Lhamel tatayhla Heowa

Toj yik lewhay toj israelitas ihi desierto, Coré, Datán, Abiram wet 250 hinʼul tatayhla Moisés. Lhamel yopʼantekwe: «¡Oyʼelh amejen! ¿Atsi mʼak toj tamenej toj am ahope olhamel oka líder? ¿Wet atsi mʼak toj tamenej toj Aarón hope sacerdote toj lhamya? Heowa iyej nilhokej wichi toj ikana, tsʼilakhitʼa am lhayʼe Aarón». Heowa wuj toj yʼulhanche mʼak toj lhamel yome, ilate toj nʼotayhla lham.

Moisés ifwenho toja Coré wet wichi toj lhayʼe lham: «Che fwala hoyehla tabernáculo wet chaj amchehen fwiyhol lehis am tapoyej incienso. Heowa ipaynhila namehen atsi elh toj itshupiye».

Toj ifwala elh, Coré wet 250 hinʼul lhaihutwek toj ihoye Moisés toj ihi tabernáculo. Wet iwo tesa toj iwun incienso malhyej at che sacerdotes. Heowa ifwenho Moisés wet Aarón: «Yej alepʼajtej Coré wet iyhaj toj lhayʼe».

Coré ihoye lhip toj Moisés ihi toj ihi tabernáculo, mat Datán, Abiram wet lewʼet lheley tʼuhitʼahlak ihoye. Heowa ifwenho israelitas: «Ekchʼoye Coré, Datán wet Abiram lewʼetes». Israelitas yikchʼoye lhiptso. Datán, Abiram wet lewʼet lheley ikasithen toj ihi lewʼetes lepe. Honhat lhaiselhkat toj lhaichenhi wet tim wichi toj tatayhla Moisés. Toj ihi tabernáculo, iche itaj toj talh pele toj itayhat Coré wet 250 hinʼul.

Toj paj, Heowa ifwenho Moisés: «Is che nilhokej iyhaj toj lhaitumtej laka tribu ichaj kana letsut. Lesayen weihalhapej lheyis toj ihi letsut. Mat toj ihi Leví letsut, tihi Aarón lhey. Tichufwi tabernáculo nilhokej nʼotsutes. Hinʼu letsut toj otshupiyehla lhawʼol talhohla».

Toj ifwala elh, Moisés itompha nilhokej nʼotsutes wet ipayne laka líderes. Aarón letsut, lhawol tʼat, wet lhay yʼohen toj ihi. Toj malhyejtso Heowa ikalelhat toj itshupiye Aarón hopkhilak hope sacerdote toj lhamya.