Mʼak toj iwoyek nawoye toj nachʼote ipunfwas lewhay che iche nʼowitʼay

Nekchompej lhayʼepej lhip toj iche nʼowitʼayhyajay toj ikanchi honhat. Lewhay toj iche nʼowitʼayhyajayna iwatlak kalelhajcha nʼochʼotyaj toj nʼowʼenho wichi. Hop toj tamenej toj Hinʼul toj lhaitumtej nilhokej congregaciones (Cuerpo Gobernante) yome toj iwatlak iche Lhip toj lhaitumtej toj tachʼote iyhaj (Departamento de Labores de Socorro) toj iyej nʼowukwey Betel (sucursales) toj ihi nilhokej honhatil.

Lewhay toj ipunfwas toj ihi Lhiptso ihanej toj iche nʼowitʼay toj ikanchi honhat, yofwajkwet tʼane hop ancianos hopkhilak ihanej mʼak toj ipunfwas iwatla. Che wuj toj aytaj mʼak toj ihi ipunfwas toj ihi lhiptso toj lhamel iwohiyetʼak tumla, hop nʼowukwe Betel (sucursal) itshupyenhiyela ipunfwas toj ihan mʼakej hopkhilak itetshan nʼochʼotyaj toj nʼowʼenho wichi. Ipunfwasna nʼalej toj iwoyek tʼalhe ipunfwas iyhaj toj ihuminchek tachʼote, hate tʼalh mʼayhay toj ipunfwas iwatla wok iwoyek ichaj wet hiwʼenho mʼayhaytso toj ipunfwas iwatla.

Laha ihi toj nʼowoye tajtso hopkhilak niwuja nʼochumet, kalelhaj mʼak toj nʼowoye wet nam is toj nachumyenlhi chinaj tʼoj wet mʼayhay toj nʼowʼenho ipunfwas. Tajtso hope mʼak toj ihichetʼa che iche elh toj tsʼilak lham toj itshupiye mʼak toj iwoye.

Hop ipunfwas toj nʼowukwe Betel itshupiye iwoyek yam kalelhaj chihatefwaj (ep hote toj ihi) chinaj tʼoj wet ipunfwas toj nʼowatlahla. Hate nʼalej toj iwoyek tʼane wichi toj niyatej lhiptso hopkhilak athahitʼa lhachumet toj nawʼenho ipunfwas nʼochʼotyaj toj iwatla. Toj malhyejtso isitʼa che ipunfwa iwo tesa toj ihutwek chinaj tʼoj, ithate mʼayhay wok ihoye lhip toj nʼowitʼayhyajay ihi che ihichetʼa elh toj tʼalheje tajtso.

Kalelhaj toj wuj toj nahumin lhapunfwas wet natʼuhlak nachʼote lewhay toj iche nʼowitʼayhyajay toj wuj toj athahen (Heb 13:16). Toj malhyejtso, ¿atsi mʼak toj iwoyek nawoye? Mʼak toj wuj toj laha ihi hope toj nawo tʼalhyajaʼpe ipunfwas toj ihi nʼowitʼay wet iyhaj toj tachʼote lhamel. Hate iwoyek nathatcha chinaj tʼoj hopkhilak nachʼote nʼochumet toj ihi honhatil (obra mundial). Hop Hinʼul toj lhaitumtej nilhokej congregaciones ichumyenlhi nʼowukwey Betel hopkhilak lhamel itshupiye lenʼayij toj tʼuhawetej toj is che nʼochumyenlhi chinaj tʼoj. Wet che natʼuhlak nahoye wet nachʼote ipunfwas iwoyek nalesayen formulario Solicitud de voluntario local de diseño y construcción (DC-50).

YAHIN VIDEO WICHI TOJ IHI BRASIL HICHʼAHEN, WET TOJ PAJ CHULHO NʼOYʼATSHANEKNA:

¿Atsi mʼak toj leseltej toj iwoye wichi toj yen lhometa Heowa toj ihi Brasil toj tachʼote lepunfwas toj tafwaytshi toj wichi hichʼahen?