Niyat tsinha tachumla lewitʼay

Toj ihi pʼante laka palacio toj ihi Jezreel, niyat Acab iyahinchepej laka ventana wet hiwʼene hinʼu toj lhey Nabot laka uvas lhiley. Acab tʼupʼantehlak ichaj honhattso. Mat Nabot tʼuhitʼahlak iwom hop toj Heowa laka Ley yome toj isitʼa che nʼowom lechatilis laka honhat. Nabot iwoye pʼante mʼak toj is alhoho. ¿Ha lefwetaj toj Acab yenhitʼa wʼet mʼayeka mʼak toj Nabot tatshupiye? Kha. Acab matche toj lewak ihi wet iwathitʼahlak inupha toj talhchufwi lewʼet wet tufwitʼa mʼak.

Acab lechʼefwa hope pʼante elh toj matche toj fwitsaj, niyat tsinha Jezabel. Lham yok: «Am ahope niyat toj ihi Israel iwoyek lewoye mʼak at che lehuminche. Olham owʼenla amho honhattso». Toj malhyejtso, ilesayen cartas toj ithate ancianos toj ihi ciudadtso. Toj ihi cartastso lham yome toj Nabot isitayen Dios wet is che nʼothatejlhi tuntey lham wet nʼolan. Ancianos iwoye pʼante nilhokej mʼak toj Jezabel tʼalhe. Toj paj, lham ifwenho Acab toja: «Nabot pajche yʼil. Iwoyek lhen awuka laka uvas lhiley».

Nabot tsʼilakhitʼa toj hope elh toj naj letesa toj Jezabel ilan, atsinhatso hate ilan wujpe wichi toj ihumin Heowa. Hate nʼokwiyej dioses toj kamatachehen wet iwoye tʼat mʼayhay toj niʼisa. Heowa hiwʼen tʼat nilhokej mʼayhaytso. ¿Atsi mʼak toj Heowa iwohiyeja Jezabel?

Toj tafwaytshi toj Acab yʼil, lhos Joram iwo tesa leniyatyaj. Toj malhyejtso Heowa ichen hinʼu toj lhey Jehú hopkhilak itiyej lewitʼayhyaj Jezabel wet lewʼet lheley.

Jehú ihi lakaletaj toj ihoye Jezreel, lhip toj Jezabel ihi. Joram hate yik toj ihi lakaletaj hopkhilak ichutla Jehú. Toj hiwʼen Joram yʼatshane: «¿Ha nais lhamehen?». Jehú nichulho: «Kha, hop toj ako, Jezabel, kamaj tujlhache tʼat toj iwoye mʼak toj niʼisa». Toj malhyejtso Joram lhaitilhkat toj ihi lakaletaj, mat Jehú tiyajej flecha wet ilan.

Toj paj, Jehú ihoye Jezabel laka palacio. Toj Jezabel ihanchʼoye tajtso, lhaipaklhi, hate yenlhi lewʼoley wet ihi tʼat ventana toj inihihla hop lham. Toj Jehú nichate, Jezabel isitʼa lhomtes toj nichulho hop lham. Jehú tʼanpe Jezabel lakawos: «¡Tat honhate!». Wet lhamel ihutche Jezabel toj talhche ventana wet toj ichate honhat yʼil.

Toj tafwaytshi tajtso, Jehú ilan 70 Acab leles wet itiyej kanhi nʼonʼokhayaj toj nʼotiyej Baʼal. ¿Ha lewʼen? Heowa ihanej nilhokej mʼayhay wet lham itiyej letes toj tʼuhawetej iyhaj toj iwoye mʼak toj niʼisa.