Heowa hiwʼenho lakhajyhayaj hop Sansón

Hop israelitas yachajo toj nʼokwiyej dioses toj kamatachehen. Hop toj tamenej toj Heowa inuhitʼahla toj filisteos lhayis yen kwenkaya israelitas. Mat iche iyhaj israelitas toj ihumin Heowa, malhyej Manoa. Lham wet lechʼefwa leles ihihitʼa. Iche ifwala, toj Heowa ichene laka ángel hopkhilak tahuyej Manoa lechʼefwa wet yok: «As ihihla, hopehla elh toj ifwaythej filisteo lhayis hop israelitas. Hopehla nazareo». ¿Lehanej atsi iyhaj toj hopehen nazareos? Hope wichi toj wʼenha lhamej toj tachumhoplhi hop Heowa wet nʼonʼayejo toj yʼisit lewʼoley.

Toj tafwaytshi lewhay, Manoa lechʼefwa lhos ihi, wet lhamel yen lheya Sansón. Toj lhaichiyhelit, Heowa hiwʼenho lakhajyhayaj toj wuj. ¡Lham iwoyek ilan león toj ihane lekweyey! Iche lewhay, toj tsʼilak lham toj ilan 30 filisteos. Hop toj tamenej, toj filisteos matche toj nʼayiho lham wet ihuminchek ihanej chi malhyej (ep hote) toj ilan lham. Iche honatsi, toj Sansón ima toj ihi Gaza. Toj malhyejtso letayhfwas ihoye lepe ciudadtso wet itaye che lham inupha toj nechʼe fwalatso hopkhilak ilan. Mat toj honatsi lechowej inepha ihoye ciudadtso lepelis wet ilanche, toj paj tʼilhaj toj itiʼpe lefwapol toj ihanʼpe chenhaj toj iwhaye Hebrón.

Toj paj, filisteos ihoye Dalila, toj hope pʼante Sansón lakais, wet ifwenho toja: «Olhamel owʼenla amho miles chinaj tʼaj toj plata che lehanej atsi lhip toj Sansón italhthi lakhajyhayaj. Hop toj olhamel ohuminchek okatej wet otihi hop cárcel». Dalila iwatla pʼante chinaj tʼajtso, wet tachumla mʼak toj nʼofwenho. Toj ichun, Sansón tuhitʼahlak ifwenho Dalila atsi lhip toj italhthi lakhajyhayaj. Mat lham ilehiyejtʼa toj yʼatshane Sansón wet lham yʼelej Dalila wet ifwenho lhip toj italhthi lakhajyhayaj. Lham yok: «Ihichetʼa lewhay che nʼoyʼische owʼoley hop toj onazareo . Che nʼoyʼisit owʼoley, nemhit okhajyhayaj ihihla». Matche toj isitʼa toj Sansón ifwenho tajtso hop Dalila, ¿mat?

Dalila ikelhtsi toj ifwenho hop filisteos: «¡Ohanej lhip toj italhthi lakhajyhayaj!». Dalila imayen Sansón toj itiʼpe lhechey wet tʼalhe nʼoelh che yʼische lewʼoley. Dalila tʼan wet yok: «¡Sansón, filisteos ikana!». Lham nom, wet nechʼe ihanej toj nemhit lakhajyhayaj ihi. Filisteos itsoklhi wet ilanche letelhoy wet itatho cárcel.

Iche ifwala, toj wujpe filisteos lhaihutwekhen toj ihi templo toj laka dios Dagón ihi. Tʼanwetha: «Lhaka dios yachaj namehen hop Sansón. Tompha hop Sansón hopkhilak tʼischenyenwetha namel». Nʼotihi lechowej dos columnas wet nʼolakwlhi lham. Sansón yam aytaji lepak wet yok : «Heowa, por favor, achajo toj lewʼen nʼoho akhajyhayaj». Lewʼoley yachajo toj lhaichiyhelit, wet ihutche dos columnastso wet templotso wascha wet ilanhen nilhokej iyhaj toj ihi lhiptso Sansón hate yʼil.