2. ¿Atsi mʼak toj Biblia yomeje Heowa?

Biblia yome toj nilhokej dioses toj wichi nʼokwiyej, Heowa hope tefwajni Dios toj matche. ¿Atsi mʼak toj tamenej? Iche wujpe mʼayhay toj tamenej. Heowa hope elh toj lenʼohyaj inuʼpe iyhaj, «nʼowujtaj toj iʼpe nilhok honhat» (Salmo 83:18, NWT). Lham hope elh toj «najit letunfwaya», wet nʼolhometna yome toj lham lekhajyhayaj ihi, toj ikalhi toj iwoye nilhokej mʼayhay toj tʼuhlak iwoye. Lham hope elh toj «[lh]enek nilhokej mʼayhay» toj ihi pele wet honhat (Apocalipsis 4:8, 11). Hate, Heowa hope tefwajni Dios toj iche wet ihichetʼala ifwala che yʼil (Salmo 90:2).

Toj Heowa hope elh toj lhenek namel, tʼuhawetej che tajlhamet lham toj nanʼokwiyej (Apocalipsis 4:11). Tajtso hope toj is che nahumin wet nanʼokwiyej tajlhamet lham, nachumyenhilhitʼa nʼocheyalis, nʼopeyak wok mʼak at che hope (yahyen Isaías 42:8).

Toj nanʼokwiyej Heowa is che hope «lham tʼamajchetes wet äp akäjejlhi» Heowa (Romanos 12:1). Tajtso hope toj is che natchʼahuye laka leyes. Malhyej toja, iyhaj toj ihumin Heowa tachʼahuye wet ihumin nʼofwonyajay toj yiwite iyhaj toj lechʼefwa ihi. Hate tachumhitʼahla nʼokeyis toj iwoyek ikanchi nʼoelh, malhyej toj ichumyenlhi drogas, yokwas wok toj iyayej wuj hatʼes.a