Mʼak pʼante pajche ifwel namhu

Heowa nemhi iwaynej wichi toj fwitses yikhonchi toj honhat toj wʼatshan wet isilataj. Dios kalayʼis hopkhila tajlhamet lhamil ihi honhat. ¿Atsi toj ihiyeja wichi toj fwitses? Yomtilak lahanej, natetshan mʼak pʼante Noé ihi. Lham pajche pʼante iche. Hope pʼante hinʼu toj is, iwuye mʼak toj tolhe Dios tiyajʼattsi. Mat iñhoj wichi toj iʼpe honhat pʼante iwuye mʼak toj niʼisa. Toj molhyejtsu, Heowa ifwenhu Noé ichenla pelhay toj wuj yomtilak yikhonchi wichi fwitses toj ihi pʼante honhat. Dios hote ifwenhu Noé yenhilhila lehi yomtilak che lham lhoyʼa lukwey tafwayen (Génesis 6:9-18).

Noé lhoyʼa lewʼet lheley yenlhi lehi. Noé ifwenhu nilhokej wichi toj ihichela pelhay toj wuj, mat wichi tachʼahuhiyeʼa wet kamaj iwuye mʼak toj niʼisa. Noé nuj lachemet toj yenlhi lehi wet ytatu tsotoy, lapes lham lhoyʼa lechefwa, lhoyʼa leles wet lhamil lechefwas. Toj molhyejtsu, Heowa ichene wuj iwumcho lhoyʼa inwokw, “cuarenta ifwalas [wet] cuarenta honatsis”. Inot hipʼoʼpe honhat (Génesis 7:7-12).

Wichi toj fwitses yʼinhen pʼante, mat Noé lhoyʼa lechefwa, lhoyʼa leles wet lhamil lechefwas tafwayen. Heowa ifwaythen pelhay toj wuj wet ihoney honhat nemhiche mʼak toj niʼisa (Génesis 7:22, 23). Dios lhomtes yome toj nomla lawhoy toj Heowa yikonchila nilhokej wichi toj niwuyaye mʼak toj Dios yahemen. Wichi toj isen nemhi iche che yikonchi. Lhamil ihila yomtilak tiyajʼattsi toj iʼpe honhat toj wʼatshan wet isilataj (2 Pedro 2:5, 6, 9).

Ifwalasna, wujpe wichi iwuye mʼak toj niʼisa. Heowa ichen wichi toj yen lhometa Lham ifwalapej yomtilak ifwenhu nilhokej wichi, mat iñhojfwas lhamil toj tachʼahuye Heowa lhomtes. Yahemenitʼe Dios ifwenhu mʼak toj niʼisa wet mʼak toj is, yahemenitʼe lhaynechaynhi lewʼatshancheyaj. ¿Atsi toj ihiyeja lhamil? ¿Lhaywolaʼelha ifwala che hope? Wujpe toj lhamil ihichetʼe lhaywolaʼelha. Yomʼalhuhu ifwala toj yikonchila wichi toj fwitses yomtilak tiyajʼattsi (Salmo 92:7).

Honhatna nemhi iche che yikonchi, hopkhila honhat toj nechʼayek. Wichi toj Dios lhoyfwasa ihila yomtilak tiyajʼattsi toj iʼpe honhat akojpo, wʼatshan wet isilataj (Salmo 37:29).