Lewhay toj Salomón iwo tesa toj niyatej Israel, Heowa yʼatshane lham: «¿Atsi mʼak toj lewatlak owʼen amho?». Salomón yok: «Omamse tʼat wet kamaj ohaniyejtʼak oyam is mʼayhay. Por favor, wʼen nʼoho ohanyaj hopkhilak otʼuye aka wichi». Heowa yok: «Toj letʼalh nʼoye ahanyaj, oayenla hopeya hinʼu toj matche toj hantsaj toj ihi honhat. Hate ahopkhila niyat toj hiwʼen wujpe mʼayhay wet che letachʼahu nʼoye, lelayhla wujpe años».

Salomón iwo tesa toj yenlhi templo. Ichumyenlhi oro, chinaj, halʼoy wet tuntey. Nilhokej mʼayhay toj yene matche toj is. Wujpe hinʼul wet atsinhay toj ihan mʼakejen tachʼote toj yenlhi. Siete años toj nʼoyenlhi wet wakʼalh. Toj malhyejtso ichate ifwala toj nʼoyachaje Heowa, wet nʼotiʼpe altar nʼotwʼayhthes. Salomón yupincha toj tatayhla lhip toj altar ihi wet iwo tʼalhyaja: «Heowa tʼuhawet amej templo toj matche toj wuj wet isilataj inuʼpe toja. Mat, chumla mʼak toj olhamel owoye toj onʼokwi amej wet otʼalhyajay». ¿Chi malhyej (Ep hote) toj lewʼen? ¿Ha Heowa ihumin templotso? ¿Ha tachʼahuye Salomón letʼalhyaj? Toj Salomón ileyej toj iwo tʼalhyaja, iche itaj toj talh peleye wet iwunho nʼotwʼayhthes. Toj malhyejtso Heowa inʼalit toj ihumin templotso. Toj israelitas hiwʼen tajtso, wuj toj lekajyaj ihi.

Wujpe wichi toj ihi Israel wet lhipey iyhaj toj atosehen ihanej tʼat toj Salomón hope hinʼu toj matche toj hantsaj. Wichi ihoye lham hopkhilak tachʼoteje lewitʼayhyajay. Niyat tshina toj talhe Saba tʼisiyake lham hopkhilak yenlhi nʼoyʼatshanhay toj athahen hopkhilak yelhte. Toj ilate Salomón lechulhyajay yok: «Omatitchetʼa mʼak toj nʼoyom ame, mat nechʼe ohanej toj ahope elh toj matche toj lehanyaj ihi, inuʼpe mʼak toj nʼofwel nʼoho. Aka Dios, Heowa, ikopfway ame». Toj ihi Israel matche toj is mʼak toj wichi ihi, wet lhamel lekajyaj ihi. Mat tatay lhimpaj toj mʼayhay iwohla iyhaja.

Lewhay toj Salomón nʼokwiyej Heowa, iche nʼotamsek toj ihi Israel. Mat lham iyej pʼante atsinhay toj talhe lhipey iyhaj wet toj nʼokwiyej dioses toj kamatachehen. Lhimpajpej toj Salomón iwo elha wet iwo tesa toj nʼokwiyej dioses iyhaj. Heowa itiyej lewak lham wet yok: «Osohiyeja hawʼet lheley toj niyatej Israel wet oyamla dos. Owʼenhihola lhip toj wuj hop elh akawos wet hawʼet lheley tsʼilakhila toj lhaitumtej lhimpaj».

Heowa iwoye mʼak elh hopkhilak nilhokej itafwelche mʼak toj yome. Iche Salomón lakawo, toj lhey Jeroboam, yik wet ichutla hop profeta Ahías toj ihi lenʼayij. Hop profetatso ilanhi lewuy, yam 12 lhipey toj iwasthi wet ifwenho Jeroboam toja: «Heowa isohiyeja Salomón lewʼet lheley toj niyatej Israel wet yamla dos nʼoniyatyajay. Chuma 10 lhipey owuyna, hop toj aniyathiyeja 10 tribus». Lewhay toj niyat Salomón ihanej mʼak toj iche, tʼupʼantehlak ilan Jeroboam. Hop toj tamenej toj Jeroboam tiyaje hop Egipto. Toj tafwaytshi lewhay, Salomón yʼil, wet lhos Roboam iwo tesa leniyatyaj. Toj malhyejtso, Jeroboam yen tichunhayaja toj mʼak ihiyejtʼala wet yaple Israel.

Toj paj, wichi toj tanhay toj ihi Israel ifwenho Roboam toja: «Che lewoyeje mʼak toj is wichi, lhamel ilehitʼala amej». Mat laka amigos toj mamses ifwenho: «Is che lewoyeje mʼak toj niʼisa wichi. Is che lechumyenwetha lhamel». Roboam tachʼahuye laka amigos wet fwitsaje wichi. Hop toj tamenej toj wichi tatayhla lham wet wichitso itumtej Jeroboam che niyatej 10 tribus. Hop 10 tribustso nʼoyen lheya Israel. Wet dos tribus iyhaj nʼoyen lheya Judá, wet tʼifwtiyej Roboam. Malhyejtso pʼante toj nʼowʼenhathen 12 tribus toj ihi Israel.

Jeroboam iwathitʼahla pʼantek wichi nʼokwiyej Heowa toj ihi Jerusalén hop toj Roboam lhaitumtej lhiptso. ¿Ha lehanej mʼak toj tamenej? Hop toj nowaye pʼante che wichi tekawayhla lham wet tachʼahuye hop Roboam. Toj malhyejtso yenlhi dos wʼasetas toj oro wet ifwenho wichi toja: «Jerusalén matche toj tofwe. Is che amel lemalhe kana hopkhilak lenʼokwiyej wʼasetasna». Wichi tachʼahuye lham wet yachajo toj lhamel hipʼethatla Heowa.