NʼOCHUFWENYAJ 28
Asno toj yomlhi
Israelitas 40 años toj ihi desierto. Pajche ikalhi ciudades iyhaj toj takhajayhen. Athana lhamel ihi tʼat honhat lhip toj lhey Moab, toj tataye tewok Jordán, wet tatay lhimpaj toj lhamel tiyajo Honhat toj Heowa ifwenho lhamel. Balac, Moab laka niyat, wuj toj nowaye che israelitas isoyej laka honhat. Hop toj tamenej toj tʼalheje hinʼu toj lhey Balaam toj ihoye Moab hopkhilak itayhte mʼak toj niʼisa israelitas.
Mat Heowa ifwenho Balaam: «Yej tayhte mʼak toj niʼisa israelitas». Hop toj tamenej toj Balaam tʼuhitʼahlak ihoye Moab. Niyat Balac yachajo toj tʼanla wet ifwenho toj hiwʼenhihola mʼak at che tʼalhe, mat Balaam yachajo toj tachumhitʼahla. Toj malhyejtso Dios ifwenho toja: «Iwoyek lehoye. Mat lhomhiyela mʼak toj olham ofwel amho».
Balaam iʼpe lela asno toj tiyaje Moab. Lham tʼupʼantehlak itayhte mʼak toj niʼisa israelitas, tej toj Heowa pajche ifwenho toj isitʼa toj iwoye tajtso. Toj malhyejtso, Heowa laka ángel inuhla lenʼayij tres veces. Balaam hiwʼenhitʼa ángel, mat lela hiwʼen. Toj ichun lela, tiyajche lhip elh. Toj paj asno tiyajwhaye nʼolafwek toj tuntey, wet iwo tesa toj hipʼajtit Balaam lakala. Toj lepes, asno lhaithat katsi toj ihi nʼayij. Lewhaytso, toj asno iwopej keya Balaam itasinpej toj ihane halʼo.
Toj paj, Heowa yomyenlhi asno. Asno yʼatshane Balaam: «¿Atsi mʼak toj tamenej toj letasinnʼo?». Balaam nichulho toja: «Hop toj lhennʼo ochʼisuk. Che owʼen espada, pajche toj leyʼil». Asno yok: «Pajche toj otilhajlhi am. ¿Ha iche lewhay toj omalhyejtso?».
Toj malhyejtso, Heowa ifwoyenpe Balaam letelhoy hopkhilak hiwʼen ángel. Ángel yok: «Pajche Heowa ifwel amho toj isitʼa che letayhte mʼak toj niʼisa Israel». Balaam nichulho: «Isitʼa mʼak toj owoye. Athana oyaple owʼet». Mat ángel nichulho: «Iwoyek lehoye Moab, mat tajlhamet iwoyek lhome mʼak toj Dios pajche ifwel amho».
¿Ha lefwetaj toj Balaam iche mʼak toj ihanej? Kha, hop toj yachajo toj itayhte mʼak toj niʼisa israelitas tres veces. Mat, tres veces, toj Heowa iwopej elha toj itayhte mʼak toj niʼisa israelitas. Toj lepes, israelitas inuye Moab, wet Balaam yʼil. Matche pʼante toj is che Balaam tachʼahuye Heowa talhe toj ichun, ¿mat?
«Tsi nilhokej mʼak tä niʼisachehen lefwetes, häpe tʼat nʼohumnhayaj tä õʼtiyej kolhki. Wet häp iyhäj tä tʼakänyaj itiyej kolhki, lhamel nistakej tʼekhahyaj, wet hätet iwoye tä itshänejwethä chʼuthanil lehusey, wet wuj leteläythayajay tä iyej lhamel» (1 Timoteo 6:10).