Atsinha toj tesa lhos yachajo toj ilay

Lewhay toj honhat tamchay, Heowa ifwenho Elías: «Hoye Sarepta. Che lechate lhiptso lewʼenla atsinha tesa toj hiwʼenla amho ak». Toj ihi lepe lhiptso, Elías hiwʼene atsinha tesa toj pʼelitsaj toj ihutwek leña wet tʼalhe che hiwʼenho inat lhip. Toj lham yik toj tʼukwe inat, Elías yok: «Por favor, olhaipʼaltsen ame iwoyek lechaj nʼoye aka pan lhip». Mat atsinha nichulho toj yok: «Owʼenhitʼa pan, iwohiyetʼak owʼen amho mʼak. Tajlhamet owʼen harina wet aceite toj oyenlhila olhos lhak wet olham olhak, wet tajlhamet». Elías yok: «Heowa yome toj che am lhenlhi nʼoho pan toj lhamsaj, lewʼenla harina wet aceite pajtha noj toj honhat tamchay».

Toj malhyejtso atsinha toj tesa yaple lewʼet yenlhi pan wet hiwʼenho Heowa laka profeta. Hop atsinha wet lhos hiwʼen lhak nilhokej lewhay toj honhat tamchay malhyej toj Heowa ifwenho. Laka harina lehi wet aceite lehi ihichetʼa lewhay che noj.

Toj paj iche mʼak toj matche toj aytaj. Atsinha lhos tʼinhayaj ihi wet yʼil, wet lham lhaipʼaltsene Elías che tachʼote. Toj malhyejtso Elías tachumla hanʼafwaj. Ichaje lhip toj ikapha toj ihi lewʼettso. Toj paj, itiʼpe nʼomawʼet wet iwo tʼalhyaja: «Heowa, por favor, achaje hanʼafwajna lewʼatshancheyaj». ¿Ha lehanej mʼak toj tamenej toj iwoyek nʼoseltej toj Heowa iwoye tajtso? Hop toj lewhaytso kamaj ihichetʼa nʼoelh che yachajo toj ilay. Wet hate atsinha tesa wet lhos hopkhitʼa israelitas.

Hanʼafwaj yachajo toj iwo leyalha wet ilay. Elías ifwenho atsinha wet yok: «¡Yahin! As ilay». Lham matche toj lekajyaj ihi wet ifwenho Elías: «Athana ohanej toj ahope hinʼu toj talhe Dios. Mʼak toj yome talhe tʼat Heowa wet yam matche».