Heowa tahuyej hop Samuel

Hop sacerdote toj lhamya, Elí, hiwʼen pʼante dos leles: Ofni wet Finees. Lhamel hopehen pʼante sacerdotes wet tachumwetha toj ihi tabernáculo. Mat lhamel tachʼahuhiyetʼa Heowa laka leyes, wet hate iwoyeje mʼak toj niʼisa hop wichi. Lewhay toj israelitas ichaje lewʼayhtes hop Heowa, Ofni wet Finees imalheyej tʼisan toj matche toj is. Elí ihanej toj isitʼa mʼak toj leles iwoye mat iwohiyetʼa mʼak toj ifwone lhamel. ¿Ha lefwetaj toj Heowa iwohiyela mʼak?

Tej toj Samuel hanʼafwaj pʼante itenhitʼa Ofni wet Finees lakeyis. Hop toj tamenej toj Heowa matche toj kajejlhi lham. Iche honatsi toj Samuel ima wet ilate nʼopak toj tʼane lham. Inepha, wet inu alhoho toj ihoye Elí wet yok: «Oikana». Mat Elí nichulho: «Otʼanhitʼa ame. Aple amawet». Samuel yachajo toj ima. Toj malhyejtso, yachajo toj ilate nʼopak. Tercera vez toj Samuel ilate nʼopaktso, Elí ihanej toj hope Heowa toj tʼane Samuel. Elí ikaleltho toj che lham yachajo toj ilate nʼopaktso is che nichulho toj yok: «Fwel nʼoho, Heowa. Akawo tachʼahu ame».

Toj Samuel yaple lemawet yachajo toj ilate nʼopaktso: «Samuel, Samuel». Lham yok: «Fwel nʼoho, Heowa. Akawo tachʼahu ame». Heowa ifwenho toja: «Fwenho Elí toj otihiyeja letes lham wet lewʼet lheley. Lham ihanej toj leles iwoye tʼat mʼak toj niʼisa toj ihi oka tabernáculo, mat ifwenhihotʼa mʼak hop lhamel». Toj ifwala elh, Samuel ifwoyenche tabernáculo lepelis, malhyej lakeypej. Lham nowaye che ifwenho Heowa lhomet hop sacerdote toj lhamya. Mat Elí tʼane wet yʼatshane: «Samuel, ¿atsi mʼak toj Heowa ifwel amho?». Wet Samuel ifwenho nilhokej Heowa lhomet.

Samuel lhaichiyhelit tʼat, wet Heowa kamaj yen tʼat hopeya laka amigo. Hop israelitas toj ihi nilhokej lhipey ihanej toj Heowa itshupiye hop Samuel hopkhilak hope profeta wet juez.