Heowa ikhajyen hop Elías

Jezabel ihanej pʼante mʼak toj iyej Baʼal laka profetas wet matche toj lewak ihi. Toj malhyejtso ichene nʼosilotwo hop Elías toj yok: «Che fwala leyʼinhila malhyej iwoye Baʼal laka profetas». Elías wuj toj nowaye mʼak toj ilate wet yik toj tiyaje desierto. Toj ihi lhiptso iwo tʼalhyajaye Heowa: «Naya tʼat mʼak toj inʼoyej, so nʼoyej owʼatshancheyaj». Elías wuj toj yʼel wet ima toj ihochufwi halʼo.

Mat iche ángel toj inomatlhi Elías wet ichumyenlhi lhomtes toj akajchehen wet yok: «Nepha, tuj mʼak». Elías hiwʼen pan toj iʼpe tuntey toj chayohen wet nʼolhathi toj inat ihi. Tʼek, iyayej inat wet yachajo toj ima. Ángel yachajo toj inomatlhi Elías wet yok: «Tʼek. Hopkhilak akhajay tojchehla hanʼayij». Toj malhyejtso Elías tʼek wet yʼisej lhip mʼak toj tuj. Toj paj yik 40 ifwalas wet 40 honatsi paj toj ichate chenaj Horeb. Toj ihi lhiptso tiyajchufwi cueva wet ima. Heowa tahuyej lham wet yok: «¿Atsi mʼak toj lewoye toj lhe kana, Elías?». Elías yok: «Hop israelitas yamhitʼa matche laka promesa toj ifwel amho. Wet inachu aka altares wet ilanhen aka profetas. Wet athana tʼuhlak ilannʼo».

Heowa ifwenho Elías: «Nupha kasit toj lheʼpe chenaj». Nechʼe iche ihwok toj wuj toj aytaji, honhat wʼahu wet toj paj itaj. Toj lepes, Elías ilate nʼopak toj niʼaytajahi wet isajya. Toj malhyejtso hipʼoʼpe letepe toj ichumyenlhi lewuy wet ikasit toj iʼpe chenaj. Heowa yʼatshane atsi mʼak toj tamenej toj yik. Wet Elías yok: «Tsʼilak olham toj omalhehi». Mat Heowa yok: «Atsʼilakhitʼa. Kamaj iche 7.000 wichi toj imalhehi Israel toj nʼokwi nʼoyej. Hoye wet fwenho Eliseo toj lham hope elh toj otshupiye hopkhilak hope profeta che tafwaytshi am». Elías yofwajkwet toj iwoye mʼak toj Heowa tʼalhe. ¿Ha lefwetaj toj Heowa hate tachʼotla ame che lechʼahuye? Matche tʼat. Athana natetshanla atsi mʼak toj iche toj kamaj honhat tamchay.