Toj nen tichunhayaja mʼak toj ihichela is che lhachayaj ihi

Tatay lhimpaj wet nofwila Heowa letelaythayaj toj itiyej wichi. Nʼotayhthila religiones toj kamatachehen, ihichela niyatey toj lhaipʼajtitwek hopkhilak inuye Dios laka wichi, wet toj ihi Armagedón Heowa itayhthila wichi toj niʼisa. Dios lakawos wuj toj inihihla mʼayhayna toj naselthiyeja toj ihichela.

Nahanhiyejtʼa nilhokej mʼayhay toj ihichela toj ihi nʼolhakli toj lhayʼe lhip toj aytaj. Nahanhiyejtʼa lewhay toj iwohla tesa. Nahanhiyejtʼa mʼayhay toj niyatey yenla tesayej religiones hopkhilak itayhat. Nahanhiyejtʼa atsi mʼayhay toj niyatey iwohiyela hopkhilak inuye Dios lakawos wet atsi lewhay toj yenla lepesa toj iwoye tajtso. Hate nahanhiyejtʼa atsi mʼayhay toj Heowa ichumyenhilhila hopkhilak itayhat wichi toj niʼisahen toj ihi Armagedón.

Dios Lhomtes ifwel namho nilhokej mʼak toj iwatlak nahanej hopkhilak lhatʼotle tʼunhen wet lhaniwhayaj ihi toj ihi ifwalas toj natatache. Malhyej toja, nahanej toj nehi ifwalas toj lepes toj ihi lewhay toj lepese (2Ti 3:1). Hate nahanej toj lewhay che nʼotayhat religiones nʼoyamhitʼala pitaj, hopkhilak religión toj matche tatayhitʼa (Mt 24:22). Nahanej toj Heowa ifwayhthila laka wichi (2Pe 2:9). Wet nahanej toj elh toj Heowa itshupiye hopkhilak itiyej lakalelhthayaj wichi toj fwitses wet ifwayhthen wujpey wichi toj ihi Armagedón, hope elh toj is alhoho mʼak toj iwoye wet lakhajyhayaj ihi (Ap 19:11, 15, 16).

Lewhay che nʼal mʼayhaytso wichi «tawelkayhiyejawethä lenowayhyaj» (Lu 21:26). Mat toj nayahyen wet nen tichunhayaja mʼak toj Heowa iwoye pʼante toj ifwayhat lakawos wet mʼak toj ifwel namho toj ihichela toj tatay alhoho iwoyek namatitche toja: «¡Akhajyenhen, neyhetchephä ethey, tsi tottʼa alhoho afwayhyaj!» (Lu 21:28).