Toj ihi nilhokej lhipey, wichi wʼenhahiche letichunhayajay toj itiyej hatʼes. Iche wichi toj iyayej hatʼes toj lhayʼe lakalayʼis wet iche iyhaj toj iyahiyejtʼa mʼak toj alcohol iyej. Hate iche iyhaj toj iyayej hatʼes pajtha wʼoknhas. ¿Atsi mʼak toj Biblia yomeje hatʼes?

1. ¿Ha is, che nʼoelh iyayej hatʼes wok kha?

Biblia yomhiyetʼa toj isitʼa toj nʼoelh iyayej hatʼes. Biblia yome toj «hatʼes tä ikänitlhi» hinʼu hope nʼowʼayhat toj Heowa hiwʼen namhohen (Salmo 104:14, 15). Hate, Biblia yome toj iche pʼante hinʼul wet atsinhay toj afwtintses toj iyayej pʼante hatʼes (1 Timoteo 5:23).

2. ¿Atsi nʼofwonyaj toj Biblia hiwʼenho iyhaj toj tatshupiye toj iyayej hatʼes?

Heowa tsʼilakhitʼa toj nʼayiho toj nʼoelh iya pajtha wʼoknaj, hate che tsaji hatʼes toj nʼoelh iyayej (Gálatas 5:21). Biblia yok: «Yej aletʼaje iyhäj tä ikän hatʼes» (Proverbios 23:20). Hop toj tamenej toj, che natshupiye toj nayayej hatʼes, che natsʼilkas wok nalhayʼe iyhaj, isitʼa che nam tsaji toj nayayej pajtha nahanhiyejtʼa mʼak toj name, mʼak toj nawoye wok kalelhajitʼa lhatichunhayajay. Hate isitʼak nam tsaji toj nayayej toj nawitʼayen lhatʼisan. Che lehumin toj lenuhatpe lewʼet toj leyayej hatʼes is che leleyej.

3. ¿Chi malhyej (Ep hote) toj nanʼalit toj nenhitʼa wʼet mʼayeka mʼak toj iyhaj tatshupiye?

Tefwajnipej namel is che natshupiye che nayayej hatʼes wok kha. Isitʼa che natiyej lhatichunhayaj toj niʼisa iyhaj toj tatshupiye toj iyayej lhimpaj hatʼes. Che iche elh toj tatshupiye toj iyahiyejtʼa hatʼes isitʼak nanityenej (Romanos 14:10). Wet natshupiye toj nayahiyejtʼa hatʼes che iyhaj ihuminhitʼa (yahyen Romanos 14:21). Hop cristiano tʼuhikwetʼa mʼak toj lham isej, mat tʼukwe mʼak che elh isej (yahyen 1 Corintios 10:23, 24).

NATʼAYHETTSHI TOJ NALECHUFWENEJ

4. Tshupiye che leyahiyeja hatʼes wok kha

¿Chi malhyej (Ep hote) Jesús letichunhayaj toj itiyej toj nʼoyayej hatʼes? Hopkhilak nahanej lechulhyaj, natetshan mʼak toj ichun toj nʼoseltej toj Jesús iwoye pʼante. Yahyen Juan 2:1-11 wet ame mʼayhayna:

• Toj ihi relatona, ¿atsi mʼak toj ichufwen namejen Jesús letichunhayaj toj itiyej hatʼes wet iyhaj toj iyayej?

• Tej toj Jesús yomhiyetʼa toj isitʼa che nʼoelh iyayej hatʼes, ¿atsi letichunhayaj toj cristiano is che itiyej nʼoelh toj tatshupiye toj iyayej hatʼes?

Tej toj, cristiano iwoyek iyayej hatʼes hopkhitʼa toj nilhokej lewhay toj tʼuhawetej toj iya. Yahyen Proverbios 22:3 wet tetshan che tʼuhawetej toj leyayej hatʼes che:

• Am lhehi auto wok máquina.

• Ahope atsinha toj hichʼotshan.

• Kachawo ifwel amho toj isitʼa che leyayej mʼak toj alcohol iyej.

• Atha amho toj leleyej toj leyayej hatʼes.

• Niyatey yome toj isitʼa che nʼoyayej hatʼes.

• Lheyej elh toj tatshupiye toj iyahiyejtʼa hop toj ifwalas toj pajche ihumin toj iya.

Che am lhenlhi nʼokajyaj, malhyej che letawhayey, ¿ha is, che lewʼenho hatʼes iyhaj wichi toj ihoye? Hopkhilak lehanej mʼayhay iyhaj toj is che letetshan, yahin VIDEO.

VIDEO: ¿Ha is, che owʼenho hatʼes iyhaj? (2:41)

Yahyen Romanos 13:13 wet 1 Corintios 10:31, 32. Che tafwaytshi toj leyahyen tefwajpejni textos, ame mʼayhayna:

• ¿Chi malhyej (Ep hote) toj iwoyek tachʼot ame mʼayhayna toj matche hopkhilak letshupiye mʼak toj ikajyenlhi Heowa?

5. Tshupiye chifwajte (ep hote toj ihi) hatʼes toj leyahiyeja

Che leyayej hatʼes, husekchʼoye, toj Heowa tej toj yomhiyetʼa toj isitʼa toj nayayej hatʼes, lham nʼayiho che nam tsaji toj nayayej. ¿Atsi mʼak toj tamenej? Yahyen Oseas 4:11, 18 wet ame mʼayhayna:

• ¿Atsi mʼak toj iwoyek iyej elh toj tsaji hatʼes toj iyayej?

¿Atsi mʼak toj iwoyek tachʼot namehen toj nanuhitʼape lewʼet toj nayayej hatʼes? Is che nahanej tʼat mʼayhay toj itihla namejen lhawitʼay. Yahyen Proverbios 11:2 wet ame mʼayhayna:

• ¿Atsi mʼak toj tamenej toj is, che lekalelhat amho chifwajte (ep hote toj ihi) hatʼes toj leyahiyeja?

6. Mʼak toj tachʼote nʼoelh toj ileyej toj iya

VIDEO: «Onʼayiho mʼak toj oihihte» (6:32)

• ¿Chi malhyej (Ep hote) toj hatʼes yʼaje mʼak toj Dimitri iwoye?

• ¿Ha lham ikalhi toj ileyej toj iyayej hatʼes?

• ¿Atsi mʼak toj iwoye hopkhilak ikalhi tʼat toj ileyej toj iya?

Yahyen 1 Corintios 6:10, 11 wet ame mʼayhayna:

• ¿Atsi mʼak toj Biblia yomeje toj nʼoelh wʼoknhaj?

• ¿Chi malhyej (Ep hote) toj nahanej toj nʼoelh toj lakey toj iya iwoyek iwo elha lakeytso?

Yahyen Mateo 5:30 wet ame mʼayhayna:

• Jesús techʼaynek toj yome toj nʼoelh is che yiset lakwey tʼuhlak ichufwen namejen toj is che nalhaikhajyenej toj naise Dios. Che am alekhajyenej toj leleyej toj leya, ¿atsi mʼak toj iwoyek lewoye?a

Yahyen 1 Corintios 15:33 wet ame mʼayhayna:

• Che lehumin toj ayʼe iyhaj toj ikanhi hatʼes, ¿chi malhyej (ep hote) toj tajtso iwoyek yʼaj ame?

MʼAYHAY TOJ LETETSHANNE

Heowa hiwʼen namhohen hatʼes hopkhilak nen kajyaja, mat lham nʼayiho che nʼoelh iyayej hatʼes pajtha wʼoknaj wok che yam tsaji.

Mʼayhay toj nalechufwenejne

• ¿Atsi mʼak toj Biblia yomeje hatʼes?

• ¿Atsi mʼayhay toj isihentʼa toj iyej nʼoelh toj yam tsaji hatʼes toj iyayej?

• ¿Chi malhyej (Ep hote) toj nanʼalit toj nenhitʼa wʼet mʼayeka mʼak toj iyhaj tatshupiye che iyahiyeja hatʼes wok kha?

IWOYEK LEWʼEN IYHAJ MʼAYHAY:

¿Atsi mʼayhay toj mamses wet lhutshay is che ihanej lewhay toj iyayej hatʼes?

Yej alhen hopeya hatʼes kwenek (2:31)

Tafwelej mʼayhay toj iwoyek lewoye hopkhilak leleyej toj leyayej hatʼes.

«Chi malhyej (Ep hote) toj iwoyek lenuhitʼape lewʼet toj leyayej hatʼes» (La Atalaya, 1 toj enero toj 2010)

¿Ha is, che cristianos yenlhi brindis?

«Mʼayhay toj wichi tayʼatshan lhamehen» (La Atalaya, 15 toj febrero toj 2007)

Yahyen chi malhyej (ep hote) toj hinʼu ikalhi pʼante toj ileyej toj iya, toj ihi lhip toj yok: «Ohopehte elh toj lepes ihihitʼa toj iya».

«Dios Lhomtes iwo elha mʼak toj ihi» (La Atalaya, 1 toj mayo toj 2012)

Nilhokej namel nahumin toj natshupiye atsi lhakay toj nawʼuyhi wet chi malhyej (ep hote) toj nalhayenwetha. Che nahanlhi mʼayhay toj matchehen toj ihi Biblia toj athahitʼa, iwohiyelak nakajyenlhi Heowa wet nawʼuyhi lhakay toj nahumin. Natetshan iyhaj tajtso.

1. ¿Atsi mʼayhay toj matchehen toj ihi Biblia is che nahanlhi che nalhayenwetha?

Elh toj cristiano is che tatshupiye «tawʼuyhi lewʼuyis tä tʼuhawetej» «yämthilek nʼälej tä häpehen iyhäj tä lehusek ihi» wet «mʼak tä is tä tet iwoyek yen lewʼuya», hate lhakay isitʼa che tachʼoy hopkhilak «lhayen Dios tʼamajchetesa» (1 Timoteo 2:9, 10). Natetshan cuatro mʼayhay toj matchehen toj ihi Biblia toj talho textona: 1) Lhakay is che «tʼuhawetej» wok is. Toj ihi Heowa ka wichi iche wujpe mʼayhay toj nʼohumin, nʼalej toj pajche toj lewʼen toj ihi olhamel oka reuniones, mat lhakay toj nawʼuyhi wet lhawʼoley inʼalit toj nenhitʼa wʼet mʼayeka Dios toj nanʼokwiyej. 2) Toj nalhayenwetha is che inʼalit toj nahopehen «iyhäj tä lehusek ihi», tajtso hope toj natekawayhla nʼokay toj ipʼakej lhatʼisan wet toj wawʼulhihotʼa. 3) Nanʼalit tʼat «mʼak tä is» toj nawoye toj nawʼuyhihitʼa nʼokay toj moda. 4) Lhakay toj nawʼuyhi is che inʼalitpej toj «[n]ayen Dios tʼamajchetesa», toj malhyejtso nanʼaltej lhaiyhaj toj nanʼokwiyej Dios toj matche (1 Corintios 10:31).

2. ¿Chi malhyej (Ep hote) toj lhakay toj nawʼuyhi yʼaje cristianos?

Matche tʼat toj iwoyek natshupiye atsi lhakay toj nawʼuyhi. Is che natichunejlhi che tajtso iwoyek tamenej lhaiyhaj. Nalhaikhajyenhen hopkhilak lhaiyhaj iyahinhitʼa kanhi. Nahanlhi nʼofwonyajayna: «Is chik elhpej nʼamel iwoye mʼak tä lepuhfwa isej, yämlek lhaikhajyenej tʼekhahyaj» (yahyen Romanos 15:1, 2).

3. ¿Chi malhyej (Ep hote) toj lhakay toj nawʼuyhi inityenej wichi iyhaj toj itafwelej Heowa?

Nalhaikhajyenej toj nawʼuyhi nʼokay toj tʼuhawetej nilhokej lewhay. Mat natetshan lhakay iyhaj toj nawʼuyhihla toj nahoye reuniones wet toj nawo lhometa. Isitʼa che nawʼuyhi lhakay toj tʼuhawethiyejtʼa toj nawo lhometa hop toj iwoyek tamenej toj wichi yen wʼet mʼayeka nʼosilotyaj toj nahane. Mat, nahuminchek nakhajyen lhaiyhaj hopkhilak itafwelej mʼak toj matche wet yam isilataj «nʼochufwenyaj tä yäme Dios Lhafwayhthi» (Tito 2:10).

NATʼAYHETTSHI TOJ NALECHUFWENEJ

4. Che nawʼuyhi lhakay toj is inʼalit toj nenhitʼa wʼet mʼayeka Heowa

¿Atsi mʼak toj tamenej toj laha ihi toj nen lhakliya chi malhyej (ep hote) toj wichi hiwʼen namel? Yahyen Salmo 47:2 wet ame mʼayhayna:

• ¿Chi malhyej (Ep hote) toj is che yʼaj namehen lhakay toj nawʼuyhi toj natchumhoplhi Heowa?

• ¿Ha lefwetaj toj tʼuhawetej che natetshan lhakay toj nawʼuyhi che nahoye reuniones wet toj nawo lhometa? ¿Atsi mʼak toj tamenej toj malhyejtso atichunhayaj?

5. ¿Chi malhyej (Ep hote) toj nam is lhakay toj natshupiye wet toj nalhayenwetha?

Yahin VIDEO.

VIDEO: «Mʼak at che häpe [...] tä lewoye, wuntej häp Dios» (10:18)

Laha ihihitʼa che tʼunhi lhakay toj nawʼuyhi. Mʼak toj laha ihi hope toj is che hichʼoyhitʼa wet tʼuhawetej. Yahyen 1 Corintios 10:24 wet 1 Timoteo 2:9, 10. Che paj ame mʼak toj tamenej toj nawʼuyhihitʼa nʼokay toj...

• ... wasi, hichʼoy wok tʼuhawethiyejtʼa.

• ... ipʼakej wok inʼalit lhatʼisan, wok toj iwoyek tamenej toj nʼoyahin namel.

Tej toj cristianos athana iwohiyetʼa ley toj nʼowʼenho pʼante Moisés, leyna tachʼot namehen toj nahanej chi malhyej (ep hote) Heowa letichunhayaj. Yahyen Deuteronomio 22:5 wet ame mʼayhayna:

• ¿Atsi mʼak toj tamenej toj isitʼa che atsinha lhayenlhi wet tawʼuyhi nʼokay malhyej iwoye hinʼu wok hinʼu tawʼuyhi atsinha lakay?

Yahyen 1 Corintios 10:32, 33 wet 1 Juan 2:15, 16 wet ame mʼayhayna:

• Che lhakay toj nawʼuyhi tamenej toj lhip toj nehi wok congregación ihuminhitʼa, ¿ha is che natetshan tajtso? ¿Atsi mʼak toj tamenej?

• Lhip toj lhehi, ¿atsi nʼokay wet chi malhyej (ep hote) toj ihumin toj lhayenwetha wichi?

• ¿Ha lefwetaj toj nʼokayna tʼuhawethiyejtʼa cristiano? ¿Atsi mʼak toj tamenej toj malhyejtso atichunhayaj?

MʼAYHAY TOJ LETETSHANNE

Che natshupiye lhakay toj is wet toj nalhayenwetha nanʼaltej toj nenhitʼa wʼet mʼayeka Heowa wet lhaiyhaj.

Mʼayhay toj nalechufwenejne

• ¿Atsi mʼak toj tamenej toj Heowa itetshan lewhay toj nalhayenwetha?

• ¿Atsi mʼayhay toj matchehen toj ihi Biblia is che yʼaj namehen toj nalhayenwetha?

• ¿Chi malhyej (Ep hote) toj lhakay toj nawʼuyhi iwoyek yʼaje iyhaj letichunhayaj toj itiyej nʼonʼokhayaj toj matche?

IWOYEK LEWʼEN IYHAJ MʼAYHAY:

Tetshan atsi mʼak toj inʼalit akay toj lewʼuyhi.

«Chi malhyej (Ep hote) toj wichi hiwʼennʼo» (Nʼochufwenyaj toj ihi jw.org)

Tetshan mʼak toj tamenej toj nʼoelh is che itichunejlhi toj kamaj yenhilhitʼa tatuaje.

«¿Ha is, che nʼoelh itihi letʼisan tatuaje?» (Nʼochufwenyaj toj ihi jw.org)

Tetshan iyhaj mʼayhay toj matchehen toj ihi Biblia toj tachʼotla ame toj letshupiye mʼayhay toj isis.

«¿Ha iwujyen Dios lhakay toj nawʼuyhi?» (La Atalaya, septiembre toj 2016)

¿Chi malhyej (Ep hote) toj atsinha ikalhi toj yam is letichunhayaj toj itiyej iyhaj toj lhayenwetha?

«Mʼak toj wichi iwoye toj lhayenwetha hope toj inuhla onʼayij» (¡Despertad!, 22 toj diciembre toj 2003)