José hope pʼante Jacob lhos elh toj nitalakwa. Lechilalis ihanej toj José hope elh toj lajcha lhayʼe lhip toj ihumin. ¿Ha lehanej mʼak toj lhamel ilate? Lhamel matche toj tʼischene José wet nayiho. Iche ifwala, toj José lefwilhey ihi wet ifwenho lechilalis. Lhamel yen tichunhayaja toj lefwilheytso hope toj ihichela ifwala che lhamel nʼokwiyej lham. Hop toj tamenej, toj lhayʼe lhip toj lhamel nayiho.

Iche ifwala, toj José lechilalis tʼuye lelay toj ihi ciudad toj lhey Sikem. Toj malhyejtso Jacob ichene José hopkhilak iyahne lechilalis. Toj lhamel hiwʼene, yok: «Yahinla nʼofwilhekwo. ¡Lhek nalanla!». Lhamel itsoklhi wet itatche pozo toj pitoj. Mat lechila elh, toj lhey Judá, yok: «Yej nalan. Mʼak toj is che nawoye hope toj nafwenlhi hopkhilak hope nʼokawo». Wet iwoye tajtso. Lhamel itumhatla 20 chinaj tʼoj toj plata José, hop Madián lhayis toj tiyaje Egipto.

Toj paj, lechilalis ilanej kayla woyis José lakay, wet ichaje lajcha. Wet yʼatshane: «¿Ha hope as lakay?». Jacob fwetaj toj iche itshawet toj ilan lhos José, wet wuj toj lefwitajayaj ihi. Wet ihichetʼa elh che iwoyek ikajyenlhi.

Toj ichate Egipto, hinʼu toj lenʼohyaj ihi toj lhey Potifar ichaj José hopkhilak hope lakawo. Mat Heowa iyej tʼat José. Potifar hiwʼen toj José hope elh toj chumaj wet elh toj iwoyek tʼekhaye. Wujitʼa lewhay toj tafwaytshi, José tʼuye nilhokej mʼayhay toj Potifar lewuk.

Potifar lechʼefwa hiwʼen toj José hope elh toj takhajay wet isilataj, wet tʼalhepej che imayej lham. ¿Atsi mʼak toj José iwoye? José takawayhla wet yok: «Kha, tajtso isitʼa. Owuk tʼekha noye, wet am ahope lechʼefwa. Che oma amej, malhyej at che ottayhla Dios».

Iche ifwala, toj Potifar lechʼefwa inityenej José toj imayej lham. Itsok José lewʼuy, mat lham inu alhoho. Lewhay toj Potifar ichate lewʼet, lechʼefwa ifwechʼenlhi lham, wet yome toj José iwoyeje mʼak toj niʼisa. Potifar wuj toj lewak ihi wet hipʼohi José. Mat Heowa iyej tʼat José.

Toj kamaj José ihi tʼat carcel, faraón, Egipto laka niyat, lefwilhey ihi wet ihichetʼa elh che iwoyek itafwelche. Iche faraón lakawo toj ifwenho toj José iwoyek ifwenho mʼak toj hope lefwilhey. Toj malhyejtso, faraón tʼalhe che nʼokelit toj nʼohane José.

Faraón yʼatshane José: «¿Ha iwoyek lefwel nʼoho mʼak toj hope ofwilhey?». Jose ichulho: «Siete años toj Egipto hiwʼenla wuj lhak, wet che paj siete años toj nehlas ihihla. Tshupiye elh toj hantsaj hopkhilak tʼamajej nʼolhak wet wichi lhak ihi tʼat». Faraón yok: «¡Otshupi ame! Am ahopkhila segundo niyat toj ihi Egipto». Mat, ¿atsi mʼak toj tamenej toj José ihanej mʼak toj hope faraón lefwilhey? Hop toj Heowa tachʼote.

Siete años toj José tʼamajej nʼolhak. Toj paj, nehlas yʼajpe honhat, malhyej toj lham yome, wet wichi toj talhe lhipey iyhaj ihoye Egipto hopkhilak ichaj lhak. Lajcha, Jacob, ihanej toj nʼolhak ihi Egipto, hop toj tamenej toj ichene 10 leles hopkhilak ihoye wet ichaj nʼolhak.

Jacob leles ihoye José, wet lham itafwelej lhamel. Mat lechilalis itafwnhiyejtʼa lham. Lhamel takhoschufwi José, wet nʼokwiyej, malhyej toj lham ifwilhanej pʼante toj mamse. José tʼupʼantehlak ihanej che lhamel kamaj nayiho lham, wet ifwenho toja lechilalis: «Amel leyahin kana wet leyahin che iwoyek lenuye olhamel». Lhamel yok: «¡Kha! Olhamel otʼalhe Canaán. Oichente 12, mat uno yʼil pʼante, wet elh toj lepes lhele imalheyej olhamel ojcha». José ifwenho lhamel: «Chaj kana amel achʼinij wet omatitchehla amel amet». Lhamel yaple tʼat lajcha lewʼet.

Jacob lewʼet lheley yachajo toj lhak ihihitʼa, wet yachajo toj ichene leles hop Egipto. Mat athana ichaj lhamche lechʼinij, Benjamín. Hopkhilak yelhte lechilalis, José itatho nʼolhathi toj plata hop Benjamín laka bolsa wet isujkane toj lhamel hopehen etantses. Toj José lakawos hiwʼen nʼolhathi toj ihi bolsa, lechilalis iseltej. Lhamel lhaipʼaltsene pʼante José hopkhilak itiyej letes, mat lechʼinij kha.

Toj malhyejtso, José ihanej toj lechilalis ileche lakey. Iwohiyetʼak itelaytej, iwo tesa toj tafwlhi wet yok: «Ohope José, amel achʼinij. ¿Ha kamaj ilay tʼat ojcha?». Lechilalis wuj toj iseltej toj ilate lham. Jose ifwenho lhamel wet yok: «Yej tichunche mʼak toj amel lewoyejte noye. Dios ichajno kana hopkhilak ofwayhat amel. Mat ¡kelhchetsi!, chaj kana hop ojcha».

José lechilalis yaple lewʼet wet ifwenho nʼosilot toj is hop lajcha wet lhamel ichaje Egipto. Tafwaytshi wujpe años, José wet lajcha yachajo toj iwek.