼak toj iwoye pʼante Satanás hopkhilak iwo tesa mʼak toj niʼisa toj ihi Honhat?

Ahottaj, wok Satanás, tatayhla pʼante Dios. Toj lham tʼuhlak iyhaj iwujyen, ifwechʼenlhi pʼante wichi toj ichun, Adán wet Eva, hopkhilak lhamel hate tatayhla Dios. Wet ikalhi pʼante tajtso lewhay toj ifwenho Eva mʼak toj kamatache (Génesis 3:1-5). Lham ikalhi pʼante toj Eva imatitche toj Heowa nʼayejo mʼak toj is wet toj tajtso tʼuhawethiyejtʼa. Mʼak toj lham tʼuhlak yome hope toj wichi lhayʼehila lhip toj lekajyajay ihiche che tachʼahuhiyetʼa Dios. Lewhay toj Satanás ifwenho pʼante Eva toj yʼinhitʼala, ifwenho tʼat mʼak toj ichun toj kamatache. Hop toj tamenej toj Biblia yome toj lham hope «elh tä wʼet yämlhi tʼat, wet häpe mʼak tä kamatache lajcha» (Juan 8:44).

2. ¿Atsi mʼak toj Adán wet Eva tatshupiye pʼante?

Heowa hiwʼenho pʼante wujpe mʼayhay Adán wet Eva. Ifwenho pʼante toj iwoyek tuj halʼoy lhay at che hope toj ihi yachuyajwʼet Edén mat iche tefwajni toj isitʼak lhamel tuj (Génesis 2:15-17). Mat lhamel tatshupiye pʼante toj tuj halʼo lha toj nʼonʼayejo. Eva «ilanhi elh lhay wet tufw». Wet toj paj Adán «häte lham tufw» (Génesis 3:6). Toj malhyejtso lhamel tachʼahuhiyetʼa pʼante Dios. Toj Adán wet Eva hopehen pʼante iyhaj toj lechʼisukyaj ihihitʼa, lhamel ihanhiyejtʼak iwoye mʼak toj niʼisa, tajlhamet mʼak toj is. Mat toj lhamel hanlak tachʼahuhiyetʼa Dios, iwo pʼante chʼisukyaja wet takawayhla toj Dios niyatej lhamel. Mʼak toj lhamel tatshupiye wuj pʼante toj itiyej letelaythayajay (Génesis 3:16-19).

3. ¿Chi malhyej (Ep hote) toj yʼaje namel mʼak toj Adán wet Eva tatshupiye pʼante?

Lewhay toj Adán wet Eva iwo pʼante lechʼisukyaja, lhamel lhayen hopeya iyhaj toj lechʼisukyaj ihi, wet mʼak toj ikalhi pʼante hope toj lechʼisukyaj yʼaje nilhokej leles toj lepes lheley. Toj yome Adán, Biblia yok: «Iche hinʼo tefwajni tamenej pʼante tä nʼochʼisukyaj ihi honhat, wet nʼochʼisukyajna iton alhoho nʼotʼilek, wet nʼotʼilek yʼaje nilhokej wichi tsi nilhokej iwo lechʼisukyaja» (Romanos 5:12).

Toj malhyejtso, ¿atsi mʼak toj tamenej toj lhawitʼayhajay ihi? Ichepej toj namel tʼat toj natshupiye mʼak toj niʼisa alhoho. Wet ichepej toj mʼak toj wichi tatshupiye yʼaj namejen. Mat, ichepej lewhay toj lhawitʼayhyaj ihi hop toj nehi tʼat lhip wok lewhay toj tʼuhawethiyejtʼa (yahyen Eclesiastés 9:11).

NATʼAYHETTSHI TOJ NALECHUFWENEJ

4. Elh toj tamenej toj nehi lhatelaythayajay

Wujpe wichi imatitche toj Dios tʼat toj niyatej honhatna. Mat, ¿ha matche tajtso? Yahin VIDEO.

VIDEO: ¿Atsi elh toj niyatej Honhat? (1:24)

Yahyen Santiago 1:13 wet 1 Juan 5:19 wet ame mʼayhayna:

• ¿Ha hope tʼat Dios toj tamenej toj nehi lhatelaythayaj wet mʼak toj niʼisa?

5. Mʼak toj Satanás ikalhi toj niyatej Honhat

VIDEO: ¿Atsi mʼak toj tamenej toj Dios inuhitʼahla toj iche nʼotelaythayaj? (lhip) (3:07)

Yahyen Génesis 3:1-6 wet ame mʼayhayna:

• ¿Atsi mʼak toj kamatache toj Satanás yome pʼante? (Tetshan versículos 4 wet 5).

• ¿Chi malhyej (Ep hote) toj Satanás yome pʼante toj Heowa iskatho wichi mʼak toj is?

• Mʼak toj Satanás yome pʼante, ¿ha wichi iwatlak toj Heowa niyatej lhamel hopkhilak lakajyaj ihiche?

Yahyen Eclesiastés 8:9 wet ame mʼayhayna:

• Lewhay toj Heowa niyatiyejtʼa Honhat, ¿chi malhyej (ep hote) wichi?

1. Adán wet Eva lechʼisukyaj ihihitʼa pʼante wet ihi tʼat lhip toj wʼatshan wet isilataj, mat lhamel tachʼahuye Satanás wet tatayhla Heowa.

2. Toj tafwaytshi tajtso yʼajʼpe nilhokej Honhat nʼochʼisukyaj, nʼotelaythayaj wet nʼotʼilek.

3. Heowa itaythila nʼochʼisukyaj, nʼotelaythayaj wet nʼotʼilek. Wichi yachajohla toj lechʼisukyaj ihihitʼa wet lepes ihihitʼa toj ilayhiche toj ihi Honhat toj wʼatshan wet isilataj.

6. Heowa wuj toj aytaj letichunhayaj toj hiwʼen namel toj lhatelaythayaj ihi

¿Ha Dios itetshanhitʼa lhatelaythayaj? Tetshan mʼak toj niyat David wet apóstol Pedro yome pʼante. Yahyen Salmo 31:7 wet 1 Pedro 5:7 wet ame mʼayhayna:

• ¿Chi malhyej (Ep hote) toj lelat ame toj lehanej toj Heowa itetshan lhawitʼayhyajay wet toj wuj toj aytaj letichunhayaj toj hiwʼen toj lhatelaythayaj ihi?

MʼAYHAY TOJ LETETSHANNE

Satanás wet wichi toj ichun, lhamel tamenej toj mʼak toj niʼisa ihi honhatna. Heowa wuj toj aytaj letichunhayaj toj hiwʼen namel toj lhatelaythayaj ihi wet tatay lhimpaj Lham itayhtila nʼowitʼayhyajay.

Mʼayhay toj nalechufwenejne

• ¿Atsi mʼak toj kamatache toj Satanás ifwenho hop Eva?

• ¿Chi malhyej (Ep hote) toj yʼaj namehen mʼak toj Adán wet Eva iwoye pʼante?

• ¿Chi malhyej (Ep hote) toj nahanej toj Heowa wuj toj aytaj letichunhayaj lewhay toj hiwʼen toj lhatelaythayaj ihi?

IWOYEK LEWʼEN IYHAJ MʼAYHAY:

Tafwelej mʼak toj hope nʼochʼisukyaj toj Biblia yome.

«¿Atsi mʼak toj hope nʼochʼisukyaj?» (Nʼochufwenyaj toj ihi jw.org)

Yahyen mʼayhay iyhaj toj natetshanne toj Satanás iwoye toj ihi pʼante yachuyajwʼet Edén.

«¿Atsi mʼak toj tamenej toj Dios inuhitʼahla toj iche nʼotelaythayaj?» (La Atalaya, 1 toj enero toj 2014)

Tetshan mʼak toj ikhajyen namel wet mʼak toj ichulho nʼoyʼatshanek toj atha.

«¿Atsi mʼak toj tamenej toj Dios inuhitʼala toj nʼolanhen wujpe judios?» (Nʼochufwenyaj toj ihi jw.org)

Yahin mʼak toj hinʼu ihanej ihi taj pʼante nʼotelaythayaj ilunej lham.

Athana otsʼilakhitʼa (5:09)

Hop wichi toj ichun, Adán wet Eva, tachʼahuhiyetʼa pʼante Dios. Hop toj tamenej toj namel nawo chʼisukyaja, lhatelaythayaj ihi wet nayʼinhen.a Mat Heowa iwoye tʼat mʼak, hopkhilak ifwayhat namejen nʼochʼisukyaj wet nʼotʼilek, isej hop Lhos Jesucristo. Biblia yome toj, Jesús tʼilek, tiskan natapehen. Malhyej at che nʼotiskanpe nʼoelh hopkhilak nʼofwayhat. Wet Jesús iwom lewʼatshancheyaj toj newache mʼak toj niʼisa toj iyej hopkhilak tiskan natapehen (yahyen Mateo 20:28). Toj Jesús hope pʼante elh toj lechʼisukyaj ihihitʼa wet tachʼahuyepej Heowa iwoye pʼante che lepes ihihitʼa toj ilay toj ihi Honhat, mat tatshupiye toj iwom natapehen lewʼatshancheyaj hopkhilak yachajo toj nawʼen mʼak toj Adán wet Eva itayhat pʼante wet inʼalit namejen toj lham wet Heowa wuj toj naihumnhen. Toj ihi nʼochufwenyajna tachʼotla namehen toj nanʼaltej lhaka gracias Jesús mʼak toj iwoyej pʼante natapehen.

1. ¿Chi malhyej (Ep hote) toj Jesús tʼilek tachʼot namehen athana?

Toj nahopehen wichi toj lechʼisukyaj ihiche nawoye wujpe mʼayhay toj Heowa ihuminhitʼa. Mat iwoyek nahopehen Heowa lakalayʼis toj lhamya che naleche toj nawoye nʼochʼisukyajay wet natʼalhe Heowa, che itayhat lhates isej Jesús. Wet hate che nalhaikajyenej toj naleche toj nawoye mʼayhaytso toj niʼisahen (1 Juan 2:1). Biblia yok: «Cristo leteläythayaj ihiʼpe wichi lesukyajay, weihalhache wet tajlhame. Lham häpe tʼat Elh tä is, mat yʼilpe wichi tä niʼisahen yämthilek ichäj amehen häp Dios» (1 Pedro 3:18).

2. Lewhay toj tatay alhoho, ¿chi malhyej (ep hote) toj tachʼotla namehen Jesús tʼilek?

Heowa ichen pʼante Lhos hopkhilak iwom lewʼatshancheyaj toj newache mʼak toj niʼisa che iyej «häpkhilek elh at chik häpe chik tʼekhaye, tatäyhitʼala, mat ikatej lewʼatshancheyaj tä tʼun» (Juan 3:16). Isej mʼak toj Jesús iwoye pʼante, tatay lhimpaj Heowa itayhtila mʼayhay toj niʼisa toj iwitʼayen wichi hop toj Adán tachʼahuhiyetʼa. Toja hope toj, che nanʼalit toj natʼekhaye mʼak toj Jesús iwoye pʼante, iwohiyelak lepes ihihitʼa che nalayhiche che Honhat wʼatshan wet isilataj (Isaías 65:21-23).

NATʼAYHETTSHI TOJ NALECHUFWENEJ

3. Jesús tʼilek ifwayhat namehen nʼochʼisukyaj wet nʼotʼilek

VIDEO: ¿Atsi mʼak toj tamenej toj Jesús yʼil pʼante? (lhip 1) (2:01)

• ¿Atsi mʼak toj Adán itayhat pʼante lewhay toj tachʼahuhiyetʼa Dios?

Yahyen Romanos 5:12 wet ame mʼayhayna:

• ¿Atsi mʼak toj tamenej toj yʼaj ame Adán lechʼisukyaj?

Yahyen Juan 3:16 wet ame mʼayhayna:

• ¿Atsi mʼak toj tamenej toj Heowa ichen pʼante Honhat hop Lhos?

1. Adán hope pʼante hinʼu toj lechʼisukyaj ihihitʼa, wet lewhay toj tachʼahuhiyetʼa Dios, ichaje wichi nʼochʼisukyaj wet nʼotʼilek.

2. Jesús hope pʼante hinʼu toj lechʼisukyaj ihihitʼa, wet toj tachʼahuye Dios, ifwoyenche nʼayij hopkhilak wichi hate iwoyek lechʼisukyaj ihihitʼa wet lepes ihihitʼa toj ilayhiche.

4. Nilhokej wichi iwoyek isej Jesús tʼilek

VIDEO: ¿Atsi mʼak toj tamenej toj Jesús yʼil pʼante? (lhip 2) (2:00)

• ¿Chi malhyej (Ep hote) toj tefwajni hinʼu iwoyek wujpe wichi isej?

Yahyen 1 Timoteo 2:5, 6 wet ame mʼayhayna:

• Adán hope pʼante hinʼu toj lechʼisukyaj ihihitʼa, wet lewhay toj iwo chʼisukyaja ichaje wichi nʼochʼisukyaj wet nʼotʼilek. Jesús hate hope pʼante hinʼu toj lechʼisukyaj ihihitʼa. ¿Atsi mʼak toj lham iwoye pʼante «tä lhaiwom pʼante wet lhayen lahaya nilhokej wichi»?

5. Toj Jesús lhayen lahayape wichi hope nʼowʼayhat toj Heowa hiwʼen pʼante amho

Heowa lakalayʼis ihanej toj hope nʼowʼayhat toj matche toj laha ihi toj Jesús lhayen lahayape wichi. Malhyej toja, yahyen Gálatas 2:20 wet ame mʼayhayna:

• ¿Chi malhyej (Ep hote) toj apóstol Pablo lhomtes inʼalit toj Jesús tʼilek hope tʼat lewʼayhat toj Heowa hiwʼenho?

Lewhay toj Adán iwo pʼante chʼisukyaja, lham wet leles yʼinhen tʼat. Mat Heowa ichen pʼante Honhat hop Lhos hopkhilak yʼil wet toj malhyejtso am iwohiyela lepes ihihitʼa toj lelayhi.

Toj leyahyen versículos, tichunejlhi chi malhyej (ep hote) pʼante toj Heowa ilat lhame toj hiwʼen toj Lhos wuj toj letelaythayaj ihi. Yahyen Juan 19:1-7 wet 16-18 wet ame mʼayhayna:

• ¿Chi malhyej (Ep hote) toj lelat ame toj letichunejlhi toj Heowa wet Jesús iwoyej ame mʼak?

MʼAYHAY TOJ LETETSHANNE

Isej toj Jesús yʼilpe wichi, Heowa itayhat lhachʼisukyajay wet toj malhyejtso iwoyek lepes ihihitʼa toj nalayhiche.

Mʼayhay toj nalechufwenejne

• ¿Atsi mʼak toj tamenej toj Jesús yʼil pʼante?

• ¿Chi malhyej (Ep hote) toj Jesús lewʼatshancheyaj toj newache mʼak toj niʼisa che iyej hope «tä lhaiwom pʼante wet lhayen lahaya nilhokej wichi»?

• ¿Chi malhyej (Ep hote) toj aisej Jesús tʼilek?

IWOYEK LEWʼEN IYHAJ MʼAYHAY:

Tafwelej mʼak toj tamenej toj Jesús lewʼatshancheyaj toj newache mʼak toj niʼisa che iyej hope mʼak toj nʼotiskanejpe wichi.

«¿Chi malhyej (Ep hote) toj Jesús tʼilek hope toj «lhayen hayayej wujpe wichi»?» (Nʼochufwenyaj toj ihi jw.org)

Tetshan mʼak toj is che nawoye hopkhilak nafwayhen.

«¿Chi malhyej (Ep hote) toj Jesús ifwayhat namel?» (Nʼochufwenyaj toj ihi jw.org)

¿Ha Heowa itayhat wichi letes tej che matche toj niʼisa?

«Nʼoyʼatshanhay toj talho Biblia» (La Atalaya, 1 toj mayo toj 2013)

Yahyen chi malhyej (ep hote) toj lhaichufwenej toj Jesús lhayen lahayape wichi tachʼote hinʼu toj iwo elha lakey.

«Nemhit ohope mʼak toj niʼisa kwenek» (Nʼochufwenyaj toj ihi jw.org)