Mʼak toj iche pʼante toj iʼpe chenaj Carmelo

Toj ihi pʼante 10 tribus toj ihi Israel laka niyatey matche toj fwitses, mat Acab hichʼatej toj niʼisa. Lham iyej pʼante atsinha toj matche toj fwitsaj toj nʼokwiyej dios Baʼal. Lhey Jezabel. Mʼak toj Acab wet Jezabel iwoye tamenej toj wujpe wichi nʼokwiyej Baʼal. Hate ilanhen wujpe Heowa laka profetas. ¿Atsi mʼak toj iwoye pʼante Heowa? Ichene hop profeta Elías hopkhilak ifwenho mʼak hop Acab.

Elías ifwenho Acab toj nemhit iwomlahcha toj ihi Israel hop toj lham hope niyat toj matche toj fwitsaj. Inuʼpe tres años, toj ihichetʼa mʼak che talh toj talho honhat, wet wichi ichuyuhen. Toj paj, Heowa yachajo toj ichene Elías hop Acab hopkhilak tahuyej. Hop niyat Acab ifwenho Elías toja: «Am tsʼilak lechaj kana nʼowitʼayhyajay. Nilhokej mʼak toj iche ates tʼat». Elías nichulho: «Otesitʼa toj nemhit iwomcha. Tamchay honhat hop toj am lenʼokwiyej Baʼal. Hutwek wichi wet Baʼal laka profetas toj ihoʼpe chenaj Carmelo. Wet nawʼenla atsi elh toj yome mʼak toj matche».

Hop wichi lhaihutwekhen toj iʼpe chenaj wet Elías tahuyej lhamel wet yok: «Is che amel letshupiye. Che Heowa hope Dios toj matche, hanlhi lham. Mat che Baʼal hope dios toj matche hanlhi lham. Nawohiyela toja: is che 450 Baʼal laka profetas iwaklhat lewʼayhat wet tʼanchʼoye laka dios. Olham hate owohiyela tajtso wet otʼanlachʼoye Heowa. Wet dios che nichulho hope Dios toj matche». Wet wichi tachumla mʼak toj Elías ifwenho.

Toj malhyejtso, Baʼal laka profetas iwaklhat lewʼayhat. Lhamel imalhewek ifwala toj tʼanchʼoye laka dios: «¡Baʼal, chul nʼohohen!». Toj Baʼal nichulhihotʼa lhamel Elías ilakwlhi lham wet yok: «Am aytaji amel apak. Nʼalej toj kamaj ima wet is che iche elh toj inomatlhi». Pajtha honatsi toj Baʼal laka profetas tʼanchʼoye lham, mat ihichetʼa elh che nichulho.

Elías itiʼpe lewʼayhat hop altar wet itshaye wujpe inat. Wet iwo tʼalhyaja: «Heowa is che wichi ihanej toj am ahope Dios toj matche». Yofwajkwet toj Heowa ichen itaj toj talh peleye hopkhilak iwun nʼowʼayhat. Wichi tʼan toj yok: «¡Heowa hope Dios toj matche!». Athana Elías yok: «Isitʼak yamhen Baʼal laka profetas». Ifwalatso, nʼolanhen 450 Baʼal laka profetas.

Toj paj, iche pelefwaj toj ikapha wet Elías ifwenho Acab: «Namla pelhay. Waklhat aka kaletaj wet aple hawʼet». Nechʼe iche pele toj chalaj, ihwok toj aytaji wet iwo tesa toj iwomcha. Nechʼe noj toj tamchay honhat. Acab yam ilafwel toj yik toj iʼpe laka kaletaj. Heowa tachʼote Elías hopkhilak lhayʼe lhip toj ilafwel toj inu alhoho inuʼpe kaletaj. Mat, ¿ha tafwaytshi nilhokej Elías lewitʼayhyajay? Natetshanla.