7. Dios Niyatyaj laka leyes inuʼpe hinʼul laka leyes

Hop niyatey yenlhi leyes hopkhilak tachʼote wet tʼuye laka wichi. Dios Niyatyaj hate hiwʼen laka leyes wet laka wichi is che iwoye tʼat. Yahyen 1 Corintios 6:9-11 wet ame mʼayhayna:

• ¿Chi malhyej (Ep hote) toj lefwetaj che imalhewek honhat iwoye tʼat mʼak toj Dios tʼalhe lhamel?a

• ¿Ha lefwetaj toj tʼuhawetej toj Heowa tataye che laka wichi toj ichufwi Leniyatyaj yenhitʼa wʼet mʼayeka mʼak toj Lham tʼalhe? ¿Atsi mʼ ak toj tamenej toj malhyejtso achulhyaj?

• ¿Chi malhyej (Ep hote) toj nahanej toj wichi toj tachʼahuhiyetʼa leyesna iwoyek iwo elha mʼak toj ihi? (Tetshan versículo 11).

Wujpe wichi nafwenhen lewhay toj yome sexo wok nʼowanyajay. Mat lewhay toj Dios Lhomtes yome nʼowanyajay, yam kalelhaj wet yenhitʼa wʼet mʼayeka. Mʼak toj yome wuj toj iwoyek tachʼot namehen. Wet tajtso tʼuhawetej, hop toj Biblia talhe Heowa, elh toj yenwetha pʼante namel wet ihanej mʼak toj iwoyek naisej. Lham ichufwen namejen nʼokey toj is che nanʼalit hopkhilak nakajyenlhi lham wet iwohiyelak toj lepes ihihitʼa toj nen kajyaja mʼak toj nehi.

1. ¿Chi malhyej (Ep hote) Heowa tichunhayaj toj itiyej nʼowanyajay?

Nʼowanyajay hope nʼowʼayhat toj talhe Heowa. Lham ihuminchek hinʼu wet atsinha toj tawhayeyhen yen kajyaja tajtso. Isej nʼowʼayhatna hinʼu wet atsinha iwoyek inʼalit lhamejen lehumnhayaj toj tʼuhawetej, tajlhamhiyetʼa toj iwo lelesa. Dios Lhomet yok: «Wo akäjyajayej häp atsinha tä lhen unfwaya tä amamse» (Proverbios 5:18, 19). Heowa tataye che cristianos toj tawhayeyhen tʼifwti lhamehen. Hop toj tamenej toj cristianos isitʼak iwo lakainʼoyaja (yahyen Hebreos 13:4).

2. ¿Atsi mʼak toj hope nʼokainʼoyaj?

Biblia yome toj «lhamel tä iwoye lakainʼoyaj [...] lewʼet ihihitʼala Dios Niyatyaj» (1 Corintios 6:9, 10). Iyhaj toj ilesayen pʼante Biblia ichumyenlhi nʼolhometna pornéia hopkhilak yome nʼokainʼoyaj. Toja yʼaje 1) nʼoelh toj imayej elh toj lechʼefwahitʼa,a 2) hinʼu toj imayej hinʼu elh wok atsinha toj imayej atsinha elh wet 3) nʼowanyajay toj nʼotiyej itshatay. Lewhay toj natumla nʼokainʼoyaj nakajyenlhi Heowa wet nen kajyaja wujpe mʼayhay toj isis (1 Tesalonicenses 4:3).

NATʼAYHETTSHI TOJ NALECHUFWENEJ

3. Is che lhekchʼoye nʼokainʼoyaj

José, hinʼu toj afwtintsaj, lhaikhajyen pʼante hopkhilak tatayhla nʼokainʼoyaj. Yahyen Génesis 39:1-12 wet ame mʼayhayna:

• ¿Atsi mʼak toj tamenej toj José inu alhoho? (Tetshan versículo 9).

• ¿Ha lefwetaj toj José iwoye mʼak toj is alhoho? ¿Atsi mʼak toj tamenej?

VIDEO: Is che lhekchʼoye nʼokainʼoyaj (5:06)

Heowa ihuminchek nilhokej namel natekawayhla nʼokainʼoyaj. Yahyen 1 Corintios 6:18 wet ame mʼayhayna:

• ¿Atsi mʼayhay toj iwoyek inityenej nʼoelh toj nichatho nʼokainʼoyaj?

• ¿Chi malhyej (Ep hote) toj am iwoyek letekawayhla nʼokainʼoyaj?

4. Am iwoyek letumla nʼolhelhtshayaj

VIDEO: Nayahyen Biblia toj natatayhla nʼolhelhtshayajay (3:03)

• Lewhay toj ipunfwa toj ihi video ihanej toj letichunhayaj wet mʼak toj iwoye iwoyek tamenej toj nemhit tʼifwtiyej lechʼefwa, ¿atsi mʼak toj iwoye?

Cristianos toj afwtintses hate is che lhaikhajyenhen hopkhilak letichunhayaj nemhit lechʼohle ihi. ¿Atsi mʼak toj is che lewoye hopkhilak letiyej kanhi atichunhayajay toj kokʼaye? Yahyen Filipenses 4:8 wet ame mʼayhayna:

• ¿Atsi mʼayhay toj is che nen tichunhayaja?

• ¿Ha lefwetaj toj, che nayahyen Biblia wet toj nalekhajyenej toj natchumhoplhi Heowa athahitʼahla namhohen toj natiyej kanhi nʼolhelhtshayaj? ¿Atsi mʼak toj tamenej?

5. Naisej Heowa laka leyes

VIDEO: Iyhaj toj nihana mʼakej isitʼa lenʼayij (9:32)

• ¿Atsi mʼak toj tamenej toj mamse nichatho mʼak toj niʼisa? (Tetshan Proverbios 7:8, 9).

• Proverbios 7:23, 26 yome toj nʼokainʼoyaj iwoyek ichaje nʼowitʼay nʼoelh. ¿Atsi nʼowitʼayhyajay toj ihihitʼala namejen che nahanlhi Biblia lefwonyajay?

• ¿Atsi nʼokopfwayajay toj Heowa hiwʼenla namhohen che nahanlhi lefwonyajay?

Iche wichi toj yome toj isitʼa toj Dios yen wʼet mʼayeka toj hinʼu imayej hinʼu elh wok atsinha imayej atsinha elh. Mat Heowa hope Dios toj nʼohumnhayaj talhe, wet ihuminchek wichi lepes ihihitʼa toj yen kajyaja mʼak toj ihi. Mat, che natʼuhlak nakalhi tajtso, is che nawoye wet nahanlhi Biblia lefwonyajay. Yahyen 1 Corintios 6:9-11 wet ame mʼayhayna:

• ¿Ha tajlhamet toj hinʼu imayej hinʼu elh wok atsinha imayej atsinha elh toj Dios yen tichunhayaja toj isitʼa?

Hopkhilak nakajyenlhi Dios, nilhokej namel is che nawo elha lhahusey. ¿Ha nʼoelh isej che iwoye tajtso? Yahyen Salmo 19:8, 11 wet ame mʼayhayna:

• ¿Ha lefwetaj toj mʼak toj Heowa tʼalh namehen tʼuhawetej? ¿Atsi mʼak toj tamenej toj malhyejtso atichunhayaj?

MʼAYHAY TOJ LETETSHANNE

Hop nʼowanyajay hope Heowa lewʼayhat wet lham ihuminchek hinʼu wet atsinha toj tawhayeyhen malhyej toj ley yome yen kajyaja.

Mʼayhay toj nalechufwenejne

• ¿Atsi mʼayhay iyhaj toj hate hope nʼokainʼoyaj?

• ¿Atsi mʼak toj tachʼotla namehen toj nachathihotʼa nʼokainʼoyaj?

• ¿Chi malhyej (Ep hote) toj naisej toj natchʼahuye Heowa laka ley?

IWOYEK LEWʼEN IYHAJ MʼAYHAY:

Tetshan mʼak toj tamenej toj Dios tʼuhlak hinʼu wet atsinha tawhayeyhen malhyej ley yome che ihuminchek iwek.

«¿Atsi mʼak toj Biblia yomeje wichi toj tawhayeyhihentʼa malhyej toj ley yome?» (Nʼochufwenyaj toj ihi jw.org)

Tetshan mʼak toj tamenej toj Biblia tachumhitʼahla nʼokeyna, toj hinʼu imayej hinʼu elh wet atsinha imayej atsinha elh, mat tajtso tamenhiyejtʼa toj is che nanʼayiho wichitso.

«¿Ha is, che hinʼu imayej hinʼu elh wet atsinha imayej atsinha elh?» (Nʼochufwenyaj toj ihi jw.org)

Yahyen chi malhyej (ep hote) toj tʼu namehen mʼak toj ihi Biblia toj yiwite nʼowanyajay.

«Toj nʼoelh ichayoyhat elh toj ihane lakʼaj, ¿ha hope nʼowanyajay toj tʼuhawetej?» (Nʼochufwenyaj toj ihi jw.org)

¿Atsi mʼak toj tachʼote pʼante hinʼu toj ihi nʼokeyna toj imayej hinʼu elh toj iwo elha mʼak toj ihi wet ikajyenlhi Dios? Yahyen mʼak toj ihi pʼante toj nʼoyome «Nʼoyenhitʼanʼo wʼet mʼayeka».

«Dios Lhomtes iwo elha mʼak toj ihi» (La Atalaya, 1 toj abril toj 2011)

Toj ihi nilhokej lhipey, wichi wʼenhahiche letichunhayajay toj itiyej hatʼes. Iche wichi toj iyayej hatʼes toj lhayʼe lakalayʼis wet iche iyhaj toj iyahiyejtʼa mʼak toj alcohol iyej. Hate iche iyhaj toj iyayej hatʼes pajtha wʼoknhas. ¿Atsi mʼak toj Biblia yomeje hatʼes?

1. ¿Ha is, che nʼoelh iyayej hatʼes wok kha?

Biblia yomhiyetʼa toj isitʼa toj nʼoelh iyayej hatʼes. Biblia yome toj «hatʼes tä ikänitlhi» hinʼu hope nʼowʼayhat toj Heowa hiwʼen namhohen (Salmo 104:14, 15). Hate, Biblia yome toj iche pʼante hinʼul wet atsinhay toj afwtintses toj iyayej pʼante hatʼes (1 Timoteo 5:23).

2. ¿Atsi nʼofwonyaj toj Biblia hiwʼenho iyhaj toj tatshupiye toj iyayej hatʼes?

Heowa tsʼilakhitʼa toj nʼayiho toj nʼoelh iya pajtha wʼoknaj, hate che tsaji hatʼes toj nʼoelh iyayej (Gálatas 5:21). Biblia yok: «Yej aletʼaje iyhäj tä ikän hatʼes» (Proverbios 23:20). Hop toj tamenej toj, che natshupiye toj nayayej hatʼes, che natsʼilkas wok nalhayʼe iyhaj, isitʼa che nam tsaji toj nayayej pajtha nahanhiyejtʼa mʼak toj name, mʼak toj nawoye wok kalelhajitʼa lhatichunhayajay. Hate isitʼak nam tsaji toj nayayej toj nawitʼayen lhatʼisan. Che lehumin toj lenuhatpe lewʼet toj leyayej hatʼes is che leleyej.

3. ¿Chi malhyej (Ep hote) toj nanʼalit toj nenhitʼa wʼet mʼayeka mʼak toj iyhaj tatshupiye?

Tefwajnipej namel is che natshupiye che nayayej hatʼes wok kha. Isitʼa che natiyej lhatichunhayaj toj niʼisa iyhaj toj tatshupiye toj iyayej lhimpaj hatʼes. Che iche elh toj tatshupiye toj iyahiyejtʼa hatʼes isitʼak nanityenej (Romanos 14:10). Wet natshupiye toj nayahiyejtʼa hatʼes che iyhaj ihuminhitʼa (yahyen Romanos 14:21). Hop cristiano tʼuhikwetʼa mʼak toj lham isej, mat tʼukwe mʼak che elh isej (yahyen 1 Corintios 10:23, 24).

NATʼAYHETTSHI TOJ NALECHUFWENEJ

4. Tshupiye che leyahiyeja hatʼes wok kha

¿Chi malhyej (Ep hote) Jesús letichunhayaj toj itiyej toj nʼoyayej hatʼes? Hopkhilak nahanej lechulhyaj, natetshan mʼak toj ichun toj nʼoseltej toj Jesús iwoye pʼante. Yahyen Juan 2:1-11 wet ame mʼayhayna:

• Toj ihi relatona, ¿atsi mʼak toj ichufwen namejen Jesús letichunhayaj toj itiyej hatʼes wet iyhaj toj iyayej?

• Tej toj Jesús yomhiyetʼa toj isitʼa che nʼoelh iyayej hatʼes, ¿atsi letichunhayaj toj cristiano is che itiyej nʼoelh toj tatshupiye toj iyayej hatʼes?

Tej toj, cristiano iwoyek iyayej hatʼes hopkhitʼa toj nilhokej lewhay toj tʼuhawetej toj iya. Yahyen Proverbios 22:3 wet tetshan che tʼuhawetej toj leyayej hatʼes che:

• Am lhehi auto wok máquina.

• Ahope atsinha toj hichʼotshan.

• Kachawo ifwel amho toj isitʼa che leyayej mʼak toj alcohol iyej.

• Atha amho toj leleyej toj leyayej hatʼes.

• Niyatey yome toj isitʼa che nʼoyayej hatʼes.

• Lheyej elh toj tatshupiye toj iyahiyejtʼa hop toj ifwalas toj pajche ihumin toj iya.

Che am lhenlhi nʼokajyaj, malhyej che letawhayey, ¿ha is, che lewʼenho hatʼes iyhaj wichi toj ihoye? Hopkhilak lehanej mʼayhay iyhaj toj is che letetshan, yahin VIDEO.

VIDEO: ¿Ha is, che owʼenho hatʼes iyhaj? (2:41)

Yahyen Romanos 13:13 wet 1 Corintios 10:31, 32. Che tafwaytshi toj leyahyen tefwajpejni textos, ame mʼayhayna:

• ¿Chi malhyej (Ep hote) toj iwoyek tachʼot ame mʼayhayna toj matche hopkhilak letshupiye mʼak toj ikajyenlhi Heowa?

5. Tshupiye chifwajte (ep hote toj ihi) hatʼes toj leyahiyeja

Che leyayej hatʼes, husekchʼoye, toj Heowa tej toj yomhiyetʼa toj isitʼa toj nayayej hatʼes, lham nʼayiho che nam tsaji toj nayayej. ¿Atsi mʼak toj tamenej? Yahyen Oseas 4:11, 18 wet ame mʼayhayna:

• ¿Atsi mʼak toj iwoyek iyej elh toj tsaji hatʼes toj iyayej?

¿Atsi mʼak toj iwoyek tachʼot namehen toj nanuhitʼape lewʼet toj nayayej hatʼes? Is che nahanej tʼat mʼayhay toj itihla namejen lhawitʼay. Yahyen Proverbios 11:2 wet ame mʼayhayna:

• ¿Atsi mʼak toj tamenej toj is, che lekalelhat amho chifwajte (ep hote toj ihi) hatʼes toj leyahiyeja?

6. Mʼak toj tachʼote nʼoelh toj ileyej toj iya

VIDEO: «Onʼayiho mʼak toj oihihte» (6:32)

• ¿Chi malhyej (Ep hote) toj hatʼes yʼaje mʼak toj Dimitri iwoye?

• ¿Ha lham ikalhi toj ileyej toj iyayej hatʼes?

• ¿Atsi mʼak toj iwoye hopkhilak ikalhi tʼat toj ileyej toj iya?

Yahyen 1 Corintios 6:10, 11 wet ame mʼayhayna:

• ¿Atsi mʼak toj Biblia yomeje toj nʼoelh wʼoknhaj?

• ¿Chi malhyej (Ep hote) toj nahanej toj nʼoelh toj lakey toj iya iwoyek iwo elha lakeytso?

Yahyen Mateo 5:30 wet ame mʼayhayna:

• Jesús techʼaynek toj yome toj nʼoelh is che yiset lakwey tʼuhlak ichufwen namejen toj is che nalhaikhajyenej toj naise Dios. Che am alekhajyenej toj leleyej toj leya, ¿atsi mʼak toj iwoyek lewoye?a

Yahyen 1 Corintios 15:33 wet ame mʼayhayna:

• Che lehumin toj ayʼe iyhaj toj ikanhi hatʼes, ¿chi malhyej (ep hote) toj tajtso iwoyek yʼaj ame?

MʼAYHAY TOJ LETETSHANNE

Heowa hiwʼen namhohen hatʼes hopkhilak nen kajyaja, mat lham nʼayiho che nʼoelh iyayej hatʼes pajtha wʼoknaj wok che yam tsaji.

Mʼayhay toj nalechufwenejne

• ¿Atsi mʼak toj Biblia yomeje hatʼes?

• ¿Atsi mʼayhay toj isihentʼa toj iyej nʼoelh toj yam tsaji hatʼes toj iyayej?

• ¿Chi malhyej (Ep hote) toj nanʼalit toj nenhitʼa wʼet mʼayeka mʼak toj iyhaj tatshupiye che iyahiyeja hatʼes wok kha?

IWOYEK LEWʼEN IYHAJ MʼAYHAY:

¿Atsi mʼayhay toj mamses wet lhutshay is che ihanej lewhay toj iyayej hatʼes?

Yej alhen hopeya hatʼes kwenek (2:31)

Tafwelej mʼayhay toj iwoyek lewoye hopkhilak leleyej toj leyayej hatʼes.

«Chi malhyej (Ep hote) toj iwoyek lenuhitʼape lewʼet toj leyayej hatʼes» (La Atalaya, 1 toj enero toj 2010)

¿Ha is, che cristianos yenlhi brindis?

«Mʼayhay toj wichi tayʼatshan lhamehen» (La Atalaya, 15 toj febrero toj 2007)

Yahyen chi malhyej (ep hote) toj hinʼu ikalhi pʼante toj ileyej toj iya, toj ihi lhip toj yok: «Ohopehte elh toj lepes ihihitʼa toj iya».

«Dios Lhomtes iwo elha mʼak toj ihi» (La Atalaya, 1 toj mayo toj 2012)

Tej toj am matche toj lehumin Heowa wet letekawayhla nilhokej mʼayhay toj lham ihuminhitʼa hopkhilak ifwitajayen lham, ichepej toj lewohiyela mʼak toj nitʼuhawetayej. Mat iche nʼochʼisukyajay toj inuʼpe iyhaj toj yamho (1 Corintios 6:9, 10). Che am lewoye nʼochʼisukyaj toj lhayʼe lhip toj niʼisa, is che lehusekchʼoye toj Heowa ilehiyejtʼa toj iti amej lehumnhayaj; lham ihuminchek itayhat ates wet tachʼot ame.

1. ¿Atsi mʼak toj is che nawoye hopkhilak Heowa itayhat lhates?

Nʼoelh toj ihumin Heowa toj ihanej toj iwo lechʼisukyaja ilat lhame toj tumho lehusek malhyej che ihi chowej. Mat Heowa ikhajyen nʼoelh toj ihane nʼolhomtesna toj ifwenho pʼante laka wichi: «Tej tä hachʼisukyajay wuj tä nʼäl, mat olejla, hätehlat iwoye fwiyʼet tä wuj tä ipelaj» (Isaías 1:18). Che natalhtho lhahusek toj naleche mʼak toj niʼisa toj nawoye Heowa itayhatla lhates. ¿Atsi mʼak toj hope toj naleche mʼak toj niʼisa toj nawoye? Hope toj matche toj nayʼulhanche mʼak toj niʼisa toj nawoye, toj naleche tajtso wet natʼalhe Heowa che itetshanhitʼa. Nʼoelh lhaikhajyenej hopkhilak itiyej kanhi letichunhayajay toj niʼisahen wok ileche mʼayhay toj iwoyek yachajo toj ichaje lechʼisukyaj, wet matche toj lhaikhajyenej toj iwoye Heowa laka leyes (yahyen Isaías 55:6, 7).

2. Che nawo chʼisukyaja, ¿atsi nʼochʼotyaj toj Heowa hiwʼen namhohen isej ancianos?

Nʼoelh toj iwo lechʼisukyaja, Heowa ifwone lhomtesna: «Is chik tʼäne Dios leles tä lhamenya» (yahyen Santiago 5:14, 15). Hinʼulna hopehen ancianos toj Heowa tatshupiye toj ihane laka espíritu santo toj ihumin lham wet lelay, wet lhamel wakʼalhen hopkhilak tachʼot namehen toj nachajo toj naise Dios (Gálatas 6:1).

Che nawo chʼisukyaja, ¿chi malhyej (ep hote) toj ancianos tachʼot namehen? Dos wok tres lhamel tachʼotla namehen toj natafwelche Heowa letichunhayaj, mʼak toj tamenej toj isitʼa mʼak toj nawoye. Hate hiwʼen namhohen nʼofwonyajay wet tachʼotla namehen hopkhilak ihichetʼa lewhay che yachajo toj nawo chʼisukyaja. Che iche nʼoelh toj iwo lechʼisukyaja wet ilehichetʼa lakey toj niʼisa, ancianos ichemphahla toj ihi congregación hopkhilak nʼotʼuye congregación.

NATʼAYHETTSHI TOJ NALECHUFWENEJ

3. Toj nafwel mʼak toj isitʼa toj nawoye tachʼotla namehen toj yachajo toj naisen

Nʼochʼisukyaj at che nawoye yʼaje tʼat Heowa, hop tamenej toj is che nafwenho mʼak toj isitʼa toj nawoye. Yahyen Salmo 32:1-5 wet ame mʼayhayna:

• ¿Atsi mʼak toj tamenej toj lhayʼe lhip toj is che nafwenho Heowa lhachʼisukyajay inuʼpe che naskatho lham?

VIDEO: Heowa ifwone elh toj lham ihumin (3:01)

• Hopkhilak Canon yaple Heowa, ¿atsi nʼochʼotyaj toj ancianos hiwʼenho lham?

Matche toj laha che name mʼak toj nalate toj tumho lhahusek wet nafwenhopej mʼak toj matche hop ancianos, hop toj lhamel hopehen lhachʼotyaj Yahyen Santiago 5:16 wet ame mʼayhayna:

• Hopkhilak ancianos athahitʼa toj tachʼot namehen, ¿atsi mʼak toj tamenej toj isitʼa che naskatho mʼak toj nawoye?

4. Heowa itiyej lepʼaltsenyaj wichi toj iwo chʼisukyaja

Che iche nʼoelh toj yamho lechʼisukyaj wet iwathitʼahlak tachʼahuye Heowa laka leyes, nʼochemphahla toj ihi congregación wet nemhit nalhayʼajte lham. Yahyen 1 Corintios 5:​6, 11 wet ame mʼayhayna:

• Toj nahanej toj levadura yafwuto harina, ¿ha lefwetaj toj yʼajiyela congregación che nalhayʼajte elh toj iwo lechʼisukyaja toj yʼulhanhichetʼa mʼak toj iwoye? ¿Atsi mʼak toj tamenej?

Mʼak toj Heowa iwoyeje iyhaj toj iwo chʼisukyaja, ¿chi malhyej (ep hote) toj inʼalit toj is alhoho letichunhayaj, lehumnhayaj ihi wet lepʼaltsenyaj ihi?

5. Heowa itayhat lhates che naleche mʼak toj niʼisa toj nawoye

Jesús yome pʼante nʼotechʼaynek toj tachʼot namehen toj natafwelche chi malhyej (ep hote) Heowa letichunhayaj lewhay toj nʼoelh ileche mʼak toj niʼisa toj iwoye. Yahyen Lucas 15:1-7 wet ame mʼayhayna:

• ¿Atsi mʼak toj ichufwen namejen Jesús techʼaynek toj yome Heowa?

Yahyen Ezequiel 33:11 wet ame mʼayhayna:

• ¿Atsi mʼak toj laha ihi toj is che nawoye hopkhilak nanʼalit toj nayʼulhanche mʼak toj nawoye?

MʼAYHAY TOJ LETETSHANNE

Che nawoye nʼochʼisukyaj toj yamho mat matche toj nayʼulhanche wet nalekhajyenej toj nachahijotʼa toj nawoye, Heowa itayhatla lhates.

Mʼayhay toj nalechufwenejne

• ¿Atsi mʼak toj tamenej toj is, che nafwenho Heowa lhachʼisukyajay?

• ¿Atsi mʼak toj is che nawoye hopkhilak Heowa itayhat lhates?

• Che nawoye nʼochʼisukyaj toj yamho, ¿atsi mʼak toj tamenej toj is che natʼalhe ancianos lechʼotyaj?

IWOYEK LEWʼEN IYHAJ MʼAYHAY:

Yahin chi malhyej (ep hote) toj hinʼu isej Heowa lepʼaltsenyaj, malhyej toj ihi Isaías 1:18.

Yej nakachu Heowa lepʼaltsenyaj (5:02)

¿Chi malhyej (Ep hote) toj ancianos tachʼote iyhaj toj yamho lechʼisukyaj?

«Chi malhyej (Ep hote) toj nʼonʼaltej nʼohumnhayaj wet nʼopʼaltsenyaj iyhaj toj yamho lechʼisukyaj» (La Atalaya, agosto toj 2024)

Tetshan chi malhyej (ep hote) toj nʼonʼaltej nʼohumnhayaj wet nʼopʼaltsenyaj iyhaj toj iwo chʼisukyaja.

«¿Chi malhyej (Ep hote) toj nʼochʼote iyhaj toj nʼochʼempha toj ihi congregación?» (La Atalaya, agosto toj 2024)

Yahyen mʼak toj hinʼu ihi pʼante toj ihi lhip «Owatlak oyaple Heowa» chi malhyej (ep hote) toj hinʼu toj ilate toj tumho tʼat lehusek toj Heowa yachajo toj ichaje lham mʼak toj matche.

«Dios Lhomet iwo elha mʼak toj ihi» (La Atalaya, 1 toj abril toj 2012)